رواية شمس الأقدار الفصل الثلاثون 30 دودو
رواية شمس الأقدار الجزء الفصل الثلاثون
رواية شمس الأقدار البارت الفصل الثلاثون
رواية شمس الأقدار الحلقة الفصل الثلاثون
( في البداية كان رحيل شخص أحبّه عني بمثابة كارثة
ثم تدريجيًا ومع إدراكي التام أن لا أحد يبقي نضجت والآن بعد أن تعلمت وتألمت أصبحت أُساعد من يُريد الرحيل بنفسي )
شيراز بصوت واطي: وكلموني وقالو بيديرو مفاجاة لشمس بما انه يوم الاحد اسبوعها .. فـ شن رايكم ؟
شهرزاد اطبطب ع عمر بيرقد: ماعنديش مشكلة عندنا وقت نجهزو فيه العشي والحلو
خلود ابتسمت: وخيتي محلاهم خالاتك
شيراز ابتسمت: اي الحمد لله هذا ماطلعنا بيه من الدنيا .. الخالة أم بالله
شهرزاد: باهي قولك شن نديرو العشي ؟
خلود تقترح: نديرو شعيرية بالمكسرات شن رايكم ؟
شيراز: اي والحلو خلوه عليا بندير تورتة
شهرزاد: خلاص امالا حافظو ع السر تو انا نقول لماما وتقترح عليا اضافات تانية
وتم كل شي بالاتفاق المسبق ..
شمس تتوجع من أثر الولادة ..
شيراز بكل حزم: شمس عادي تغسلي الاماعيين ؟
استغربت الطلب بس لبت دون اعتراض: اي عادي هاتي
وقفت بتثاقل وبدت تغسل في شوية اماعيين ع الحوض .. والتجهيز كان كله في حوش خوها بدر .. بدون ماتشعر .. شهرزاد ابتسمت لاختها لقتها ترقد في زين بحُب ..
شهرزاد ع حافة السرير: شموسة شن رايك تبدلي وتساوي شعيراتك ؟
شمس باستغراب: مدايرين حاجة ومدرقينها عليا ؟
شهرزاد ضحكت: لا لكن اليوم اسبوع زيوني وقلنا خللي نبدلو ونطرحو كلنا عدا الله لمة .. وبعدين نبو نصورو ونزلو خللي يشوفو الناس مش كان اطلقت معناها خلاص تموت في الحياة ؟
تنهدت شمس: هكي قولك ؟
شهرزاد: اي امتى نقول في الغلط انا ؟
ابتسمت: تم خللي نشوف شن نلبس ؟
شهرزاد ابتسمت وقربت الكيسة: اطمني بابا خدالك قفيطين يهبل .. شوفيه !
انعجبت هلبا شمس بيه وشهقت بفرح: ربي يحفظكم ليا ومايحرمني منكم
شهرزاد: هيا خلود تراجي فينا
استغربت: علاش تراجي ؟
شهرزاد: مش قلتلك بنديرو لمة وجو اقترحت خلود تكون اللمة عندها
تنهدت شمس براحة: والله انها بنت اصول
شهرزاد ابتسمت: كيف عاد حتى مرت الغالي والحنين
لبست شمس وبدلت .. وسرحت بنفسها ع المرآية ..
( ياقهرتك ياقصي .. والله طالعة احلا بمليون مرة من كنت عندك ! .. خسارتك وخلاص )
عدلت من نفسها وحطت رتوش وطلعت دبة دبة لحوش خوها بدر ..
وهنا كانت المفاجاءة .. !
كانت كل العيلة حاضرة بنات خالتها وبنات خالها واميمتها الحنونة .. حضنتهم بفرح وكلها ايجابية ع انه الجاي احلا باذن الله ..
يدردشو ويهدرزو وخداهم الوقت وكانو في قمة الانسجام والراحة .. وبعد غياب الضحكة رجعتلك ياشمس ..
سعيدة وسطهم وكانت في نفسها هذا مكاني وهادم ناسي .. وهدوكم حسيبهم ربي ..
ودعتهم كلهم وهي فرحانة وتردد
( ربي يفرحك زي مافرحتوني صحيتو .. ربي مايحرمني من طلتكم الباهية .. الله يبارك فيكم ويهنيكم .. اقسم بالله بجد فرحتوني وضحكت اليوم من قلبي )
تلفتت حضنت امها: صحيتي ماما وشكرا هلبا ع كل شي درتوه ع خاطري
حنان ابتسمت: هادو عمايل خلود وشهرزاد وشيراز اشكريهم هما
تلفتت لشهرزاد وقالت: وخيتي صحيتي وربي مايحرمني منك
شهرزاد حضنتها بشوق: وخيتي تستاهلي كل خير
شيراز: خلولي حصة
شمس ابتسمت وفتحت ذراعها: تعالي هي
حضنتها .. وأسرت دعوة لكل عيلتها .. وخلود بزايد تعرفو ليش ؟
لان بنات الاصول نقصوا .. ونقصو من يفكرو في حماواتهم زي خواتهم .. وتعامل عزوزتها زي امها .. نقصو ونقصو هلبااا .. وربي يبارك في كل كنة زي خلود ويرزقها كل خير زي مافرحت شمس وكانت تواسي فيها وفي كل لحظة ضيق معاها .. !
وبعد يومين تحديداً .. رجعت لمشروعها وحياتها الدراسية المعتادة ..
الدكتور بنظارته الطبية مركز وكل تفكيره في العرض يللي مجهزاته شمس تجهيز مسبق .. بتمعن واضح ..
الدكتور: تمام يابنتي .. ركزي شويا ع السلايد هذا وعدلي فيه تمام !
شمس بامتنان: تمام دكتور في حاجة تانية حاب توضحهالي ؟
الدكتور: لا يابنتي ربي يوفقك .. ولما في العرض تكلمي بالشويا عليك ماتستعجليش لان كل بالدرجات ره
تنهدت: باذن الله
الدكتور حوّل نظارته: موفقة .. كيف حال وليدك وزوجك ؟
تلاشت ابتسامة شمس .. واطت راسها بألم وحسرة .. عدلت من نقابها وايديها يرجفو والارتباك غطى ملامحها .. وشلّ حركة لسانها ..
شمس: عندي زوز ولاد توا والحمد لله تو تشوفهم في المناقشة باذن الله .. ( رفعت عيونها بصعوبة ) اما زوجي فـ .. انا اطلقت دكتور
انصدم الدكتور وتوسعو عيونه: كيف صار ؟ .. والله جي معاك مرتين والا تلاتة ولاه وباين عليه وليد كويس ( تنهد وحط ايديه ع المكتب ) اسفة للتدخل ( ابتسم ورفع عيونه ) يلا ربي يعوضك خير وربي يباركلك في وليداتك وتلقيهم باذن الله
ابتسمت شمس بقوة: اي باذن الله .. بارك الله فيك
كبريائها .. وابتسامتها القوية تلاشت بمجرد ماتخطت عتبة الباب ..
طول الممر شارقة ببكيتها .. وبين ممرات الكلية تحاول تستنشق الاكسجين مش لاقياته .. وين الهواء ؟ وين قوة رئتيها في سحب الاكسجين ؟ وين نبضات قلبها المتزنة ؟
رفعت عيونها وقابلها المكان يللي اول مرة تشوف فيه قصي .. كان زميل الدراسة ..
عصرت قلبها بقبضة ايدها .. وبدت تبكي والنقاب تبلل .. والدهشة زادت .. وضيق التنفس يللي صارللها كان ممكن يوذيها للموت المحتم .. وقفت ورفعت تليفونها وترعش مع بعضها ..
وأول صوت يداوي جراحها .. واول لمن تشكي وتحكي بدون كنترول .. بدون حواجز وقيود ..
: شهرزاد !
وبدت تبكي مجرد ذكرها للاسم ..
شهرزاد بخوف: اسم الله عليك شمس خيرك شن في ؟
شمس تبكي .. وتبكي .. الوجه احتمرّ .. والقلب مش قادر يتحمل اكبر من هكي طاقة ..
شهرزاد: فهميني وخيتي خيرك تبكي بالله عليك ؟
شمس: كل مانبي ننساه يذكروني فيه ياشهرزاد
قصي: كل مانبي ننساها يذكروني بيها ياخالتي
سماح نظرة ألم ع وليد اختها: تربح ياوليدي اهدا
قصي يحاول يتماسك اكتر الدموع الراجل ضعف كما متعارف .. مسح ع وجهه: نبي ننساها علاش شن طلبت انا ؟
شمس: بالله عليك قوليلي علاش صعب ؟ علاش ؟
شهرزاد تبكي مع اختها: اهدي بالله عليك احكيلي شن صاير ؟
سماح: قصي .. ( حطت ايديها ع خدوده ) ولدي احكيلي شن صاير بس ؟
قصي تنهد بوجع: طلعت توا مع الولاد عارفين انه عندي ولد كبير شويا فسألوني عليه .. وبعدين قالولي مش تزوجتها اللي تبيها ولاه !
شمس: كنت عند الدكتور وسألني ع ولدي وبعدين سألني عليه .. الله لا تربحك ياكوثر ماعاد خلا فيا حيل نرد ياشهرزاد
قصي: قلبي ياخالتي لما فكرني فيها اقسم بالله ماعاد خلاني نوقف ع رجليا .. ركبت السيارة طول ومش قادر نواجه حد ونقوله ريتو البنت اللي حاربتهم كلهم باش خديتها .. بايدي رفعتها لاماليها وطلقتها
شمس: الراجل اللي كنت نشوف فيه اقصى احلامي وكل امالي انا اللي طلبت الطلاق منه .. انا اللي هربت منه ومن عيشتهم اللي تقرف
قصي: قاعد كل يوم نطلع ونبي نعيش حياتي وكل يوم نفشل ياخالتي
سماح تنهدت: ردها ياقصي ولا توجع قلبك
تلاشت نظرة الخسران من عيونه .. وولدت نظرة الحقد من جديد: مستحيل
شهرزاد تنهدت بألم: باهي ياوخيتي حوليه من الحظر بالك يتصل بيك ويعتذر وتفهمي السبب بالك حق ربي صلح حاله ويرجعلك ؟
تحولت نظرة الشفقة والالم وع طول لنظرة الحدة والكبرياء: مستحيل
وبين المستحيل والمستحيل .. قاعدة قلوب تتوجع .. قلوب تزرع الألم وتحصد ألم اكبر .. قلوب تنزف كل ليلة وليلة ع الفراق ..
والعناد ولّد كبرياء تمثيلي .. ولّد طلاق .. الله المستعان ..
وفي يوم المناقشة .. لا مكان للضيق اليوم ولا مكان للألم الكاسر .. بدلت ولبسته عبايتها وطقمت مع ولادها ع اللون البيج .. وتنهدت وتجهزت وابتسمت للخير القادم .. اكيد
وقفت قدام كم من الدكاترة والحضور .. بثقة لا تزعزعها همس بين الحضور .. وألقت .. ونالت استحسان الحاضرين وصفقولها بحرارة بعد ..
( انا حابة نشكر الله بفضله انا واقفة قدامكم وهنا .. ونشكر كل اعضاء هيئة التدريس ودكتوري المشرف الفاضل .. ونشكر نفسي ع الانجاز بعد طول انتظار .. نشكر ماما وبابا ع سعيهم معاي ووقفتهم هما وكل عيلتي وربي قدرني نردلهم جمايلهم يارب العالمين )
طلعت وحضنت كل صديقاتها بحب ولهفة وشوق ..
شمس: بعدتنا كورونا ع بعضنا والحمد لله اليوم تلاقينا ع خير
صديقتها ( دنيا ): الف مبارك وربي يوفقك
صديقتها رحاب: حبيبتي انتي ربي يهنيك ويسعدك يارب ديما ديما
صديقتها القريبة واسمها ( سارة ): آهو الحمد لله بدي الخير يهل عليك والحمد لله ربي عوضه جميل
ابتسمت شمس وحضنتها: اي الحمد لله
تنهدت دنيا: صحة ليك ياشمس والله خديتي قرار صعب هلبا وكنتي قده
شمس تنهدت: خلينا توا فرحانين فكيني من سريبه
ضحكت دنيا: وانتي قلتيها
تتمشى بين ممرات الكلية وماسكة بايدها طفلها يزن ع أمل يكون زيها او احسن منها في المستقبل باذن الله .. وفي ايدها الثانية باقة ورد صغيرة ..
وفي نفسها ..
( بديتي ياشمس في الانجاز والحمد لله .. بديتي تكبري في عين نفسك اكتر واكتر .. والله انك قوية وانتي قدها فعلاً .. اليوم انتي خديتي شهادة بكالوريوس بمجهودك الذاتي وكنتي قدها .. ح تكوني قدها اكيد وتنسي قصي وكل شي متعلق بيه )
غمرت ولدها بحنان والثاني راقد في سريره .. ورقدت .. واول ليلة كانت خريجة فيها .. وهم الدراسة خلاص انزاح ..
وهذا ثاني هم ينزاح عن شمس ..
مخنوقة ومضايقة .. السبب ….
( تبكي وتجري ورا قصي بجهدها الكبير .. وتتوسل له
: قصي ردلي ولدي تربح بالله عليك نبي ولدي
قصي شاد في ايده يزن: عندك الثاني سادك
: لالا قصي نبيهم الزوز .. قصي خود كل شي الا ولادي .. خليلي ولادي ياقصي )
فاقت من نومها مفزوعة .. تلفتت واطمنت ع ولادها وقعدت تبكي ..
( نبي نفرح بس نبي نتهنى بفرحتي من غير ماتجيني في نومي ياقصي .. كابوس انت اقسم بالله )
حنان مقعمزة مع شيراز وشمس في جلسة قهوة ..
حنان: كلموني اليوم الناس وقالو غدوا بيجو بيتعرفو وبيخطبو ع حسب مافهمت
شيراز بخجل: بالشويا خيرهم مستعجلين
ضحكت شمس: شوفي وجهها شوفي
شيراز وقفت: خللي نجيبلكم قرينات شمس تحبيهم ولاه !
شمس ضحكت: لالا خودي يزون لعبيه واهربي حق
رفعت يزن وطلعت من الدار: ناخدو امالا ماناخذوش وتسأل فيا .. ناخدو وناخدو وعشرة ناخدو .. غزالي يزوني
ضحكت شمس: وبيديرو نظرة شرعية ولاه !
تنهدت حنان: اي خللي توا يجو اماليه قبل وبعدين ساهل
شمس: سألو عليه الوليد قبل ؟ اسألو ياماما حتى ع الحوش الواحد يشعف
ضحكت حنان: سألنا وان شا الله اللي فيه الخيرة ربي يجيبه
خلود في الليل جهزت عوالة فطيرة .. ونادت ع حماواتها اضافة الي شهرزاد مايديرو شي من غيرها ..
حمودي حضن يزن: تعرفي ياخويلة نحبه نحس فيه خوي
ضحكت شمس: حتى هوا يحبك
خلود حطت ع الطاوة: بيهبلوني عليه
شمس: خليهم يجو يلعبو معاه
خلود حطت الطرف في الكيسة: لا وين مرآ نافس ويجو يداعكو فوق راسك
شمس تنهدت: فكرتيني في ايامي هدوكم
خلود ابتسمت: اعوذ بالله .. غير اسمعي ذوقيلي الفطيرة بالله
شمس خدت طرف وكلت منه: زي العسل الله يبارك ع ايدياتك .. ( تنهدت بوجع ) تصدقي يالودي ولدك متنبئ بطلاقي قبل سنة
استغربت خلود ورفعت ايديها: كيف ؟
شمس: قاللي خويلة امتى تجي تقعدي عندنا ديما
خلود تنهدت: الصغار سبحان الله ع قد ماتفهميهم يسكتو شي مايسكتوش
شمس ابتسمت: لا عادي .. يقولو فيها فالكم عند صغاركم وتحسابيني مضايقة لا بالعكس هذا خيرتي والحمد لله
خلود ابتسمت: ربي يعوضك خير منه صدقيني ح تقابلي انسان تقولي شن كنت نحس لما درت للذبان كراسي اقسم بالله
تنهدت شمس ورفعت عيونها للقمر: زعمك نلقى خير منه !
خلود ضحكت: خودي مني وادعي ربي يعوضك خير منه
شمس ابتسمت بهزوة ع الامر: تصدقي مش مفكرة حاليا نتزوج كرهت عمهم الرجالة .. توا نفكر في ولادي وبس
حطت طرف فطيرة في الكيسة: يابتي توا قاعدة في عمق الالم غير تنزاح هالغمة وتشوفي الحياة بامبي .. اصبري ع رزقك
ع وقفة شهرزاد: شن تخططو من وراي !
خلود ضحكت: شمس تدعي وتسحسح ع الرجالة يللي من ضمنهم راجلك وراجلي
شهرزاد ضحكت: يستاهلو والا لا !
خلود ضحكت: لا يستاهلو .. مايقدروش
شهرزاد حطت ايديها ع كتف شمس بحب: والله انك درتي اللي ماقدرت وحدة فينا اديره
شمس طبطبت ع يد اختها: اللطف ياربي .. انتي وزياد ولودي وبدر احلا اثنين الله يبارك عليهم عصافير ياقنينكم وربي يهنيكم .. انتم شوفو غير شيراز مازال حتى ماخطبو كيف مرتبكة ووجهها يتورّد لما نهدرزو في الموضوع
ضحكت شهرزاد: وغدوا نشوفوك انتي عروسة مع اللي يستاهله قلبك حبيبتي
شمس تنهدت: نقولو باهي وخلاص
لقراءة الفصل التالي : اضغط هنا
لقراءة الرواية كاملة اضغط على : (رواية شمس الأقدار)
