رواية شمس الأقدار الفصل الثاني عشر 12 بقلم دودو
رواية شمس الأقدار الجزء الثاني عشر
رواية شمس الأقدار البارت الثاني عشر
رواية شمس الأقدار الحلقة الثانية عشر
( أحبه لدرجة أغفر له الأشياء التي لا تغتفر )
قصي روّح بكري ع غير العادة .. استغربت امه جاته تستفسر .. !
كوثر: خيرك اسم لله مروّح بكري اليوم ؟
قصي يحوّل في سبيدروه: شمس مريضة قلت نقعد معاها
كوثر: مافيها شي ركبتلها واطمنت عليها
قصي حط السبيدرو ع جنب وركب: كويس
صفقت ايديها امه بيأس: متلف عقله الولد خلاص عليه !
فتح عليها دار النوم لقاها راقدة وتأن .. رجع غسل ايديه بسرعة وبدل حوايجه وبخ الكحول كعادتها لما تستقبله اول مايروح ..
قعمز ع حافة السرير وتنهد : شمس راقدة !
فتحت عيونها بصعوبة اول ماسمعت صوته عدلت تقعميزتها: لالا .. انت روحت!
جي قرّب منها وغطاها باليرغان: ارتاحي ارقدي علاش نايضة غير بنطمن عليك بس !
مسحت ع وجهها: مانعرفش خيرني صداع واللوزتين نايضات عليا ؟
ابتسم: ماهو امس لبستي خفيف ياغبية .. الجو سخن شويا تحسابي الصيف ولّى
ابتسمت: اي صح ( فنصت فيه ) معاش تقول غبية ؟
تنهد وضحك: خلاص خللي نعصرلك ليم ونجيبهولك
شدت ايده لما بينوض: لالا قعمز بحداي بس
طبطب ع ايدها: مش معطل عليك والله
ابتسمت وتنهدت ..
قعمز جنبها وشربها الليمونادا بعد كملت اتكت ع رجله وقعد يمسح ع شعره بلطف .. لعند خداها النوم واتكى بحداها ..
سمعت اذان الظهر فاقت .. لقاته قاعد جنبها ..
فرحت هلبا وأسرت دعوة
( ربي مايحرمني منه )
نوضاته: قصي .. نوض الظهر اذن !
فاق بيها ومسح ع وجهه: نضتي ؟ شن حالك توا ؟
تنهدت: احسن ان شا الله
حوّل اليرغان: نمشي نجيبلك بنادول ونقوللهم راهي حامل ولاه !
شمس حركت راسها ايجاباً: اي
قصي: ماشي مانعطلش عليك بنصلي ونجيبه هي
طلع قصي .. حوّلت اليرغان ووقفت بتثاقل ومشت بخطى بطيئة للحمام بتتوضى للصلاة ..
تلقتها عزوزتها انخلعت عيطت: خلعتيني اللآي ؟
ضحكت كوثر: عاد نحسابك راقدة قلت مانبيش نضايقها !
شمس شدت كتف الباب: لا كان قصي هنا كيف طلع
كوثر: شفته المختش .. قلتله مافيها شي سيب خدمته وجي يجري زي المهبول
شمس تنهدت: علاش مابيتش نقوله اني مريضة
كوثر بامتعاض: انا قلتله لانه سألني عليك شورك مارديتيش عليه والا ماتبيش تردي !
شمس ضحكت: لا مش مانبيش نرد .. كنت في الحمام وبعدين كلمته لقيته عارف اني مريضة
كوثر فتحت باب دار النوم: هويها الدار تو يتحسن حالك ره
شدتلها ايدها شمس: لا تربحي راني صقعانة خللي نتحسن شويا تو نهويها
كوثر لوت فمها: امورك ياحنة .. خللي ننزل نجيبلك غداك
شمس ابتسمت: لا صحيتي علاش متعبة روحك تو ناكل اي شي
كوثر: لوليدي الغدي
تلاشت ابتسامتها شمس وتنهدت: اه باه
نزلت كوثر وبعتت رجوى تركبلها الغدي ..
بعد كملت صلاتها لقت رجوى واقفة عليها .. خدت منها الصونية ..
شمس ابتسمت: صحيتي سلم ايديك
رجوى: صحتين ( مدتلها طاسة امية ) هادي طاسة امية كويسة للبردة
استغربت شمس: شن فيها !
رجوى: ملح وسكر بس امي قالتلك اشربيها كويسة
شمس: بارك الله فيكم صحيتو
رجوى: سلمك
ونزلت تجري .. خدت شمس الطاسة شربت منها شويا وحطتها ع الطاولة ..
روّح قصي بالدواء وقعد سايرها اليوم كله وماحبش يطلع ويخليها بروحها تعبانة ..
بعد فترة نزلت عشية شمس لقت عزوزتها تغسل في البساط ..
شمس: السلام عليكم كيف حالك توا !
كوثر وقفت وشادة عصاة المكنسة وداهشة: باهية وانتي شن امورك توا ؟
شمس: الحمد لله تمام ( خدت عليها المكنسة ) هاتي عليك نعاونك
كوثر عطتها وقعمزت ع حافة دروج الجنان: والله دهشني عطيه البلي
ضحكت شمس وبدت تحكّ فيه: اي حالة البساطات الواحد كان يحصل غسالة بساطات يرتاح والله
كوثر مسحت ع وجهها: ماتنفعش .. والله ماينفع غير الحكان بالمكنسة الحرشة
شمس ابتسمت ومستمرة في الغسل: بالعكس احني كانت عندنا وحدة والله ماشا الله مريحة هلبا
كوثر زفرت بضيق: ناخذها بهداك السوم وتقعد ملوحة ! الواحد يالله يشري حاجته الاساسية
شمس تنهدت وقفت شويا: اي والله .. انا والله نخمم في غسالة الدبش والله مانعرف نشغلها القديمة اهيا
كوثر: قولي الحمد لله غيرك مش محصلها
شمس استرسلت واستمرت في الغسل: لا الحمد لله ع كل حال .. لكن قلتله وقت باع سيارته خللي ناخدو غسالة قاللي فلوسها تمو ( اضافت ضحكة استغراب ) فاش مشو الفلوس الله اعلم !
كوثر: شن فاش مشو ؟ عطاهم لبوه
شمس وقفت وانصدمت: عطاهم لبوه؟
كوثر: اي ماعندناش مصروف احني فعطاهم لبوه يصرف منهم ماهو ياحنة عمك مخلي مرتبه للديون
شمس باستغراب: اه عندكم ديون ؟
كوثر شربت امية: اي عندنا ماهو شرينا قطعة ارض لانور يبني فيها ويستقل بحياته .. ياحنة بابه بروحه لا من يجيه لا من يضايقه
اخفت شمس تعبير وجهها المستغرب .. والمصدوم ..
استرسلت: من الاول قلت هذا الحوش لقصي بعد نتوكلو وربي ياخد امانته .. نبي نبني دار ومطبخ وحمام لبنيات لما يتلاقو ع الاقل يقعدو في حويشهم مافي من يضايقهم لا مرت خو ولا صغارهم
تنهدت شمس وجابت الطوبو وولعت المية: اي صح
كوثر: وانور يقعد في حويشه لا امك قالت لا امك حطت بروحهم وع راحتهم .. والله انا زمان كانو خانقينّي اماليه تخايلي حتى نجيب بشكطي لصغاري ندس فيه في صاكواتهم مانقدرش نركب بيه يشوفوه حماواتي يديرو العار
مصدومة شمس ومش قادرة تقوللهم انه نفس وضعك انا عايشة حالياً والله .. الفرق انه ولدك ماياكلش عليكم شي الا في حالات خاصة ومانقدرش ندس عليكم شي ..
وبس .. !
شمس: انا ماعنديش غسالة ياشهرزاد ! قريب موتت وين قالتلي صرفناهم ؟
شهرزاد: ع كيفه ياوخيتي هادم اماليه وواجب عليه يعاونهم
شمس: وانا ؟
شهرزاد تنهدت: والله ماني عارفة شن نقولك لكن كلنا هكي تبهدلنا في الاول !
شمس: خيرها خلود ماما مادرتلهاش هكي .. حوشه وين سكناته ماناقصه شي
شهرزاد: اهو حتى انتي هكي وبعدين معاش تقارني روحك بحد
شمس تنهدت: مانقارنش والله لكن وجعتني روحي .. تبهديل من غير غسالة ره اقسم بالله
شهرزاد: ياوخيتي علاش تبهدلي في روحك وتقعدي تسحني وانتي حامل مش باهي ليك .. روّقي وارتاحي وكل شي ينحل ان شا الله
شمس: يارب .. سكري اهو قصي ع الخط
شهرزاد: سلميلي عليه
شمس: باذن الله
سكرت من اختها وردت ع قصي ..
قصي: ايوا شن الجو ؟
شمس: الحمد لله .. مروّح والا مازال ؟
قصي: في الطريق .. من كنتي تكلمي ؟
شمس: شهرزاد تسأل عليا
قصي: اه البروفيسورة .. شن جوها ؟
شمس: باهية الحمد لله
قصي: قريب نوصل تبي حاجة ؟
شمس: سلامتك بس
قصي: خيره جوك هكي ؟
شمس: لالا نحس في راسي دايخ
قصي: خاطرك تطلعي حبيبي ؟
شمس: عادي براحتك
قصي: تمام ناكل حاجة ونطلعو باهي ؟
شمس تنهدت: تمام
اتكت بحداه ع السرير وفي بالها نفس الموضوع ومش عارفة كيف تفتحه .. !
تنهدت وتشجعت: قصي
قصي مغمض عيونه يحاول مع نوم الظهرية: عيونه !
شمس: عادي نحكيلك شن مضايقني ؟
قصي وبنفس الوضعية: اي احكي
شمس عدلت تقعميزتها ولمت شعرها: الحوش قصي .. انا مش مرتاحة اقسم بالله
قصي فتح عيونه وزفر بضيق: هييي علينا نفس الموضوع ديما !
شمس: لاني بجديات نتكلم وماريتش منك اي رد فعل
قصي حط ايده ع راسه: شن تبيني ندير متلا ؟
شمس: نطلعو نأجرو .. عادي والله نخدمو ونعاونو بعض المهم امورنا رايقة وحياتنا مستقلة ومستقرة قصي !
ناض قعمز: انتي شن يعنيلك الاستقرار ؟
شمس: انت
قصي رفع كتافه: وانا معاك
شمس: مش بالكيفية اهيا قصي انا مانحبش ننذل .. عمري كله نعيشه بكرامة والا مانعيشش بكل
قصي عقد حواجبه ووسع عيونه: كيف هادي ؟
شمس: يومها لما رفعتنا لخالتك حكينا في موضوع الحوش .. وخواتك مش متقبلين فكرة الفصل ( رفعت ايديها باستسلام ) وانا متقبلة كلامهم ع فكرة حوشهم ومن حقهم يديرو فيه مايبو .. وانا الضيفة وانا المفروض ندوّر وين نأسس حياتي مع شريك حياتي وصغاري في المستقبل وهذا حوشهم وهما احرار يعني مش تفهم كلامي اني نشحن فيك عليهم لا والله .. انا شايفة معاهم الحق هذا مش حوشنا
فنص فيها وقعمز ع ركابه: كيف هادي ؟ مش حوشنا ؟
تسلل لقلبها الخوف: اي صح كلامي ولاه !
قصي: هما قالولك هذا حوشنا ومش حوشك ؟
شمس تلعثم لسانها وبدت ترعش: لا مش هكي قصدي هدرزنا عادي وجت في الدوة ووضحلي انهم مش راضيين يشينو حوشهم ؟
قصي انفعل: حوشهم صار ؟
شمس خافت: شن كل كلمة تعاود فيها مش فاهم والا شنو بديت تخوّف فيا ره !
قصي نزل من السرير ولبس توب التوتة: تو نوريهم انا شن معناها مش حوشي .. ناقصني غير الفرخات
ناضت تجري شمس وشدت ايده: قصي افهم انا مانتكلمش ع خواتك خيرك قلبت الطاولة عليا وحسستني كأني نشحن فيك عليهم ؟ تي انا نقصد من حقهم وهذا ليهم توا بعدين المهم حقهم
فكلها ايديها: حوّلي من عليا .. انتي تو مش ح تفهمي لين نجيبهملك
شمس بدت تبكي: ياقصي افهمني تربح مش هذا المقصد .. انا نبي نفهمك ان لازم تكون عندنا شوية خصوصية قصي !!
ولا جدوى ياشمس من تبريرك فـ قصي حسم الموضوع بينه وبين نفسه .. دون الرجوع لك
خدي مفاتيحه وطلع طلقة لشقتهم لان امه كانت موجودة غادي .. وطلبت منه قبل ساعة النقاش انه يروّح بيها وخبرها انه بيروّح بيها قبل المغرب بس بعدما احتد النقاش طار ومشالها ..
طول الطريق الام تحاول تفهم غضب ولدها واعصابه التالفة .. ولا جدوى ايضاً
وصل للحوش وركب لغرفته لقاها مقعمزة تبكي ع السرير ومش عارفة هل تصرفها سليم ام فيه نسبة غلط كبيرة لا تحتمل التصحيح ..
قصي: نوضي البسي حوايجك اهو جبت امي
وقفتله: قصي انت شن قاعد تقول وخيرك هكي هبلت انت ؟
قصي: هيا نراجو فيك
وطلع خلاها في حيرة من امرها .. تعصبت وبدت تخبط في راسها ع تصرفها المستعجل وبدون تدبير جيد ..
لبست وطلعت ..
كوثر متفاجئة: تي خيركم ترعشو فيا شن في ؟
قعمز قصي ع طاولة الجلسة: يما هذا حوش منو ؟
قعمزت شمس ع حافة الجلسة ومازالت ملامح الصدمة تغطي وجهها .. تغيّر كلياً مش نفس الشخص يللي كان قبل ساعتين تقريباً
كوثر ببلاهة: حوشك شن في ؟
زفر بضيق: ريتي سمعتي شن قالت ؟
كوثر شافت لشمس: بتفهموني والا كيف ؟
شمس كيف بتتكلم .. قاطعها: علاش امالا تقولولها انه حوشكم ومانبوشي ماينفصل ويشيان وكدا كدا !
كوثر: من قال هالكلام ؟
قصي: يما انا مش قاعد نسأل فيك صار الموضوع او لا !
قاطعاته: والله ماصار منه هالكلام بكل
قصي: قلتلك انا مش قاعد نسأل فيك .. انا نبي نوضح لشمس شي غايب ع بالها وبس
انفعلت شمس: خلاص قصي علاش تكبر في الموضوع ؟
كوثر عقدت حواجبها وفهمت: خليه يتكلم
قصي متعصب بزيادة: انتي وخواتي قلتولها هذا حوشنا ومانبوشي يتلبز تمام ! هدوكم شن دخلهم فيه الحوش ومن اصلا طلب رايهم ؟ حوشي هذا دافع فيه فلوسي وجهدي .. طاقتي كلها حطيتها فيه جايين انتم ببساطة هكي ( رفع ايديه بمعنى الكلام ) هذا حوشنا ! الحوش الفوقي ليا يما وانا حر شن ندير فيه .. لوطة انا ماادخلتش فيكم جيتو وسكنتو وانا قاعد مافصلتش مادورتكمش .. اما بناويتك يلقحو ويبو يطلعوني منه الحوش مايصيرش هالكلام اعطوني حقي وسلامتكم
كوثر تعصبت واضايقت اكتر: ماحد قال هكي واصلا خواتك يحلفو براسك ومايحنتو كيف بيقولو عليك هكي وهما كان يلقوك يشيلوك ع راسهم .. قصي ياولدي شوف من يبي يخرب عليك حياتك مش جاييني لهالمسكينات وتفش فيهم غلك ؟ ( شافت لشمس وعيونها شرار ) جاية تبي تفرقيه ع خواته ؟ بعد لقيتيه يحبهم ومايرضاش فيهم !
شافلها قصي بصدمة: كلامك مش معاها .. كلامك معاي ومش اول مرة ع فكرة تجبدو في سيرة الحوش .. وانا نفوت بمزاجي .. الحوش حوشي تبوني نطلع اعطوني حقي والله ماعاد تشوفو وجهي .. انا مش ناكر جميلكم عليا لكن تقعدو ترعشولي في المرآ وتفتفيت زايد راني مش ناقص
كوثر زفرت بضيق: نوض جيب مانشرب يبستولي ريقي !
قصي شاف الخوف في عيون شمس: لا مانيش نايض .. اللي تبيه تقوليهولها قوليه قدامي
كوثر تعصبت اكتر: نوض وخليني معاها ترا نتفاهم معاها راهو الموضوع مش زي مافهمت واصلا ماصارش بكل ولا حد جبد سيرتها ولا سيرة الحوش مرتك تتخايل
شمس اضايقت واندفعت: اقسم بالله صار يوم مشينا لحوش خالتي سماح في الطريق تناقشتو واللي قلتوه قلتهوله لكن مش بقصد نفتن بينكم لا والله ..
قصي قاطعها: شمس ماعمرها كذبت عليا .. ( أشر بصبعه السبابة ع راسه ) فهمتيني ولاه !
كوثر وعيونه ع شمس بتحرقها: ماتخافش عليها ماعندي مانديرللها بنفهمها بس .. نوض جيب عصير .. ( علت صوتها ) ياودي اطلع وخليني معاها مانيش واكلتها
قصي شافلها بحدة: اسمعي يما قسما بالله لو مازال يتكرر موضوع الحوش لما نهج ونخليهولك .. ( وقف وتلفت لشمس ) وبنرفعها معاي
كوثر تنهدت بتعصب كبير: برا ع حالك
طلع من الدار .. شمس حبست دموعها ومش قادرة تستوعب الموقف يللي حطها فيه قصي ..
كوثر: هكي عاجبك لما تفرقي الولد عن عيلته ؟
شمس ببلاهة: مافرقتش حد انا .. وضحتلك شن قصدي
كوثر تنهدت: الراجل ماينحكالاش شي ره
شمس: حتى اللي مضايقني !
كوثر خبطت ايديها ع بعض: وشن مضايقك ياحنة ؟
شمس والدموع منحصرة في العين: ياالآي انا مانبي شي والله مانبي حاجة غير نرتاح بس في حوشي
كوثر لوت فمها: وشن اللي مش مريحك ؟
تحشمت تتكلم بصراحة: لا شي .. غير انا الوحم وهرمونات الحمل متعبيني .. وكارهة الحوش
كوثر ضغطت ع سنونها: تمشي تقوليله يطلعك من الحوش ؟
شمس: حكيت موضوع عادي وهوا كبره بس
كوثر وقفت: الله يهديك وخلاص .. خليتيه يشوف خواته زي الشطان الرجيم هونا الزوز يتباكو لوطة ويقولو معقولة ليها اربع شهور بس غيراته علينا ؟
شمس توسعو عيونها وضايقها الكلام .. بس سكتت وماحبتش تبرر موقفها .. لان فعلا موقفها ضعيف ..
والسبب قصي .. !
فتح باب الدار بهدوء لقاها مقعمزة ع سريرها تبكي .. سكر الباب بالمفتاح وجي قعمز ع السرير وكيف بيتكلم ..
شافتله شمس وبدت تضرب فيه ع صدره: علاش درت فيا هكي علاش ! ( تتكلم بين شهقات بكاها ) علاش درت هكي ! ياقصي شن قولتك انا ! نهدرزلك اقسم بالله نهدرزلك اللي مضايقني تمشي تحطني في الموقف الزبالة هذا ؟ تحطني في موقف مع امك ترا قوللي شن بينسيها فيه ؟ انا ننسى وانت تنسى هيا مستحيل تنسالي .. وتوا راهي حاطة في بالها اني بنت قليلة اصل ونبي نفرقكم ع بعض
قصي حاول يحضنها ويهديها بس كانت تصد فيه ..
استرسلت: انا طلبت منك حل انا حكيتلك انت لانك نصي الثاني وماخبرتش حد ع اللي مضايقني .. انت شن تحسابني ماعنديش وين نسكن والا مش قادر بابا يصرف علينا ويعيشنا باش تزوجتك ؟ شن تحسابني رخيصة هلبا ع اماليا وعطوني لاول واحد ؟ انا كان نبي الفلوس والحياش راني تزوجت اللي جوني قبلك ..
قصي قاطعها: علاش الدوة البايخة اهيا ؟
شمس: انت خليتني نقولك هكي انت خليتني نوضحلك الرؤية عندك ! .. قصي انا اخترتك انت .. انت اللي نبي نكمل حياتي معاه لا فكرت في فلوس ولا عز .. فكرت كيف نكوّن عيلة معاك بحويشنا مستقلين مستقرين لا في من يذلنا ولا يهينّا !
قصي: من ذلك انتي وهانك ؟ خيرك تدوي هكي ؟
شمس والدموع سيل ع الخد: انا قاعدة كل يوم ننهان وننذل لما يجي يخش ويهد عليا .. انا نضم في حوشي نلقى حد وراي نطلع من الحمام نلقى من مقابلني .. انا كرهته الحوش لاني مش واخدة راحتي معاك مش لانه مش حوشك او لانك مش دافع فيه فلوس ! مايهمنيش ان شا الله نسكن في دار ومطبخ وحمام مايهمنيش .. المهم معاك قصي .. فاهمني ؟
حضنها رغماً عنها: سامحيني بالله عليك تسامحيني .. راني عايش بيك ياشمس ومانبيش نشوف دموعك بالله عليك
في حضنه ومازالت تضرب فيه .. متعصبة منه ومش قادرة تسامحه ..
قصي حاضنها بالقوة ومتمسك بيها: انا حمار ومانعرفش نتصرف .. انا نبي نوضحلك بس حبيبك راجل
شمس: مش هكي .. مش بالطريقة هادي
باعدها عن حضنه وابتسم: خواتي يراجو فيك بيعتذرو منك .. انا والله اللي يضايقك نحرقه حرق
مسحت دموعها: مانبيش نشوف حد .. خلاص قوللهم سامحتهم
ابتسم وتنهد: وانا ؟
حضناته: ياريت نقدر نزعل منك .. زي الكلبة اقسم بالله
ضحك وغمرها: حشاك ياحبي .. الحب يللي بينا صعب هلبا تغلبه الكرامة .. وبعدين انا لو عندي كرامة وحدة كانت تردس فيا وانا حاضنها .. بالله مش زي الكلب انا !
ضحكت وابتسمت ..
قصي شد خدودها بلطف: نبيك ديما فرحانة .. ع خاطري !
شمس حركت راسها ايجاباً ..
قصي: وانا نوعدك .. كل اللي في خاطرك نديره بس اصبري عليا تمام ؟
شمس حضناته وتنهدت براحة: ياريت تعرف اللي في خاطري بس
قصي ضحك: حافظك حفظ انا بس استني عليا
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية شمس الأقدار)
