رواية شمس الأقدار الفصل الثالث عشر 13 بقلم دودو

رواية شمس الأقدار الجزء الثالث عشر

رواية شمس الأقدار البارت الثالث عشر

رواية شمس الأقدار الحلقة الثالثة عشر

( حـارب معـي أخطـائي ولا تحـاربنـي بأخطـائي )

ومن ينـاير الي اواخِـر فبرايـر ..
يصادف اليوم يوم ميلادها .. كانت تنتظره بلهفة وتتخايل شريكها جايب الهدايا والجـاتوه ومزين البيت بالورد ..
بس .. !
فاقت من احلامها ع صوت رنة تليفونها والمتصل فارس الاحلام ..
قصي: صباح الورد حبي ؟
ابتسمت وبصوت مليان نوم: فيقتني من احلا حلم في حياتي !
قصي ضحك: مازال في احلا من اللي عايشتيه ؟
ضحكت واخفت سؤالها ( شن اللي عايشته ؟ ) وتظاهرت فعلاً بانها سعيدة ..
قصي: نوضي وصحصحي وافطري وكلميني
شمس: حاضر .. انت ماشي للعمل ؟
قصي: اي شربت قهوتي وطلعت
شمس: ياروحي درت قهوتك بروحك ؟
قصي ضحك: عادي شن ديما بنشربوها مزهرة ؟ .. قاعدين اماليك راقدين ؟
شافت لباب غرفتها: لا شكلهم ناضو بكري وخلوني راقدة شورهم قالو مسكينة ماترقدش كويس
قصي ضحك: وهما مش عارفين ترُك في النوم هنا ليه ليه
شمس ضحكت: هي خللي انوض ونشوفهم .. تو يقولولي لاش بايتة عندنا كان اول ماتنوضي ساعتين لقصي وقبل ماترقدي ساعتين لقصي !
قصي: من الحُب هذا باش تعرفي بس !
شمس تنهدت: ويجي يوم يخف الحُب هذا ويتلاشى ؟
قصي: زمري ع النكد هي .. بري شموستي افطري بالسلامة
ضحكت: رد بالك ع روحك
قصي: حتى انتي .. باي
سكرت الخط ورفعت ايديها تتكسل .. خشت ع حمودي ولد خوها يجري وحضنها ..
ضحكت: صباح الخير ع احلا وليد في العالم !
ضحك: صباح النور .. من نضت وانا نقول لماما نبي نمشي لعميمة خلتني نجيك بالسيف !
ضحكت: وعلاش ؟
حمودي عدل قعدته ومبتسم: مانعرفش تبيني نعس ع خوتي
حوّلت اليرغان ووقفت فتحت الروشن: ماهو عاد انت الكبير ولازم تعاونها في خوتك
حمودي وقف يشبحلها: ماهو انا نحب لما تجي تباتي نقعد معاك ونهدرز عليك .. انتي وعمو قصي
شمس تنهدت: تحبه انت ؟
حمودي: اي هلبا .. هوا كويس وطيب
حطت ايدها ع كتفه وتمشت معاه لوين ماتتواجد باقي الاسرة: اي طيب هلبا وحتى هوا يحبكم
وقف حمودي شبحلها: انتي امتى مروحة ؟
شمس: بالك غدوا
حمودي ببلاهة: امتى بتجينا تقعدي عندنا ؟
شمس ضحكت: انا نجيكم كل اسبوع ونبات شن تبي اكتر من هكي ؟
حمودي تنهد بحزن: لا نبيك تقعدي عندنا ديما !
ضحكت شمس: ماتملش مني ؟
حمودي: لا مستحيل
حنان وشيراز موتيات الفطور ..
وقفت شمس ع عتبة الدار: الله اكبر .. ياماشا الله ع هالصفرة يللي تجنن خيركم مانوضتوني ؟
شيراز جايبة الخبزة وتضحك: قلنا خلوها العروس ترتاح
تنهدت شمس: ع قولة اللآي تمتلك العرسة خلاص قريب يجيك الولد
شيراز اضايقت: قوليلها انا عروسة عمري كله
ضحكت ولمت شعرها: عادي تمت تمت المهم يجيني وليدي ع خير وعافية
حنان ابتسمت: ساد قصي يشوف فيك عروسة شن دخلك في غيره ؟
قعمزت شمس ع الصالون: اي والله اهم حاجة هوا !
شيراز ضحكت: شوفي ياماما كيف عيونها بدو يلمعو ؟
حنان نخصتها: تحشمي يابنت
ضحكت: شن قلنا من عيب ؟
تحشمت شمس وخشت للحمام ( اكرمكم الله ) ودارت دورتها وطلعت كملت فطورها ..
حنان: وشن جوك مع كوثر ؟
ابتسمت شمس واخفت كل التصرفات المشينة من كوثر: باهية الحمد لله .. مافيش اطيب من هالعيلة الحق كويسين معاي هلبا
شيراز فرحت بكلامها: يارب انطيح حتى انا في عيلة زي هالعيلة
همست شمس بينها وبين نفسها ( بعيد السو عليك وخيتي ) وابتسمت ظاهرياً ..
حنان مدت لحمودي سندويتشه: اي والله ربي يطيحكم في اللي خير مننا
شمس تنهدت: اهم شي الراجل ياشيراز .. لما يكون حنين تبيعي الدنيا بللي فيها
ضحكت حنان: قصدها قصي اكيد !
ضحكت شيراز: اصلا ديما ندعي ربي يرزقني براجل زي قصي .. ياوخيتي ياشمس سعدودك بيه يهبل يهببل بجديات
تنهدت شمس وابتسمت .. وكملت اكلها مع حكاياتها هي وقصي وتناغمهم مع بعض .. والرابط يللي بينهم كبير .. !

رن تليفونها ..
شهرزاد طبست وضحكت: اهو آوسا يتصل
ضحكت شمس: قوي الاسم كيف دلعتيه
شهرزاد تشرب في نسكافيه: ماهو اسمه معقد شن بندلعوه !
ضحكت شمس وخدت تليفونها وطلعت من الدار ..
حنان ابتسمت: ربي يهنيهم يارب .. قداش مافرحانة كل مانشوف فرحتها بيه وفرحته بيها
شهرزاد تنهدت: اي والله وربي يتمملها ع خير ويسعدهم طول العمر

شمس: امممم انت شن تقدر تهديلي ؟
ضحك قصي: عاد انا نسأل فيك !
شمس: مانبي شي والله .. نبيك تقعد ديما حنيّن عليا هكي وطيب وكويس
قصي: ماتبيش حاجة تبي الضحّكات !!
ضحكت لين دمعو عيونها .. بعدين خدت شهيق طويل وزفير وابتسمت: نبي حوش بروحي
تلاشت ابتسامته واختفت ضحكته تدريجياً .. انصدم .. وفي حالة ذهول لا توصف من هول الكلمة ..
شمس شافت لتليفونها بخوف: آلو !؟
تسمع في نفسه بس صوته انعدم ..
شمس زاد الخوف غطى كل ملامحها: قصي ! آوسا ؟
ضحك بهزوة .. وتزفر بضيق: عاودي شن قلتي ؟
شمس خدت نفس طويل: نبي حوش بروحي .. حوش يلمنا انا وياك .. يخصنا نتكمه ونضمه ونروح نلقاه زي ماهوا .. فهمت عليا !
قصي: والله ؟
شمس: اي والله
قصي انفعل وبدي يعيط: تبي حوش ولاه ! والله لما نديره الحوش باهي وانتي ماك خاشيتيله
انصدمت شمس: شن تقول قصي ؟
قصي بدي يتنفس بسرعة وسكت ..
شمس علت صوتها: شن كنت تقول قصي !
قصي تنهد: ماقلت شي .. تبي حوش بروحك ولاه ؟ ماشي تو نديرلك حوش بروحك
وسكر الخط .. لوّحت تليفونها وبدت تبكي ..

شهرزاد تنهدت: انتي الغالطة .. تو هناك وحدة بعقلها تتكلم في موضوع زي هذا ع التليفون وعند اماليها ؟
شمس وشهرزاد كانو في الدار بروحهم يتهامسو .. ومش حابة شمس توصل الموضوع لامها بتتضايق عليها .. فحبت تفضفض لاختها الكبيرة وتعطيها التصرف السليم ..
شمس: وشن فرقة يعني عند اماليا والا اماليه ماهو دماغي واحد سوا اهني والا غادي ؟
شهرزاد ضحكت ع بلاهة اختها وعبطها: ياغبية .. الراجل لما تتكلمي في موضوع يضايقه عند اماليك شن بيقول ؟
اندفعت شمس: شن بيقول يعني !
شهرزاد: بيقول هادي امها واختها عبولها راسها واشبح شنو !
شمس تنهدت: عينه .. ماهو من يوم سكنو اماليه معانا وانا نقوله .. شن بيتغير توا ؟ وشن يفرق عنده اصلا ؟
شهرزاد تنهدت: ياشمس ياحبيبتي .. تصرفك مليون في المية غلط
شمس: ويعني ؟
شهرزاد خبطت ع رجليها: يعني توا تصبري تشوفيه هوا شن بيدير قبل
شمس: ياحليلي لو نزيد نبات ليلة تانية ماما بتستغرب !
ضحكت شهرزاد: خليه الموضوع عليا .. تو نقوللها متوحمة ع الحوش .. المهم توا ماتكلميشي بكل نعرفك دماغك ربع تو تجري تتصلي وتزيدي الطين بلة
تنهدت شمس بخوف: ان شا الله خير وخلاص

وفاتت هديك الليلة ع قصي كلها اعصاب ونرفزة ع اتفه الامور ..
كوثر سكرت باب الحوش وشافت لراجلها: خيره هدا بيكلب والا شنو ؟
صالح يدخن: خير بلاه !
كوثر قعمزت قريبة عليه: كان بيروح بشمس اليوم وتوا قاللي مانيش مروّح بيها
صالح: ع كيفه شن كل شي بتقعدي في جرتهم ؟
كوثر زفرت بضيق ولوت شاربها ومش عاجبها كلامه: شني امالا تبيني نخليه براحته ؟ هدا كان تطلقه يدير البيبط
صالح ضحك وشبحلها: ياسر خللي الصغار يعيشو حياتهم .. كبرو معاش يبو شورتك في كل شي عاد !
شبحتله ع جنب: تي انت لين ماتت امك باش معاش شاورتها
صالح تعصب: هييي عليك ليلة .. ولدك هذا صعب بري تكلمي معاه تو يبلطلك كلمة تقعدي تحوسي في مكانك
كوثر علقت عيونها في الفراغ: ياخوفي يبدا يهز وراها لا شخصية لا بلي ع راسه
صالح: شن يهز وراها ؟ وكان مشي وراها شن دار جريمة ؟ مرته في الاخير وقريب تولي ام ولده .. خلي الولد في حاله تربحي وفوتي هالليلة ع خير
كوثر حذفت المخدة ع جنب ووقفت: ارقد بالله وفكني من هرجتك
وناضت .. وكل شي تختلس النظر ع ولدها يللي قاعد في السيارة وشاد تليفونه ..
وبينها وبين نفسها
( والله يخون فيها هالمريضة قاعدة عند اماليها ! تو ينفعوها )

شمس متكية ع سريرها وتتفرج ع السقف .. خواتها غطو في نوم عميق بعد الفجر طبعا هدرزة وضحك وماتحلا اللمة الا بصفيرة تجدد النفسية ..
كل شويا تشوف لتليفونها لعله يرن .. ولا فايدة .. !

ناضتت تفطر مع عيلتها .. يللي كانو شايلينها ع كفوف الراحة لان حامل والارهاق يللي ع معالم وجهها يحسابوه من الحمل .. وهو من نفسية اللي تحت الصفر .. كل ماتبتعد ع قصي تحس في نفسها يضيق وقلبها ينبض نبض يخوفها عليه اكثر ..
واخيراً ..
رجعت الروح لشمس ورن قصي ..
شمس بكِبر: نعم !
قصي تنهد: صباح الورد .. شن الجو ؟
شمس: باهية وانت ؟
قصي: شن وانا ؟
شمس تنهدت: يعني شن جوك ؟
قصي ابتسم: كان اخخي وتوا مليح الحمد لله
شمس استغربت: علاش !
قصي: نكلم في شمسي .. بعد نسمع صوتك كل شي يبدا مية مية
شمس: والله ! وامس اللي كانت تكلم فيك جداي ؟
قصي يقلد فيها: جدااي ! ( ضحك ) اول مرة نسمعها منك ع اساس كنتي كيوت ودلوعة يعني ؟ وتقولي حنينة واميما !
شمس: عادي كل يوم بشكل .. نجرب في كل شي وبعدين شن جداي كلمة شلافطية يعني !
تنهد قصي: ياودي فكيني من جداي وجداك .. بنتغدا ونجي نروح بيك تمام روحي !
شمس استغربت اكثر وسكتت ..
قصي: عارفه اللي في راسك .. نروحو ونهدرزو في حوشنا وبراحتنا تمام ؟
شمس: في حوشنا !
قصي: قلتلك بنحل كل شي خلاص عاد
شمس تنهدت: يصير خير
قصي يضحك: اليوم شن في ؟
ضحكت شمس ..
قصي: خلاص موتيلك مفاجأة .. !
شمس فرحت: الله !
قصي: والله .. خلاص عاد معاش تنكدي تمام !
شمس: تمام

شهرزاد تعلم في شمس: توا ياحبيبتي لما يجي يروح بيك هدرزو بالشويا مش تنفعلي وتعيطي زي الهبلة
شمس: باه خلاص فهمت
وياريتك فعلا فهمتي ياشمس .. !
اول ماوصل قصي وكلمها تطلع .. حبت تقيس غلاها ..
شمس: انزل بنكلمك كلمتين قبل مانروحو !
قصي استغرب: خيرك هبلتي ؟ شن بنهدرزو عند اماليك ؟
شمس: اي مهناك حد .. بابا مشي لخدمته وخوي مع اصحابه يعني اطمن
قصي تنهد: شنس بلا شياط ريق وهيا
شمس أصرت: مانيش نازلة لين تنزل ونكلمك
سمع كلامه ونفذ مطلبها ونزل ..
فتحتله الباب ودخلاته للصالة: تعالا خش !
قصي مستغرب: شن كمين ؟
شمس دخلاته للصالة وقعمزاته ع الصالون: شن صار ؟
استغرب قصي: في شنو ؟
شمس: في اللي قلتلك عليه ؟
قصي تعصب وتنرفز ع الاخر وتمالك نفسه: تو بجديات انتي تتكلمي ؟
شمس بابتسامة استفزت قصي اكثر: اي
قصي زفر بضيق: تو بتروحي معاي والا شني ؟
شمس رفعت كتافها: لا .. لين نديرو حوش لينا
قصي شبحلها والصدمة تعلو الوجه ووقف .. بيطلع
شداته من توب التوتة بس صبعها انجرح عيطت .. ولا عبرها .. طلع من الصالة للباب الخارجي .. للسيارة .. وهي تلحق فيه وتترجا انه يوقف ويسمعها
( قصي راجي اسمعني بس )
طلع وخلاها في حوش اماليها .. بدون آي احساس بوضعها الخاص والاحراج يللي سببه ليها بعد روّح ..

ركبت درجة درجة وشادة صبعها المجروح كان ينقط دم ..
حنان باستغراب وحست ببنتها وجهها متغير: خيره قصي طلع ماسلمش عليا !
تظاهرت شمس بطبيعة الوضع: لا مافيه شي غير قلتله خللي نزيد يوم
امها كانت شادة صفرة القهوة لقصي حطتها ع جنب: كيف تخليه يوصل لهنا ويرجع ؟
شمس قعمزت ع الصالون وبدت تبكي .. امها ع طول جت حضنتها ومش فاهمة السبب ..!
شهرزاد بعد رقدت ولدها سمعت شمس تأن وتبكي .. نزلت تجري مخلوعة ع اختها ..
حنان وشيراز يللي مشت جابت امية ..
شيراز: خيرك شن في !
الوحيدة شهرزاد يللي فاهمة الوضع: خلوها هذا من ضغط الوحم بس مادوروهاش
فنصت في اختها ..
شمس تمالكت نفسها: هكي تعاركت مع قصي ع خاطر نبيه يخليني هنا هوا ماباش زعل مني
حنان تنهدت براحة: معقولة يابنتي هالعمل رعشتيني عليك .. نوضي اغسلي وجهك وخليه قصي تو نكلمه بعدين ونفهمه تمام !
مسحت دموعها شمس ووقفت خشت للحمام ( اكرمكم الله ) غسلت وجهها وطلعت ..
وحاولت تتناسى الوضع شويا لصحتها ..

قصي روّح مشحون للحوش .. وكان مجهز شوية زينة بمناسبة ميلاد شمس .. بدي يقربع ويكسر وطربق كل البالونات يللي مرتبهم وقعمز ع السرير يحاول ياخد نفس اكثر .. اكسجين عنده نقص بشكل كبير .. مسح ع وجهه مراراً وتكراراً ..
ويكرر في ذات الجملة من لما طلع من حوش نساباته
( تو نوريك انا ياشمس .. تو نوريك )

كوثر في الليل مستغربة في قصي كيف قعد في شقته ماطلعش بكل باش يروّح بشمس ..
ركبتله وطقت باب دار النوم ..
فتحلها: شنو ؟
خش قعمز ع سريره لحقاته وقعمزت قريبة عليه: وين شمس ؟
قصي بتعصب: دسيتها تحت السرير
اضايقت امه: بلا تسهويك
قصي حذف تليفونه: شن وينها ؟ قاعدة عند اماليها !
كوثر شهقت: وعلاش قعدت حتى اليوم !
تعصب قصي وانفعل: انا نبي نفهم بس ! انتي شن علاقتك يما بحياتنا ؟ بالله عليك معاش تتدخلي فينا خلينا حتى تشوفينا نقطعو في بعض فوتينا .. تمام !
وقفت امه وزفرت بضيق: والله ماتتحشم
طلعت وقربعت الباب .. وهوا مسح ع وجهه بتعصب كبير .. وخدي شهيق وزفير .. ويحاول يستوعب الموقف وشاف لبقايا البالونات زاد تعصب وحذف تليفونه ع الحيط ..

في عشية اليوم التالي ..
قدامها العجانة وتعجن في فطيرة .. وشهرزاد فاهمة وضعها ..
طبطبت عليها: خللي عليك الفطيرة انديرها انا وبري ارتاحي
مسحت ع وجهها واصطنعت ابتسامة كاذبة واهية عن ماحدث: لا بنديرها انا .. شيراز وبابا خاطرهم في فطيرتي
همستلها: شن صار في قصي معاش كلمك ؟
هربت دمعات متمردات من حصار الجفن ع الخد متورد من كثر ضغط التفكير: لا
مسحت ع شعرها بلطف: خلاص ماتبكيش .. تو يكلمك اهدي بس
شمس شافت لشهرزاد: يعني هوا الغالط ؟
شهرزاد تنهدت: لا والله انتي الغلط راكبك من ساسك لراسك
شمس طفت العجانة: ترا كيف ؟
شهرزاد خدت العجينة ودهنتها بالزيت: قلتلك من الاول روحي لحوشك وهدرزي .. مواضيع زي هادي تبي تقعميزة رايقة سكرتي راسك وتصرفتي بعوج
شمس شافتلها باستغراب: شن الحل ؟
غلفتها بنايلو وحطتها ترتاح: توا شويا مع المغرب اتصلي بيه وخليه يروح بيك وتفاهمي معاه في حوشكم
شمس أنبها ضميرها اكثر بعد كلام اختها: تصدقي كان موتيلي مفاجأة ليوم ميلادي !
شهرزاد ابتسمت: والله كويس قصي الله
شمس فرحت وابتسمت .. وراق البال ..!

حطو صفرة العشية .. سمعت صوت امها تتكلم بالتليفون .. قربت منها
حنان: ياكوثر خليهم عرسان وهادي اولهم سنة قاعدين يتعرفو ع طباع بعض مادوريهمش
كوثر بامتعاض: كيف ماندورهمش هذا ولدي ومرته حسبة بنتي !
حنان تنهدت: فاهمة والله .. لكن انا بروحي مش عارفة شن يللي صار بينهم حدها قالتلي تبي تزيد تبات وتزاعلو بس !
كوثر اضايقت: وعلاش تبات وتخلي فيه بروحه ؟
حنان اضايقت من منطق اسلوبها: انا مانبيش ندخل بينهم .. خليهم يتعرفو ع طباع بعض وانتي عارفة ديما اول سنة صعبة عليهم الزوز
كوثر اندفعت: انا بنكلمه غير يروح بس واتصلت بشمس ماردتش ؟
تلفتت حنان لقت شمس وراها: آهي جت بحداي تبيها ؟
كوثر مش مصدقة حوار حنان وحستها تكذب عليها : اي هاتيها .. !
خدت شمس التليفون من امها: كيف حالك اللآي ؟
كوثر: هكي اديري فيا يابنيتي ؟ تخلي فيا مشغولة عليكم ؟
ابتسمت شمس اخفت كامل الموضوع: شن درت ؟
كوثر: قصي مخليتيه بروحك الليل كله ع التليفون يميعد وانتي شادة اماليك وقاعدة غادي ! وامك عندها علم بللي صاير وانا لا ؟
شمس شافت لامها مستغربة: شن قالتلك ماما ؟
كوثر بحزن: انك مضايقة قصي ع البيتان ! مش باهي يابنتي البيات برا .. تخللي الفراغ بينك وبين راجلك يكبر وديما ناس زمان يقولو فيها اللي ماتباتش بعيد ع الحوش هذا راجلها يبيها ويحبها !
استغربت شمس وضحكت خفية: يعني قصي لما يخليني نبات معناها معاش يبيني ؟
كوثر باصرار: اي امالا شنو ! وين تندري لما تخليه وتباتي شن يدير بروحه ؟
شمس بثقة: ياللآي الراجل لما ينوى شي يديره ع خيار عينك ولا يعبرك اصلا .. عموما والله ماتخممي مافي شي ماتخافيش .. هوا توا زعلان مني تو نعرف نراضيه ماتشغليش بالك موضوع تافه
كوثر تعمدت الاحراج: شن التافه لما تباتي بعيدة عليه ؟ وبعدين انا شن يرقدني الليل وولدي مش متهني في حياته ؟
شمس توسعو عيونها ورفعت حواجبها: اللطف ياربي .. انا مانبيش نشغلك وبعدين تو نروحله قصي ونتفاهم معاه ع الخيانات يللي من وراي
كوثر شافت قصي مروّح وحاط التليفون في وذنه: اهو يتكلم قاعد لتوا
شافت شمس لتليفونها لقاته يرن باسم ( قصي ) ضحكت خفية وماحبتش تكتر دوة في الموضوع هذا تحديداً لان عزوزتها مصرّة ادخلها الوسواس في راسها ..
شمس: اه تمام
واخترعت سبب وسكرت المكالمة ..