رواية شارع الحب الفصل الثالث 3 بقلم ميرنا ناصر
رواية شارع الحب الجزء الثالث
رواية شارع الحب البارت الثالث
رواية شارع الحب الحلقة الثالثة
” ضحكت، ضحك هستيري وقفلت المكالمة وانا مش حاسة غير بمشاعري وقلبي بيتهشموا لحد مادخلت ماما الأوضة وأتكلمت ”
= بتول حبيبي عريسك جه.
_ عريسي!!.
= ايوه عريسك، وائل أخو شادي بره هو وأمه وابوه ويالهوووي يابتول على كمية الهدايا اللي داخلين بيهم.. علشان تعرفي لما أمك تدعيلك جوازه إنما إيه متقلش حاجة عن أختك ريم ووائل ايـه بسم الله ماشاء الله أغنى من شادي بكتير .. يلا إغسلي وشك كدا وشوية ميك اب على دريس لطيف وأطلعي.
_ إنتوا إزاي تدوهم ميعاد من غير ماترجعولي.
= يووه يابتول ما إحنا جينا ياحبيبتي من الفرح لقيناكي نايمة ..
_ والنهاردة اليوم كله دا ايـه؟!
= مكنتش فاضية.. إديكي شوفتي بعينك اليوم كله أنا وأختك عملنا ايه في البيت.
_ ماما.. ماما انا مش قادرة أتكلم ولا حِمل مناهدة انا مش مؤهلة أطلع أتعرف على حد.
= تتعرفي!!
_ ايوه.. طالما محترمتونيش ومشاركتونيش الموضوع اللي هو من الأساس يخصني.
= لا دي خطوبة مش تعارف.. النهاردة خطوبتك.
_ ايـه الهزار البايخ ده!.
= بنت إحترمي نفسك.
_ أحترم نفسي؟! واحترم نفسي إزاي وانا مش عارفه معني الأحترام بسبب إسلوبكم يعني ايـه خطوبتي!! فهميني يعني ايـه أحنا لو في عصر الجاهلية كانوا هياخدوا رأيي.
” دخل بابا على صراخي وتحدث بهدوء غريب ”
= لا كان زمانك موءودة وأرتحنا منك.
_ بجد يابابا انا عملالكم مشكلة كدا أوي.. طب انا مش طالعة وروني بقى خطوبة ايـه دي اللي هتم والعروسة غائبة.
” بص ليا بغضب وحنق ثم أقسم ”
= أقسم بالله يا بتول لو ما طلعتي لتكوني بنتي ولا أعرفك.
_ بمعنى؟!
= بمعنى إن ملكيش مكان في بيتي ولا بيت عماتك ولا خالتك وهتبقي مرمية في الشارع زي كلاب السكك.. ووريني هتعملي ايـه.. هسيبك ربع ساعة بالظبط وبالدقيقة تكوني ظبطي هيئتك المتبهدلة دي، وتطلعي فيهم للناس وتكوني مبسوطه وموافقه
إما..
_ إما أطلع ومليش مكان هنا.
= ذكية طالعة لأمك.
_ تمام يابابا وانا موافقة بس مش على الخطوبة على الخروج من البيت ده.. ومش هنزل قسمك انا يستحيل أرجع البيت ده تاني ربع ساعه وهلم كل هدومي.
= إنتي ملكيش هدوم عندي.. دي بفلوسي والدهب اللي لابساه ده تقلعيه.. حتى موبايلك.. هتخرجي بالهدوم اللي عليكي دي.
” حسيت الدنيا بتلف بيا، ودموع، دموع بتسابق بعضها وبتتصارع مين فيهم يجري الأول من عيوني .. كان فاكر إنه كدا بيلوي دراعي بس انا فعلًا نفذت كل كلامه وخرجت نزلت أمشي في الشوارع وانا في هيئة غريبة شعري مش مرتب ولا حتى لبسي مش معايا فلوس، ولا موبايل ولا حتى دهبي.. قررت أروح أحكي مع النيل زي عادتي.. أروح فين لخالتي اللي مش بتكره حد في حياتها قدي، ولا عماتي اللي مش بيتنفسوا غير بإذن من بابا.. وفجأة النيل بقى هادي والشوارع بقيت هادية والجو أبتدي يبرد كنت بدعي من ربنا ميكونش في مطر لأول مره على رغم حبي للمطر بس ربنا المرة دي أستجاب عكس دعائي ”
= يابنتي إنتي كويسة… الدنيا بتمطر ولا إنتي مش حاسة!
” بصيت للصوت ولقيته جاي من شاب تلاتيني كان بيبع البطاطا.. مردتش ..كنت حاسة إن لساني هو كمان جِمد من البرد مش بس أطرافي ”
= يابنتي ردي عليا..إنتي سمعاني.. لا حول ولا قوة إلا بالله..تعالي معايا.
” خدني لمكان قريب من الكورنيش زي عشة فيها أدوات بسيطه وأقفاص من البطاطا مد لي كوز من البطاطا السخنة و كوباية شاي وبطانيه بسيطه ”
= ايـه حكايتك يابنتي ولا إنتي خرسة.. ولا مالك لا حول ولا قوة إلا بالله
_ انا مش عايزه أكل.
= طب ما انتي بتتكلمي أهو.. فين بيتك وأهلك ياأنسة .
_ أهلي.. انا..
= إتدفي بس من البرد خدي البطانية دي ولفيها عليكي ألا جسمك بيتنفض.
” مسكت البطانية وعينى وقعت على الشال الصوف اللي إديتهوني تيتا حور.. ياربي كل ارقامهم وعنواينهم في الشنطة وخلاص الشنطة مهياش معايا.. مفيش غير بطاقتي هي دي الحاجة الوحيدة اللي نزلت بيها.. يأست وعيوني دمعت.. يعني حتى لو الناس دي هتستضيفني يوم واحد انا مش هعرف أوصلهم ”
= ايـه الدنيا.. ليا ساعة بكلمك.. يابنتي فهميني حكايتك إيه.
_ انا.. انا تايهه..
= باين عليكي يا أنسة .. سهلة وبسيطه قولي لي عنوانك فين ومع صلاة الفجر هوصلك بيتك إن شاء الله.
_ مهو..هو.. انا عايزة أروح شارع.. شارع الحب.
= شارع الحب!! ودا يطلع فين ده!!
_ مش عارفة.. بس كل اللي أعرفه إنه بعيد عن القاهرة بخمسين كيلو..
= يا دين الله، خمسين كيلو حته واحدة..بس أيوه برضو المكان ايـه؟
_ اممم ..لا.. انا.. انا مش عارفة هو فين بالظبط كل اللي أعرفه انه بعيد خمسين كيلو .
= يعني ايـه يابنتي مش عارفة دا حتى شكلك كبيره مش صغيرة.
” بصيت له بيأس وبكاء ونحيب أشبه بطفل رضيع رأى العالم لأول مره ”
= وحدي الله ياأنسة مش كدا .. بكره الصبح يحلها ألف حلاّل.
_ انا مش هقدر أستني لحد الصبح.. لو عايز تساعدني محتاجة إنك تديني حتى ثلاثين جنية.
= ودي هتوصلك مسافة خمسين كيلو!!. انا عارفة إنك قلقانه مني بس انا إبن ناس وبخاف ربنا وعندي اللي زيك وعملت كدا معاكي علشان ثواب ومساعدة لوجه كريم ..
” أول ما قال الجملتين دول خوفت أكتر، حسيت إنه كاشف أفكاري. خلاص مبقتش أثق في حد، لا حبيب ولا أهل ولا أب إلا شارع الحب.وجدو مُحب وبيته اللي كله دفا ومتحسش ببرد يناير أبدًا فيه، بيت كله حُب ”
_ لو عايز تساعدني.. وبجد تكسب فيا ثواب أرجوك إديني ثلاثين جنية وهرجعهم تاني والله.
” طلع الشاب من جيبة فلوس فكة كتير وبدأ في العد ثم أعطاهم لي بالكامل مئتين جنية ثم تحدث”
= دول كل اللي معايا.. أتفضلي.
_بس دول تقريبًا.. كل اللي في جيبك.
= مستورة يا انسة.
_انا مش هاخد غير المبلغ اللي قولتلك عليه.
= طب انا عندي حل يرضي الطرفين أحنا نقسمها بالنص أنتي مئة وانا زيك.. وطالما هتجبيهالي يعني مش هتضيع.
” وافقت أخدتها منه وجريت.. على نفس المكان بتاع إمبارح… الموقف اللي ركبت منه العربيه.. كان هنا.. انا فاكره.. فضلت أجري زي المجنونة في كل الشوارع اللي جنب بعض لحد ماتعبت وضغطي حسيته أبتدي يوطي ..قعدت في الارض وبصيت للسما ودموعي مختلطة بدموع المطر وبصرخ وأنادي بكلمة واحدة يــــــــــارب ، يــــــــــــارب.. فوقت على صوت غريب.. ايوه.. هو هو سواق إمبارح .. ونفس الزحمة على العربية جريت ناحيتهم ”
= أنتي يا أنسة.
_ انا!!.
= أيوة.. إنتي..رايحة فين.
_ رايحة معاكم.. رايحين شارع الحب صح.. انت..انت اللي أخدتني إمبارح.. فاكر..فاكر انا لميت ليك الأجرة وحسبتهوملك كان الكلام ده على وقت المغرب كده .. يلا..أرجوك وديني شارع الحب.
” بص يمين وشمال.. كانت كل العربية رجال وبس، وانا البنت الوحيدة وهيئتي غريبة ”
= لا حول ولا قوة إلا بالله ربنا يتوب عليكم بطلوا الهباب اللي بتشربوه ده..شارع حب ايـه وزفت ايه.. ايه البلاوى دي.
” ركب عربيته وموافقش إنه يركبني العربية.. فضلت أصرخ زي المجنونة أول ما العربية أتحركت جريت وراها .. لحد ما السواق وقف بناءً على طلب راجل عجوز في العربية أقنعه ياخدني وياخد فيا ثواب .. ركبت وانا فرحانة ومن فرحتي.. نمت في العربية محستش بأي حاجة غير ونفس السواق بيصحيني..”
= قومي.. يا مدام.. يا أنسة.. أنتي ياست . دا أيه البلاوي دي ياربي .
” قومت مخضوضه من صوته.. بحاول أفتكر أنا فين.. وفهمت أنه وصلنا.. نزلت من العربية كانت لحظة شروق الشمس.. بحاول أفتكر انا مشيت فين إمبارح.. بس شكل الشوارع بالليل غير النهار..ومش فاكره انا مشيت ازاي.. فضلت ماشيه كتير وشوارع بتدخلني في شوارع وأفضل أسأل أي حد ماشي ومفيش غير على لساني جملة واحدة.. فين شارع الحب.. لحد ما دخلت شارع.. أيوه هو ده الرصيف.. هو دا شارع الحب وقفت ست كانت ماشية ”
_ صبا..صباح الخير.
= صباح النور أقدر أساعدك في حاجة.
_ مش دا شارع الحب.. صح؟
= شارع الحب!!. لا دا شارع الخمسين.
_يعني ايـه شارع الخمسين؟! اه..انا عارفه انه بعيد عن القاهرة بخمسين كيلو..بس اسمه شارع الحب.
= لا ياحبيبتي معرفش غير إنه من زمان الأزل اسمه شارع الخمسين.
_ طيب إستني بعد إذنك.. الشوارع اللي هنا مش حضرتك من المنطقة دي؟!
= أيوه من هنا.
_ في شارع من الشوارع هنا إسمه شارع الحب.
= لا والله مفيش كدا.
_ طب في راجل هنا إسمه جدو مُحب وتيتا حور.. هو البيت في الشارع ده
= لا برضو مفيش حد هنا بالاسم ده.
” وقفت ناس كتير أسألهم.. كلهم أكدوا لي إن مفيش حاجة إسمها شارع الحب.. يعني إيـه كل ده وهم.. أمير وتيتا حور وجدو..جدو مُحب وهم .
فضلت بلف زي النحلة في المنطقة دي بخرج وبدخل من نفس الشوارع لحد غروب الشمس وانا كل اللي معايا خلاص خلصوا مفيش غير ثمن زجاجة ميه إشتريتها وخرجت لمحت صيدلية أفتكرت كلام أمير. ”
«عمومًا ياجدو ضغطها واطي، ومحتاجة محلول ملح.. في صيدلية أول الشارع خليها تروح يركبولها كانيولا علشان انا بتاع ميتين..بعد أذنك»
_ في صيدليه أول الشارع.. في صيدلية أول الشارع.
” كنت بهذي بالجملة زي المجنونة ودخلت الصيدلية مسرعة”
_ مساء الخير.. انا بتول.. انا جدو مُحب..ودكتور أمير ..مش فاكره أسمه أمير..أمير صلاح بتاع ميتين هو..هو مش حفيده.. هما ساكنين هنا.. صح
” كان الصيدلي بيحاول يفهم كلامي لكن من كتر تعبي وإرهاقي الشديد كلامي مكنش مفسر”
= مساء النور.. بالراحة بس يا أنسه.. انتِ عايزه ايـه..وانا هساعدك.
_ انا جيت هنا.. أيوه هو الشارع ده.. قابلني رجل عجوز قال لي إن إسم الشارع ده شارع الحُب.. وهو إسمه جدو مُحب.
” ضحك بشدة ثم بص لي ”
= يا خبر أبيض هو ظهرلك ولا ايـه؟
_ ظهرلي!! هو جدو مُحب..اللهم أ..أحفظنا من..الـ
يتبع…..
لقراءة الفصل التالي : اضغط هنا
لقراءة الرواية كاملة اضغط على : (رواية شارع الحب)
