رواية سيف ونيرفانا الفصل الثاني 2 بقلم زينب سمير توفيق
رواية سيف ونيرفانا الجزء الثاني
رواية سيف ونيرفانا البارت الثاني
رواية سيف ونيرفانا الحلقة الثانية
في موقع التصوير عند نيرفانا، كانت بتجهز علشان جلسة التصوير الدعائية للفيلم، ومعاها جولي.. اللي قالت وهي بتشوف النوتة بتاعتها – انا حاولت أضم مواعيدك كلها أنهاردة في خمس ساعات بس بكرة صعب نعمل كدا.. بكرة في لقاء تلفزيوني عايز لوحده يمكن أربع ساعات
– مينفعش نأجله؟
– صعب جدًا لازم الحلقة تتعرض قبل عرض الفيلم، ومعندناش وقت ليه غير بكرة
– تمام
– خلي بالك..
بصت حواليها وقربت منها تهمس – حوار تأجيلك شغلك الكتير دا عامل تساؤلات كتير، محدش عنده فكرة اية اللي ورا دا بس الكل عارف أن في حاجة أكيد
أتنهدت نيرفانا بضيق و – عارفة بس أعمل أية؟ مقداميش حل غير إني ابين أني عبيطة
– طيب أنتي لسة شايفة أنه مستحيل تعرفي حد بجوازكم؟
– جولي.. أنتي عارفة قراري في الموضوع دا كويس، مستحيل حد يعرف إني متجوزة سيف أبدًا، الموضوع دا لو اتعرف هتحصل دراما كتير جدًا وكمية إشاعات وكلام مش هنعرف نوقفها، والكل هيقول إنها مجرد نزوة وأنا مش هقدر أستحمل الكلام دا خاصةً وانا عارفة إنه حقيقة
– انا حاسة إنك غلطانة في الحوار دا وإن الموضوع بالنسباله مش مجرد نزوة ياناني، دا عنده أصرار أكتر منك إنه يظهر أرتباطكم للنور من أول لحظة
– دا علشان هو مش هيخسر حاجة ياجولي، هو محدش يقدر يتكلم عنه اي كلمة ولا شغله هيتأثر بأي كلام، انا اللي هتهد وشغلي كله هيتأثر من اي كلمة كدا ولا كدا، انا اللي الكلام ورايا هيبقى بالكوم وانا مش بحب كدا.. فالأفضل نفضل مكتمين على الجوازة دي لحد ما يمل ويزهق وننفصل وأخلص بقى
ضحكت جولي و – لسة فاكرة من اول يومين جواز وأنتي بتقولي أسبوع ويزهق وبعدها بقينا نقول شهر ويزهق تلت شهور.. لحد ما كملنا سنة وداخلين في التانية أهي.. مش بعيد تلاقيـه بعدين بيسألك عن حمل وعايز أولاد يانهار ابيض لو حصل دا بجد
قالتها وهي بتضحك بزهول، بصتلها نيرفانا بعصبية و – أسكتي خالص أنتي علشان أي حاجة بتفكري فيها تاني يوم بيكلمني عنها ولو حصل وفتح الحوار دا هاجي أقتلك
– بعيدًا عن الهزار، تخيلي لو دا حصل فعلًا وحملتي؟
نيرفانا بإقرار وتأكيد – هنزله فورًا طبعًا وأعتقد رغم اختلافات أنطباعنا وأرائنا انا وسيف من اول لحظة اتقابلنا فيها الا أن رأيه هيتفق مع رأيي في الحوار دا بس
زمـت جولي شفتيها و – متبقيش متأكدة اوي كدا، محدش عارف سيف الدين دماغه جواها اية
أتنهدت نيرفانا وهي بتهز راسها بإيجاب على كلامها
ودي أكتر حاجة بتخوفها منه
إنها مش عارفة أية اللي في دماغه!!
خبطات على الباب وحد من الاستف بيستعجلهم – ناني يلا التصوير هيبدأ..
طلعت بفستانها الأحمر قابلت مهند البطل لفيلمها كان وسيم لابس بدلة سودا وكرافتة حمرا، قربت منه وجولي وراها معاها صور تخيلية و – دي الصور اللي هتصوروها ودا مقطع فيديو عبارة عن سبع ثواني هيتصور علشان يتضاف للبرومو
– تمام
بدأوا يصوروا اللقطات اللي كانت شبة خالية من التلامس، الحوار اللي مكنش عاجب مهند اللي معروف في الوسط الفني إنه زير نساء.. حاول يقرب منها وهما بيصوروا و – أبعد شوية يامهند
– لية؟ كدا أحسن هتدي للمشاهد انطباع أحسن
حاولت تبعد أيده اللي بيقربها من وسطها ومن بين اسنانها – قولتلك متلمسنيش وإلا..
بجراءة همس وهو بيقرب وشـه منها – وإلا أية؟ دا انا سبت عروض خرافية كانت متقدمالي علشان أصور الفيلم دا معاكي.. وطول التصوير مش سمحالي أكلمك كلمة حتى.. دي فرصتي الأخيرة
حاولت تذقه وهي بتصرخ – فرصة اية انت اتجننت؟ أبعد عني..
التصوير وقف والكل بصلهم بقلق سأل مدير التصوير – في حاجة ياناني؟
صرخت وهي بتبعد السماعات والميكروفون عنها – في إني مش هكمل زفت تصوير لحد ما الأستاذ دا يتعدل
ومشيت وسابتهم وجولي وراها بتجري وفي نفس الوقت بتدي تعليمات للمساعدين – لو في ناس صورت اللي حصل أمسح الفيديوهات بسرعة وأمنعها تنزل
****
دخلت ورا نيرفانا الأوضة اللي كانت متعصبة و – مقدرتيش تتحكمي في عصبيتك شوية؟ اللي حصل دا لو اتسرب هنضيع كل تعبنا في الأرض
– ما هو اللي حيوان انا قيلالك من بدري مبحبش الممثل دا وهاتي حد غيره، سمعته زفت فضلتي تشكري فيه وتكتبي عنه أشعار وهو زبالة
– طيب مش انتي اللي قولتي إنه كان كويس معاكي طول الفترة اللي فاتت وكان محترم
– مطلعش زفت، اووف انا مش طيقاه مينفعش يكتفوا باللي صوروه؟
– صعب دا احنا ملحقناش ناخد لقطتين على بعض
خبطات على الباب ودخل عماد المخرج و – ناني بليز عديها هو والله اتأسف وأعتذر برة وقال مش هيكررها عديها علشاني المرة دي بس، دا اخر يوم تصوير هيجمعكم وياستي العرض الأول والحفلة أحضري ومتبصيش في وشـه حتة
– مش قادر تقولي براحتك متحضريش؟
عماد بتسرع – تـوء تـوء مين اللي متحضرش؟ يابنتي أنتي عايزة تخربي بيتنا كلنا ولا اية! أنتي أهم من كل اللي موجود هنا دلوقتي
بص لجولي وغمزلها و – وجولي طبعًا علشان منقدرش نتخلى عنها
ضحكت جولي واتنهدت ناني و – طيب علشانك بس هكمل تصوير
– انا هتأكد ان مفيش حد صور اللي حصل ونزله، عارفين انتوا الصحافة بتكون عاملة ازاي في الأوقات اللي زي دي بتكون مزروعة وسطينا من غير ما نحس
– تمام
طلعت كملت جلسة التصوير وخلصت كل اللي مطلوب منها وخلال الوقت المحدد كانت في طريقها للبيت وجنبها جولي اللي صرخت بضيق فجأة وهي ماسكة التـاب بتاعها و – الفيديو أتسرب وشوفي مكتوب أيه..
‘ خلاف عشاق في موقع تصوير.. فكما معروف مؤخرًا إشاعة عن وجود علاقة حب تجمع بين الممثلة المشهورة نيرفانا والممثل مهند المعروف بعلاقته النسائية المتعددة الأمر الذي لا يعجب حبيبته نيرفانا ويبدو ان الشجار اليوم كان بسبب ذلك وبسبب غيرتها عليه بعد ان تسربت لقطات له بليلة أمـس مع إحد الفتيات في إحدى البارات الليلية ‘
– أية القرف دا؟ أمتى ظهرت الشائعات دي؟
– من اول ما بدأتوا تصوير الفيلم بس مكنش في اي دليل عليها ومظهرتوش سـوا مع بعض فمحدش أتكلم عنها
– ااه
– عمومًا متقلقش هتصرف وهحذف كل دا وهنحاول ننزل نفي
– ياريت علشان الحكاية مش ناقصة والله، كفاية اللي هروح وهلاقيه بسبب الحوار دا
بصتلها جولي بشفقة و – نسيت حوار سيف دا خالص، بس عرفيه أن ملكيش ذنب
– ولا يعرف بقى انا اعمله اية.. انا تعبت
– معلش هانت ونخلص من الفيلم دا بحواراته الكتير
– عقبال ما اخلص من سيف وحواراته الكتير برضوا
ضحكت جولي وسكتوا لحد ما وصلت لبيتها وودعت جولي ونزلت..
****
دخلت الشقة لقيتها فاضية منه أتنهدت براحة إن وصلة تعذيبها النفسي لسة مبدأتش، غيرت هدومها ووقفت في المطبخ تعمل أكل، بدأت تندمج وكانت مشغلة اغاني بترقص عليها وتتحرك بأنسجام لحد ما لفت تجيب حاجة اتفاجئت بيه.. سيف.. واقف عند باب المطبخ ساند بدراعه على الباب ومكتف دراعاته، من جاكته اللي مرمي بإهمال على كرسي في المطبخ وأكمامه المشمرة عرفت إنه واقف من بدري
أبتسمت بإرتباك و – أنت هنا من بدري؟ محسيتش بيك
أتعدل في وقفته وقرب منها حاوط وسطها بدرعاته و – محبيتش أمنع نفسي من اللحظة دي وأشوفك وأنتِ بكل الروقان دا
ضحكت بتوتر و – انا عملت الأكل، غير هدومك عقبال ما أغرف
قرب يبوسها على خدها و – بحب لما تعامليني ك جوزك وتعمليلي أكل بأيدك
قال كلمته ومشى وهي حطيت أيدها على قلبها اللي بيدق بعنف قبل ما تبدا تغرف الأكل
بعد دقايق كانوا بياكلوا سـوا بهدوء مسيطر على المكان قاطعه صوته الجاد رغم إنشغاله في الأكل وباصص في طبقه – أية اللي حصل بالظبط مع مهند الشامي
سابت شوكتها وبصتله بقلق، جت اللحظة المنتظرة
– مفيش.. احنا كنا بنصور وهو حاول قصدي قرب من غير قصده بطريقة معجبتنيش وانا كنت متعصبة بسبب ضغط الشغل فطلعت عصبيتي عليه وكدا والصحافة صورت بقى وأنت عارف خيالهم
بصوت ساخر وهو بيسيب شوكته ويبصلها – خيالهم اللي متضطر اتحمله طالاما نيرفانا هانم معروفة قدام الكل إنها سنجل ومش مرتبطة، كل ما نصور فيلم نقول مرتبطة بالممثل كل ما تقابلي معجب نقول حبيبها في السـر وجوزها مش من حقه يعرف الكل بجوازهم
– سيف لو سمحت انت عارف ان المهنة دي كلها حوارات من دي، احنا نفسنا لو جوازنا اتعرف هتلاقي كلام ملوش اول من اخر مش هنعرف..
قاطعها – ساعتها هعرف أقطع كل الكلام دا وأمنع اي حد يجيب سيرتك لأن هيبقى معايا حق لكن دلوقتي بسبب حضرتك ورغبتك انا مضطر كل فترة أسمع حوارات من دي وأعمل نفسي مسمعتهاش
واجهته – انت مبتعملش نفسك مسمعتهاش، أنت كل حد قربلي من ساعة ما اتجوزنا لقيت طريقة وآذيته بيها من غير ما تظهر في الصورة
بصلها ببجاحة وقوة و – انا عايز آذيهم بقى وانا ظاهر في الصورة علشان الكلي عرف أنتي ملك مين ومتجوزة مين
أتنهدت بحرارة و – يالله، انا تعبت من الكلام في الموضوع دا
– وانا كمان.. علشان كدا..
بعد الكلمة دي بصتله بقلق، رفع عيونه ليها و – في أقرب وقت ممكن انا هعلن جوازنا للكل يانيرفانا، من دلوقتي توقيت اعلان جوازنا بقى في ايدي وبناءًا على رغبتي مش بأيدك أنتِ..
– بـس..
حاولت تتكلم لكنه رفع أيده ومنعها وقام من على السفرة و – انا همشي دلوقتي علشان عندي شغل، أحتمال آجي بالليل متأخر متستنينيش
وعرفت إن شغله المهم هو.. مهند الشامي!!
حطت راسها على التربيزة وزفرت بتعب – أووف، راجل متعب.
****
تاني يوم، في أستوديو كانت قاعدة نيرفانا بتجهز علشان تطلع على الهوا، جولي واقفة جنبها و – الأسئلة أنتي شوفتيها وراجعتي كل حاجة مفيش بس غير سؤالين بيكونوا مفاجأة علشان دي فكرة البرنامج حاولي مهما كانت الأسئلة محرجة او صادمة متتوتريش ولا تتعصبي وجاوبي بذكاء.. تمام؟
– تمام
قربت المذيعة منها و – ناني جاهزة؟ دقايق وهنطلع على الهوا
– جاهزة
قعدت المذيعة في كرسي جنبها وكل واحد خد مكانه وبدأ التصوير – أهلًا وسهلًا بيكم في حلقة جديدة من برنامجنا ‘ أسرار النجوم ‘ وأنهاردة ضيفتنا نجمة وغير أي نحمة، فنانة متميزة موهوبة ومن أول ظهور على الشاشة عرفت تسيب بصمة، جمالها ملهوش مثال وأسرارها أكيد ملهاش نهاية..
بصت لنيرفانا و – أهلًا بيك يانيرفانا.. نورتينا
– دا نورك حبيبتي ميرسي
– بس الحقيقة طلعتي أجمل في الحقيقة عن الكاميرا كمان
ضحكت نيرفانا بخجل ومردتش، المذيعة – مش عايزة نكون سخنين عليكِ ونبدأها بالأسئلة علطول بس الحقيقة أسئلة فانزك ومتابعينك كتيرة اوي وما صدقوا يلاقوا فرصة
– براحتك خالص
– نبدأ بأول سؤال.. مين هي نيرفانا؟ أوصفي نفسك.. طفولتك أحلامك.. أية اللي وصلك لهنا
– أمم.. نيرفانا طفلة صغيرة لأب وأم كانت هي كل حياتهم دلوعة.. حبت التلفزيون والتمثيل من صغرها حبت فكرة أنها تكون معروفة عند ناس كتير وبيحبها ويشوفها ناس كتير، أهلي مكنوش معترضين على الفكرة بس كانوا خايفين عليا، معروف الوسط الفني إنه صعب ولما طربت عرفت أن معاهم حق، في حاجات ورا الكواليس مينفعش تتحكي
– زعلانة إنهم مكملوش معاكي الحكاية؟
– أكيد.. كان نفسي يشوفوا نيرفانا بنتهم بقيت أية، بس هما أكيد في مكان أحسن
– أنتي طلعتي وأتشهرتي بسرعة.. الموضوع دا مخوفكيش؟
– لا.. دايمًا في خيالي كنت راسمة الصورة دي في بالي فلما أتحققت مكنش عندي رهبة كنت مبسوطة
– بيقولوا علشان تاخد لازم تدي.. دفعتي أية علشان توصلي للمكانة دي؟
نيرفانا بضحكة خفيفة – هعتبره سؤال برئ وأجاوب.. مدفعتش غير جهد زيادة وإرهاق، انا ظهرت في وقت الشاشة كانت اعتادت على وشوش معينة ومحتاحة تجديد ويمكن دا ساعدني جدًا
– متابعينك وخصوصًا الشباب مجننهم حاجة واحدة.. أنتي مرتبطة؟
ضحكت و – لحد دلوقتي لا
– وبخصوص إشاعات إمبارح؟
– مش حقيقية.. انا ومهند زملاء بس، وكان فيه سوء تفاهم ما بينا وأتحل في ساعتها بس انتي عارفة الصحافة بقى
– مفيش مشروع ارتباط قريب؟ مش بتدوري على الإستقرار؟ تبقى مامي..
– ما انا عايشة مستقرة اهو ومبسوطة، حاليًا لا نفسي أكمل زي ما أنا كدا
– في إشاعة ظهرت من فترة أن في مخرج حاول يعرض عليكي إنك تتجوزيه عرفي مقابل أجر مادي كبير وشهرة وأمتيازات أسرع.. المخرج دا لقيوه تاني يوم في بيته مضروب لدرجة صعبة جدًا وحاليًا قعد في بيته ومشتغلش تاني.. تفكري دا ليه علاقة بيكِ؟
– معتقدش
– هو رفض يقول مين السبب ورا دا بس في إشاعات بتقول إنه ممكن يكون..
قاطعتها نيرفانا ببعض الحدة – لا معنديش فكرة
– طيب أخر سؤال قبل الفاصل.. من فترة ظهرت صورة لحد طالع من عمارتك وهو متنكر ولابس هودي أسود وحاطط كمامة على وشـه…
ردت نيرفانا قبل ما تكمل – أديكي قولتي عمارتي مش شقتي.. يعني ممكن ميكونش ضيفي انا
خلصت كلامها ببسمة باردة.. هزت المذيعة راسها و – هناخد فاصل صغير ونرجع نكمل حوارنا الشيق مع ضيفتنا
قربت منها جولي و – متقلقيش بعد الفاصل هيكون كله كلام عن الفيلم الجديد
– أووف تمام
– بس برافوا عليكِ ثباتك الأنفعالي ممتاز
– أحمدي ربنا اني مسكت نفسي عن إني اقوم أجيبها من شعرها بالعافية
ضحكت جولي.. ورجعت المذيعة وكملوا اللقاء
****
في مكان تاني كان قاعد سيف الدين في مكتبه فخم جدًا وباين عليه مظاهر الثراء، قدامه شاشة كبيرة وظاهر عليها البرنامج ونيرفانا قدامه بيسمعها ومركز مع كل تفصيلة ليها وبيسمع أجوبتها وردودها بملامح جامدة متضايقة
خبطات على الباب ودخول مساعده ويعتبر دراعه اليمين.. رائف و – تم يابـوص، اعتبر مهند الشامي دا أنتهت مسيرته
هز راسه من غير ما يبصله وخرج التاني
سمع ردها وضحكتها الباردة وهي بتنفي إنها مرتبطة ومش بتفكر في الموضوع دلوقتي، ثـار ومن غير شعور مسك أثرية موجودة على المكتب وبأقوى ما عنده ضربها في الشاشة..
و – ماشي يانيرفانا.. انا هخليكي في أقرب وقت أنتِ اللي بتتمني الكل يعرف بجوازنا وبتترجيني أعمل كدا.. مش انا، وساعتها هشوف مزاجي عايز أية
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية سيف ونيرفانا)
