رواية سيفي الحامي الفصل السابع 7 بقلم منيرة سيف
رواية سيفي الحامي الجزء السابع
رواية سيفي الحامي البارت السابع
رواية سيفي الحامي الحلقة السابعة
*تاني يوم*
سيف – ليلو قومي بقا انتي نومك تقيل ليه كده
ليل وهي بتتمطع – صباح الخير
سيف – ده ياصباح الهنا ايه القمر ده
ليل – ايه التلزيق ده
سيف بقرف – تلزيق عندك حق مانا اللي غلطان بردو
ليل – جابو الاكل
سيف – ده اللي همك حقك طبعا مانتي نايمه مرتاحه ع السرير محدش قدك
ليل – قر بقا قر ع النووومههه
سيف – طب ع الاقل يعني اعزمي عليا مره انام عليه
ليل – إن شاء الله
سيف – طب قومي اغسلي وشك يختي عشان نفطر
*سيف كان قلقان ع طريقتها بعد مااعترف احسن تتغير بس الحمد لله لسه دبش زي ماهي*
ليل – لو مجتش هاكل الاكل لوحدي
سيف – بجيب مايه استاذه طفاسه
ليل – نسيت اسالك عملت ايه ف الشغل انبارح
سيف – والله كان تمام الحمد لله وهنخلص العقود النهارده
ليل – طيب كويس وشي حلو عليك
سيف – هو ف ف حلاوة وشك ياليلو
ليل بكسوف – كل ياسيييف
*بعد الأكل نزل سيف يخلص العقود وخلص وطلع*
سيف – ليل واخيرا خلصت الشغل نهائي هفضالك بقا بت ياليل انتي فين
*دور عليها ف الغرفه كلها ملقهاش وقلق نزل رن عليها مردتش نزل جري للرسيبشن وسأل عليها محدش عارف هي فين فضل يرن لحد ماردت*
ليل – ايوه ياسيف خلصت
سيفربخصه – انتي كويسه
ليل – ايوه انا كويسه ف ايه
سيف – انتي فين
ليل – الله انا قاعده ف الرسيبشن بشرب بتاع غريب كده
*فضل يدور عليها بعيونه لحد مالقلها وراحلها*
سيف – انتي ازاي تنزلي من غير ماتقوليلي
ليل – مرضتش ازعجك وانت قاعد لشغلك ف نزلت وقولت هتشوفي زي المره اللي فاتت وانا كنت بتصور ف مخدتش بالي انك طلعت
سيف – هو ايه الهبل اللي انتي بتعمليه ده انتي عارفه انا قلقت ازاي كان ممكن تبعتيلي مسدج لكن ازاي بتحبي تعملي اي حاجه تضايقني ودماغك دايما مبتفكرش صح
*فضلت ليل ساكته وبصاله صوته علي زياده عن اللزوم وابتدت الناس تبصلهم حطت وشها ف الارض وقامت وطلعت فوق تدارك سيف اللي عمله حاسب ع مشروبها وطلع وراها وهو مش عارف هيعمل ايه بس عصبيته غصب عنه من خوفه وقلقه عليها*
سيف – ليل
ليل بدموع – لا بص متتكلمش معايا ولو سمحت لو سمحتت اجتنبني خالص لحد ماتخلص شغلك
سيف – خلصت النهارده
ليل – حلو اوي مبروك احجز طياره عشان عايزه اروح
*هنا قامت ليل تلم ف حاجتها*
سيف – انتي بتعملي ايه
ليل – زي ماسمعت كده عايزه اروح احجز طيارة بكره مش هقعد هنا يوم زياده
سيف – طب صلى ع النبي واهدي
ليل – عليه افضل الصلاة والسلام وانا هاديه وجدا بس عايزه اروح ومتناقشنيش
سيف – والله يحبيبتي قلقت عليكي مش اكتر حقك عليا
ليل بدموع وسخريه – اه حلوه دي كل مره تهيني قدام الناس والناس تشوفك وانت بتهزقني وترجع تقولي حقك عليا وانا زي الهبله بعديها بس المرادي بقا لا ياسيف عشان كبرت منك اوي وانا خلاص تعبت مش كل شويه تهيني ف حته شكل مره ف المكتب ومره هنا
سيف – طب اهدي عشان خاطري وتعالي نقعد نتكلم
ليل – متلمسنيش وسيبني لو سمحت اقولك انزل اقعد تحت انا بصراحه مش عايزه اشوفك
سيف بزعل – كل ده
ليل – هو انت ازاي اصلا مستهون بالموضوع. تعالي نتخيل كده اني كل شويه اهينك قدام حد وازعقلك كده واخليك ف نص هدومك قدام الناس
سيف – طيب خلاص انا غلطان اقعدي طيب نتكلم انا والله خوفت وقلقت مش اكتر ونزلت سألت عليكي وقعدت ارن مردتيش قلقت اكتر خصوصا اننا ف مكان غريب مش هتعرفي حتى تتواصلي انا غلطان اه بس غصب عني والله واوعدك مش هعملها تاني وهخلي بالي
ليل بحزن – تعرف انك دايما شايفني غبيه ومبعرفش اتصرف ودايما بفكر غلط
سيف – لا لا والله ماصح خالص انا بس من خوفي عليكي وخوفي انك تضري ف يوم مش اكتر والله متخليش دماغك تقولك كلام مش حقيقي
ليل – ماشي يا سيف لو سمحت عايزه اروح
*مسك سيف دراعها براحه وقعدها وقعد قدامها*
سيف – هاتي ايدك
ليل – لا
سيف وهو بيمسك ايديها – حقك عليا متزعليش وانا والله هسيطر ع نفسي بعد كده بس خليكي فاهمه ان انا كنت خايف وقلقان عليكي مش اكتر
وادي يستي بوسه لايدك دي وبوسه لايدك التانيه وبوسه لراسك وبوسه ل..
ليل وهي بتبعد – ايهههه ايه هتروح فينن
سيف – انتي نيتك مش حلوه ليه كنت هبوس مناخيرك عادي
ليل – ايه القرف ده
سيف – تيجي نخرج بقا عشان نحتفل اني خلصت شغل
ليل – هو انا هيبقا باين عليا هبله هو وانا برجع اللبس للدولاب تاني
سيف – جدا
ليل – مش مهم كله لاجل كوريا انا اصلا مش عايزه اروح
*خلص الاسبوع مابين تجربة اكلات مختلفه وزيارة اماكن كتيره وشوبينج وهدايا لأهلها وقدرت ليل تعمل البوم لصور كتيره اوي ليهم سوا وللبلد قربوا من بعض اكتر وحب وتعلق سيف بيها زاد اكتر وكان بيحاول انه يساعدها تعرف حقيقة مشاعرها بأنه يلبي ليها طلباتها يكون معاها كويس يبطل يزعقلها وبينلها قد ايه هي ف نظره انثى مش مجرد الطفله اللي كان بيلاعبها او بنت خالته اللي زي اخته اما ليل أجلت كل التفكير وحاولت تستمتع بالرحله ولكن مكانتش قادره تمنع نفسها حاسه انها فرحانه بإعترافه واللي قاله بس ف نفس الوقت خايفه تديه فرصه عشان هي لسه متعرفش احساسها بيه حب اخوي ولا حب من النوع التانيي*
*قبل الرجوع بيوم*
ليل – سيف
سيف – عيونه
ليل – تعالى نام هنا
سيف – ايه
ليل – تعااالى نام ع السرير
سيف – قولي والله
ليل – والله
سيف – اشمعنا بقا
ليل – بكره ف سفر وانت شكلك تعبت من نوم الكنبه ف مجتش من يوم وكلها اصلا كام ساعه ونقوم
*قام سيف بسرعه ونام جنبها*
سيف – بصي مش هتحرك من مكاني زي مانا لحد الصبح
*منامتش ليل بسهوله لكن ف نهاية المطاف نامت*
*بعد شوية صحيوا الاتنين ع صوت المنبه ونقدر نقول ان كان بينهم فاصل 3 سم تقريبا المختلف المرادي ان ليل فتحت عيونها ولقيته باصص ليها ولكن متحركتش ومع ان عيونه كانت عاديه بس خدتها ف دنيا تانيه وسرحت فيهم شويه*
سيف بهدوء – وانا كمان عيونك خطفوني
*فاقت ليل من سرحانها وقامت بسرعه*
ليل بتوتر – احم يلا قوم عشان منتأخرش بقا
*مسك ايديها وهي بتقوم*
سيف – ليه بتقاوحي نفسك ليه بتجبريها انها ترفض وليه بتقنيعها بحاجه مش حقيقيه غصب عنها
ليل – بس انا مش بعمل كده وع فكره انا بحاول وبفكر بس محتاجه وقت والله اعلم هوصل لإيه يمكن مش ببين كده لكن انا فعلا بفكر
سيف – ماشي ياليلو خدي وقتك انا كده كده مستنيكي مش هحلك
ليل بضحك – طب قوم عشان منتأخرش
*خلصوا ترتيباتهم وركبوا الطياره وبعد ساعات وإجراءات كتير وتعب كانوا وصلوا للبيت وبعد ما استقبلوهم اهلهم وسلموا عليهم*
نور – ياليل جبتيلي الحاجات اللي قولتلك عليها
ليل – وانا اقدر انساها بردو جبت كل حاجه
الماما – طيب يحبايبي يلا عشان ترتاحوا شويه بقا م السفر مادام مش قادرين تاكلوا
*رجعت فريده هي وسيف لشقتهم وليل بعد ماخلصت حكاياتها مع نور ووريتها الهدايا بتاعتها وبتاعت مامتها راحت ف سابع نومه*
*عند سيف
فريده – ايه الاخبار
سيف – اخبار ايه
فريده – قولتلها
سيف بضحك – قولتلها
فريده بفرح – بجد طب ايه قالتلك وانا كمان
سيف بحزن – لا قالتلي هفكر
فريده – يابنت الورده
سيف بضحك – حلوه دي
فريده – مابدل مااشتم اختي طب انت قلقان
سيف – من ناحية قلقان ف اكيد بس هي بردو مبررها قوي
فريده – وايه هو بقا
سيف – شوفي عايشين بقالنا قد ايه سوا كنا اخوات وانا دايما كنت بحاول اعوضها عن ابوها ف شافتني اخوها الكبير لما اجي فجأه كده اقولها بحبك اكيد لازم تفكر وتتلغبط ومتوافقش كمان بس انا املي ف ربنا كبير وواثق انه ع الاقل ف 30% امل ومستنيها
فريده – هقولك ع حاجه مادام بتحبها اوعى تيأس هما بيقولوا لا حياة مع اليأس والحب نفس الكلام لا حب مع اليأس لانك لو يأست يبقا مبتحبهاش وانا شايفه انها بتحبك بس المشكله انها مش عارفه او يمكن عقلها مش مستوعب تسيبك م الموضوع ف حاله واحده لو قلبها خلاص رفضك وبقت لغيرك وايديها فيها دبله من حد تاني اقولك ساعتها سيبك منها وربنا هيرزقك بنصيبك يحبيبي وإن شاء الله انا متفائله خير ربنا يريح قلبك يحبيبي ويقربلك البعيد يارب ويجبر بخاطرك عاجلاً ليس اجلاً
سيف – ربنا يخليكي ليا يفيرو يارب وحاضر مش هيأس
فريده – نام شويه بقا اكون انا عملتلك اكله حلوه كده لما تصحى تاكل
*تاني يوم الصبح*
سيف – ايه يبنتي مبترديش من اول مره ليه
ليل – ف ايه ياسيف حرام عليك عايزه انام ف حد يرن ع حد الصبح كده
سيف – نعم يختي نوم ايه انتي مش وراكي شغل
ليل – شغل اه الشغل ينهار ابيض
سيف – نهار ابيض دانتي نهارك تركواز معايا قومي يزفته اللبسي قدامك نص ساعه والاقيكي قدامي
ليل – حاضر حاضر سلام
*قامت ليل بسرعه وحاولت تجهز ف النص ساعه ولكن….*
سيف – متأخره ربع ساعه ومأخراني معاكي ف مخصوملك نص يوم
ليل – حيث كده بقا اخصملي النص الباقي انا داخله اكمل نوم
سيف وهو بيمسكها من قفاها – خدي يبت
ليل – اوعى يخربيتك بليزر نور هتفضحني
سيف – قدامي احسنلك
ليل – اوعي طه
*وصلوا الشركه*
اسماء – السفريه كانت حلوه
ليل – كانت تحفههههه وراجعه متحمسه للشغل جداااا حتي جايه متأخر ربع ساعه واتخصملي نص يوم
اسماء بضحك – ينهار ابيض
ليل – استاذ سيف مبيرحمش
اسماء – ع رأيك
*خلص اليوم استنيته ليل وبعد ماركبوا العربيه*
ليل – الجو ف كوريا كان تحفه هنا حر شويه
سيف بضحك – دي حقيقه اصلا نومة البلكونه كانت عجباني
ليل – طب بقولك ايه جبلي ايس كريم
سيف – لازم لازم
ليل بدلع – لازم لازم
سيف – يخلاصو ده من عيني خليكي هنا هنزل اجبلك واجي ع طول
*نزل سيف ومشالتش عيونها م عليه جاب الايس كريم وهو بيعدي شاورلها بيه من بعيد وفجأه خبطته عربيه الناس اتلمت نزلت ليل جري وهي مفزوعه محستش ازاي وصلتله ومكنش ع لسانها غير اسمه قعدت جنبه وحاولت تفوقه لكن مفيش فايده رنوا ع الاسعاف لكن ليل مستنتش بمساعدة اتنين م اللي واقفين ركبوه عربيته وركبت جنبه وواحد م اللي ساعدها ساق العربيه لحد المستشفى فضلت تقرأ قرآن وتدعي انه يبقا كويس وصل المستشفى كشفوا عليه اكتشفوا انه ف غيبوبه ولازم يدخل العنايه وده اللي حصل كلمت ليل مامتها وقالتلها وبعد شويه كلهم جم*
فريده بعياط – ابني ماله ياليل والنبي طمنيني عليه
ليل بعياط – انا اسفه يخالتو انا السبب سامحيني انا اسفه حقك عليا
نهى – بس يا ليل وحدوا الله هيبقا كويس ربنا قادر ع كل شئ
*طلع الدكتور جريوا عليه*
فريده – طمني ع ابني يدكتور الله يخليك هو كويس صح
الدكتور – اهدوا يجماعه الخبطه كانت شديده جدا ف للاسف اتسببتله ف غيبوبه الله اعلم هيفوق منها امتى بس ان شاء الله قريب انتوا بس دعواتكم كان ف جرح ف دماغه الحمد لله مش كبير واتخيط ورجله للاسف اتكسرت وجبسناها وهو حاليا ف العنايه لحين فوقانه وإن شاء الله خير
*كلهم انهاروا وبالذات ليل لأنها حاسه انها السبب*
نهى بعياط – استهدوا بالله يجماعه قومي يفريده وحدي الله تعالي نصلي وندعيله وإن شاء الله خير يحبيبتي ربنا كبير
ليل – هاجي معاكوا
*نزلوا كلهم يصلوا اما نور راحت تشوف المصاريف*
*عدي اسبوع وهو ع نفس الحال الدكتور بيقول انه بيتحسن لكن لسه مفاقش مفارقتهوش ليل الا قليل ومن كتر حزنها خست وشكلها اتغير والحزن اتملك منها وف عز حزنها مكنش مصبرها غير صلاتها وقربها من ربنا و ايقنت ان ده الطريق الصح كان اسبوع واحد اه بس اتغيرت تماما للأصلح وكام اول قرار صك انها غيرت لبسها واتحجبت اما فريده مقهوره ع ابنها بس ربنا مصبرها*
*كانت واقفه ليل كالعاده بتبص ع سيف من بره وبتقرأله قرآن وتدعيله وجت عند الايه دي ومقدرتش تمسك دموعها*
– “قَالَ مَنْ يُحْيِي الْعِظَامَ وَهِيَ رَمِيمٌ قُلْ يُحْيِيهَا الَّذِي أَنْشَأَهَا أَوَّلَ مَرَّةٍ وَهُوَ بِكُلِّ خَلْقٍ عَلِيمٌ”
*فضلت ليل تعيط شويه وتدعي وهي باصه ع سيف وفجأه ربنا استجاب لدعوتها ولقته بيحاول يحرك ايده وبيفتح عينه*
ليل – الله اكبر الله اكبر *جريت تنده ع الدكتور* يادكتورر يادكتورر سيف فاق
*جري الدكتور وكشف عليه ولقاه واعي بس محتاج يرتاح بص سيف ع ليل وشافها بتعيط كان بيبصلها وعيونه بتقولها وحشتيني خرج الدكتور وقالها انها ينفع تدخله*
ليل بعياط – سيف يحبيبي الحمد لله ع سلامتك انت كويس صح انا كنت هموت ياسيف انت كويس طمني عليك
سيف بهدوء – اهدي يحبيبتي انا بخير متقلقيش
ليل وهي بتبوس ايديه بحزن – وحشتني يا سيف حقك عليا انا السبب انا اسفه مكنتش اعرف والله
سيف – بطلي هبل بقا ده قدري يحبيبتي وانا كويس اهو الحمد لله شوية وقت وهرجع زي الاول
ليل – إن شاء الله يحبيبي استني هكلمهم يطلعوا هما تحت بيدعولك ف المسجد استنى
*كلمتهم وقالتلهم وطلعوا جري*
فريده – يحبيبي يبني كده ياسيف توجع قلب امك عليك انت بخير يحبيبي طمني عليك حاسس بإيه
سيف – متقلقيش يحبيبتي انا كويس اتطمني شوية وقت وهبقا تمام
نهى – الف سلامه ياسيف الف سلامه يحبيبي ربنا يقومك بألف سلامه يارب
نور – سلامتك ياسيف مش متخيل خالتو وليل كانوا هيموتوا عليك ازاي
سيف – بعد الشر عليهم انا مليش غيركم
*فضلوا قاعدين معاه وهو ينام شوبه ويصحي شويه والدكتور يديله ادويه وفريده تأكله لحد ماتعبوا وناموا لكن ليا فضلت جنيه خايفه يحتاج حاجه شويه ودخلت الممرضه بالعشاء والعلاج*
ليل – سيف قوم يحبيبي اتعشى وخد الادويه ونام تاني
*صحي سيف و عدلتله ليل قعدته وقعدت تأكله وكان بيبصلها وبيتأمل*
سيف – شكلك حلو اوي بالطرحه
ليل بإبتسامه – مانا مش ناويه اقلعها تاني
سيف بفرحه – بتهزري صح
ليل وهي بتأكله – تؤتؤ بتكلم بجد
سيف – اغيب اسبوع ارجع الاقي الحلاوه دي كلها
ليل – ربنا مايعيده يارب يحبيبي يارب انا ملقتش غير ربنا اللي كان جنبي والصلاه والقرآن كانوا مهونين عليا كتير وخلوا عندي امل رهيب انك هتبقا كويس وبخير وفعلا ربنا استجاب دعواتي وبعد اسبوع انا عيني ف عينك اهو عيونك اللي وحشوني
سيف – بس انا ملاحظ يعني ان من ساعة مافوقت وانتي بتقولي حبيبي ووحشتني وخوفك وحزنك عليا باين اوي اوي كمان وفرحتك لما فوقت مكنتش طبيعيه وبتقولي كلام حلو غير عادتك ده كله بردو عشان انا اخوكي مش كده
ليل بكسوف – تؤ المرادي مش عشان اخويا المرادي عشان بحبك ياسيف بحبك بجد وموافقه ابقا مراتك مش هلاقي زيك ابدا انا متأكده وكمان اتاكدت من مشاعري وعرفت اني بموت فيك كمان مش بحبك
سيف بهزار – ااااخخخ ياقلبيييي لا ناديلي الدكتور بسرعه
ليل – بعد الشر عنك يعيوني
سيف – كمان عيوني دانتي اللي عيوني والله هرمنا والله من اجل هذه اللحظه كنتي قولي كنت خدتلي اسبوع غيبوبه من بدري
ليل – تؤ متقولش كده بقا بعد الشر عنك يارب ربنا يبعد عنك اي شر يحبيبي وتفضل جنبي
سيف – طب مفيش بوسه ع الماشي
ليل – انت شايف ان ده لايق ع الحجاب اللي لبسته مش هتشوف شعرايه الا بعد كتب الكتاب يحبيبي
سيف – يستي موافق بكره الماذون ييجي نكتب الكتاب ولما اخف الفرح
ليل – ايه ايهههه بالنسبه للترتيبات والحاجات الكتير اللي بتتجاب وانا كعروسه مش المفروض اظبط نفسي
سيف – لو ع الترتيبات ف الشقه جاهزه والفلوس جاهزه ننزل نشتري الأساسيات اللي تعيشنا ونتجوز ونرتب شقتنا سوا ولو عليكي كعروسه فانا بعشقك ومظنش ف ليفل حلاوه هتوصليله اكتر م الحجاب ده. فريدددددهههه اصحي يفريدددددههه
*صحيوا كلهم من الصوت*
فريده – ايه ف ايه انت كويس
سيف – باركولنا يجماعه كتب كتابنا بكره
*صمت عم المكان للحظات بعدين قالوا كلهم ف صوت واحد*
– كتب كتاب مين
سيف – انا وليل
ليل – انا معرفوش
فريده – انتوا بتتكلموا بجد
سيف – اه والله
نهى – يعني البت حنت عليك خلاص
سيف بشك – حنت عليك ف حد قالك حاجه يخالتو
نهى – فريده حكتلي ع كل حاجه
سيف – دي اخرة اللي يقول لامه ع سر بس مش مهم المهم ان الانسان نال مراده اخيرا احب اقولك يخالتو بنتك طلعت عيني وعين اهلي
فريده – يبقا نجيب الماذون بكره
نهى – انتي عبيطه يفريده ازاي يعني
سيف – يخالتو يحبيبتي انا جاهز والشقه جاهزه هنكتب الكتاب وبعد كام يوم اخف ونعمل فرح ابن لذينه بالله عليكي وافقي قبل مابنتك تغير رأيها
نهى – انت جبت شقه من ورانا
سيف – لا ما جارنا مشي اللي كان قدامنا ده ف الشقه وانا قولت للمالك اني هاخدها
نهى – امممم ايه رأيك ياليل
ليل بكسوف – اللي تشوفيه يمامي
سيف بفرح – الله اكبر قالتلك يمااامييي
فريده – ولا براحه ع نفسك عشان متتعبش
سيف – طب مينفعش نجيب المأذون دلوقتي
ليل – نام يحبيبي وصلي ع النبي بكره يبقا يحلها ربنا
سيف بفرحه – ماماااا سامعه بتقولي يحبيبي
فريده بضحك – اتقل يولا متبقاش مدلوق كده
ليل – ماتسيبيه مدلوق يخالتو ايه شغل الحموات ده بقا هو انا حبيته ليه ماعشان دلقته
سيف بفرحه – ماماااااا خدتي بالك من حبيته دي
*قعدوا يهزروا شويه لحد ماناموا*
*تاني يوم شافه الدكتور وقالهم أن حالته اتحسنت كتير الحمد لله وممكن بكره يتكتبله خروج*
سيف – ليل موبايلي فين
ليل – اهو والعربيه نور وديتها للجراش
*رن سيف ع عمر*
سيف – الو يعمر
عمر – ايوه ياسيف الحمد لله ع سلامتك سامحني يحبيبي معرفتش اجي لما فوقت والله شايل الشركه بدالك ومتقلقش عليها ماشيه زي الفل
سيف – عمر اسمعني ضروري هتسيب الشركه دلوقتي وتروح تجبلي مأذون بسرعه وتيجي ع المستشفى يلا مستنيك
ليل بصدمه – انت بتعمل ايه
فريده – والله كنت عارفه انه بيتكلم بجد
نهى – والله يبنتي انتوا الاتنين مجانين ولايقين ع بعض وانا موافقه
نور – وانا كمان
*بعد شويه عمر جه وجاب المأذون وبعد محايلة سيف لليل وافقت اخيرا وكتبوا الكتاب*
المأذون – بارك الله لكما وبارك عليكما وجمع بينكما في خير إن شاء الله
*زغرطوا كلهم اما سيف سحب ليل لحضنه وشدد عليها وهمسلها*
سيف – اهو الحضن ده كنت هموت واعمله اول مافوقت بس طعمه بالحلال احسن بكتير
ليل – ينفع اقولك بحبك تاني
سيف بهزار – تعالي ندخل مسابقه مين هيقولها اكتر
ليل بضحك – بعد مايمشوا بقا
نهى – ماخلاص يالا انت ماصدقت
سيف – ابعدي خالتو عني يماما
فريده – ماتسيبي الواد ينهى ماخلاص بقت مراته
سيف – اااااخ خدتي باله من مراته دي
ليل – دخلت قلبي
سيف – والله انتي اللي دخلتي قلبي
*فكوها من حضنه بالعافيه وباركوله وباركولها وسابوهم لوحدهم شويه مراته بقا لكن دخلت عليهم الممرضه بالغدا والعلاج*
ليل – يلا بقا عشان تاكل وتاخد العلاج
سيف – مش هاكل
ليل – وده ليه بقا
سيف – انتي بقيتي مراتي
ليل بكسوف – امممم
سيف – مش هاكل بقا الا لما اخد بوسه
ليل – سيف متهزرش احنا ف مستشفى
سيف – بتهزري مانا عارف بردو مش هاكل
ليل – طيب معلش كل ولما نروح هديك 2
سيف – لا سوري انا مضمنكيش
ليل – تؤ سيف مترخمش بقا
سيف – خلاص اشطا والله ماهاكل
ليل – طب بتحلف ليههه
سيف – عشان مش هاكل فعلا
ليل – طب خلاص
*قربت ليل عليه وادتله بوسه ف خده بسرعه ورجعت*
سيف – ده ايه لامؤاخذه
ليل بكسوف – بوسه
سيف – ومكسوفه اوي ده اسمه كروته
ليل – لا بقا امال انت عايز ايه
سيف وهو بيشاور ع بوقه – بوسه هنا
ليل – ده عندها
سيف – عند مين
ليل – فريده
سيف – طب وحياتها مانا واكل غير بيها
*عندت ليل قصاده شويه وهو مصمم وف الاخر لبت رغبته*
ليل بمحاوله منها انها تداري كسوفها – ممكن تاكل بقااا
سيف بفرحه – ماشي
*فضلوا كده يومين سيف يتدلع عليها وهي مضطره تسايسه عشان علاجه كتبله الدكتور ع خروج ووصاه يخلي باله من رجله لحد مايرجعله كمان شهر يفك الجبس روحوا ع البيت*
*تاني يوم من وصولهم ف التليفون*
سيف – بت يمراتي
ليل – نعم يعيونها
سيف – تعالي اكليني
ليل – الله مانت بقيت كويس تقدر تاكل لوحدك
سيف – لا ايدي وجعاني تعالي اكليني
ليل – حاضر بعملك حاجه حلوه هحطها ف الفرن واجيلك
سيف بفرحه – مستنيكي يمراتي
ليل بضحك – باي يجوزي
*خلصت ليل وراحتله وقالت لنهى تخلي بالها من الحاجه*
فريده – ادخلي يختي بيتدلع ومش راضي ياكل غير لما تيجي ربنا يكون ف عونك خلفتي من قبل ماتتجوزي
ليل بضحك – دعواتك والنبي يفيرو شكلي اتسرعت
*دخلتله ليل*
ليل – حبيبي مش راضي ياكل ليه
سيف – مستني مراتي تأكلني
ليل – مراته جت يلا بقا
سيف – انتي لبسالي الطرحه ليه زيادة ايمان ده يعني ولا ايه
ليل وهي بتفك طرحتها – بنسى والله
سيف – اااخ قلبي الصغير لا يتحمل
ليل – خلاص نلبسها تاني
سيف – لا خلاص بيتحمل عادي معقوله هشوف كل الجمال ده لوحدي بعد كده
ليل – محسسني انك اول مره تشوفني بشعري
سيف – وده اللي حاسه قعلا مش عارف ليه حرفيا ربنا بيعوض ياليل ويامحلى عوضي وهو انتي والله
ليل – انا اللي اتراضيت واتعوضت بيك عن كل الهموم اللي شوفتها ربنا جبر قلبي بيك وناويه اشيلك ف عيوني وقلبي كمان
سيف – كتري بقا م الكلام الحلو ده هتلاقيني بخف اسرع
ليل – بحبك
سيف بضحك – كده ممكن اقوم امشي ع رجلي دلوقتي
*عدى شهر وطول الشهر ده وصى سيف صنايعيه يظبطوا الشقه ويخلصوها ف اسرع وقت وفعلا خلصت لأنها مكنش فيها شغل كتير وكمان جهزوا حاجات كتير اوي وليل جابت لبسها كامل ومتبقاش ليهم غير رفايع بسيطه هيجهزوها مع الوقت وقرروا انهم مش هيعملوا فرح هيهيصوا شويه وليل هتجيب فستان سيمبل وهيقضوا شهر العسل ف المالديف زي ما ليل حبت فك سيف الجبس وبقا كويس وعملوا الزفه سلمت ليل ع اهلها وسافروا*
*ف الشاليه*
ليل – ينهار ابيض يا سيف ع الحلاوه
سيف – عارفه الاحلى منها ايه
ليل – ايه
*شدها سيف ع السرير جنبه وحضنها*
سيف – اني قادر انام جنبك ع السرير واحضنك وابوسك عااااادي جدا ومحدش يقدر يكلمني
ليل بضحك – ده اللي همك
سيف – طبعا كل حاجه خاصه بيكي تهمني وليها الاولويه كمان
ليل – عارف بقا احلى حاجه بالنسبالي ايه
سيف – ايه
ليل – اني اخيرا حسيت وفهمت يعني ايه امان ويعني ايه ابقا متطمنه وانا هنا ف حضنك وعرفت كمان ان كل اللي كنت بحس بيه كان حب بجد مش حب اخوي زي ماكنت فاكره وبحمد ربنا اني مضيعتكش من ايدي
*بعد شهر من سفرهم مكنوش عايزين يرجعوا ولأنهم ميقدروش يعيشوا من غير مايرخموا ع بعض ف كانت رخامتهم اكتر من حبهم ف بعض بس ده تعبيرهم عن الحب بعد مارجعوا من السفر*
فريده – مفيش نونو هنا نونو هنا كده يعني
*بصت ليل لسيف بكسوف كأنها بتقوله اتكلم*
سيف – انا وليل يماما قررنا هنأجل الخلفه شويه عايزين نعيش مع بعض الاول نفهم بعض اكتر ونفهم اسلوبنا و طريقتنا ومنها بردو نستمتع شويه وبعدين نجيب بيبي
نهى – والله يحبيبي مادام انتوا كده مبسوطين خلاص دي حياتكوا انتوا
سيف وهو بيحاوط ليل – طيب بقا انا هاخد مراااااتيييي ونروح شقتناااا حد عايز حاجه
نهى وفريده بضحك – لا يحبيبي سلامتكوا ربنا يهدي سركوا يارب ويسعدكوا
ليل وسيف – امين يارب
سيف وهو بينام ع السرير – اااااه مش مصدق نفسي معقوله بقيتي مراتي خلاص وقاعدين سوا ف شقتنا اللي هنملاها عياال وهنبقا بابا وماما
ليل وهي بتنام جنبه – لو كان حد قالي كده من 4 شهور بس مكنتش صدقته وقولت عليه اهبل بس عارف ترتيبات ربنا اجمل بكتير اوي يا سيف مرضيه كده وتحس ربنا بيطبطب عليك ف نهاية الطريق
سيف وهو بيضمها – والله انا اللي ربنا طبطب عليا بزوجه جميله زيك ياليلتي وطريق نهايته سعاده متمنهاش ابدا مع حد غيرك مش هتبقا سعاده اصلا لو مع غيرك.
__________________________
*وتوته توته خلصت الحدوته حلوه ولا ملتوته 🌚🤎*
نهيناها بسعاده كعادتنا مبحبش انكد عليكوا ابداً وبمسك نفسي بالعافيه والله 😂🤎
اتمنى تكونوا استمتعتوا وتكون روايتي خفيفه ع قلوبكم واتمنى كمان اشوف رأيكم الحلو عشان اكمل 🥹🤎
إلى اللقاء ف روايه اخرى إن شاء الله 🫶🏻🤎
لقراءة الرواية كاملة اضغط على : (رواية سيفي الحامي)
