رواية سلف ودين الفصل السابع عشر 17 بقلم لولو محمد
رواية سلف ودين الجزء السابع عشر
رواية سلف ودين البارت السابع عشر
رواية سلف ودين الحلقة السابعة عشر
فى شقه نور
محمد / انت بانهى وش جاى تانى
مروان / زى ما دخلنا بالمعروف نخرج بالمعروف
محمد / انا مش هسيب قشايه من حق بنتى
مروان / و انا مش ناوى اكل عليها حقها
امانى / و حق القلم اللى اديتهولها قدام الناس يا سى مروان
مروان / هى اللى ابتدت
محمد / بكره الصبح هجيب المحامى و نستلم عفش بنتى و مؤخرها
امانى / و هو العشر تلاف اللى انت كاتبلهملها دول مؤخر
مروان / هو انا ممكن اتكلم مع نور مره اخيره
محمد / ما افتكرش فى كلام ممكن يكون بينك و بين بنتى و نورت اتفضل
مروان / هستنى حضرتك بكره عن اذنك
مروان يمشى
امانى / ادى اخره ان ما حدش بيسمع كلامى
………………………………..
بعد فتره
فى محل فساتين
سمر / انا شايفه ان ده احلى يا أية
أية / بس دا غالى اوى يا ماما
سمر / الغالى يرخصلك يا قلب امك هو انتى بتتجوزى كل يوم
البياعه / على فكره بيبقى حلو اوى فى اللبس
سمر / انا عاجبنى خشى قيسيه
أية / ايه رايك يا عمر
عمر / قيسيه
أية / ماشى
أية تاخد الفستان و تروح مع البياعه و هى مبسوطه على الاخر
سمر / ههههههههههههههههههههههه ربنا يديم عليكى الفرحه يا بنتى حقه يا عمر لو خلصنا الفستان نطلع على الكوافير و نحجز عشان ننجز
عمر / هتحجزى الكوافير ازاى و احنا لسه ما حجزناش القاعه
سمر / يووووه نسيت و انت مستنى ايه يا عمر الله
عمر / باذن الله بكره و لا بعده اخد على و نلف
سمر / لا لا لا ما تاخذنيش يا عمر المفروض فى مشوار زى ده تاخد أية معاك الله مش هى العروسه و لا ايه
عمر / ربنا يسهل
سمر / على فكره لو الفستان غالى بناقصه على فكره
عمر / اللى يعجب أية هشتريهولها
سمر / يخليك ليها يا جوز بنتى
أية تطلع زى الملايكه
أية / ايه رايك
عمر / حلو اوى بكام ده
سمر / بخمس تلاف بس
عمر / ماشى هناخده
البياعه / معاد الفرح امتى
عمر / لسه ما اتحددش
البياعه / امال هتحجزه على اساس ايه
أية / هو ده مش بيع
البياعه / لا ده سعر الايجار بس فى منه للبيع
سمر / ايوه هو ده بكام بقى
البياعه / بخمسه و عشرين الف
أية / ليه يعنى لا طبعا دا هيتلبس مره واحده يعنى
أية تبص لعمر
أية / مش مشكله ادينا خدنا فكره لما نحجز القاعه نيجى نحجزه
عمر / اللى تشوفيه
سمر / يا سلام
أية / هروح اللبس بقى
سمر / يعنى هى أية تقل ايه عن البنات اللى بيجيلهم فستان جديد يعنى
عمر / هو انا قولت لا
سمر / و لا تقول قال يعنى مش مطبخين كل حاجه سوا
عمر يبصلها و ما يردش اية تطلع من البروفه
أية / يلا
عمر / يلا
………………………………
فى شقه ندى
ندى قاعده بتتفرج على التليفزيون على فيلم سويت نوفمبر حسام يروح يقعد جنبها
حسام / انا شوفت الفيلم ده قبل كدا
ندى ساكته
حسام / البطله هتموت فى الاخر هى اصلا عيانه
ندى تبصله
حسام / ايه رايك نخرج نروح السينما و نتعشى بره
ندى / انا لو قادره اقوم من مكانى كنت قمت من اول ما قعدت جنبى بس واضح ان مفيش مفر هدخل انام عن اذنك
حسام / ندى
ندى / نعم
حسام / الشقه خلصت خلاص و بيفرشوها
ندى / مبروك عن اذنك
ندى تدخل و تقفل الباب
…………………………………..
فى شقه عمر
سمر / انتى عاوزه تجننينى فى واحده تعمل كدا
أية / و انا كنت عملت ايه
سمر / يعنى لا شبكه و لا مهر و لا مؤخر و لا حتى فرح عليه القيمه
أية / ممكن لو سمحتى توطى صوتك
سمر / لا ما اوطيش صوتى هو مرخصك كدا ليه لو كان ابوكى عايش كان هيرضى بالوضع ده
أية / يا ستى انا راضيه اصلا هعمل ايه بفستان شرا يعنى هو انا هلبسه كل يوم دانا اصلا كنت مستغليه الخمس تلاف ايجار
سمر / هى الخمس تلاف دول فلوس
أية / انا اصلا الموضوع ده مش فارق معايا
عمر يطلع من الاوضه جوه و يمشى و يقفل الباب
أية / عاجبك كدا زمانه زعل
سمر / ما يتفلق لو ما كنتيش رخصتى نفسك له من الاول ما كانش ده بقى حالك و يعالم يمكن كان جالك غيره اللى يتاقلك بالدهب
أية / و مين قالك ان غيره كان يفرق معايا تصبحى على خير
سمر / فقريه من يومك
…………………………..
فى الشقه فوق المحل
على نايم على سريره و عمر نايم على سريره
على / خمسه و عشرين الف عفريت اما ينططوها هى فاكره نفسها ايه
عمر / انا ازاى كان فيتانى حاجه زى دى
على / ما داهيه لتكون بجد ناوى تجبهولها ليه يابنى فوق انت وراك لسه قاعه و كوافير و استوديو و زفه و شهر عسل انا اه قولت هديك اللى انت عاوزه بس انت كدا بتافور و انا مش هقدر اساعدك
عمر / انت بتتكلم فى ايه يا على انا بتكلم عن الشبكه أية ما جالهاش شبكه
على / شبكه ؟؟
عمر / هى مش عروسه فى عروسه بتتخطب من غير شبكه دا احنا حتى ما اشتريناش دبل دهب حتى
على / لا فى دى معاك حق اه لكن فستان بخمسه و عشرين الف اوفر اوى يا عمر
عمر / كانت زى الملاك و هى لبساه
على / انت حالتك صاعبه اوى
عمر / عارف انا سمر رايها عندى فى الجزمه و أية قالت نستنى اما نحجز القاعه و نيجي ناجره
على / طب ما هى بت جدعه اهى امال فارق معاك فى ايه بقى
عمر / عنيها و اللمعه اللى انطفت هى ما بينتش بس انا شوفتها
على / بص انا هقولك حاجه
عمر / قول
تليفون على يرن على يتنطر من مكانه
على / ثوانى لازم ارد
على يجرى يطلع على البلكونه
عمر / مين يابنى انت يابنى خير
……………………….
فى شقه نور
نور / انا اسفه لو كنت بتصل فى وقت مش مناسب
على / ابدا ابدا
نور / بصراحه كنت بمسح النمر و اتصلت عليك بالغلط
على / شوفتى ربنا عشان كنت ناويه تمسحى رقمى
نور / ابدا والله بس انا اتكيت بالغلط
على / حصل خير المهم طمنينى عليكى انا ممنوع انى اروح عند الحج انور فما اعرفش اخبارك
نور / ممنوع ليه
على / هههههههههههههههههه خايفين تحصل مشاكل تانى مع طليقك
صمت ثوانى
على / انا اسف هو انا قلت حاجه غلط
نور / لا ابدا بس افتكرت ان انا كمان ما عادش ينفع اروح هناك مع ان طنط منال وحشانى اوى
على / مش مبرر على فكره انتى تروحى مكان ما تحبى و تحطى رجلك فى وش الطخين و لو دكر يكلمك
نور / ههههههههههههههههههه تعرف اول ما قولت لماما انك ضربته هههههههههههههههه ما اقولكش من ساعتها و هى عاوزه تعملك تمثال عندنا و تحطه فى النيش
على / هههههههههههههههههههه خد الشر وراح
نور / شفت معاه ايام حلوه برضه
على ساكت
نور / ما كانوش عشره يومين كان فى بينا حاجات حلوه زكريات ما تتنسيش
على / انتى طيبه اوى يا نور
نور / لا انا هبله على راى ماما تصدق لو قلتلك ان جوازه عليا مش هو اللى واجعنى انا عارفه ان العيب منى
على / العيب منك ؟؟؟
نور / انت عارف انى ما بخلفش صح
على / معلش يعنى و هو لو كان ما بيخلفش كنا نقتله يعنى و لا نعمل ايه على فكره بقى
نور / الراجل غير الست يا على الست بتصبر و تستحمل عشان بيتها
صمت
نور / على فكره انا ما اتصلتش بالغلط ……. انا كنت مخنوقه و كنت بدور على حد اكلمه حد يسمعنى
على / دا يشرفنى
نور / انا حواليا ناس كتير اوى بس ما حدش فيهم هيفهم كلو هيقولى انتى ازاى لسه بتفكرى فيه ازاى زعلانه ما حدش هيفهم
على / يا بخته
نور / لو كان قالى انه عاوز يتجوز كنت … مش عارفه بس اى واحده غير دى
على / تفرق ايه
نور / الفتره اللى فاتت خناقاتنا كلها كانت بسببها كانت بترسم عليه لحد ما جابته
على / هههههههههههههههههههههههههه دا على اساس انه عيل صغير و هى ضحكت عليه بمصاصه بصى انا اللى شوفته فى حياتى علمنى حاجه واحده بس ……. لا الحقيقه ما اتعلمتش حاجه هههههههههههههههه هكدب عليكى لو قولتلك ان اللى يبيعك انساه و الكلام ده
نور / طنط منال حكتلى انك كنت بتحب واحده
على / ههههههههههههه و ما زلت مش حب حب يعنى هو انا مش قادر انساها ساعات بحلم بيها بتنادينى ساعات بتنادينى و ساعات انا بناديها اه انا فاهمك مش سهل انك تنسى مش سهل انك تفتحى صفحه جديده بس لازم الحياه تستمر
عمر يخبط على كتف على
على / ثوانى
نور / ههههههههههههههه احنا طولنا اوى انا بجد عمرى ما اتكلمت مع حد كدا و متشكره انك سمعتنى
على / لا شكرا انك اتكلمتى
نور / مع السلامه
على / سلام
عمر يشاور لعلى استعجل على يقفل
على / ايه يا زفت فى ايه
عمر / ايه يا عم فى ايه انت بترغى مع مين
على / قفلت عاوز ايه
عمر / هعوز ايه يابنى انت مش كنت هتقولى فكره بخصوص الفستان و الشبكه و كدا
على / فكره ايه
عمر / تصدق انا غلطان انى استنيت كل ده عشان و لا بلاش اخويا الكبير برده
عمر يجى يمشى على يمسكه ما يلحقوش
على / ما تبقاش خلقى كدا اصبر فكرنى بس
عمر يمشى و على ينفخ
…………………….
فى الشقه عند نهاد
نهاد / انت مكبر الموضوع كدا ليه مش خدت عفشها و كل حاجتها و الشقه فضيت خلاص ننقل احنا بقى هناك و نوفر فلوس الايجار
مروان / كنت بفكر ابيع الشقه و ناخد شقه تانيه فى اى حته تانيه
نهاد / اى حته تانيه ايه بس يا مروان انت عارف اسعار الشقق كام دلوقت هتخسر فيها على فكره و بعدين هو يعنى اللى هيشتريها احسن منك فى ايه
مروان / مش عارف يا نهاد مش مرتاح بجد
نهاد/ بص براحتك لا ارض عاوز تبيع و لا الشقه عاوز تستخدمها و حتى القرشين اللى كنت شيلاهم للزمن ادتهملك عشان المؤخر خليك انت كدا قاعد لحد ما نشحت
مروان / انتى حاميه كدا ليه مش الواحد ياخد وقته فى التفكير
نهاد / الوقت بيكلف فلوس يا حبيبى انت لو حسبت نقل العفش مش هيجيب ايجار الوقت اللى بيعدى ده ركز معايا يا مروان عشان خاطرى كلها كام شهر و ابننا يشرف لازم على الاقل نكون كاسرين قرش للولاده الولاده بتكلف على فكره و لا انت ناوى تولدنى فى مستشفى حكومى اوعى يا مروان دول بيخطفوا العيال و يبدلوهم
مروان / لا حكومى ايه و خطف ايه لا طبعا هتولدى فى مكان نضيف و ما تشيليش هم هتدبر لسه بدرى على الولاده
نهاد / على العموم فكر يا حبيبى فكر بالراحه و باذن الله هتلاقى ان انا معايا حق و بكره تشوف
مروان / باذن الله تصبحى على خير
…………………….
فى شقه عمر
عمر يدخل البيت يلاقى سمر قاعده اول ما تشوفه تلف وشها كانها مقموصه يرفع حاجبه و يدخل على جوه
أية / حمد الله على السلامه
تليفون عمر يرن يكنسل و يحدفه على الكومدينو
عمر / والله ما انا رادد ارغى انت بقى مع نفسك
أية / مين
التليفون يرن تانى عمر ياخده و يقفله
أية / هو انت اتخانقت مع على
عمر / لا مش متخانقين انا بس بنكشه
أية / ليه
عمر / سيبك انا كنت عاوز اتكلم معاكى فى حاجه
أية / لو على الكلام اللى قالته ماما
عمر / أية انتى عارفه انى بحبك صح
أية / لا ما اعرفش عرفنى ههههههههههههههه
عمر / انا بتكلم جد على فكره
أية / سورى خلاص اتكلم
عمر / بصى يا أية انا وعدتك انى هجيبلك احسن فستان و اعملك احلى فرح
أية / يا عمر قولتلك والله ما فارق معايا
عمر/ انا فارق معايا يا أية
أية ترفع حاجبها و تعوج بقها
أية / طب ايه رايك لو نبص فى مكان تانى يكون ارخص يمكن نلاقى حاجه احلى
الباب يخبط عمر يقوم يفتح يلاقى سمر ماسكه تليفون
سمر / على عالى لتليفون عاوزك هو موبايلك فاصل و لا ايه
عمر يبتسملها و ياخد منها الموبايل
عمر / الو
على / احنا فينا من الهبل ده تصدق لولا ان مزاجى رايق كنت جيت ضربتك قدام اهل بيتك
عمر / على اساس تعرف اصلا
على / هههههههههههههههه انت هتستقوى عليا و لا ايه
عمر / سيبك انت مزاجك رايق هاه ؟؟؟
على / ههههههههههههههه بقولك هديك ميه الف تديهم لأية و خليها تختار هى عاوزه تعمل بيهم ايه
عمر / أية ؟؟؟
أية تبصله و تشاورله فى ايه
على / اه عاوزه تجيب بيهم دهب تطيرهم تعمل فرح هى حره
عمر / اه فهمت
على / لما الست الوالده تعرف هتقنعها ان كفايه اوى زفه عربيات و هى اولى بالباقى
عمر /ههههههههههههههههه اه بس مش ده اللى انا عاوزه
أية / هو فى ايه
عمر / ثوانى يا على ثوانى …. ايه فى ايه انتى ما اعرفش اتكلم فى التليفون
أية / بتتكلموا عنى انا سمعتك بتقوله أية
عمر / طب ممكن اخلص مع الراجل الاول
سمر / تعالى يا أية معايا المطبخ قال يا خبر بفلوس بكره يبقى ببلاش
سمر تشد أية و يمشوا
عمر / الو معاك
على / ايه ده هو انت بتتكلم جنبهم
عمر / و هو انا بعرف افلت دى كماشه يا جدع
على / هههههههههههههههههه المهم فكر كدا و رد عليا
عمر / قول يارب
…………………………….
بعد فتره فى شقه ندى
حسام يدخل من بره تليفونه يرن يرد
حسام / ياريت يكون فى اخبار جديده عشان بدات ازهق
ياسر / خلصنا الجرد امبارح و فى كرتونتين ناقصين
حسام / نعم كرتونتين
ياسر / هو اى كرتونتين دا افيدرين
حسام / ههههههههههههههههه مش تقول يا راجل و حسين بيه عرف مين ابن الحرام اللى سلكهم
ياسر / هانت يا برنس الحسابات بتتراجع يمكن نلاقيهم ساقطين او نلاقيلهم وصولات مضروبه او حاجه
حسام / ماشى هستنى البشرى
ياسر / بقولك يا رياسه هو الكرتونتين دول يلزموك فى حاجه
حسام / لو هتعرف تصرفهم عيش
ياسر / اقسم بالله حبيبى هههههههههههههههه
حسام / سلام
حسام يقفل التليفون اخلاص واقفه بعيد
حسام / فى حاجه ؟؟؟
اخلاص / الست ندى
حسام باهتمام / مالها
اخلاص / نايمه طول اليوم و لا راضيه تصحى تاكل و لا تشرب و لا حتى تاخد الدوا
حسام / ازاى ده
حسام يفتح الباب على ندى يلاقيها نايمه يبص على النوته مفيش كتابه يحط ايده على كتف ندى بالراحه
حسام / ندى ندى
ندى / عاوزه انام
حسام / طب قومى كلى لقمه
ندى / لما اصحى
ندى نايمه خالص حسام يعدى ايده يبعد الشعر من على وشها و يبتسم اخلاص تدخل معاها كبايه لبن حسام ياخدها منها
حسام / اقفلى الباب وراكى
اخلاص / حاضر
اخلاص تطلع و تقفل الباب حسام يحط الكبايه على الكومدينو و يعدل ندى على دراعه و ياخد الكبايه و يحطها على بقها
حسام / طب اشربى دى و نامى تانى
ندى تاخد بق صغير خالص و تزق الكبايه بايدها حسام يحاول معاها تانى و تالت من غير ملل
حسام / طب قومى اتخانقى معايا طيب هههههههههههه
حسام يبص لندى نايمه على دراعه يحط الكبايه و يضمها لحضنه و ينام جنبها
////////////////////////////////////
حسام / هو انتى لازم توصلى للمرحله دى من الاكتئاب عشان اعرف احضنك ناقصك ايه طيب قصرت معاكى فى ايه ما طلبتيش حاجه و ما نفذتهاش ما حلمتيش بحاجه و ما حققتهاش فاضل ايه يعنى هو مكنش ينفع نعيش زى اى اتنين بيحبوا بعض لا لا لا مش نافع
////////////////////////////////
حسام يقوم يقعد و يشد ندى و يفوقها
حسام / قومى يا بت اصحى اصحى
ندى تفتح عنيها
حسام / قومى اصحى اصحى
ندى تنفخ
ندى / حتى النوم مش مهنينى عليه انت عاوز ايه يا اخى
حسام / قومى اتخانقى معايا
ندى تبعد عنه و هى مخنوقه
ندى / انت مجنون
حسام / اه ان كان عاجبك
ندى تبصله بقرف و تدخل الحمام تغسل وشها حسام يعمل يس و هو مبسوط و يفضل واقف على الباب ندى تروح ترزع الباب فى وشه
حسام / سهله لو على الجنان مفيش اجن منى على فكره
حسام يروح ناحيه النوته و يقطع اول ورقه من غير ما يعمل صوت و يحطها فى جيبه و يمشى
………………………………..
فى شقه نهاد
نهاد / و عملتوا ايه
مروان / عادى يعنى الطبيعى لما لقينا نقص هنراجع الحسابات تانى
نهاد / و هتفضل كل يوم تتفحت فى الشغل زى النهرده كدا
مروان / هى اول مره يعنى ما انتى عارفه
نهاد / على الاقل كنا بنبقى سوا
مروان / على رايك بس تصدقى برده كنت بروح على موشح هههههههههههههههههههههه
نهاد / و هو الموشح بتاعى زى بتاعها برضه
مروان يسرح ثوانى نهاد تروح تقعد على رجله
نهاد / فكرت فى موضوع اننا ننقل شقتك بدل ما هى فاضيه
مروان / اه
نهاد / و قررت ايه
مروان / افوق بس من حوار الجرد ده و ننقل علاطول
نهاد تقوم تلف بفرح
نهاد / يس يس يس
مروان / ايه يا مجنونه هههههههههههههه
نهاد / انا عن نفسى هبدا من بكره الصبح اللم الحاجات فى كراتين عشان ما ناخدش وقت فى النقل خالص
مروان / ماشى
نهاد / بفكر اعزم مامتك على الغدى عندنا بكره ايه رايك
مروان / مفيش مانع بس لازم تعرفى ان ماما زوقها صعب اوى فىالاكل
نهاد / و هو انا شويه فى الاكل و لا ايه
مروان / هههههههههههههههههههههه خلاص مدام كدا خشى بقلب جامد
…………………………….
فى المحل عند على
على بيتكلم فى التليفون فى المكتب و هو مبسوط اوى و عمال رايح جاى
على / ههههههههههههههههههههه عارفه لو حلفتيلى على الميه تجمد مش هصدقك برده
نور / ليه يعنى
على / عشان البنات ما بيفكروش كدا
نور / اه قصدك انى عملت كدا عند يعنى بضايقه
على / مثلا يعنى
نور / يمكن فى الاول كنت بفكر كدا
على / و لما حسيتى ان ايه التفاهه دى ففكرتى فى مبرر منطقى اكتر صح
نور / ايوه مفيش واحده غيرى تنام على سريرى
على / ما انتى بعتى العفش فى الاخر و بنص تمنه كان ممكن تقبلوا العرض و يعوضكوا عن تمن العفش و تسبيه
نور / لا خساره فى جتتها ياريته كان اتجوز واحده عدله يمكن كنت هديت شويه
على / بصى بيقولوا اللى ما اخدتوش القرعه
نور / قرعه فى عينك اسمها اللى رمته الهانم تاخده مساحه السلالم انت بتشتمنى انا كدا
على / ههههههههههههههههههههههه
نور / ايه ؟؟؟
على / مش لاقى رد معاكى حق فعلا المثل ده شتيمه فعلا ازاى بيقولوه بقالهم قرون
نور / نحن نختلف عن الاخرون على فكره
على / واخد بالى
صمت ثوانى
على / بقولك ايه مش هتزورى طنط منال قريب
نور / كنت عندها امبارح
على / بتهزرى
نور / ليه يعنى هو انا المفروض اخد اذنك و لا اديك خط سيرى
على / ايه القفله دى لا طبعا مش قصدى
نور / هههههههههههههههههههههه ايه يابنى مالك اتخضيت كدا ليه بهزر معاك
على / رخمه على فكره
نور / ماما بتقولى انى مش طبيعيه الفتره دى بضحك بهبل عارف كانى شاربه حشيش او حاجه
على / و انتى تعرفى الحشيش منين انتى يعنى
نور / انا اللى رخمه برده
على / ههههههههههههههههه يا ستى اضحكى ما حدش له عندك حاجه
نور / بضحك تفتكر هو كمان بيضحك
على /اه بيضحك و سرقاه السكينه
نور / يمكن مبسوط بجد بكره يبقى اب و هى تخليه ينسانى
على / و هو انتى تتنسى ؟؟؟؟
نور / لا طبعا هو الخسران اصلا
على / ههههههههههههههههههه ايوه كدا
نور / هكدب على مين يعنى اكيد الطفل ده هيقربهم من بعض
على / هو انا قولتلك ان والدى و والدتى منفصلين
……………………….
فى شقه ندى
ندى تطلع من الحمام و تمسك الموبايل تتصل تلاقى مشغول تنفخ و تحدف الموبايل على اخر دراعها على السرير اخلاص تفتح الباب و تدخل شايله صينيه اكل ندى تروح تجيب الموبايل من على السرير
اخلاص / جبتلك لقمه ترمى بيها عضمك ما اكلتيش حاجه من الصبح
ندى / حطيها عندك و اطلعى بره
اخلاص / حاضر
اخلاص تحط الصينيه و هى بتبص على ندى ندى ماسكه فى الموبايل اوى و بتمسح اخر مكالمه من السجل و تعمل مكالمه تانيه تلاقى مشغول تحط الموبايل و تروح تاكل
ندى / ما تتفضلى معايا
اخلاص / هههههههههههه سبقتك الف هنا
ندى / امال وقفالى زى اللقمه فى الزور ليه ما تطلعى بره
اخلاص / ياختى حاضر
اخلاص تطلع و تقفل الباب وراها
……………………………..
فى شقه عمر
سمر / و هى الميه الف دى تعمل حاجه ما تشوف جرام الدهب بكام
عمر / ده اللى معايا و دى امكانياتى
سمر / دا الفلوس اللى انا كنت مديهالك و انت اديتها لأية عشان جهازها كانت اكتر من كدا
عمر / انتى عاوزه ايه من الاخر
سمر / و انا هعوز ايه يعنى كتر خيرك ماكلنا و ملبسنا و منيمنا عندك كتر خيرك
أية تبص لامها
سمر / ما تبصليش كدا انا مش عوزاكى يجى عليكى يوم و صحبتك تيجى تتجوز تبصيلها و تحسى بالنقص اصلا و لا تحسى مدا من الاول كان اختيارك مش انتى اللى رخصتيله نفسك كدا من الاول احمدى ربنا بقى على اى عضمه يرميهالك
عمر / انتى بتتكلمى كدا عن مين
أية تقوم تدخل اوضتها و هى بتعيط عمر يقوم وراها جرى و سمر قاعده بتغلى فى نفسها
………………………
فى شقه نور
نور / و دا ايه علاقته بحالتى طيب
على / الله كل الحالات دى و برده ما اتعلمتيش حاجه خالص
نور / يا على الوضع مختلف يعنى عاوز تقنعنى ان مرات ابوك كانت هتريحه لو ما كانش عنده اولاد اصلا
على / لا هو ما كانش هيرتاح الا لما يجرب واحده و اتنين و تلاته مش موضوع عيال اصلا موضوع طفاسه مش اكتر
نور / هههههههههههههههههههههههههه افتكر انك بتتكلم عن ابوك على فكره
على / لا انا بتكلم عننا كلنا الرجاله يعنى
نور / ههههههههههههههه و انت منهم
على / انا اولهم بس الاقى ههههههههههههههههههههههه
نور / ههههههههههههههههههههه تعجبنى صراحتك
على / تفتكرى لو كنت اتجوزتها كنت هفضل فاكرها بالشكل ده
نور / هى اسمها ايه صحيح
على / اعتبريها نون
نور / نون
على / عديها
نور / حاضر بس ياترى ممكن تحكيلى عنها
على / عاوزه تعرفى ايه
نور / يعنى اتعرفتوا ازاى و قصه حبكوا و ايه فرقكوا كدا يعنى
على / كانت جارتى و زميلتى فى الكليه و مفيش قصه ما لحقش يكون فى قصه الصراحه الحوار كله كانت نظرات
نور / نظرات ؟؟؟
على / كنت اطلع البلكونه ابص عليها تشاورلى باى اشاورلها يعنى مفيش كلام بنا لحد ما قابلتها فى الكليه و عرفت انها واخده بالها منى هى كمان و قررت اتقدملها بس مفيش نصيب باباها رفض
نور / خساره
على / لعله خير
نور / انت عارف احنا بقالنا قد ايه بنتكلم
على / بما ان الشركه لسه ما قطعتش المكالمه يبقى لسه ما قفلناش الساعه الرابعه هههههههههههههههههههه
نور / ههههههههههههههههه انا مش مقتنعه تماما بكلامى معاك مع انى ما انكرش انه بيريحنى
على / عارفه ليه بيريحك
نور / ليه
على / عشان اتلم المتعوس على خايب الرجا ههههههههههههههههههههه
نور / على رايك ما لهاش وصف تانى
باب اوضه نور يتفتح و محمد يدخل
نور / ثوانى …. بابا ازيك
محمد / بقالك ياما اوى قافله على نفسك فى الاوضه و ما بتطلعيش قولت ادخل اطمن عليكى
صوت رساله توصل لموبايل نور تفتحها و تضحك
محمد / هو انتى كنتى بتكلمى مين
نور تبتسم
محمد / العشا جاهز لو عاوزه تاكلى معانا
نور / اكيد يلا بينا
…………………….
فى اوضه أية
عمر يدخل يلاقيها بتعيط يروح يقعد جنبها و يحضنها تمسح دموعها
عمر / حقك عليا انا
أية / انا تعبت
عمر / عارف
أية / كل الناس بتقولى انى ما اتربتش كلهم بيقولولى كدا عشان اخترتك هو انت كمان شايفنى مش محترمه يا عمر
عمر / قطع لسان اللى يقول عليكى كدا مين اللى قالك كدا
أية / و مين يعرف باللى حصل غير انا و انت و امى و على
عمر / على قالك كدا
أية / قالها لماما مش قالها لو كنتى عرفتى تربى بنتك ما كانتش حطتك فى الموقف ده
عمر ينفخ
أية / انسى انسى انا اصلا
عمر / على لما قال الكلام ده قاله فى وقت
أية / انا اخترتك و لو هيتعاد بيا الزمن هختارك تانى على فكره حتى من غير فرح و لا شبكه و لا اى حاجه هختارك اعتبرها مراهقه زى ما ماما بتقول اعتبرها قله ادب اعتبرها زى ما تعتبرها بس انا تعبت من كتر المشاكل
عمر / بصى يا أية انا و انتى علاقتنا عمرها ما هتنجح الا لو انا و انتى اتمسكنا ببعض و انا متمسك بيكى باقصى درجه تتخيليها و عارف انك متمسكه بيا بس طول ما امك فى الموضوع
أية / امى هتفضل طول عمرها فى الموضوع يا عمر للمره المليون دى امى و انا بنتها للمره المليون زى ما انا ما اقدرش ابعد عنك ما اقدرش ابعد عنها ايه الجريمه اللى عملتها عشان لازم اتعاقب و اختار واحد منكم
عمر / ما حدش قال تختارى انا بس مفيش فى ايدى حاجه اقدمها دلوقت انتى عارفه انى ما حلتيش غير مرتبى من الكليه و الشركه صح و لا لا
أية تبصله
عمر / و عارفه مصاريف الفتره اللى فاتت دروسك و لبسك و مصاريفك و مصاريف البيت و مصاريف رسالتى تفتكرى يا أية ان مرتبى كان مغطى كل ده بالنسبه لشاب لسه بيبتدى حياته تفتكرى انى ما كنتش بميل على اخويا اخد منه فلوس كل فتره
أية / بكره لما ماما تفتح المحل تانى مش هتحتاج تستلف من حد حاجه
عمر / على مش حد و انا مش بستلف منه ماشى
عمر يديها ضهره و ينفخ
أية / اسمع انت معاك ميه الف صح
عمر / واخدهم من على عشان تبقى عامله حسابك
أية / كتر خيره اسمعنى عندى فكره
عمر يبصلها
أية / افتح انت المحل و انا و ماما هنقف فيه و هات بالفلوس دى بضاعه جديده على اللى فى المحل و انا مش عاوزه حاجه خالص
عمر / يا سلام
أية / انا مش عاوزه فرح و لا شبكه و لا فستان و لا عاوزه اى حاجه انا عوزاك انت و مش عاوزاك تطلب من حد حاجه و لا تحتاج من حد حاجه حتى لو الحد ده اخوك انا مش عاوزاك تحس انك قليل انا مش عاوزه غير انى اكون معاك و على فكره انا عمرى ما هبص لحد عن اذنك
أية تيجى تقوم عمر يمسك ايدها
عمر / بس انا وعدتك
أية / وقتها كان عندك نص الشقه و نص المحل بتوعك باسمك حقك من ورثك فى بابا محمود الله يرحمه ساعتها كنت تقدر توفى بالوعد ده
عمر / للدرجادى شيفانى صغير و مش هقدر اوفى
أية / يتقطع لسانى لو كان ده قصدى انا اقصد ان مش وقته و لما ربنا يكرمك و تقدر تقف على رجليك هتعملى تانى حتى لو ما كانش فرح عادى ممكن يكون مثلا نحتفل بعيد جوازنا فى المالديف اسمع انها حلوه اوى تسمع عنها
عمر يبتسم
عمر / اسمع عنها
…………………………….
فى شقه امانى
محمد / انا عاوزك تتكلمى مع نور
امانى / ليه مالها نور
محمد / مش عارف بس كل ما اعدى قدام باب اوضتها الاقيها بتتكلم فى التليفون و النهرده لما سالتها بتكلمى مين ما ردتش عليا
امانى / ههههههههههههه تلاقيها احرجت تقولك انها كانت بتكلم على
محمد / على مين
امانى / دا واد طيب اوى و ابن حلال
محمد / يا امانى بنتك لسه ما فاقتش من صدمتها فى جوزها و الواد ده ممكن ياذيها و يستغلها
امانى / لا على لا انا عرفاه و قابلته و اتكلمت معاه كذا مره حتى منال بتشكر فيه اوى و جوزها بيعتبره زى ابنهم
محمد / منال جاره نور
امانى / عليك نور هما اتعرفوا على بعض اصلا هناك عندها
محمد / انا واثق فى بنتى و فى تربيتها بس يا امانى دا مش الوقت المناسب انها تقدر تقيم علاقه
امانى / سبها انت بس على الله و ما تشيلش هم و يا سيدى انا بكره هتكلم معاها و اقولها تخف شويه مع ان والله كلامها مع الواد ده خرجها خالص من المود اللى كانت فيه و فكت عن نفسها
محمد / ربنا يستر يا امانى ربنا يستر
……………………………
بعد كام يوم فى الشركه عند عمر
عمر فاتح اللاب و بيشتغل واحد يخبط على الباب
عمر / ادخل
واحد يدخل ووراه على
على / قولتلك اخوه و وريتك البطاقه عاوز ايه يعنى وسع بقى
عمر / خلاص يا مسعد اخويا والله سيبه
على / ايه ياعم مش تقولى انك مستهدف كنت ظبطتك
عمر / اقعد اقعد تشرب ايه
على يقعد و يبص على المكتب
على / حلو مكتبك و مكيف
عمر / اول مره تيجى هنا خير
على / انت اللى خير فينك كل ما اتصل بيك فى الكليه فى الشركه يا اما التليفون غير متاح و اتصل بالبيت اعرف انك نايم فى ايه مالك
عمر / اقسم بالله مشغول لشوشتى
على / و هو المشغول ما يبقاش فاضى حتى يكلم اخوه فى التليفون يا ابنى لو زعلتك فى حاجه قولى
عمر / تليفون ايه يا على هو انت حد بيعرف يكلمك اليومين دول دا انت مشغول اربعه و عشرين ساعه بالكلام مع نور
على / اااااااااااااه هو الحوار نور يعنى
عمر / مفيش حوار اصلا يا على ربنا يسعدك انت عارف قد ايه انا بحبك و بتمنالك كل خير
على / طب مش كنت ترد عليا فى موضوع الفرح و الفستان مش كنا ناويين ننزل نلف على القاعات
عمر / لا مانا غيرت رايى فى الموضوع ده
على / خير
عمر / بص هو الفتره اللى فاتت حسيت كدا ان سمر و أية مش مظبوطين من يوم الفستان كلام كتير اوى عن الفلوس و حقك وورثك خصوصا انى عملت زى ما انت قولتلى و ما قولتلهمش اى حاجه انك كتبتلى الشقه و المحل
على / سمر اه ممكن لكن أية ما افتكرش
عمر / انت اللى بتدافع عنها
على / ما بدافعش عنها انا بقول رايي هى زى اى بنت يا عمر نفسها فى فرح جامد و تلبس فستان سندريلا و الجزمه الازاز بتاعتها نفسها تحس انها ملكه و لو ليوم واحد بس
عمر / المهم انا قولتلها انى واخد منك 100 الف و قولت فكرتك زى ما قولتلى تعرف ان سمر ما رضيتش و قالت ما يعملوش حاجه و أية قالتلى انت اولى بالفلوس انا مش عاوزه لا فرح و لا اى حاجه مش عوزاك تستلف من اخوك و لما ربنا يكرمك نبقى نروح المالديف مالديف ايه دانا يوم ما روحت الغردقه روحتها على حساب الشركه ههههههههههههههههه
على / و ده اللى خلاك تشك فيها
عمر / هى اللى طلبت الفرح و دلوقت بتلغيه عادى
على / عادى ما عاكش و بتقولها انك واخدهم من اخوك
عمر / لما كلكوا فى صفها اشمعن انا اللى مش مقتنع بتصرفها
على / أية بتحبك يا عمر فوق بص انت امشى فى خطتك عادى و خلى الفلوس معاك و ما تعرفهاش قولها انك رفضت تستلفهم قولها مثلا انكوا هتعملوا فراشه فى الشارع و تخلص الحوار باقل التكاليف و دبلتين و محبس على قد مبلغ انت محوشه و اتجوزها فعلا
عمر / انا بحبها بس ساعات ما ببقاش عارف انا بكلمها و لا بكلم امها ساعات بحس ان
على / ما تيجى نخرج
عمر / ايه ؟؟؟ نعم نخرج دلوقت
على / لا دلوقت ايه نتفق على يوم كدا نخرج انا و انت و أية و نور
عمر / اااااااااااااااااااااه … يا لئيم قول كدا بقى انت زهقت من التليفونات قولت تنط على المرحله التانيه و عاوزنى كوبرى
على / بس يا اهبل ….. هو مش بالظبط هو الفكره ان نور بقالها فتره مش بتتصل و اتصلت انا بيها مرتين كنسلت فبقول يعنى … يعنى
عمر / اه فهمت و ماله نجرب اعزمها عندنا على الغدى
على / انت عبيط صح
عمر / ليه
على / اقولها لو سمحتى يا مدام نور تعالى اخدك تتغدى معايا شقه اخويا اولا عمرها ما هتصدق ان اخويا و مراته و حماته فى الشقه و هتقول انى ايه عيل زباله و بستدرجها و عمرها ما هتدينى وش تانى بس يا اهبل
عمر / و ثانيا
على / ثانيا ايه انت هتنقطنى
عمر / ههههههههههههه مش انت اللى قولت اولا
على / اوووووووووووووووف
عمر / خلاص خلاص و ماله ظبط انت و انا معاك
على / نور لما هتقعد مع أية افتح الحوار و نشوف راى الستات ايه يمكن احنا ظالمين البت دى
عمر / نجرب
………………………………….
فى شقه نور
امانى / مالك يا قلبى قاعده لوحدك ليه
نور / اعمل ايه يعنى
امانى / ايه رايك نروح لعمتك نقعد معاها شويه
نور / لو حضرتك عاوزه تروحى روحى لكن انا مليش مزاج
امانى / ليه بس يا بنتى هو انتى هتقضى باقى عمرك قافله على نفسك باب اوضتك كدا طب يا ستى روحى اسالى على عمك و مراته اللى ما حدش بيسمعلهم لا حس و لا خبر دول
نور / يا ماما انا مش عاوزه اتكلم مع حد مش عاوزه اشوف حد و لا حد يشوفنى
امانى / طب هو اخبار على ايه ما عدتش بشوفك بتكلميه انتوا اتخانقتوا
نور / لا بس انا قررت انى مش هكلمه تانى
امانى / ليه بس يا بنتى هو عملك حاجه
نور / ابدا بس لما بابا سالنى بتكلمى مين و ما عرفتش ارد عليه اتاكدت انى بعمل حاجه غلط و زعلت من نفسي اوى اذا كنت مكسوفه اقول لابويا هقول ايه للغرب
امانى / و مالنا و مال الناس يا بنتى بقولك ايه ما تيجى نروح نزور الست منال ما وحشتكيش
نور / ما عادش ينفع جيران الهنا بينقلوا هناك و ممكن اشوفهم ما انا كلمتها فى التليفون و عرفت
امانى / يعنى مفيش فايده هتفضلى حابسه نفسك فى اوضتك كدا
نور / يا ماما انا مش حابسه نفسى و لا حاجه انا بس
تليفون نور يرن
امانى / على ؟؟؟ ردى ردى
نور / لا طنط منال
امانى / طب ردى
نور / الو … ازيك يا طنط …. و انتى اكتر والله ……… ما بعملش قاعده مع ماما فى البيت …….. خير ……. لا عادى طبعا بس الفكره …. طب ما تحلفيش حاضر هشوف كدا ……… خلاص هاجى والله …. هلبس واجى حاضر هههههههههههههههه ………مع السلامه
امانى / خير
نور / طنط منال عزمانى على الغدى و حلفت لو ما روحت مش هتكلمنى تانى
امانى / و مستنيه ايه قومى اللبسى و يا ستى لو على جيران الهنا هلبس و اجى معاكى و يبقى حد يكلمك و هتشوفى امك هتعمل ايه
نور / انا مش حمل مشاكل
امانى / و احنا مش بتوع مشاكل يا قلبى
نور / ماشى هقوم اللبس
………………………
فى الشركه عند مروان
مروان / انا مش فاهم حاجه
حسين / دى امضتك على وصل بخروج الكرتونتين باسم صيدليه الشفا موجوده فى المخزن بس ملهاش اى اثر فى سجلات الشركه او حساباتها
مروان / انا ما مضيتش على الوصل ده و ما اعرفش عنه اى حاجه
حسين / انا كنت غلطان لما وثقت فيك ورقيتك على العموم اى كلام تانى يبقى مع البوليس
مروان / بوليس ايه حضرتك انا ما عملتش حاجه اكيد فى سوء تفاهم اكيد فى حاجه غلط
حسين / انا مش هضيع وقتى فى الكلام مع مجرم زيك طلعوه بره
الامن يشدوا مروان بره و هو بيصرخ
مروان / انا ما عملتش حاجه انا شغال هنا بقالى سنين عمرى ما عملت حاجه زى دى اكيد فى حاجه غلط فى حد ملفقهالى حسين بيه ارجوك ارجوك
الامن يشدوا مروان بره مروان يبص يلاقى ياسر
ياسر / فى ايه يا استاذ مرون مالك هما ماسكينك كدا ليه ليكون ليك علاقه بكرتونتين المواد المخدره اللى اختفوا من المخزن
مروان / انت بتقول ايه يا بتاع انت
ياسر / حسام باشا كان معاه حق لما قال انك مش هتعمر فى الترقيه دى كتير
مروان / اه يا ولاد الكلب
مروان يحاول يفلت من بتوع الامن عشان يضرب ياسر ياسر يبعد و يعدل هدومه
ياسر / لا لا هتكرمشلى البدله ما ينفعش ادخل على رئيس مجلس الاداره و هو بيرقينى ابقى مدير الحسابات و انا مكسر
مروان / اقسم بالله ما هعديها لا ليك و لا للكلب حسام
ياسر / شاهدين بيهددنى عاوز ينتقم منى ليه ياعم و انا مالى هو انا اللى قولتلك تسرق
مروان / يا ابن الكلب
ياسر يفتح الباب و يدخل المكتب و يقفل الباب
مروان / سيبونى سيبونى بقولكوا
البوليس يدخل
ظابط / مروان السكرى
مروان / انا برئ الموضوع ده متلفقلى
الظابط / اتفضل معانا اى حاجه تحب تقولها وفرها للتحقيق اتفضل
مروان / ارجوك انا برئ انا برئ
الظابط / من فضلك اتحرك بدون مقاومه
………………………
فى شقه عمر
سمر / ايوه يعنى هتروحوا فين
أية / ما اعرفش قالى اللبسى هعدى عليكى اخدك قولتله حاضر
سمر / هو ايه اللى حاضر انا ما عدتش فهمالكوا حاجه لا انتى و لا هو
أية / ايوه يا ماما خير اؤمرى عاوزه تفهمى ايه
سمر / هتعملوا ايه فى موضوع الفرح هتفضلوا تناموا سوا كدا اخوات و لا هو ايه مشكلته بالظبط معلقك جنبه كدا و ايه حكايته ما داهيه لتكون عنده مشكله و تدبسى فيه
أية / ايه يا ماما الكلام ده عيب اوى كدا على فكره
سمر / ما عيب الا العيب يا روح امك يا بت دانا لو خدت القسيمه و روحت قولت للقاضى انه ما دخلش عليكى من يوم ما اتجوزتوا من كااااام شهر و انتوا بتناموا فى سرير واحد هيخلعك منه فى ساعتها
أية / و ايه مانعك يا ست ماما
سمر / صحيح ما انتى خايبه عشان لما هتخلعيه هتطلعى من المولد بلا حمص يا روح قلب امك و حتى لو اطلقتى لا ليكى شبكه و لا مؤخر و لا مهر و لا اى حقوق
أية / يا ماما انا و هو اتفقنا اننا مش هنعمل فرح و هنحط الفلوس فى المحل و نجيب بضاعه جديده و لما ربنا يكرمنا بقى نبقى نعمل فرح محترم او نسافر نتفسح كدا يعنى
سمر / يعنى هتفضلى كدا لحد ما ربنا يكرمه
أية / يووووه انتى عوزانى اعمل ايه يعنى
سمر / خايبه و خبتك ناقعه
تليفون أية يرن
أية / عن اذنك لازم انزل عمر مستنينى تحت
سمر / ابقى طمنينى عليكى
أية / باذن الله عن اذنك
أية تنزل
سمر / ياترى ناوى على ايه يا ابن حنان
……………………….
فى شقه انور
منال / ههههههههههههه بس انت ما فهمتنيش كدا فى التليفون
على / كنتى هتغيرى رايك يعنى و ترفضى لو كنت قولتلك
منال / لا بس انت لو فاكر انك بكدا بتضرب عصفورين بحجر واحد ممكن الحجر يرد فى وشك و العصفورتين يطيروا منك
على / ههههههههههههههههه لا ما تقوليش كدا باذن الله خير هاه تحبى اساعدك فى حاجه
منال / ههههههههههههههههههههه لا خليك انت مع الحج سليه لحد ما اجى
على / فكرى تانى دانا فى المطبخ استاذ
منال / يلا يابنى روح شوف حالك ما تعطلنيش
على / ههههههههههههههه حاضر
الباب يخبط على يروح يفتح يلاقى نور و مامتها
امانى / اهلا ازيك يا على ما كناش نعرف انك هنا
على يسلم على امانى و يبص لنور بتبصله بابتسامه خفيفه بتحاول تداريها
على / نورتوا اتفضلوا
امانى / احنا جينا علاطول يارب ما نكنش اتاخرنا و الست منال زعلت مننا هى فين صحيح
على / فى المطبخ
نور / عن اذنكوا هروح اساعدها
نور تجرى على المطبخ
على / اتفضلى اقعدى حضرتك
انور يطلع من البلكونه و امانى تروح تقعد
انور / اتارى الدنيا منوره عاش من شافك يا ست الكل امال فين ست البنات
امانى / دخلت المطبخ تشوف ست منال لو محتاجه حاجه حاكم البت نور دى يا على ما اقولكش لهلوبه فى الاكل نفسها ايه كنت حكيتلك قبل كدا انا على الكريب لو فاكر
على / فاكر ايه حضرتك انا نفذت الفكره فعلا و جبت واحد سورى يشتغل الحاجات دى و على فكره عملت ركن البيتزات برده
امانى / يا ما شاء الله يا ما شاء الله انا يعجبنى اوى الشباب اللى زيك يا على والله اللى ما بيضعيوش وقتهم على القهاوى الواحد لازم يشتغل و يبنى نفسه امال ايه مش تقولى
الباب يضرب
على / عن اذنكوا هقوم افتح
على يقوم يفتح يلاقى عمر و أية
عمر / اوعى نكون اتاخرنا
على / لا ابدا تعالى يا أية اعرفك باهلى
عمر و أية يدخلوا و على ياخدهم ناحيه امانى و انور
على / اخويا و مراته الست امانى و الحاج انور
انور / انا شوفتك قبل كدا افتكرتك يا قمر مش انتى …. اه يا خلبوص اتاريك اضايقت اوى لما قولت عليها اختك ههههههههههههههههههههههههه
عمر / ازيك يا حج
انور / والله لولا القمر دى معاك كنت ضربتك انا ياوله ما تسالش عنى الفتره دى كلها
أية تسلم على امانى و تقعد جنبها
امانى / بسم الله ما شاء الله اسم النبى حارسك و صاينك هو فى جمال كدا فى الدنيا
أية / ميرسى
نور تطلع من جوه شايله سيرفيس
عمر / اهلا مدام نور
امانى / دى نور بنتى
أية / اهلا و سهلا
أية تقوم تسلم على نور و منال تطلع من جوه شايله سرفيس تانى
منال / اكيد انتى أية كان نفسى اشوفك من زمان اوى من كتر ما حكولى عنك
أية / يارب يكونوا حكوا خير
منال / كنت هموت و اشوف البت اللى شقلبت كيان الواد عمر بالشكل ده
نور / هجيب باقى الاكل ثوانى
أية / هساعدك
عمر / على فكره أية نفسها حلو اوى فى الاكل بس على قدها فى القهوه هههههههههههههههه
أية تبصله
امانى / لا دى فرصه بقى نخلى نور تعلمك دا حتى نور بتعمل فنجان قهوه ايه وصايه والله لازم بعد الاكل تدوقها يا استاذ على
على / اه اكيد طبعا باذن الله
………………………………..
فى القسم
المحامى / احنا الاول هنطعن فى التوقيع و نقول انه مش توقيع حضرتك بس لو لاقدر الله
مروان / انا بقولك انا برئ ما اعرفش حاجه عن اذن الصرف ده اصلا و لا حتى عن الصيدليه دى
المحامى / انا بقول لا قدر الله لازم نعمل حسابنا لكل الاحتمالات ما يمكن حضرتك مضيت عليه و انت مش واخد بالك
مروان / انا مش قادر استوعب هى وصلت لكدا انا لازم اخرج من هنا انت فاهم لازم اخرج
المحامى / لا باذن الله هتخرج انت معاك انيس الفولى المحامى حط فى بطنك بطيخه صيفى و اطمن احنا لو ما قدرناش نثبت ان التوقيع مزور هنعتبرها غلط فى الحسابات و ان الكرتونتين ما اتسجلوش فى باقى الدفاتر
مروان / انا ماضى على كل التقارير اللى صدرت فى الحسابات و مراجعها بنفسى مفيش اى اثر للكرتونتين دول فى اى وصل و لا اذن صرف غير الاذن ده
المحامى / انا مش عاوزك تقلق احنا هنمشى فى كل الطرق بس لازم تعرف ان الموضوع ده هيكلفك عشان نظبط حبايبنا القضيه مش سهله دى ممكن توصل لاعدام
مروان / اعدام !!!!
المحامى / ما تخافش الكلام ده لو ما كانش معاك انيس الفولى لكن طول ما انا معاك ما تخافش
مروان / ربنا يستر
…………………………….
على الاكل عند انور
منال / اخبار الفرح ايه يا عمر انا حالفه لارقص فى فرحك انت و على
عمر يبص لأية
عمر / احنا قررنا اننا ما نعملش فرح
امانى / ليه بس يابنى دا الواحد بيتنشا على فرحه
عمر / يعنى الظروف و كدا قررنا اننا نخليه على الضيق كدا عندنا فى البيت يعنى نلم صحابنا و كدا و نفرفش و نسافر اى حته انا و هى نقضى شهر عسل حلو و لما ربنا يفرجها ابقى اعوضها
انور / طب ما هو ربنا فارجها اهو يابنى قولى بس ناقصك ايه ايه يا عروسه انتى ايه رايك فى الموضوع ده
أية / عادى يعنى حضرتك
منال / يعنى انتى الفرح مش فارق معاكى دا حلم اى بنت
أية / ممكن يتعمل احلى فرح و احلى فستان و فى الاخر البنت تتجوز واحد ما بتحبوش و ممكن البنت يكون فرحها على قدها بس فى الاخر تتجوز اللى بتحبه عادى
نور / معاكى حق
على / على فكره أية شاريه عمر اوى
منال / هو فى زى عمر دا يتاقل بالدهب
على / بس مش لدرجه انه يخطبها من غير حتى شبكه و هى ترضى عشان تقف جنبه
أية / عمر شاب فى اول حياته ما حلتوش غير مرتبه و بكره لما ربنا يكرمه هيجيبلى احلى حاجه
منال / ايوه يا بنتى بس دى حقك حتى لو دبله و محبس اهى شبكه
عمر / ايه يا جماعه انتوا ليه محسسينى انى معدم اوى كدا انا قولتلها ان معايا ميه الف جنيه و قولتلها شوفى انتى عاوزه ايه الشقه موجوده و مفروشه و فيها كل حاجه و تشوف بقى الفرح و الفستان و الشبكه اللى تعجبها
انور / و هو ميه الف شويه يا بنتى
عمر / قالتلى احنا نحطهم فى المحل بتاع ابويا الله يرحمه
على / الله يرحمه
عمر / و لما نقف على رجلينا ربنا يسهل نبقى نروح المالديف هى عاوزه تروح المالديف مش انا اللى حارمها
نور / تعرفى يا أية انا بقول انك معاكى حق
على / بجد
نور / اه جدا اصل الفرح ما بيبقاش بتاعك اه انتى بتلبسى و تبقى عروسه بس كام ساعه بس الناس بتيجى ترقص و تهيص و تجامل و تروح فانتى ما نابك من الفرحه ساعات و مصاريف كتير جدا مع انك لو اخدتى الفلوس دى و طلعتى بيها حج او عمره او حتى فسحه اكيد انتى الكسبانه
امانى / لا مش معاكى يا نور اذا كان انتى جالك احلى شبكه و اتعملك اكبر فرح بتقولى كدا للبنت دى هى مش من حقها تفرح يعنى
نور / و استفدت ايه فى الاخر عملت احلى فرح و لبست الفستان و اتصورت و فى الاخر اتجوز عليا و طلقنى و البوم الصور اترمى فى الزباله و مسحنا الفيديوهات و حتى شبكتى عمرى ما هفكر اللبسها
امانى / حتى لو ما لبستيهاش اديها عندك تسندك شوفى بقى لو كنتى اتنازلتى عنها و فى الاخر باعك
أية / عمر مش هيبعينى
امانى / اكيد يا بنتى بس حقك ما ينفعش تتنازلى عنه ممكن تقلليله و تراعى ظروفه معاكى لكن مش تلغيه
منال / انا مع امانى يا عمر
أية / انا مش عاوزه اتجوز بفلوس حد تانى
صمت ثوانى و على ينتبه
أية / انا و عمر عاوزين نبنى نفسنا بنفسنا نحس بتعبنا ما يبقاش فى حد له فضل علينا عشان ما يجيش فى يوم من الايام حد يدخل فى حياتنا
انور / يا بنتى اللى بتقوليه ده صعب مفيش شاب يقدر يفتح بيت لوحده فى الزمن ده
على / ثوانى يا حج حد زى مين يدخل فى حياتكوا حد زيي مثلا
انور / حتى لو انت يعنى هى معاها حق
على / يعنى ايه
انور / يعنى اخر الليل هى و هو بابهم هيتقفل عليهم و مش من حق اى حد يحشر نفسه فى العلاقه دى
على / اه صح على اساس امها مش هتدخل
أية / و لا حتى ماما على فكره ليها راي فى حياتنا و اللى انت ما تعرفوش ان ماما مش موافقه على تصرفاتى او اى قرار باخده انا و عمر بس انا ما يهمنيش غير علاقتى بعمر
على / و انا هاثر على علاقتك بعمر ازاى بقى يعنى
نور / على فكره كل واحد فيكوا بيتكلم فى ناحيه شكل و انتوا الاتنين معاكوا حق
عمر / عشان كدا ساكت هههههههههههههه
نور / على لو سمحت عمر اخوك و يوم ما هيحتاج حاجه مش هيكون له غيرك يطلب منه و ده دورك انك تكون موجود فى الوقت ده بس لو يقدروا يحلوا مشكلتهم من غيرك و ما جوش ليك مفيش عليهم لوم فهمت هى تقصد ايه
أية / بالظبط ان كانت المشاكل اللى بينى و بين عمر ماديه فانا متنازله عن كل حاجه
امانى / اللى على البر عوام يا بنتى حتى لو مش دلوقت سنه اتنين تلاته عشره هيجى عليكى يوم تحسى ان فرحتك اتخطفت منك هتحسى انك اقل من غيرك
أية / غيرى لو عندها الدنيا ما عندهاش عمر
منال / ههههههههههههههههههه تصدقى انا للحظه غرت
انور / الله الله الله
منال / مش غرت منها غرت من عمر
عمر / انا ؟؟؟
منال / مين فى الدنيا ممكن يلاقى حد يحبه اوى كدا
انور / لا بجد الله هو انا ما بحبكيش كدا
منال / بتحبنى بس فى بينا عشره سنين و زكريات حلوه بتزود حبنا لكن هما لسه
عمر / لا معلش انا و أية متربيين سوا يعنى الزكريات الحلوه مفيش اكتر منها
أية / و الوحشه
عمر يبص لأية
………………
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية سلف ودين)
