روايات

رواية سلف ودين الفصل الرابع والأربعون 44 بقلم لولو محمد

رواية سلف ودين الفصل الرابع والأربعون 44 بقلم لولو محمد

رواية سلف ودين الجزء الرابع والأربعون

رواية سلف ودين البارت الرابع والأربعون

رواية سلف ودين الحلقة الرابعة والأربعون

الممرضه / مدام ليلى … فى حد مهم جدا جاى يزورك
على يبص يلاقى مامته واقفه فى الشباك مدياه ضهرها و مش فارق معاها
الممرضه / هى ما بيجلهاش زيارات غير مدام رباب و متطوعين الجمعيات الخيرية و هى مش بتتفاعل معاهم مهما حاولوا هى بتحب تقف لوحدها كدا معظم الوقت و تسرح
نور تديها فلوس فى ايدها الممرضه تبتسم و تمشي و على عينه على ليلى و ساكت نور تبصله و تزقه بالراحه و تقفل الباب نور تروح ناحيه ليلي سرحانه فى السما
نور / ازيك يا ماما ليلى عامله ايه
ليلي مفيش اى رد فعل نور تبص لعلى
على / ماما
ليلي تبص لنور نور تبتسم و تبص لعلى ليلى تبص لعلى و فجاه تعيط و بالراحه تنزل تقعد فى الارض على يروح يحضنها و يعيط هو كمان
على / انا اسف سامحيني … سامحيني
ليلي / كان غصب عنى والله كان غصب عنى
على يمسح دموعها
على / خلاص يا ماما خلاص … قومى يا ماما تعالى معايا قومى نروح
نور تساعد على يقوموا ليلى
على / دى نور مراتى
ليلى تبص لنور بحب نور تقعدها على كرسي
على / بنت جدعه و هتحبيها اوى
نور / انا هلملك حاجتك عشان تروحى معانا احنا شقتنا حلوه و بحرى و هواها يرد الروح هتعجبك اوى ان شاء الله
ليلى / لسه شغال فى محل الشاورما
على يبص فى الارض و يبص لامه
على/ الحج انور الله يرحمه كتبلى المحلات باسمى
ليلى تبتسم و تهز راسها
على / عمر كمان اتجوز … فاكره عمر يا ماما
ليلى / و حد يقدر ينسي ابن الغاليه
على يبتسم
على / الله يرحمها
ليلى تعيط
ليلى / كبرتوا يا على سنين كتير اوى عدت و انا
نور / و لسه يا ماما فى سنين كتير باذن الله جايه نعوض فيها اللى فات
على يمسح دموع ليلى تبتسم
ليلى / عندكوا اولاد ؟
نور تبص لعلى بحزن على يمسك ايد ليلى
على / انا … انا ما بخلفش يا ماما
نور تستغرب
ليلى / روحت لدكتور يا ابنى
على / ممكن نتكلم فى موضوع تانى لو سمحتى … شبعنا نكد سنين خلينا نركز فى الفرح حبه ممكن
ليلى / ممكن يا حبيبي طبعا ربنا يكتبلك الفرح كله
على يقوم يبوس راس نور و يكمل مكانها نور تقعد على السرير فى صمت و هى باصه فى الارض
………………………..
فى شقه امانى
امانى / انتوا هتستهبلوا امه ايه اللى ظهرت فجاه و يجبها تعيش معاكوا ليه ما يشوفلها شقه لوحدها
نور / وطى صوتك يا ماما الست تعبانه
امانى / دا انا اللى تعبت دخل علينا بالمسكنه و يتيم و فجاه صوته على و حسه طلع و دلوقت جايبلك امه تخدميها مش كفايا علينا اخوه و مراته بنت المجنونه
نور / لو عوزانا نسيب البيت و نشوف شقه بره احنا فيها قولى من دلوقت احسن ما تحرجينا مع الناس
امانى / يا بنتى افهمى انتى ما تعرفيش يعني ايه تعيشي مع حماتك و هنروح بعيد ليه انتى مش رفضتى ترجعى لمروان عشان ما تعيشيش مع حماتك
نور / لا يا ماما انا رفضت ارجعله عشان مشاعرى ناحيته كانت ماتت ما كانش فى بينا حب ما كانش فى مبرر للعشره الغدر اللى شوفته منه قسوته عليا قستنى عليه
امانى / و حنيه سي على بقي
نور / حنين و قلبه طيب زى العيال الصغيره بالظبط
امانى / بعد اللى عمله فى اخوكى
نور / يا ماما على ما يعرفش وسط يا صح يا غلط و حسام يوميها كان غلطان جامد
امانى / ما تنقطينيش يا بت انتى
نور / ماما لو بتحبيني بجد اطلعى سلمى عليها و ما تعمليش مشاكل
امانى / هطلع طبعا بس لما ابوكى يجي من الشغل نطلع سوا عشان تعرف ان وراكى اهل
نور / ما فيش فايده سعد زغلول قالها زمان مفيش فايده عن اذنك
نور تمشي و امانى مستغربه
امانى / ما لها بنت المجنونه دى كمان
…………………..
فى لبنان
حسام / معلش الشقه صغيره بس احنا هنحتاج اكتر من كدا ايه فى بدايه حياتنا اوضه و صاله و حمام و مطبخ ان شاء الله لما حبيبه تكبر و تحتاج اوضه لوحدها يكون وضعنا اتحسن و ناخد بيت اكبر او يمكن نكون لقينا عرض احسن فى حته تانيه
ندى / ان شاء الله
حسام / تحبى ننزل نتفرج على البلد و نتفسح شويه انا هبدا شغل من بكره و هبقي لسه جديد و كدا مش هقدر اخد اجازات فى الاول انتى عارفه
ندى / لا خليها مره تانيه بجد السفر تعبنى .. بس انت انزل بقي ما دام مفيش اجازات هاتلنا اكل و خزين للبيت و كدا عشان ما يبقاش ناقصنا حاجه لحد اجازتك الجايه
حسام / متاكده مش عاوزه تيجي معايا
ندى / بجد مش قادره خالص و كمان لسه هفضي الشنط و اخد دوش من السفر و ارتب الدنيا تكون جيت
حسام / تمام تحبى اساعدك الاول و بعدين انزل
ندى / براحتك
حسام / تمام هساعدك الاول يمكن لما تلاقيتا خلصنا نفسك تتفتح على الخروج
ندى تبتسم و تبدا هى و حسام يروقوا الدنيا و يرتبوها
…………………….
فى شقه على
على بيفضي شنطه ليلى فى الدولاب
ليلى / مين حبيبه دى يا على
على يبص على الحيطه و السرير
على / بنت اخو نور بنت زى العسل بس سافرت لبنان النهرده ما لكيش نصيب تشوفيها… لا استنى انا عندى صور كتير ليها على الموبايل
على يطلع موبايله
ليلى / روحت لدكتور يا على
على / ممكن ما نتكلمش فى الموضوع ده
ليلى / يا حبيبي
على / ماما لو سمحتى
ليلى / انا بتكلم ليك عشان خاطر نور كمان افرض
على / ما افرضش و ياريت ما تتكلميش مع نور او حد من اهلها فى الموضوع ده ممكن
ليلى / اللى تشوفه
على / هبقي اعزم عمر و أية مراته و فى واحده مهمه جدا فى حياتى هعرفك عليها طنط منال ارمله الحج انور الله يرحمه ست طيبه و ليها فضل كبير عليا و على عمر ما عندهاش اولاد و خدتنا اولادها و احنا كمان بنعتبرها فى مقام امنا صدقيني هتحبيها اوى
ليلي / و ابوك يا على موافق على علاقتك بعمر
على / بابا الله يرحمه اتوفى
ليلى / لا اله الا الله
على / فى حاجات كتير حصلت الفتره اللى فاتت ما يتهيالش ان ليها لزمه اننا نحكيها تعالى نبدا من النهرده تمام
ليلي / تمام اللى يريحك
نور تدخل
نور / انا جيت
على يبتسم
ليلى / نورتى بيتك
نور / اما انا بقي هعملكوا حته غدوه على فكره مرات ابنك شاطره جدا فى الطبيخ
على / و انا اشهد
نور / نصايه و الاكل يكون جاهز
نور تمشي
ليلى / هو انت اتجوزتها فى شقتها دا بيت عيلتها
على / ايوه
ليلى / و وافقوا
على / انا بنيت الشقه و شطبتها و فرشتها بس كتبتها باسمها برده كمهر يعني
ليلى / و عامل ايه معاهم
على / باباها راجل طيب اوى و عمها غلبان كان جارى فى المحل بس حصلتله ظروف و اتشل عايش فى الشقه اللى تحت و حمايا و حماتى فى الشقه اللى تحتهم و الصيدليه بتاعه اخوها نور لما بتبقي فاضيه بتنزل تقف فيها بس هم جابوا واحد يشغلها و كدا اريح
ليلى / مبسوط وسطيهم يعني اهم حاجه … شكلها بتحبك
على / نور دى ملاك من السما هاديه و عايزه تعيش بنت حلال بجد
ليلى / ربنا يهديهالك
على / انا خلصت تحبى تقعدى شويه فى البلكونه هواها حلو فعلا
ليلى / اقعد معاك فى اى مكان ربنا وحده اللى يعلم انت واحشني قد ايه
على يبتسم و يمد ايده لمامته و ياخدها و يعدوا من قدام المطبخ نور بتشتغل
ليلى / تحبى اساعدك
نور / لا لا ارتاحى حضرتك انا خلاص خلصت هعلق عليه و اجى اقعد معاكم
على / على فكره يا ماما انا كمان طبيخي حلو فى يوم هنعمل مسابقه و تحكمى بينا انتى بقي
نور / و انا اجى جنبك حاجه يا شيف يلا يلا ما توقفش ماما فى الحر و الكتمه يلا
على يبتسم و يروح مع ليلى البلكونه و نور تكمل
…………….
فى لبنان
حسام / تماااام … كدا الشقه فله و كل حاجه فى مكانها هنزل اجيب بقي شويه خزين و اتعرف على المنطقه تحبى تيجي معايا
ندى / هنام شويه قبل ما بيبو تصحى انزل انت و خد بالك من نفسك
حسام / تمام براحتك مش هتاخر
ندى / اوك تمام خلى تليفونك معاك
حسام / تمام و انا كمان مش هبعد ما تقلقيش يعني
ندى / تمام
حسام يمشي و ندى متبعاه اول ما يقفل الباب تروح تجيب الموبايل و تفضل تتصور فى الشقه و فى البلكونه و تصور حبيبه و تشير على الفايس صورهم و تروح تنام جنب حبيبه
ندى / ربنا يهديكي يا بيبو و تفضلى نايمه لحد ما بابا يجي
…………………
فى شقه على
على و نور و ليلي بياكلوا
ليلى / لا فعلا اكلك حلو جدا
نور / الف هنا اصلها هوايه عندى من زمان
ليلى / انا بقي استاذه فى الحلويات
نور / حلو جدا تعلميني بقي
ليلى / ان شاء الله
جرس الباب يضرب على يجي يقوم
نور / خليك يا قلبي كمل اكلك هفتح انا
نور تفتح الباب تلاقي امانى و محمد
نور / اهلا … دول بابا و ماما
على يقوم يسلم
محمد / كدا قومناكوا من على الاكل
على / حضرتك تنور فى اى وقت
نور / هروح اجيب طبقين اتفضلوا اتفضلوا
نور تدخل جوه
على / اعرفكوا .. والدتى ليلى .. طنط امانى حماتى و عموا محمد والد نور
ليلى / اهلا و سهلا تشرفنا
امانى / الشرف لينا يا حبيبتي مع انها متاخره اوى
نور تدخل تحط الاطباق
نور / انتوا لسه واقفين
الكل يقعد
امانى / معلش بقي اصل المفاجاه كانت شديده شويه
نور / ما قولتلك يا ماما ان بابا على و مامته كانوا منفصلين و على ما كانش عارف عنوان مامته الله
امانى / طب هو ابوه كان مانعه عنها هى ما تسالش عن ابنها
على / ما كانتش تعرف عنوانى اكيد كانت سالت
امانى / الحمد لله ان ربنا لم الشمل بس انا مستغربه بس التوقيت بس دا انتوا مسافرين
ليلى تبص لعلى
نور / دول اسبوعين بس هنروح و نيجي علاطول
امانى / و الست ليلى هتفضل هنا صح
على / لو ما عندكيش مانع
امانى / و انا امانع ليه بيتكوا و انتوا احرار فيه … و انتى بقي هتقفلى بيتك يا ست ليلى
على / ايوه ما لوش لزمه انها تقعد لوحدها و لا حضرتك ايه رايك
امانى / يهمنى راحتها مش يمكن ما بتحبش الخلطه
نور / لا هو دخول الحمام زى خروجه دى لو فكرت بس تمشي هنط وراها اصل انا لزقه ههههههههههه
ليلى تبتسم
نور / ما بتاكليش ليه
نور تحط لليلى و تحط لعلى على يمسك ايدها و يبوسها تبتسم و محمد متابع اللى بيحصل و مبتسم و ساكت
……………………..
فى المحل عند على
عمر / بتهزر صح
على / نفسي اولع فى نفسي يا عمر بجد انا لو كان حد حكالى ان فى واحد امه فى دار مسنين و هو عايش عيشتى كنت تفيت عليه اطلع انا فى الاخر واطى اوى كدا
عمر / و انت كنت تعرف منين
على / ما ليش عزر يا عمر ما ليش عزر طب كنت سالت عنها كنت سالت من بعيد حتى
عمر / ازاى و انت ما كنتش بتقدر تهوب من المنطقه اصلا انا اساسا مستغرب انك قدرت تدخل الشارع
على / اقسم بالله ما كانت سهله بس كلام نور وجعنى اوى
عمر / الحمد لله
على / البت نور دى مش عارف اقولك ايه … انت اصلك ما شوفتش بتعاملها ازاى و لا بتراعى نفسيتها ازاى … طبعا امها ما سكتتش بس نور لمت الموضوع
عمر / و طبعا ابوها
على / الحاضر الغائب خيال مأته
عمر / ربنا يهدى اهو النوعيه دى من الرجاله اللى بتخلى مراتاتهم يفتروا بالشكل ده
على / معاك حق سيبك منى انت بقي كنت عاوزنى فى ايه
عمر / أية عاوزه نسافر اسكندريه
على / و ماله حتى تبقى مصلحه تغيروا جو
عمر / علاطول
على يتعدل فى الكرسي
عمر / و لو ينفع بره مصر يكون احسن
على / و انت رايك ايه
عمر / ليا مين بره يا على طب هى فعلا ما لهاش غيرى فمش فارقه بالنسبالها انما انا ليا … ليا انت يا على
على/ طب و دراستها
عمر / هى كدا كدا انتساب
على / لو ده هيخليها تعدى اللى هى فيه جرب
عمر / الهروب هو الحل يعني
على / هتواجه مين يا عمر هتواجه مين يعني
عمر / طب و المحل
على / افتح واحد تانى هناك و اشوفلك حد يقف فى ده و تابع الاتنين
عمر / طب و الحركه دى بتحصل ببلاش يعني
على / سبها لله … انوى انت بس و انا هسلفك
………………..
فى شقه عمر
أية / لا يا عمر سلف لا
عمر / دا بدل ما تفرحى انى هعملك اللى انتى عوزاه
أية / و هو انت ما تعملش اللى انا عوزاه غير لما تاخد اذن على
عمر / انتى شيفاها كدا يا أية
أية / طب قولى انت شايفها ازاى و من غير قمص
عمر / و كمان قمص !!! طب بصي بقي يا أية المحل حسباته قدامك و انا سبت مرتب الحكومه و الشركه و ده اللى باقي لي نعيش منه شوفى بدخل كام فى الشهر و شوفى الدكتور بتاعك بس بيسحب كام منه و اكل و شرب و مصاريف عشان اعمل اللى اقدر عليه عشان نفسيتك و فى الاخر زى ما انتى شايفه
أية / على يعني اللى بيصرف علينا
عمر / ليا مين يا أية اميل عليه لما اتزنق و بعدين ما تقلقيش بردهم
أية / لو كنت قولتلى كنت لميت ايدى و الدكتور بتاعى اللى قاطم ضهرك انا مش ريحاه تانى و ان كان على سفرنا اسكندريه فدهبى موجود و انا اولى من على بالوقوف جنب جوزى يا عمر
أية تدخل جوه عمر يدخل وراها يلاقيها بتنام فى السرير
عمر / مين فينا اللى بيتقمص دلوقت
أية / انا مش مقموصه
عمر / امال هتنامى بدرى ليه
أية / عشان ما نتخانقش يا عمر
عمر / مش هنتخانق يا أية قومى اقعدى معايا نشوفلنا فيلم نتفرج عليه سوا
أية / هتعملى فشار ؟
عمر / اعملك قومى
أية تبتسم و تقوم عمر ياخدها فى حضنه و يطلعوا بره
…………………
فى شقه على
على و نور قافلين عليهم الباب بالمفتاح و نايمين فى حضن بعض
نور / بصراحه ما كنتش متخيله انى هقولها بس
على / يومين و نسافر و لما نرجع
نور / والله يا على انت عارف انى مش عوزاها تمشي بس اديك شوفت كنا متكتفين ازاى النهرده لا عرفنا نلعب زى كل مره و لا خدنا راحتنا
على / فاهمك بس انا مش هقدر اقولها تمشي دلوقت خالص دى ما لحقتش استنى حتى شهر و لا حاجه و بعدين انا هنزل الشغل طول النهار اهو تسلو بعض ايه رايك
نور / طب ايه رايك انت نجبلها شقه صغيره فى المنطقه و نفضل معاها طول اليوم و نسيبها على النوم بس
على / طب و عمك هتعملى فيه ايه
نور / ماله عمى ما حسام حالل الموضوع و جايبله ناس متخصصين
على / بس احنا قولنا هنتابعه انتى كدا بتشتتى نفسك
نور/ خلاص اللى تشوفه … هو انا ممكن اسالك سؤال
على / اكيد
نور / انت ليه قولت لمامتك ان انت اللى ما بتخلفش
على يبتسم و يبص الناحيه التانيه
نور / خفت تضايقنى صح
على / لا … الحقيقه لا … عملت كدا عشان اختصر عمرى من الجدال و القيل و القال و صداع ما لوش اول من اخر
نور / مش هيجي عليك يوم و تندم يا على
على / ما حدش بيهرب من نصيبه و سبحان اللى بيرزق لو مكتوبلى حاجه هشوفها
نور / ازاى يعني
على / يعني سبيها على الله
نور / كل الدكاتره قالوا ما فيش امل
على يبوس راسها
على / نامى يا نور احنا صاحيين من بدرى و تعبنا اوى النهرده
نور / تمام يا حبيبي
……………………..
فى الشركه فى لبنان
حسام داخل يقابله شاب
الشاب / حسام باشا نورت لبنان
حسام / منوره بناسها
الشاب / بلغونا انك مش بتحب تشتغل فى مكتب مقفول
حسام / و لما باب المكتب يتقفل عليا هتابع الشغل و الموظفين ازاى
الشاب / هههههههه وجهه نظر على العموم احنا خصصنالك المكتب اللى هناك مكان كاشف المقر كله و تقدر تتابع الشغل كله من هناك
حسام / تمام .. استاذ غسان وصل مش كدا
الشاب / لا والله لسه
حسام / تمام هستناه فى الجزء بتاعى هناك … عن اذنك
حسام يروح مكتبه يلاقي مج ملفوف كادو يفتحه يلاقي مكتوب عليه حسام زغلول جواه شيكولاته بنت جميله تدخل
البنت / كل واحد هنا عنده المج بتاعه عليه اسمه
حسام / هديه حلوه منكوا ميرسي … حسام … انا
البنت / غنى عن التعريف … هدايه عزام … ام لبنانيه اب مصرى
حسام / واضح .. من اللهجه اقصد
هدايه / هو انت منهم و لا ايه لا على فكره انا برده بتكلم لبنانى كويس بس بعتز باصلى المصرى
حسام / احسن ناس بس .. احم .. كنتى تقصدى ايه بانت منهم
هدايه / اللى بتاثر فيه اللهجه اللبنانيه
حسام / انا متجوز مصريه بالرغم من انى تقريبا لفيت الوطن العربى كله
هدايه تتعدل فى وقفتها
هدايه / غسان بيه وصل
حسام يبتسم و يقوم يروح يسلم عليه
………………
فى شقه على
ليلى فى المطبخ مع نور
ليلى / يااااه دا انتوا طلعتوا عرسان جداد خالص انا قولت على الاقل بقالكوا سنتين تلاته اقل حاجه
نور / اشمعن يعني
ليلى / اصل ايه اللى هيخلى عرسان جداد يكشفوا على الحمل و الخلفه دا قصدى
نور / ماما … انا اللى ما بخلفش مش على
ليلى تبص لنور باستغراب
نور / على قالك كدا عشان كان خايف على مشاعرى
ليلى / و انتى
نور / انا كنت متجوزه قبل على
ليلى / ما تاخذينيش يا بنتى بس
نور / انا قولتلك الحقيقه عشان مش عاوزه اكدب عليكي انا و على بنحب بعض و هو عارف ظروفى كامله قبل ما يتقدم
ليلى / عن اذنك يا نور يا بنتى هروح الحمام
ليلى تقوم و نور تتابعها بحزن
…………………..
فى شقه منال
على / علاقتى بيها عمرها ما كانت علاقه طبيعيه اصلا
منال / فهماك
على / انا امى كانت ماما حنان الله يرحمها
منال / بس ماما ليلى برده ليها عندك حقوق
على / عارف والله بس حاسس انى جبت واحده غريبه عيشتها معايا
منال / عشان عرسان بس
على / ما كنتش متخيل انى هضايق بالسرعه دى هو انا ابن وحش اوى كدا
منال / انت ظروفك مختلفه و صدقنى انا فهماك جدا و حاسه بيك
على / نور بتقول اخدلها شقه فى المنطقه
منال / لا لا لا ما لوش لزمه لو عاوز رايي خليها معاكوا قرب منها و عوضها عن اللى ضاع منها سنين و اسمحلها تعوضك عن اللى راح منك
على / اللى راح عمره ما بيرجع
منال / انت لسه صغير و العمر قدامك
على / انا خايف تحتك بطنط امانى او تضايق نور
منال / ساعتها هبقي اخدها تعيش معايا هنا تونسني و اونسها و من هنا لوقتها اكون خدت عليها و اتصاحبنا
على / حضرتك هتيجي تتغدى معانا بكره قبل ما نسافر
منال / ما تقلقش فاكره و اهو فرصه اتعرف على مامتك
على / باذن الله
منال / انت راجل كويس يا على جدع و ابن اصول صدقنى مش هتعمل الا الصح
على / ما خاب من استشار
منال / و انا هنا وقت ما تحتاجنى
على / ربنا ما يحرمنى منك ابدا و يديكى الصحه و طوله العمر
………………….
فى شقه على
نور تدخل الاوضه تلاقي على نايم تقفل الباب بالراحه و نطلع بره تلاقي ليلى قاعده بتتفرج على التليفزيون
نور / لقيته نايم ما هانش عليا اصحيه
ليلى / هينام دلوقت؟؟ دا كدا مش هيعرف ينام بالليل
نور / على نومه متقطع جدا دا ان عرف ينام اصلا فما بصدق انه ينام بسيبه
ليلى / على !! دا كان بيتحدف على السرير زى الطوبه ما يصحاش الا اما المنبه يضرب و يصحى البيت كله و نقف كلنا على دماغه نصحيه ههههههههههههههههه
نور / هههههههههههههههه مش قادره اصدق بصراحه مع ان نفسي اوى الايام دى ترجعله تانى … على … بيحلم بكوابيس كتير اوى و خصوصا لو اتعرض لاى موقف يفكره بطفولته
ليلي / شكلكوا تعرفوا بعض من زمان اصلكوا عرسان جداد اكيد ما لحقتيش تعرفى عنه كل ده فى الكام يوم دول
نور / مش من كتير انا اصلا كنت جاره طنط منال و الحج انور الله يرحمه و على كان بيجيلهم كتير فاتقابلنا كذا مره و اتعرفنا على بعض و حبينا بعض و كدا
ليلى / احكيلى احكيلى انا فاتتنى حاجات كتير اوى … احكيلى عنك انتى و هو
نور / ما فيش حاجه تتحكى … انا كنت … بصي هى مجموعه صدف كدا فى الاول و بعدين لما اطلقت … هى كانت فتره صعبه علينا احنا الاتنين
ليلى / لو مش عاوزه تحكى بلاش انا فهماكى مش سهل ان الواحده تنفصل بس انتى وضعك اهون انتى ما كانش عندك اولاد
نور / انا اطلقت عشان ما عنديش اولاد
ليلى / و التانى كان عاوز خلفه
نور / اتجوز من ورايا
ليلى / بس دا حقه الشرعى امال التعدد اتعمل ليه
نور / هو حقه بس مش دى … مش البنت دى … يعني عارفه لما تبقي فى واحده سبب مشاكل بينكوا و انتى حاسه انها بترسم عليه و فجاه تكتشفى انه متجوزها و حامل كمان
ليلى / الستات بيحسوا طبعا بالحاجات دى … بس ما تاخذينيش يا بنتى ايه يضمنلك ان على بعد فتره ما يتمناش يكون اب هو اكيد بيحبك عشان يتجوزك فى الظروف دى
نور / ما عنديش ضمانات … حقه … انا ما اجبرتوش يتجوزنى هو كان عارف ظروفى و هو اللى اتقدم انا … انا ما منعتوش … و مش همنعه … يوم ما يحب … مش هقف فى طريقه و صدقيني هنسحب بكل هدوء … مش هتمسك تانى بعلاقه انا عارفه انى مهما حاربت فيها انا برده الطرف الخسران
عنين نور تتملى بالدموع
ليلى / طب و ليه ما تفضليش جنبه و ربنا يكرمكوا من الزوجه التانيه دى بعيل تربوه انتوا التلاته سوا
نور / مش هقدر … على فكره انا بحبه اوى … بحب على اوى … مش سهل اشوفه مع غيرى ينام بعيد عنى و ابقي كمان عارفه انه نايم فى حضن غيرى … هتبقي ام اولاده … هيحبها عشان ام اولاده … و واحده واحده هبقي ضيفه … و يمكن ضيفه تقيله كمان
نور تعيط ليلى تطبطب عليها
ليلى / و لا اللى بتخلف مرتاحه و لا اللى ما بتخلفش مرتاحه
نور تبصلها
ليلى / حكالك عنى ايه ؟ الام الوحشه اللى رمت عيالها صح
نور / لا خالص
ليلى / لا لا انا دى … هو نفسه ما يعرفش غير كدا عشان يحكى عنى
على يصحى يطلع بره يسمعهم بيتكلموا يقف يسمع
…………………………..
فى شقه عمر
أية بتكوى الهدوم عمر يدخل و هو بينشف شعره
عمر / اما بقي لو كبايه قهوه من ايديكى الحلوه دى تبقي جبرت على الاخر
أية / هخلص القميص ده و اروح اعملك
عمر / هتعرفى يعني ههههههههههههه
أية / مش راده عليك
عمر / ايوه احنا بنرد فى الملعب
أية / طب تصدق هتكمل انت كوى هدومك انا داخله الحمام
أية تفتح الدولاب و تشد غيار و تمشي و عمر بيضحك
عمر / ايه يعني هتهدديني طب دا انا المكوى دى لعبتى
عمر يكمل كوى
عمر / فيلم عشان بقولها تظبط القهوه ما كل الناس عارفه انها ما بتعرفش تعمل قهوه عدله … بس انا هطلع اجدع منك و اعملك انا القهوه
عمر يوقف المكوى و يروح المطبخ يدور فى التقفيل
عمر / هو برطمان القهوه فين … داهيه لا يكون مفيش قهوه تبقي عنب اوى
عمر يفتح فى التقفيل و يدور فى برطمان وراه التانى يلاقي شريط حبوب منع الحمل ناقص حبوب يمسكه و يبص فيه باستغراب و يبص على الحمام و يرجع يبص للشريط أية تفتح باب الحمام عمر يروح يقف قدامها و فى ايده الشريط أية تبصله و تبص للشريط
…………………….
فى شقه على
ليلى / كنت عيله فى ثانوى حبيت واد حليوه عندنا فى الشارع اهلى لما عرفوا طلعونى من المدرسه و جوزونى غصب لاول عريس … ابو على … كان راجل حنين مش هنكر … و كريم … بس انا عمرى ما حبيته … احساس انى بخونه حتى لو فى خيالى كان واجعنى و خصوصا لما ابراهيم الله يحرقه ظهر فى حياتى تانى حاولت والله العظيم والله العظيم انى ابعد و انساه ما قدرتش فى كل مره بشوفه فى كل مره بسمع صوته حتى لو من بعيد … محمود لما عرف طلقنى جاب اهلى و قالهم بنتكوا عندكوا … ما كانش فى بينى و بين ابراهيم اى حاجه انا برده متربيه … بس كنا بنتخانق فى مره و وقعت بلسانى … انا و محمود اللى كنا بنتخانق وقعت و اتكلمت عن ابراهيم و ان اكيد ما كانتش هتبقي حياتى معاه كدا … ما انا عيله برده
على متابع و باصص فى الارض ليلى تعيط
ليلى / اهلى نزلوا فيا ضرب كان الود ودهم اموت يوميها ما اعرفش ازاى فلت و هربت محمود ما دافعش عنى اهلى ما دافعوش عنى عيالي فوق و انا لوحدى فى الشارع لو طلعتلهم هموت و لو سبتهم هموت … انا ما عملتش حاجه … ما خنتوش ما اتكلمتش حتى مع ابراهيم مع انى بحبه … ما ليش مكان تانى اروحه … روحت لابراهيم جسمى كله ازرق هدومى متقطعه مش شايفه من كتر العياط … ابواب الدنيا كانت مسدوده فى وشي بعدى عن عيالي قاهرنى … حتى ابراهيم اللى كان ملجأى الوحيد وقتها كنت خايفه منه هيعمل فيا ايه … فتحلى الباب و سابلى بيته اقضي فيه العده شافلى محامى احاول اجيب العيال طبعا ما ينفعش عشان هتجوز معيش غير ثانويه لو ما اتجوزتش ابراهيم و اخترت العيال هجوع انا و هم اهلى ماتوا فى نظرى من زمان و خدت العزا يوم طلاقى يعني مفيش امل … تمام اتجوزت ابراهيم معاملته ليا كويسه لحد ما عرف انى بروح ازور محمود … كنت بزور عيالي والله بحوش من مصروف البيت اى فكه و اجمعها و اجبلهم اى حاجه و اروح اشوفهم … تخيلى عيالك بيقولوا ماما لحد تانى و ما تقدريش تقوليلهم انا ماما بيحضنوكى و يبوسوكى كانك واحده غريبه ما بيدوكيش فرصه تشبعى و لازم تنزلى جرى قبل ما محمود يشوفك خصوصا انه شغال تحت البيت حبى لابراهيم خلى محمود يكرهنى و حبى لعيالي خلى ابراهيم يحس انه مش قادر يكفيني و الموضوع باظ خالص بقي لما عرف انه ما بيخلفش و مش هيقدر يعوضنى عنهم
نور / و ليه ما قولتيش لعلى الكلام ده قبل كدا
ليلى / امتى ؟؟ لما على جالى ابراهيم ركبه مليون عفريت و فعلا ظروفنا الماديه كانت على القد لانه كان بيحاول يتعالج و انا قولتله هشتغل بس واحده بثانوى هتشتغل ايه بنضف بيوت و امسح سلالم و و لما بداو يكبروا و مصاريفهم تكتر معاهم اشتغلت الصبح فى محل فراخ و بالليل فى عياده دكتور .. انا بنت ناس على فكره من عيله … عارفه يعني ايه تبقي من عيله و يجور عليكي الزمن عشان عيالك
نور تطبطب على ايد ليلى
ليلى / كان على قلبي زى العسل لحد ما على ساب الجامعه … بقي بعد كل ده … هو مش بيديني وش كارهنى و ده حقه ما هو ما يعرفش و ان اتكلمت مش هيفهم لا سنه و لا خبراته هتخليه يفهم يمكن عبير الله يرحمها اللى كانت بديني ريق حلو يصبرنى على العيشه لحد ما كلمونى فى يوم و قالولى انها ماتت
على ما يقدرش يقاوم و الدموع تنزل من عنيه و يطلع يقف قدام ليلى
ليلى / روحت المستشفي لا فاهمه امتى و لا ازاى محمود هايج و على منهار و انا مش مصدقه اللى بسمعه امتى طيب امتى الا عمره ما بصلها و لا كان بيبصلها و هى يا قلبي ساكته و صابره طب كانت قالت
على يقعد تحت رجلين ليلى
ليلى / هى لو قالت كنت هسكت يعنى كنت هاخدها و اهج كنت قتلته قبل ما يمس منها شعره
ليلى تعيط نور تحضنها
ليلى / كانت قالت لاخوها كانت هربت لابوها اى حاجه غير اللى جرا كانت تعمل اى حاجه تانيه غير انها تموت بالشكل ده
على / خلاص يا ماما كفايا
ليلى / انا مش ام وحشه يا على انا ما بعتكوش انا ما عنديش اغلى منكوا يا ابنى
على يبوس راسها
على / و لا انا عندى اغلى منك اهدى
نور / هقوم اعمل ليمون عن اذنكوا
نور تقوم و على يقعد مكانها و ياخد ليلى فى حضنه بتعيط و هو بيطبطب عليها
…………………………….
فى شقه عمر
أية تاخد الشريط من عمر و تدخل المطبخ تعينه مكانه عمر يدخل وراها
عمر / بالبساطه دى مفيش حتى تفسير
أية / عاوز تفسير لايه يا عمر
عمر / مش دا برضه حبوب منع حمل و لا انا فاهم غلط
أية / حبوب منع حمل و اه باخدها … ليه عشان مش مستعده لاطفال دلوقت يا عمر
عمر / و خدتى القرار ده لوحدك
أية / انا تعبانه يا عمر تمام … مش طبيعيه مجنونه
عمر / يا سلام
أية / انت مصمم تكلم يعني مصمم تسمع كلام يضايقك
عمر / مجرد وجود الشريط ده مضايقني مجرد انك اتاخرتى فى الحمل بعد الحادثه
أية / ما هو المشكله فى الحادثه كل حاجه باظت بسبب الحادثه
عمر / ليه
أية / عشان انا خسرت نفسي يا عمر احساسي بالامان ضاع مش قادره اتحمل مسؤليه طفل او طفله يجي يوم و يشوفوا امهم متصوره بالشكل ده
عمر / مش هيحصل … مش هيحصل و ان حصل هناخد حقنا بالقانون احنا ما عملناش حاجه غلط
أية / مش هقدر يا عمر
عمر/ هو انتى بتقدرى البلا قبل وقوعه
أية / اصبر عليا يا عمر اصبر عليا احنا لسه صغيرين استنى يمكن لما اخلص دراستي اكون خفيت
عمر / انتى لا عيانه و لا مجنونه يا أية
أية / انا خايفه يا عمر خايفه يجي عليا يوم و ابقي زى ندى بقره مسحوبه بحبل عيالها
عمر / و انا بالنسبالك هبقي حسام اللى ساحبك مش كدا
أية / لا يا عمر انا بحبك
عمر / بس مش حاسه بالامان معايا
أية / وقت الجد سبتني و هربت
عمر يبصلها بحزن و الدموع بتنزل من عنيها
أية / انا بحبك و ما ليش غيرك بس دا عمره ما هيغفرلك انى جيتلك و جيت لعلى و اتخليتوا عنى فى اكتر وقت كنت محتاجاكوا فيه كان ممكن اموت كان ممكن مليون حاجه تحصل و انا لوحدى انا لحد النهرده بتفزع لو حد خبط جامد على الباب مش قادره اواجه الناس مش قادره انام طبيعي من غير كوابيس
عمر / كمان فى كوابيس
أية / مش كل الكوابيس بتصحينا بنصرخ منها ساعات بنتفزع من غير صوت
عمر / دا انا طلعت عايش فى دنيا تانيه بعيد خالص
أية / و اديك عرفت هتزعل و تسبنى لوحدى و تروح لعلى تشتكيله و تفضفض معاه و بعدين ترجعلى صح
عمر / لا يا أية مش هسيبك
عمر ياخد أية فى حضنه
عمر / و مش هتروحى للدكتور لوحدك تانى و لا حتى مع طنط منال … عشان انتى مشكلتك ما طلعتش فى الحادثه مشكلتك طلعت فيا انا
أية / انت زعلان منى
عمر / زعلان من نفسي اوى .. زعلان انى سبتك يوميها و زعلان انى ما فهمتكيش لحد دلوقت … حقك عليا يا أية حقك عليا يا حبيبتي
أية تعيط جامد و عمر حاضنها
……………………
فى شقه ندى
ندى بتكلم نور فيديو كول
نور / بالسرعه دى
ندى / دا نزل من امبارح كمان
نور / على خير ان شاء الله و عاملين ايه فى الاكل و الحاجات دى
ندى / بنجهز الحاجه من بليل و انا اسويها
نور / لو احتاجتى اى حاجه كلميني تمام
ندى / تمام
ليلى تدخل
ليلى / هو مفيش نعناع يا نور
نور / فى يا ماما فى رف البهارات عوزاه فى حاجه
ليلى / بحب احط رشه على خلطه المحشي
نور / ما اعرفش على بيحبه كدا و لا لا بس هو فى رف البهارات
ليلى / ماشي يا حبيبتى
نور / هخلص الفون واجيلك
ليلى / خدى راحتك
ليلى تمشي نور تبص لندى
ندى / ماما !!!
نور / مامه على
ندى / هى لسه عايشه
نور / ما تساليش
ندى / و عامله ايه معاكى
نور / عسل … النهرده عندنا عزومه انتى عارفه مسافرين بكره و كدا
ندى / أية جايه
نور / اه طبعا و طنط منال و ماما و كلنا
ندى / و بابا
نور / كلنا يا بنتى كلنا و ما تقلقيش انا و على نازلين طالعين عليه و فعلا الناس اللى حسام جايبهم دول كويسين اوى و احنا كلنا فوق راسهم ما تقلقيش و نقلناله التليفزيون قدامه و جنبه نوته و قلم لو حب يكتب اى حاجه و على جابله تليفون صغير و مسجل عليه نمرنا و عامل خاصيه الاتصال السريع يتصل علينا فى ثوانى
ندى / ربنا ما يحرمنى منكوا ابدا
نور / و لا يحرمنا منك … انا تقلت على ماما ليلى اوى بس انتى وحشتيني اوى
ندى / اما نشوف لما تسافرى هتفتكريني و لا
نور / بس يا رخمه
ندى / ههههههههههه روحى روحى لحسن حماتك تغضب عليكي
نور / مش بقولك رخمه … يلا سلام بوسيلى بيبو
ندى / سلام
نور تقفل و تجرى على المطبخ
ليلى / ما كترتش النعناع خفت تكونوا ما بتحبوهوش
نور / ان شاء الله هيطلع جميل كفايا انك حطيتي نفسك فيه وسعى بقي اما استلم منك
ليلى / لا خد البتنجان احشيه على ما اخلص سليق الكرنب
نور / تمام … طلعتى الفراخ
ليلى / سلامه الشوف ما هى فى الحلل على البوتجاز اهو هههههههههههه
نور / هههههههههههه ما اخدتش بالى عن اذنك هحشي بره
ليلي تبتسم نور تاخد الصينيه و تطلع بره
……………….
فى المحل عند على
على / دا الموضوع طلع اكبر مما كنت متخيل
عمر / لا و طلعت فهمانى اكتر مما كنت فاكر ان فاهم نفسي قالتلى هتروح تفضفض مع على و تسبنى لوحدى فى الوقت اللى كنت ناوى اعمل فيه كدا فعلا لميت نفسي و احتويت الموقف
على / انت فعلا زى ما قولت لازم تروح للدكتور يقولك تتعامل معاها ازاى
عمر / كلامها وجعنى اوى يا على حسيت انى واطى اوى
على / كل حاجه وقتها كانت غلط و غلط فوق غلط فوق غلط الدنيا باظت مننا
عمر / سيبك منى عامل ايه مع مامتك
على / لسه بتعرف عليها من اول و جديد
عمر / كلنا بنتغير و دول مش يوم و لا اتنين دول سنين طويله عمر يعني
على / لا لا ما اقصدش بس طلعت الدنيا غير ما كنت فاهمها خالص
عمر / ازاى يعنى
على / كنت لما ببص لندى و اقول قد ايه بتعانى عشان بنتها مش امى اللى رمت عيالها عشان حبيبها ما طلعتش كدا خالص … مش هنكر انى لو مكان بابا الله يرحمه كان رد فعلى برده هيبقي عنيف بس … انت فاهم انا بقول ايه
عمر / دا شكل واحد فاهم
على / ههههههههه لا
عمر / بقولك ايه شكلها حوار هروح اجيب أية و اقابلك عندكوا و نبقي نتكلم على رواقه
على / ما تجيب الحجه بالمره انا كمان هعدى اجيب نواقص للعزومه و كدا
عمر / بسيطه جيت فى جمل
على / ما اتحرمش منك
عمر / امين يلا سلام
عمر يمشي على يقوم و يقفل ورق قدامه
…………………….
فى شقه نور
باب الشقه يخبط ليلى تروح تفتح تلاقى منال
منال / السلام عليكم مدام ليلى صح
ليلى / ايوه
نور تطلع من المطبخ
نور / طنط منال ازيك اتفضلى اتفضلى … دى طنط منال يا ماما
ليلى / حقك عليا اللى ما يعرفك يجهلك
منال تدخل تقعد و ليلى و نور يقعدوا
منال / و لا يهمك يا حبيبتي سعيده انى اتعرفت عليكي … ايه ريحه الاكل دى هو انا اتأخرت و لا ايه انا قولت اجى بدرى اساعد
نور / تساعدى مين دا ماما ليلى ايديها ما شاء الله مكنه فى لف المحشي
منال / ايه ده يعني ارجع تانى و لا ايه
نور / هو دخول الحمام زى خروجه و لا ايه دا انا ما صدقت جيتي بدرى يمكن نشبع منك شويه
منال / امال الحجه امانى فين انا ما عديتش تحت قولت اكيد هنا
ليلى/ زمانها طالعه اجبلك حاجه تشرابيها و لا تسد نفسك
نور / خليكي انا هقوم اجيب و اوطى على المحشي
نور تقوم
منال / منوره بيتك يا ست الكل
ليلى / منور باهله و زواره
منال / ان شاء الله نتقابل كتير الفتره الجايه و نتعرف على بعض اكتر
ليلى / دا يشرفنى نور حكتلى عنك و عن الحج الله يرحمه و اللى عملتوه عشان على كتر الف خيركوا
منال / على يستاهل كل خير
نور تطلع من المطبخ شايله صينيه عليها كاسات عصير
نور / اتفضلوا يارب يعجبكوا
منال / الحلو ما يعملش الا الحلو
……………………
فى شقه محمد
محمد / انا مش فاهم ازاى نبقي جيران و نطلع اخر ناس يعني
امانى / اخر ناس ايه هو سى على نفسه كان وصل
محمد / برده اهو تقفى جنب بنتك فى العزومه و تساعديها
امانى / اه و ست ليلى تتستت على قفايا ما قولتلها تجيب جاهز قال على نفسه فى كرنب يا ماما زهقنا من البيتزا و السندوتشات يا ماما نفسنا فى اكل بيتي يا ماما
محمد / انا تاعب قلبي معاكى ليه طبعك و لا هتشتريه انا طالع ابص على اخويا ابقي خبطى عليا و انتى طالعه ما ينفعش اقعد وسط الستات لوحدى
امانى/ لما على يجي ابقي اطلع
محمد يبصلها و يمشي و هو بيضرب كف على كف
………………..
فى شقه على
نور شايله الاكل من المطبخ و أية بتساعد و ليلي بترص السفره و امانى قاعده بتتكلم مع منال
امانى / دول ما حضروش حتى شنطه السفر
نور / هنحضرها فى السهره بقي يا ماما
امانى / و هو بعد ما تخلصي الليله و المواعين هيبقي فيكي حيل تحضرى حاجه
على يدخل من البلكونه
على / ما تشغليش بالك يا طنط و بعدين احنا مش مهاجرين فى صحرا اللى ننساه نجيب غيره
منال / تعيش و تجبلها يا حبيبي
ليلى / و بعدين ما تقلقيش يا ست امانى انا هساعدها فى التنضيف
منال / تنضيف ايه دا لو كل واحد غسل طبقه
على / ما تحطيش فى دماغك الكلام ده يا حجه احنا جايين ننبسط تنضيف ايه و مواعين ايه
نور / الاكل جاهز
عمر و محمد يدخلوا من البلكونه و محمد بيزق مصطفى بكرسيه و الكل يقعد
نور / طنط ليلى بقي هى اللى عامله الاكل دا كله انا بس ساعدت فدوقوا بقي و قولوا رايكوا
عمر / لا تسلم ايدها الريحه لوحدها كفايا
ليلى / الف هنا يا حبيبي مطرح ما يسري يمري
منال / لا حقيقي عظمه اوى
امانى / دا غرقان نعناع
نور / لا والله دى رشه صغيره خالص
امانى / بس باينه لقطعها من اول قطمه اهو
منال / فى ناس بتحب تحط نعناع عشان انتفاخات الكرنب
امانى / و هو الكمون قصر معاكوا فى حاجه
ليلى / ازواق يا ست امانى و لولا اختلاف الازواق لبارت السلع
نور / بس هو حلو فعلا يا ماما تسلم ايدك
نور تبص لعلى تلاقيه بياكل مصطفى و مش باصصلهم تحطله قطعه فرخه قدامه يبتسم
على / تسلم الايادى الاكل حلو فعلا
ليلى / الف هنا يا حبيبي
………………..
فى شقه عمر
أية / ما كانتش جابتها من شعرها كنت ارتحت
عمر / ست قليله الزوق اوى
أية / احرجت الكل و طول القعده تحدف فى كلام الواحد ما يروحش فى حته هى فيها بعد كدا
عمر / عشان الورد
أية / انت لسه زعلان منى يا عمر
عمر ينتبهلها
أية / حكيت لعلى
عمر / اه حكيتله … بس مش عشان اخد رايه انا وحيد يا أية زيك بالظبط
أية / لا يا عمر مش زيي انا ماليش غيرك لما بحب احكى او افضفض ما بروحش لغيرك
عمر / و لا حتى انا بتجيلى يا أية
أية / كانت فتره صعبه ندى و الظلم اللى بتعيشه بسبب بنتها
عمر / لا انا حسام و لا عمرك هتشوفى اللى ندى بتشوفه و لعلمك بقي لو خيرتى ندى نفسها بين حبيبه و الدنيا
أية / هتختار حبيبه بس لو ما كانتش حبيبه جت قبل ما حبيبه تتولد كانت بتحاربه بتقاوم ما كانش لقى ايد توجعها يمسكها منها
عمر / و انا محتاج ايد توجعك امسكك منها يا أية مش كدا
أية / انا قلبي هو اللى بيوجعنى يا عمر
عمر / سلامه قلبك يا قلبي بس ليه هو انتى فاكره انك لما هتقوليلى كدا مش هزعل مش هتاكديلى احساسي انى مقصر فى حقك طب قوليلى اقدر اعمل ايه و ما عملتوش انا سبت الدنيا عشان ابقي جنبك سبت الكليه و الشركه و بعدت عن كل اللى يعرفونى عشانك
أية / ازاى و احنا لسه عايشين وسطيهم
عمر / تمام يا أية تمام من بكره اكلم سمسار فى اسكندريه يشوفلنا شقه و محل و اخدك و نسافر من هنا نبعد عن كل اللى بيحبونا نبقي انا و انتى بس مادام ده هيريحك يا أية
أية / انا و انت و بس .. هنحتاج ايه تانى
عمر يوطى على راسها يبوسها
عمر / انتى عندى بالدنيا يا أية اقسم بالله انتى عندى بالدنيا نسافر و نبعد و كل اللى يريحك حاضر
أية / ربنا ما يحرمنى منك ابدا
عمر / و لا يوريني فيكي حاجه وحشه
…………………..
فى المطار تانى يوم
عمر / انا عاوزك بقي ايه تلفلى المالديف دى حته حته كدا عشان تجبلى الزتونه لما اجى اروح
نور / طب ما كنتوا جيتوا
عمر / نيجي فين لا انا بحب فى الحاجات دى ابقي لوحدى مش جمصه هى عشان نطلع عائلات
ليلى / ههههههههههههههه ربنا يحظكوا يا ولاد
على / عمر هيروحك يا ماما و كدا كدا البيت مليان و لو احتاجتى اى حاجه رقم عمر انا سجلتهولك على الموبايل
عمر / دا على اساس انى هستنى اما تحتاج لا دا حضرتك ما تعرفينيش انا لزقه اوى
ليلى / ربنا ما يحرمنى منك لا انت و لا اخوك
نور / و انا !!!
ليلى / و لا انتى يا ست البنات كلهم
على / طب ايه كدا الطياره هتفوتنا
عمر / لا تفوتكوا ايه يلا على بركه الله سيرى يا نورماندى … و ما تقلقش كلو هنا تحت السيطره
نور تحضن ليلى
نور / هتوحشيني اوى
ليلى / و انتى اكتر والله يلا فى حفظ لله كلمونى طمنونى اول ما توصلوا تمام ؟
على / اكيد باذن الله يلا سلام
على يحضن ليلى و يمشوا يوطى على نور يوشوشها
على / جبت اللعب؟
نور / جبتها كلها
على / كدا الواحد يسافر و هو مطمن
نور تضحك و تبص الناحي التانيه
عمر / تمام … تحبى اوصلك فى اى حته قبل ما نروح ؟ ايه رايك تيجي تتغدى معانا النهرده على فكره أية نفسها حلو اوى فى الاكل
ليلى / تسلم ايديها و عنيها بس انا ما نمتش من امبارح و فى اكل كتير باقي من العزومه خليها مره تانيه ان شاء الله
عمر / خلاص تمام يبقي تسمحيلى بقي اعزمك على حاجه حلوه فى الطريق
ليلى / اسمحلك اتفضل
………………….
فى شقه ندى
حسام يدخل شايل اكياس
حسام / نونو انا جيت
ندى / فى المطبخ
حسام يدخل يحط الاكياس فى الارض
ندى / ايه ده
حسام / خزين للبيت معلبات و مجمدات على القلى عشان هتلخم الفتره الجايه فقولت الحاجات دى بتنجز كنت عايش عليها فى الامارات
ندى / تمام روح غير و اتشطف و انا هعبيها و اغرفلك
حسام يجي يمشي ندى تلحقه و تمسك ايده يبصلها
ندى / بشويش بيبو نايمه
حسام يحط صابعه على بقه و يمشي و ندى بترص الحاجه فى الفريزر حسام يدخل تانى و هو بيفك زراير القميص
حسام / كلمتى نور؟ النهرده معاد سفرهم الهانيمون
ندى / كلمتها إمبارح
حسام / ههههههههههههههه عرفتى بحكايه ام على
ندى / سمعت
حسام / كانت فين دى طول الوقت اللى فات
ندى / و احنا مالنا هو انا مسافره كل المسافه دى عشان تيجي تكلمنى عن على فى ايه يا حسام
حسام / مالك يا نونو اتعصبتى كدا ليه دى نكته مش اكتر
ندى / نكته !! المفروض اضحك يعني .. طب اضحك علي ايه على طفل اتربى فى اسره مفككه كلها معاناه انت شايف ان دى حاجه تضحك
حسام / هو انتى شايفه على طفل دا متجوز و فاتح بيت و لا انتى مش واخده بالك
ندى / انت عاوز توصل لايه
حسام / و لا حاجه عن اذنك
حسام يطلع بره و ندى تغرف و هى مخنوقه تسمع تليفون حسام بيرن تبص على الباب و تكمل غرف تخلص حسام يدخل
حسام / تحبى تخرجى بالليل
ندى / هنروح فين
حسام / عيد ميلاد واحده معانا فى الشركه
ندى / هى اللى كانت بتكلمك دلوقت
حسام / اه كانت بتاكد عليا
ندى / شكلك مهم اوى انها تتصل بيك و انت يا دوب لسه مروح
حسام يبتسم
حسام / غيرتى و لا ايه اقطع معاها وقتى
ندى / انا غرفت شيل الاكل على ما اصبلنا كبايتين عصير نبلع و لا احطلك بيبس
حسام يروح يحضنها
ندى / انا جعانه بيبو هتصحى
حسام / مش عيب تغيرى على جوزك على فكره
ندى / ناكل و بعدين نتكلم فى الموضوع ده ممكن
حسام يبتسم اوى
حسام / ممكن يا قمر
حسام يشيل الصينيه و يمشي ندى تنفخ
………………….
فى الفندق فى المالديف
نور نايمه على يروح يقعد جنبها و يحاول يصحيها
على / نور نونو نونه
نور تفتح عينها بالراحه
على / مش كفايا نوم بقي و لا ايه ما تقومى كدا نخرج و لا نتفسح و لا نعملنا اى حاجه
نور تنام على بطنها
نور / ضهرى مكسر خالص
على يدعكهولها بالراحه تبتسم
على / ما انا عاوز اعرف البلد دى تفرق ايه عن اسكندريه طب دا الواد عمر كان بيقول شعر فى الجونه
نور / مفيش فرق طو
على / امال اتشحطتنا كل ده ليه
نور / ما كملتش … كنت بقولك ما فيش فرق طول ما احنا مع بعض و بعدين ما تستهبلش انت مشكلتك كانت فى الطياره مش فى الشحطته
على / ايوه اه حصل ايه يعني اول مره اركبها خفت
نور تلف و تمسك ايده و تبوسها
على / الا ما روحت حجه و لا حتى عمره طب تصدقي لو روحت هروح برى انا طيارات تانى مش راكب
نور / هههههههههههههههه يا ابنى ما هى زيها زى اى مواصله و اللى ممكن يحصل فى الطياره ممكن يحصل فى المركب و فى القطر و فى العربيه
على / لا بس لما بصيت على البيوت و هى بتبعد دخت
نور / هههههههههههه مش انت اللى شبطت تركب جنب الشباك خلاص أبقي اركب بره و احنا راجعين و بعدين انت مصحيني عشان ترغى وسع وسع اما اقوم البس
على / ايوه بقي يا جامد انت يا مركز فى الصح
نور تضحك و تقوم و على متابعها
……………………
فى كازينو فخم فى لبنان
شباب وبنات يرقصوا واضاءه خافته و ليزر و موسيقي عاليه حسام يدخل شايل هديه و ندى جنبه شايله حبيبه ندى تشوف الجو تقفل هدايه تشوف حسام تجرى تسلم لابسه فستان قصير حمالات
هدايه / اخص عليك انا قولت مش جاى
حسام / احم .. ازاى بس … ندى مراتى حبيبه بنتى .. هدايه معايا فى الشركه
هدايه / نورتى العيد ميلاد و ايه القمر دى مش شكلك خالص يا دكتور
حسام / الحمد لله قمر زى مامتها … اتفضلي كل سنه و انتى طيبه
هدايه / اوووووووه ميرسي كتير تعبت نفسك اتفضلوا … بصوا بقي النهرده عوزاكوا تنسوا نفسكوا على الاخر اشربوا و انبسطوا و عيشوا هبص على باقى الناس و ارجعلكوا تمام
حسام / تمام
هدايه تمشي ندى تشد حسام
ندى / عاوزه اروح
حسام / احنا لسه واصلين
ندى / ما انا لو اعرف انك هتجبنى انا و حبيبه كباريه ما كنتش جيت
حسام / كباريه ايه بس
جارسون يدخل يحط كاسين على الترابيزه و يمشي
ندى / و ايه المناظر دى
الدى جاى يشغل شيك شاك شوك و هدايه تطلع على ترابيزه ترقص
ندى / و ادى الرقاصه جت اهى
حسام يبص لندى و يبتسم
حسام / بترقصي احسن منها على فكره
ندى / بس تعرف انا كدا اطمنت عليك فى الشركه
حسام / ههههههههههههههه يا شيخه
ندى / اهو يمكن وسط المزز دى كلها تلاقيلك واحده غيرى و تنسانى
حسام / يمكن فى غيابك شيطانى يغلبنى مره بس اول ما بشوفك بنسي الدنيا كلها و ما بقدرش انساكى
ندى تبص على الرقص و الدلع ناحيه هدايه
ندى / هى دى دكتوره
حسام / اللى مستهونه بيها دى اصغر مديره حسابات مسكت فى الشركه
ندى / لا تستحقها طبعا واضح انها بتشقي جامد فى الشغلانه دى مش شايف بترقص بضمير ازاى
حسام / هههههههههههههههههه
ندى / ما تقوم تنقطها
حسام يبص لندى ندى بتتفرج و هو مبتسم يبص على هدايه و يرجع يبص على ندى
………………….
فى شقه ليلى
جرس الباب يضرب تروح تفتح تلاقى امانى
ليلى / اهلا وسهلا اهلا و سهلا اتفضلى
امانى / انا قولت اطلع اطمن انك مش ناقصك حاجه انتى لوحدك برده
ليلى / فيكي الخير كلمتى نور
امانى / طبعا دى كل شويه تبعتلى صورهم على الواتس
ليلى / ربنا يهنيهم تحبى تشربى ايه
……………….

يتبع…

لقراءة الفصل التالي : اضغط هنا

لقراءة الرواية كاملة اضغط على : (رواية سلف ودين)

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى