رواية سلف ودين الفصل الخامس 5 بقلم لولو محمد
رواية سلف ودين الجزء الخامس
رواية سلف ودين البارت الخامس
رواية سلف ودين الحلقة الخامسة
سمر / ما انت سبتلى عمر عملت فيه ايه ضربته و لا حرقته و لا حطيت الشمعه على ضهره و سبتها تسيح زى ما سى على كان بيقول عنى
محمود / اسوء افتريتى عليه
سمر / بجد والله و مدام انا شيطانه اوى كدا سايبنى على زمتك ليه ما تطلقنى طلقنى يا محمود و مش هتشوف وشى و لا وش بنتى تانى و ابقى خلى ولادك الرجاله ينفعوك
محمود / طبعا بتقوليها بقلب جامد مهو كل حاجه باسمك دلوقت
أية / كفايا بقى كفايا حرام عليكوا ارحمونى
سمر / أية حبيبتى
أية / بابا تعبان يا ماما بابا تعبان
سمر / شايف .. شايف اللى مش من دمك خايفه عليك ازاى
محمود / بطلى تقولى الكلمه دى عنها أية بنتى
سمر / قول الكلام ده للحكومه قوله لشهاده ميلادها اللى اسمك مش فيها
سمر تاخد أية و يدخلوا اوضه أية و يقفلوا الباب
محمود / انا مش هرمى أية انتى ليه مش قادره تفهمى
محمود يحط ايده على قلبه و يروح اوضته بالعافيه و ياخد الدوا و ينام على السرير و هو باين عليه الحزن و التعب
…………………………….
فى البيت عند ندى
باب الاوضه يتفتح و مها تدخل
مها / حسام عاوز يبص عليكى
ندى / مش عاوزه اشوف حد سيبونى فى حالى
مها / انا قولتله انك بتنامى كتير قولتله انك ما بتاكليش قال ان الموضوع كبير و لازم تروحوا لدكتور
ندى / احسن ان شالله اموت و ترتاحوا منى
مها / بعد الشر و اعيش لمين بعدك يا هبله انتى .. بصى حطى الطرحه دى على راسك و انا هناديله
ندى / دلوقت هتحجب مش كدا عشان بابا قصلى شعرى مش كدا
مها / انتى اللى غلطتى يا ندى انتى اللى اجبرتى ابوكى على كدا كان ناقصك ايه يا ندى كان ناقصك ايه
ندى / كان ناقصنى ايه قولى كان عندى ايه
مها / و على ده هو اللى كان هيكمل اللى ناقصك يعنى
ندى / كمله على الوحيد اللى كمله الكلمه الحلوه الاهتمام الضحكه الصدق
مها / و احنا قصرنا معاكى فى ايه
ندى / انا مش عاوزه اتكلم
مها / انتى مش قادره تتكلمى مش مش عاوزه انا و ابوكى ضيعنا عمرنا عشانك عشان نوفرلك احسن عيشه حرمنا نفسنا من كل حاجه عشانك و فى الاخر بتقولى الكلام ده كنت عشت بقى كنت عشت و سبتك تتحرمى بحق و حقيقى كنت عشت
حسام يدخل الاوضه و يمسك مها من ايدها و يطبطب عليها و يخرجها بره الاوضه و يدخل تانى ندى تعيط
حسام / ايه اللى جرالك يا ندى فى واحده تكلم امها بالطريقه دى ندى اللى اعرفها عمرها ما تكلم امها كدا
ندى / انت مش عارف حاجه
حسام / ما كانوش شويه شعر قصتهم بالغلط هى يعنى كانت كوافيره ايه يا ندى بكره يطول و بعدين يا ستى و لا تزعلى نفسك انا هاخدك و نروح للاكبر كوافير فى مصر و هيصلحوهلك
ندى / انت بتقول ايه يا حسام
حسام / انتى داخله فى دور اكتاب الاعراض اللى عمتى قالتها اعراض خطيره جدا بكره الصبح هروح انا و انتى نعمل شويه تحاليل و من هناك هنطلع على الكوافير هو هيعرف يتصرف فى شعرك و مش بس كدا هفسحك و ابسطك اخر انبساط
ندى / يا حسام انت مش فاهم حاجه
حسام / ندى انتى غاليه اوى عندى اغلى من اى حاجه فى دنيتى قوليلى ايه بس اللى تاعبك و اوعدك
ندى / انا عاوزه انام سبنى لوحدى سيبونى فى حالى
حسام / خلاص خلاص ارتاحى و بكره الصبح هعدى عليكى و اوعدك ان كل حاجه هترجع زى الاول و احسن اوعدك تمام
ندى تبص الناحيه التانيه حسام يحط علبه حمره جنبها على الكومدينو و يطلع بره و يقفل الباب
مصطفى / تمام ؟؟؟
حسام يهز راسه بابتسامه مصطفى يطبطب على كتفه
…………………….
فى شقه حسام
الست / اتاخرت كدا ليه يا حسام
حسام / والله يا ماما يومى كان طويل و متعب
بنت / طب وصلنى يلا و احكيلى فى الطريق
حسام / هو جوزك مش هيجى حتى ياخدك و لا ايه
البنت / و النبى يا حسام تسبنى فى حالى عشان انا فيا اللى مكفينى
حسام / ليه فيكى ايه هو زعلك و لا عملك حاجه
الست / قول ما عملش ايه
البنت / خلاص بقى يا ماما الله
حسام / فى ايه يا نور ما تحكى عملك ايه
الست / من يوم ما الدكتور ما قالهم و هو قالب على اختك قلبه سواد
حسام / ايه الحيوان ده و هو بايدها يعنى و هو لو ما كانش بيخلف كانت عملت معاه كدا دا بدل ما يبوس ايده وش وضهر على النعمه اللى فى ايده هو يطول اصلا يتجوز اختى هو بيتامر على ايه
نور / خلاص يا حسام انا متاكده انها فتره و هتعدى انا متاكده انه بس مخنوق شويه و كل حاجه هترجع زى ما كانت ما تضغطش انت بس عليه
حسام / لو مش عارف يحافظ على النعمه اللى فى ايده يسيبها و احنا نحطك جوه عنينا انتى اختى الوحيده يا بت و انا مش هسمح لمخلوق يزعلك دا انا اموت اهون
نور / ربنا يخليك ليا يا حسام بس صدقنى مروان مش وحش هو بس الفتره دى … انت عارف هو بيحب الاطفال قد ايه
حسام / و هى سهله عليكى يعنى دا بدل ما يقف جنبك و يساعدك يكمل عليكى هى دى الرجوله
نور / خلاص يا حسام بقى ما تكملش عليا انت كمان تعال وصلنى و لا اخد تاكس
حسام / لما ابقى اموت ابقى خدى تاكس يلا تعالى اوصلك و اجبلك ايسكريم فى الطريق كمان هو انا عندى اغلى منك يا بت
نور / ربنا يخليك ليا يا احلى حوس فى الدنيا
………………………..
فى المطعم
انور / مفيش اخبار يا عمر
عمر / لا مفيش سالت فى كل المستشفيات فى كل الاقسام ما خلتش ما لوش اثر
احمد / طب و العربيه اللى خطفته ما لقطتش النمر بتاعتها
عمر / لو كان ليها نمر كنت قولتها للظابط بس ما كانلهاش ما كنلهاش ما كنلهاش
احمد / ايه يا عمر ما تجمد امال دانا لو منك اروح اسال فى المستشفيات على العيال اللى خطفوه زمان على نفخهم
عمر يبص لاحمد
احمد / ان شاء الله خير
عمر / هو يوم باين من اوله الله يحرقك يا أية
انور يضحك عمر يبصله
انور / ما قدرش على الحمار بيتشطر على البردعه
عمر يبص فى الارض و يمشى
………………………..
تحت بيت نور
نور / بصراحه ليها حق
حسام / طب اعمل ايه يعنى اروح اجيب سكينه و اغز امها كان لازم يعنى تعمل نفسها كوافيره
نور / انت عارف ندى بتحب شعرها قد ايه و كمان فرحها يوم الخميس
حسام / اسكتى فضلت تعيط النهرده و تقول مش عاوزه فرح مش عاوزه حد يشوفنى لما قطعت قلبى
نور / ايه الهبل ده انا لما هطلع فوق هتصل بيها و اعقلها
حسام / انا قولتلها هاخدها بكره و نروح لاحسن كوافير فى مصر اكيد هيلاقى حل
نور / طبعا هيلاقى يابنى بص هو بس هيساوى شعرها و يركب اكستنشن هيبقى و لا كان حصله حاجه
حسام / طب ما تقوليلى على كوافير كويس
نور / هقولك بس الاول قولى انتوا مستعجلين كدا ليه مش كنت تستنى اما تخلص كليه
حسام / مستعجل ايه يا نور انا بقالى كام سنه صابر دانا خللت زمايلى اللى قدى شايلين عيالهم … انا اقصد يعنى
نور / فاهمه قصدك
حسام / و بعدين شهاده ايه اللى هنستناها طب تعرفى انا مجهزلها حته برنامج هيطير عقلها حجزت ففندق خمس نجوم اقامه كامله و اتصلت بصحابى هناك و قولتلهم يشوفولنا حته كويسه نقعد فيها و يخلوها كامله من مجاميعه هخليها تعيش فى جنه مش هيبقى ناقصها اى حاجه
نور / ربنا يهنيكوا ببعض يارب
حسام / ادعيلى يا نور بالله عليك
نور / دعيالك يلا روح ارتاح بقى عشان بكره قدامك يوم طويل يلا سلام
حسام / سلام يا ست البنات كلهم
………………………..
فى المستشفى تانى يوم الصبح
الدكتور / الاشاعه سليمه الحمد لله كلها شويه ردود و كدمات مفيش كسور
على يبتسم
عمر / شكرا يا دكتور
الدكتور / عن اذنكوا
عمر / قلقتنى عليك الحمد لله على سلامتك
على / الله يسلمك
عمر / حسام صح
على يهز راسه
عمر / كنت عارف والله كنت عارف ان ابن الكلب ده ورا الموضوع
على / مفيش اخبار من ندى
عمر / والله يا صاحبى من اخر مره شوفتها لما روحت من الكليه ما بانلهاش اثر حتى البلكونه مقفوله ما بتتفتحش بقولك ايه يا على انسى البت دى مش هيجى من وراها غير المشاكل و القرف و كفايا اللى حصل لحد كدا
على / انا بس عاوز اطمن عليها
عمر / بمناسبه ايه مش هى اللى اختارت مش هى اللى فضلت التحش ده عليك خليها تشرب اللهى تولع بيه
على / عمر
عمر / ايه
على / انت بتحكم عليها على اساس ايه هو انت سمعتها ما يمكن ابوها طلع عينها لما شاف الصور ما يمكن ضربها لما قتلها اش عرفك انت
عمر / صح صح و النبى انت طيب و على نياتك و بكره تلاقي ضحكتها على وشها قاد كدا اسالنى انا البنات دول احفاد ابليس اهم حاجه عندهم الفلوس و بس لكن احنا نولع بجاز
على / مش ندى يا عمر و على فكره حتى لو حصل انا ما يهمنيش اكتر من انها مبسوطه لو هيسعدها اكتر منى حلال عليه بس الحيوان ده ما يعرفش غير نفسه ما يهمهوش غير نفسه هيتعسها
عمر / احسن عشان يعرفوا قيمتك ولاد المضايقه شوفت عملوا معانا ايه شوفت قالولك ايه شوفت عملوا فيك ايه
على / و ياترى عملوا فيها ايه يا عمر ما يمكن هيجبروها على الجواز
عمر / انت عبيط فى حد بيتجوز غصب عنه فى الزمن ده
على / اش عرفك يا عمر عملوا معاها ايه
عمر / دى بنتهم ما حدش بياذى بنته
على / حد غيرنا يقول الكلام ده
عمر يبص لعلى و يسكت و يبص فى الارض الباب يخبط و ظابط و اتنين عساكر يدخلوا عمر يتعدل فى وقفته
…………………….
فى مستشفى تانى
حسام / بس يا ستى شوفتى ما بتوجعش خالص ازاى
ندى / الممرضات كل شويه يقولولى مبروك هو فى ايه
حسام / ههههههههههههههه يا ستى اى هبل عشان يضربوا فلوس الناس فى البلد دى لو لقوكى ربع جنيه مخروم هيحطوكى فى جيبهم
ندى تبص الناحيه التانيه
ندى / هو انا ممكن اخد موبايلك عاوزه اعمل مكالمه
حسام / طبعا اتفضلى
ندى / شكرا ………. غير متاح اتفضل
حسام / كنتى بتكلمى مين
………………………………
ندى / مفيش
حسام / تمام يلا بقى نروح الكوافير
ندى / ما لوش لزوم
حسام / بقولك ايه انا حجزت خلاص و هتروحى يعنى هتروحى مش فلوس حرام هيا دانا بيطلع عينى على ما بلمها
ندى / و عشان كدا بقولك ملوش لزوم حرام يعنى فلوسك
حسام / و انا و فلوسى و تعبى و عمرى كله فدى ضحكه واحده منك بس انتى فكيها بقى
ندى تهز راسها بحزن تليفون حسام يرن
حسام / عموا اكيد بيطمن عليكى ثوانى …. ايوه يا عمو ازيك … متقلقش كلو تمام … لا معايا و مبسوطه كمان …. ما تشلش هم يا عمو فى ايه هو انا بلعب ….. لا ما تقلقش عليها خالص …. سلام …. عاجبك كدا خليتى ابوكى هيتجنن عليكى اكيد خايف تقعى منى و لا حاجه ما الهانم لو بتاكل كويس ما كانش كل ده حصل اقولك يلا نروح نفطر و ندبها عشان تعرفى تكملى اليوم يلا بقى اتحركى احنا هنبات فى المستشفى
حسام يشد ندى و يمشوا
……………………..
فى المستشفى عند على
عمر / انت ليه قولتلهم ما تعرفش حاجه و ليه قولتلهم انها كانت سرقه
على / خلاص يا عمر
عمر / انا هروح القسم و اقول اللى اعرفه ما تحاولش تمنعنى انت فاهم
على / مش هقدر امنعك اصلا انا مش قادر حتى اقوم من السرير
عمر يروح يقعد جنب على و يمسك ايده
على / الحمد لله انك جنبى يا عمر
عمر / الحمد لله انك انت اللى جنبى يا على انا ما نمتش من امبارح
على / مش انا ضربت الواد حسام امبارح حتى و انا مربوط
عمر / يا جامد يا جامد احكيلى احكى
على / هحكيلك امبارح بقى ……….
…………………………
فى البيت
مها / ايوه كدا والله شكلك فرحنى
ندى / البركه فى حسام
مها / هو فى زى حسام
حسام / ايه يا عمتى انا معملتش حاجه و بعدين هو يعنى عمل ايه المهم بقى يا ست ندى تاكلى كويس و تفكك من الاكتئاب ده
مصطفى يدخل
ندى / عن اذنكوا
ندى تدخل اوضتها و تقفل الباب مصطفى يبصلهم و يدخل وراها
ندى / لو جاى عشان اروح الاوضه التانيه فحاضر هاخد غيار و امشى
مصطفى / مين فى الدنيا يعرف مصلحتك قدى
ندى / خلاص يا بابا مش رفضته و عملت اللى انت عاوزه
مصطفى / رفضته رفضت مين؟؟ على !! هو فين على
ندى تبص لمصطفى
مصطفى / تفتكرى لو كان على جه ما كنتيش هتصحى حتى على صوتنا ما كناش حكينالك كان هيسكت لما يترفض و يمشى فى هدوء يعنى
ندى / ماما قالت
مصطفى / امك قالت اللى انتى عاوزه تسمعيه عشان ما تكملش عليكى عشان ما تفتكريش انك وقفتى لابوكى و ليها عشان واحد ابن كلب بيتسلى
ندى تبص لمصطفى
مصطفى / هو فين على اصلا اتصلى بيه هيرد عليكى؟؟ عمره عشان انكشف عشان عرف انك شوفتيه على حقيقته زمانه دلوقت بيدور على عيله تانيه يتسلى بيها كان يساوى دموعك كان يساوى شعرك كان يساوى احساسى كاب و انا بشوف بنتى بتضيع قدام عنيا عشان واحد ما يسواش
ندى / على بيحبنى
مصطفى / و لسه بتقول بيحبنى لسه بتقاوح اثبتلك ازاى خدى خدى موبايلى كلميه اتصلى بيه شوفيه فين
ندى / اى كان انا متاكده انه بيحبنى قلبى بيقولى انه
مصطفى / قلبك لسه اخضر ما يعرفش حاجه قلبك برئ ما شافش الدنيا عامله ازاى طب خلينى افرض انه كان عاوز يجى و حدد معاد و انا رفضته هتكسرى كلام ابوكى هتكسرى قلبى عشانه
ندى / يعنى جه
مصطفى / صبرنى يارب انا بقول افرضى لو خيرتك بينى و بينه بين ابوكى اللى رباكى طول السنين دى كلها و بين الواد اللى دخل البيت من شباكه زى الحراميه هتختارى مين يا ندى
ندى / متزنقنيش و تقولى اختارى يا بابا
مصطفى / على العموم اعملى اللى يريحك التليفون معاكى اتصلى بيه و ابقى قابلينى لو عبرك و خليكى فاكره انك بعتى ابوكى و حبه عشان عيل بيلعب بيكى
………………………..
فى القسم
حسام / انا قولت لحضرتك انا امبارح كنت عند خطيبتى و نزلت انا و عمى روحنا قعدنا مع والدى شويه على القهوه اللى على ناصيه بيتنا و بعدين روحت للماذون و روحت حجزت قاعه و اتفقت مع طباخ عشان البوفيه و حجزت فندق و بعدين رجعت لعروستى تانى عشان اقولها على الاخبار الجديده و روحت البيت و نزلت وصلت اختى و بعدين روحت و نمت قتيل لحد الصبح روحنا المستشفى عشان تحاليل كتب الكتاب و بعدين روحنا فطرنا و بعدين روحنا الكوافير عشان عروسه و كدا حضرتك فاهم و يادوب دخلت البيت بعتولى جيت
الظابط / عندك دليل على الكلام ده
حسام / طبعا حضرتك ممكن تبعت لعمى تساله انا كنت عنده امتى و تسال الاماكن اللى قولتها لحضرتك كلها و حتى خطيبتى ممكن نجيبها تشهد
الظابط / امال تفسر بايه اتهام على محمود حقى ليك انك خطفته و ضربته و رميته
حسام / ههههههههههههههه انا اسف بس انا اصلا ما اعرفش حد بالاسم ده اصلا و بعدين هخطفه ليه يعنى و بعدين هو انا بتاع مافيا انا حضرتك دكتور صيدلى شغال فى شركه من اكبر شركات الادويه فى العالم مين على ده عشان اضايق منه اصلا و بعدين انا قولت لحضرتك انا كنت فين طول اليوم امبارح
الظابط / وقع على اقوالك
حسام / معلش بس سؤال هو احنا كدا خصلنا اصلى لازم امشى عشان اروح اجيب البدله و الفستان عريس بقى و كدا هههههههههههههههههه
الظابط / اه خلاص تقدر تتفضل
حسام يمضى و يسلم على الظابط و يمشى و بره يقابل عمر عمر يبصله باستغراب
عمر / انت خرجت ازاى
حسام / عادى و انت كنت فاكر ايه
عمر / انت ايه يا اخى ايه
حسام / كان نفسى نكمل كلامنا بس انا فى واحد صاحبى مستنينى نروح نشترى البدله عريس بقى و كدا عقبالك
عمر يحاول يضرب حسام و يمسك نفسه فى اخر لحظه
حسام / شاطر احنا فى القسم ما توديش روحك فى داهيه سلام يا عمووور
عمر / معاك حق خساره اضيع نفسى عشان واحد زيك بس على العموم على باعتلك معايا رساله ايده سليمه المره الجايه لما تحب تكسرهاله ابقى ابعت رجاله مش سليكون
حسام يبتسم و يمشى و عمر واقف بيغلى و بعدين يدخل القسم
…………………………..
فى البيت عند ندى
نور / يعنى ايه نايمه انا هدخل اصحيها امال هننزل نشترى الفستان امتى ايه الهبل ده
مها / خشيلها انا اصلا غلبت معاها
نور تدخل الاوضه تحاول تصحى ندى ما تصحاش
مها / ما تحاوليش غلبت
نور / دى و لا كانها ميته هو فى كدا فى الدنيا
نور تطلع مع مها بره جرس الباب يضرب نور تفتح تلاقى حسام
حسام / جبت بقى حته بدله انما ايه ما حصلتش ها جاهزين تنزلوا تجيبوا الفستان
نور / ندى نايمه مش معقول يكون ده نوم يا حسام
حسام / هو ممكن كبايه ميه يا عمتى هموت من العطش
مها / ثوانى حاضر
مها تدخل حسام يشد نور و يقعدوا
حسام / ندى نفسيتها وحشه اوى امبارح ما بطلتش عياط فى الكوافير خصوصا لما بنت الجزمه الكوافيره قالتلها ايه اللى عمل فى شعرك كدا دا باظ خالص و قعدت تتناور عليها
نور / ايه ده
حسام / والله كنت هقوم اضربها ما يبوظ زي ما يبوظ امال احنا جينلك ليه
نور / انا عارفه ؟؟مهو لو شعرنا جامد و ما فيهوش غلطه هنحتاج للى زيهم ليه يعنى
حسام / سيبك تلاقيها كانت عاوزه تبين انها بتعمل اللى متعملش فنلافيها قرشين
نور / يمكن
حسام / عشان كدا بقولك ما تزعليش من ندى يمكن عملت نفسها نايمه عشان ما تعلقيش على شعرها يعنى
نور / مش ممكن ابدا
حسام / راعى ظروفها انتى عارفه هى كانت بتحب شعرها قد ايه دى حتى ما بتتكلمش مع مامتها خالص
نور / للدرجادى
حسام / و اكتر بقولك ايه انا هاخدك انتى و طنط و ننقى حاجتكوا و خلى ندى هبقى انزل انا و هى لوحدنا بالليل
نور / كان نفسى اشوف الفستان
حسام / على العروسه هيكون احلى طبعا يلا اتحركى الله
نور / تمام تمام يلا
حسام / يلا يا طنط هنتاخر
مها تطلع من جوه و فى ايدها كوبايه ميه حسام ياخد بق و يغمز لمها و ينزلوا
……………………..
فى شقه على
احمد / حمد الله على السلامه يا بطل ايه ياعم قلقتنا عليك ما انت زى البغل اهو
على يضحك
عمر / اعوذ بالله منك بق ده و لا صندوق زباله
احمد / صندوق زباله هههههههههه
على يتسند لحد ما يوصل للبلكونه يبص على بلكونه ندى
احمد / انساها يا شقى البت طلعت واطيه
على يبص لاحمد
احمد / النهرده و انا بفتح الصبح بدرى شوفتها نازله مع ابن الوارمه و لافه راسها بطرحه و بعدين رجعت اخر النهار على سنجه عشره و شعر ايه و مكياج ايه تقولش عروسه
عمر / خلاص خلاص بلا قرف
على لسه بيبص على البلكونه
عمر / صحيح الطيور على اشكالها تقع
احمد / امال لو عرفت ان البيه المحترم جه خد امها وواحده كمان وراحوا اشتروا فستان الفرح و رجعوا
عمر / ما خلاص بقى يا احمد
احمد / انا عامل عليك يا صاحبى انساها
على / لما قلبى يصدق كلامكوا هنساها
عمر / مستنى ايه اكتر من كل ده عشان تنساها يا على الله
على / حتى لو قالتلهالى بنفسها حتى لو سمعتها منها بودانى مش هصدق انتوا ايه ما بتحسوش مش هصدق
عمر / خلاص خلاص اهدى خلاص احنا اسفين احنا بس
على يتسند و يحاول يدخل اوضته عمر يمسك ايده و يدخله
احمد / ما تشلش هم انا هقف مكانك لحد ما تبقى تمام و تقف على رجليك تانى يا صاحبى
عمر يشاورله احمد يفتح الباب و ينزل
…………………………
فى شقه أية يوم الخميس
محمود يدخل أية تستقبله
أية / روحتله
محمود / ما راحش الكليه النهرده
أية / طب ما سالتش على عنوانه
محمود / سالت عمر ما غيرش بطاقته عنوانه فى الورق هو هنا
أية / قولتلك فى واحده اسمها غاده بتشتغل معاه بتوصله
محمود / ما لقتهاش بس سبت رقم تليفونى و قالولى اول ما يوصلوله هيكلمونى
أية تهز راسها و تدخل
…………………………….
فى شقه ندى
ندى / مش هلبس و لا هروح فرح و لا هتجوز حتى لو على ما بيحبنيش انا ما بحبش حسام
مها / بعد كل اللى عمله علشانك ما بتحبيهوش فاضل ايه تانى قوليلى فاضل ايه
ندى / هو انا بقيت تقيله اوى عليكوا كدا
مها / ابوكى حالف عليا يمين طلاق انتى ايه
ندى / مفيش حاجه اسمها يمين طلاق انتوا هتضحكوا عليا دا مجرد حلفان عادى يصوم تلت ايام و خلاص
مها / جبتى القسوه دى منين
ندى / منكوا انتوا ايه مش شايفين نفسكوا
مصطفى يدخل
مصطفى / مها روحى اللبسى و سيبيهالى
ندى تبص لابوها و تبص الناحيه التانيه بغضب مها تخرج
مصطفى / ما تخلينيش اضطر اكسرلك راسك مره تانيه
ندى / حتى لو قتلتنى مش هتجوز حسام ما بحبوش يا ناس ما بحبوش هو الجواز غصب
مصطفى / ان كان عاجبك على العموم بشوقك حتى لو هتحضرى الفرح بالبجامه براحتك وجعتى قلبى
ندى تبص لابوها بحزن يطلع من الاوضه و هى تعيط
……………………..
فى شقه عمر
عمر بيتكلم فى التليفون
عمر / ليه عملتى كدا يا غاده
غاده / انا قولت انه ممكن يعنى
عمر / دا ابويا يا غاده يمكن كان محتاج حاجه حرام عليكى والله
غاده / بعد كل اللى عمله يا عمر
عمر / و لو عمل اكتر يا غاده على العموم شكرا انك بلغتينى انا هتصرف
غاده / انا اسفه بجد انا افتكرت
عمر / خلاص خلاص ما تشغليش بالك سلام
عمر يقفل السكه و ينفخ على يطلع من الاوضه
على / بتتخانق مع مين كدا
عمر / انت ايه اللى قومك من السرير ما تدخل يابنى ترتاح
على / سمعتك بتقول بابا طلعت ماله بابا
عمر / كويس زى الفل راح الكليه سال عليا و غاده قابلته و وزعته بالزوق
على / طب و مستنى ايه ما تروحله يابنى
عمر / هروحله بس بكره النهرده مش هينفع
على / مش هينفع ليه
عمر / انت عارف يا على النهرده فرح ندى دا حتى الماذون عندها دلوقت بيكتبوا الكتاب
على / انا مش هعمل حاجه ما تخافش
عمر / على
على / ما تخافش قولت
عمر / تمام هستنى معاك شويه و بعدين انزل
على يهز راسه و يدخل
……………………….
فى شقه ندى
مصطفى يدخل لندى بدفتر الماذون تحت باطه يحطه على السرير ندى تبص الناحيه التانيه
مصطفى / الرجاله بره انجزى
ندى / ما تحاولش مفيش جواز بالغصب و ان حاولت تجبرنى هطلع للماذون و اقوله انكوا جابرينى
مصطفى / لا و على ايه بناقص
ندى تبص الناحيه التانيه مصطفى يقرب منها و فجاه يطلع شريط لزق من جيبه و يلفه حوالين بقها تحاول تصرخ ما تعرفش و يثبتها و يربط ايديها و هى بتعيط و تبصله بحرقه
مصطفى / ايه فاكره نفسك ايه فاكره انى مش هقدر عليكى
ندى تعيط
مصطفى / انا عارف مصلحتك اكتر منك مش كبرتى و بقيتى عروسه مش بقيتى بتعرفى تكدبى على ابوكى و تقرطسيه يبقى تتجوزى بقى و تشيلى مسؤليتك يبقى تنزلى من على كتافى عشان مش هعيش شايل هم حد جديد يضحك عليكى مش بقيتى بتبجحى فى ابوكى و تقفيله و تكسرى كلامه يبقى ما لكيش عيش معايا
ندى تعيط مصطفى يفتح الدفتر و يمضى مكان ندى و ندى بتعيط و تبص لابوها و تصرخ بس مكتومه مصطفى يطلع ختامه من جيبه التانى و يفتحها و يمسك ايد ندى و يعوصها و يبصم بيها غصب عنها و هى بتحاول تقاومه مش قادره
مصطفى / مبروك يا ندى مبروك يا عروسه
مصطفى ياخد الدفتر و يطلع بره و ندى تعيط و تحاول تفك نفسها مش عارفه و تصرخ صوتها مش طالع شويه و حسام يدخل يلاقيها بالمنظر ده يجرى عليها و يفكها
حسام / ايه اللى عمل فيكى كدا
ندى / اللحقنى يا حسام اللحقنى
حسام / فى ايه ايه اللى حصل مالك انطقى
ندى / انت اخويا يا حسام انا مليش حد غيرك دلوقت ساعدنى ساعدنى ارجوك
حسام / اخوكى يا ندى انا بقيت جوزك دلوقت
ندى / باطل العقد باطل انا ما وافقتش انا ما مضيتش بابا اللى مضى بايده و بصمنى غصب عنى
حسام / انتى بتقولى ايه يا ندى
ندى / بقول الحقيقه
صوت باب الشقه بيتفتح حسام يقوم يجرى يقفل الباب
ندى / اعمل حاجه يا حسام
حسام يقعد و هو محتار و يبص فى الارض
ندى / انت ما يرضيكش تتجوز واحده بتحب واحد تانى
حسام يبصلها
ندى / انا بحب على و هو بيحبنى بس فى حد صورنا و بعت الصور لبابا و من ساعتها و موبايل على مقفول و انا محبوسه هنا
حسام / و ما قولتليش ليه و احنا فى المستشفى
ندى / خفت اقولك الموضوع يكبر ما كنتش عارفه انه هيوصل للدرجادى
حسام / طب انا اعمل ايه دلوقت المعازيم و الناس العيله صحابى زمايل بابا و صحابه دى فضيحه انتى متخيله الموقف
ندى / غصب عنى والله غصب عنى
حسام / هقول ايه لاهلى انتى متخيله لو بابا عرف دا ممكن يقاطع عمى خالص … بلاش ابوكى منظره ايه قدام الناس و قدام زمايله فى الشغل دا كلها كام ساعه و القاعه تبقى امم فوق بعض
ندى تعيط
حسام / بصى انا عندى فكره هتحل الموقف ده
ندى / ايه
حسام / بصى عدى اليوم و انا و انتى هنلم الموضوع بنا و بين بعض
ندى / يعنى ايه
حسام / ايه يعنى اول واحده كتبت كتابها و بعدين اطلقت
ندى / قصدك انى
حسام / نتجوز النهرده و نعمل اننا عرسان حلوين و الكل ينبسط و المعازيم تتعشى و تروح و بعدين شهر التانى ما اتفقناش ما عجبكيش العيشه فى الغربه اى حجه نطلق تنزلى مصر و يا دار ما دخلك شر
ندى تبص لحسام
حسام / لو عندك حل تانى قولى بس دا اللى عندى ما تبصليش كدا انتى عارفه انا صرفت كام لحد دلوقت اصلا ليا كلام تانى مع عمي بس بعدين
ندى تبص فى الارض
حسام / عدى اليوم يا ندى و اللى انتى عوزاه هيتعمل بعد كدا
ندى / وعد
حسام / وعد طبعا انتى هبله
الباب يتفتح و نور تدخل
نور / ايه يا عم هو اكمنكوا كتبتوا الكتاب و لا ايه اطلع بره اما نلبس العروسه
حسام / ايه الرزاله دى الله مراتى ما اقدرش اقعد معاها شويه
نور / مراتك بالليل يا حبيبى تقعد معاها براحتك بس من دلوقت لحد الفرح لوسمحت سبهالى يلا يا بنتى الكوافيره بره قومى يلا على الحمام
حسام يبص لندى و يغمزلها تقوم مع نور رجل ورا ورجل قدام
نور / يلا اطلع انت بقى على الحلاق و ظبط نفسك ما تخافش هتاخدها على سنجه عشره
حسام / زى ما اتفقنا يا ندى هاه يلا يا قلبى اسيبك انا بقى سلام
حسام يمشى
نور / انا مخصماكى جيتلك كتير اوى الفتره اللى فاتت ايه يا بنتى اختى بتتجوز و ما نهيصلهاش
ندى تبص فى الارض نور تحضنها
نور / يلا خشى الحمام كدا و انا هجهز كل حاجه يلا يا قلبى
…………………………
فى الشارع قدام البيت
حسام / مش قولتلك هتوافق اهى وافقت
مصطفى / انا مش عارف انت اقنعتها ازاى
حسام / هى بس كانت بتكابر يعنى بس لما ما لقتش حد واقف فى صفها وافقت انت عارفها عنيده و بتحب كلامها هو اللى يمشى
مصطفى / عدت على خير امها كانت مرعوبه من المنوم اللى بتحطه للبت فى العصير
حسام / خلاص ما عدلوش لزوم اطمن و بعدين هو انا حلاق ما انا صيدلى و عارف ما لوش اى اعراض جانبيه عادى يعنى
مصطفى / الحمد لله
حسام / المهم انا و هى هنخلص الفرح و نطلع على الفندق و حضرتك بكره تطلع على الماذون تاخد القسايم و التوكيل و تروح مصلحه الجوازات و تخلص الباسبورتات
مصطفى / ان شاء الله ما تاخدش وقت
حسام / و لو حصلت اى مشاكل مش مشكله قولى و انا ابقى اخلع منها شويه و نروح نخلصهم
مصطفى / فى عنيك يا حسام
حسام / انت بتوصينى يا عمى على روحى
مصطفى / مش عارف ليه مخنوق ما اللى عملته
حسام / معلش تلاقيك صعبان عليك فراقها بس
مصطفى / يمكن يلا اطلع انت شوف طريقك و اقابلك فى القاعه بالليل
حسام / تمام يلا يا عمى سلام
حسام يركب عربيته و يمشى و عمر واقف فى البلكونه بيبص عليهم عينه تيجى فى عين مصطفى يبص الناحيه التانيه و يمشى
…………………………..
فى شقه أية
أية تحط الاكل لمحمود و تقعد
محمود / امك لسه غضبانه و قافله على نفسها
أية تبصله و تسكت
محمود / قوليلها لو كان امانها فى المحل و الشقه و العربيه مش معايا تاخدهم
أية / ايه اللى بتقوله ده يا بابا
محمود / انا ولادى مش محتاجين منى حاجه الحمد لله واحد معيد و التانى كسيب
أية / الحمد لله
محمود / و هو كدا كدا الحاجه هتروح لمين مهى لبنتى فى الاخر
محمود يمسح بايده على وش أية تمسك ايده و تبوسها
محمود / ابقى بلغيها رسالتى … انا نازل المحل
أية / الاكل يا بابا
محمود / كلى انتى بالهنا و الشفا انا مش جعان
…………………………..
قدام البيت بالليل
حسام واقف جنب العربيه متزوقه على الاخر و لابس بدلته و كميه عرابيات بالهبل واقفه و عيله ندى نازلين عمالين يزرغطوا و ندى نازله فى ايد مامتها بفستان الفرح و الطرحه و اول ما تطلع من بابا البيت حسام يجرى عليها و يبوس ايدها و يديها ورد
حسام / ايه الحلاوه دى
ندى تهز راسها فى حزن حسام يقول بصوت عالى
حسام / ههههههههههههههه انتى مكسوفه و لا ايه يلا يلا لسه هنروح الاستوديو يلا يا جماعه
حسام ياخد ندى و يفتحلها باب العربيه تبص تلاقى على واقف الناحيه التانيه رابط ايده و باصصلها و مبتسم وشها يتسحب و تحاول تروح عليه حسام يمسكها و يوشوشها
حسام / احنا هنخيب و لا ايه اركبى عدى اليوم العيله كلها واقفه
ندى تبص يمين و شمال حسام يقول بصوت عالى
حسام / يلا الكل يركب هنتاخر على الاستوديو
ندى تركب حسام يجرى يروح الناحيه التانيه و يركب و هو بيشاور لعلى باى باى و يقفل الباب ندى توشوشه
ندى / شوفت كان بيبصلى ازاى زمانه فاكرنى خنته لو بس اكلمه اشرحله
حسام / انتى بتقولى ايه و بعدين لو بيحبك بجد هيفهم ايه يعنى مش هيتجوز فى شهرين
ندى / على الاقل ما يتجرحش
حسام / احنا فيها يا ندى العربيه ما طلعتش ننزل و نفضها سيره و استحملى بقى انتى و ابوكى البلاوى اللى هتحصل انا اصلا مليش دعوه بكل ده
نور تركب قدام و حد كمان مكان السواق
نور / انتوا بتتوشوشوا بتقولوا ايه هاه
حسام / ههههههههههههه ما تخليكى فى حالك يا براشوت
حسام يبص لندى يلاقيها باصه فى الارض
حسام / ما تطلع ياعم مروان خلينا ننجز
مروان / مستعجل اوى
حسام / الله يرحم كنت عاوز تكتب الكتاب يوم قرايه الفاتحه و لا نسيت
نور / هو انت حد يعرف يغلبك يلا يا مروان خلينا نجوزه و نخلص منه هههههههههههههههههه
العربيه تتحرك و على بيبص عليها عمر يحط ايده على كتفه
على / ايه رايح فين
عمر / نزلت اطمن عليك
على / لا انا تمام تمام
عمر / شكلها هتشتى
على / كويس
عمر / يلا نطلع
على / هتمشى شويه و ارجع و لو حاولت تمنعنى هنخسر بعض ماشى عشان مخنوق و …
عمر / خلاص خلاص بس ما تبعدش
على يطبطب على كتف عمر و يمشى
…………………………
فى القاعه
حسام و ندى بيرقصوا سلو و ندى مش مبسوطه
حسام / الحمد لله انك ما بتحاوليش تبقى ممثله لانك ضايعه
ندى تبصله
حسام / على الاقل اضحكى
ندى / انا مخنوقه اوى يا حسام
حسام / حقك عليا انتى عارفه انه مش بايدى فى ايدى ايه اعمله اكتر من كدا بصى حواليكى
ندى تبص حواليها تلاقى عيلتها كلها بتبص عليهم
حسام / كل الناس دى هتقول ايه لما تعرف الحقيقه تفتكرى ما كانش نفسى تبقى بجد مش تمثيل كان نفسى بس كل شئ نصيب و سعادتك عندى اهم
ندى تبصله
حسام / تخيلى بقى لما ما تبقاش حقيقه و كمان ما تبقيش نصيبى
ندى تبص فى الارض
حسام / انهى بلاء ده ياربى
حسام يرفع عنيها لعنيه
حسام / انا بحبك حتى لو انتى ما بتحبنيش يكفينى تكونى سعيده فتره و هتعدى بس عدى اليوم ابتسمى وريهم الضحكه الحلوه
ندى تبتسم
حسام / ايوووووووه هو ده
…………………………
فى محل الموبيلات بتاع محمود
على يدخل غرقان ميه من المطر و بيعيط محمود يشوفه يجرى عليه
على / لو ناوى تطردنى تانى فما تتعبش نفسك انا كدا كدا ماشى
محمود/ انت غرقان كدا ليه هتعييى
على / فارق معاك اوى ما يمكن اموت و ترتاح منى اتناشر سنه بسال نفسى انا عملتلك ايه عشان تكرهنى كدا
محمود / حقك عليا يابنى انا ما بكرهكش
على / كنت عاوز منى ايه كنت عاوزنى استنى اما اشوف اخواتى بيتحرقوا قدامى
على يشد هدومه يقلعها و يورى ابوه جسمه و اماكن الحروق و محمود يحاول يلبسه تانى عشان ما يعياش و على بيعيط
محمود / حقك عليا يابنى حقك عليا بس اللبس لتعيا الدنيا برد و مطر
على / انا ما قتلتش عبير انا عملت كل اللى اقدر عليه عشان احميها اشتغلت ليل نهار عشان ما يبقاش ناقصها حاجه حرمت نفسى من كل حاجه عشانها بس ما قدرتش ما قدرتش اعمل ايه ما قدرتش ما قدرتش
محمود ياخد على فى حضنه
محمود / خلاص يا على خلاص و لو على حبيبتك انا هاجى معاك نكلم اهلها
على يبعد ابوه عنه و على وشه ابتسامه مكسوره
على / ما تتعبش نفسك اتجوزت فرحها النهرده
محمود يبص لعلى بحزن
على / ما تزعلش حتى لو كنت جيت معايا كانوا هيطردونا برده اشمعن هى اللى هتوافق عليا يعنى اذا كانت الدنيا كلها رفضانى
محمود يمسك ايد على على يشدها
على / انا مش جايلك عشان تطبطب عليا انا مش محتاج انك تطبطب عليا انا جاى عشان … مش عارف انا جاى ليه يمكن عشان … انا اسف انا بس……… لعله خير يمكن ربنا بيحبها كدا احسن
محمود / اهدى يابنى ما تعملش فى نفسك كدا
على / كل ما احب حد يضيع منى كل ما اتعلق بحد يروح انا مش زعلان انها اتجوزت غيرى لو هيسعدها ربنا يوفقهم انا بس زعلان على نفسى
محمود / قوم يابنى اطلع معايا فوق نشف هدومك و ارتاح
على / لا انا لازم امشى .. لازم اروح عشان عمر لوحده زمانه قلقان عليا
محمود / اتصل بيه اتصل بيه خليه يجى
على / عمر ما عملش حاجه عمر ما قربش من بنت الجزمه اللى فوق دى انت سامعنى عمر ما عاكسهاش
محمود / عارف عارف أية قالتلى على كل حاجه انا اصلا ما كنتش مصدق انه يعمل كدا انا كنت مستنيه يجى يعتزر و لما عرفت انه جالك
على / رميته لمجرد انه جالى … لمجرد انه راح لاخوه اللى انت مانعه عنه كنت مستنى منه ايه كنت عاوزه ينام على السلم و لا يشحت كنت عاوز من ابنك ايه
محمود / على
على يصرخ
على / بلا على بلا زفت اسهل حاجه انك تلوم الضعيف اسهل حاجه انك تلاقى شماعه تعلق عليها بلاويك و انا كنت الشماعه دى انت اللى قتلت عبير انت اللى قتلت اختك انت اللى رميت اختك للحيوان ده لا مش انا مش انا
على بصوت مكسور
على / انت اللى قتلتها انت اللى قتلتنا كلنا انت مش انا
محمود يعيط
على / ربنا يسامحك ربنا عارف انى ما قصرتش انى حاولت ربنا وحده اللى عارف
على يمشى و محمود يحاول يحصله و هو بيتكلم
محمود / انا هعوضكوا عن كل حاجه انا هصلح كل حاجه اوعدك هات عمر و تعال هات اخوك و تعال صدقنى انا
على يركب تاكس و يمشى من غير ما يسمع لابوه
محمود / استنى استنى يابنى استنى
محمود يبص على التاكس لحد ما يختفى و يرجع المحل رجل ورا ورجل قدام و يقعد يعيط فى جنب
………………………
فى الفندق
جناح فخم جدا حسام و ندى يدخلوا
ندى / واااو دا احلى من بيتنا
حسام / ههههههههههههههه الحمد لله كنت خايف ما يعجبكيش
ندى / ما يعجبنيش ؟؟؟ بتهزر تلاقيه غالى اوى كل حاجه النهرده كانت غاليه اوى اكيد
حسام / ما تفكريش فى الفلوس و انتى معايا ماشى اهم حاجه عندى انك تنبسطى و بس
ندى / بس حرام يعنى اكيد صرفت تحويشه العمر يعنى تتغرب كل ده و تبعزق كل ده على الفاضى
حسام يقعد على ايد كنبه
حسام / لا طبعا مش على الفاضى اولا للمره المليون اهم حاجه عندى انك تكونى مبسوطه ثانيا انتى مستقليه بجوزك اوى
ندى / جوزى!!!
حسام يقوم من مكانه و يمسك ايدها
حسام / احم تعالى اما افرجك باقى السويت …. هنا الحمام و هنا اوضه النوم ايه رايك بقى
ندى / هو احنا هنام فى اوضه واحده
حسام / المفروض انى انزل الريسبشن و اقولهم انى عاوز اوضه تانيه انام فيها فى شهر عسلى
ندى تقعد على السرير و تتنهد حسام يقعد جنبها و يمسك ايدها
حسام / يا ستى انتى شايله الهم ليه انتى نامى هنا و انا هنام بره
ندى تبصله
حسام / دلوقت غيرى هدومك و خدى راحتك و انا هطلب عشا لانى واقع من الجوع تمام
ندى تهز راسها
…………………..
فى شقه عمر
على نايم و عمر قاعد جنبه يعمله كمادات
عمر / انت اختفى و امشى فى المطر و تعال اعيا و انا اسهر جنبك
عمر ينفخ
عمر / انت بتعمل فى نفسك كدا ليه يعنى هى تستاهل يعنى … ما كلهم زى بعض من ندى ل أية يا قلبى لا تحزن … حد قالك قبل كدا اننا منحوسين حاجه نكد يا اخى …… بس مش فاهم انا ست غاده دى كمان ابويا يسال عنى و هى تحلقله و توزعه دى هبله و لا ايه … تفتكر يكون جاى يتخانق معايا عشان أية … ما داهيه ليكون كدا فعلا …. انا مالى انا مهى اللى كل يوم تنطلى المفروض اعملها ايه .. يعملوا البلوه و التانيه و احنا اللى نشيل القرف ………. يووووه انا بكلم نفسى
عمر يشيل الكمادات و يبلها و يحطها على دماغ على
……………………
فى الفندق
حسام يفتح باب الاوضه فجاه ندى تتخض
حسام / اسف ههههههههههه جيت اخد بجامه مش هنام كدا يعنى ههههههههههههههه
ندى / اتفضل
حسام / محتاجه مساعده فى الفستان
ندى / لا انا ……….
حسام يروح يقف وراها و يفتحلها السوسته و اول ما يخلص تبعد من قدامه
ندى / شكرا
حسام / اممم تمام غيرى بسرعه قبل ما العشا يجى
ندى تهز راسها حسام يطلع بره و يقفل الباب يسمع صوت خبط على الباب اللى بره يروح يفتح يلاقى الروم سيرفيس جايب عشا و اتنين عصير يديله تيبس و يقفل الباب
حسام / قولتش حاجه انا العشا وصل
حسام يطلع من جيبه حبايبه و يحطها فى كاسه عصير و يشرب حبه كتير من التانيه ندى تفتح الباب يحط الكاسه
حسام / وااااو العصير ده جامد لازم تجربيه
ندى / شكرا
حسام / حلوه اوى البجامه دى عليكى طبعا ما كنتش متوقع ان عروستى هتبقى لابسه كدا ليله دخلتنا بس عادى يعنى هههههههههههههههه
ندى تبص لنفسها و تضحك
حسام / هتقفى عندك كتير انا جعان
ندى تروح تقعد هى و حسام و ياكلو و هو بيبص عليها و هى بتشرب العصير
حسام / ما شوفتيش انتى بقى الفيلا اللى هنقعد فيها انا و انتى هناك
ندى / فيلا
حسام / يعنى مش فيلا فيلا يعنى بس انا بشتغل فى شركه ادويه و المدينه اللى انا قاعد فيها بعيد شويتين عن المدينه و طبعا ما ينفعش تقعدى فى سكن الشركه فاجرت فيلا صغيره هتعجبك اوى
ندى/ ما كانت اى شقه تفى بالغرض و لا هى مصاريف و خلاص
حسام / انا وعدت عمى انى هعيشك فى الجنه و انا راجل بيوفى بوعده اشربى اشربى
ندى تشرب و تتاوب
ندى / شكله كان يوم طويل
حسام / على الاقل كملى عشاكى و بعدين نامى
ندى / لا مش قادره تصبح على خير
ندى تقوم عشان تدخل الاوضه تمشى خطوتين و بعدين تدوخ حسام يقوم جرى يسندها لحد السرير و ينيمها و يقعد جنبها ثوانى
حسام / كان ممكن نبدا حياتنا بشكل مختلف شكل احسن بس انتى اللى اخترتى الطريق ده انتى اللى اجبرتينى على كدا يعنى بصى حواليكى حبيب القلب سى على كان هيقدر يعملك نص لا ربع اللى عملتهولك
حسام يطرقع صوابعه جنب ودان ندى الاتنين مفيش اى استجابه يقوم و يبدا يقلع هدومه
……………………….
تانى يوم عند أية
سمر / خشى يا أية صحى ابوكى عشان يفطر
أية / ثوانى
أية تدخل لمحمود و تهز ايده بالراحه
أية / بابا …بابا … بابا اصحى الفطار جاهز
سمر تدخل
سمر / هو لسه ما صحيش
سمر تزقه جامد شويه ما بيتحركش سمر تبص ل أية و تبدا تزقه جامد
سمر / محمود محمود اصحى
أية تحط ايدها على بقها و تبدا تعيط سمر تحط راسها فى حضنه و تعيط
………………………
فى الفندق
ندى تصحى تلاقى نفسها نايمه فى السرير بالبجامه تصحى تيجى تقف تقع تقعد شويه و تمسك راسها و بعدين تقوم تطلع بره تلاقى حسام نايم على الكنبه تروح الاوضه تانى تجيب غطا من على السرير و تغطيه بيه يصحى
ندى / انت نمت من غير غطا امبارح كان برد جدا
حسام / ما حستش اصل الجناح مكيف
ندى / حصل خير نبقى نطلب منهم بطانيه زياده مش دا ممكن
حسام / كل حاجه ممكن المهم انتى تعوزى
ندى / شكرا
حسام / حاسه بايه
ندى / بحاول افكر مش عارفه
حسام / يبقى ما تفكريش انتى عندك مشكله على فكره ما بتعرفيش تستمتعى يا بنتى اللحظه اللى انتى فيها مش هتتكرر تانى عيشيها
ندى / انت ازاى واخد الامور ببساطه يا حسام انا و انت نمنا فى اوضه واحده
حسام / انتى مراتى
ندى / على الورق
حسام ينفخ
ندى / و لسه لما هنسافر انا مش قادره اصدق ان بابا عمل فيا كدا اصلا
حسام يمسك ايد ندى و يقعدها جنبه
حسام / باباكى كان عاوز مصلحتك
ندى باستهظاء
ندى / صح
حسام / بقولك ايه احنا لسه فيها لما يجوا النهرده ابقى قولي كل حاجه و اطلقى يوم صبحيتك و شوفى بقى الناس هتقول عنك ايه
ندى / ما يولعوا
حسام / تفتكرى سى على هيقول كدا برضه على واحده اطلقت يوم دخلتها و لا هيعمل زى الناس
ندى / على مختلف
حسام / على على على
ندى / انت اللى جبت سيرته على فكره مش انا
حسام / خلاص خلاص نغير السيره
ندى / هو انت قولت ان بابا جاى
حسام / اكيد طبعا هيجى على الاقل عشان يطمنوا عليكى
ندى / يا سلام
حسام / صحيح لما يبقوا يسالوكى عن امبارح ابقى اعملى نفسك مكسوفه و سيبى المكان و امشى
ندى تبصله
حسام / و لو رخموا فى الاسئله ابقى قولى كلموا حسام و انا هتصرف
ندى / انا ما بعرفش اكدب
حسام / و دا احلى ما فيكى
ندى / يا ترى على عامل ايه دلوقت
حسام/ انا هقوم استحمى عن اذنك لو عاوزه ابقى اطلبى فطار من الريسبشن
ندى تهز راسها
………………………..
فى شارع محمود
عمر يدخل يلاقى فى فراشه بتتنصب تحت البيت و المحل مقفول يطلع الشقه يلاقى الباب مفتوح و فى قران شغال يدخل يلاقى ناس بترص كراسى و أية و سمر قاعدين يعيطوا أية تشوفه تجرى عليه
عمر / بابا فين
أية تعيط اكتر
عمر / ابويا فين
سمر / الله يرحمه جينا نصحيه لقينا السر الالهى طلع
عمر يتصدم
أية / البقاء لله كان بيحاول يوصلك عشان يعتزرلك و تسامحه شكله كان حاسس ان اخرته قربت
عمر مش قادر يتنفس و يقعد على اقرب كرسى
سمر / الحمد لله انك هنا على الاقل تقف مع الرجاله تحت تاخد العزا
عمر يهز راسه و هو ساكت و بيحاول يدارى دموعه
أية / هو على فين
عمر / على عيان
أية / من حقه يعرف
عمر / هكلمه هكلمه
………………………….
فى الفندق بالليل
مصطفى / الحمد لله
حسام / انا قولتلك انها اول ما هتشوف المكان هنا و تعرف الفرق و تلاقى اللى قدامها امر واقع هترضى
مصطفى / بس هى زعلانه منى
حسام / فتره و هتعدى انت عارفها قد ايه هى عنيده
مصطفى / فهمها يا حسام قولها انى عملت كدا عشان مصلحتها
حسام / والله بكلمها يا عمى على العموم طمنى عملت ايه فى الجوازات
مصطفى / ما تشيلش هم كل حاجه هتبقى خلصانه قبل معاد السفر
حسام / تمام
امانى و مها يطلعوا من الاوضه و هما بيضحكوا
مها / يلا بينا و لا ايه
حسام / كان بودى اقولكوا خليكوا قاعدين بس انتوا عارفين يا بخت من زار و خفف ههههههههههههه
امانى / شوفوا الواد ماشى يا سيدى هنتطرق خد بالك من عروستك هنيجى اخر الاسبوع نبص عليكوا
حسام / تنوروا يا امى امال بابا ما جاش معاكوا ليه
امانى تبص الناحيه التانيه
امانى / ما تاخدش فى بالك خليك انت فى عروستك
حسام / لا بجد فى ايه
امانى / جوز اختك اتخانق معاها جامد اوى امبارح اكيد اتحسدوا فى الفرح
حسام / اروقله بس و انا والله
امانى / ما تعكرش دمك و ركز فى عروستك قدامك تسع تشهر و تحط حفيدى فى حجرى انت فاهم
حسام / ههههههههههههه
……………………………
مصطفى / يلا يام حسام
امانى / يلا يا جماعه سلام يا مصطفى
مها / مش هوصيك على ندى
حسام / توصينيى على روحى يا ماما
مها / عشت و عاشت روحك يابنى سلام سلام يا ندى
مها تشاور لندى على باب الاوضه و يمشوا
حسام / اخيرا انا كنت فاكرهم هيباتوا
حسام يبص لندى يلاقيها بتعيط
حسام / لا لا لا لا ما اقدرش على كدا بقولك ايه
ندى / انا اسفه بس غصب عنى صعبان علي نفسى من اللى عملوه فيا و لما شوفت ماما قد ايه فرحانه بالكدبه دى خفت
حسام / طبعا لازم تخافى يعنى تخيلى هتزعل قد ايه لما تعرف الحقيقه والله ما عارف هتقدر تبص فى وش عمى ازاى بعدها دى ممكن تتقهر و تموت بعد الشر
ندى / تف من بقك يا حسام بعد الشر
حسام / بقولك ايه ما تيجى نخرج
ندى / نخرج ايه بس يا حسام
حسام / ما انا زهقان و بعدين دى اجازتى مش هقضيها بين اربع حيطان يعنى هو كان ممكن اقضيها بين اربع حيطان عادى لو يعنى
ندى / لو ايه
حسام / ههههههههههههههههههه لو يعنى كنا عريس و عروسه و كدا
ندى تبص الناحيه التانيه
-حسام / انتى زعلانه و لا مكسوفه
ندى تبصله
حسام / طب بما اننا هنقعد هنا نشوف بقى حاجه عدله فى التليفزيون نتفرج عليها
ندى / انا جعانه
حسام / بس كدا ثوانى هطلب حاجه ناكلها تشربى عصير ايه مع الاكل
ندى / اى حاجه
حسام / تمام تمام شوفيلنا انتى حاجه نتفرج عليها فى التليفزيون على ما اطلب الاكل
………………………….
فى العزا بالليل
الشيخ بيختم و عمر و على واقفين بياخدوا العزا من الناس و بعدين عمر يقعد على يقعد جنبه و يطبطب عليه
عمر / مات و هو زعلان منى مات و هو غضبان عليا
على / ما تحملش نفسك فوق طاقتها
عمر / اكتر حاجه حازه جوايا انه كان بيحاول يوصلى يمكن كان عاوز يقولى حاجه يمكن كان حاسس انه هيموت و نفسه يقولى حاجه
على / اكيد كان عاوزك تسامحه
عمر / تفتكر
على/ انا متاكد
واحد من بتوع الفراشه يقف فى جنب
على / انا هروحله خليك انت
على يروح يقف مع بتاع الفراشه و عيل صغير يقف جنب عمر
العيل / طنط سمر عاوزاك فوق
عمر يهز راسه و يقوم وراه
……………………………..
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية سلف ودين)
