رواية سلف ودين الفصل الحادي والسبعون 71 بقلم لولو محمد
رواية سلف ودين الجزء الحادي والسبعون
رواية سلف ودين البارت الحادي والسبعون
رواية سلف ودين الحلقة الحادية والسبعون
الحلقه الثالثه و ثلاثون
ندى / وحشانى
حسام / و ابوكى مش واحشك ما تقومى تطمنى عليه
جرس الباب يضرب
حسام / دا اكيد المحامى بعت الورق اللى قولتله عليه انتى هترجعيلى الشقه و هتمضى على تنازل عن حضانه حبيبه ما انا لازم ائمن نفسي من ناحيتك
ندى / انا عمرى ما هائذيك
حسام / اكيد عشان ساعتها هتدخلى السجن و مش هتشمى ريحه حبيبه حتى
حسام يسيب ندى و يطلع بره ندى تحضن حبيبه اوى و تفضل تعيط حبيبه تبصلها بحزن و تحضنها اوى
ندى / انا مش هسيبك ليه ما تخافيش مش هيحرمنا من بعض لو ما كنتيش اتولدتى ما كانش قدر يعمل كل ده ما كانش قدر ياذيني و يعذبنى كدا كانت تيته بقت عايشه و جدو كويس كنت هبقي فى الكليه زى كل البنات فى سنى
ندى تحضن حبيبه اوى و مش واخده بالها ان نفسها بيتكتم
ندى / بس انتى جيتي و نورتى حياتى مش هيقدر يحرمنى منك مش هياخدك منى هعيش و اربيكي و اجوزك اللى تحبيه بس هعيش عشانك انتى لو روحتى منى اموت اموت و ارتاح ارتاح من كل العذاب ده
حسام يدخل الاوضه يشوف المنظر يرمى الورق و يجرى يفك حبيبه من ندى ندى تصرخ
ندى / سبها ما تاخدهاش سبها حرام عليك انا ما عملتش حاجه ما عملتش حاجه
حسام / سبيها هتموت فى ايدك سبيها
حسام يشد حبيبه و هى بتصرخ على اخرها ندى تسمع صريخ حبيبه عنيها توسع
حسام / كنتى هتموتيها انتى مجنونه هتكتمى نفسها
ندى تمد ايدها تلمس حبيبه حسام يبعدها
ندى / انا عمرى ما هاذيها … انا ما اقدرش اعيش من غيرها
حسام / كان ممكن تموت دلوقت
ندى تعيط جامد و تفضل تخبط راسها فى الحيط حسام يسيب حبيبه و يمسك ندى و يحضنها و هى بتتلوى و تعيط
حسام / اهدى اهدى ما كانش قصدك اهدى اهدى يا حبيبتى اهدى
ندى تعمل على نفسها و تنام فى حضنه من غير حركه حسام يبص يلاقي حبيبه بتلعب فى الورق يتنهد و يفضل حاضن ندى اللى نامت بين ايديه حسام يبص عليها نايمه يفضل قاعد مكانه و واخدها فى حضنه
حسام / انا اسف مرحله و هتخلص هنعديها سوا هجبلك مهدئ كويس من الصيدليه تحت تاخديه و هترتاحى عليه ما تقلقيش و اللى حصل ده عمره ما هيتكرر تانى هتبقي كويسه هترجعى احسن من الاول كمان
حبيبه تروح ناحيه حسام ياخدها فى حضنه
حسام / حقكوا عليا حقكوا عليا
حسام يبص على الباب يلاقي مصطفى بالكرسي المتحرك عند الباب بيبص عليهم
حسام/ ازيك يا عمى عامل ايه
مصطفى بيبص على ندى نايمه فى الارض
حسام / تعبانه من السفر هتريح شويه على ما اعملها لقمه و لا اى حاجه و هتبقي كويسه ما تقلقش عليها
مصطفى يحاول يدخل الاوضه حسام يقوم و يزقه ناحيه اوضته مصطفى يمسك فيه بايديه حسام يفك نفسه و مصطفى ما يقدرش عليه
حسام / انا صبرت عليك كتير بس مش لدرجه انك تحاول تمد ايدك عليا خليك فى اوضتك دى انا مش فايقلك انتوا ايه ما فيش دم خالص
حسام يقلب مصطفى على الارض و يرمى كرسيه جنبه و يقفل باب الاوضه بالمفتاح مصطفى يزحف للباب و يفضل يخبط و يرزع حسام ياخد نفس و يروح المطبخ يجيب كبايه مايه و يروح يحاول يصحى ندى و يسقيها و يفوقها تفتح بصعوبه
حسام / شوفتى قله الاكل ينفع كدا
ندى تبصله بتعب
حسام / قومى غيرى هدومك و خشي استحمى على ما اشوف عندنا ايه يتاكل ابوكى قلقان عليكي
ندى / بابا
حسام / ما تقومى يا ندى الله هو فى ايه
ندى / حاضر حاضر هقوم
ندى تحاول تقوم رجليها ما تساعدهاش تقع على ركبها و ايديها حسام يتنهد
حسام / دا ايه اليوم ده بس يا ربي
حسام يسند ندى و يروح يفتح الدوش
حسام / اقلعى و استحمى انا قافل على ابوكى فخدى راحتك ثوانى هجبلك غيار و جاى
حسام يطلع بره و ندى قاعده فى البانيو تحت المايه بهدومها
…………………….
فى شقه أية
منال / يا بنتى امانى ماكدالى انهم وصلوا
أية / طب قافله تليفونها ليه
منال / تعبانين من السفر مثلا
أية / هما جايين من الكويت دى اسكندريه
منال / مش حاسه كدا انك حشريه حبتين مش حاسه يعني
أية تبص لمنال تلاقيها بتضحك
منال / انا والله لو افهم سبب توترك المستمر ده اعزرك انما انا مش فهماكى
أية / من ساعه ما كانت هنا ما كلمتنيش ثانيه و بكلمها مش بترد او غير متاح عادى يعني
منال / هى بقالها سنه دول حيالله يومين و اكيد ليها عذرها يمكن بتتصلى فى وقت مش مناسب يمكن الشبكه وحشه
أية / طب الوقت مش بيبقي مناسب خالص يعني
منال / لا اله الا الله
أية / بصي انا تعبت اسماء تبقي زى اختى و فجاه تقطع معايا و ندى تكلمنى كل يوم و فجاه تقطع معايا
منال / ندى غير اسماء و بعدين ندى انشغلت شويه قدرى يا أية ما انتى كمان البت لبختك يمكن على ما بتفوق و تفضي بيبقي الوقت اتاخر و الوقت بيجرى يا بنتى و الدنيا تلاهى هتلاقيها لما ترتاح بتكلمك تعتزرلك ابقي عاتبيها بادب ندى بتحبك و اكيد مش هيحوشها عنك غير الشديد القوى
أية / اهة شوفتى اهو ده اللى بتكلم فيه ان اكيد فيها حاجه
منال / طب بصي احنا ناس زوق و بنفهم فى الاصول خلينا نعدى النهرده على خير و بكره باذن الله اخدك و نروح نزورها قال يعني بنجيب حاجات للعيال من شقه نور و عدينا
أية / ماشي
منال / اهدى بقي مش كل يوم هترضعى البت غلت
أية / حاضر هقوم ابص على العيال
منال / قومى و اعمليلنا حاجه مسكره زيك نشربها
أية / عنيا حاضر
منال / تسلم عنيكي ربنا يهديكوا يا ولاد و يبعد عنكوا ولاد الحرام
أية تدخل المطبخ و منال تقعد تسبح
………………………..
فى شقه حسام
ندى قاعده فى وضع الجنين على السرير حسام يدخل شايل صينيه عليها اكل
حسام / انا جبتلك مهدئ حلو اوى من الصيدليه بس ما ينفعش من غير اكل يتعب معدتك فعملتلك شوربه و سلقتلك نص فرخه
ندى / هو انا كنت هموت حبيبه بجد
حسام يحط الصينيه على الكومدينو جنب ندى و يقعد جنبها و يمسك ايدها تعيط
ندى / انا عمرى ما هسامح نفسي
حسام / ما كنتيش تقصدى و ان شاء الله مش هتتكرر تانى
ندى / انهى ام انا انهى ام اللى
حسام / لما هتاخدى العلاج اللى جبتهولك
ندى / ودينى لدكتور قوله اى حاجه اكدب عليه اى كدبه بس انا لازم اخف انا
حسام / لو روحتى لدكتور هيحجزك فى المصحه يعني هتقعدى فتره بعيد عن حبيبه و مش بس كدا كل الناس هتعرف هيعايروها يا بنت المجنونه هتفضل طول عمرها يتقالها يا بنت المجنونه يا ندى
ندى تبص فى الارض و تعيط
حسام / صدقيني انا مش بتاع كفته انا قريت نشره الدوا و قريت عنه على النت و فى اطلس و عارف انا بديكي ايه و هديكي كمان منوم فى الوقت اللى هكون فيه بره البيت عشان اضمن انك طول ما انتى مش تحت عيني فى امان
ندى / هاخد بالى من حبيبه ازاى و انا نايمه
حسام / هبقي اخدها معايا
ندى / يعني ممكن اصحى ما الاقيهاش
حسام / مش هاخدها و اهرب ما تخافيش
ندى / انت بتعمل فيا كدا ليه انا ما عملتش حاجه لكل ده ما تروحله هو تعمل فيه كدا روحله هو
حسام / هو ما يخصنيش يخص نور لو عاوزه تقوليلها انتى اتفضلى
ندى / عاوزنى اقولها ايه انت بتعمل فيا كدا ليه انا بنت عمك على فكره احنا متربيين سوا انا عمرى ما اذيتك ليه بتعمل فيا كدا
حسام / عاوزه تعرفى بجد عاوزانا نقعد و نتحاسب اقولك عملتلك ايه و قدمتلك ايه و رديتهولى ايه اقولك كام مره وجعتيني اقولك اتحملت ايه عشانك و بسببك اقولك لسه بتحمل ايه و مستعد اتحمل ايه
ندى / انا كل اللى عوزاه انى ابقي كويسه انى اعرف اربى بنتى هربيها ازاى و انا كدا
حسام / دى خطوه كويسه انك عاوزه تخفى و انا هساعدك دا مجرد اللتهاب فى الاعصاب من الخضه مش اكتر و هيروح هديكي فيتامينات و مهدئ بسيط خالص و منوم ضعيف و كلها حاجات امنه و ما لهاش اى اعراض جانبيه انا اكيد مش هضرك بس برده لو عاوزه تروحى المصحه هوديكى انا تهمنى مصلحتك
ندى / شكرا
حسام / دلوقت كلى
ندى تبصله
حسام / انا مش هتحايل عليكي انا المفروض انزل اشوف اللى ورايا و سايب كل حاجه تضرب تقلب و قاعد جنبك مش هينفع كدا كلى و خدى الدوا عشان اقدر امشي من فضلك
ندى تهز راسها و تجيب الصينيه و تبدا تاكل و حسام متابعها
حسام / هروح اكل ابوكى ارجع الاقيكي مخلصه
ندى تهز راسها
حسام يطلع بره و يقفل الباب عليها يتنهد و يروح يفتح على مصطفى قاعد فى الارض ورا الباب يزق الباب و مصطفى و يدخل
حسام / دا ايه عمايلك دى مش كفايا عليا بنتك انتوا متفقين عليا تكرهونى فى عيشتى اقسم بالله ارميك فى اعفن دار مسنين و لا اسال فيك اصلا فركز معايا كدا و اهدى
حسام يعدل الكرسي و يشد مصطفى يقعده
حسام / تحب تروح الحمام
مصطفى يهز راسه اه حسام يزق الكرسي للحمام
حسام / خمس دقايق و هرجعلك
حسام يقفل باب الحمام على مصطفى و يروح يجيب صينيه الاكل و يدخلها اوضه مصطفى و يرتب الاوضه
حسام / انا لو الفلبينيه مش هتعملوا فيا كدا و ياريته عاجب
حبيبه تدخل الاوضه حسام يشيلها يلاعبها تضحك
حسام / عاجبك اللى بيحصل فى بابا ده يا بيبو انتى عاجبك انتى عاجبك انتى تعجبى الباشا انتى قلب بابا يا قلبي على احلى ضحكه فى الدنيا تاكلى ممم انتى جعانه تاكلى ممم
حسام يروح يقعد حبيبه فى كرسي بيبي فى المطبخ و يحطلها طبق فيه اكل و ياكلها معلقتين
حسام / هشوف جدوا و ارجعلك
حسام يروح يفتح الحمام فتحه صغيره
حسام / خلصت يا عمى
حسام يفتح الباب اوسع و يساعد مصطفى يرجع اوضته و يقربله الاكل مصطفى يطلع موس حلاقه من هدومه و يحاول يعور حسام فى رقبته بس سطحيه حسام يصرخ فيه
حسام / انت اتجننت
حسام يشوط الاكل يوقعه فى الارض
حسام / انا هدفعك تمن اللى عملته ده كويس خليك هنا بقي لحد ما يبانلك صاحب لا اكل و لا شرب و لا حتى حمام هخليك لما دودك ياكلك
حسام يبص يلاقي ندى واقفه على الباب يعنفها
حسام / ارجعى اوضتك قرفتونى
ندى واقفه مكانها حسام يصرخ
حسام / قولت على اوضتك
ندى تتخض و تعملها على نفسها حسام يبص فى الارض و يتنهد و يبصلها بتعيط يزقها بعيد و يقفل الباب على مصطفى بالمفتاح
ندى / بابا
حسام يشارلها على الجرح
حسام / شايفه ؟؟”شايفه و لا اتعميتي دفعت الفلوس دى كلها عشان يقدر يحرك ايديه و اخرتها بيحاول يموتنى
ندى / بابا
حسام / انا مش هكرر كلامى تدخلى الاوضه و تكملى طفح و تغيرى الزفت اللى عليكي و تاخدى الدوا و تتخمدى بدل قسما عظما
ندى / لا لا خلاص خلاص
ندى تدخل تقعد مكانها و تاكل و حسام عينه عليها تفضل تاكل و تحشر فى بقها و عينها عليه يتنهد و يقفل الباب بالمفتاح و يروح المطبخ لحبيبه و يقعد قدامها و يهدى و ياكلها و هو مبتسم
حسام / مفيش غيرك فى بيت المجانين ده والله يا بنتى كلى يا قلبي كلى
حسام يحط ايده على الجرح و يقوم يجيب مناديل مطبخ كتير و يحطها على رقبته
حسام/ بوظلى القميص الجديد حسبى الله و نعم الوكيل فيه
………………………
فى الفندق
نور قاعده بتقرا قران و على بيتكلم فى التليفون
على / لا نور كلمت حسام و كانوا كويسين بس ما خرجوش النهرده طبعا راجعين تعبانين من السفر فاكلوا و ناموا
عمر / طب نور كلمت ندى يمكن أية ترتاح
على / اه كلمتها بس كانت مجهده جدا تقريبا ما كانتش بتعرف تنام هناك من قلقها على حبيبه او حاجه كدا طنط بتقول لنور انها جت و طلعت على فوق علاطول ما عدتش عليها
عمر / لا و المفروض تعدى اوى
على / انا المفروض جاى هنا اعمل عمره على فكره
عمر/ ايه الاخبار عندك صحيح
على / رطوبه بلا هدف الله يكون فى عون اهل البلد بجد غير كدا راحه غير عاديه و جو الواحد فعلا كان محتاجه بجد يا عمر بمجرد ما بصيت للكعبه و قعدت ادعى ربنا كتير و اعيط و اسجد ما كنتش عاوز ارفع راسي من الارض و قعدت ادعى و ادعى و ادعى كانت لحظه ما تتوصفش اقسم بالله و نور كمان قعدت تشرب ميه زمزم كتير جدا و حاولت اعمل زيها بس ما قدرتش هى شربت اكتر منى بكتير بتقول ان ده بيداوى اى امراض او سحر او حسد
عمر / ما تنسانيش فى حبه بالله عليك
على / ما تقلقش ان شاء الله هجيب جركنين تلاته
عمر / تمام و بالنسبه للمحل ما تقلقش كلو تمام و متابع كل حاجه
على / ما اتحرمش منك ابدا بقولك هسيبك بقي عشان هننزل عشان الصلاه
عمر / تمام افتكرنى باى دعوه
على / اكيد يلا سلام
على يقفل نور تصدق
نور / صدق الله العظيم … يلا ؟
على / يلا يا قلبي
نور تعدل الطرحه قدام المرايه و تمشي قدام على يقفل باب الاوضه و يحصلها يركبوا الاسانسير سوا
………………………
فى شقه امانى
امانى / و انت هتاخد البت على قلبك و انت خارج ليه ما تسيبها فوق
حسام / شبطت فيا اخليها تعيط يعني
امانى / و لما تجوع و لا تعملها على روحها هتعمل ايه
حسام / مش معقول مش هعرف اتصرف يعني و بعدين ما هى بتاكل يعني علبه عصير و لا علبه زبادى و ان كان على البامبرز ما تقلقيش انا واخد شنطه فيها غيار و بامبرز هسيبها فى العربيه و بعدين هو انا مش هعرف اتعامل مع بنتى يعني
امانى / اياكش بس ست الحسن اللى فوق دى تبقي مرتاحه و مانتخه و انت واخد البت على قلبك
حسام / هى بنت حد غريب بقولك ايه انا خارج و ارتاحى هجيب اكل اكل جاهز ليكي انتى وبابا معايا وانا راجع
امانى / يعني هتاخد البت و كمان الست هانم مش هتطبخ
حسلم / انا قولت هجبلك انتى وبابا ما قولتش هجيبلها يلا سلام بقي هتاخر
امانى / مع السلامه
حسام ينزل يقابل أية و منال
حسام / الله ايه المفاجاه الحلوه دى
منال / ربنا يكرمك احنا جينا ناخد غيارين زياده ليس و نغم نور قالت فى مفتاح مع ماما
حسام/ اه فى بس هستاذنكوا عشان العمال واقفين فى الصيدليه الجديده و المفروض اروح ابص عليهم
أية / ندى فوق
حسام / اه فوق بس نايمه اصل حبيبه هانم نامت شويه الضهر فسهرت ندى طول الليل مش عارف شاربه قهوه و لا ايه حكايتها دى قولت اخدها يمكن لما تغير جو و تركب العربيه تنام و اهو برده اسيب ندى ترواح شويه
أية / دا انا قولت اقعد معاها شويه
حسام / اكيد لو كانت تعرف كانت … بصي اطلعى خبطى عليها
أية / هو تليفونها مقفول علاطول ليه
حسام / هههههههههههههه ما انتوا ما شوفتوش اللى حصل الفندق كان فيه حمام سباحه و بعدين كنا بنهزر يعني فزقيتها و نسيت ان الموبايل فى جيبها و حطينه فى الرز بس شكله كدا الله يرحمه انا حتى واخده معايا فى جيبه بس مش هملك اطلعهولك عشان شايل بيبو و الشنطه و كدا هوديه للراجل نفع يتصلح قشطه ما نفعش هجيب واحد جديد و امرى لله ما دى اخره الاستهتار غلطتى و بعترف
منال / ربنا يعوض عليكوا
حسام / والله يا طنط انا بحبك و بحب قعدتك بس مستعجل اوى على العموم مش هتاخر و هجيب اكل وانا راجع استنونى
أية / معلش مستعجلين مره تانيه بقي
حسام / اممممم تمام اكيد و اهو برده كلها قد ايه يعني و نطلع سوا المصيف اما حجزتلكوا حتى لوكايشن هتدعولى
أية / مش عاوزين نعطلك نكمل كلامنا بعدين
حسام / تمام تمام يلا سلام
حسام يمشي
أية / شوفتى التعويره اللى فى رقبته
منال / شوفتها بس ما سالتش شكله فعلا مستعجل
أية / طب هنعمل ايه هنخبط على ندى و لا هنسيبها تنام
منال / براحتك بقي انا عملت اللى عليا و اكتر من كدا اقسم بالله غلب حمارى
أية تهز راسها و تشاور لمنال تطلع و هى تطلع وراها
…………………….
فى شقه عمر
عمر / ما يمكن تعبانه يا بنتى انا على ماكدلى انها كلمت نور وكانت مرهقه جدا البنت شكلها بتسنن و لا اى حاجه انا ما افهمش فى الحاجات دى
أية / ماشي يا عمر
عمر / تفتكرى لو ندى فيها حاجه مش هنعرف
أية / انا فى حاجه جوايا مخليانى قلقانه طول الوقت يمكن لو كانت فتحت و شوفتها انا خبطت كتير يا عمر
عمر / يمكن كانت فاكراكى حماتها الحربايه طالعه تتسلى عليها فقالت تقصر الشر و يمكن كانت رايحه فى النوم فعلا و بعدين اصبرى بكره كدا لما نشوف حسام هيصلحلها التليفون و لا هيجيبلها واحد جديد اما نشوف
أية / صحيح يعني هو ما جابلكش انت التليفون ليه مش انت اولى برده و لا ايه انا ازاى ما اخدتش بالى من الحكايه دى دا بيكدب
تليفون أية يرن تروح تجيبه تلاقي ندى تبص لعمر
أية / دى ندى
عمر / طب ما تردى مستنيه ايه ردى
أية ترد
أية / الو
ندى / سورى يا أية بجد انا كنت نايمه والله ما سمعتكيش
أية / انتى كويسه يا بنتى انتى من يوم سفركوا اسكندريه و انتى مختفيه خالص
ندى / معلش والله غصب عنى بس خلاص حسام صلح التليفون و كلو هيبقي تمام بقي
أية / كويس الحمد لله المهم شوفتى شقه اسكندريه ؟؟
ندى / بصراحه لا انا كنت فى الفندق بس اكيد حسام حاجز حاجه حلوه يعني
أية / بجد والله طيب و ماله
ندى / يويو معلش هقفل بابا شكله عاوز حاجه
أية / تمام ابقي كلميني تانى طمنيني عليكي
ندى / حاضر اكيد سلام
أية تقفل و تبص لعمر
عمر / يارب تكونى ارتاحتى
أية واقفه سرحانه و بتفكر
عمر / المفتش كرومبوا هيشتغل اهو
أية / و لا كرومبوا و لا كرومبه هروح اتوضي و اصلى اياكش شيطانى يهدى و ارتاح
عمر / والله عين العقل
أية تبص لعمر و تمشي و هو متابعها
……………………
فى شقه ندى
حسام يقفل الموبايل
حسام / شاطره
ندى / هتدخلنى لبابا
حسام / انتى شايفه عمل فيا ايه دا لولا انه عمى اقسم بالله
ندى / عشان خاطرى دا ابويا عشان خاطرى
حسام / هدخلك ليه تنضفيه و تاكليه و لما تطلعى هقفل الباب تانى انتى فاهمه
ندى / اللى تشوفه حاضر بس خليني اخشله اطمن عليه
حسام / تعالى
حسام يروح يفتح الباب يلاقي مصطفى قاعد على كرسيه و باصصله
حسام / ما شاء الله اتحسنت خالص عرفت توصل لهنا لوحدك
ندى / تعال يا بابا اوديك الحمام و اغيرلك هدومك دى تعال نتغدى سوى انا ما اتغديتش تعال
ندى تزق كرسي مصطفى مصطفى يحاول يمسك فى حسام تانى ندى تمنعه
ندى / ليه كدا يا بابا ليه
مصطفى يبص لندى بتكلم حسام
ندى / مش هيعمل كدا تانى وعد
حسام يروح المطبخ و ندى تزق مصطفى الحمام
ندى / انا مش هقدر احميك منه ما تزعلوش مش هقدر اشوفه بياذيك احنا ما لناش حد ما حدش هيسال علينا و لا هيهتم اصبر و خلاص
مصطفى الدموع تنزل من عنيه
ندى / اوعدنى انك مش هتزعله تانى اوعدنى انك مش هتعصبه حلف هيوديك دار مسنين … عاوز تسيبني لوحدى عاوز تبعد عنى
ندى تعيط مصطفى يمسح دموعها
ندى / ما تزعلوش لو بتحبنى ما تزعلوش
مصطفى يشاورلها تطلع من الحمام حسام يدخل شايل غيار
حسام / غيار يا عمى مش هتحتاج ندى تساعدك انت الحمد لله بقيت كويس … روحى نضفى اوضه ابوكى
ندى / حاضر
ندى تمشي و حسام و مصطفى بيبصوا لبعض
حسام / انا عمرى ما كنت اتخيل ان العلاقه بينا توصل لكدا بس انت حاولت تقتلنى عاوزنى اعمل ايه انا تعبان و طالع عيني فى كل حاجه و مش قادر ارتاح و لا اتلفت و حضرتك بتحاول تقتلنى واحد غيرى كان وداك السجن و لا على اقل تقدير مستشفي المجانين بس انا عملت حساب للعشره فلو سمحت ما تكررهاش
مصطفى باصص لحسام بغل حسام يقفل الباب و يرجع الاوضه يلاقي ندى بتنضف الارض
حسام / هنزل ابص على ماما و هاخد حبيبه معايا
ندى تبصله
حسام / تاكلى ابوكى و تنيميه و تتشطفى كدا و تلبسي حاجه حلوه و تكلميني اطلع … هسيبلك التليفون انا عارف انك مش هتزعليني مش كدا
ندى تهز راسها لا
حسام / تمام
حسام يطلع الصاله يشيل حبيبه و يمشي ندى تجرى على الاوضه و تفتح فى الادراج و تقعد تدور فى الدولاب فجاه حسام يدخل
حسام / بخصوص الورق
ندى تصرخ
حسام / ما تتعبيش نفسك و تدورى عليه انا عاينه فى الصيدليه تحت انتى عارفه انتى ماضيه على ايه صح
ندى / انا كنت بطلع قميص نوم
ندى تشد قميص نوم و توريه لحسام
ندى / انت بتحب ده صح
حسام / بحب اى حاجه عليكي … انا نازل
حسام يمشي ندى تقعد تعيط
…………………
فى السعوديه
نور و على بيتمشوا فى مول ضخم
نور / تفتكر كدا كفايا و لا نسينا حد
على / والله انا اساسا تعبت فبخيالك انتى بقي
نور / مالك
على / مش قادر يا نور رجلى فقفقت مش كدا
نور / خلاص كفايا خلينا نروح
على / نشوف بس حته ناكل فيها لقمه و بعدين نروح
نور / طب ما تقول جعان يعني بدل اللفه دى كلها
على / تعرفى طول عمرى بستغرب الست بتجيب الطاقه و الحماس للف و الشرا منين
نور / دى قدرات خاصه و منح ربانيه
على / ههههههههههه يا مزاجك الرايق
نور / بصراحه ما كنتش متخيله ان العمره هتفرق معايا اوى كدا بجد حاسه انها غسلتنى و احنا لسه يادوب فى الاول اهو الاماكن هنا والمعلومات الواحد بيصلى هنا كانه عمره ما صلى الريحه حتى مختلفه
على / لا دى ريحه الفراخ اللى جايه من المطعم اللى هناك ده
نور تزغده بضحك
نور / فصلتنى وبوظت عليا اللحظه تحب ناكل
على / ياريت
نور و على يتمشوا ناحيه مطعم
على / لما نرجع مصر انا هيبقي ورايا حاجات كتير اوى تشغلنى انا قصرت جامد فى شغلى و صرفت مبالغ كبيره و فلوس حسام اللى كنت حوشتها و خدت منه فوقيها كمان
نور / ممكن ما تفكرش هنا فى الحاجات دى
على / للأسف ما ينفعش و بقولك ده عشان لازم تعزرينى الفتره الجايه انا هكون مشغول جدا و اكيد هبقي مقصر معاكى جدا
نور / يا حبيبي انا مقدره ظروفك و عارفه انت بتتعب قد ايه عشانا و عارفه كمان انك هتقدر تعوض الفتره اللى فاتت و تلم نفسك بسرعه
على / انا اقصد ان الحمل هيبقي تقيل عليكي لوحدك البيت و الاولاد
نور / لما هتيجي اخر الليل
على / هكون تعبان لا قادر احكى و لا اسمع
نور / بس هتنام فى حضنى هتونس بيك و اطمن فى وجودك
على / يعني مش هيجي يوم و تقلبيها نكد و تقولى الاهتمام ما بينطلبش و الحركات دى
نور / بص يا على يا ابنى احنا ما لناش حكم على هرموناتنا
على / يا حفيظ يا مغيث
نور / هههههههههههههه روح روح شوف هناكل ايه و انا هروح اقعد هناك
على / ماشي ثوانى و جايلك
على يروح ناحيه الكاشير و نور تروح تقعد فى جنب
……………………..
فى شقه ندى
حسام نايم و حبيبه نايمه جنبه و ندى قاعده فى وضع الجنين بتفكر
////////////////
ندى / انتى بجد ناويه تكملى باقي عمرك كدا دا انتى لسه صغيره مش هتموتى قريب يعني … اموت ايه و حبيبه مين يربيها … و انتى بمنظرك ده هتعرفى تربى. حبيبه دلوقت مش فاهمه حاجه حبيبه لما تكبر هتبصلك ازاى هتطيقك ازاى … ام مش عارفه حتى تمسك نفسها هعلمها تقلع البامبرز ازاى و انا هلبسه و ان كنت فى السن ده كدا لما هكبر هبقي ازاى … هخف … ازاى و هو مش عاوز يعالجك هو فرحان بيكي كدا جاريه مذلوله تعملى اللى يقول عليه و تشكريه انه سايبك عايشه … و هو انتى كدا عايشه
ندى تبص على حبيبه
ندى / طب و بابا هسيبه لمين و حبيبه هسيبهاله كدا … وجودك فارق ايه … على عمره ما هيسيب بابا و حبيبه عمره ما هيسمح لحسام ياذيهم بالشكل ده … على مين و هو فين سي على لما كنت بموت بالحياه فى الصندوق ما كل ده بسببه … بس نور بتحب حبيبه و … انتى بتلفى و تدورى ليه الحل معروف و انتى اللى مش راضيه تشوفيه … انا ما اعرفش مخبى الورق فين … يولع الورق مش هتفرق اى حاجه
ندى تبوس راس حبيبه و تعدى ايدها على شعرها بحنيه و هى مبتسمه وسط الدموع
ندى / حبيبه … حبيبه هتبقي فى امان … يعني اقتله و اتعدم و اسيبها للمجهول .. انا اصلا مش هقدر اقتله … ما هو قتلك بدل المره اتنين و مكمل هتستنى ايه … لو عرف انى قتلتله مش هيسيبنى مش هيسكت .. بس هيعمل ايه و هو ميت … مش عارفه
ندى تبص لحسام نايم
ندى / اقتله و اموت نفسي … ساعتها الكل هيرتاح … بس انا عاوزه اعيش عاوزه اربيها عاوزه احميها من الدنيا انا عاوزه اعيش و اشوفها عروسه عاوزه اعيش و اكون جنبها فى كل الاوقات هتحتاجنى كل بنت بتحتاج امها انا ما اقدرش اتخلى عنها هى ما لهاش غيرى … يمكن دى حكمه ربنا ان ولاد نور يموتوا… نور مش هتحب بنتى قدى … نور هتوفرلها حياه انتى مش هتقدرى توفريهالها اب و ام يحبوها و يحبوا بعض … ما حدش هيحبها قدى ما ينفعش حد ياخد مكانى تقول ماما لحد غيرى … ما تبقيش انانيه قومى قبل ما يصحى قومى انقذى نفسك و انقذيها … انقذ نفسي ازاى و انا بموت … بتنقذى نفسك من انك تعيشي مسخ مريض … عمره ما هيعالجك هيفضل يذل فيكي انتى وابوكى خدى حق ابوكى و اللى عمله فيه
ندى تمسح دموعها
ندى / انا لازم اخد حقنا كلنا كل اللى اذاهم و دمرهم امى اللى ماتت و أية اللى اتفضحت و ابويا اللى اتشل … و حقى … حق كل العذاب اللى شوفته من يوم ما ضحك عليا و اتجوزنى لحد النهارده لازم انتقم ما انا كدا كدا ميته هيعمل فيا ايه اكتر من اللى عمله هيدفنى بالحياه تانى ما انا مت هناك و الانسان ما بيموتش مرتين قومى يا ندى قومى مره واحده ما لهاش تانى قومى هاتى حقك
////////////////////
ندى تبص لحسام و تقوم تروح تجيب سكينه من المطبخ و تقرب من حسام بالراحه و فجاه ترفع ايدها و تيجي تنزل عليه حسام يفتح عنيه ترمى السكينه و تروح فى جنب و تصرخ
ندى / ما كانش قصدى ما كانش قصدى
حسام يقوم يجرى و يحضنها
حسام / اهدى يا ندى اهدى
ندى تعمل على نفسها
ندى / هى اللى قالتلى هى اللى كانت عاوزه لكن انا لا انا عمرى انا بحبك والله بحبك
حسام يحضنها و يطبطب عليها تعيط
حسام / حصل خير حصل خير
ندى / وديني دكتور انا مش بتصرف بوعيي
حسام / هزودلك الدوا هظبطلك الجرعه ما تخافيش
ندى / ما تقولش لحبيبه ما تقولهاش حاجه
حسام / حبيبه نايمه فى دنيا تانيه مش حاسه بحاجه اهدى اهدى و انسي
ندى / انت مش هتنسي هتستنى اما نبقي لوحدنا هتستنى لما تستفرد بيا تانى
حسام / ما احنا لوحدنا يا ندى لوحدنا يا حبيبتى
ندى / انا تعبت
حسام / فتره و هتعدى و انا جنبك اهو هنعديها سوا ما تخافيش
ندى / دا انا خايفه عليك … انا ممكن ائذيك انا ما اقدرش اعيش من غيرك دا انا بحبك اوى
حسام / هبقي اعمل حسابى واديكي منوم و انا نايم ما تخافيش دى كانت غلطتي انا
ندى / يعني مش زعلان منى
حسام / ما انتى مش هتعمليها تانى مش كدا
ندى / ابدا خالص والله عمرى عمرى والله ابدا
حسام / خلاص اهدى بقي اهدى
ندى / طب هقوم اغير انا هدومى ما بتلحقش تنشف على الحبل انا بقيت بعملها اكتر من حبيبه
حسام يمسح دموعها
حسام / هنزل اجبلك هدوم جديده و صدقيني واحده واحده الدوا هيجيب نتيجه و ترجعى احسن من الاول كمان
ندى تبص لحسام يبعد شعرها عن وشها و يساعدها تقوم
حسام / اسبقيني على الحمام هجيب غيار و اجيلك
ندى تهز راسها و تمشي و حسام عمال يبص على الارض حواليه
حسام / هتعمل ايه فى القرف ده بس يا حسام
…………………..
فى السعوديه
نور بتكلم امانى فى التليفون
نور / و فيها ايه بس يا ماما
امانى / يعني ما فيش مره تنزل تبص علي حماتها و لا تسال عن عمها مفيش مره ترفع سماعه التليفون و تشوفنى محتاجه حاجه
نور / انتى غريبه اوى يا ماما انتى مش لما بتشوفيها بتتعصبى
امانى / طب والله سيرتها لوحدها بتعصبنى سيبك منى هتيجي امتى
نور / ما انتى عارفه يوم الخميس ان شاء الله
امانى / باذن الله توصلى بالسلامه
نور / بصي انا هقفل عشان نلحق ننزل للصلاه
امانى / ماشي يا قلبي بس صحيح بصيتي على الدهب زى ما قولتلك
نور / سلام يا ماما
امانى / يا اختى انا تاعبه نفسي على ايه براحتك يلا سلام ادعيلى
نور / عنيا سلام
نور تقفل و تخبط على على فى الحمام و تفتح الباب تلاقيه بيتنشف من الوضوء
على / خلصتى
نور / يلا ؟
على / يلا
نور و على يمشوا
……………….
فى شقه ندى
حسام يدى لندى حبايه تبلعها بشويه ميه
حسام / شايفه اتحسنتى ازاى
ندى / انا نايمه طول الوقت و لما بقوم ببقي مدروخه و مش مركزه خالص
حسام / بس بداتى تظبطى الحمام الحمد لله واحده واحده بقي هنقلل الادويه لانك مش هتحتاجيها خالص ان شاء الله
ندى / امتى دا نور هترجع قريب و دى مش زى أية هتيجي مره كل فين و فين دى فوقى يعني هتنزل مره الصبح و مره الضهر و مره بالليل هتفضل تنزل لحد ما تلاقيني صاحيه
حسام / هتنزل على اسكندريه يعني قدامنا اسبوع كمان و بعدها نبقي نماطل باى شكل
ندى / و انت هتقدر تعتزر عن سفريه اسكندريه دى انا مش هينفع ابقي معاهم انا لو فلتت منى قدامهم هموت نفسي
حسام / للدرجادى خايفه على صورتك قدامه
ندى / خايفه يودونى مستشفي مجانين خايفه يحرمونى منك و من حبيبه خايفه يتقال لحبيبه يا بنت المجنونه خايفه ابقي لوحدى انا ما اقدرش اعيش من غيرك دا انا اموت يا حسام
حسام / ما تخافيش يا حبى نامى انتى دلوقت و ارتاحى و ما تفكريش فى اى حاجه و انا هظبط كل حاجه تمام
ندى تبص لحسام و تفرد ضهرها ياخدها فى حضنه و يلعب فى شعرها
حسام / ربنا وحده اللى يعلم انتى بالنسبالى ايه انا عمرى ما اتمنيت حاجه فى الدنيا غيرك عايش عشانك بس ما حدش يقدر ياخدك منى مش هسمحلهم لان ببساطه من غيرك مش هقدر اعيش الانسان بطبعه بيحارب عشان البقاء الروح غاليه و انتى روحى يا ندى
حسام يبص على ندى نايمه
حسام / اوعى تفتكرى انك اتعاقبتى لوحدك انا بتوجع فى اليوم مليون مره … عايش فى نار … اوعى تفتكرى انى مصدق الكلام االى بتقوليه انا مش اهبل … بس مع كدا مش هقدر انكر انى ساعات … بغمى عقلى و استمتع اصلى عشت سنين بحلم اسمعه حتى لو كدب حتى لو … انا عملت عشانك كل حاجه حرفيا كل حاجه و كنت مستعد استحمل اكتر و كنت مستعد اعيش خدام تحت رجليكي حتى لما كنت بغلط فى حقك كنت بغلط عشانك عشان احافظ عليكي او عشان اجبلك اللى بتتمنيه مش هم بيقولوا كل شئ مباح فى الحب و الحرب … ما انتى حبك حرب يا ندى حبك حرب يا قاتل يا مقتول … على فكره انا كمان بكدب بكدب لما بهددك بحبيبه او بابوكى او حتى انى ائذيكي انا ما ممشيتش و سبتك زى ما قولتلك انا كنت جمبك بسمع خبطك و اول ما الصوت وقف جريت فتحت اطمن عليكي
الدموع تنزل من عين حسام غصب عنه يمسحها بس ما يقدرش تنزل اكتر
حسام / ياريتنى ما عملت فيكي كدا … بس انتى اللى بداتى انتى و الكلب ده و لعلمك انا لو ما كنتش لميت الموضوع كان زمان نور كمان بتتوجع و انا ما عنديش اغلى منها هى كمان … فيه ايه على ده هاه فيه ايه شايفين فيه ايه … دا انسان عاجز و ما بيعرفش يتصرف قليل الحيله و ضعيف شفتوا فيه ايه انتوا الاتنين … صعب عليكوا طب ما انا كمان المفروض اصعب عليكوا انا ما عنديش اغلى منكوا انا ما ليش غيركوا انتى و نور كل حياتى انتوا الهوا بالنسبالى و هو واخدكوا منى … بكرهه بكرهه و نفسي اقتله موته تشفى غليلي منه بس مش قادر مش قادر اللمسه و لا حتى اقرب عشان وجعه هيوجعكوا … هيريحنى بس هيوجعكوا و انا عمرى ما هستحمل وجعكوا اتوجع انا مش مهم انا بحبك اوى يا ندى .. سمعانى بحبك اوى
حسام يمسح دموعه و يقوم يشيل حبيبه من الصاله و يقعد على الكنبه و يبدا يلاعبها و هى بتحاول تنزل للعب
حسام / اعمل ايه يا بيبو فى اللى انا فيه … حتى انتى عاوزه تسبيني … الدبدوب ده ؟
حسام يجبلها دبدوب من الارض و حبيبه لسه بتحاول تنزل ينزلها
حسام / ماشي يا ستى اللعبى لحد ما اخلص اللى ورايا ما انا هنا الاب و الام و ياريته عاجب
حسام يقوم يدخل المطبخ يجيب طبق بلاستيك يفضي فيه الهدوم من الغساله و يحطه فى جنب و يملا الغساله و يشغلها
حسام / نخلص المواعين دى و بعدين ننشر على رواق بقي … شوفى مين زوج يا ست ندى مدلع مراته كدا … استعنا على الشقا بالله
حسام يشمر و يبدا يغسل المواعين
………………………….
فى شقه عمر
منال / نسيتي حاجه
أية / لا انا راجعت على الحاجه اللى فى الليسته كلها لو فى حاجه ناقصه بقي يبقى انتوا نسيتوا اصلا تكتبوها فى الليسته
عمر / ما ننسي يا ستى هو احنا مسافرين المريخ دى اسكندريه نبقي ننزل نصايه نخطفها من اى حته يعني مش حوار
يس / انا لبست
عمر / ايه يا عم الحلاوة دى ادخل بقي اوضتى كدا هتلاقي ازازه برفيوم على التسريحه بختين بالعدد هاه ما تحفش انفخك هاه هههههههههههههه
يس / دا انا هستحمى بيها
يس يجرى و عمر يقوم يجرى وراه
أية / هدخل اساعد نغم و اسرحلها على ما تلبسي
منال / لا روحى اللبسي و لبسي بنتك انا هخلص نغم و بعدين اللبس خلينا ننجز
أية / تمام
أية تدخل الاوضه تلاقى عمر بيسرح
عمر / هاخد يس و الشنط و نروح نمون و نجيب شويه تحابيش للطريق و هعدى على طنط ليلى اجيبها
أية / تمام و انت راجع رنلى ننزل
عمر / ماشي لو عوزتى اى حاجه كلميني
أية / تمام يلا عشان ما تتاخرش
عمر / يلا يا وحش
يس / يلا
عمر و يس يمشوا و أية تروح تشيل بيرين تشم ريحه وحشه
أية / ما تبقيش بنتى لو ما عملتيهاش ما انتى لازم تتحفيني … يلا هنا احسن من الطريق
أية تنيم بيرين على السرير تانى و تروح تجيب شنطه صغيره تفتحها و تطلع بامبرز و وايبس
…………………….
فى شقه امانى
محمد / مهو على و نور لما هيوصلوا مش هيبقي معاهم عربيه يبقي امنطقى بدل ما نتزنق انا و انتى فى عربيه حسام و تتزنقى انتى طول الطريق جنب مصطفى و ندى و حبيبه نروح بعربيتنا ده المنطقى
امانى / لا يا حبيبي اللى كنت اقصده من سؤالى ليه يديك مفتاح الشقق و يقولك اسبق عشان ادبس انا فى التنضيف مش كدا
محمد / لا اله الا الله الراجل معاه فى العربيه بيبي و راجل قعيد يعني هيقف فى استراحات كتير دا برده منطقى
امانى / كان بعت ندى معانا
محمد / يا ست الكل و لما هيبعت ندى معانا مش هنقف احنا كمان
امانى / كان ادى المفتاح لعمر
محمد / بقولك ايه لو روحنا و لقينا الدنيا مكركبه هاخدك و ننزل نقعد فى اى حته لحد ما يوصلوا خلاص
امانى / انا عارفه ان السفريه دى هتيجي على دماغى فى الاخر
محمد / بناقصها يا امانى احنا لسه ما اتحركناش من البيت و الغم اشتغل بناقصها
امانى / اما انك غريب صحيح
محمد / انا اللى غريب
تليفون محمد يرن محمد يطلعه و يبص فيه
محمد / ابنك وصل تحت ها هتنزلى و لا ايه
امانى / هدخل اجيب الشنطه من جوه
جرس الباب يضرب امانى تدخل و محمد يفتح يلاقي حسام شايل كيسين صغيرين
حسام / دا الفطار و ده الصن بلوك
محمد / طب ساعدنى ننزل الشنطه العربيه
حسام / تمام
حسام يدخل يشيل الشنطه و ينزل امانى تطلع من الاوضه شايله شنطتها تبص لمحمد و تنزل محمد يتنهد و يدخل يشيك على الشقه و ينزل يلاقي امانى و حسام واقفين جنب العربيه
امانى / ما تتاخرش انا مش هنضف الشقه لوحدى
حسام / الشقه فله و لو لقيتي فيها قشايه يبقي ليكي حق تتكلمى
امانى / اما نشوف ما تتاخرش برده ما تسبنيش مع نسايب اختك لوحدى
حسام / مسافه السكه يادوب هطلع اجيب الشنط و احصلكوا
امانى / ما نستناك نطلع سوا
حسام / براحتك عاوزه تستنى استنى بس اكيد الموضوع هياخد وقت على ما انزل عمى و الشنط و كدا
محمد / و انا قفلت الشقه خلاص فلو هتستنى هتستنى فى العربيه … اساعدك تنزل مصطفى
حسام / لا ما تشغيلش بالك انا هتصرف
محمد / طب على بركه الله
حسام / على فكره عمر اتحرك و المفاتيح مع حضرتك
محمد / طب تمام يلا يا امانى اركبى
امانى / ركبت
امانى تركب و محمد يسوق و يمشي و حسام متابعهم و يطلع يجرى على فوق يفتح باب الشقه و يدخل يفتح باب اوضه مصطفى لابس و على رجله حبيبه لابسه
حسام / تحب تدخل الحمام قبل ما ننزل العربيه انا شيكت عليها امبارح و نزلت الشنط الصبح و انا نازل فاضل احنا ننزل عشان نمشي
صوت خبط على الباب حسام يروح يفتح باب اوضه ندى
حسام / فى معادك بالمللى
ندى / انا عملت على نفسي تانى
حسام / تمام خشي اتشطفى و غيرى على ما ابص على بامبرز حبيبه و انزلها هى و عمى العربيه
ندى / بلاش تاخدنى معاكوا يا حسام انا ما خفيتش انا مش هينفع
حسام / ما حدش هياخد باله انك لابسه بامبرز تمام و ابقي ادخلى غيرى كل ساعتين
ندى / و هرميه فين بقي ان شاء الله اكيد هياخدوا بالهم من الزباله
حسام / اعملى كيس فى اوضتنا و انا هاخده بنفسي كل يوم ارميه انا و انتى هنغطى على بعض تمام
ندى / مش هتظبط
حسام / ندى فوقى و ما تضيعيش وقت الكل اتحرك يلا اتحركى ربع ساعه بالكتير و تكونى واقفه قدامى جاهزه يلا
ندى تبصله و تدخل الحمام و تقفل الباب يرجع يبص لمصطفى
حسام / هنزل انادى اى حد يساعدنى انزلك
مصطفى يشاورله حمام
حسام / ما انا سالتك ما رديتش و ندى فى الحمام دلوقت هعملك ايه يعني
حسام يتنهد و يهز راسه ماشي و يشيل حبيبه و يحطها على السرير
حسام / تعال انزلك شقه بابا و من هناك على العربيه و بعدين ابقي اطلع اجبلك الكرسي بس تعمل حسابك انك هتساعدنى انا مش هشيلك انا هسندك بس
مصطفى يهز راسه
حسام / و لا استنى انزل الكرسي و بعدين انزلك بدل ما تقع منى
حسام يسند مصطفى يقعد على السرير و يشيل الكرسي و ينزل يفتح شقه ابوه و يحط الكرسي جنب الباب و يطلع يجرى على فوق يسند مصطفى و مصطفى ساند بايده التانيه على الترابزين و حسام شبه شايله
حسام / انا والله لو بشتغل بالسخره ما هتعب كدا بس على الله يتمر
حسام يقعد مصطفى على الكرسي و يزقه للحمام
حسام / خلص على ما انزلك
حسام يطلع يجرى على فوق يلاقي حبيبه فى الصاله يشيلها و يدخل بيها جوه تانى
حسام / رايحه على فين انتى هاه رايحه على فين احنا لسه ما اتحركناش و فرهدت
………………………
فى اسكندريه
محمد يفتح الباب و يدخل وراه امانى و ليلى و منال و أية العيال يدخلوا يجروا على جوه و عمر ورا شايل شنطتين كبار
محمد / والله شقه حلوه و برحه ما شاء الله
امانى / احنا شقتنا اللى فوق صح
محمد / ايوه
ليلى / اوضه للولاد و اوضه لعمر و أية و اوضه ليا انا و انتى يا حجه
عمر / انا هنزل اجيب باقي الحاجه من العربيه
محمد / انا هاجى معاك
ليلى / انتوا هتتقسموا ازاى فوق
امانى / زى ما هتتقسموا هنا
ليلى / ايوه فاهمه انتى و جوزك اوضه و حسام و مراته اوضه و على و نور فى اوضه الاستاذ مصطفى هينام فين
امانى / هيساعوا بعض بقي او يفرشوله حاجه فى الصاله بقي
منال / حصيره الصيف واسعه يعني و تاخد من الحبايب الف و لا ايه
امانى / ايوه و بعدين احنا واخدين على كدا كنا طول عمرنا ناخد شقه واحده الستات و العيال يتوزعوا على الاوض و الرجاله تفرش فى الصاله فعادى يعني
أية / هو حضرتك مش هتطلعى تبقي على الشقه فوق
الكل يبصلها
أية / هو طياره على هتوصل الساعه كام صحيح اما اقوم ابص على العيال
أية تدخل جوه
امانى / شايفه قله ادبها
منال / حقك عليا ما تقصدش
امانى / و لا تقصد انا طالعه فوق
امانى تطلع محمد و عمر يطلعوا شايلين شنط
عمر / سيبها هنا هحط اللى معايا و اطلعهالك
محمد / لا لا هطلعها انا مش حوار
محمد يطلع على فوق يلاقي امانى واقفه قدام الباب
امانى / ما خليتهوش يطلعهالك ليه
محمد / الراجل شايل شنطتين و قبلها شنطتين اخليه يشيل بتاعتى ليه دى حياله واحده انتى ايه اللى طلعك
امانى / طردونى يا خويا ايه اللى هيطلعنى غير انهم يطردونى
محمد يفتح الباب امانى تدخل
محمد/ فله اهى ما لكيش حجه
امانى / هدخل اخد الاوضه اللى على الشارع قبل ما ست الحسن تيجي و تنقي
محمد / خدى ان شالله تاخدى الشقه كلها انا هنزل اخد لفه فى المنطقه
امانى / هتسيبني لوحدى
محمد / عاوزه تيجي تعالى
امانى / لما افرش هدومى فى الدولاب الاول تعال دخلى الشنطه و ساعدني
محمد/ اتفضلي
محمد يشيل الشنطه و يدخل و امانى تقفل الباب و تروح وراه
…………………….
فى استراحه
حسام بيتكلم فى التليفون
حسام/ ادينا كل استراحه نقف عشان عمك و فى البيت قبل ننزل و حبيبه هانم البامبرز قرر يبهدلنا فعادى يعني و اديني محتاس
نور / ههههههههههههههههه للدرجادى
حسام / انا كنت قعدت فى بيتي بكرامتى فسحه ايه دى بس انا على ما اوصل هكون شحرت دا ان وصلت
نور / ههههههههههههههههه حرام عليك هموت من الضحك المهم احنا طالعين على الشقه اهو جبتلك شويه حاجات
حسام / سلامتك عندى بالدنيا
نور / هى ندى جنبك
حسام/ لا فى الحمام بتغير لبيبو مش لسه قايلك
نور / تمام لما توصلوا بقي بالسلامه مش هعطلك
حسام / تمام يا قلبي حمد الله على السلامه نورتى مصر
نور / منوره باهلها سلام
حسام يقفل و يحط الموبايل فى جيبه و ندى تطلع من الحمام
حسام / تمام ؟
ندى تهز راسها و تركب
حسام / طول ما انتى هاديه هتعرفى تتحمى هتتوترى هتبوظ منك تمام فاهم حاجه ايه انك تفضلى هاديه
حسام يطلع علبه من جيبه و يديها حبايه
حسام / مهدئ
ندى / هينشف ريقي و هشرب
حسام / استحملى لحد ما نروح البيت او قضيها بوقات صغيره معلش استحملى ما لازم تهدى عشان ما حدش ياخد باله
ندى تهز راسها و تاخد الحبايه و مصطفى قاعد ورا عينه عليها
حسام / اديك واحده يا عمى
مصطفى يبص الناحيه التانيه و يمسح دمعه نزلت منه غصب عنه حسام يسوق
…………………………
فى شقه اسكندريه
نور و على و عمر يدخلوا الشقه اللى تحت و على و عمر كل واحد شايل شنطتين و الكل يسلم على بعضه
ليلى / ايه ده كله
على/ دفعت وزن محترم ما شاء الله
ليلى / ما اساسي طبعا
على / بس ما يغلوش عليكوا نور نقتلكوا كل الحاجات دى على زوقها
امانى / تسلم و يسلم زوقها
نور / دا والله فيهم شنطه كلها ازايز و جراكن ميه بس
على / خفت يتوهوا فى المطار فاشتريت شنطه و عبيتهم جواها و بصراحه الشنط هناك حلوه كنت بجيب واحده لقيت عليها عرض فجبت اتنين
الكل يقعد
نور / امال بابا و ماما فين
أية / خرجوا و اكيد زمانهم جايين مش قولتيلهم انك جايه
نور / اه كلمتهم لما وصلت
منال / يبقوا اكيد فى الطريق
أية / كلمتوا ندى
نور / فى الطريق حبيبه و عمى مصعبين الرحله عليهم اوى دا حسام بيفكر حرفيا يروح
أية / انا اصلا توقعت انهم مش هيجوا
نور / ليه بس كدا يا أية
أية / انا روحت البيت اخد حاجات للولاد مرتين و فى المرتين ندى نايمه و بتصل بيها كتير جدا ما بتردش و لما تتكرم و تتصل تقول كانت نايمه
منال / ما انتى كمان مواعيد نومك اتلخبطت بسبب بيرين
أية / حبيبه مش صغيره زى بيرين حبيبه كبرت ما شاء الله و نومها اتظبط
نور / اهم جايين فى الطريق
على / هو انا لوحدى اللى جعان و لا
عمر / لا بصراحه انا كمان
على / ما تيجي ننزل نلقط اى حاجه على ما الجماعه يجوا
نور / سمك و جنبرى على زوقك بقي نفسي فيهم
على/ احلى اكله بحارى حد نفسه فى حاجه معينه
ليلى / اكتر من كدا نبقي بننهب
على / مسافه السكه و راجعين
منال / بقولك يا عمر بالمره مدام نزلتوا شويه خضار و فاكهه على زوقك
عمر / عنيا
على و عمر يمشوا
أية / طب فاكهه ماشي خضار ليه بقي هو احنا جايين نطبخ
منال / على الاقل شويه سلطه جنب الاكل و لا شريحه طماطم جنب الجبنه
ليلى / كدا كدا هننزل بالليل نشوف ايه ناقص و نشتريه
نور / طب ايه افتح الشنط دلوقت و لا لما نتجمع كلنا و لا ايه
ليلى / براحتك
منال / لما الكل يوصل احسن على الاقل ماما ما تزعلش اننا ما استنيناهاش
أية / هقوم اعلق على شاي
ليلى / و فى هنا شاى
منال / الحمد لله جايبين باكت شاى و كيس سكر معانا
أية / و ترمس ميه سخنه للطريق و لما فضي وقفتنا فى استراحه نملاه هههههههههههههه
منال / كلو الا الشاى دا ادمان بالنسبالى
أية / طب عن اذنكوا بقي اجيب الجرعه
أية تدخل جوه و الكل بيضحك
ليلى / وحشتيني يا حجه و نزولك المحل بقي بحساب
منال / غصب عنى والله اديكي شايفه الظروف انا عارفه انى تقلت عليكي
ليلى / ابدا اديني بتسلى بدل وحدتى
نور / عن اذنكوا هقوم اساعد أية
نور تقوم
ليلى / انا والله ما كنت اقصد حاجه
منال / ربنا يعينها و يصبرها معلش
ليلى تهز راسها
……………………
فى العربيه
على / يعني ما شوفتوهاش ولا مره
عمر / بس أية كلمتها فى التليفون اكتر من مره
على / و نور كمان انا دعيت كتير هناك ان ربنا يخلصها من اللى هى فيه
عمر / دعيت يجمعكوا ببعض
على يبص لعمر
عمر / سكت
على / انا و ندى قصه و انتهت انا بس مش قادر اشوفها مع الحيوان ده انا عارف انه مش كويس
عمر / هو حيوان اه بس بيعاملها حلو و ما تنكرش احنا شوفنا مواقف كتير جدا تشهدله
على يبص لعمر
عمر / ما حدش بيكرهه قدى بس دى كلمه حق قدام ربنا و بشهاده الكل حسام انسان زباله بس زوج كويس و اب كويس و ان كان له حركات كدا فكلنا بنغلط عادى يعني
على / انا مش مصدق اللى بسمعه بصراحه
عمر / حسام بيكهربها و يطفى السجاير تحت باطاتها ارتاحت كدا يعني
على / هرتاح لو قفلت بقك خالص
عمر / اتخرست اياكش تكون اصلا بتسمع لحد غير نفسك
على يبص لعمر عمر يحط ايده على بقه
……………………
فى شقه اسكندريه
حسام و محمد بيسندوا مصطفى يقعدوه و ندى وراهم شايله حبيبه
ندى / طلعوه على فوق احسن
محمد / اخد نفسي يا ندى طيب دا لسه فى هم تحت عاوزين ننزل نطلعه
حسام / خليك انت يا بابا ارتاح وانا هنزل اجيب الحاجه
امانى / ما لقيتش يعني عماره فيها اسانسير
……………….
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية سلف ودين)
