رواية سلف ودين الفصل الحادي والأربعون 41 بقلم لولو محمد
رواية سلف ودين الجزء الحادي والأربعون
رواية سلف ودين البارت الحادي والأربعون
رواية سلف ودين الحلقة الحادية والأربعون
على ينزل و نور تدخل جوه و ندى بتابعهم على السلم من فوق تدخل شقتها و هى هتطق تبص لحبيبه و تروح تحطها جنب ابوها نايم و تروح تبص على حسام نايم و هى بتغلى تبص لنفسها فى المرايه و تبتسم باسطناع و تروح تنام فى حضن حسام حسام يصحى و يبصلها و هى فى حضنه تشد ايده تخليه يحضنها يبتسم اوى و يحضنها اوى من ضهرها
حسام / هو انا مت و دخلت الجنه و لا ايه
ندى / و هى دى الجنه بالنسبالك
حسام / و اكتر مما كنت اتخيل كمان
حسام يحضنها اكتر
ندى / انا زهقت من قاعده البيت ما تخرجنى بكره
حسام / اؤمرى و انا انفذ
ندى / تعال نسافر السخنه يومين اهى ساعه بالعربيه اى فندق او شقه نبعد عن كل اللى هنا انا و انت و بس
حسام / و بس
ندى تلف و تبصله
ندى / و بس
حسام يهز راسه و هو مش مصدق نفسه
حسام / انا و انتى و بس
حسام يحاول يبوسها تقوم تقعد يستغرب و خيبه الأمل تظهر على وشه
ندى / انا ما اكلتش حاجه من الصبح قوم افتح نفسي و شوفلنا فيلم كوميدى قوم انطر الطاقه السلبيه اللى فى البيت دى افتح الشبابيك و على الاغانى قوم نرقص
حسام يقوم يقعد على ركبه و هو مش مستوعب
حسام / نرقص ؟
ندى / انت عمرك ما شوفتنى برقص صح ؟ قوم اما ارقصلك
حسام / ما تعمليش فيا كدا يا ندى انا
ندى / انا عاوزه افرح عاوزه اضحك عاوزه ارقص و اغنى و اتنطت قوم معايا انا ما ليش غيرك
حسام يقوم مع ندى و يطلعوا بره ندى تفتح شبابيك الشقه كلها و تشغل النور و تعلى التليفزيون على قناه الاغانى و حسام واقف عمال يتلفت حوالين نفسه و هى بتتحرك بسرعه فى الشقه و مش ملاحقها تروح تشده تقعده على الكنبه و فى ايدها طرحه تتحزم بيها و تفضل ترقص و حسام بيتفرج و هو مبسوط
……………………….
فى شقه عمر
عمر قاعد على السفره بيراجع حسابات و أية قاعده بتتفرج على التليفزيون و هى بتقطع خضار جرس الباب يضرب أية تقوم تتفزع و تجرى على عمر اللى قام وقف
عمر / ايه ايه الباب بيخبط عادى خشي و انا هشوف مين
أية تهز راسها و تدخل تدارى فى الستاره عمر يروح يفتح يلاقى على مقرفص فى الارض و حاطت راسه بين رجليه يوطى عليه بفزع
عمر / على .. مالك قاعد كدا ليه
على يرفع راسه و يبصله بحزن
على / انا تعبان اوى يا عمر تعبان و مش لاقى مكان اروحه
عمر / طب قوم قوم ادخل و لا نروح مستشفي و لا ايه
على / لا لا انا بس مش … عشان أية و كدا
عمر / ما لكش دعوه بيها تعال نقعد فى الاوضه الصغيره قوم تعال
عمر يقوم على يبص جوه يلاقي أية مداريه فى الستاره
عمر / على معايا هندخل الاوضه الصغيره
أية تدخل اوضتها و تقفل على نفسها الباب و عمر و على يعدوا و يدخلوا الاوضه و يقفلوا الباب
………………….
فى شقه ندى
ندى تفك الطرحه من على وسطها و تروح تترمى على الكنبه جنب حسام و هى مسخسخه من الضحك ياخدها فى حضنه و هو سعيد
حسام / ما كنتش اعرف انك بترقصي حلو اوى كدا
ندى / اخص عليهم معقول ما حدش قالك
حسام / اللى يسمع غير اللى يشوف
حسام يحاول يبوسها تقوم
ندى / يبقي نشغل اغنيه تانيه
حسام يشدها فى حضنه
حسام / يا شيخه اتقى الله انا تعبتلك سلف
ندى / نفسي اعمل مساج اوى حد يطقطقلى ضهرى بتعرف تعمل مساج يا حسام
حسام / على خفيف كدا
ندى / تؤ يبقي هتعجن وانا مش حمل فرهده
حسام / اشوف فيديوهات و اتعلم انا ذكى و بتعلم بسرعه انتى بس جربينى
ندى / من هنا لحد ما نسافر قدامك وقت اتعلم براحتك
حسام / و دلوقت
ندى / لا دلوقت هدخل انام بقي عشان تعبت و كمان بكره ورايا يوم طويل جدا
حسام / تنامى ايه و يوم طويل ايه
ندى / الله انت مش قولت هتخرجنى اخص عليك بتعشمنى و تخلا بيا
حسام / مين ده ؟؟ انا !!! ابدا والله طب دا انتى بس تؤمرى كدا
ندى / بحسب والله كنت هزعل منك
حسام / و انا ما اقدرش على زعلك
حسام يشيل ندى و يدخل يحطها على السرير
ندى / حسام
حسام / ايه بقي
ندى / غيرت البامبرز لحبيبه بدل ما تصحى و تفضل تصرخ
حسام / ما هى نايمه نايمه
ندى / انت بتتخلق عليا ليه
حسام / ابدا يا حوبى و انا اقدر انا بس … جرا ايه يا نونو دا انا لحم و دم برده
ندى / ايه يعني اول مره تشوف واحده بترقص
حسام / و انتى اى واحده انتى مراتى حلالى و بحبك
ندى / امممم … انا والله مش معترضه بس هو
حسام / ايه ؟
ندى / بصراحه يا حسام انا بحاول بس بخاف
حسام / بتخافى من ايه بس يا بنتى ادى لنفسك فرصه بس و الله هغير رايك خالص
ندى / عشان خاطرى ما تضغطش عليا
حسام / لكن عادى انتى تضغطى عليا صح عادى تعدى و تدوسي ما فيش حاجه حصلت صح
ندى / انا اسفه
حسام يزعق
حسام / يعني ايه اسفه
جرس يضرب من اوضه مصطفى حسام يلم نفسه و يبص لندى و يسيب الاوضه و يمشي ندى تتنفس
………………
فى شقه على
عمر / انت عبيط صح ؟ بعد كل الفلوس دى
على / ما انت ما شوفتش بتبصلى ازاى
عمر / يا على يا على افهم احنا من الاول قولنالك ان ده هيحصل انت كدا بتخسر نور كمان
على / ما دا اللى تاعبنى نور نور كانت واقفه مش فاهمه اى حاجه
عمر / و ما ينفعش تفهم
على / هى ما لهاش ذنب فى كل ده
عمر / و لا حد فينا ليه ذنب و انت كدا كدا مش هتاذيها بالعكس انت
على / انا ضايع … انا … ضايع
عمر / تمام فسخنا الخطوبه و خرجت من حياه نور و ندى … ندى سافرت لبنان و انت هتقعد تعيطلى برده … اقولك تمام انت صح اتصل بنور بقي قولها انا هفسخ الخطوبه مش هقدر اكمل
على يبص لعمر
عمر / ما تكلمها و قولها
على يبص الناحيه التانيه
عمر / انت بتعمل فى نفسك كدا ليه دا جواز مش لعبه
على / مش عارف .. المشكله ان نور كويسه و بتفهمنى و بتحاول تقرب بكل الطرق بتستوعبنى و تريحنى بس نظره ندى بتدبحنى يا عمر
عمر / نفس النظره سواء اتجوزت نور او غيرها انت ليه من الاول اخترت نور
على / عشان ابقي جنب ندى
عمر / و وجودك جنب ندى تاعبك بس مش قادر تبعد … لا عن ندى و لا عن نور و سبحان الله الاتنين شبه بعض
على / و حبيبه
عمر / اهى دى بقي حكايه تانيه البت دى طلعت نزلت بنت حسام يعني انت تقدر توفرلها ايه
على / هى مش فارقه معاه بيستغلها بس عشان يربط ندى جنبه
عمر / بس طول ما ندى جنبه هو اب كويس جدا و زوج برده للاسف كويس جدا
على / ما بنى على باطل فهو باطل
عمر / بس فى طفل ما لوش ذنب
على / بالظبط حبيبه ما لهاش ذنب دا مش هيصونها مش هيعرف يربيها و لا يحافظ عليها
عمر / و انت كزوج امها طبعا هتقدر توفرلها اللى ابوها ما قدرش يوفره
على / انت معايا و لا معاه
عمر / معاك و لعلمك اللى بقوله ده انت شخصيا بتقوله جواك و ده اللى خلاك تجيلى انك عاوز تسمعه عاوز حد يقولك انك مش هتقدر تقدم لحبيبه اى حاجه و لا حتى لندى فابعد عن نور كمان بس انت مش هتقدر تبعد عن نور لان نور هى ااقشايه اللى بقيالك تربطك بندى و حبيبه
على يبص لعمر
عمر / قول لأية انك هتسيب نور هتزرغط مش بعيد تتحزم و تنزل ترقص زى الهبله فى الشوارع بس انا بقولك ان بغض النظر عن كل القرف ده و فعلا ما بنى على باطل فهو باطل نور بنت كويسه جدا و بتحبك جدا
على / يعني اعمل ايه
عمر / دى حياتك انت ما اقدرش اخد اى قرار مكانك و بعدين من فلاحتى جاى تسالنى انا يا عم وحد الله
على / هههههههههههه لا اله الا الله
عمر / بص هى القرارات دى ما ينفعش تتاخد على معده فاضيه انت تقوم تطلعلك حته كبده من الفريزر و تشوحهالنا و نتكلم بقي على رواقه ايه رايك
على / كبده ايه دلوقت انت كمان
عمر / تصدق معاك حق حموضه و قرف بيتهيالى عندى زبادى جوه
على / انا مش جعان انا همشي اكيد أية زهقت من القاعده لوحدها و مش عاوز اقيد حريتها
عمر / الشقه واسعه خليك ارتاح هنا النهرده و انا هروح ابص عليها
على يبص لعمر
عمر / ما تستهبلش انت اصلا مش عاوز تبقي لوحدك النهرده فما تتعبش قلبي فى مناهده بقي و اقعد اتحايل عليك دا بيتك خليك
على يبتسم و يبص فى الارض عمر يفتح الباب و يطلع يروح المطبخ يلاقي أية بتعمل ساندوتشات
عمر / هو انا بحبك من شويه
أية / احسن دلوقت
عمر / احنا جنبه اهو
أية تروح تصب شاى فى كبايات
أية / خليك جنبه النهرده و انا هدخل انام
عمر / ربنا ما يحرمنى منك
أية / و لا يحرمنى منك بس انت عارف ان ده الصح جوازه من نور مش هيحل حاجه
عمر / اوكر و لا ايه
أية / تصبح على خير
عمر يبتسم أية تسيب المطبخ و تمشي عمر يشيل الصينيه و يرجع لعلى
عمر / شوفت بقي أية بتعزك ازاى احلى عشا لا و ما صدقت خليك جنب اخوك و دخلت تنام خالص انا بقي بقول اجيب اللاب و اقطعك رايح جاى ايه رايك
على يبتسم عمر يحط الصينيه قدامه و يقعد و يطبطب على رجل اخوه
عمر / هتفرج ان شاء الله
…………………………….
فى شقه ندى
ندى تقوم بالراحه تتحرك فى الشقه تلاقي حسام نايم على الكنبه فى الصاله تقف بعيد تبص عليه يحس بيها
حسام / ناقصك حاجه و لا ايه
ندى / انت زعلان منى صح
حسام يقوم يقعد
حسام / فارق معاكى يعني
ندى / صدق او ما تصدقش فارق انا مش باقيلى غيرك
حسام يستاخر و يشاورلها تروح تقعد مكان ما كان قاعد تروح تقعد
ندى / انت فاكر الدنيا سهله انت مش حاسس بيا
حسام / خلاص يا ندى انا مش هطلب منك الموضوع ده تانى
ندى / و انا مش هرقصلك تانى
حسام / هو رقص بس وجودك جنبى مجرد انى اشوفك اشمك احس بيكي كفايا
ندى / و دى هعملك فيها ايه دى كمان
حسام / ما تعمليش انا غلطت زمان و ان شاء الله مع الوقت هقدر اتلافى الغلط ده
ندى / بفكر اروح لدكتور أية
حسام / لما نسافر هشوفلك حد هناك كويس هنا مش هينفع اصلا مش هنلحق تتابعى مع حد عشان السفر
ندى / تمام اللى تشوفه
حسام / خشي نامى و ارتاحى عشان بكره هاخدك نتفسح
ندى تهز راسها و تدخل جوه حسام ينام على الكنبه تانى و هو بيفكر
……………………….
فى شقه نور بعد فتره
نور بتعمل بروفا لفستان الفرح
نور / هو فعلا محتاج كورسيه عشان يظبط و لا ايه رايك يا نونو
ندى بتلعب فى الموبايل و مربعه على السرير و جنبها حبيبه نايمه
ندى / حلو
نور / جب بصي طيب قبل ما تقولى رايك
ندى تبصلها و ترجع تبص فى الموبايل
ندى / حلو
نور تروح تقعد جنب ندى
نور / مالك يا ندى
ندى / دى عاشر مره تقيسي الفستان من يوم ما اشتريتيه دا انتى هتقطعيه قبل الفرح من كتر القلع و اللبس
نور / مش لازم اتاكد ان كل حاجه تمام
ندى / امال لو كنتى هتعملى فرح يا بنتى كل حاجه سيمبل اهى اشمعن ده اللى انتى عوزاه بيرفكت و طرحه ايه و تاج ايه و شوز ايه
نور / خلاص خلاص انا غلطانه اصلا
ندى / لا ما انتش غلطانه و الفستان اقسم بالله ما محتاج كورسيه و طالعه مزه المزز اهدى بقي
نور / هديت هروح اغير
ندى / ياريت و انتى جايه تجيبى شنطه الماسكات اما نروش شويه
نور / تمام .. استنى شوفتى جبت ايه امبارح
ندى / ايه ؟
نور تجرى تفتح الدولاب و تطلع شنطه فيها بوكس جواه قميص نوم ابيض و تفرده قدام ندى
ندى / حلو اوى
نور / صح ؟ بسبعميه جنيه فى السايل
ندى / غالى اوى ليه يعني امال قبل السايل كان ايه
نور / يا بنتى حرام عليكي دا تحفه
ندى / و لو يعنى هى فلوس حرام … قولتى لعلى انك جيباله قميص نوم بالسعر ده هيقول عليكي سفيهه
نور / ههههههههههه ليه يعنى دا انا حتى هلبسهوله يعني
ندى / و انا مالى يعنى ما تلبسيه زى ما تلبسيه فى الاول و الاخر غالى و ما يستاهلش
نور / مش بقولك انتى مش فى المود النهرده ايه الفصلان ده بس تصدقى يا ندى الحق مش عليكي الحق عليا انا انى فكراكى اختى و هتفرحيلى
ندى / والله !! هى بقت كدا .. اعذريني انى بغير منك و مش قادره ادارى
ندى تشيل حبيبه و تيجي تقوم نور تمنعها
نور / فى ايه يا ندى
ندى / ما فيش غيرانه منك هطق
نور / بطلى رخامه بقي انتى عارفه انى ما اقصدش بس انتى حسام ما بيستخسرش فيكي يعني لو نفسك فى واحد زيه هيجبلك و هيجيبلك الاغلى كمان
ندى ما تقدرش تمسك دموعها
ندى / لا عاوزه اغلى و لا ارخص انا بس عوزاكوا تسيبونى فى حالى
نور / ندى ندى اهدى ليه كل ده انا مش فهماكى
ندى / نور انا اسفه الف مبروك والله الفستان جميل و القميص تحفه انا اللى وحشه وحشه اوى
نور تحضن ندى ندى تعيط و نور مش فاهمه حاجه ندى تبعدها عنها
ندى / هانت خلاص ادينا هنسافر اهو و نبعد عن كل ده
نور / خليكي هنا ثوانى و رجعالك
ندى / اتفضلي
نور تطلع بره و ندى قدامها قميص النوم تطبقه و تحطه فى العلبه و تقفلها و تروح تبص فى المرايه و تمسح دموعها
ندى / مش مكتوبلك
ندى تمسك قلم روج احمر فاقع و تحط
ندى / عشان حبيبه … عشان نور … و عشانى
ندى تمسك قلم كحل و تتكحل
نور تدخل
نور / بتعملى ايه يا بنتى امال الماسكات دى لزمتها ايه
ندى / هعمل شعرى كيرلى ايه رايك
نور / هيليق عليكي
ندى / احمر و لا اشقر
نور / ندى انتى بترضعى
ندى / اشقر الاحمر هيكبرنى
نور / اقعدى اما اظبطلك عينيكي ايديكي بترعش
ندى / ماشي
ندى تقعد و نور تزوقها
نور / زمان كان عندى صحبات بالهبل و قرايب و كدا الجواز خدنى منهم واحده ورا التانيه لما ما عادليش غيرك انت و اروى و طبعا هى ما بتردش على تليفوناتى حتى و دلوقت انتى مسافره لبنان و انا
ندى / انتى معاكى على
نور / و أية ما بتطيقنيش و هو نفسه على اقصد مش بيحب اقرب من أية اوى
ندى / لما نسافر انا و حسام الدنيا هتظبط ما تقلقيش
نور تلف راس ندى للمرايه
نور / انتى قمر حتى من غير كل ده … استنى هطلع المكوه اللفلك شعرك الكيرلى اللى انتى عوزاه
ندى / انا بحبك يا نور والله
نور / و انا كمان يا ندى بس برده ما فيش صبغه
ندى تضحك و تبص الناحيه التانيه
………………….
فى محل بدل
على بيقيس بدلته و مش مرتاح
عمر / حلوه والله و بعدين دى ساعتين زمن هتتصور و زفه عربيات و هتروح مش حوار هو
على / خنقانى
عمر / لتكون خايف من الجواز
على / خفه و لا ايه
عمر / بص الجواز ده زى الجزمه الجديده بتلمع و مغريه كدا بس اول ما تلبسها لازم تعورك شويه بس ما تقلقش بتريح بعد كدا فى الاستعمال
على يبص لعمر باستغراب و يرجع يبص لنفسه فى المرايه
على / تمام هاخدها و امرى لله اخبار أية ايه ؟
عمر / عندها فستان هتحضر بيه و دا طبعا بعد ما بوست ايديها و رجليها انها تتكرم و تحضر اصلا و هتيجي بس عشان انت ما تبقاش واقف لوحدك
على / اصيله
عمر يبتسم ويبص الناحيه التانيه على يتكلم بصوت واطى
على / نور بنت كويسه و بتحبنى
عمر يبصله و يبص فى الارض و يسكت
…………………..
فى شقه امانى
ندى قاعده بالعرض على كرسي و رجليها متعلقه على ايد الكرسي عماله تتصور سيلفى جرس الباب يضرب
ندى / افتحى يا نور
نور تطلع من جوه بتنشف ايدها بفوطه
نور / لا بجد لا تعليق يا ندى
نور تفتح تلاقى على شايل اكياس كتير تاخد منه
نور / ايه ده كلو هههههههههه تعال ادخل حماتك بتحبك
على / شوفى كدا فى حاجه ناقصه
نور / بعدين بعدين البانيه على النار ادخل
نور تجرى على المطبخ على يقف و يبص على ندى و هى بتتصور و كانه مش موجود
على / لايق عليكي
ندى تبصله و تتعدل بالراحه فى صمت
على / عامله ايه
ندى تفكر و تبص بعيد و ترجع تبصله على يقعد
على / ندى انا
ندى / جبت بدله الفرح؟ نور اشترتلك بجامه حرير نبيتي شكلها عبيط اوى ههههههههههههههه
على يبص الناحيه التانيه
ندى / ما تقولهاش انى حرقت المفاجاه تمام … هقوم ابص على حبيبه
ندى تقوم على يمسك ايدها تبصله
على / عوزانى اعمل ايه و انا اعمل
ندى / لو لفيت الدنيا مش هتلاقي احسن من نور احسن منى انا شخصيا شاطره فى كل حاجه و محترمه بتعرف ربنا طيبه و بتحبك خد انت بس بالك منها
نور تطلع شايله سرفيس عليه مكرونه
نور / هى ماما هتبات عند الترزى و لا ايه
ندى / ام العروسه بقي امال ايه … شوفت فستان بيبو جاااااامد
نور / ما تحرقيش المفاجاه بقي
ندى / سورى سورى هدخل ابص على بيبو و اهو ما ابقاش عازول بينكوا
نور / يا رخمه هههههههههههه
ندى تبص لعلى و تدخل الاوضه و تقفل الباب عليها
نور / هجيب البانيه و السلطه عشان نتعشي و هو سخن شكلهم مطولين بره
على / كلو انتوا انا تعبان طول النهار من اللف الحاجات دى اممم معظمها لبسي الجديد ااااااه ابقي حطيه فى الدولاب و شوفى لو حاجه ناقصه اجيبها و هبقى اللم هدومى فى شنطه بكره و اجيبها او يوم الحنه يعني ربنا يسهل و جبتلك حاجه حلوه انتى و الجماعه يعني
على يجي يمشي نور تمنعه
نور / طب على الاقل اتفرج على الحاجات اللى جبتهالك
على / ممكن بكره ؟ معلش يعني … والله تعبان ما قادر
نور / تمام يا حبيبي لو حبيت تكلمنى فى اى وقت
على يهز راسه و يمشي نور تدخل المطبخ ندى تفتح الباب و تبص من وراه
…………………….
قدام المحل يوم الحنه الصبح
على يدخل يركن العربيه يلاقى ناس بتعلق نور
على / احمد .. احمد
احمد يروح لعلى
احمد / اؤمر يا رياسه
على / هو فى ايه
احمد / جرا ايه يا رياسه انت مش عريس و لا ايه بنوجب معاك
على / يا ابنى
احمد / بقولك ايه يا رياسه دى ما كانتش عشره يوم و من حقنا نفرح بيك و انا والرجاله حالفين لنهيصلك و نخربها النهرده حتى لو زفه عربيات طب دا انا اجرت حته موتسيكل قسما بالله لنولعها
على / هههههههههه تسلم يا ابو حميد نردهالك ان شاء الله
احمد / قول يا رب لحسن الواحد تعب
على / ههههههههه طب ما تتجدعن مستنى ايه
احمد / مستنى بنت الحلال هتجوز نفسي يعني اهو اديني بدور
على / ان شاء الله ربنا يعترك فيها عن قريب بقولك ايه انا هطلع اللم باقي حاجتى من فوق و همشي ساعتين زمن و هرجع
احمد / مش عاوزك تشيل هم اى حاجه عيش و انبسط
على يخبط على كتف احمد و يطلع فوق
…………………..
فى شقه نور
ندى بتعدى ايدها على سرير حبيبه و تبصله نور تدخل
نور/ جبتك يا عبد المعين
ندى تبصلها
نور/ بصراحه عندك حق تحفه اوى صح
ندى تهز راسها
نور / هيصعب عليا انها مش هتنام فيه خالص
ندى / مش مكتوبلها … ما لهاش نصيب فيه هنعترض على اراده ربنا
نور / ان شاء الله تنزلوا اجازه قريب قبل ما تكبر عليه المهم انا خلصت هنا تعالى بقي ننزل نجهز قبل ما الناس تيجي
ندى / ناس مين
نور / ايه يا بنتى انتى ناسيه اننا مش عاملين فرح يعني اللى هيجامل هيجامل فى الحنه
ندى / صح صح
نور / يلا يلا لسه ورانا حاجات كتير اوى … اول عروسه فى التاريخ بتعمل كل حاجتها بايديها يلا
نور تمشي و ندى تبص على السرير بحزن و تمشي تعدى من على اوضه النوم و تقف نور ترجعلها
نور / بكره ابقي افرشها ماما و هى جايه هتعدى تجيب شويه شمع و ورد و بكره بقي ابقي ازوقها عشان ما تتبهدلش
ندى / عندك حق
ندى تمشي و نور وراها
…………………………
فى شقه تهانى
تهانى / يا ستى الف مبروك و ربنا يتملها بخير بس انا مش هقدر ادخل مكان بنت مها فيه
امانى / اقولك ايه بس على عيني والله اعمل ايه
تهانى / انتى ما لكيش ذنب صحيح يعملوها الصغار و يقعوا فيها الكبار
امانى / بس نور بنتك
تهانى/ خلاص بقي يا امانى قولتلك انا و بنت مها ما ينفعش نكون فى مكان و نور اختارت ندى يبقي ربنا يوفقها ان شاء الله لما تغور على لبنان هاجى انا و اروى نباركلها و ننقطها كمان عشان تعرفى ان ما فيش بيني و بين نور غير كل خير
امانى / والله هتجنن كان مستخبيلنا كل ده فين بس يا ربي
امانى تقوم
تهانى / على فين
امانى / ورايا هم ما يتلم ما انتى عارفه يلا فتك بعافيه
تهانى تقوم توصل امانى للباب
………………..
فى شقه ندى
حسام بيلبس و يسرح و يرش برفيوم قدام المرايه ندى تدخل
حسام / انتى لسه ما لبستيش الناس هتيجي
ندى / هلبس اهو
ندى تفرد نفسها على السرير حسام يبصلها
حسام / انا لبست عمى و ظبطه اخر حاجه هنزله تحت و اطلع اللبس حبيبه و ارضعها اجهزى انتى براحتك و ما تشغليش بالك باى حاجه عاوزك قمر
ندى باصه للسقف و ساكته حسام ينام جنبها و يلعب فى شعرها
حسام / انتى كدا كدا قمر اصلا حتى لو حضرتى بالبجامه
حسام يحاول يبوسها تقوم تفتح الدولاب و تطلع فستان سيمبل و تبدا تبص فى المرايه و تعدل شعرها حسام يقوم يبوس راسها و يطلع بره ترمى الفرشه على التسريحه و تقوم تدخل الحمام
………………..
فى الشارع
عربيه على تركن و ينزل على و عمر و أية و منال الشباب يتلموا حوالين على و يشيلوه وسط الزحمه و منال بتضحك تاخد أية و يطلعوا فوق و عمر واقف قدام البوابه حسام يروح يناوله ازازه حاجه ساقعه
حسام / ايه يا عم التأخير دا كلو دا انا قولت هتخلعوا اشرب ساقع
عمر / كنت هتنبسط لو خلع
حسام / سرااااب وجوده بالنسبالى زى عدمه عن اذنك
حسام يمشي و عمر متابعه بغل
عمر / ليك يوم يا ابن الكلب ليك يوم
………………
فى شقه نور
الشقه مليانه ستات و بنات و نور قاعده و ندى مش موجوده أية و منال يدخلوا نور تقوم تسلم و امانى تقوم تسلم
نور / اتاخرتوا كدا ليه
أية / ندى فين
منال / معلش والله على ما عدى علينا و على عمر و كدا و الطريق انتى عارفه
أية / ندى فين
امانى / فى الاوضه جوه بترضع حبيبه
أية / عن اذنكوا
أية تروح ناحيه الاوضه
امانى / و هى مش هاين عليها تبارك للعروسه و لا شغل السلايف هيبتدى بدرى
منال / دى غلبانه والله و ما ليها فى حاجه
امانى / والله اخص عليكى يا حجه طب دا انتى تعرفى نور من قبل أية بكتير يعني المفروض تقفى فى صف نور مش أية
نور / مش وقته يا ماما الناس
منال / انا هكلم ايه متاكده انها ما تقصدش خليكي مع ضيوفك يا بنتى
منال تروح الاوضه ورا أية تدخل و تقفل الباب تلاقي حبيبه نايمه على السرير و ندى و أية قاعدين قدام بعض
منال / ليه كدا يا أية مش تباركى لنور … ازيك يا ندى
ندى / الحمد لله تمام
منال / قومى اقعدوا مع الناس بره و بلاش الحركات دى نور ما لهاش ذنب فى كل اللى بيحصل و على كمان لو بتحبوه افرحوله مش هتبقوا انتوا و الدنيا عليه
منال تطلع بره و هى بتزرغط
أية / فكراها سهله ما الدنيا كلها علينا كان حد حس بينا
ندى / بس هى معاها حق
ندى تقوم تحط حبيبه فى كاريكوت
أية / انتى رايحه فين
ندى / مش هينفع ادارى هنا اكتر من كدا هطلع اقوم بالواجب و ارقص العروسه اختى برده
أية / انتوا عاوزين تجننونى
ندى / ايه اللى جابك ؟ فاكره انى هبوظ الفرح مثلا و لا هقعد انا و انتى زى عوازل الفرح نبصلهم بغل و نمصمص شفايفنا
أية تبص لندى
ندى / هو اختارها و هى طيبه و تساهله يبقي نفرحلهم
أية / بس هو ما اخترهاش على بيحبك انتى
ندى / انتى بجد لسه مصدقه ؟ انا مرحله فى حياته و عدت دلوقت وقت نور … مراته
ندى تفتح الباب و تطلع بره و أية واقفه مضايقه
…………………
فى الشارع
على راكب حصان و الشباب بيرقصوه و هو عمال يضحك
على / يا جدعان كفايا هو مفيش غيرى فى الحنه و لا ايه
احمد / يا عم عيب عليك دا العروسه بتتفرج
على يبص لفوق يلاقي نور و البنات ملمومين حواليها نور تشاورله يشاورلها و ينزل و احمد يركب على يروح ناحيه عمر واقف فى جنب الفراشه معمول اوضه فيها ترابيزه كبيره و الناس بتاكل و عمر واقف على بابها
على / ايه الاخبار نبعت نجيب كمان و لا ايه
عمر / ما يتهياليش الاكل كتير و هيفيض كمان
حسام يدخل
حسام / عشر وجبات فوق بسرعه
عمر / و انت اتشليت ما تدخل تاخدهم
حسام يبص لعمر و بعدين يبص لعلى
حسام / هخليها عليا المرادى … عشان خاطر العرسان بس
حسام يدخل
على / مالك
عمر / مش طايقه … تصدق انى
حسام يطلع من جوه شايل ١٠ اكياس كل كيس فيه علبه و يعدى يطلع فوق
على / كمل
عمر / مش عارف احط اى حاجه فى بقي هنا
على / ما تافورش
عمر / يا عم اقسم بالله ادانى الساقع كبيته
على / لا اله الا الله طب استنى هنا
على جوه و ينادى على واحد من الشباب
على / بلال … بلبل
بلال يجي
بلال / اؤمر يا رياسه
على / ازازتين ساقع من التلاجه بسرعه يا ابنى الواحد ريقه ناشف
بلال / طب مش تاكل الاول يا رياسه
على / لا خليني انا للاخر لما الناس كلها تاكل خد عمر معاك و اظبطلى الاداء
عمر يبص لعلى
على / هروح ابص على الرجاله ليكون سقطنا حد ما اكلش و لا حاجه
بلال / ما تقلقش يا رياسه كلو تحت السيطره
على / حبيبي
على يخبط على كتف عمر يزقه على جوه و عمر بيبصله بلال يفتح اكياس و يرص على الترابيزه
………………….
فى شقه امانى
ندى متحزمه و بترقص و أية قاعده هتطق توطى على منال
أية / دا اكيد ساقيها حاجه
منال / ششششش
أية / يعني دى تصرفات واحده طبيعيه
منال / يعني اللى بتعمليه انتى اللى طبيعي مالك يا أية
أية / هموت اقسم بالله … هى مش صعبانه عليكي
منال / اتكلمنا مليون مره فى الموضوع ده اهدى بقي
أية / سكت سكت
امانى تروح تقعد جنب أية
امانى / جرا ايه يا يويو هتفضلي قاعده كدا مش تقومى ترقصي مع سلفتك
أية / ما بعرفش ارقص معلش
امانى / هو فى حد الزمن ده ما بيعرفش يرقص
أية / انا معلش
ندى تروح تقعد
ندى / تعبت اوى اوى مش قادره
امانى / اقعدى يا اختى جنب صحبتك هروح انا اهيص للعروسه
امانى تمشي أية تشد ندى عليها
أية / هو ساقيكي حاجه و لا ايه قوليلى والله افضحه واطربق الفرح على دماغهم
ندى / شششششش بس يا مجنونه ساقيني حاجه ايه هو انتى مش هتكبرى و تعقلى بقي
منال / ربنا يكملك بعقلك يا ندى يا بنتى
أية / يعني انتى فرحانه بجد
ندى / رايي و احساسي مش مهم انا شخصيا مش مهمه بس الناس دى كلها بتدور على حاجه يرغوا فيها و انا ما عنديش استعداد اكون انا حدوته الفرح
منال / و تكونى انتى ليه ما أية قايمه بالواجب هتطق فى فرح سلفتها
ندى / هى مش خطوبتها كانت معاكى فى فرحك و كنتى هاديه و انا رقصت يوميها برده عادى و انتى كمان رقصتي ايه اللى جد دلوقت … بت بت ما ترديش و لا تجادلى لا وقته و لا مكانه يومين نستحملهم بالطول و لا بالعرض و حسام ده مش هتشوفى وشه تانى
أية / و انتى
ندى / انا كفيله بنفسي فكيها كدا و بلاش الوش ده ما حدش هنا فاهم و لا هيفهم
أية / ما يخصونيش
ندى / نور تخصنى و على يخصك فكيها عشانهم
منال / معاها حق
ندى / انا هقوم اجبلكوا حاجه تشربوها
ندى تقوم تدخل المطبخ تلاقي امانى بتفتح ساقع و ترص على صينيه
امانى / شايفه يا اختى مجايبك
ندى / مجايبي انا !! ليه انا ما عزمتش حد خالص بتتكلمى عن مين ؟
امانى / عن غراب البين صحبتك ست أية ايه مش شايفه بوزها الممدود شبرين قدامها
ندى / ندى قبل ما تكون صحبتى هى قريبه على جوز بنتك و لا انا كمان الى عرفت على عليكوا و لا انتى ما اتعرفتيش على اهل علي قبل ما توافقوا على الجوازه
امانى / النصيب بقي لازم يطلعلنا فى كل خرابه عفريت
ندى / بس العفريت المرادى شديد عليكي على روحه فى اخوه
امانى / بتتكلمى بثقه اوى كانك تعرفيه
ندى / من كلام بنتك عنه تعرفى انه كتب لعمر شئ و شويات دا حتى اتنازله عن كل ميراثه من ابوه الله يرحمه البيت و المحل و اتكفل بكل مصاريفه حتى الفرح و شهر العسل و لحد دلوقت عمر يشاور و على ينفذ
امانى / عشان كان عازب موراهوش مسؤليات انما دلوقت الوضع اتغير
ندى / هنشوف
ندى تشيل الصينيه و تطلع بره
امانى / هنشوف يا اختى … هنشوف
………………….
فى شقه ندى
ندى تدخل شايله حبيبه و حسام بيزق كرسي مصطفى
ندى / انا تعبت موت بجد هموت و انام
ندى تاخد حبيبه الاوضه و حسام ياخد مصطفى اوضته و يغيرله هدومه و ينيمه على السرير
حسام / ناقصك اى حاجه يا عمى
مصطفى يهز راسه لا
حسام / تصبح على خير
حسام يروح اوضته يلاقي ندى نايمه بهدومها و حبيبه صاحيه
حسام / و انتى ايه اللى مصحيكي ايه سهرتنا مطوله و لا ايه
حسام يغير هدومه حبيبه تزمزق
حسام / حاضر والله حاضر بغير بس
حسام ياخد حبيبه و يطلعوا بره ندى تقوم تقعد تبص عليه و تاخد نفس و تنفخ و ترجع تنام تانى
………………….
فى شقه عمر
عمر / هههههههههههههههههههه ما كنتى جبتيها من شعرها بالمره
على / انا بس نفسي افهم نور عملتلك ايه
أية / ما عملتش انا متعصبه لصاحبتى يا اخى اللى المفروض يكون بيترقصلها ندى مش نور
على / ما ليش نصيب فيها يا أية
أية / بالسرعه دى فقدت الامل نور قدرت تنسيك ندى بالسرعه دى
على / ما نسيتهاش بس مش من حقى افكر فيها هى فى عصمه راجل تانى
أية / انا داخله انام البيت بيتكوا … النقاب خنقنى
عمر / النقاب برده ههههههههههههههه
أية تبصله عمر و على بيضحكوا أية تدخل جوه و هى بتضرب كف على كف
عمر / بتقولى ندى كانت بترقص زى اللى عاملين دماغ
على / كلنا رقصنا يلا يلا انا هدخل انام دا لو ما عندكش مانع
عمر / نهائي خد راحتك انا شخصيا هتكفى على السرير فسيخه
على يبتسم و يدخل الاوضه الصغيره و عمر يدخل اوضه أية تبصله
عمر / عشان خاطر على
أية / اكتر من كدا ايه
عمر / هانت خلاص
أية / انا تعبانه و مصدعه و هنام
عمر / تصبحى على خير
عمر يبوس راسها و ينام جنبها
…………………..
فى اوضه ندى
حسام يدخل لوحده ندى نايمه يروح يفتح الدولاب و يطلع بجامه ليها و يروح جنبها بالراحه و يفتح سوسته الفستان ندى تقوم تقف بعيد ضهرها للدولاب
ندى / فى ايه ؟
حسام / هتنامى بهدومك
ندى / تقوم تخضنى كدا يا حسام … حرام عليك والله
حسام / ايه يا نونو ما حصلش حاجه لكل ده
ندى / انا داخله الحمام
حسام / حمام ايه دلوقت يا ندى هو فى ايه
ندى / اعملها على نفسي يعني عشان تنبسط و لا لبسني بامبرز احسن
حسام / انا اسف ما قصدتش
ندى / انا رايحه الحمام
ندى تشد البجامه و تدخل الحمام و تقفل الباب بالمفتاح و تقف تبص لنفسها فى المرايه و هى مخنوقه
……………….
فى اوضه نور
نور بتتكلم فى التليفون
نور / لا على فكره انا فهماها جدا و مقدره موقفها جدا
على / الحمد لله
نور / بس هى لازم تتعلم تفصل بيني و بين حسام
على / بكره تكبر وتفهم … المهم انك مش زعلانه
نور / نهائي بالعكس اليوم كان جميل جدا بس انا هعمل ايه فى الاكل الباقى ده كله
على / يا ستى بكره ما حدش هيبقي فاضي يعمل اكل ينفعوا
نور / انت اتعشيت
على / على اخرى مفيش مكان لبق ميه
نور / الحمد لله بص انا مش عاوزه اقفل بس انا لازم انام عشان الصور بكره و كمان هصحى بدرى فى حاجات كتير اعملها عروسه بقي و كدا ههههههههههه
على / تمام … تصبحى على خير
نور / و انت من اهله يا حبيبي سلام
على يقفل و يحط الموبايل جنبه و يبتسم و ينام
………………..
فى شقه حسام
حسام قاعد على السرير بيشرب قهوه يحط الفنجان على الكومدينو و ينفخ و يقوم يخبط على الحمام ندى تفتح حاطه ماسك على وشها و لافه شعرها بفوطه
حسام / انتى بتعملى ايه كل ده
ندى / فى ايه يا حسام بظبط شويه حاجات عشان الفرح بكره
حسام يبتسم
حسام / ماشي يا ندى بس يا ترى بكره هتبقي حجتك ايه
ندى / مش فاهمه تقصد ايه
ندى تروح تغسل وشها
حسام / على العموم انا شربتلك فنجان قهوه مخصوص فخدى راحتك على الاخر انا مش مستعجل خدى … راحتك … على الاخر
حسام يسيبها و يمشي يروح اوضته تروح وراه
ندى / اؤمر يا حسام تقصد ايه بكلامك ده
حسام يبصلها و يبتسم
حسام / انما للصبر حدود يا ندى
ندى / معاك من الدوا اللى كنت بتديهونى ؟؟ المنوم اقصد
حسام / ندى
ندى / اديهون انا بقولك اديهونى لانى جربت كل الطرق و ما نفعش
حسام / ليه ما انا من حقى اعرف انا قصرت فى ايه
ندى / انت بجد بتسال السؤال ده
حسام / اه بسال عاوز افهم فين المشكله دا انتى عايشه ملكه دا انا طافح الدم عشان ارضيكي طبخ و ترويق دا انا حتى حبيبه برضعها و اغيرلها و انتى كلمه حلوه حتى مستخسره فيا
ندى / لو على الكلام فانا مش مقصره المشكله انى مش قادره ادى اكتر منه
حسام / و العمل ؟؟
ندى / انا مسمحاك اديني المنوم و انا راضيه
حسام / انا مش راضي انتى فكرانى ايه انا كنت بعمل كدا غصب عنى عشان اوصلك انا عاوز احس بحبك يا ندى
ندى / مش قادره مش قادره اعمل ايه يعني مش قادره
ندى تعيط
ندى / بمجرد ما بحس انك .. الدنيا بتسود فى عيني روحى بتروح … عاوزنى اقولك ايه .. مش قادره انسي مش قادره اعيش بالطريقه دى بقولك اديني فرصه اصبر عليا خدنى بالراحه
حسام / اكتر من كدا ايه
ندى / انا قدامك يا حسام اعمل اللى انت عاوزه
حسام / انا بقي اللى مش عاوزك انا مش هتحايل عليكي اكتر من كدا بكره انتى اللى هتجيلى لما تشوفيه نايم مع غيرك لما تسمعى ضحكهم لما تلاقي عايش حياته و ناسيكي انتى اللى هتجيلى
ندى / اطلع بره
حسام / هتجيلى
ندى تصرخ
ندى / بقولك اطلع بره اطلع اطلع
ندى تزق حسام بره و ترزع الباب وراه
……………………
تانى يوم فى اوضه مصطفى
ندى بتلبس مصطفى الجرافاته حسام يدخل و يقف على الباب ندى تبصله و تروح تجيب فرشه الشعر و تسرح لباباها
ندى / قمر يا بابا قمر هروح بقي اللبس حبيبه
حسام / لبستها
ندى / هروح اشوف
ندى تيجي تعدى يوقفها
حسام / النهرده فرح ماشي ؟
ندى / انا لا لبست و لا جهزت
حسام / الكوافيره تحت اللبسي الفستان و انزلى و سيبى الباقي عليا
ندى / عشان ترجع تعايرنى تانى
حسام / ندى
ندى / هروح اللبس
ندى تدخل الاوضه التانيه و تقفل الباب حسام يبص لمصطفى
حسام / حطيت صوابعى منها فى الشق اعملها ايه اكتر من كدا عشان اعجب انا بدأت احس ان كل ما بدلعها بتتمرع جبت اخرى بقولك طهقت
مصطفى يبص الناحيه التانيه
حسام / انا بكلمك ليه صحيح دا ايه التخلف اللى انا فيه ده
حسام يسيب الاوضه و يمشي مصطفى يتف وراه
…………………….
قدام البيت
عربيات كتير و موتوسيكلات و الشباب متجمعين حوالين على بيضحكوا و يهزروا و هو واضح عليه التوتر
احمد / دا انا هطلع عينكوا
بلال / ان عرفت تمشيها اساسا دا هيغرقك ده يا رياسه اشترى منى
احمد / كدا طب ابقي تعال متاخر و انت تشوف هيبقوا ٣ اسابيع سواد
على / هو اسبوع واحد
شاب ١ / انت مش مسافر
على / ايوه ما هو اسبوع السفر انما قبل كدا هبقي متابع معاكوا و بروح و باجى عليكوا
الكل يضحك بسخسخه
على / و انا قولت حاجه غلط و لا ايه
شاب ٢ / لا ابدا نبقي نتكلم فى الحوار ده لما نبقي نشوفك ما تقول حاجه يا عمر
عمر / حاجه
بلال / ايه يا ابو عمو مالك
عمر / العروسه نزلت الحمد لله نكمل الحفله
منال تطلع من البيت و وراها امانى بيزغرطوا و نور و حواليها بنات و فى الاخر ندى على واقف مكانه و نور و ندى بيبصوله عمر يزغده
عمر / روح هات عاروستك
على يبص لعمر و يبص على ندى و نور
حسام / يلا يا جماعه هنتاخر
نور و امانى يروحوا ناحيه على عينه على حسام بيمسك ايد ندى و يركبها عربيته قدام و منال تركب معاها ورا
نور / ايه رايك
على / حلوه اوى ما شاء الله
نور / طب ايه ؟
على / ايه ؟
نور / فين البوكيه هههههههه
على / اه اسف
على يمد ايده من الشباك و يطلعلها البوكيه تمسكه و هى مبسوطه يفتحلها الباب يركبها و يجرى يركب الناحيه التانيه و عمر يركب مكان السواق امانى تلف تلاقي أية راكبه جنب عمر تستغرب على يطلع راسه من الشباك
على / لو تحبى تركبى جنبنا ورا
امانى / لا انا بطمن بس ان الكل ركب هركب مع حسام
امانى تجرى ناحيه عربيه حسام و تفتح باب ندى ندى تبتسم و تنزل تركب ورا جنب منال امانى تركب و الزفه تتحرك
امانى / نعدى النهرده بس و افوقلها
حسام / مين دى
امانى / ست زفته اللى فاكره انه فرح ابوها
ندى / قصدك أية ؟
امانى تبص قدامها و تسكت
ندى / كان نفسي اشوف هتقدرى تعملى معاها ايه بس للاسف مسافره
منال / ندى
ندى / سورى يا طنط
امانى / سبيها تتكلم العيب مش عليها العيب على البيه
حسام / مش قولتى هتعدى الليله
امانى / عشان خاطر اختك الغلبانه بس و بعدين على راي ال… كلها كام يوم و نخلص نستحملهم بالطول و لا بالعرض
حسام / عين العقل يا ست الكل
امانى / ما هو اللى بيشيل قربه مخرومه
حسام يضحك و يبص الناحيه التانيه
امانى / الصبر من عندك يارب
ندى تضحك بصوت عالى مستفز منال تغمزها تحط ايدها على بقها و تبص لحسام فى المرايه متابعها و مبتسم تغمزله بعينها امانى تنفخ
……………………….
فى الاستوديو
على و نور جوه و الباب مقفول و الدنيا زحمه حسام يروح ناحيه ندى
حسام / نونو نونو
ندى تقوم و تروحله
حسام / انا قطعتلنا كارتين بعديهم ايه رايك
ندى / فكره حلوه حتى بيبو تتصور بفستانها و كدا
حسام / انا بصالحك على فكره
ندى / مش زعلانه على فكره
حسام / بجد
ندى / مش وقته و لا مكانه
حسام / انا بحبك
ندى تبتسم و تبص حواليها باب الاوضه يتفتح و على و نور يطلعوا
حسام / احنا لينا كارتين
حسام يروح يشيل حبيبه و يمسك ايد ندى و يدخلوا و نور واقفه على الباب
حسام / هاخدك معانا الكارت الجاى استنى ما تمشيش
نور تبتسم و ندى تقعد على كرسي و حبيبه على رجلها و حسام موطى عليهم و واخدهم فى حضنه الراجل يصور
حسام / زود زود كارتين كمان
الراجل يهز راسه ندى تقوم من الكرسي و حسام يشيل حبيبيه و هى تقف قدامه و حبيبه منهم
حسام / تعالى يا نور
نور تدخل و تقف قدام ندى و حسام قاعد على الكرسي و حبيبه على رجله على يبص عليهم ندى تبص على على
الراجل / بصيلى هنا يا مدام
ندى تنتبه و تبص للراجل حسام يبصلها و يبص لعلى على الباب و يبص للراجل و ياخدوا الصوره
حسام / هطلع احاسب على الكارتين الزياده … خد بقي صوره للقمرات سوا
حسام يطلع بره و ندى شايله حبيبه نور تقف قدامها و ياخدوا الصوره
الراجل / حاجه كمان
على / انا كمان عاوز كارتين … عمر .. تعال انت و أية
على يدخل و يبص لندى
على / بعد اذنك
ندى تديله حبيبه يقعد بيها على كرسي و نور واقفه حاطه ايدها على كتفه عمر و أية يدخلوا
على / تعالوا الناحيه التانيه
عمر و أية يروحوا يقفوا ندى تيجي تمشي
على / استنى اتصورى معانا
ندى / ما افتكرش ليا مكان
نور / ايه الكلام ده تعالى يا بنتى
ندى و على بيبصوا لبعض
أية / يلا يا ندى
ندى تروح تقف جنب نور الراجل يصور
على / تعالى يا ندى مكانى
ندى تقعد مكان على و تشيل حبيبه و على يقف وراها و نور تسند على كتفه بدلع ندى بتبص عليهم حسام يدخل
حسام / وانا و انا
حسام يروح يزق على من ورا ندى و يقف هو مبتسم و يحط ايديه الاتنين على كتفها الكل مضايق ما عدا نور و حسام
الراجل / الضحكه الحلوه
ابتسامه خفيفه تظهر
الراجل / الف مبروك
على / حاسب على الكارتين يا عمر على ما الناس تركب
عمر يهز راسه و يطلع بره
حسام / كانت فكره جامده منك دى … عجبتنى
حسام يشيل حبيبه و يانج ندى بايده التانيه و يمشوا و ندى بتبص وراها على على نور تشاورلها باى و هى مبتسمه ندى تبتسم و تبص قدامها و على عينه على ندى
نور / كانت فكره حلوه اوى بجد انبسط بيها جدا
على يبصلها و يبتسم
على / اهم حاجه
نور تهز راسها و هى مبسوطه اوى
………………
فى شقه نور
امانى تدخل و هى بتزرغط و على و نور وراها و حسام
حسام / طب ايه يا ماما مش يلا بقي و لا ايه
امانى / صينيه العشا على السفره لو احتاجتوا اى حاجه
حسام / مش هيحتاجوا يلا بقي
امانى / خد بالك منها يا على
على / فى عنيا ما تقلقيش عليها
امانى تحضن نور و تبوسها و تنزل هى و حسام على يقفل الباب وراهم و يبص نور واقفه مبتسمه
على / مبروك
نور / مبروك
على / تحبى تدخلى تغيرى و لا المفروض اشيلك لجوه
نور / هههههههههههههههههه
على / مخيب للامال صح
نور / تحب تتعشي
على يبص على الصينيه و يضحك
على / عمر مره قالى انا هتجوز مخصوص عشان صينيه الديك الرومى دى
نور تروح تكشف الصينيه
على / مين هياكل كل ده
نور / انا هدخل اغير الفستان
نور تدخل الاوضه و على متابعها يروح يغطى الاكل و يقلع جاكت البدله و يبدا يفك الزراير
…………..
فى شقه ندى
حسام يدخل يلاقى ندى بتنيم مصطفى فى سريره يساعدها
حسام / كنت متخيل هلاقيكي نايمه بهدومك
ندى تبصله يروح يجيب بجامه مصطفى و يساعدها تلبسهاله
حسام / امال بيبو فين
ندى / فى اوضتنا نايمه ارجوك ما تصحيهاش
حسام / و انا كنت جيت جنبها … صحيح جبتلك بره نص صينيه العشا اللى كانت عند ماما تحت
ندى / انا مش جعانه
حسام / يمكن عمى يحب يتعشا
ندى تبص لابوها يهز راسه لا ندى تعدله و تطلع بره حسام يروح وراها ندى تدخل المطبخ و تفتح شنطه حبيبه تطلع الببرونات تغسلها حسام يحضنها من ضهرها
حسام / انتى لسه زعلانه منى
ندى / لا
حسام / امال مالك
ندى / ما ليش بغسل الببرونات قبل ما حبيبه تصحى كلها وسخه زى ما انت شايف
حسام يعلق على الكاتل
صوت ضحك من فوق حسام يبتسم و عينه على ندى اللى اتخشبت
حسام / هروح اغير هدومى
حسام يطلع بره و يبص عليها من بعيد الدموع تنزل من عين ندى صوت الضحك يتكرر ندى تقعد فى الارض و تغطى ودانها بايديها و تعيط حسام يدخل
حسام / جايلك ايه من دا كله دا ما يستاهلش دا جه سكن فوقيكي عشان تسمعى و تشوفيه بعينيكي و هو هايص مع غيرك فوقى بقي لنفسك و بيتك و جوزك
ندى تبصله بغل
ندى / و انت يعني اللى تستاهل ما انت السبب فى كل ده
حسام / ليه و انا اللى قولتلك اتعلقي بواحد بايعك عيطي يا ندى عيطي جامد و هو فوق و لا انتى فارقه معاه … بيضحك و عايش عادى جدا مع عروسته .. اطلعى بكره لنور و اطمنى عليها و شوفى هتقولك ايه … سكتوا يا ندى
حسام يشاور على شباك المطبخ و ندى بتبصله و هى منهاره من العياط
حسام / صوتهم راح دخل معاها الاوضه و هينام معاها على نفس السرير
ندى / انت ازاى حقير كدا
حسام / و انتى ايه هاه ؟ و لا فاكره ان صبرى عليكي و سكوتى خلاكى بقيتي على حق مجرد تفكيرك فيه خيانه ليا جوزك و لو هو كلمك يبقي بيخون نور اللى بتعتبرك اختها يعني مش بس بتخونى جوزك دا انتى بتخونى اختك كمان
ندى تقوم تقف
ندى / انا مش هرد عليك انا حتى مش هقعد معاك فى مكتن واحد
ندى تطلع بره المطبخ و تروح الاوضه و حسام وراها
حسام / قالها نفس الكلام اللى قالهولك و فسحها فى نفس الاماكن اللى فسحك فيها كتبلها الشقه و اشترالها دهب قدملها اضعاف اللى قدمهولك
ندى / اطلع بره
حسام / حتى سرير حبيبه اللى كان عامله عشانك اداهولها
ندى تبصله حسام يبتسم
حسام / ما دام بصيتي كدا يبقي انا عندى حق … انا اللى بحبك
ندى / و انا بكرهك
حسام الابتسامه تروح من وشه و ندى وصلت للانهيار
ندى / انت اللى ما استحملتش تشوفنا سوا انت اللى فرقت بينا و حرمتنى منه
حسام يمسكها من شعرها
حسام / انا جوزك
ندى / مغتصب و قاتل و حقير
حسام / ما حدش بيغتصب مراته دا حقى و هاخده بالزوق بالعافيه هاخده
حسام يزق ندى على السرير تبصله و تتف عليه يضربها بالقلم شفتها تجيب دم
ندى / اضرب كمان يمكن تحس انك راجل
حسام يمسكها من رقبتها و هى نايمه على السرير
حسام / حسي انتى مره من نفسك حسي
ندى / الميتين ما بيحسوش و طول ما انا معاك بموت كل يوم مليون مره
حسام / و هو كان هيحيكي
ندى / بص فى وش اختك و انت تعرف بص كانت ازاى و بقت ازاى بصلى كنت ازاى و بقيت
حسام يخنقها تبدا تزرق يسيبها يقوم يقف و يديها ضهره و هو بيحاول يمسك اعصابه و هى تقعد و هى عماله تكح
ندى / دا اروى نفسها خدت بالها قد ايه وشي بينور و انا معاه
حسام يلف و يديها بضهر ايده قلم تتنطر على الارض شفتها تتفتح من الناحيه التانيه مصطفى يضرب الجرس جامد حسام واقف ندى تسند على الكومدينو و تقوم تمسح الدم بايدها و ابوها لسه عمال يضرب الجرس
حسام / بعد كل الل عملته عشانك
ندى / ما شوفتش منك غير الدم
حسام يلف و يبصلها و النار قادت جواه مش قادر يتحكم فيها
حسام / ما دام ده ردك على كل اللى عملته معاكى يبقي تشوفى الدم بقي عشان تعرفى الفرق
حسام يجيب ندى من شعرها فى الارض و ينزل فيها ضرب و هى بتصرخ و مصطفى يضرب الجرس و حبيبه تصحى تصرخ
حسام / دلعى فيكي خلاكى تفتكرى ان ما ليش وش تانى خلاكى تسوقى فيها
……………………
فى شقه نور
على بيلبس هدومه و بيجرى نور تجرى وراه و تقف قدام الباب قبل ما يفتح الباب
على / اوعى من وشي
نور / بابا هيدخل بابا دلوقت هتلاقيه بيخبط عليه
على / يعني استنى اما تموت فى ايده على ما باباكى يدخل انتى مش سامعه
نور / سامعه والله بس انت ما ينفعش تدخل انت ما لكش دعوه
على / دى لو كلبه فى الشارع بتصرخ بالمنظر ده هجرى عليها اوعى
على يزق نور و يفتح الباب وينزل يلاقي محمد بيخبط على الباب
محمد / افتح يا حسام بدل ما اكسر الباب افتح … على !! ايه اللى نزلك
صوت صريخ ندى يختفى و يفضل صوت صريخ حبيبه
محمد / اطلع لعروستك يا على و انا هدخله
على / ما فتحش
محمد / سكتت
على / ما يمكن جرالها حاجه سكوتها لوحده مرعب
على بيرزع على الباب مفيش حد يفتح على يبص لمحمد و يخبط الباب بكتفه محمد يخبطه معاه
لحد ما يتفتح و يدخلوا
…………………….
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية سلف ودين)
