رواية سلف ودين الفصل الثاني والسبعون 72 بقلم لولو محمد
رواية سلف ودين الجزء الثاني والسبعون
رواية سلف ودين البارت الثاني والسبعون
رواية سلف ودين الحلقة الثانية والسبعون
الحلقه الرابعه و ثلاثون
فى شقه اسكندريه
حسام و محمد بيسندوا مصطفى يقعدوه و ندى وراهم شايله حبيبه
ندى / طلعوه على فوق احسن
محمد / اخد نفسي يا ندى طيب دا لسه فى هم تحت عاوزين ننزل نطلعه
حسام / خليك انت يا بابا ارتاح وانا هنزل اجيب الحاجه
امانى / ما لقيتش يعني عماره فيها اسانسير
حسام / والله دوخت يا ماما بس ما كانوش واسعين كدا و لا الفيو ده
ليلى / حقه يا حسام منظر البحر يرد الروح انا جيت اسكندريه كتير بس اول مره اخد اول نمره من البحر كدا
حسام / الحمد لله انها عجبتكوا هنزل اجيب الشنط و الكرسي
ندى / هاجى اساعدك
حسام / خليكي مرتاحه
ندى تقف و تبصله و بعدين تبصلهم
ندى / هستاذنكوا الحمام
ندى تدخل جوه
امانى / هو انتوا متخانقين
أية / لا ليه
امانى / الا ما سلمت عليكي … و لا صحيح هى سلمت على حد فينا من الكبار لما هتسلم على الصغيره
محمد / البت كانت على سفر سبيها تدخل الحمام اتاريها يا قلبي مستعجله تطلع فوق محرجه تقول مزنوقه قدامنا
امانى / لا يا شيخ
منال / وارد جدا على فكره و ما تنسيش انها صغيره يعني
امانى / دافعوا عنها امرعوها اكتر ما هى ممروعه الا حتى ما سلمت على نور اللى جايه من السعوديه
حسام يدخل شايل شنطتين كبار
حسام / لا هاخد نفسي بقي و بعدين انزل اجيب الكرسي
امانى / ايه الشنط دى كلها
حسام / هدوم ندى و عمى و حبيبه و كام غيار ليا و كام فوطه على ملايه اصلي بصراحه يعني بقرف بحب اخد ملاياتى و فوطى معايا
امانى / حسام حبيبي من يومه محنتف
حسام / مالك يا نونو معلش يا قلبي ما سلمتش عدل ما حسبتش خالص حساب السلم واللى انا فيه ده و انا باجر الشقق معلش
نور / حبيبي و لا يهمك … هقوم اطمن على ندى طولت فى الحمام
حسام / لا هقوم انا كمان بصراحه محتاج الحمام يعني دى حاجه ما فيهاش كسوف يعني هههههههههههههههههه
حسام يروح يخبط على الحمام
حسام / ندى … ندى
ندى تفتح الباب
حسام / فى حاجه ؟
ندى / عاوزه اطلع فوق
حسام / روحى اقعدى و سلمى و انا خمس دقايق هدخل الحمام و انزل اجيب الكرسي و نطلع تمام ؟
ندى تهز راسها و تطلع
ندى / ارجوك خلينا نطلع انا مش لابسه بامبرز رميته فى اخر استراحه خفت يبان تحت الهدوم
حسام / اهدى اهدى انتى لسه عامله حمام اهو ما تشربيش حاجه خمس دقايق و هنطلع
ندى تهز راسها
حسام / نهدى تمام
ندى تهز راسها و تعدى تطلع بره تسلم على نور و أية بالحضن
ندى / معلش الطريق بقي
نور / تعالى اقعدى
أية / ندى انتى كويسه
ندى ترتبك و تبص على هدومها و تحاول تمسك نفسها
ندى / اه … مالى
أية / ما فيش
حسام يطلع من الحمام
حسام / هنزل اجيب الكرسي و نطلع عمى فوق يرتاح و يفرد ضهره و انزلكوا بقي نشوف هنعمل ايه النهرده
محمد / يا ابنى خليك على زمانه جاى بالاكل تاكلوا لقمه و نطلع كلنا نرتاح شويه و لما نصحى بالليل نخرج
حسام / طب ايه يا عمى مش عاوز تدخل الحمام
مصطفى يهز راسه
حسام / هنزل اجيب الكرسي ادخلك الحمام
ندى تقوم تقف
ندى / اجى معاك
حسام / مش هتاخر يعني ههههههههه اقعدى
حسام يمشي و ندى تقعد و الكل بيبصلها باستغراب و هى بتبصلهم بخوف و توتر
نور / اما انا جبت لحبيبه شويه فساتين هيعجبوها اوى و لو حاجه طلعت صغيره تبقي رزق بيرين بقي مع انى والله جبتلها حاجات جميله اوى برده
أية / انتى كويسه يا ندى
ندى تبص لأية و تقوم تجرى على الحمام
امانى / دا ايه الجنان ده
نور تبص لأية و تقوم ورا ندى
………………..
فى الشارع
على يركن العربيه و ينزل هو و عمر و يشيلوا كل واحد كيسين كبار
حسام / اوعى الروايح … حمد الله على السلامه
على / الله يسلمك اتأخرتوا كدا ليه
حسام / الطريق بقي و كدا بس احنا هنا من فتره بس كنت بريح من تطليع الشنط و نزلت اخد الكرسي لعمى بقي عشان يتحرك و يروح الحمام و كدا
على / اساعدك فى حاجه
حسام / لا كفايا شيلتك انا هطلع وراك بالكرسي
على و عمر يطلعوا و حسام وراهم
حسام / احنا ناكل لقمه و نريح و بعدين ننزل بالليل نخربها
عمر / قدم المشيئه بس
حسام / انت صفيت محلك اللى هنا صح
عمر / لا مفتوح بس بروح و اجى عليه كل فتره
حسام/ كويس نعدى بقي نجيب موبايل جديد بقي لندى
عمر / باذن الله
التلاته يدخلوا الشقه فى الوقت اللى نور و ندى خارجين فيه للصاله ندى تشوف حسام جنبه على تفضل تبص عليهم و تعملها على نفسها و الكل عينه عليها
امانى / يا نهار اسود
حسام يروح يحوط على ندى و يسحبها فوق و الكل مصدوم نور تطلع تجرى وراها و على يجي يطلع عمر يمسك ايده على يبصله عمر يهز راسه لا على يروح يحط الاكياس اللى فى ايده على السفره و ينزل عمر يسيب الاكياس فى الارض و يمشي وراه
أية / انا كان قلبي حاسس اقسم بالله قلبي كان حاسس قولتلك يا طنط قولتلك مش طبيعيه يا طنط لا صوتها طبيعي و لا اختفائها طبيعي
امانى / يلا دى دعوتى عليها اخيرا ربنا استجاب
محمد / حرف كمان يا امانى انا مش هبيتك هنا .. لا .. انا مش هبيتك على زمتى
امانى / بتقول ايه يا محمد … اللى سمعتيه
محمد يجى يطلع ورا حسام
امانى / عاوز تطلقنى عشان ام شخه بنت اخوك
محمد يرجع لأمانى
محمد / لا مش عاوز انتى طالق يا امانى مبسوطه طالق
امانى / فى ستين داهيه تاخدك
محمد يطلع فوق و امانى تيجي تطلع منال تجرى وراها تمنعها
منال / اهدى بس يا امانى مش وقتك دلوقت الدنيا والعه خلقه
امانى / ما تولع بجاز و لا تتنيل بستين نيله هو فى ايه هو بعد العمر دا كله هتهان وسط الناس و اسكت
أية تسيبهم و تطلع فوق
ليلى / اهدى بس يا ست امانى هو الراجل زعلان و انتى برده ما تعرفيش الموضوع وراه ايه
امانى / يا اختى و انتى شوفتى اللى شوفته من الحربايه دى و امها
منال / الست ميته بقي ما تغلطيش كمان فى الاموات
ليلى / راعوا حتى الراجل المريض اللى قاعد وسطينا مش قادر يرد ده
امانى تبص لمصطفى
امانى / خدتوا الواد و ميلتوا بخته و نحستوه ربنا ينتقم منكوا
امانى تشد شنطتها و تنزل منال تيجي تجرى وراها ليلى تمنعها
ليلى / سبيها دى مش عارفه بتقول ايه و كل ما بتكلميها بتغلط زياده
منال / انا هطلع ابص على الغلبانه اللى فوق
ليلى / هتسبيني مع الراجل لوحدى
منال / ادخلى اقعدى مع العيال جوه اما نشوف اليوم ده هيخلص ازاى
ليلى / انا كان ايه اللى جابنى بس ما كنت قاعده مرتاحه
منال تبصلها و تطلع تلاقيهم بيتخانقوا
حسام / و انا كنت اعرف انه هيجيبلها حساسيه و يورمها بالمنظر ده
محمد / و احنا كنا فين فى كل ده
حسام/ هى ما كانتش عايزه حد يشوفها بالمنظر ده خصوصا ماما ما حضرتك عارف انها مش هتسكت
محمد / طب دا ايه علاقته باللى حصل تحت
حسام / دا رد فعل طبيعي للعلاج امال الميه دى كلها هتروح فين يعني
محمد / انا مش فاهم اى حاجه من اللى بتقوله ده انا هاخد البنت دى و نروح نكشف عليها
حسام / هو انا يعني هقصر مع مراتى لا اله الا الله
منال / اسفه على المقاطعه بس ندى فين
حسام / فى الحمام جوه مع نور و ندى
منال / على فكره يا استاذ محمد مدام امانى نزلت خدت شنطه ايدها و نزلت
محمد / كلم امك و اتعامل معاها انا طلقتها
حسام / اية !!!
محمد / اللى سمعته انا جبت اخرى خلاص
حسام / هو فى ايه يا بابا دا وقته يعنى
محمد/ انزل معايا نطلع عمك و روح دور على امك و اطمن عليها لحد ما اكلم ندى و اشوفلها دكتور يشوفها
حسام / اعمل اللى يريحك ما دام ما حدش بيسمع كلامى انا مش هتكلم خالص عن اذنكوا
حسام ينزل محمد ينزل وراه
محمد / حسام
حسام يبص
محمد/ ساعدنى نطلع عمك الاول
حسام يهز راسه و يدخل مع محمد الشقه
………………………
على البحر
على رايح جاى و عمر عمال يقلب فى الموبايل
عمر / نقص هرمون الايه دى اتش السكر كميه كبيره من الكافيين المخدرات الحبوب المنومة اللتهابات او مشاكل فى المثانه امساك امراض البروستاتا لا دى بنت يا عم فى قدامى اسباب كتير جدا ممكن تكون سببت اللى حصل
على / انت هتجننى يا عمر لبنت فى سنها
عمر / ما هو اذا عرف السبب بطل العجب و يا خبر بفلوس عشر دقايق و يبقي ببلاش
على / انا بس عايز افهم انت برودك ده جبته منين
عمر / ما جبتوش اكتسبته من كل القرف اللى شوفته فى حياتى و خصوصا الفتره اللى فاتت خلانى لازم ابقي هادى و ما اخدش اى رد فعل على الاقل يا سيدى ما اديش فرصه لحد انه لا يمسك عليا غلطه و لا ياخد موقفى حجه انه يقلب الدفه و يغير الموضوع
على / انا قولتلك مش هيسكت اكيد عمل فيها حاجه
عمر / هيعمل حاجه بعد الموقف بشهرين كاملين و ازيد فى ايه يا على دا حتى مش منطقى خالص
على / لا منطقى كل حاجه تطلع من حسام اتوقع منه اى حاجه
عمر / طب تمام نتعلم منه بقي نتعلم منه الراجل ما خدش رد فعل وقتى و خطط و تكتك واستنى اللحظه الصح و اتصرف اهو نتعلم منه بقي مره يمكن نقدر نجيب حقنا منه مره الراجل دحلاب و ما حدش بيقدر يمسك عليه غلطه ما تتهورش انت بقي و تركب نفسك الغلط
على / انت ليه مش حاسس بيا
عمر / والله حاسس بيك و عشان اثبتلك هكلم أية دلوقت و اطمن منها على ندى و اعرف منها اللى حصل ده سببه ايه
عمر يطلع الموبايل و يتصل و على متابع باهتمام
…………………
فى اوضه ندى
ندى نايمه فى السرير فى وضع الجنين بتعيط فى حضن نور و أية جنبها و منال قاعده تحت رجليها
نور / يا قلبي انتى مكبره الموضوع ليه انا قعدت كام شهر بعمل على نفسي طب والله على اشترالى خمس بناطيل بيت ابدا فيهم على اللى عندى من كتر ما كنت مش ملاحقه اغسل وانشر
محمد يدخل
محمد / قومى يا ندى نروح نشوف دكتور يكتبلك علاج مناسب
ندى / سيبونى لوحدى لو سمحتوا
محمد / قومى يا ندى
ندى / مش عاوزه دكاتره و لا عاوزه اروح مستشفيات انا ماكنتش عاوزه اجى هنا اصلا ارجوكوا سيبونى فى حالى سيبونى لوحدى
حسام يدخل
حسام / ممكن تنزلوا تحت يا بنات
أية / لا مش ممكن و مش هنسيبها لوحدها الا اما نطمن عليها
تليفون أية يرن
حسام / جوزك ده صح روحى ردى عليه يلا يلا ردى
أية تبص لحسام و تكنسل و تقعد جنب ندى و تبصله يضرب كف على كف
حسام / قومى يا ندى نروح المستشفي قومى هو يوم باين من اوله
أية تبصله
حسام / كلمى امك يا نور يمكن ترضي ترد عليكي انتى
نور / ليه ماما مالها
حسام يبص لمحمد
حسام / ابوكى طلقها
نور / أية
أية تزرغط الكل يبصلها و منال تقوم تشدها و نور تروح لابوها و ندى فى السرير فى النص بين الناحيتين بيتخانقوا
منال / قومى قدامى قومى
نور / الكلام ده بجد يا بابا
أية / اقوم اروح فين انا مش هتحرك من هنا
محمد / انا تعبت بتتخانق على كل صغيره و كبيرهو مفيش ذره دم نقطه احساس عماله تضغطنى تضغطنى تضغطنى
منال / اتلمى يا أية ما تزوديش الطين بله و بصي حواليكي
نور / بس مش لدرجه الطلاق يعني
أية / انتى مش عارفه اللى فيها يعني
محمد / كنتى عوزانى اعمل ايه يعني
ندى تصرخ
ندى / ممكن تطلعوا كلكوا بره ممكن تتخانقوا بره ممكن تسيبونى ارتاح ممكن تسيبونى فى حالى بره اطلعوا بره بره
حسام /اهدى يا ندى لو سمحتى اهدى اهدى
حسام يحضن ندى تفضل تعيط نور تلف و تروحلها تحط ايدها عليها
نور / ندى
ندى / ابعدوا عنى سيبونى فى حالى سيبونى فى حالى ابعدوا و سيبونى اعيش فى حالى انا عمرى ما اذيتكوا عمرى ما اذيت حد سيبونى اعيش
أية / ندى احنا بس عاوزين نطمن عليكي
حسام / ممكن لو سمحتوا تسيبوها ترتاح من السفر شويه و تهدى و تنزلوا تحت شويه و هى لما تهدى هننزل و نعملكوا كل اللى انتوا عاوزينه ممكن ؟
الكل يبص لبعضه و ندى بتعيط على اخرها
منال / احنا تحت يا ندى
ندى / انا عاوزه ارجع بيتي يا حسام انا مش عاوزه اقعد هنا
حسام / حاضر يا ندى اهدى بس اهدى … والله ما بنطلب معجزه سيبوها شويه تهدى مش كدا
منال / اطلعوا بره يلا تعالوا اما ننزل نبص على العيال حتى زمانهم تعبوا الست ليلى تحت
منال تشد نور و أية بره و الكل يطلع حسام يقوم يقفل الباب و ندى ما بتفصلش عياط حسام يرجع ياخدها فى حضنه
حسام / انا لميت الموضوع و قولتلهم انك اخدتى دوا عملك حساسيه و اخدتى علاج للحساسيه و لازيكس عشان ينزل الميه فدا اللى عمل معاكى كدا
ندى / انا عاوزه ارجع بيتي ابوس ايدك انا مش قادره ابصلهم حتى ما تحطنيش معاهم فى مكان واحد ابوس ايدك اديني حبايه و لا اتنين و لا اديني العلبها كلها انا تعبانه انا تعبانه اوى
حسام / العلبه كلها ايه هى نص حبايه بس تنامى شويه لحد ما نحل اللخبطه اللى بره دى و هبقي اديكي مهدئ عشان تقدرى تتعاملى معاهم
ندى / انا مش عاوزه اتعامل معاهم انا مش عاوزه اخرج من اوضتى دى و ما تخليهمش يدخلولى انا مش عاوزه اشوفهم و لا يشوفونى ابوس ايدك يا حسام ابوس ايدك ما تخليهمش يشوفونى
حسام يجيب كبايه ميه و يطلع علبه من جيبه و يدى لندى نص حبايه
ندى / ابعدهم عنى
حسام / اشربى و نامى شويه ارتاحى و لما تصحى ان شاء الله كل حاجه هتتحل
ندى تبصله و تاخد الحبايه و تبلعها بالميه و تنام و يقعد يلعبلها فى شعرها لحد ما تنام يغطيها و يطلع يقفل الباب عليها و يطلع بره يلاقي محمد قاعد جنب مصطفى
محمد / عامله ايه
حسام / اديتها منوم هتنام و لما تصحى نبقي نوديها للدكتور و لا شوفوا انتوا عاوزين تعملوا ايه
حسام يرمى نفسه على الكرسي جنب ابوه
حسام / انا تعبت انا عملت كل اللى اقدر عليه و ما عدتش قادر اعيش فى المورستان ده
محمد / ايه اللى حصل يا حسام اللى بيحصل للبنت دى مش طبيعي
حسام / اللى بيحصلها وارد يحصل لاى حد خدت دوا ليه اثار جانبيه و بنعالجها و التوتر و الارهاق اللى عاشته
محمد / طب ارهاق و ماشي جايين من سفر طويل مع انها مسافه كام ساعه مش جايين من المريخ يعني انما توتر ليه بقي
حسام / ما هى خايفه يا بابا خايفه ان اللى حصل ده يحصل ندى بقالها كام يوم على الوضع ده
محمد / و احنا فين من كل ده
حسام/ مش المفروض لما مراتى تتعب بحاجه مش عاوزه حد يعرفها انى اروح اللف على اهلى نفر نفر و افضحها يعني انا اصلا غلطت لما جبتها انا كنت اعتزرت لحد ما الموضوع خلص انا اللى غلطت لما خفت تسالوا ليه مش هنيجي و تعرفوا اديكوا عرفتوا برده بس بطريقه زى الزفت و ادى حضرتك و ماما ما شاء الله على التوقيت يعني حاجه اخر حلاوه بصراحه
محمد / كدا كدا كان هيحصل
حسام / تقوم تعملها هنا و قدام الناس تقدر تقولى هنلم الليله دى ازاى
محمد / ان شالله عنها ما اتلمت ان شالله عنها ما اتلمت يا اخى انا اللى يهمنى دلوقت البت اللى جوه دى
حسام / اللى جوه دى مراتى و ام بنتى و ما حدش فى الدنيا هيحبها و لا هيخاف عليها قدى وانا مش مقصر فمن فضلك ما تزايدش عليا
محمد / انت بتقول ايه يا بتاع انت
على يدخل
حسام / اهلا
على / عاوزك
حسام / مش قادرلك انزل كلك لقمه و لما نفض الهم اللى احنا فيه نبقي نشوف اللى حضرتك عاوزه لان مستحيل يكون اهم من اللى احنا فيه
على / مامتك تحت كانت قاعده على كافيه جنبنا انزل هديها بكلمتين
حسام يبص لمحمد
محمد / انا الموضوع بالنسبالى انتهى ما تبصليش
حسام / يا بابا بنتك راجعه من السفر اللى بعتناها ليه عشان اعصابها تهدى و تعدى حزنها بسبب اللى حصل تقوم حضرتك تنكد عليها يوم رجوعها
محمد/ انا حياتى مع امك جحيم و كل يوم بيزيد
حسام / يعني العشره دى كلها مش فاكرلها فيهم حاجه واحده تشفعلها
على يروح يقعد حسام يبصله
على / امك هايجه فى الكل تحت و انا مش قادرلها بصراحه
حسام / نعم يعني اؤمر
على / هى امى و لا امك انا مش ملزم استحمل اى كلمه من حد اى كان
حسام يبص لعلى من فوق لتحت
حسام / على الاقل هديه قوله كلمتين على ما ارجع
على / ان شاء الله
حسام يكتم جوه و يقوم يقف على باب الشقه
حسام / نسيت الموبايل جوه
حسام يدخل يفتح الباب ياخد المفتاح و يقفل الباب بالمفتاح و يحط المفتاح فى جيبه و ينزل على يبص لمصطفى باصص فى الارض و بيعيط يطلع موبايله على نوته و يروح جنب مصطفى و يحطه فى ايده
محمد / فى حاجه و لا ايه
على / نور و عمى وانا و عمر جنبك و اللى جوه دى بنتك الوحيده اللى طلعت بيها من الدنيا ساعدنا نساعدها
مصطفى باصص فى الارض
على / مش قادر تتكلم اكتب دافع عنها باى طريقه قولنا نعمل ايه و احنا نعمل
مصطفى يحط الموبايل على الترابيزه و يحرك الكرسي ناحيه جوه
محمد / لو حسام بيكدب يا مصطفى قول لو فى حاجه نقدر نساعد بيها ندى قول يا مصطفى
مصطفى يلف بالكرسي و يبص لمحمد و يبتسم بسخريه و يدخل يحاول يفتح الباب ما بيتفتحش يفضل يخبط مفيش اى رد فعل يرزع مفيش اى رد فعل على و محمد يدخلوا و مصطفى لسه بيرزع
محمد / ندى ندى افتحى يا بنتى … ندى
على يبص من الخرم
على / المفتاح مش فى الباب
على يجيب مفتاح اوضه تانيه و يزق كرسي مصطفى بعيد و يحاول يفتح ما بيفتحش يخبط تانى مفيش اى صوت حسام يطلع و معاه عمر و نور وراهم
حسام / بتعملوا ايه ندى واخده منوم و المفتاح معايا
محمد / منوم !!
حسام/ ايوه ندى بتاخد منوم فيها حاجه دى
عمر يبص لعلى
عمر / انا لسه قاريها المنوم ممكن هو اللى ماثر على الحمام انا لسه قريهالك يا على … بقالها قد ايه بتاخده
حسام / و انت بقي بقيت دكتور و انا ما اعرفش
نور / هى اصلا بتاخد منوم من امتى
حسام / من زمان لما بتتعب مش بتعرف تنام و هى بتفكر كتير فبتاخد منوم .. و على فكره امن و مفعوله قصير يعني تلت اربع ساعات و هتصحى ممكن نهدى بقي انا عارف انا بديها ايه كويس دا شغلى على فكره
عمر / ايوه بس انا لسه قارى دلوقت
حسام / قريت فين فى جوجل هنعالج امراضنا دلوقت بجوجل كل واحد قراله معلومه هيجي يتنطت علينا
على / ما لو صح توقف الزفت ده و خلاص بتكابر ليه
حسام / يا سيدى بناقصه هو انا اللى بديهولها هى اللى بتطلبه
نور / و هى تعرف اضراره منين بس
حسام / امان يا ستى هو انا هديها حاجه تضرها لا اله الا الله
محمد / طب و فيها ايه لو روحنا نشوف دكتور و اطمنا
نور / لو سمحت يا بابا عشان خاطرى
محمد / لو هتكلميني فى موضوع امك
نور / عشان خاطرى
محمد / يا نور انا
نور / اديها فرصه اخيره راضيها لحد ما نرجع مصر و نطمن على ندى احنا مش هنفضل ما بينكوا و بين ندى خلينا نحل مشكله منهم و نركز فى التانيه ارجوك
حسام / انزل راضيها يا بابا و ردها و نبقي نعمل قاعده لما نرجع مصر و نشوف عاوزين ايه دا لا مكانه و لا زمانه
محمد / انا لو نزلتلها دلوقت و ادتنى كلمتنين من بتوعها
نور / ساعتها يبقالك الكلام و حقك و اعمل اللى يعجبك .. ما تقول حاجه يا على
على / انا خارج عن اذنكوا … معلش يا عمر تجيب لعمى اكله من تحت و تاكله اكيد جعان … زمان الاكل برد اصلا
حسام / يعجبنى فيك انك فى وادى تانى خالص
على / يعجبنى فيك انك تخربها و تعمل من بنها
على يسيب المكان و يمشي
حسام / اقسم بالله ما حد حايشني عنه غيرك
عمر / انا نازل اجيب لعمى ياكل و هستاذنكوا اطلع انا و الجماعه ناكل هنا هنسيبلكوا الشقه تحت تاخدوا راحتكوا لحد ما تحلوا الموضوع
حسام / طب ما تنزلوا تحت و احنا نطلع نحله هنا عادى و ما تخافش عليه دا عمى و انا طول الفتره اللى فاتت واخد بالى منه كويس مش هتيجي انت دلوقت اللى تشيله عنى كام ساعه و تزايد عليا يعني
عمر / لا فعلا ما لكش حل بجد
نور / معلش يا عمر عشان خاطرى والله انا ما هاكل الا اما اكله
عمر / ماشي يا نور ماشي
عمر ينزل
حسام/ تعالى ننزل احنا كمان نحاول نطلع ماما باى شكل و لو سمحت يا بابا ارجوك
محمد يزق مصطفى فى اوضه من الاوض و يرجعلهم
محمد / المرادى هعمل حساب لكل الظروف اللى حوالينا بس تعملوا حسابكوا تفهموا امكوا ان الكيل طفح انا ما عدتش قادر اتحمل و انتوا الحمد لله كبرتوا و كل واحد فيكوا يقدر يعلى نفسه و حكايه عشان العيال اللى ضغط على نفسي سنين بسببها نا عادلهاش لزمه فاهمين
نور / فاهمين هنتكلم معاها بس دلوقت راضيها بكلمتين انا هنزل اجيبها مع انى افضل حضرتك تنزل تناديها ما تطلقهاش قدام الناس و تردها بينكوا و بين بعض
محمد يبص لحسام
حسام / عشان خاطرنا بقي لم الدور دى كانت لحظه شيطان يعني و حضرتك الكبير
محمد يتنهد و ينزل نور تبص لحسام مبتسمه و ينزلوا وراه مصطفى يطلع من الاوضه و يخبط على ندى و هو بيعيط
……………………
فى اوضه تحت
عمر و أية و ليلى فارشين فى الارض و العيال حواليهم بياكلوهم
ليلى / و احنا ينفع ناكل لوحدنا كدا
عمر / لو استنيناهم مش هناكل
ليلى / طب و على يا قلبي دا لسه واصل من السفر
عمر / سالته قال مش جعان قاعد فى البلكونه و اكيد هياكل مع نور يعني
أية / بصراحه انا نفسي مفتوحه اوى للاكل مع ان ندى صعبانه عليا اوى
ليلى / هو ايه حكايتها صحيح ايه اللى حصل ده
عمر / بتاخد ادويه ليها اثار جانبيه شديده و طبعا الحاله النفسيه زى الزفت
أية / دا غير ان جوزها حيوان يعنى
ليلى تسيب اللقمه و عمر يبص لأية
أية / نور مش زيه بس هو زى امه عجينه مطينه بطين
عمر / مش هناكل و لا ايه
أية / سكت
ليلى / على كمان مش بيحبه علاطول بحس بكدا
أية / و ما بتحسيش باى حاجه تانيه
ليلى / زى ايه
أية / بسال عادى ما اقصدش حاجه
عمر / خد يا يس فصصتلك الحته دى … اكلى نغم يا أية و حاسبي السفا
أية / حاضر
عمر يبص لليلى تتنهد و تاكل
………………….
فى الصاله
امانى / و لا تكلمنى و لا لسانك يخاطب لسانى
حسام / بابا نازلك لحد عندك بقي يا ماما و الترضيه اللى تعوزيها
منال / و بعدين دى كانت لحظه شيطان و عدت
امانى / لو سمحتى يا ست منال انا بحبك
منال / ما هو انا بتكلم عشان عارفه انك بتحبيني عشان خاطر نور طيب البت ما ارتاحتش من السفر و لا غيرت هدومها
امانى / ما البركه فى ام
نور / ماما … ندى عيانه و انتى ست العارفين من عاب ابتلى
امانى / بعد الشر عنى انتى هتفولى عليا و لا ايه
حسام / يعني حبيبه دى ما لهاش خاطر عندك يا ستى انا ما ليش حبيبه كمان ما لهاش نور مالهاش
امانى / شيفاكوا كلكوا محموقينله اوى الا ما فتح بقه و قال حرف
محمد / انا نازل عشان خاطرهم
الكل يبص لمحمد بصدمه
محمد / انا عملت لولادى خاطر
امانى / و انا ما يرضينيش تتغصب على حاجه يا سي محمد بناقص و اقولك حاجه انا مش هنكد على نفسي و على عيالي بالعكس هحتفل بخلاصي منك و هنبسط و اتفسح و لا هعبرك
محمد / تبقي جدعه
نور / انت بتقول ايه بس يا بابا
محمد / بقول انى جعان شوفيلى طبقين اطلع اكل مع اخويا بلا هم عمالين يراضوا فيكى بقالهم فوق الساعه و انتى مرسومه على ايه مش فاهم انا
امانى / ما دا عيبك و انت من امتى كنت بتفهم
٩حسام / معاكى حق فى دى بقي معاكى حق و هو انا لو كنت بفهم كنت اتجوزت واحده بلسانك ده
على يطلع من البلكونه و يعديهم و يجي ينزل
نور / استنى يا على انا جايه معاك
نور تبصلهم و تمشي مع على
محمد / وليه نكديه بوز اخص
امانى / احترم نفسك
حسام / ما خلاص بقي خلاص طفشتوا البت و فرجتوا علينا الناس هو فى ايه ما ترحنونا و تحسوا بينا كل واحد فيه اللى مكفيه مش كدا
امانى / انا طالعه اوضتى ابقي نام جنب اخوك فى الصاله
محمد / احسن بلا هم
امانى تطلع فوق و محمد يروح يفتح الاكياس و يغرف طبق كبير
محمد / وليه تسد النفس و تحرق الدم
حسام / ينفع كدا يعني
محمد / ما اسمعش حسك انت كمان و لعلمك البت الغلبانه اللى فوق دى لما تفوق هاخدها المستشفي و اطمن عليها
حسام / خلصت على ماما و فضيتلى يعني و ماله نروح المستشفي مش فاهم هخاف من ايه يعني
محمد يبص لحسام و ياخد الطبق و يوصل للباب و يبصله
محمد / ابقي اغرف طبق عدل لامك و اكلها
حسام / الله طب ما دام انت حنين كدا ما تاخدهلها انت
محمد / تفهم ايه انت فى العشره صحيح
محمد يطلع يلاقي مصطفى قاعد قدام باب اوضه ندى و امانى فى اوضه تانيه اقفله عليها الباب محمد يروح يحط الطبق بره و يدخل ياخد اخوه
محمد / ما تقلقش عليها اول ما تصحي هاخدها المستشفي و اطمن عليها بنفسي تعال كلك لقمه بدل حرقه الدم دى
محمد يقعد و يفصص الاكل و ياكل مع اخوه
………………..
على الكورنيش
نور بتعيط و بتمسح دموعها بمنديل
على / من زمان لما اتخنق اجى اقعد و أتأمل فى ابداع ربنا و اقول اللى ممشي الجمال ده كله بالتناسق ده شروق و غروب مع البحر مع الطيور و السحاب بالشكل الجامد ده مش هيظبطلى حياتى يعني اكيد هيظبطها ان شاء الله
نور / انا دعيتلهم كتير و انا هناك دعيت ان ربنا يعملنا اللى فيه الخير
على / ما يمكن ده خير بالنسبه لباباكى انا و انتى عارفين ان امك صعبه برده
نور / امى غلبانه يتيمه و ما لهاش حد كانت صاحبه عمتى و ابويا حبها و اتجوزوا ما لهاش حد ينصرها و لا تروحله فى وقت زعلها بق على الفاضي زى ما بيقولوا
على / دى مين دى
نور / امى يا على امى
على / واضح انه اكيد ده مش الوقت المناسب اللى اقولك فيه مامتك بتعمل ايه بما انك مش شايفه
نور / لا شايفه و عارفه ان ماما صعبه و بتقول كلام كتير ممكن يجرح بس هى بتخاف علينا و تحبنا
على / و اولاد الناس ايه وضعهم ما لهمش حد يخاف عليهم و يحبهم و لا هو الضعيف لما يلاقى الاضعف منه بدل ما يتسندوا على بعض يدوس على الاضعف منه يمكن يحس بقوته
نور تبص لعلى
على / حماه هنقول حماه و امى ايه وضعها
نور / بتراعيني اوى يعني ما بتقوليش كلمه كدا و لا كدا يا على
على / كام مره فى كام موقف شوفى دى كام كلمه فى الموقف الواحد حتى فى غيابها انتى متخيله لما امى تشوفها بتعامل مرات ابنها و حفيدتها كدا بتبصلى ازاى بتتوقعى منى ادافع عنك لو قالتلك كلمه ازاى
نور / بس بتحبك
على / ما اعتقدرش كنت شايفه فى كلامها قبل الجواز بس بعد الجواز بقي ما كنتش على هواها
نور / يعني نرميها فى الشارع يعني
على / مش انا اللى اعمل كدا فى ام اللى فتحت بيتها لامى و جابتها من الشارع مش انا
نور / انا تعبت اوى تعبت
على / تعالى نتمشي شويه و ناكل ايسكريم عزه و لا نشوف اى حاجه ناكلها انا جعان يا خساره الفلوس اللى ادفعت فى الاكله دى دا انا لو بشتغل شهر مش هيدخلى المبلغ اللى اترمى فى الارض ده
نور تبصله
على / مش خساره فيكي قومى انا و انتى نشوفلنا حته حلوه ناكل فيها لحد ما الجو يهدى نروح
نور / تفتكر المنوم اللى ندى وخداه هيروح امتى و تفوق
على / انتى بجد مقتنعه ان اللى حصل لندى بسبب المنوم
نور / هنكشف و نشوف مش هنسكت يعني
على يهز راسه
نور / فى حاجه يا على انت شاكك فى حاجه
على / كانت زى الفل و احنا مسافرين و فجاه يختفوا هم الاتنين و فجاه يظهروا ندى نايمه طول الوقت و زى الشبح ما حدش شافها نهائي و لا سمع حسها و فجاه اللى حصل النهرده
نور / نظريه المؤامره بقي و حسام اخويا تانى خلصنا من ماما و دخلنا فى اخويا دور بابا هيجي امتى
على / ابوكى اطيب راجل قابلته فى حياتى زيك بالظبط
نور / و انا هروح مع اطيب راجل ده نطمن على ندى و مش هنسيبها الا اما تبقي زى الفل ما تخافش ما حدش هيحب اختى و يخاف عليها اكتر منى بس انا هتصرف بهدوء مش اهم حاجه عندى ان أثبت ان حسام وحش و خلاص
على / انا اسف
نور / بعد ايه بقي بعد ما حرقت دمى و كملت عليا انت كمان اعزمنى بقي على حاجه حلوه تصالحنى بيها
على / ههههههههههههه بس كدا تؤمرى اتفضلى
…………………
فى المستشفي
ندى قاعده جنبها نور و حسام و محمد و على واقفين بعيد
نور / هو طبيعي التحاليل تتاخر كدا
حسام / مش شايف انها اتاخرت و لا حاجه يعني اهدى و بعدين اديكي شايفه المكان زحمه ازاى
نور / ايه تفتكر المفروض كنا روحنا مكان تانى
حسام / لو مستعجله تقدرى تمشي
ممرضه تخرج
الممرضه / ندى زغلول
حسام يروح ياخد ظرف و يفتحه يبص فيه على يروح يبص معاه
حسام / اتفضل يا دكتور على بيه اتفضل شخص الحاله
على / اوعى تبلع ريقك بس لتموت مسموم و لا حاجه دا ايه ده
محمد / خلاص يا رجاله ما يصحش كدا فيها ايه التحاليل دى يا حسام
حسام / الحمد لله زى الفل هروح اديها للدكتور و ارجعلكوا
على / هنيجي معاك
حسام يبص لعلى
حسام / اتفضلوا
الكل يتحرك و ندى باصه فى الارض و نور بتحركها
……………….
فى العياده
الدكتور / هو انا الحقيقه مش شايف اى سبب عضوى للى بيحصل
نور / و لا حتى المنوم اللى بتاخده
الدكتور / النوع و الجرعه … هى بتاخد معاه اي ادويه تانيه
الكل يبص لحسام
حسام / بتاخد مهدئ
نور / أية
حسام / احنا كنا عايششين فى لبنان و نونتنا اتخطفت منها و هى حاولت تنتحر لما حست اننا ممكن نكون خسرناها و كدا
الدكتور / الكلام ده بقاله قد ايه
حسام / فتره طويله حوالى سنه
الدكتور / و هى بتاخد المهدئ و المنوم من سنه بنفس الجرعه الدكتور ما غيرش العلاج او التكنيك
حسام / انا طبيب صيدلى انا اللى
الدكتور / حضرتك بتتكلم جد حضرتك بقالك سنه بتديها دوا من غير ما تعرضها على دكتور اصلا ارجوك قولى انى فاهم غلط
حسام / الجرعه كانت بسيطه و الدوا امن و حضرتك تقدر تشوف النشره بتاعته بنفسك
الدكتور / بالنسبالى اللى اقدر اقوله فى حدود تخصصي ان فعلا مفيش سبب عضوى اقدر انا اعالجه لكن اللى اقدر انصحكوا بيه هو انكوا تشوفوا دكتور نفسي
ندى تصرخ
ندى / دكتور نفسي لا دكتور نفسي ليه انا مش مجنونه انا كويسه انا ما عملتش حاجه انا كويسه صح يا حسام صح قولهم انى كويسه يا حسام قولهم انى مش مجنونه انا مش مجنونه يا دكتور والله انا كويسه والله انا مش مجنونه
الكل يبص لبعضه
حسام / اهدى يا ندى لو سمحتى اهدى
ندى / انا مش مجنونه انا مش محتاجه دكتور روحونى لبنتى لو سمحتوا روحونى لحبيبه هى فين حبيبه فين بنتى
حسام / تمام يا ندى تمام هنروح هنروح بس اهدى لو سمحتى اهدى
ندى تعيط و تبص حواليها و ترجع تبص لحسام
ندى / عشان خاطرى انا بحبك رجعنى لبنتى ارجوك
الدكتور يدور فى علبه فيها كروت جنبه و يطلع كرت يديه لنور نور تبص للدكتور و توطى على ندى
نور / يلا يا ندى نروح يلا يا حبيبتي
ندى / هنروح لحبيبه صح مش هروح مستشفيات صح مش هبعد عن بنتى صح
نور / لا يا قلبي هنروح البيت لحبيبه و عموا قومى يا حبيبتي قومى يا قلبي
ندى تقوم و حسام يحوط عليها و يطلع بيه بره نور ترجع للدكتور
نور / حضرتك شايف ان ده ضرورى دكتور نفسي فعلا
الدكتور / حضرتك الحاله مش محتاجه معجزه او خبير عشان يعرف انها محتاجه دكتور نفسي الفكره ان ممكن يكون ده بسبب الادويه اللى اخدتها او الصدمه القديمه اللى اتعرضتلها و ما اتعالجتش
نور / بس هى كانت كويسه جدا
الدكتور / ظاهريا ممكن و ممكن بسبب الادويه و ممكن المشكله كانت مدفونه فى عقلها الباطن و فى حاجه حصلت حادثه تانيه او مشكله او حاجه هى اللى خلت العقده دى تظهر و تاثر عليها بالشكل ده و مهما قلت مش هيقدر يجزم فى الموضوع غير دكتور متخصص
نور تبص فى الارض
الدكتور / لا هو عيب و لا حرام يا مدام دا مرض زى اى مرض لازم نلحقه قبل ما يوصل لمرحله ما ينفعش فيها علاج
نور تهز راسها و تبص لعلى
على / تعبناك يا دكتور
الدكتور / ابدا و لا تعب و لا حاجه
على و نور يطلعوا بره يلاقوا ندى بتبلع حبايه بشويه ميه
نور / ما بلاش الزفت ده بقي يا حسام
حسام / على ما نروح و نشوف هنعمل ايه
على / طلعت البيه الدكتور هاه الباشا الوحيد اللى بيفهم فى الطب و بيعالج كل الامراض صح
حسام / مش وقتك لما نبقي نروح نبقي نتخانق و نبستف و نعمل اللى انت عاوزه و مش انت اصلا اللى هتحاسبنى
نور / ممكن نروح
حسام / يلا يا ندى يلا يا حبيبتي
ندى / يلا يا حسام
ندى تمشي مع حسام و محمد مسندها من ايدها التانيه و على متابع يمسك نور يوقفها فى جنب
على / اديني الكرت
نور / لما نروح هكلمهم
على / نروح دلوقت
نور / نكلمهم و نعرف المواعيد و نحجز و نروح هنروح كدا خبط لزق ازاى الوقت اتاخر اصلا
على / لا اله الا الله
نور / انا رايي ننزل مصر كلنا و نشوف حد يتابعها فى مصر احسن احنا مش عايشين هنا و مش هينفع كل يوم تتعرض على دكتور شكل
على يبص فى الارض و يهز راسه
نور/ احنا لا ارتاحنا و لا غيرنا هدومنا خلينا نروح ننام شويه و اهى الشنط مقفوله ننزل بكره و نروح نحجز عند الدكتور بتاع أية و يا سيدى عشان الناس اللى معانا ما لهمش ذنب هنزل انا و انت و ندى و حسام و بس و اللى عاوز يقعد يخليه
على ساكت
نور / خد الكرت خليه معاك انا مش مانعه العلاج عن اختى انا بس مش عوزاها تتبهدل كل يوم مع دكتور
محمد يدخل
محمد / فى حاجه و لا ايه
نور / هنرجع الصبح مصر عشان نشوف دكتور كويس لندى بس اكيد مش كلنا اللى عاوز يقعد يقعد ما لوش لزوم الكل ينزل معانا
محمد / انا هاجى معاكوا
نور / تمام ممكن نروح دلوقت بقي
على / اتفضلي
…………………….
فى اوضه أية
عمر / ناموا الحمد لله
أية / انا بقول ننزل مصر معاهم
عمر / و نزولنا و لا قعادنا هيقدم و لا هياخر فى ايه
أية / لا اكيد هيفرق على الاقل ندى ما تحسش انها لوحدها المرحله دى صعبه اوى يا عمر و هى ما لهاش حد خالص
عمر / مش عارف يا أية الدنيا كلها ملخبطه و بجد ما مش قادر اصدق ان اللى بيحصل ده بجد وانه مش كابوس
أية / ليه يا عمر ليه مش مصدق هو مش ده نفسه الشخص المريض اللى اغتصبها واتجوزها تحت تهديد انه يحرمها من بنتها و سكتنا كلنا و سبناها ليه
عمر / و احنا كان فى ايدنا ايه بس نعملهولها
أية / و لا حتى نعمله لنفسنا
عمر يبص لأية
أية / احنا بنتعامل عادى مع شخص مريض ما سابش حد فينا من غير ما ياذيه و يدمرله حياته و هو بيتعامل كانه ما عملش حاجه و مطلوب مننا اننا نتعامل على انه ما عملش حاجه و الحياه لازم تستمر لازم نتعايش لان الدنيا مش هتقف لا على وجعك و لا على
عمر يحضن أية تعيط
أية / انا لو اطول اقتله كنت قتلته و القانون فى صفى
عمر / لو كان فى صفنا كنت قتلته من زمان بس ما يستاهلش نضيع عمرنا عشانه القانون مش هيحمينا هتعدم انا اللى هتعدم و انتى هتعيشي لوحدك و دلوقت بقي فى بيبي كمان القانون مش هيرحمنا و لا هيصدق اللى حسام بيعمله القانون مش فى صفنا
أية / طب و اخرتها هنستنى اما ندفنها يعني هيرتاح لما تموت
عمر / قومى يا أية عبى الشنطه قومى و لمى حاجه العيال كمان هى كانت سفريه بنت كلب اصلا
أية تبصله
عمر / ما انا على اخرى نفس الحوار مع على بهدى فيه و معاكى و انا والله محتاج اللى يهدينى هو انا مش هزعل على ندى مش متاثر عشانها والله انا كمان مخنوق و زعلان بس الدكتور قال ان خسارتها بنتها فى لبنان ممكن يكون السبب و انها اضطرت تتعايش مع الوضع من غير تدخل دكتور متخصص يساعدها
أية / اشمعن دلوقت
عمر / ما اعرفش لما هتروح للدكتور النفسي اكيد هتتكلم اكيد هتحكى اكيد هنعرف اللى حصل
أية / و اللى حصل ده اقسم بالله ما لوش الا اسم واحد حسام زغلول حسام زفت الطين زغلول
عمر / ساعتها يبقي ربنا يتولانا بجد لانها هتبقي خربت رسمى
أية / مش هتخرب اكتر من كدا احنا فى الحضيض
عمر يبصلها أية تنام و تدى عمر ضهرها و هو يتعدل و يتنهد
……………
فى اوضه ندى
ندى قاعده و واخده ركبها فى حضنها و بتعيط و تتنفض
حسام / ما حدش هيحرمك من حبيبه اهدى بقي
ندى / هتودونى لدكتور نفسي هتودونى مصحه
حسام / مش هيحصل تمام انتى مش محتاجه و انا هوقف المنوم بما انهم بيقولوا ممكن يكون السبب تمام
ندى / و المهدئ
حسام / انتى حاسه بايه بتبقي احسن لما بتاخديه
ندى / مش عارفه انا مش عارفه حاجه و خايفه
حسام ياخدها فى حضنه
ندى / انا مش عاوزه اقعد هنا تعال نروح اى حته تانيه انا و انت و حبيبه و بس حتى بابا مش هاخده معايا انا مش هقدر اراعيه
حسام / تحبى تروحى فين
ندى / اى حته انا و انت و حبيبه و بس تعال نسافر اى حته
حسام / ما كنا فى لبنان و انتى اللى قولتى نرجع مصر
ندى / انا تعبانه و عايزه انام
حسام / نامى يا قلبي نامى و ارتاحى و ان شاء الله بكره لما ننزل مصر
ندى / مش عاوزه انزل مصر مش عاوزه اسافر معاهم مش عوزه احتك بيهم انا مش عوزاهم فى حياتى اصلا انا مش عاوزه حد فى حياتى اصلا
حسام / اهدى اهدى لو سمحتى اهدى و كل حاجه هتبقي زى الفل كل ما بتتوترى كدا الدنيا بتبوظ زياده
حسام يفتح درج الكومدينو و يديها حبايه من علبه
ندى / منوم؟
حسام / مهدئ … هيفرق معاكى شويه لحد بكره و لما الدكتور يكتب بديل نبقي نوقفه
ندى / برده هتوديني لدكتور انت ما بتفكرش فى حبيبه ما بتحبهاش
حسام / بحبها و بحبك و لو كنت اعرف طريقه تانيه غير دى كنت عملتها بس انتى مش قادره تساعديني
ندى / قولى اعمل ايه و انا اعمل انا بسمع كلامك قولى انت عاوز ايه و انا اعمله
حسام / مش عارف يمكن محتاجه وقت يمكن محتاجه حاجه اقوى بس انا خايف اديكي حاجه اقوى ائذيكي انا ما اقدرش ائذيكي يا ندى انا بحبك
ندى / و انا والله بحبك يا حسام بحبك اوى بس ما تحرمنيش من حبيبه دا انا عايشه بس عشانها انا لو بعدت عن حبيبه اموت يرضيك اموت يا حسام هتعيش من غير ندى حبيبتك مش انا ندى حبيبتك
حسام يحضنها اوى و يديها الحبايه تاخدها و تشرب ميه و تنام فى حضنه
حسام / انتى عمرى كله يا ندى حقك عليا انا عمرى ما اتخيلت ان الدنيا توصل للمرحله دى حقك عليا
ندى / انا بحبك يا حسام بحبك ما تخليهمش يحرمونى منك انا ما اقدرش اعيش من غيرك
حسام يحضنها و يمسح دموعها
حسام / مفيش حاجه هتحرمنى منك و لا هتبعدك عن حبيبه ما تخافيش
ندى تهز راسها و تنام و هو بيلعب فى شعرها
………………….
فى اوضه على
على قاعد على طرف السرير نور تدخل تنهد
نور / يعنى كل الدعا اللى دعيته فى العمره ده ما يتقبلش معقول … طب انا لو عليا ذنب بكفر عنه حتى العمره ما نفعتش معاه معقول
على يبصلها باستغراب
نور / بين امى و بين ندى … بين اخويا و بين اختى … طب و انا فين
على / و انتى ناقصك ايه
نور / ايه السؤال ده انت اللى بتسال
على / ايوه انا انا اللى بسال قال على راى المثل اللى يشوف بلاوى الناس تهون عليه بلوته
نور / دا لو ناس يا على انما دول امى و اختى واخويا دول انا يا على وجعهم يوجعنى اللى فيهم فيا مش قادر اصدق انك مش حاسس بيا
على / ان كان على ابوكى و امك اديهم وقت هيتراضوا مش اول مره يتخانقوا فاكره لما راحت قعدت عند عمتك
نور / بس المرادى مش متخانقين يا على دول مطلقين
على / هيتراضوا لما الدنيا تهدى هيتراضوا ما تقلقيش ابوكى بيحبها و هى … مش عارف بس ان شاء الله خير يا نور ان شاء الله خير
نور تبصله و تسكت و تقعد جنبه
على / احنا بنعدى ازماتنا مع بعض و كل ما كان فى حد بيدعمك و يخفف عنك كل ما قدرت تعدى اسهل بس ندى كلنا عارفين ان ما كانلهاش حد غيرك تشتكيله اكيد حكتلك اكيد حاولت تفضفض معاكى ولو مره لو فى حد عارف ندى كانت بتعيش ايه مع حسام هيبقي انتى يا نور بغض النظر انه اخوكى لو فى حد هيقدر يساعد ندى هيكون انتى
نور / المشاكل العاديه بين اى اتنين متجوزين مشاكل بسبب الغربه و الوحده صحبتها الوحيده هناك كانت بترسم على حسام و ابوها كان بيعاكس ندى و كان فى مشاكل و دى اللى خلتهم يرجعوا مصر و اللى حصلى و عيالى اللى ماتوا … كانت متغيره جامد من يوم وفاه اكرم كانت خايفه ايوه بس … بس ده طبيعي مش كدا انا كمان ما كنتش طبيعيه و لا انت طبيعي و لا حد فينا كان طبيعي من اليوم ده يمكن خايفه تخسر حبيبه زى ما خسرنا ولادنا و يمكن ده اللى فكرها بالفتره اللى حبيبه ضاعت فيها و انتحارها و الكلام ده مش عارفه بس ده اللى عاقله جايبنى عليه دلوقت
على يهز راسه و يقوم
نور / رايح فين
على / هقوم امشي رجلى و احاول يعني … بصي مخنوق بجد مش قادر حاسس ان الحيطان بتطبق على نفسي
نور / تمام و انا هحاول انام شويه مع انى ما افتكرش عقلى هيجبنى
على يبوس راسها و يمشي تطلع بره تسمع صوت باب الشقه تطلع تبص تلاقي حسام بيطلع من الاوضه
حسام / خير فى حاجه و لا ايه
نور / على نزل يتمشي شويه
حسام / السعادى
نور / ندى عامله ايه
حسام/ خايفه تروح لدكتور الموضوع موترها بتقول هيقولوا لحبيبه يا بنت المجنونه و يعايروها
نور / حسام انت فى حاجه مخبيها عليا
حسام / حاجه زى ايه يعني
نور / اى حاجه ممكن تفرق فى حاله ندى
حسام / بنلف نلف و نرجع لحسام اى بلوه تحصل فى الدنيا نقول حسام صح ايوه غلطت لما اديتها علاج من نفسي بس انا كمان خايف زيها و مش فاهم و بتحصل يعني مش قاصد ائذيها و لا فرحان بحالتها دى اقولك حاجه
حسام يتلفت
حسام / ندى حاولت تقتلنى و انا نايم و مره حاولت تخنق حبيبه
نور تتفاجئ
حسام / انا بدى لندى المنوم لما بكون خارج او هنام عشان خايف تاذى نفسها او تاذينا
نور / و ازاى تسكت على حاجه ذى دى
حسام / خايف عليها يا نور خايف اخسرها
نور / ما انت لو ما ساعدتهاش هتخسرها فعلا حسام الموضوع كدا طلع كبير و ما يتسكتش عليه
حسام / ادينا راجعين بكره اهو ربنا يسهل
نور / ماما مش راجعه بتقول ما دام كلكوا راجعين و ما دام كدا كدا فلوس الشقه مدفوعه تقعد يومين تغير جو
حسام / احسن حاجه على الاقل تبعد عن بابا لحد ما الدنيا تهدى شويه
نور / تفتكر هتهدى
حسام / افوق من اللى انا فيه و بعديه افوقلهم … بقولك ايه خشي ارتاحى شويه و الصباح رباح خشي و انا كمان هدخل انام انا كمان مش قادر تصبحى على خير
………………..
فى اوضه ندى
ندى تقوم من النوم تبص على حبيبه نايمه فى حضن حسام تبتسم و تقوم تلبس الاسدال و تروح تفتح الباب بالراحه فى نور بسيط داخل من ناحيه البلكونه تروح ناحيته و هى مبتسمه تلاقي ابوها و عمها نايمين فى الصاله تروح ناحيه النور و تفتح الشيش و تدخل تتفرج على الشروق و تبتسم
ندى / الله حلو اوى
مها تدخل تسند على الصور زيها
مها / حلو اوى فعلا تحبى تروحى هناك
ندى تشوف مها تحضنها
ندى / وحشتيني اوى وحشتيني وحشتيني كل ده سيبانى كل ده بعيد عنى هونت عليكي
مها / غصب عنى كان لازم امشي بس عمرى ما سبتك و كنت مستنيه الوقت اللى اقدر ارجعلك فيه
ندى / و ليه اتاخرتى
مها / الشمس هتطلع و الشروق هيفوتك
ندى تبص على الشمس
مها / لازم نلحق قبل ما يصحوا و ياخدوكى منى تانى
ندى / هيودونى مصحه هيبعدونى عن حبيبه
مها / مش هسمحلهم انا جايه اساعدك اهو
على يفتح باب الشقه و يدخل باين عليه الارهاق يلاقي البلكونه مفتوحه يبص ندى واقفه جنبها و بتكلم نفسها
مها / هخبيكي فى مكان ما يقدروش يوصلولك فيه هناك مش هيقدروا ياذوكى بس لازم نمشي قبل ما يصحوا ما ينفعش يعرفوا انى عايشه
ندى / و حبيبه هسيبها دا ممكن ياذيها
مها / هنرجعلها لما الوقت يجي هنرجعلها
ندى/ طب ادخل اجيبها مش هتاخر
مها / هيصحي و ساعتها مش هنلحق الشمس
ندى تبص تانى على الشمس و الرعب مالى عنيها على يقرب و هو مستغرب
ندى / هرجعلها لما الوقت يجي هرجعلها
ندى تطلع على السور على يجرى يمسك ايدها يشدها رجلها تفلت و تبصله برعب
على / لا يا ندى لا استنى
ندى تصرخ و هى بتشد ايدها من ايده
ندى / سيب حسام هيصحي و يشوفنا سيب ما تمسكش ايدي حسام هيشوفنا سيب سيب ايدي سيب
على / بطلى تهزى نفسك هتقعى بطلى … حسام يا حسام
ندى / بتعمل كدا ليه حرام عليك بتعمل كدا ليه سيب
على / عشان حبيبه يا ندى ما تموتيش دلوقت … يا عمر يا عمر
ندى تبص تحت و حسام يصحي و الكل يصحي ندى تفوق و تصرخ
على / يا عمر يا عمر
ندى / ما تسبنيش ابوس ايدك ما تسبنيش عاوزه اعيش عشان حبيبه ما تسبنيش
حسام يحاول يحاول يمسك ايد ندى و عمر يفتح البلكونه تحت و محمد ينزل يجرى على تحت
ندى /هو اللى مسك ايدي ما تسبنيش ساعدنى
حسام و على يحاولوا يشدوا ندى عمر يطلع يقف على السور و محمد ماسكه يزقوا ندى لفوق و أية بتصرخ على و حسام يشدوها نور تقعد على الارض فى جنب بتعيط و حسام قاعد و واخد ندى فى حضنه و هى بتعيط و على قاعد فى جنب و الكل اعصابه بايظه
ندى / هو اللى مسك ايدي انا ما عملتش حاجه
نور / ندى
ندى تبص لنور عمر و محمد يدخلوا و الكل وراهم
ندى / انا كنت عايزه اللحق الشمس
حسام ما يقدرش يمسك دموعه و يعيط
ندى/ انا مش عايزه اموت عاوزه اجوز حبيبه و افرح بيها انا مش عايزه اموت
حسام ياخد ندى فى حضنه اكتر و امانى متابعه اللى بيحصل فى صمت و تبص لمحمد
امانى / اللهم لا شماته
الكل يبص لامانى تسيب المكان و تدخل اوضتها
على / مش هنلحق ننزل مصر هناخدها للدكتور اللى هنا اللى قالوا عليه امبارح كان ممكن ما نلحقش ننزل مصر كان ممكن ما تتلحقش
نور / قومى يا ندى نلبس
ندى تبص لنور الكل بيعيط
ندى / هنروح فين
نور / قومى تعالى هناخد حبيبه معانا ما تخافيش
ندى تبص لحسام منهار
ندى / ممكن اروح
…………………..
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية سلف ودين)
