رواية سلف ودين الفصل الثاني والأربعون 42 بقلم لولو محمد
رواية سلف ودين الجزء الثاني والأربعون
رواية سلف ودين البارت الثاني والأربعون
رواية سلف ودين الحلقة الثانية والأربعون
على / يعني استنى اما تموت فى ايده على ما باباكى يدخل انتى مش سامعه
نور / سامعه والله بس انت ما ينفعش تدخل انت ما لكش دعوه
على / دى لو كلبه فى الشارع بتصرخ بالمنظر ده هجرى عليها اوعى
على يزق نور و يفتح الباب وينزل يلاقي محمد بيخبط على الباب
محمد / افتح يا حسام بدل ما اكسر الباب افتح … على !! ايه اللى نزلك
صوت صريخ ندى يختفى و يفضل صوت صريخ حبيبه
محمد / اطلع لعروستك يا على و انا هدخله
على / ما فتحش
محمد / سكتت
على / ما يمكن جرالها حاجه سكوتها لوحده مرعب
على بيرزع على الباب مفيش حد يفتح على يبص لمحمد و يخبط الباب بكتفه محمد يخبطه معاه لحد ما يتفتح و يدخلوا يلاقوا مصطفى نايم على وشه فى الطرقه بيحاول يزحف محمد و على يدخلوا يلاقوا حسام قاعد فى الارض بيعيط و حاضن ندى مغم عليها و غرقانه فى دمها و حبيبه مفلوقه من العياط على يجرى على ندى حسام يحضنها اوى و يمنعه يلمسها و يصرخ فيه
حسام / ابعد عنها ما حدش يقرب ابعد
محمد يشد على
محمد / ايه اللى جرا يا حسام
على يروح لحبيبه اللى بتصرخ على اخرها يشيلها و يهزها تسكت و هى بتتشحتف و عينه على ندى محمد يقعد قدام ندى و يبص لحسام
محمد / حسام اهدى … قوم خلينا ناخدها المستشفي نلحقها
حسام حاضنها و بيعيط يعدى ايده على شعرها
حسام / انا ما كانش قصدى
على و حسام يصرخوا فى بعض امانى تدخل
على / انت لسه هتعيط ما تقوم تلحقها بدل ما تموت فى ايدك
حسام / ما لكش دعوه انت ما لكش دعوه
امانى / انت بتعمل ايه هنا يا على انت ازاى تسيب عروستك لوحدها و تنزل
مصطفى يوصل للاوضه
محمد / قوم يا ابنى معايا قوم نلحق البت
امانى / انت لسه واقف يا على ما تطلع لعروستك
محمد يقوم حسام شايل ندى و ياخده و يمشي على يروح وراهم امانى تقف فى النص تمنع على
امانى / رايح فين
على يبصلها يروح يحط حبيبه فى سريرها و يروح يشيل مصطفى من الارض بيعيط يحطه فى سرير ندى
امانى / انت عاوز تنقطنى انت بتعمل ايه
على / بصلح اللى ابنك بينيله ايه مش شايفه حاجه حواليكى غير ان نور لوحدها فوق نور سليمه
امانى / انت ازاى تكلمنى كدا
على يقرب من امانى
على / انا ربايه شوارع روحى عدلى على ابنك
امانى تبصله بغضب
امانى / حسابنا بعدين
امانى تمشي على يبص حواليه و بعدين يبص على مصطفى و يروح يقعد جنبه
على / هتبقي كويسه ان شاء الله … هاخد حبيبه فوق ابص على نور
على يبص على الارض بقع دم
على / هبقي انزل ابص عليك
على يقوم يمسح دموع مصطفى و يروح يحيب ازازه ميه و يسقى مصطفى و يشيل حبيبه و يطلع يلاقيها قاعده بتعيط و امانى بتطبطب عليها
امانى / واحد و مراته احنا مالنا
على / احم احم
امانى تبصله من فوق لتحت بقرف يروح يحط حبيبه على السرير جنب نور و يبصلها
على / بتعيطي ليه يا نور
امانى / يا بجاحتك يا اخى ليك عين تسال
على يقوم لامانى
على / واحد و مراته انتوا مالكوا
امانى / انت زودتها اوى
نور / لو سمحتى يا ماما
امانى / انتى بتكلميني انا بعد اللى عمله و بعد اللى قاله
على / لو حضرتك شايفه ان واحد يضرب مراته عادى لكن انى ادخل و اللحقها ده اللى غلط فكويس ان حضرتك بتصلحيلى مفاهيمي بدرى عشان فى اول خناقه ليا مع نور اديها علقه موت
امانى / ابقي اللمس شعره منها
على / هى نور بنتك احسن من ندى فى ايه
امانى / انت بتقارن ايه بايه انا بنتى متربيه احسن تربيه انما ندى
على / قبل ما تغلطى فيها ما فيش مبرر فى الدنيا يبرر اللى ابنك عمله لا دين و لا قانون و لا انتى ايه رايك يا نور
نور / ممكن تنزلى يا ماما بعد اذنك
امانى تبص لنور و عنيها واسعه امانى تبص لعلى مبتسم و مش قادر يداريها امانى تمشي و ترزع الباب وراها على يروح يقعد جنب نور
على / انا اسف
نور / على ايه انت ما غلطتش
على / امال بتعيطي ليه
نور / انا ما اعرفش ايه اللى حصل بينهم بس دى اول مره تحصل والله
على / كانت سايحه فى دمها
نور تبصله
على / مغم عليها و غرقانه دم ما كانتش غيرت فستانها حتى حبيبه جنبك كانت بتصرخ و عمك كان فى الارض بيزحف يحاول يحوش عن بنته
نور / ليه كل ده
على / بالظبط ايه فى الدنيا ممكن يبرر موقفه عملت ايه و لا قالت ايه حتى ادعيلها عشان لو ملحقوهاش اخوكى هيتعدم
نور / لا و بتسالني بتعيطي ليه
على / يهمنى انه ما يكونش بسببي انا ما كانش قدامى حل تانى انهى قلب انى اكمل معاكى على صوت صريخهم يعنى
نور / لما نزلت بابا ما كانش تحت
على / كان تحت خدوا ندى و مشيو حبيبه كانت بتصرخ عمك كان فى الارض
نور / ماما كانت
على / امك ما طلعتش غير على صوتى و كل اللى فارق معاها انى ازاى اسيبك و انزل … انا و الله ما فاهمها هى بتكره ندى كدا ليه حتى بعد كل اللى حسام عمله كارهه ندى دا لو حسام اتعدم انه قتل ندى هتلوم ندى انها ماتت فى ايد حسام
نور / تف من بقك ان شاء الله مش هيحصلها حاجه
على / خايفه عليها و لا على اخوكى
نور / ان كان هو اخويا فهى اختى و انت عارف
على يتنهد و يقوم يروح ناحيه الباب و يبصلها عينها عليه
على / انا كنت مستنى ايه يعني .. ايه اللى جد فى حياتى عشان افرح زى الناس ما كان لازم اتوقع ان فى مصيبه هتحصل تنكد عليا
نور تضحك على يروح يقعد جنبها ياخدها فى حضنه و يبوس راسها
على / حقك عليا
نور / تفتكر هى عامله ايه
على / مش عارف و قلقان موت على عمك اللى لوحده تحت ده
نور / معاك حق و ماما اكيد نزلت على شقتها
نور تبص على حبيبه نايمه
على / هنزل ابص عليه و اجيلك
نور تهز راسها و تبتسم على يبوس رأسها و يقوم
نور / ليه كدا يا حسام حرام عليك
……………………..
فى شقه عمر
عمر نايم و أية صاحيه بتفكر عمر يتقلب يفتح يلاقيها باصه للسقف ياخدها فى حضنه تبصله
عمر / بتفكرى فى ايه غيرى
أية تبتسم
عمر / والله ما فى حاجه مستاهله
أية / بفكر فى حياتي يا عمر دى كمان ما تستاهلش
عمر / لو بتفكرى فى اللى فات فلا ما تستاهلش تضيعى النهرده عليه و لو بتفكرى فى اللى جاى فلينا رب اسمه كريم قادر يقلب الحال و لو بتفكرى فى النهرده
أية / احنا ليه بيحصل معانا كدا
عمر / فى غيرنا بيحصل معاهم اسوء
أية / اسوء من كدا
عمر / بكتييييييير هو حد عارف حاجه ما البيبان متقفله على كل بيت يا بنتى ما حدش مرتاح
أية / بس انا مش قادره اعيش يا عمر
عمر / و لا انا بس انا عندى فى الدنيا اللى يخليني اتمسك و اعافر فيها عشانه
أية / على ؟
عمر / انتى يا أية
أية / انا ايه ؟
عمر / انتى حياتى انتى اللى ربطانى بالدنيا دى و مخليانى اكمل فيها و دا من زمان على فكره من و انتى بيبي انا فجاه لقيت امى ماتت و اخواتى سابونى ما كانش ليا غيرك من يومها و انا عايش بفكر فيكى بس عارف ان مرت علينا اوقات … بس زى ما قولتلك لينا رب اسمه كريم ادينا اهو سوا
أية / ما بتفكرش ايه اللى هيحصل لو الفيديوهات دى طلعت تانى
عمر / فكرت طبعا فكرت كتير كمان و عارف هعمل ايه هواجه انا ما فيش على راسي بطحه انا لا عملت حاجه غلط و لا حرام
أية / و لا ندى عملت
عمر / انا عارف انك بتحبيها و انك متاثره عشانها بس
أية / ما لهاش حد يقف جنبها و لا يدافع عنها و على اخوك ده اللى رايح عشان يبقي جنبها و يحميها هو اول واحد جرحها عارف يعني ايه ان اللى بحبه يدخل على اختى فى الشقه اللى فوقى يبقي قدامى طول الليل و النهار اسمع ضحكتهم و اشوفها بتدلع عليه انت متخيل العذاب اللى هى عايشه فيه ندى انتحرت عشان حبيبه باعت نفسها للشيطان عشان بنتها
عمر / ام يا أية … بكره ان شاء الله لما ربنا يكرمنا هتفهمى
أية / مش خايف تنام ما تقومش مش خايف حبيبه تشوف اللى انت شوفته
عمر/ الاعمار بيد الله و اكيد ربنا ليه حكمه من اللى بيحصل
أية / و نعم بالله
عمر / أية … حبيبتي … حاولى تشغلى عقلك بنفسك دراستك اللى متاخره فيها البيت شوفيلك هوايه اشغلى وقتك اى شغله حتى لو تنزلى تقفى معايا فى المحل
أية / لا المحل لا
عمر / اونلاين يا ستى سوقيلى اونلاين الاتجاه دلوقت كله كدا نعمل صفحه و تتابعيها ايه رايك
أية / على فكره ده نفس كلام الدكتور بس تفتكر هيجيب نتيجه معايا
عمر / نجرب هنخسر ايه و بعدين طول ما احنا مع بعض نحاول مره و اتنين و تلاته و لا ايه
أية تهز راسها
عمر / انا بحبك اوى يا يويو
أية / و انا والله يا عمر
عمر ياخد أية فى حضنه و يبوس راسها
………………….
فى المستشفى
الدكتور / لا طبعا لازم محضر و مستحيل تكون حادثه
محمد / يا ابنى والله
حسام / اعمل الصح يا دكتور
محمد يبص لحسام و الدكتور يمشي
محمد / يعمل الصح ايه انت عاوز تودى نفسك فى داهيه
حسام / اللى يحصل يحصل
محمد / ايه اللى وصل الدنيا بينكوا لكدا ايه اللى حصل
حسام / والله يا بابا ما قادر اتكلم دلوقت ابوس ايدك
محمد / انا هقوم اكلم امك اطمن على حبيبه و عمك سبناهم لوحدهم
محمد يقوم يقف فى جنب و يتكلم فى التليفون
محمد / ايوه يا امانى
امانى / عاجبك عمايل سي على دى دا البيه لسه ما دخلش و بيعمل كدا
محمد / وقت على دلوقت يا امانى … طمنيني على مصطفى و حبيبه
امانى / لا يا خويا ما تقلقش سي زفت طلع حبيبه للداده تقعد بيها و نزل قعد مع اخوك يا ميله بختك يا بنتى فى جوازاتك هى بنتى بس دول ولادى الاتنين
محمد / سلام يا امانى
محمد يقفل السكه و يتصل بعلى نور ترد عليه
نور / ايوه يا بابا طمنى ندى عامله ايه
محمد / لسه جوه ما حدش عاوز يقولنا حاجه و اخوكى مش معايا خالص
نور / انا مش قادره اصدق انه عمل كدا قلبي بيتقطع من ساعه ما على حكالى على منظرها و لا حبيبه يا قلبي عماله تتفزع كل شويه كانها حاسه
محمد / و عمك عامل ايه
نور / على معاه تحت ما تقلقش مش هيسيبه لوحده طمنونا انتوا بس على ندى
محمد / ادعيلها و ادعى لاخوكى ربنا يهديه لحسن انا خلاص حطيت صوابعى العشره منه فى الشق
نور / ان شاء الله خير
محمد / حقك عليا انا يا بنتى كسرنا فرحتك
نور / ندى تقوم بالسلامه لبنتها و الباقي محلول باذن الله
محمد / يكملك بعقلك يا قلب ابوكى … خدى حبيبه يا نور و انزلى جنب جوزك يا عالم بيقول علينا ايه دلوقت
نور / حاضر يا بابا
محمد / حضرلك الخير يا بنتى مع السلامه
محمد يقفل و يبص لحسام قاعد فى دنيا تانيه يخبط كف على كف و يروح يقعد جنبه
…………………….
فى شقه ندى
على يقوم من الارض و يشيل طبق بلاستيك فيه مايه بصابون
على / فله اهى
على يبص على مصطفى قاعد سرحان يحط الطبق على الكومدينو و يقعد جنبه
على / هتبقي كويسه ان شاء الله و هترجع زى الفل و احسن
مصطفى يبص لعلى و يرجع يبص الناحيه التانيه
على / اجبلك حاجه تاكلها و لا اعدلك راسك تنام شويه؟
مصطفى يهز راسه لا
على / حاسس بيك اوى على فكره ان يبقى جواك كلام و مش قادر تقوله
على يبص فى الارض و مصطفى يبص عليه
على / ما حدش عارف الخير فين و لا الحكمه من ورا اراده ربنا كل اللى علينا نصبر و نعافر
نور تدخل شايله حبيبه نايمه
نور / ازيك يا عمى
نور تحط حبيبه جنب مصطفى يبصلها و يبتسم
نور تبص لطبق الصابون الاحمر من لون الدم و تبص لعلى
نور / كلمتهم فى التليفون … خير ان شاء الله
على يهز راسه
على / تعالى نتكلم بره عشان ما نصحيش حبيبه كفايا فزعتها
نور / يا ريت
على و نور يطلعوا بره
نور / واحد غيرك كنت هبقي محروجه منه بس انت عارف عنى كل حاجه
على / انتى ما لكيش ذنب فى كل اللى بيحصل بس اخوكى لازم يلاقى اللى يحاسبه
نور / بابا معاه و بجد
على / ابوكى راجل طيب و حسام ابنه
نور / و ندى كمان
على / ابو ندى راقد جوه مشلول ما استحملش اللى حصل فى بنته كان مرمى فى الطرقه هنا بيزحف بكل قوته عشان يلحقها و حتى لو كان وصل و لا كان قدر يعملها حاجه … دا حبيبه بنته كانت مفلوقه صريخ و عياط ما هانش عليه يسكتها فى وسط كل ده هى اساسا مش فارقه معاه
نور / هو ابوها
على / و بتقوليلى انا الجمله دى انتى كمان عارفه عنى كل حاجه انا ابويا بالنسبالى كان اسوء اب فى الدنيا كنت ببص للعيال اللى بتضحك فى حضن ابهاتها و ادعى و احسبن عليه بس لما شوفت اخوكى هدعي لابويا بالرحمه
نور تبص فى الارض
على / بيحبها … امال لو بيكرهها هيعمل فيها ايه ؟
نور / ما حدش عارف تفاصيل اللى حصل بينهم
على / انتى كمان هتبرريله ترضيها على نفسك يعني مش كفايا عايشه معاه غصب عشان حبيبه لا و كمان يقتلها بالشكل ده
نور تبص فى الارض
على / على فكره انا حاسس بيكي والله بس ان كان هو اخوكى فهى زى ما بتقولى اختك
نور / بايدي ايه اعمله … و لا حاجه … النهرده المفروض اسعد يوم فى حياتى و اديك شايف اللى احنا فيه … اعمل ايه قولى اقدر اعمل ايه و ما عملتوش
على / بطلى تدافعى عنه و تدوريله على مبررات
نور / ما بيسمعش لحد و الله ما بيسمع
على / تمام
نور/ على … حبيبي … عشان خاطرى سيب بابا هو اللى يدخل ما لكش انت دعوه ما تحطنيش بينكوا
على / يا ريته كان ينفع
على يسيب نور و يدخل المطبخ يروق الدنيا و يغسل الببرونات نور تروح تقف على الباب و تبص عليه فى صمت و تبص فى الارض و تروح تقعد جنب عمها
……………….
فى المستشفي
الظابط خارج من اوضه ندى و محمد واقف بيفرك فى ايديه و حسام واقف هادى الظابط يبص لحسام و يمشي و محمد واقف مستغرب يفتح الباب و يدخل يلاقي ندى نايمه فى السرير يروح يقعد جنبها
محمد / قولتيلهم ايه يا بنتى
ندى / ما تقلقش يا عمى قولتله وقعت على السلم و ما بتهمش حد
محمد / ليه ؟
ندى تبص لمحمد باستغراب
ندى / كنت عاوزنى اقول ان حسام ضربنى !!!
محمد يبص فى الارض
ندى / حبيبه فين يا عمى سبتوها لوحدها ؟
محمد / ما تقلقيش على حبيبه دى مع نور و على الله يباركله واقف مع ابوكى
ندى / خليهم يروحونى يا عمى لو سمحت
حسام يدخل بالراحه مكسوف و مش قادر يبص على ندى
حسام / عامله ايه دلوقت
ندى / عاوزه اروح
حسام يبص لمحمد
محمد / هروح اتكلم مع الدكتور و اشوف هنعمل ايه
محمد يطلع بره حسام يقعد و يمسك ايدها
حسام / ليه ما قولتيش للبوليس ان انا اللى ضربتك
ندى / هيحصل ايه هتتحبس ؟ و ساعتها اسافر لبنان ازاى
حسام / ساعتها كان ممكن تطلقى لو عاوزه
ندى / هيعدموك يعني ؟ انا خلاص اتعلمت الدرس … الحاجه الوحيده اللى هتفرقنا هى الموت بس ان شاء الله ما يكونش موت حبيبه
حسام / بعد الشر عنك و عن حبيبه … ندى انا بجد اسف اوى انا مش عارف انا عملت كدا ازاى … انا ما كنتش فى وعيي
ندى / مش فارقه … حسام انا عاوزه اروح اخر حاجه فكراها حبيبه كانت بتصرخ و انا قلبي واكلنى عليها اوى يا تروحنى يا تجبهالى لو سمحت
حسام / طب ارتاحى و انا
ندى / عاوزه بنتى يا حسام لو سمحت هاتلى بنتى مش هرتاح غير بيها
حسام / حاضر حاضر
حسام يطلع بره يلاقي محمد بره
حسام/ عاوزه حبيبه
محمد / لينا كلام تانى فى اللى انت عملته
حسام / اللى تشوفه يا بابا بس لو سمحت
محمد / لا … انا مش هسيبها معاك لوحدها روح هات حبيبه انت
حسام / تمام يا بابا عن اذنك
حسام يمشي و محمد باين عليه الضيق
……………………
فى شقه حسام
نور بتدى حبيبه ببرونه على يدخل لابس خروج
نور / على فين
على / هروح المستشفي لندى
نور / بابا معاها و طمنى بقت كويسه
على / اه بس لوحدها و اكيد البوليس هيجوا ياخدوا اقوالها و ممكن يجبروها تتنازل
نور / على
على / اخوكى مش اخوكى مجرم و لازم يتربى و لا عشان يتيمه و ما لهاش حد
نور / برده مصر تحشرنى بينكوا
على / مش من حقه مش من حق اى حد يمد ايده على مراته بالشكل
ده
نور / اعمل اللى انت شايفه صح
نور تبص لحبيبه و تكمل رضاعتها على لسه واقف بيبص عليها مش بتبص عليه
على / مش هقدر اشوف الغلط و اغمض عنيا
نور / قولتلك اعمل اللى انت شايفه صح هى اختى و هو اخويا و كدا كدا انا فى النص بينهم فمش هتفرق لما جوزى كمان يدخل فى المطحنه
على / يا اجى عليكي يا اجى على ندى مش كدا
نور تبصله
نور / انت مش عارف ايه الصح مش كدا
على / عارفه بس مش قادر اجى عليكي انا كمان
نور / روح يا على انا بقولك روح و اقف جنب ندى و لو استنيت اكمل رضاعه حبيبه هطلع اللبس و اجى معاك انا كمان
على / بجد يا نور!!
نور / لو ندى اختارت تشتكى حسام هقف معاها هو غلطان بس لو ندى
على / اكيد هتشتكيه الا لو كان مهددها بحاجه انتى يعني مش عارفه اخوكى
نور تتنهد و تبص لحبيبه على يروح يقعد جنبها
على / وجودك هيفرق مع ندى جدا زى ما طول الوقت بتقولى انتى اختها
نور / خد كمل انت الببرونه على ما اطلع اللبس
على ياخد حبيبه و نور تيجي تطلع بره تلاقي حسام داخل
نور / حسام !!
……………..
فى المستشفي
محمد قاعد جنب ندى
محمد / انتى عارفه انك عندى فى غلاوه نور صح و لا لا
ندى تبتسم و تهز راسها
محمد / انا عارف انك رجعتى لحسام عشان حبيبه عارف انك مش بتحبيه و انك عمرك ما هتسامحى على اللى فات
ندى / اللى فات مات المهم اللى جاى
محمد / و اللى حصل بينكوا النهرده ده بيقول ان اللى جاى ممكن يكون احسن
ندى تاخد نفس عميق و تبتسم بحزن
ندى / هيبقي ان شاء الله لما نسافر لبنان كل حاجه هتبقي كويسه ان شاء الله
محمد / فى لبنان هتبقوا لوحدكوا ما حدش هيحوش عنك لو الموقف ده اتكرر
ندى / هيحصل ايه يعني ؟ هموت ؟ ابقوا خدوا بالكوا من حبيبه و بابا و خلاص
محمد / انتى بتقولى ايه يا ندى
ندى / ايه يا عموا مستغرب ليه ما انا مت مره فى الامارات و لا نسيت و عادى الدنيا ما وقفتش و لا حد زعل عليا بالعكس دا انا رجوعى و انكوا تكتشفوا انى عايشه كان هو بدايه اللعنه كلهم هناك قالولى ما تنزليش خليكي هنا احسن الامير هيتكفل بيكي و ببنتك … بس انا عيله برده و لا ليا خبره و لا بعرف اخد قرار نزلت … و ياريتنى ما نزلت كان زمانى بربى بنتى هناك ان شالله اخدم فى البيوت… ههههه اخدم ايه دا مفيش افشل منى هههه
ندى تضحك ضحكه مكسوره و محمد متابعها بحزن
ندى / كان زمان ماما عايشه و بابا سليم و بيمشي و حسام سعيد مع اروى و علاقتك بعمتوا كويسه يا ريتني ما رجعت مصر
محمد / عشان كدا ما اشتكيتيش حسام عشان فاكره انك هتلاقى فى لبنان اللى ضيعتيه فى الامارات
ندى / مش بس كدا … بيتهيالي انك تتغرب فى بلد غريب ارحم من مليون مره من انك تعيش غريب وسط اهلك انا ليا مين هنا
محمد / ليه بتقولى كدا يا ندى
ندى / عشان دى الحقيقه ربنا يخليك لنور لو على يوم جه عليها هتعرف انى مش زيها … بس ما تقلقش انا متاكده ان على هيحطها فى عنيه … مش هياذيها
محمد / اقسم بالله يا ندى انتى زى نور بنتى بالظبط
ندى / ما تحلفش … ماشي … مصدقاك انا زى نور هاتلى حقى … قوم هاتلى حقى
محمد باصص لندى بحزن
ندى / ما تضايقش نفسك اعمل زى غيرك قول ابوها اللى عمل فيها كدا من الاول ارمى الحمل من على كتافك خلاص حبيبه امر واقع و لازم احافظ عليها
محمد يقوم و يطلع بره و يقفل الباب وراه ندى تمسح دموعها و تاخد نفس عميق و تطلعه
……………….
فى شقه حسام
حسام نايم فى الارض وعلى فوقيه نازل فيه ضرب و نور بتصرخ و تحوش بينهم
حسام / دا انا هحبسك
على / مش قبل ما اقتلك
نور / كفايا حرام عليكوا كفايا
حسام / انت اصلا مال اهلك بينا
على / هوريك انا مال اهلى يا واطى يا عديم الربايه
على يضرب حسام امانى تدخل تحوش مع نور و تزعق
امانى / دا كان يوم ايه ده سيب ابنى انت ايه حكايتك النهرده
على يبص لامانى من فوق لتحت و يبص لنور بتعيط يبعد حسام يقف
حسام / عشان تصدقونى لما كنت بقول عليه ربايه شوارع
على / لا و انت اللى متربى اوى
امانى / انا ابنى متربى احسن تربيه مش انت اللى هتعدل على تربيتي
نور تصرخ فيهم
نور / كفايا بقي كفايا انتوا ايه ما بتحسوش
على يسكت
حسام / مش شايفه مجايبك
نور / مجايبى انا !!! ليه هو على هو اللى ودى مراتك المستشفي اسمع ان كنت هتمثل على الكل فعليا انا لا
امانى / كلمى اخوكى الكبير عدل يا نور
نور / الكبير كبير بافعاله انما حسام مصمم كل يوم يصغر لما قرب يختفى
حسام / بالسرعه دى !!! لا دا انت طلعت جامد زى ما سمعت عنك
نور / انا هطلع اللبس يا على
امانى / على فين
نور / هنروح نطمن على ندى … و لعلمك يا حسام لو البوليس طلب شهادتنا
حسام / ندى نفسها قالت انها وقعت من على السلم
على / اكيد هددتها و لا ضغطت عليها
حسام / بيني و بين مراتى مالك انت بينا
نور / قبل ما تكون مراتك هى اختى
امانى / و حسام ايه لما ندى اختك حسام ايه
نور / عن اذنكوا عشان اتاخرنا كتير اوى
نور تعدى و حسام يمسح وشه من الدم و عينه على على
حسام / هدخل اخد حبيبه … ندى عوزاها
حسام يحاول يدخل على يمنعه و يزقه
على / مش هسمحلك نور اللى هتاخدها
حسام / انت هتحكم على بنتى كمان
على / مش يمكن تاخدها و تهرب عشان تضغط على ندى
امانى / انا مش مصدقه نفسي و الله ما مصدقه نفسي … بقي انت على الطيب الغلبان اللى عمرنا ما قولنا له حاجه و اعترض جاى النهرده و تعمل كل ده
حسام / خال عليكوا وش المسكنه اللى كان لابسه
على / معلش اصلي ما اتعودتش اقف مع الغلط حتى لو مجامله
امانى / غلط ايه انت تعرف ايه اللى حصل ندى دى بنت ناقصه
على / ما تغلطيش فيها
حسام / انت هتنسي نفسك و لا ايه
على يطلع على السلم و ينادى
على / يلا يا نور
حسام / بتلعبها غلط خالص على فكره
على يبص لحسام
حسام / نور اختى يعني لو وقفت على راسك مش هتقدر توقع بينا
على / انا ما اتجوزتهاش عشان اوقع بينكوا
حسام / امال اتجوزتها ليه
على ينادى تانى
على / يلا يا نور
حسام / ما جاوبتش يعني
على / اللى بينى و بين نور عمر اللى زيك ما هتفهمه
حسام يبتسم و يروح يدخل اوضته على يدخل وراه حسام يشيل حبيبه و يبص لعلى عينه عليه
حسام / انا اخو نور و مهما حصل هفضل اخوها و ابو حبيبه و مهما حصل هبقي ابو حبيبه انما انت هنا ضيف حتى مش هيبقي فى عيل يربطها بيك
على / لعله خير لحسن يطلعلك
نور تدخل
نور / انا جاهزه
نور تدخل تشيل حبيبه و تمشي و على و حسام وراها
…………………
فى المستشفي
ندى بتتالم لوحدها فى الاوضه تضرب الجرس و هى عماله تبص حواليها الممرضه تدخل
ندى / لو سمحتى هو مفيش اى مسكن ليا جسمى كله واجعنى
الممرضه / ثوانى حاضر
الممرضه تطلع بره و محمد يدخل
محمد / محتاجه حاجه يا بنتى
ندى / هو حسام لسه ما جابش حبيبه
محمد / جايين فى الطريق نور جايه معاها تحبى يجيبولك حاجه و هم جايين
ندى تبص الناحيه التانيه و هى مضايقه الممرضه تدخل تحطلها حقنه فى الكانوله
ندى / شكرا
الممرضه / بالشفا … عن اذنكوا
الممرضه تطلع بره
ندى / عمو .. كلمتهم انى اروح
محمد / تروحى فين بس يا ندى
ندى / هروح بيتي يا عموا لو سمحت انا مش عيانه عشان الناس تيجي تزورنى هنا انا مش عاوزه حد يجي يتفرج عليا هنا
محمد / يتفرج عليكي
ندى / بابا لوحده و اكيد قلقان عليا خليني اروح بدل ما يجراله حاجه
محمد / على معاه
ندى / مين على يا عموا مين على … بابا يقربله ايه يخصه فى ايه الوقت اتاخر و انا
محمد / على طيب و ابن حلال و
ندى / انا عاوزه اروح … أرجوك
الباب يتفتح و نور تدخل شايله حبيبه وراها حسام وراهم على
ندى / اخيرا اتاخرت كدا ليه
حسام يروح يقعد جنبها
حسام / ما رضيوش يدونى البنت افتكرونى ههرب بيها
ندى / حسام انا بقيت كويسه خليهم يكتبولى خروج
نور / حبيبتي ارتاحى هنا انتى شكلك تعبانه اوى
ندى / انتى ايه اللى جابك
نور / ندى !!!
ندى تبص لعلى
ندى / انتوا مش النهرده دخلتكوا
نور / انتى اهم يا بنتي انتى بتقولى ايه
ندى / بقولك خدى جوزك و روحى يا نور
نور / ندى
حسام / ندى ايه يا نور ندى ايه
على / ندى … لو بيحاول يضغط عليكى باى شكل
ندى تشد المخده من تحت راسها و تغطى وشها
على / احنا جايين نبقي معاكى
ندى تشيل المخده
ندى / و انا ما طلبتش منكوا حاجه و مش عاوزه منكوا حاجه سيبونى فى حالى
حسام يبص لعلى و يبتسم على يبص لنور
نور / ندى … حبيبتي
ندى / خدى جوزك و روحى
نور تبص لعلى و تبص لحسام
حسام / ايه !!! شيفانى ماسكلها خرزانه و لا ممسكها السلك العمومى عريان
نور / بابا
محمد / حسام ما دخلش الاوضه على ندى من ساعه ما فاقت و لا كلمها
حسام / اخيرا … صدقتى و لا تحبى احلفلك
على / ندى
ندى تتك على الزرار كتير جدا
على / اللى حصل النهرده لو ما اخدتيش موقف هيتكرر تانى و تالت و عاشر هتستنى اما يموتك انتى ساكته ليه احنا معاكى
ندى تبصله بغل
ندى / خد … مراتك … و روح يا عريس
الممرضه تدخل
ندى / لو سمحتى هو مفيش ساعات محدده للزياره ؟ اصلي تعبانه و محتاجه ارتاح
الممرضه تبص للى فى الاوضه باستغراب
محمد / خد مراتك و روحوا يا على
ندى / و انت معاهم يا عمى … بابا محتاج اللى يبقي جنبه و دول عرسان جداد مش عاوزين نتقل عليهم
على يبص على ندى
حسام / تقدروا تتفضلوا انا هبقي معاها
نور تبص لعلى ما بيشيلش عينه من على ندى باصه الناحيه التانيه
محمد / يلا يا ولاد
محمد يمشي نور تمشي وراه الممرضه تمشي و على لسه واقف
حسام / مستنى حاجه ؟
على / ندى
حسام يجز على سنانه و ندى باصه الناحيه التانيه نور تدخل تمسك ايد على يمشي معاها ندى تبص عليهم و تبص لحسام
ندى / هنتحاسب على اللى انت عملته .. اوعى تفتكر انها خلصت على كدا
حسام / اقسملك يا ندى كان غصب عنى
ندى / لا سكران و لا بتاخد مخدرات ايه عذرك … ملبوس
حسام / و انتى مش حاسه بنفسك … مين فى الدنيا يتعرض لكميه الاستفزاز دى و يفضل هادى
ندى / استفزاز
حسام / بتعيطي عليه
ندى / بعيط على روحى
حسام / لو شوفتى … لو حسيتي مره واحده بحبى ليكى … انا بحبك لدرجه الجنون
ندى / لدرجه المرض
حسام / لدرجه المرض … ايوه انا مريض بيكي .. طول عمرهم بيقولوا خد اللى شاريك
ندى / و انا بيعاك
حسام يقوم يقف
حسام / مش قادر مش قادر
ندى / المره الجايه هموت فى ايدك
حسام / اساليهم انا كنت عامل ازاى لما دخلوا عليا … اقسم بالله ما كنت فى وعيي … ندى انا بحبك انا عمرى ما ائذيكي
ندى / امال تسمي اللى انا فيه ده ايه … انا عملت ابونيه فى المستشفيات يا حسام
حسام / انتى اللى
ندى / انا اللى قتلت امى و شليت ابويا و شيلت رحمى
حسام / ما كنتش عايز حاجه من دى تحصل ما مسكتش سكينه و دبحت بيها طنط مها الله يرحمها
ندى / امال اللى عملته معايا تسميه ايه … انت دمرت حياتي و حياه أية
حسام / امها السبب مش انا
ندى / انا تعبانه و مش قادره اجادل … كدا كدا بكلم حيطه ما بتحسش
حسام / مقدر انك زعلانه… غلطان و مش هقدر اتكلم … بس اوعدك انى اعوضك
ندى / عاوزه … انام
حسام / تمام تمام … نامى و انا هسهر بحبيبه هنا
ندى تهز راسها و تغمض عنيها
………………
فى شقه نور
على واقف فى البلكونه بيغلى و نور بتابعه من بعيد تدخل
نور / انا هدخل انام
على ما يردش
نور / تصبح على خير
على ما يردش نور تدخل الاوضه و تنام فى السرير على جنبها و الحزن مالى وشها على يدخل و ينام على جنبه و وشه ليها و هى مدياله ضهرها
على / انا اسف
نور تبصله
نور / على ايه
على / انتى ما لكيش اى ذنب فى كل اللى بيحصل
نور / و لا انت ليك
على / خايف اكون ظالمك
نور / اى حد مكانك اكيد كان هيتصرف زيك
على يفتح ايده نور تروح فى حضنه
على / انا تعبان اوى يا نور انتى كنتى تستاهلى حد يشيل عنك
نور / و هو الحب و الجواز ايه غير اتنين يسندوا بعض
على / ربنا ما يحرمنى منك
نور تبتسم على يبتسم
على / النهار قرب يطلع
نور / ايوه
على / انا مش جايلى نوم بصراحه ما بحبش انام و انا مضايق
نور / تحب نغير المود باى حاجه تيجي نلعب
على / نلعب !!!
نور تقوم على يقوم يبص عليها بتفتح درج التسريحه و تطلع كوتشينه
نور / نلعب الشايب باحكام
على يبتسم
نور / ايه خايف و لا ايه
على / لا انتى قلبك حنين تعالى
نور تروح تقعد قدامه و تفنط الكوتشينه و هو عينه على الكوتشينه و هى عينها عليه
………………….
فى شقه ندى
ندى تدخل و حسام مسندها
ندى / نيمنى جنب بابا لو سمحت
حسام / حاضر
حسام يدخل ندى جنب ابوها اول ما يشوفها يمدلها ايده و هيموت و يقوملها و يزوم
ندى / جيالك انا كويسه ما تقلقش
محمد / انا طلبت دليفرى زمانه جاى فى الطريق
ندى تنام جنب مصطفى ياخدها فى حضنه
محمد / هسيبكوا ترتاحوا لو عوزتوا حاجه نادونى
حسام / ربنا يخليك ارتاح انت
محمد يبص لندى و مصطفى مش باصينله و يمشي و يقفل باب الشقه وراه و يطلع فوق يخبط على نور الباب يتفتح فى ثانيه
نور / شششش على نايم … ازيك يا بابا
محمد / كنت عاوز اتكلم معاكى
نور / اتفضل
محمد يدخل يبص حواليه و يطلع البلكونه و يقف فيها لوحده ثوانى و نور تدخل شايله كبايتين شاى واحده مليانه و التانيه لنصها
نور / لسه طافيه الكاتل اتفضل
محمد ياخد الكبايه و هو مبتسم
محمد / عامله ايه
نور / الحمد لله تمام
محمد / امك طول الليل تقومنى على جوزك
نور / انت رايك ايه كنت هتحترمه لو ما كانش ادخل
محمد / على شاب ابن حلال و انا بحبه
نور / على غلبان و طيب والله يا بابا طول الليل بيتفزع من الكوابيس ما صدقت نام شويه
محمد يبصلها باستغراب
نور / على عاش حياه صعبه اوى يا بابا و اللى حصل امبارح قلب عليه زكرياته
محمد / نور انا بس عاوز افكرك ان حسام اخوكى فى الاول و الاخر و
نور / و ندى اختى و اللى حصلها ما يرضيش ربنا
محمد / ندى جت تحت انا كنت معاها هى مش هتشتكى حسام و هتسافر معاه لبنان
نور / ربنا يهدى سرهم بس اللى حصل
محمد / ندى و حسام حياتهم مختلفه بدات غلط فلازم هتبقي غلط فى غلط بس حبيبه ما لهاش ذنب فى كل ده
على يدخل
على / حبيبه من حقها تتربى فى بيت سوى … صباح الخير يا عمى
محمد / صباح النور يا على
نور / هو احنا صحيناك و لا ايه … هروح احضرلك تفطر
على يبتسملها تدخل المطبخ يروح يدخل البلكونه
على / انا اكتر واحد يا عمى عارف مصير البنت اللى بتعيش فى اسره مفككه حبيبه ما لهاش اخ حتى ما لهاش غير امها لو امها جرالها حاجه
محمد / ندى بنتى انت فاكرنى راضي عن حسام و تصرفاته
محمد يتنهد
محمد / انت ما تعرفش حاجه يا على
على / ما هو المشكله انى عارف كل حاجه … انا جارهم و ايه صاحبه ندى
محمد / انا فاهم ده بس … على حسام بيحب ندى
على / حسام بيقتل ندى
محمد / هو ابو البنت زى ما هى امها
على / البنت دى اللى رماها فى الصحره و اللى ندى دفعت رحمها تمنها اللى حبيبه دفعت تمنها انها عمرها ما هيبقالها اخوات
محمد يبص فى الارض و يرجع يبص لعلى
محمد / انا مش ببررله انا قولتلك انى مش راضي عن تصرفاته بس دا امر واقع
على / مش هيبقي رضينا بالهم و الهم مش راضي بينا اتجوزته و عاشت يسيبها تعيش بقي مش يقتلها دا مفيش قانون و لا شرع يسمحله يضربها كدا
محمد / و هى سامحت هنخربها احنا
على / سامحت عشان سامحت و لا عشان حبيبه برده هو حضرتك مش واخد بالك ان ندى يتيمه … لا ليها اهل و لا ضهر و لا اى حد يحميها و لا يحمى بنتها ما لازم تطاطى و تسامح و تاخد بالجزمه و تسكت عشان تحافظ على بنتها اللى جت للدنيا غصب عنها و مش هتقدر تجيب غيرها
نور تدخل
نور / على … الفطار يا حبيبي تعال
على يبص لنور و يبص فى الارض و يبص لمحمد
على / انا اسف انا ما كانش المفروض اكلم حضرتك كدا … انا عارف انك ما لكش يد في كل ده و لا فى ايدك حاج تعملها
على يدخل يقف قدام كرسي و يرجع يبص لمحمد
على / اتفضل معانا يا عمى
محمد / سبقتكوا … الف هنا
محمد ياخد بعضه و ينزل نور تجرى وراه
نور / بابا
محمد / روحى اكلى جوزك و اقعدى معاه و لو عوزتى حاجه رنيلى انا تحت
نور تهز راسها محمد ينزل نور ترجع الشقه ما تلاقيش على تدخل جوه تسمع صوت الدوش
……………………..
فى المحل عند عمر
عمر بيتكلم فى التلفون
عمر / بتهزر … لا طبعا مش هقولها و مش هجيبها معايا و انا شخصيا ما اعرفش … عندها جلسه كمان شويه كنت ناوى اوصلهم و اجيلك اصبح عليك و ارجع اخدهم … تمام هرنلك لما اقرب منك … تمام سلام
أية تدخل
أية / انت لسه ما قفلتش يا عمر
عمر / كنت هقفل والله بس على كلمنى
أية / عامل ايه
عمر / كويس الحمد لله يلا يلا عشان لسه هنعدى على طنط منال
أية / يلا
………………………
فى شقه ندى
حسام داخل بصينيه عليها اكل
حسام / الغدى يا نونو الاكل يا عمى
ندى / هى حبيبه فين يا حسام
حسام / حبيبه راضعه و مغيره و نايمه على السرير جوه و كله تمام ما تقلقيش انتى خالص … تحبى ادخلك ليها
ندى / لا خليني جنب بابا هنا
حسام يحط الصينيه على ترابيزه و يعدل ندى و يروح يحط الصينيه على رجلها
حسام / هتقدرى تاكلى لوحدك ؟ اكل انا عمى ؟
ندى / هاكله انا روح انت كل
حسام / مش عاوز اكل لوحدى خليني اكل معاكم
ندى تملا معلقه و تاكل مصطفى
حسام / ليكي دوا بعد الاكل ما تنسيهوش و عمى عنده جلسه الساعه اربعه كلمت المركز هيبعتوا عربيه و كلمت بابا فاضي هيروح معاه
ندى تبصله حسام يكمل كلام
حسام / كان ممكن اروح انا بس انتى تعبانه و حبيبه هتبقي تقيله عليكي و مش هينفع نتقل على نور دى عروسه برده
حسام يبص على الاكل و ندى لسه عينها عليه تبص للاكل و تاكل ابوها
حسام / كلى انتى يا بنتى عشان دواكى و انا هاكله
حسام ياكل مصطفى مصطفى يقفل بقه و يبص الناحيه التانيه حسام يضايق و فى ثانيه يبتسم بخبث
حسام / ههههههههههه شوفتى ابوكى طلع اذكى منى عاوزنى اكلك انتى بايدي … عاوزنى ادلعك عشان اصالحك
ندى / كتر خيرك بعرف اكل نفسي كل انت عشان تقوم … ترتاح انت مطبق من امبارح
حسام / لما العربيه تيجي و اطمن على عمى هبقي اجى اريح جنبك شويه
ندى تبص لحسام و تتنهد و تكمل اكل
……………….
فى شقه على
على نايم فى السرير و نور فى حضنه
نور / و اتجوز علاء الدين من الاميره ياسمين و عاشوا فى تبات و نبات و خلفوا صبيان و بنات توته توته خلصت الحدوته حلوه و لا ملتوته
على / ههههههه حلوه
نور / تحب احكيلك قصه الشاطر حسن
على / عمرك فكرتى ليه كل القصص بتنتهى نهايه واحده
نور / يتجوزوا و يخلفوا تقصد ؟
على / يعيشوا فى تبات و نبات
نور / قصه روميو و جوليت انتحروا هم الاتنين فى الاخر
على / و قيس و ليلى … قصص الاطفال لازم تنتهى نهايه سعيده بس لما بيكبروا بيفوقوا انها مش كل النهايات سعيده او على الاقل الافلام العربي القديمه كلها بتنتهى نهايه واحده مشهد الدخله حتى الافلام اللى اتجرات و صورت الحياه بعد الجواز كانت كلها مشاكل و خناقات كان مفيش حياه سعيده بعد الجواز او مفيش حياه سعيده اصلا
نور / بس ممتاز محل و شاه جيهان اثبتوا العكس
على / و مين سي ممتاز و ست جيهان دول كمان عمرك ما حكيتيلى عنه
نور / ههههههههههه لا لا ممتاز محل دى ست
على / الست ممتاز و الراجل جيهان و لا دول كانوا مقضينها فى الاعوذ بالله
نور / هههههههههه انت بتقول ايه معقول عمرك ما سمعت عن تاج محل
على / اللى فى الهند ؟
نور / عليك نور اهو شاه جيهان ده كان واحد من حكام الهند زمان من حبه فى مراته بنالها تاج محل ضريح ليها يخلد حبهم
جرس الباب يضرب على يقوم نور تقوم
على / دا اكيد عمر … هروح افتحله
على يلبس الروب و يطلع بره يفتح الباب يلاقي عمر واقف شايل علبه شيكولاته
عمر / ايه يا اسطى كنت همشي
على / ادخل تعال
عمر يدخل يقعد
عمر / ايه الاخبار
على / تشرب ايه
عمر / و لا اى حاجه مش هطول اصلا انت عارف الليله
عمر يوطى على على
عمر / عامل ايه مع نور
على / الحمد لله تمام
عمر يهز راسه و يتعدل
على / نور واخده فرع ابوها المشكله من الفرع التانى
عمر / انت هتقولى
نور تدخل شايله صينيه عليها ساقع
عمر / صباحيه مباركه يا عروسه
نور تبتسم و تقعد و على يناول عمر الكاسه
نور / الله يبارك فيك امال أية فين ما جاتش معاك ليه
عمر / الجيات اكتر انتى عارفه عندها كشف و كدا
نور تبتسم بحزن و تهز راسها عمر يهز راسه و يقوم الكل يقف
عمر / انا مش هبقي تقيل بقي انا عارف الضيوف فى المواقف اللى زى دى بيبقوا تقال اوى
نور / ما تقولش كدا
عمر يبتسم
على / يا ابني اقعد شويه
عمر / الجيات اكتر يلا خد بالك من عروستك يلا سلام يا نور
نور / مش محسوبه
عمر / اكيد دا انا هقرفكوا زيارات
نور / على قلبنا زى العسل
عمر / تعيشي يلا سلام
على / ابقي طمنى
عمر / لو فى جديد بقي
على / ان شاء الله خير
عمر يبتسم و يفتح الباب و يمشي و على يقفل الباب وراه
نور / كنت امسك فيه شويه دا ما شربش حتى الساقع
على / بصراحه معاه حق فى الاوقات اللى زي دى الضيوف بيبقوا تقال اوى و بعدين انتى ما كملتيليش حكايه الشاطر حسن
نور تقرب بدلع
نور / انت عاوز تضحك عليا دا دورك
على / بس انا ما عنديش قصص بس ايه رايك لو نلعب الكومى
نور / اللعب
على ياخد نور تحت باطه و يدخلوا جوه و هى مبتسمه
…………………
فى شقه ندى
ندى نايمه فى السرير بتلعب فى الموبايل حسام يدخل يقف عند الباب ندى تتجاهله
حسام / تحبى اعملك اى حاجه
ندى تبصله و ترجع تبص فى الموبايل
حسام / انتى لسه زعلانه منى صح
ندى تبصله يروح يقعد جنبها
حسام / انا بحبك يا ندى اطلبى منى اى حاجه و شوفي ما تفضليش تضغطى عليا لحد ما افقد اعصابى و تيجي تحاسبيني
ندى / و انت ما ضغطتش عليا
حسام / ضغطت … ضغطت … بس ليه … هو ما يستاهلش … و الله ما يستاهل
ندى / انا عايشه فى الدنيا عشان حبيبه حبيبه و بس
حسام / و كنتى بتعيطي فى المطبخ عشان حبيبه برده
ندى / بعيط على نفسي يا حسام … على حياتي اللى انتهت من قبل ما تبدا زمايلى بيروحوا الكليه عايشين فى الاحلام انما انا … عندى كام سنه على الكابوس ده
حسام / بايدك يتحول لحلم الكل يحسدك عليه … جربى بس … حبيني … حبيني مره واحده و شوفى هعملك ايه … هجبلك الدنيا تحت رجليكي هلففك العالم هلبسك احسن لبس و اكلك احسن اكل و اعيشك احسن عيشه هخلى الكل يغير منك
ندى / زى عصفوره ضعيفه فى قفص دهب صح
حسام / قفص ايه بس … بقلك هلففك الدنيا هدخل حبيبه احسن مدارس و اشتراك فى احسن نادى .. تنزلوا انتوا الاتنين تعملوا شوبينج فى افخم مولات
ندى / مش عاوزه ده
حسام / عاوزه ايه شاورى وانا انفذ
ندى / عاوزاك تسبنى انا و حبيبه و ابوي فى حالنا تطلقنى و تنسانا و انا هرجعلك شقتك و كدا كدا عمرى ما هخرب على اختى مش هتجوز على و لا هيبقالي اى صله بيه اوعدك
نظرات خيبه امل على وش حسام
حسام / تمام … هتاكلوا منين؟ من معاشه …طب لو كفاكوا اكل و شرب هتعالجى ابوكى منين … طب تمام اديتك نفقه لحبيبه و اتكفلت بمصاريفها هتعوضيها عنى … هتعوضيني عنك ازاى
ندى / حاولت والله حاولت بس انت مش قادر تفهم انا مش قادره انسي اللى فات و انت لسه مستمر فى اخطاء جديده
حسام / فعلا … كل حاجه غلطتى انا … مراتى عينها فى واحد تانى و مقهوره عليه انه اتجوز غيرها … دى غلطتى … مراتى مش بتسمحلى اقرب منها … غلطتى … بتنكر كل حاجه عملتلها و شيفانى شيطان بقرون … غلطتى برده … انما انتى ملاك
ندى / انا كمان شيطان زيك بس انت اللى عملت منى كدا
حسام/ مش لوحدى … كلكوا اشتركتوا معايا
ندى / و كلهم دفعوا التمن
حسام / و انا اكتر واحد دفع … دا اللى ماتوا ارتاحوا … غلطتهم كانت قليله عقابهم كان خفيف انما انا مستمر طول الوقت … خسرت كل الناس و خسرت شغلى و عيلتى حتى البنت الوحيده اللى كنت مستعد ابيع عشانها الدنيا كرهانى
ندى / بايدك تصلح كل ده طلقنى و سبنى اعيش و حاول تقرب منى تانى لو لينا نصيب فى بعض
حسام / دى هتبقي طلقه تانيه
ندى / ايوه لسه فى فرصه حبيبه هتجمعنا اقسملك انى مش هكون لغيرك بس
حسام / انتى كل اللى طلبتيه انا عملته ليه عاوزه ترجعينى للصفر تانى … صفر ايه دا انا لسه قدامى طريق طويل للصفر … طب و لبنان ؟ مش انتى اللى طلبتى منى اقبل الوظيفه … انا كنت مستعد ابعد عن الدنيا بس ابقي معاكى … انا لو بعدت عنك هعيش ازاى و لمين … صدقيني انا بحاول افكر معاكى اهو بس انا مش هقدر ابعد … اللعبى بيا … عشميني و اخلفى .. بس على الاقل عندى امل اللى ما حصلش النهرده بكره يحصل … كفايا ابص عليكي و تبقي قدامى انما اطلقك !! طب ما تقتلينى أهون
ندى / جهزت كل حاجه للسفر؟
حسام يبتسم بامل
ندى / انا البيت ده ؟ الشقه دى … تعال نروح نقعد فى شقه بابا الكام يوم دول
حسام / عندى حل احسن
ندى تبصله زى الغريق المتعلق بقشايه
…………………
فى شقه على
نور و على قاعدين على السرير نور لابسه قميص نوم حرير و شعرها ديل حصان و على لابس بنطلون البجامه على يلعب اخر ورقه فى ايده ولد يقش
نور / لا كان معايا ولد كان معايا ولد اعاااااا
نور ترمى اخر ورقه فى ايدها على يهوى عليها
على / قولتلك هقشطك
نور تقلع التوكه و تديها لعلى
على / ايه الخم ده
نور / خليك جنتل مان بقي انت عمال تكسب من الصبح
على / تعرفى ان شعرك و هو سايب على وشك احلى كتير
نور تشد منه الكوتشينه و تفنط
نور / تلعب دور تانى
على يشدها من ايدها و يرميها ورا ضهره
على / ان كان حبيبك عسل و انا بشر برده
نور تبتسم جرس الباب يضرب الاتنين يتعدلوا فى قعدتهم
على / هقوم افتح على ما تلبسي
نور تهز راسها و هى مبتسمه على يطلع و هو بيلبس التيشيرت يفتح الباب يلاقي امانى
امانى / ازيك يا جوز بنتى
على / الحمد لله اتفضلى
امانى / امال نور فين
على / جايه حالا تحبى تشربى حاجه
امانى / مع انى زعلانه منك اوى بس كل اللى يجي منك حلو
على يبتسم و يدخل جوه امانى تستغرب ثوانى و نور تطلع
نور / ازيك يا ماما عامله ايه
امانى / انتى اللى عامله ايه و الجدع العجيب ده عامل معاكى ايه
نور / لحقتى تقلبي عليه
امانى / ما شوفتيش عمل ايه امبارح
نور / امبارح كان يوم ملخبط عديله زى ما عديتي لحسام
امانى / انتى بتقولى ايه دا انا مفيش حاجه بردت جوفى الا اللى حسام عمله ايوه بقي يشكمها مره بدل ما هى ممروعه كدا و مش عامله حساب لحد
على يدخل شايل صينيه عليها كانزات و كاسات فاضيه
نور / حبيبي بنفسك كدا … ثوانى هجيب تلج
على يحط الصينيه على الترابيزه
على / امال عموا محمد ما طلعش مع حضرتك ليه
امانى / عمك مصطفى عنده جلسه راح معاه
على / بالشفا ان شاء الله
امانى تفتح كنزايه و تصب فى الكاسه نور تدخل شايله تلج تحط لامانى
امانى / تسلمي يا حبيبتي … بص يا على انت بقيت واحد مننا خلاص و انا اتكلمت مع عمك محمد فى اللى حصل و بصراحه اقتنعت برايه
على / هو ايه بقي
امانى / اصل انت فعلا اتاخدت على خوانه كدا لسه اول مره تبات وسطينا تسمع صريخ و دربكه بس انت ما تعرفش الحقيقه يا ابنى ندى دى
على / انا اعرف ندى من سنين يا ست الكل
امانى / من على الوش انما الاصل
على / انا كنت فاكرك طالعه تصبحى علينا
امانى تبص لنور
امانى / انا كمان عوزاك تراضي حسام
على يرفع حاجبه
امانى / اخوك برده وانت ضربته
على يبتسم و يقوم يدخل جوه و امانى عينها عليه
امانى / عاملين ايه مع بعض
نور / كويسين
امانى / حسام هيسافر ما ينفعش يسافر و انتوا زعلانين من بعض اللى حصل بينه و بين مراته و اهم اتصالحوا و هتسافر معاه و قال على راى المثل ما ينوب المخلص الا تقطيع هدومه
نور / تمام
امانى / هسيبك و عارفه انك هتعرفي تلينيه و ابقي اللفتى نظره انك انتى اللى مراته مش ندى عشان يتحمقلها اوى كدا
نور / و هو كان حد وجهلى كلمه و سكت على بيتحمق للحق
امانى / والله !! طيب
امانى تقوم
نور / خليكي شويه
امانى / مش باين انى مرغوب فيا هنا ايه ما شوفتيش قام ازاى و دخل و قال عدولى
نور تبصلها امانى تطبطب عليها و تنزل نور تقفل الباب و تدخل الاوضه تلاقي على قاعد على السرير
نور / مشيت
على / بعد ما قومتك عليا
نور / بما انك سمعت اللى هى قالته اكيد سمعت ردى انا ما بسخنش
على / الزن على الودان
نور / بس فى جزء هى معاها حق فيه حسام
على / انا قومت عشان ما اردش و نمسك فى بعض
نور / دا اخويا يا على
على / ابقي انزلى راضيه انتى
نور / و لا حتى عشان خاطرى
على / انا ما غلطتش فيه عشان اعتزر
نور / انت ضربته
على / كان يستاهل اكتر من كدا
نور / دا اخويا يا على
على / و انا مش مانعك عنه و دا فى الاول و الاخر بيتك يجى فى اى وقت و تنزليله فى اى وقت لكن انا … اكيد بتهرجى
نور / دا جارك و مسلم زيك ليه عليك حقوق
على / نور
نور / خلاص براحتك هو كدا كدا مسافر و على كلام ندى مش هتخليه ينزل مصر تانى فبراحتك بقي
على / و اه لو ما فيهاش قله زوق منى ياريت زى ما مامتك طلبت منك تلينيني ياريت تتكلمى معاها و تفهميها انها بتخسرنى لسه بدرى اوى على الخلافات دى و بالنسبالى الخلافات من النوعيه دى هى الاسوء
نور / و الله ماما طيبه جدا و بتحبك
………………..
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية سلف ودين)
