رواية سر الملبوسة الفصل الخامس 5 بقلم إسراء ابراهيم
رواية سر الملبوسة الجزء الخامس
رواية سر الملبوسة البارت الخامس
رواية سر الملبوسة الحلقة الخامسة
كانت واقفة نوارة ومتابعة دياب وهو بيجري بلهفة علي فرحة اللي وقعت في الارض وكانت بتبصلها بغيظ وكر*ه وشافت دياب وهو بيشيلها وبيدخلها اوضتهم فقربت منهم ووقفت عند باب الاوضة وشافته وهو بيحطها عالسرير بخوف ولهفة
دياب بلهفة/ فرحة حبيبتي ،،جومي يا فرحة
نوارة بغيظ /انت هتصدجها يا دياب ،، ده سهوكة بنتة ،، دي بتعمل اكده عشان تخليك تخاف عليها
دياب ساب فرحة وقرب من نوارة بغضب
دياب/ انا مش رايد اسمع صوتك خالص ،، غوري من وشي واياكي يا نوارة تتحدتي مع فرحة او تجربي منيها
نوارة بغيظ/ بجي اكده ،، ماشي يا دياب ،، بكرة تندم وترچعلي تترچاني اسامحك
قالت نوارة اللي قالته وسابته ومشيت ودياب رجع تاني لفرحة وفضل قاعد جمبيها وهو حاضن ايديها وبيتنهد بضيق
……………………….
تحت كانت جليلة قاعدة متوترة وكل شوية تبص عالسلم بتوتر
عرفان باستغراب/ وه ،،مالك يا ولية ،، عمالة تتلفتي يمين وشمال كانك عاملة عاملة ليه اكده
جليلة بهمس/ ما انت مش فاهم حاچة ،، ليك حج تتريج عليا ،، لو كنت شوفت بت اخوك وهي عمالة تهلفط بالحديت وخايفة مني وبتشاور عليا وخليتهم كلهم يشكو فيا
عرفان بصدمة / وه اوعي تكون جالت حاچة ،، انتي مش جولتيلي انها مهتتحدتش ابدا وهتخاف تعمل اكده
جليلة بتردد/ ايوة اني كنت متوكدة ،، بس الحديت ده قبل ما تتچوز اللي اسمه دياب ده ،، انت مشوفتهاش وهي فوج كانت بتتحامي فيه كيف
عرفان بقلق/ بجولك ايه ،، انا بجولك كفايا اكده وناخد بعضينا ونمشي من اهنه وبكفايا اللي حوصل ،، منصور اخوي لو جاله خبر باللي عملناه في بته ممكن يج*تلنا
جليلة بسرعة وهي بتتلفت حواليها/ يا مري ،، وطي حسك يا راچل ليكون حد چاي ويسمعك ،، صحيح علي رأي المثل مشافهومش وهما بيسرجو وشافوهم وهما بيتجاسمو
وهما بيتكلمو دخل عليهم ياسر اللي قعد قدامهم بضيق
ياسر/ اني مش عاچبني الجاعدة اهنه ،، اني مطايجش اشوف فرحة مع اللي اسمه دياب ده
جليلة بسخرية / ماهو انت اللي جليل الحيلة وخليتنا وصلنا لحد اهنه ،، مش لو كنت سمعت حديتي ولينت دماغ البت بكلمتين كان زمانك مكانه دلوك ،، اديك بعملتك خليتها تخاف منك اكتر وبجت بتترعب اما بتشوفك
رباب بمقاطعة /سبحان الله ،،بجي فرحة اللي مكانش حد بيتجدملها ولا رايدها تتچوز راچل كيف دياب والله خسارة فيها ،، بس هنجول ايه ،، حظ
عرفان بسخرية / بلاش الثقة اللي بتتحدتي فيها دي ،، فرحة لولا حديت الناس كان زمانها جالها كتير بيتمنو بس نظرة منها ،،
رباب بضيق/ چري ايه يا بوي ،، هو انت جاصد تحر*ج دمي عاد
كانت خارجة شادية من المطبخ وشافت اخو جوزها عرفان قاعد هو ومراته وعياله بيتوشوشو
شادية بقلق لنفسها /يا ساتر يارب ،، ربنا يعميكم عننا ،، اني مخبراش ميتي هتغورو من اهنه ،، ربنا يستر ويعديها علي خير
………………………………
في اوضة فرحة كانت نايمة عالسرير وبتتململ وهي بتفتح عنيها ولقت دياب قاعد جمبها وركزت فيه وهي بتفتكر اللي حصل واللي سمعته من دياب ونوارة فعنيها دمعت ودياب انتبه ليها فقرب منها بلهفة
دياب بلهفة/ فرحة الحمد لله انك فوجتي ،،اني كنت خايف عليكي جوي
فرحة بدموع/ متجربش مني ،، اوعاك تجرب يا دياب ،، اني دلوك فهمت كل حاچة ،، بس ليه كدبت عليا ،، كنت جولتلي الحجيجة
دياب بحزن / الحجيجة كانت مُرة يا فرحة ،، اني خابر اني چر*حتك بس صدجيني ،، الموضوع مش كيف ما سمعتي خالص
فرحة بحزن/ بالعكس انا دلوك فهمت كل حاچة ،، فهمت ليه مردتش عليا لما سألتك اول يوم انت ليه اتچوزتني وانت حتي مشوفتنيش جبل سابج ،، ولما سألت نفسي ليه صبرت علي حجك ومجربتش مني حتي بعد ما جولتلك اني مبجتش خايفة منك واني رايدة اكمل معاك حياتي ،، دلوك فهمت يا دياب
دياب بقبضة في قلبه/ لا يا فرحة ،، نوارة مش السبب ،، صدجيني ،، اني مكنتش رايد اجربلك غير لما تعرفي الحجيجة
فرحة وهي بتقوم / الحجيجة انك اتچوزتني عشان تكيد نوارة بعد ما هملتك واتچوزت اخوي ،، كنت رايد تثبتلها انك ممكن تعمل كيف ما هي عملت وتتچوز بت العمدة الملبوسة اللي ما هيصدجو اهلها اي عريس يچيلها ماهي مش هتفرج بجي لانك اكده ولا اكده مكنتش هتكمل معاها
قبل ما دياب يتكلم قا*طعته فرحة وهي بتقرب منه وبتبص في عيونه جامد
فرحة بجمود/ لساتك عاشجها مش اكده يا دياب ،، لساتها في جلبك وعشان اكده مجدرتش تصارحني وتجولي ولا حتي تجرب مني
دياب بلهفة/ محصلش يا فرحة ،، اقسملك بالله مش اكده خالص ،، متنسيش انها بجت متچوزة يعني مينفعش حتي ابصلها ،، نوارة بقت ماضي يا فرحة
فرحة بدموع / مجاوبتش برضك علي سؤالي وهربت منه عشان هي لسة ساكنة في جلبك مش اكده يا دياب
دياب بتنهيدة/ فرحة انا
نوراة بمقاطعة/ مرايداش اسمع حاچة يا دياب ،، هو شهر كمان وتطلجني وتمشي من اهنه للابد ،، واللي بيناتكم انا ملياش صالح فيه
قالت فرحة اللي قالته وسابت دياب ودخلت الحمام ووقفت ورا الباب وبقت تعيط بحرقة وهي حاطة ايديها علي وشها عشان دياب ميسمعش ودياب في الأوضة كان قاعد وحاطط وشه بين ايديه بغضب ومشاعره تايهة مش عارفة طريقها
……………………………….
بليل كان الكل متجمع تحت بعد العشا ماعدا فرحة ودياب اللي نازل عالسلم وهو في قمة غضبه
شادية بابتسامة/ وه اهو دياب چه اهو ،، اومال فينها فرحة يا ولدي منزلتش ليه عاد
دياب بابتسامة باهتة / فرحة نايمة يا خالتي وهتنزل كمان شوية
قرب دياب منهم وقعد قدام عرفان اللي بص لجليلة بتوتر
دياب بجدية / اومال عمي منصور فينه يا خالتي
شادية بابتسامة / خرچ هو من شوية عشان شيخ الجامع شيعله عشان في مشكلة مع حد في البلد
حرك دياب راسه بتفهم وقام مرة واحدة وقرب من ياسر اللي قام وقف بتوتر وقبل ما يسأل دياب في ايه كان دياب ضر*به بالبو*كس في وشه خلاه وقع عالكنبة ووقتها شهقت شادية بخضة وجليلة اتأكدت ان فرحة قالت لدياب علي كل حاچة
شادية بخوف/ في ايه يا دياب ،، بتض*رب ياسر ليه عاد
عرفان بصوت عالي / انت مفكره دارك وهتتحكم فيه من اولها انا مش هسكت انا
سكت عرفان مرة واحدة لما دياب بصله بغضب بصة خرسته ورجع دياب مسك ياسر وفضل يضر*ب فيه وهو مش سامع صوت شادية وهي بتكلمه وبتحاول تبعده عنه وبعد ما خلص ض*رب فيه مسكه من لياقة قميصه
دياب بهدوء جحيمي / ده عقابك عشان بس فكرت تجرب من فرحة مرتي ،، وانتو انا مش رايد اشوف خلجة حد منكم انتو الاربعة اهنه مرة تانية ولو حد فكر يجرب من اهنه ولا يچي يامة مرتي تاني مش هيحصله طيب ووجتها اني هجول لعمي منصور وچابر عاللي حصل كله ونشوف ايه اللي هيحصل بجي وجتها
شادية باستغراب / انت بتجول ايه يا دياب ،، انا مش فاهمة حاچة واصل من اللي جولته وايه علاقة فرحة بالموضوع ده
دياب بهدوء/ هحكيلك بس بعدين يا خالة،، انتو لسة اهنه ؟
جليلة بسرعة /لاه احنا ماشين اهو ،، هم بينا يا عرفان ،، جوم يا ولدي
ياسر بص لدياب بخوف ومشي مع ابوه وامه واخته وكل ده كانت متابعاه نوارة بغيظ لانه عمل كل ده عشان خاطر فرحة
شادية بقلق/ فهمني يا ولدي الله يرضي عنيك
كان دياب هيتكلم بس اتفاجأ بفرحة بترد وهي نازلة عالسلم بعد ما شافت كل حاجة عملها دياب مع ياسر ابن عمها وابوه وعنيها منفخة من العياط وبتتكلم بجمود
فرحة/ اني هفهمك ياما ،، دياب كتر خيره عمل اللي اني مجدرتش اعمله ،، طرد عمي وعياله اللي كانو السبب في اللي اني فيه ،، كانو السبب في ان الناس تجول عني عفشة وملبوسة ،، ياسر واد عمي اته*جم عليا ياما ،، كان رايد يدوس علي عرض وشرف ابوي وعشان اكده اني هربت وطلعت الشارع بخلاجاتي وشعري المنكوش عشان استنجد بحد بس الناس ما صدجو لاجو حاچة يتحدتو عليها ودياب هو الوحيد اللي مخافش وجرب مني واتجدملي ،، اينعم مكنش عشاني ،، بس ربنا كان بعته ليا نچدة عشان ياخد حجي من اللي عمل فيا اكده
شادية وهي بتقرب من فرحة وبتعيط/ حجك عليا يا بتي ،، بجي كل ده يحصلك واني مش دريانة ،، حجك عليا يا نن عيني
نوارة بابتسامة وهي بتبص لدياب/ طول عمره دياب وهو راچل وسيد الرچالة كلياتهم ،، اصل محدش خابره جدي دايما بيدافع عن اي حد مظلوم ويچيب حجهم
دياب بص لفرحة بتوتر وحزن وفرحة كانت بتنقل نظرها ما بينه وبين نوارة بجمود وقلب مفطور
شادية بابتسامة / طبعا دياب راچل وفعلا بتي ربنا عوضها خير بيه ،، خلاص يا بتي انسي اللي فات واهو ربنا يخليلك چوزك ،، هو راچلك اللي يحميكي بنن عنيه
فرحة ابتسمت بسخرية وحزن ومردتش علي امها وشوية ودياب قام طلع لما حس ان فرحة مش معاه اصلا وكل ما عنيهم بتتقابل بتدور وشها بعيد عنه وبعدها علطول طلعت نوارة وفرحة الغيرة كل*ت قلبها رغم انها كانت بتقول لدياب انها هتطلق منه بس هي حبته واتجننت لما شافت نوارة طلعت وراه فقامت هي كمان وطلعت وراهم وكان شكها في محله لما قربت من اوضتها وسمعت صوت نوارة
نوارة بحزن/ دياب انت بتكابر بس عشان واخد علي خوطرك مني ،، بس انا مش محارباك ،، اني لساتي بحبك
ضر*بها دياب بالقلم اول ما قالت نوارة كدة وشهقت فرحة بصوت واطى وهي سامعة صوت القلم
دياب بح*دة/ اوعاكي تتحدتي في الموضوع ده مرة تانية ،، وبلاش ترخصي نفسك اكتر من اكده ،، اني چايز لما اتچوزت فرحة كنت مچر*وح منك وكنت بردلك الجلم اللي اديتهوني ،، بس لما شوفت فرحة وعرفتها زين عشجتها ،، مبجتش شايف غيرها ،، جدرت تسكن جلبي وتنسيني اي حاچة حوصلت جبل ما اعرفها ،، ودلوك لو متعدلتيش وبطلتي حديت في الموضوع ده ،، اني هاخد فرحة واهمل الدار كلها ليكي واشبعي بيها
نوارة بحرقة/ وانت فاكر انها عاشجاك اياك ،، فرحة زي الغرجان اللي متعلج بجشة ،، وبعد ما عرفت اللي كان بيني وبينك لا يمكن هتبصلك ولا هتوافج انها تكمل معاك ،، وبكرة تجول نوارة جالت يا دياب
فرحة بقوة/ ومين اللي جالك اني هعمل اكده يا نوارة
دياب اتصدم من كلام فرحة وانها سمعت اللي دار بينه وبين نوارة
نوارة بغضب / وايه اللي غير رأيك يا عروسة دلوك ،، هتكملي معاه وانتي خابرة ومتوكدة انه بيعشج غيرك ،، خابرة انه معشجش غيري وانا بس اللي ساكنة جلبه
فرحة بسخرية/ كنتي ،، كنتي يا نوارة ،، مش عيب انه كان بيعشج جبلي ،، غلطت دياب الوحيدة انه خبي عليا ومصارحنيش ،، هو ده اللي زعلني منه ،، لكن ده مش معناه اني هسيبه او اخليه يطلجني وكفاية عليا اني سمعته بودني وهو بيجولك انه بيعشجني وان اني اللي ساكنه جلبه دلوجتي ،، فلو عنديكي كرامة ومرايداش تخربي علي نفسك ،، بعدي عنه وخليكي في چوزك اللي بيحبك واتحدي ابوي وامي عشانك
نوارة بصت لفرحة بغضب وبعدين نقلت نظرها لدياب وسابتهم ومشيت وهنا قرب دياب من فرحة بسرعة بس فرحة شاورتله يقف مكانه
فرحة بحزن/ اجف مكانك يا دياب ،، اني مسمحتكش كيف ما انت فهمت
دياب بحزن/ فرحة انتي سمعتي كل حاچة بودنك ،، صدجيني هي دي الحجيجة اني مكدبتش في حاچة
فرحة بتنهيدة/ خابرة يا دياب ،، واللي انا جولته لنوارة ده كان لاجل ما ارد كرامتي جدامها واخليها تهملك في حالك ،، بس انا لسة عند قراري ،، هتطلجني يا دياب
دياب بقوة/مش هيحصل يا فرحة ،، اني ما صدجت لجيتك ،، ما صدجت الاجي جلب كيف چلبك وبراءة كيف اللي في عيونك ،، اني بحبك يا فرحة ولو ايه اللي حوصل بيناتنا اني مش هطلجك وهتفضلي مرتي لحد ما اموت
فرحة بلين / يعني حتي لو جولتلك اني فعلا ملبوسة
دياب براحة وابتسامة جذابة / حتي لو عليكي مليون عفريت ،، بعشجك يا فرحة جلبي
فرحة بابتسامة / وانا كمان يا دياب معشجتش غيرك بس لو فعلا رايدني يبجي نهمل الدار ونجعد لحالنا بعيد عن اهنه
دياب بعشق/ من غير ما تجولي ،،ده اللي كان هيحصل ،، واني ميفرجش معايا غيرك ،، وانك تكوني چاري يا فرحة جلبي
تمت
لقراءة الرواية كاملة اضغط على : (رواية سر الملبوسة)
