رواية سديم الفصل الثاني 2 بقلم هايدي ابراهيم
رواية سديم الجزء الثاني
رواية سديم البارت الثاني
رواية سديم الحلقة الثانية
– أنتِ كان ممكن تموتيني بالعملة دي!
حاولت اتمالك أعصابي، راجل مبيتفاهمش أبدًا قولتله:
– بص يا فندم قولت لحضرتك أنه بدون قصد خبطت في الزرعة فوقعت وحضرة الظابط قال أعوضك ووافق إني أدفعلك مصاريف المستشفى وأعتذرتلك.
لسة هيتكلم ويعيد في اللي قاله اتعصبت وقولت بنبرة عالية نسبيًا:
– جات سليمة أحمد ربنا إن محصلكش حاجه غير ست غرز بس.
– أنتِ ازاي تتكلمي معايا بالأسلوب دا سجل عندك يا حضرة الظابط.
الصراحة الظابط معجبهوش أسلوب الراجل فمضاني على كام ورقة وقالي:
– روحي يا آنسة ودخلي زرعاتك جوا بعد كده.
اتنهدت بعد ما مشيت من المكان دا، أول مرة أدخل قسم شرطة، لا وداخلة معورة واحد يعني الحمدلله إن بابا وماما مش موجودين، رغم إن بابا لو كان هنا كان حلها ودي مع الراجل في المستشفى في دقايق بس أنا لساني أطول مني حرفيًا ومع أول كلمة الراجل نطق بيها طلعت فيه رغم أنه حقه أصله واحد مفتوح راسه وواخد ست غرز عايزاه يقولك شكرًا على التعويرة مثلًا!!
بس مش من حقه أبدًا أنه يتكلم معايا بأسلوب قليل الذوق كده.
مشيت خطوتين سرحانة وفجأة سمعت صوت كلاكس عربية وحد من جوا العربية بيصرخ وبيقول:
– ما تركزي ولا أنتوا بقت شغلانتكم ترموا بلاكم على الناس!!
– أحترم نفسك يا بتاع أنتَ وأمشي في حال سبيلك بلا هم.
طلعت مني الجملة بعصبية ولو أطول كُنت روحت ضربته بس فلت لما ساق العربية وجري بيها.
روحت البيت قبل المغرب بساعتين طلبت أوردر بما إن ماما مش موجودة، انا بعرف أطبخ آه بس الأكل مع العيلة أحسن بكتير قعدت على موبايلي شوية وفجأة جاني اتصال من بتاع الأوردر:
– الو
رد وقالي:
– إحنا آسفين يا فندم الأوردر بتاع حضرتك أتلغي في عطل في المكنه.
– قصدك أنه هيتأخر ولا مش جاي خالص؟
اتنهد وقالي:
– لا مش هيجي يا فندم المطعم وقف شغل لحد التصليح عن إذنك.
قفل معايا واكتشفت أنه فاضل نص ساعة على المغرب وأنا ولا عملت أكل ولا في أوردر جاي.
اتنهد وأنا بقول:
– اهو المنحوس منحوس ولو علقوا على راسه فانوس.
أخدت بعضي ونزلت أدور على أي مطعم بيفتح للعائلات وقت المغرب وبالفعل لقيت في سكتي واحد قعدت وطلبت الأوردر واستنيت لحد المغرب.
سمعت دوشة غريبة في المطبخ بتاع المطعم لحد ما طلع واحد معاه صنية الأكل وحطها قدامي بعصبية وقالي:
– أي خدمة تانية؟!
رديت وقولتله:
– إزازة ماية وأي نوع عصير عندكم مش هتفرق.
حرك راسه وراح جابلي وبعدها بدقيقتين المغرب أذن ودخلوا كلهم يفطروا جوا وفضل بتاع الكاشير برا واللي كان حاطط قدامه أكل بردو وبيفطر.
وبعد ما خلصنا وحاسبت ومشيت سمعت صوت صريخ جامد في الشارع، مشيت ومهتمتش بس الصريخ زاد ولقيت واحدة بتقرب مني وبتقول:
– الحقيني بالله عليكي عايز يموتني.
اتعصبت من كلمتها وقولتلها:
– يموتك يعني أيه هي سايبة!!
أنا قولت في بالي لو دول نصابين مش هيلاقوا حاجه في الشنطة دا حتى البطاقة في البيت ولو بجد أكون عملت خير وانقذتها منه وعملت فيها سوبر هيرو بقا وقولتلها:
– هو فين دا؟
فجأة لقيت راجل جتة طول بعرض وكبير في السن دقنه طويلة وفيها شعرات بيض جاي وغضب الدنيا في عيونه وقال:
– أنتِ حتى لو استخبيتي ورا الجن الأزرق هجيبك، أخرة تربيتي فيكي مشيالي مع واحد ولا يسوى وأنا اللي كُنت مفكر إني مربيكي على الألف خدي هنا.
الصراحة منظره وهيئته لما قرب مننا خوفني واتوترت، فعلًا البنت سابتني وراحت ليه ومن الواضح جدًا أنه أبوها بصتلي بصة مش عارفه هي أيه بس كُنت هلحقها شاورتلي بلا.
بلعت ريقي وأنا بتخيل هيحصلها أيه يا ترى.
روحت البيت وأنا بقلع الكوتشي وبتنهد دخلت أوضتي رميت نفسي على السرير وقولت:
– نحس، بالله نحس مش عارفه أيه اليوم اللي كله نحس دا.
وفجأة لمع في أيدي الخاتم للمرة التانية يعملها ويلمع بالطريقة دي افتكرت لما ادتهولي سارة وهي بتعيط وبتقولي:
– خديه علشان خاطري مش عايزاه.
حاولت أفهم منها فيه أيه سابتني ومشيت وسافرت مع باباها لبرا مصر ومهما بعتلها في مسدجات مش بترد
لحد ما رنت عليا وأنا بفتكر دلوقتي وقالتلي:
– أزيك يا سديم، سبيني أتكلم متقاطعنيش علشان مرجعش في كلامي، أنا ضميري مأنبني ولازم أعترفلك بكل حاجة…
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية سديم)
