رواية سجينة مع وقف التنفيذ الفصل السابع عشر 17 بقلم أميرة أسامة
رواية سجينة مع وقف التنفيذ الجزء السابع عشر
رواية سجينة مع وقف التنفيذ البارت السابع عشر
رواية سجينة مع وقف التنفيذ الحلقة السابعة عشر
وصل خليل و ولاده ومراته بعد الفطار بشويه. بعد السلام و الترحيبات و تعارفهم بريم اللي كانت حزينه ومش بتعمل اي حاجه غير تبتسم وبس.
خالد ورغده و والدتهم شهيره كانوا مصدومين في البدايه ان عاليا هي نفس البت اللي بنت خالتها عملت الحادثه مع علي لكن خليل فهمهم كل حاجه عشان رغده بالذات متقعش بلسانها وتفتح الموضوع ده.
كانت هي وخالد مضايقين من تصرف ناصر معاها لكن خليل فهمهم وجهه نظره و الحاله اللي كان فيها.
خليل…كنتي مخبيه عننا القمر دي فين بس يا عاليا يا بنتي.
عاليا…بأبتسامه مسكت ايد ريم بحنان مش مستخبيه ولا حاجه الحمد لله القمر رجع ظهر تاني.
ريم…شكرا لحضرتك.
رغده…قوليلي ياعاليا هو انتوا عندكم عرق تركي او اجنبي🤔
عاليا…بضحك لا والله اصولنا مصريه.
رغده….ولا حتي من المنصوره اصل بيقولوا بتوع المنصوره حلوين🤔😂
عاليا….لا ياستي احنا من القاهره العيلتين بابا وماما بس يمكن احنا شبه عيله ماما اكتر ماما الله يرحمها كانت جميله جدا و خالتوا كمان كانت زي القمر فا طلعنا شبههم.
رغده…حبيبتي يا عاليا ماشاء الله ربنا يحميكم.
ناصر كان قاعد مبتسم كلامه قليل بيرد لو اتوجهلوا كلام كل شويه يبص في الساعه ورجله بيهزها جامد كان باين عليه التوتر الكبير
سيف وخليل كانوا بيبصوا لبعض كل شويه حاسين ان ناصر مش طبيعي
خليل….ايه اخبار شغلك يا سيف
سيف…الحمد لله كله تمام.
خليل…والدولار عامل ايه علي حسك.
سيف…اهو عمال يطلع لما مبقيناش عارفين نمسكه😂
خالد….الدولار دمر الدنيا الفتره دي
سيف…ده حقيقه الناس فعلا تعبانه وعلي اخرها
خليل….بس دي أزمه عالميه للأسف
سيف….الناس متعرفش كده يا خليل بيه للأسف الناس مطحونه والكل جاب اخره.
خالد….ده حقيقي الاول مصر كانت 3 طبقات طبقه فقيره طبقه متوسطه وطبقه غنيه او اللي بيسموها الكريمه لكن الوقت للاسف مبقاش في طبقه متوسطه اتعدمت بقي في غني وفقير
سيف….يمكن صح بس تعديلاً لكلامك يا خالد هي طبقه غنيه وطبقه فقيره وطبقه تحت خط الفقر.
رغده….عندك حق واللي يحزن بجد ان الطبقه الفقيره هي اللي حاسه بالطبقه اللي تحت خط الفقر لا الغني ولا الدوله باصه خالص علي الطبقه دي ديما المحتاج هو اللي بيحس بغيره بالظبط زي ما الطبقه الفقيره بتعمل مع الطبقه اللي تحت خط الفقر.
سيف….الوقت اللي احنا فيه ده للأسف يخوف اوقات كتير بحس اننا داخلين علي (ثوره جياع)
زي اللي حصل من 100 سنه نفس الفتره دي بنعيشها الوقت
خليل….ربنا يتولا الناس برحمته
خبط الباب في الوقت ده كان عمر
دخله ناصر وعرفه علي خليل واولاده ومراته و عرفهم بعمر
قعدوا مع بعض و بعد تعارفهم ببعض اتكلموا في كذا موضوع و اندمج عمر معاهم
وفضل ناصر في دنيا تانيه اغلبهم كان مركز معاه عشان عارفين ان سكوته ده مش طبيعي لكن عاليا تركيزها معاه كان اكبر حاسه انه متغير بقاله يومين مش هو ناصر اللي ديما قريب منها مش هو ناصر اللي في عز وجعه موجود
اللي قدامها واحد تاني غضبه عاميه ومخليه مبقاش شايف حد وكانت واثقه ان في حاجه حصلت مخلياه بقي كده و شايفه انه وصل لحاجه بخصوص عز ودي اكتر حاجه كانت رعباها.
عمر….ايه يا ريم مش يلا بينا بقي نفك السلك.
ريم….انا خايفه
رغده…خايفه من ايه بس ده فك السلك ده سهل اوي مفكتيش سلك قبل كده ولا ايه.
ريم….لا اول مره اتخيط اصلا.
خالد….شوف بتقولها ازاي كأنها متعوده😂😂
سيف…بضحك مش دكتوره وعارفه.
خليل…بضحك لا مش حكايه دكتوره بس رغده اتخيطت كتير اوي كانت طفله متشرده 😂
شهيره…ومازالت😂
رغده…بضحك شايفه ياست ريم اهي الحفله بقت عليا عشان خاطرك بس انتي مش فاهمه انا فعلا كنت شقيه جدا بلعب طول الوقت وبتحرك كتير وكل وقعه ليا كانت بتنتهي بكارثه هو انتي فاكره اني كنت بقت زي الاطفال اعيط و اقوم وخلاص😎 لااااا انا وبلا فخر كل وقعه بخياطه مره في حاجبي زي ما انتي شايفه كده عامله موضه الشباب بس رباني 😂😂 ومره في راسي ومره في رجلي
سيف…انتي ضايعه خالص😂😂
خالد….ده حتي وراء ودنها مفتوحه عمرك شوفت طفله تتفتح ودنها لحد انهارده نفسي اعرف وقعت ازاي عشان وراء ودنها يتفتح😂😂
ضحكوا كلهم علي خالد ورغده اللي ديما بيدوا للمكان بهجه.
رغده…هو واضح فعلا ان الحفله عليا.
عمر…بضحك اسمحيلي يا آنسه رغده عندهم حق انا كا دكتور مشوفتهاش الوقعه دي من الاخر انتي كويسه لسه سليمه يعني😂
رغده…بضحك كنت عيله صغيره بقي يا جدعان والاطفال احباب الله
شهيره….يا جدعان دكتوره وبتقول يا جدعان عليه العوض ومنه العوض😂
سيف…اهي العيله الصغيره دي لسه لحد عيد الاضحي اللي فات مخيطه صباعها😂😂
رغده….بضحك لا عندك المرادي مكانش ليا ذنب ماما هي السبب تنكري🤔
شهيره…لا منكرش بصراحه خليل كان دابح وطلب مني اسنله السكينه دخلت سنتها وجايه اخرج من المطبخ وبلف لقيتها في وشي اتخضيت وايدي رجعت لورا وانا بشد ايدي قطعت صباعها.
خالد….بضحك بنت حلال وتستاهل راحت تسن السكينه مخصوش عشان صباعك يجربها حاميه ولا لا😂😂😂😂
سيف…بضحك والله انتوا كارثه 😂 فاكر يا خالد لما كنتوا تيجوا البلد في العيد ونلعب سوا و نمشيها معيطه عشان مبنرضاش نلعبها معانا😂😂😂
خالد….كانت عيله رخمه ومازالت.
رغده…والله انا طول عمري مظلومه مع العيله دي😂😂
خليل…بضحك قوم يا ابني شوف شغلك دول جوز مجانين مش هتخلص منهم😂😂
عمر…بضحك ماشي يلا يا ريم
عاليا….طيب ممكن تتفضل في الاوضه عشان تكون براحتك.
عمر…طيب هحتاجك معايا عشان تساعديني.
عاليا…بخوف لا انا بخاف
رغده….انتوا جيبنا هنا تقلوا مننا ولا ابه يا جدعان معاك دكتوره رغده حاجه كده من الاخر ميغركش شويه الضحك والهزار انا دكتوره شاطره علي فكره.
عمر…بضحك انتي مشكله خلاص اتفضلي معايا.
سيف….وانا كمان جاي معاكم اتفضل يا دكتور عمر تعالي يارغده.
رغده….دكتوره رغده لو تكرمت😎
سيف…بضحك اتفضلي يا سعادت الدكتوره العظيمه رغده😂 حلو كده.
رغده…مش بطال😎
دخلوا مع بعض الاوضه ودخلت معاهم عاليا بس كانت واقفه باصه لريم عشان متشوفش السلك وهو بيتفك.
اما في الخارج فضل ناصر وخليل ومراته وخالد.
خليل….ايه يا ناصر مش بعاده اشوفك ساكت كده.
ناصر….لا ابدا يا خليل باشا
معاكم طبعاً
خليل….راسك فيها ايه يا أبن المنشاويه؟
ابتسم ناصر و بصله اول مره تجولي يا ابن المنشاويه.
خليل….بفكرك بعيلتك يا ناصر اللي عمرهم ما مدوا ايدهم في الدم.
خالد….ناصر انت عارف انا بحبك قد ايه وانت وسيف وعلي الله يرحمه غاليين عندي اوي بلاش اللي بتفكر فيه يا ناصر متضيعش نفسك الحق عمره ما بيضيع انا وانت شباب ويعتبر من سن بعض وانا فاهمك وفاهم دماغك وعارف كويس اوي اللي انت حاسس بيه بس خلينا نحسبها بالعقل
ناصر…بحزن عجل ايه يا خالد مبجيش فيها عجل خلاص حاولت كتير أحسبها بحسبتكم بس برچع واحس اني مش جادر بتخنج وبحس روحي بطاع في الروح وتاچي صوره علي في عيني وصوته في وداني أرچع عن حسبتكم وميفضلش غير حسبه التار
خالد….يمكن عشان اللي مسيطر عليم اكتر هو احساسك باخد التار لكن لو حسبتها صح يا ناصر في ايه في الدنيا يستاهل انك تضيع حياتك عشان واحد زي ده
ناصر…في علي يا خالد علي يستاهل اضيع حياتي وروحي وكل حاچه عشانه عشان اريحه في نومته و اردله چزء بسيط من الوچع اللي اتوچعه
خليل…يا ناصر يا ناصر افهم عز كده او كده ميت يبقي ليه تضيع نفسك و راحه علي عمرها ما كانت في آذيتك علي هيرتاح لو الدليل اتقدم وعز خد جزاءه.
شهيره….اسمحلي يا استاذ ناصر اتدخل في الكلام.
ناصر…العفو يا افندم
شهيره….انا شايفه ان خليلي وخالد معاهم حق يمكن اللي هقوله ده ميعجبكش بس لازم تفكر فيه علي اخوك مات خلاص والمثل بيقول الحي ابقي من الميت كلامي ده مش معناه انك تسيب حقه بالعكس ده انت ربنا بيحبك عرفك اللي قتل واللي انت كنت معاه ومتعرفش ان هو القاتل و كمان ربنا مش بس عرفك هو مين ده بعتلك دليل قوي يوم ما هتسلمه هيجيبله إعدام فوراً يعني هتريح اخوك في تربته عايز ايه تاني ليه تضيع نفسك انت لسه قدامك عمر وزي ما قولتلك الحي ابقي من الميت انت حواليك ناس عايشه كتير يا استاذ ناصر محتاجينك و عايزينك جمبهم تكون سندهم وقوتهم اولهم جدتك وانت عارف انت بالذات بالنسبالها ايه وسيف اللي مبقاش ليه غيرك وبلد كبيره انت كبيرها وناسها متعلقين في رقبتك صغيرها قبل كبيرها فكر بهدوء وبلاش تاخد قرار في لحظه غضب
خليل….لازم يا ناصر نطلع بكره عالنيابه نسلم الڤديو ونقدم كل اللي عندنا سيب الحكم للحكومه يا ناصر وانا هفضل معاك وعز كده كده قضيته خلصانه هياخد إعدام
ناصر…..هملني لحد بكره هرد عليك صدجني و يحلها ربنا من عنديه.
خليل….هسيبك يا ناصر بس اعمل حسابك اني مش هسيبك تعمل اللي في دماغك مهما حصل.
خرج عمر ورغده بعد ما فكوا لريم السلك.
عاليا….ايه يا حبيبتي في اي الم
ريم….لا خالص الحمد لله.
سيف….طيب مش هتخرجي بره
ريم….لا انا محتاجه انام شويه حاسه اني مصدعه اوي.
عاليا….ماشي ياحبيبتي نامي.
ريم….عاليا شعري باين اوي انه مقصوص🥺
عاليا….لا خالص والله يا قلبي دي حته صغيره اوي وبعدين باقي شعرك مش بينها.
سيف….ما تفكي بقي وتفرحي انك فكيتي اخيرا الشاش ده ولو علي شعرك يا ستي هيطلع تاني وبعدين بقي كده او كده زي القمر هتفضلي باربي.
عاليا….بضحك شايفه بيعاكسك قدامي بس انا هعمل نفسي مسمعتش🤨
ريم…بضحك معلش خليها عليا.
سيف….بضحك معرفش انا الناس اللي بتتحشر دي اه ياستي بعاكسها في حاجه
ابتسمت ريم وسكتت.
عاليا….ايوه في بتعاكس اختي قدامي.
سيف…بضحك طب اتفضلي اطلعي بره عشان اعاكسها براحتي وبصراحه انتي عامله زي العزول.
عاليا…اطلع بره كمان عايز تستفرد بأختي قدامي يلا علي بره🤨
سيف…بضحك يا ساتر عليكي شايفه اختك انتوا كويس انكم ملكوش اخ ولد كان زمانها بقت حماه لمرات اخوكي😂😂
عاليا….طبعا انت فاكر ايه .
سيف…بضحك شوفتي كان قدامك عريس زي القمر واختك اهي بعمايلها دي بتطيره منك.
عاليا…عريس عريس لمين لريم طب ده اللي هيجي جمبها هطلع عينه و هبقي حماته و هكرهه في عيشته مش كفايه انه جاي ياخد حته من قلبي.
سيف…بأبتسامه ياستي انا راضي طلعي عيني و اعملي اللي انتي عيزاه بس توافقي😉
ريم….بأبتسامه بسيطه و إحراج سكتت
عاليا…بضحك والله افكر
سيف….طب يلا سبيها ترتاح بقي وهبقي اجي اتقدملها وقت تاني ماشي يا باربي.
ريم…بأبتسامه ماشي
عاليا…هو ايه اللي ماشي انتي كمان 🤨
سيف…بضحك يا اعوذ بالله يلا قدامي وسبيها ترتاح وانا اللي كنت فاكرك كيوت وطيبه😒
خرجوا مع بعض وهما بيضحكوا و سابوا ريم تنام شويه.
ابتسمت ريم بعد ما خرجوا ونامت علي السرير ورجعت تاني لحزنها.
……..
بمجرد ما خرجت عاليا أختفت أبتسامتها هي وسيف من تاني.
سيف…..متقلقيش هتبقي كويسه.
عاليا…يارب يا سيف نفسي بقي ارتاح واحس اني فوقت من الكابوس ده
سيف….هنرتاح كلنا قريب يا عاليا وهنقنع ناصر انه يقدم الڤديو للنيابه وعز هيتجاب ونخلص بقي
عاليا…ياريت يقتنع يا سيف انا مش مطمنه خالص ناصر متغير اوي بقاله كام يوم مكلماته الكتير دي موتراني حتي عمو مرعي بقي يتوشوش معاه كتير بس يلمحوني يسكتوا وبصراحه انا مكسوفه اني أسأله لاني سبق واتكلمت معاه ووصيته انه يحاول يقنع ناصر و قاللي انه مش هيسمحله يآذي نفسه طيب بتتكلموا الوقت في ايه و بتنزلوا كتير ليه
سيف….مرعي لايمكن يبقي عارف ان ناصر هيآذي نفسه يا عاليا ويوافق بكده اكيد بيتكلموا فحاجه خاصه بالشغل
عاليا…والله ما بقيت عارفه يا سيف انا كل الحكايه اني مش مطمنه ابدا وقلبي مقبوض حتي ناصر مبقاش مديني فرصه اتكلم معاه بصت لسيف ودموعها بتلمع في عينها وانا خايفه عليه يا سيف🥺
أبتسم سيف بهدوء متخفيش عليه يا عاليا ان شاء الله مفيش حاجه هتحصل تعالي يلا نشوفهم.
مسحت عاليا دموعها وحاولت ترجع أبتسامتها وخرجوا تاني ليهم بره.
قعدوا معاهم وفضلوا يتكلموا في كذا حاجه مختلفه رغده وخالد اندمجوا مع عمر وسيف
عاليا كانت بتتكلم مع شهيره وخليل عن حاله ريم
اما ناصر بأستآذن بهدوء ودخل علي البلكونه اتصل علي مرعي.
ناصر….ايوه يا مرعي عملتوا ايه.
مرعي….لسه يا ولدي.
ناصر…بغضب لسه ايه يا مرعي جولتلك اني معايزش انهارده يعدي من غير ما أچيب الكلب ده
مرعي….احنا وراء الواد من بدري وجت الفطار طلع بيته ومن وجتها منزلش
ناصر…أوعاكم يكون حسن بيكم
مرعي…لاه اطمن محسش بينا احنا بعيد عنيه خالص
ناصر….ماشي يا مرعي أي چديد بلغني بيه واني بس الناس اللي عندي تمشي وهشوفك فين وأچيكم.
مرعي…ماشي يا ولدي
ناصر….سلام يا مرعي.
مرعي….ناصر!!
ناصر…ايوه يا مرعي.
مرعي….عايزك تعرف يا ولدي اني ماشي وراك مطاوعك بس انت وعدتني وانت خابر ان وعد الرچال كيف السيف عالرجبه أوعاك يا ولدي تكون بتلعب بعجلي أوعاك تعيشني بحصرتي العمر كله وتخليني اندم كل دجيجه اني صدجتك
اتنهد ناصر وغمض عينه بحزن متخافش يا مرعي اعمل بس اللي جولتلك عليه سلام يا مرعي.
مرعي…بقلق سلام يا ولدي.
……………
خرج ناصر كمل قعدته معاهم وكل ثانيه يرفع عينه علي عاليا اللي كانت مرقباه بعيونها ونظره الخوف اللي كانت بتبصله بيها كانت بتتعبه اكتر بسرعه يبعد عينه عنها من تاني.
بعد حوالي ساعه أستآذن اول واحد فيهم عمر عشان يرجع إسماعيليه سلم عليهم كلهم وسلم علي ناصر وفضل يوصيه من تاني انه يفكر في كلامه ويبلغ
وبعد حوالي نص ساعه أستآذن خليل واسرته بعد ما اكدوا من تاني علي ناصر يشيل فكره التار من راسه وبعدها آستأذنوا
نزل معاهم سيف يوصلهم لحد تحت.
وبمجرد ما نزلوا اتصل ناصر علي جدته يطمن عليها.
………
سيف….نورتنا يا خليل باشا نورتينا يا مدام شهيره والله.
شهيره….ده نوركم والله ياسيف
سلموا علي سيف وركبوا وفضل واقف معاه خليل وخالد.
سيف….تعبتك معايا يا خليل باشا والله.
خليل….تعب ايه بس يا سيف خلينا في المهم عايز عينك علي ناصر يا سيف انهارده بالذات
سيف….اشمعني انهارده بالذات هو قالك اي حاجه.
خليل….ناصر مكانش بيتكلم اصلا بس اخوك مش طبيعي يا سيف وكل تصرفاته تقلق طول الوقت باصص في ساعته وماسك موبايله كانه مستني حاجه ولازم تعرف حاجه خبيتها عليك مرعي لما رجع من الصعيد يا سيف مرجعش لوحده.
سيف…بصدمه تقصد ايه بمرجعش لوحده دي؟
خليل….مرعي جاي ومعاه رجاله من البلد اربعه واخوك سكنهم في بانسيون جمبكم هنا عشان يكون قريبين منه و انضملهم رجاله تاني بس مش من البلد مش عارف تبع مين او جابهم ازاي عموما انا بس بعرفك ان عيني علي ناصر وعارف كل تحركاته
سيف…بقلق يعني عاليا كان معاها حق لما شكت في مرعي هو وعدنا انه مش هيسيب ناصر ولا هيخليه يعمل اللي في راسه.
خليل ….مرعي مفيش منه قلق يا سيف بس انت عارف ابن عمك راسه ناشفه ومحدش هيقدر عليه
ومش عايزك تكلم مرعي او تعاتبه لانه وارد يبلغ ناصر انك عرفت وانا مش عايز ناصر يحرص او ياخد باله من تحركاته او يفقد الثقه في مرعي ويفكر انه قالك لانه لو ضغط علي مرعي وعرف انه مقالش هيشك اننا بنراقبه فاهمني
سيف…..ايوه بس انا الوقت مش عارف اعمل ايه علي قد ما انا نفسي عز يظهر واكله بسناني علي قد ما انا بقيت خايف من ظهوره عشان عارف ان ناصر هيضيع نفسه.
خليل….انا مش عايزك تعمل اي حاجه كل اللي تعمله بس عينك عليه لو سمعته بيكلم اي حد في التليفون بيقول حاجه تبلغني وانا كده كده بره البيت عيني عليه ناصر لازم بكره بالكتير يبلغ يا سيف اقعد معاه و اقنعه بنفسك
لازم كلنا نضغط عليه من كل اتجاه لازم يفوق من التفكير اللي مسيطر عليه في اسرع وقت.
سيف….ربنا يستر.
خالد….متقلقش يا سيف هتعدي والله يقع بس اللي اسمه عز ده ويتقبض عليه وقتها ناصر مش هيبقي متخاف عليه بالشكل ده
سيف…ان شاء الله
خليل…يلا اطلع وحاول تتكلم معاه يا سيف.
سيف….حاضر يا باشا مع السلامه
خالد…سلام يا سيف.
……….
ناصر….معلهش يا ستي كان عندي ضيوف خليل بيه ومرته وعياله مكمتش عارف اتحدت و ياكي.
فكريه…لا يا ولدي ولا يهمك اني كنت بطمن عليكم بس وكنت هسألك بلغت ولا لسه.
ناصر….بخنقه لسه لسه يا ستي
فكريه….لسه ليه يا ناصر مستني ايه ياولدي مش جولتلي هتبلغ
ناصر….حاضر يا ستي حاضر بكره ان شاء الله كفايه بجي يا ستي الله يرضي عنيكي كفايه حديت اني معودتش جادر
فكريه…حاضر ياولدي بس مش هرتاح يا ناصر غير لما تعمل اللي جولتلك عليه.
ناصر…حاضر معلهش يا ستي هجفل اني الوجت وهبجي اتصل بيكي تاني.
فكريه….ماشي يا ناصر في حفظ الله يا ولدي.
قفل ناصر وحط ايده علي راسه بإرهاق.
طلع سيف راحت فتحتله عاليا
ورجعت قعدت عاليا قدامه وبصتله وهو قاعد حاطت ايده علي راسه
ورجعت بصت لسيف وهي بتهز راسها بخوف
هز سيف راسه ليها بهدوء وسألها بصوت عالي ريم نايمه
عاليا…ايوه لسه نايمه مصحيتش
سيف….خليها نايمه براحتها وبص لناصر.. ناصر!
ناصر وهو باصص علي الارض وماسك راسه ايوه يا سيف.
سيف….عايز تنام ولا ايه لو تعبان قوم ريح.
ناصر…لاه اني بخير و معايزش انام اني شويه ونازل
سيف….نازل فين الساعه 11
ناصر….هچيب حاچه و هتمشي شويه اشم هوا.
سيف….بتنهيده ناصر.
ناصر…ايوه
سيف….بنبره خوف ناوي علي يا اخويا؟
ناصر….في ايه يا سيف.
سيف…انت فاهمني كويس يا ناصر في موضوع الڤديو
مسك ناصر راسه اكتر وهو بياخد نفس طويل وسكت
سيف….ناصر بكره الصبح لازم نروح نبلغ كفايه كده أرجوك
عاليا…بخوف ناصر من فضلك اسمعنا شويه من يوم ما ريم ظهرت واحنا بنضيع وقت علي الفاضي انت محكم رأيك ومصمم انك متسلمش الڤديو عشان مستني تلاقي عز كل اللي مسيطر عليك هو التار وبس ارجوك يا ناصر كفايه بقي احنا تعبنا كلنا محتاجين نصحي من الكابوس ده
ناصر….بجمود وفروا حديتكم لروحكم مهسلمش حاچه وهچيبه و هجتله بيدي.
وقفت عاليا بغضب وانهيار وخوف وقلق من تحكيم رأيه حست انها مش قادره تعمل اي حاجه تقنعه بيها.
عاليا….كفايه بقي انت ايه🥺 معندكش قلب مبتحسش حرام عليك تعب الاعصاب اللي بتعمله فينا ده حرام عليك كفيانا وجع بقي يا شيخ
رفع ناصر راسه وبصلها وهو ساكت.
في الوقت ده ريم كانت صحيت وسمعت صوت عالي لعاليا خرجت بسرعه وهي بتسند علي الحيطه.
ريم….عاليا في ايه بتعيطي كده ليه حصل ايه تاني
سيف….مفيش ياريم مفيش حاجه حصلت وبص لعاليا يا عاليا من فضلك اهدي شويه اسكتي
عاليا….بأنهيار مش هسكت يا سيف ومن انهارده محدش يقولي اسكتي أرحموني بقي انا سكت كتير انا من يوم اللي حصل ده وانا ساكته ضحي تتتقتل و تغتصب وانا ساكته خالتو تقع بمجرد ما تشوف بنتها في تلاجه الاموات ويجروا بيها ويطلعوا يبلغوني انها ماتت وانا ساكته اختي تختفي وميبقلهاش آثر وانا ساكته هو يجي ياخدني من قلب بيتي و يحبسني عنده لحد ما اختي تظهر وانا ساكته اسمع بودني صريخ ضحي و أغتصابها وانا ساكته اختي تبقي بتضيع قدامي وانا ساكته افضل قاعده معاكم في بيت مش بيتي ولنا ساكته مش بعمل حاجه غير بقول حاضر وطيب ونعم وبسسسسسس علي أمل اني أصحي من الكابوس اللي انا فيه ومبصحاش.
ريم…بدموع عاليا اسكتي كفايه عشان خاطري اهدي.
سيف…اهدي يا عاليا.
عاليا…..متقولوليش اهدييييي انا جوايا وجع كبير اوي محدش حاسس بيه انا لحد الوقت مش عارفه اطلع اللي جوايا كلكم بتضعطوا عليا انا مقدره و جعكم كلكم ومحدش مقدرني وهو نفسه قدرت وجعه كتير واديتله الف عذر لكل اللي عمله معايا عشان عارفه انه تعبان بحاول اكون هاديه و امتص غضبه عشان اقدر اقنعه يقدم الڤديو و ميضيعش نفسه و يضيعنا معاه وهو مش بيفكر غير في الانتقام وبس
انا اعتبرت نفسي جزء منك يا ناصر 🥺💔 مقدرتش اتحمل فكره ان انت كمان تروح زي اللي راحوا عشان انا واختي مبقاش لينا حد غيركم قدرنا حطنا في طريق بعض كلنا واعتبرتكم اهلي مبقتش قادره اتحمل خساره حد تاني فيكم يا بني ادم افهمممم🥺
حرام عليك انا قلبي مبقاش مستحمل.
نزلت دموع ريم في صمت وعيون سيف كلها دموع لكن حاول يتماسك
قام ناصر وقف وهو وجع الدنيا جواه وكل اللي سامعه و بيدور في عقله هو ضغط الكل عليه جدته تقوله بلغ خليل بلغ خالد بلغ رغده بلغ شهيره بلغ عمر بلغ سيف بلغ ريم بلغ مرعي بلغ عاليا بلغ
وفضلت الجمله تتردد في ودنه بلغ بلغ بلغ بلغ.
ناصر…اسكتي اسكتي انتاو اللي ارحموني شويه كلكم بتضغطوا عليا بلغ بلغ بلغ ايه ارحموني انا مش بنام عقلي مبيبطلش تفكير كل حاجه في الدنيا تقيله علي قلبي اخويا يا ناس اتقتل بدم بارد ارحموني علي اتاخد منه كل حاجه قبل ما يموت صوته في ودني وهو بيترجي الكلب ده عشان يسيب ضحي ويرحمه مش بيروح من بالي عارف اني لو قدمت هيتعدم بس انا مش هرتااااااح موته مش هيرحني مش هرتاح لما يموت علي ايد حد غيري موته بأيدي انا هيريحني ويريح اخويا في تربته عايزني ابلغ حاضر هبلغ واريحكم بس بردو عز مش هيموت غير علي ايدي انتوا فاهميييييين علي ايدي انا كفايه ضغط عليا بقي😡
فتح ناصر الباب وبسرعه نزل.
سيف….ناصر استني يا ناصر
عاليا…بدموع الحقه يا سيف والنبي🥺🥺
سيف….بخوف مقدرش اسيبكم مقدرش
عاليا….متخافش علينا هنقفل علي نفسنا الحقه ارجوك
نزل سيف وراه جري
ناصر…اطلع يا سيف ومتسيبهمش لوحدهم.
سيف…مش هسيبك يا ناصر.
ناصر….ارجوك يا سيف اطلع وسبني محتاج اكون لوحدي صدقني هتمشي واشم هوا وهرجع تاني بس اطلع و متسيبهمش يلا يا سيف.
هز سيف راسه بقله حيله وطلع و اتحرك ناصر بعربيته بسرعه وكان عارف وجهته.
بعد وقت بسيط نزل ناصر وبص علي البيت كان بيت والد ووالده عز كان حاسس ان جواه كميه غضب محتاج يخرجها.
طلع عز بسرعه علي البيت خبط
فتح والده كان راجل كبير في السن لكن واضح انه طيب.
احمد….مساء الخير يا ابني مين حضرتك.
ناصر….احمم مساء النور انا ناصر ابقي اخو علي المنشاوي الله يرحمه اللي بيشتغل معاه عز.
احمد….يا خبر اهلا اهلا يا ابني اتفضل تعالي انت عارف مكان عز
ناصر….لا يا حاج.
همت…ابني ابني كويس تعرف حاجه عنه يا ابني.
احمد…تعالي يا حاجه ده اخو استاذ علي الله يرحمه .
همت…البقاء لله يا ابني معلش متآخذنيش بس قلبي واجعني علي ابني وخايفه عليه.
بصلهم ناصر بإستغراب مش قادر يعرف إذا كانوا صادقين ولا بيكذبوا لكن من جواه حاسس انهم ناس محترمين.
ناصر….انا كنت جاي أسأل عليه عشان الشركه زي ما حضراتكم عارفين لوحدها وهو اللي كان مسؤول عنها بس انا كده مش فاهم حاجه.
احمد….انا هفهمك يا ابني عز من حوالي كام يوم اتفاجىنا بيه مش طبيعي وبيقول انه جاله سفر مفاجئ حضر شنطه صغيره ومشي من غير ما يفهمنا في ايه كلمنا كذا مره بس بقاله يومين تليفونه مقفول ومش بيتصل ومن وقتها منعرفش عنه اي حاجه هو اصلا من يوم اللي حصل لعلي الله يرحمه حزين وفي دنيا تانيه وديماً تايهه علي كان غالي عنده اوي.
همت….انا خايفه يكون اللي عملوا كده في علي آذوا ابني 🥺
اتأكد ناصر انهم ميعرفوش اي حاجه وان عز هربان من وقت ما عرف ان ريم عايشه.
ناصر….ان شاء الله خير متقلقوش وعموما اللي عمل كده خلاص جبناه يعني مفيش خوف علي عز
همت….الله يطمن قلبك يا ابني ده عز لو عرف هيفرح اوي
احمد….مين يا ابني اللي عمل كده بس.
ناصر….المشكله مش في مين الوقت يا حاج المشكله اني انا تايهه ومش عارف اعمل ايه انا خلاص كلها وقت بسيط و رجالتي تجيبوا ويبقي تحت ايدي مش عارف اعمل معاه ايه
احمد…ودي فيها كلام سلمه طبعا للحكومه وحق اخوك هيرجع لما يتعدم انا كنت مفكرك وانت بتقول جبناه انه في ايد الحكومه
ناصر…لا ده في ايدي انا
همت….يبقي تسلمه علي طول يا ابني ورجع حق اخوك علي ده مكانش في زيه الله يرحمه وجع قلبي عليه كان محترم ومتربي منه لله وجع قلوبنا كلنا عليه.
ناصر…طيب حطوا نفسكم مكاني انا راجل صعيدي ومقدرش اسيب حقي شوفت بعيني ڤديو لأخويا بصوته وهو بيصرخ اتقتل تسع طعنات واللي قتله ده كان واحد صاحبه من القاهره و البنت اللي كانت بتشتغل معاه واتقتلت هي كمان علي كان بيحبها وكان جاي في نفس اليوم يفاتحنا في الموضوع ده عشان نروح نطلبها اتفاجئ علي ان صاحبه ده هو كمان بيحبها وهي رفضته وقالتله انت اخويا فا مخلصهوش انها تقوله كده فا حب ينتقم كان مراقبهم قتل اخويا وقبل ما يقتله خلي رجالته تكتف البنت وأغتصبها قدامه وبعد ما أغتصبها وعراها قدام الكل قتلها قدام اخويا اللي صوته كان مسمع الدنيا بحالها كان بيصرخ من قلبه وحاسس بالعجز وهو سامعها بتترجاه يروح ينقذها ومكانش عارف وبعد ما الكلب ده قتلها وضيع شرفها راح قتل اخويا تسع طعنات وقبل ما البنت التانيه تهرب واللي صورت كل ده ضربها في راسها عملها أرتجاج وكسر مضاعف في ايدها بس ربنا شاء انه يشيل ستره عن الكلب ده ويفضحه اعمل ايه وانا مش قادر اتخطي الحادثه اللي اخويا عاشها تار اخويا في رقبتي ومش مرتاح ولا قادر ابلغ ناري قايده ومش هتطفي غير بطلوع روحه علي ايدي.
همت….بدموع منه لله منه لله
احمد…لا حول ولا قوه الا بالله.
ناصر…لو انتوا مكاني وعز يعني في موقف علي وعرفتوا اللي عمل كده هتسلموه ولا هتقتصوا منه
مع العلم انه مش بس غدر بيه وقتله ده خانه وطعن شرفه قدام عينه و حسسه بضعفه وعجزه قدام حبيبته قتل رجولته الف مره قبل ما يقتله وياخد روحه.
احمد….مش عارف اقولك ايه يا ابني يمكن انا لو في مكانك هقطعه بسناني بس انت لسه صغير تضيع حياتك عشان كلب زي ده.
همت….لو حد عمل كده في ابني قلبي هيفضل قايد نار لحد ما اجيب حقه انا ابني غايب عني يومين وهتجنن مابالك اعرف ان ده حصل فيه اكيد مش هستحمل بس زي نا قالك يا ابني متضيعش نفسك عشان واحد زي ده سلم الڤديو وجيب حق اخوك وهو هيتعدم مفيهاش كلام.
ناصر….يمكن انتوا صح ويمكن كمان كنت محتاج اسمع كلامكم ده عشان ارتاح لاني مش عارف ارتاح والدنيا ضاقت بيا بس كمان يمكن بتقولوا كده لانكم مسمعتوش الڤديو طلع ناصر من جيبه الموبايل وفتحه وجاب الڤديو و بصلهم.
ناصر….هوريكم الڤديو بس قبل ما تشوفوا اتمني تحطوا نفسكم مكاني بجد وتنسوا خالص الشخص اللي هتشوفوا احكموا بالعدل💔
كان بيتكلم ناصر بهدوء لكن نبرته فيها ضياع وتوهان وكأنه حقيقي الدنيا قفلت في وشه.
داس ناصر علي الڤديو وفضل ماسك الموبايل و مادد ايده بيه قدام عيونهم وهو عينه عليهم بحزن.
فضلوا يسمعوا الصريخ والكلام اللي بيتقال ولكن مع نبره الصوت اللي مكانتش غريبه عنهم. قلوبهم انقبضت و جحظت عينهم.
ومع اول لفه لعز الاب اتصدم والام شهقت وفضلت تقول لأ🥺💔
مش مصدقين اللي شايفينه ابنهم اللي تعبوا وشقيوا عليه وربوه اغتصب وقتل واتشالت من قلبه الرحمه.
همت….حطت ايدها علي ودنها لا لا كفايه كفايه.
فضل ناصر موجهه التليفون عليهم لحد ما الفديو خلص.
احمد….بصدمه ووجع ودموع ده ابني انا ده عز لا مش قادر اصدق طب اكذب عيني ولا اكذب ودني عز يعمل كده في علي صاحب عمره عز ميصعبش عليه صاحب عمره لا لا انا مش هصدق عيني ولا ودني.
همت…..ااااااه ليه يارب قصرنا معاه في ايه جاب القساوه دي منين عز يعمل كده مستحيل عز يغدر بعلي عز يغتصب لا ياربي ده كابوس اكيد
فضل ناصر باصصلهم وساكت شايف دموعهم وكلامهم و صدمتهم و وجعهم و باصص وساكت مديهم مساحتهم الخاصه في التعبير عن وجعهم وبعد ما خرجوا كل اللي جواهم وهديوا شويه.
ناصر…بهدوء شديد ها لسه عند رأيكم بعد ما شوفتوا الڤديوا ولا غيرتوا رأيكم بعد ما عرفت ا ان اللي عمل كده ابنكم حسيتوا باللحظات اللي عاشها علي والبنات
حطيتوا نفسكم مكاني عشتوا الوجع اللي انا عايش بيه.
صمت عم في المكان لمده ثواني واخيراً نطقت الام
همت…بوجع حقك يا ابني خد حق اخوك ومتسيبهوش.
بصلها احمد بوجع وسكت بصتله همت بوجع عندك رأي تاني يا ابو عز
احمد…بدموع انا مليش عيال بالاسم ده ورجع بص لناصر ابني مات من اللحظه دي خد حقك يا ابني بس صدقني نصيحه مني ليك اوعي تضيع عمرك وشبابك عشانه ده ميستاهلش سلمه وانا وامه هنك ن اول ناس نقف في ضهرك وهنجيب حق علي والبنت اللي ماتت واغتصبها.
ابتسم ناصر ابتسامه تكاد تكون مش موجوده لكن كلها كسره وحزن وقام وقف طبطب علي كتف احمد وقرب من همت باس راسها ورجع وقف تاني و بصلهم
ناصر….انا اسف بس كان لازم ارتاح واتكلم ياريت ابنكم كان خد حاجه منكم 💔 سلام عليكم
خرج ناصر وبمجرد ما خرج انهار الاب والام وقدروا الوقت بس يعرفوا عز مشي ليه وليه اختفي💔
نزل ناصر ركب عربيته و اتحرك وهو مش شايف قدامه
في اللحظه دي اتصل بيه مرعي.
فتح ناصر الخط من غير اي كلام
مرعي…خلاص يا ولدي چبناه وخبرنا بموطرح اللي كانوا معاه.
ناصر….واني چايلك يا مرعي.
قفل ناصر واتصل فوراً برقم مجهول.
ناصر….ايوه
…..معاك
ناصر…مرعي خبرك
……ورايح علي هناك اطمن
ناصر…ساعه زمن واكون هناك استناني
……تمام
ناصر….سلام
…….سلام.
…….. ……
حانت لحظه رجوع الحق🥺💔
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية سجينة مع وقف التنفيذ)
