رواية سجينة مع وقف التنفيذ الفصل الرابع 4 بقلم أميرة أسامة
رواية سجينة مع وقف التنفيذ الجزء الرابع
رواية سجينة مع وقف التنفيذ البارت الرابع
رواية سجينة مع وقف التنفيذ الحلقة الرابعة
طريق مجهول أضطرت أنها تمشي فيه عمرها ما كانت مجبره علي أي حاجه في حياتها قبل كده لكنها فجأه وبدون انذار حست بالاجبار والغريب انه يمكن يكون ناصر مأجبرهاش علي حاجه ساب الكوره في ملعبها و الأختيار يكون ليها فضلت عاليا قاعده سانده عالشباك باصه للطريق من غير تعب ولا ملل وكأنها لقت ضالتها في طول الطريق و ظلامه دموعها كانت نازله بهدوء من غير اي صوت. صوره خالتها وضحي وريم مش مفارقين خيالاها ضحكتهم صوتهم حتي مناقرتهم لبعض.
اخر صوره ليهم مش قادره تفارق خيالها ضحي وريم وهما بيطلبوا منها العروسه والفانوس وخالتها وهي بتتمشي معاها وبيشتروا الحاجه.
اما ناصر فا كانت عينه عليها من بدايه الطريق في المرايه مرعي سايق وهو باصص عليها من المرايه جمبه شايف دموعها حس بتأنيب الضمير وبدأ يكلم نفسه.
ناصر….ياتري هتبكي عشان فُراج خالتك وبت خالتك ولا عشان أختك ولا هتبكي عشان جفلت في وشك الدنيا و أجبرتك تاچي معايا؟
صدجيني اني مأجبرتكيش ولحد اخر لحظه كنت رايد أنك ترفضي صدجيني غصب عني مكانش في جدامي غيرك هجولك علي حاچه
تعرفي لما الدنيا تجفل في وشك
و تلاجي الدنيا كلها طبجت فوج نفسك و تلفي بعينك متلاجيش غير منفس واحد بس اهو انتي كنتي المنفس ده چيتي جدامي في اكتر وجت كنت مخنوج فيه
أعمل ايه صدجيني مش بيدي أنتي مجهوره علي تلاته بس صدجيني جهرتي علي أخوي أضعاف جهرك عاللي راحو علي أخوي كان كل حياتي كان ابني وصاحبي هو وسيف طول عمري ما أستحملش عليهم نسمه الهوا
حطي روحك مكاني تخيلي يكون عندك زرعه تكبري وتهتمي وتراعي وتربي وتشوفي زرعتك بتكبر جدام عينك وتتفتح وتحسي لما تطلي عليها كنك ملكتي سعادة الدنيا باللي فيها وفچأه ياچي حد يجطفها ويرميها علي الأرض ومش بس كده يمسك ورجها اللي كله حياه و يجطع فيه هتعملي ايه ساعتها علي بالنسبالي كان هو الزرعه دي تعرفي كان بجالي سبوعين ما شفتهوش جال هياچي مره واحده جبل رمضان علي الأجل انتي شوفتيهم كلهم يوم الحادثه إنما اني لا ملحجتش اشوفه واطل في عينه و اشم ريحته واخده في حضني ويوم ما عملتها كان ميت.
اختك هي اللي معاها المفتاح هي اللي هتخليني أرچع حج أخوي.
مكنتيش مجصوده صدجيني.
………
مسحت عاليا دموعها اللي بتنزل بغزاره وهي بتفتكر اول ما شافت ناصر ومرعي داخلين عليها
عاليا… مكنتش نقصاك في حياتي انت كمان لا عمري شوفت اخوك ولا حتي اعرفه ظهورك مكانش في وقته خالص حرام عليك ده انا بقالي 3 ايام في كابوس يوم ما أصحي منه الاقي نفسي بروح مكان عمري ما روحته بتحاسب علي حاجه معملتهاش عارفه انك موجوع زيي بس انا مش بأيدي حاجه انا موجوعه زيك بالظبط واكتر عارف انا عارفه ان الغريق بيتعلق بالقشايه وانا بالنسبالك كنت القشايه دي ديماً المدبوح بيفضل يرفص بأيده ورجله وبيتعلق بحاجه تردله روحه بس صدقني مش انا الحاجه دي انت أختارت غلط انا زيك غرقانه ومدبوحه بس الفرق ان انا بالنسبالك كنت القشايه دي في الوقت اللي انا تايهه فيه ومش لاقيه اي حد اتعلق بيه انا بالنسبالك كنت الحاجه اللي ممكن تردلك روحك في الوقت اللي انا لقيت نفسي بنزف لوحدي
انا بالنسبالك الخيط اللي هيوصلك لريم عشان ترتاح..بس انا مش لاقيه اي حد أحمله غيابها مش لاقيه حد اتعلق فيه غير ربنا انت حكمت عليا بالسجن المؤقت
وانا شوفتك مظلوم زيي يمكن اكون مش زعلانه منك و مديالك الف عذر بس ده مكانش يديك الحق ابدا تحرمني من اني ادور علي اختي و الاقيها🥺💔
عدي اقل من نص الوقت وكلاً من ناصر و عاليا بيتكلموا مع نفسهم وكل واحد فيهم اللي بيحاول يشتكي و اللي بيحاول يبرر اللي عمله واللي بيحكي اللي جواه
لكن بصمت بصوت غير مسموع
جات استراحه علي الطريق .
مرعي….في استراحه يا ناصر بيه تحب اجف فيها.
ناصر…بصوت هادي ايوه يا مرعي أجف الطريج لساته طويل خلينا نچيب مايه وأچيب شاي راسي هتتفرتك.
مرعي….حاضر قرب مرعي من الاستراحه ووقف.
بص ناصر في المرايه علي عاليا اللي كانت سرحانه ومش معاهم.
ناصر…آنسه عاليا تحبي تنزلي تريحي رچليكي من الطريج
عاليا….شكراً انا كده كويسه.
مرعي….المشوار طويل يابتي جدامنا حوالي 3 ساعات ونص أغسلي وشك مشي رچليكي يعني لو رايده.
بصتله عاليا وحست ان كلامه صح من كتر العياط حاسه ان عينها بطلع حراره قويه ومحتاجه تبردها بالمايه.
عاليا….ماشي هنزل.
بصله ناصر…مش هتنزل انت كمان يا مرعي.
مرعي….هنزل ايوه .
نزلوا التلاته مع بعض مشيت جمبهم بخطوات بطيئه كل شويه ناصر يهدي خطوته و يبص عليها بطرف عينه.
سأل العامل علي مكان الحمام شاورله.
ناصر…ادخلي واني هستناكي إهنه.
عاليا من غير ما تبصله هزت راسها مشيت خطوتين.
ناصر…انسه عاليا تحبي تشربي حاچه.
هزت عاليا راسها بلأ ودخلت عالحمام.
سابها ناصر ودخل هو كمان ورا مرعي وبعد ما خرج راح جاب شاي ليه هو ومرعي وجاب مايه وعصير وبسكوت لعاليا.
خرج هو ومرعي ووقف استناها.
ناصر….الشاي يا مرعي
مرعي….من يد ما نعدمها يا ابني هروح ادور العربيه لحد ما تاچي.
ناصر…. ماشي .
راح مرعي علي العربيه
ثواني ولمحها ناصر خارجه باين علي شعرها ووشها انها مش بس غسلت وشها دي واضح انها نزلت راسها كلها تحت المايه وخارجه بتنقط مايه.
ناصر….في حاچه حوصلت في المايه چوه ولا ايه.
عاليا…بهدوء لا انا بس مصدعه وكنت ..
قاطعها ناصر اتفضلي مناديل.
عاليا….شكراً
راحوا علي العربيه وفضلت ماشيه جمبه تمسح في وشها والمايه اللي بتنقط من شعرها.
ركبت وراء في مكانها
مد ناصر الشنطه اللي في ايده
الطريج طويل مايه وعصير وحاچه تاكليها لو چعانه.
خدتهم منه وهزت راسها وحطت الشنطه جمبها من غير ولا كلمه.
كمل مرعي الطريق والصمت سيد الموقف كل واحد غرقان في افكاره وحزنه.
لكن عاليا من تعبها أستسلمت
وراحت في النوم خالص
فضل ناصر كل شويه عينه تيجي عليها لحد ما هو كمان مقدرش يقاوم اكتر من كده سند راسه عالكرسي وغمض عينه ونام.
عدي الباقي من الوقت وناصر وعاليا مستسلمين للنوم واخيراً وصلوا البلد كان النور طلع ويوم جديد أتولد.
مرعي….ناصر بيه ناصر بيه
فتح ناصر عينه بإرهاق إيوه يا مرعي.
مرعي…خلاص وصلنا جربنا عالدار حمد الله عالسلامه.
ناصر بتعب فرد ضهره الله يسلمك يا مرعي.
مرعي بص لناصر وهو بيشاورله علي عاليا شكلها تعبانه جوي.
ناصر….بأقتضاب الوجت ترتاح.
قرب مرعي اكتر ووقف قدام بوابه البيت الكبير وهو بيدوس علي الكلاكس عشان يفتحوا.
في الوقت ده صحيت عاليا من الصوت قامت تدعك في عينها وهي بتبص حواليها.
المنظر بالنسبالها كان جديد ديماً بتشوف المنظر ده في الافلام والمسلسلات لكن اول مره تشوفه عالطبيعه.
بوابه كبيره اوي سور حديد كبير
حديقه مساحتها اكبر ومن بعيد ظاهر مبني يشبه القصر المبني علي تراث قديم لكن الوانه واضح انها جديده قرب مرعي من البوابه الداخليه ووقف كان في كام سلمه يوصلوا للباب الداخلي للمبني.
مرعي….حمدالله عالسلامه
ناصر…الله يسلمك…حمدالله علي سلامتك يا انسه عاليا.
عاليا…بصوت واطي الله يسلمك.
ناصر…اتفضلي فتح ناصر الباب ونزل.
نزلت عاليا وهي بتبص علي المكان من حواليها وكأنها بتكتشف العالم الجديد اللي دخلت عليه.
ناصر….مرعي جول لحد من الغفر يودوا شنطه آنسه عاليا علي المضيفه اللي وراء.
مرعي….بأستفسار يعني مش المضيفه دي؟
ناصر…لا عشان تكون براحتها إهنه اللي رايح وچاي من الغفر والناس هيشوفوها واني لسه مفكرتش ولا لاجيت طريجه اعرف الناس بيها.
مرعي….حاضر يا ناصر بيه لعد أذنك .
راح ناصر وقف قدام عاليا
ناصر…تعالي معايا أعرفك المكان اللي هتجعدي فيه الدار إهنه فيها مضيفتين اللي جصادك دي وفي واحده وراه الدار الكبيره يلا تعالي
مشي ناصر خطوتين وبص جمبه بسرعه وبعدين بص وراه لقاها واقفه وباين عليها الخوف رجعلها تاني.
ناصر…انسه عاليا عايز اجولك حاچه الدار إهنه فيها شغالين كتير جوي واني إهنه عايش مع چدتي وابن عمي وكان علي الله يرحمه
يعني مش رايدك تكوني جلجانه زي ما جولتلك أنتي إهنه هتجعدي معززه مكرمه مفيش اي حد هيأذيكي يعني متخافيش من اي حاچه ماشي.
بصتله عاليا وهزت راسها بهدوء خدت نفس طويل ومشيت وراه
وصل ناصر بيها للمضيفه كانت عباره عن مبني صغير من دور ولازق في المبني الكبير لكن ليه باب خاص بيه بعيداً عن الباب الكبير للبيت.
طلع ناصر من جيبه المفتاح
جه واحد من الغفر شايل الشنطه.
ناصر…روح انت خلاص.
الغفير…بعد أذنك يا ناصر بيه.
فتح ناصر الباب ودخل فضل يفتح في النور.
بصلها ناصر…تعالي يا انسه عاليا.
دخلت عاليا بترقب .
ناصر…المكان إهنه ريحه خفيف هيعچبك إهنه المعيشه وفيها مطبخ صغير وحمام چوه تعالي معاي أفرچك فوج
طلعت وراه عاليا وهي من جواها لسه قلقانه
ناصر…في إهنه أوضتين اختاري اللي علي كيفك ترتاحي فيها .
الباب اللي بين الأوضتين في الطرجه ده لو فتحتيه هتبجي چوه الدار الكبيره المفتاح كيف ما انتي شايفه من عنديكي بس تجدري تجفلي علي حالك براحتك محدش يجدر يدخل من الدار ليكي إهنه إلا لو سايبه الباب مفتوح ماشي.
هزت عاليا راسها من غير ولا كلمه.
نزل معاها ناصر تاني علي تحت
مدلها ايده بمفتاح المضيفه.
ناصر…ده مفتاح المضيفه اجفلي علي حالك براحتك.
هسيبك الوجت ترتاحي بعد الضهر هعرفك علي چدتي ماشي
هزت عاليا راسها بهدوء
استأذن منها ناصر وخرج علي طول راح علي المدخل الكبير
وبمجرد ما خرج قفلت عاليا بسرعه وراه المكان ومن كتر ما هي تعبانه طلعت علي طول نامت في أوضه من الأوض
ضهرها وجسمها كله كان تاعبها من الطريق مصدقت ناصر خرج وراحت عشان تنام
…………..
لف ناصر ودخل من البوابه الكبيره كانت سته قاعده علي كرسي ماسكه في أيدها السبحه و دموعها نزله و الشغالين رايحين جايين من حواليها
ناصر…..بتعب إصباح الخير يا ستي قرب من ايدها وراسها باسهم
فكريه…بلهفه حمد الله علي سلامتك يا ولدي.
قعد ناصر بإرهاق جمبها الله يسلمك يا حبيبتي.
فكريه…البت محاسن جالتلي انك چيت انت ومرعي كت فين كل ده وجولي عملت أيه في التحجيج طمن جلبي.
ناصر….لسه يا ستي التحجيج شغال اني بس محتاچ أرتاح بجالي يومين معارفش أنام. ارتاح شوي ولما أصحي هحكيلك كل حاچه .
فكريه….طيب يا ولدي أرتاح.
ناصر…طمنيني علي سيف
فكريه…بحزن كيف ماهو يا ولدي ماهيتحددتش مع حد.
ناصر…اني هطلع أطل عليه.
فكريه….ماشي والحج نام شويه جبل ما النسوان تاچي تعزي من بعد الضهر البيت ما هيفضاش من الناس.
ناصر…ماشي يا ستي بعد اذنك.
فكريه….ناصر
وقف ناصر وبصلها بارهاق أيوه يا ستي.
فكريه…مجولتليش بردو يا ولدي مين معاك في المضيفه؟
ناصر….معايا ضيفه يا ستي انام واصحي وهجولك كل حاچه وياريت محدش يزعچها هي كمان طريج السفر كان طويل معايزش حد واصل يروح عنديها ماشي يا ستي.
فكريه…ماشي يا ولدي.
…………….
طلع ناصر وقف قدام أوضه علي بحزن ثواني وكان بيخبط وفتح الباب.
لقي سيف قاعد علي طرف السرير ماسك القرآن في ايده ودموعه نازله بغزار.
قفل ناصر الباب وراه و دخل بخطوات بطيئه وهو قلبه متقطع علي منظر سيف قعد جمبه وقال صدق الله العظيم.
كمل سيف اخر ايه وصدق وقفل القران وهو عينه في الارض ودموعه نازله.
لف ناصر ايده علي كتف سيف وقرب راسه قبلها بحب
في اللحظه دي سيف إنهار وكأنه كان مستني حضن ناصر يطمنه.
سيف…علي راح يا ناصر علي مات و سابنا خلاص.
ناصر…بوجع أدعيله يا سيف أدعيله يا حبيبي.
سيف….ااااه 💔💔
ناصر…إچمد ياااااض إچمد وأصلب طولك مش سيف المنشاوي اللي يبجي في حالته دي أيه هتعترض علي امر الله.
سيف…بوجع أيوه هعترض هعترض يا ناصر عشان علي كان
طيب💔 علي كان حنين وراجل وجدع علي مكانش في اخلاقه كان عارف ربنا وبيعمل كل حاجه كويسه هعترض عشان احنا عمرنا ما آذينا حد عمرنا ما خدنا تارنا من اي حد عشان بأختصار احنا عمرنا ما كان لينا تار طول عمرنا محبوبين والناس كلها بتحترمنا وبتحبنا يبقي ليه يا ناصر ليه علي 💔😞
ناصر….ياض افهمممم امر الله ماهينفعش نجوله ليه أستغفر ربك يا سيف حتي لو علي كان ملاك ربك عادل وعمره ما كان ظالم هو أختاره هنجوله لا.
سيف….بس أختاره بدري اوي يا ناصر حرمني منه يا ناصر علي كان روحي كان توأمي مكنتش بعرف أقعد في مكان من غيره حتي لو يوم قولي هقعد ازاي من غيره بعد كده ابوس ايدك يا ناصر انا عايز اللي عمل كده ريحني وجيبه يا ناصر عشان اخد حق علي.
ناصر…بحزن حضن سيف هچيبه والله هچيبه وما هيكفيني عمره بس بكفياك اني مش جادر يا سيف عايزك چمبي وفي ضهري اني طول عمري صالب طولي عشان انت وعلي ورايا في ضهري علي راح ونص ضهري أنحني أوعاك تستلم يا سيف وتسيب ضهري مكشوف وجتها اني اول واحد هجع عمري ما جولت اني محتاچ حد فيكم عشان ديماً كنت بحس ان انتوا اللي محتاچيني لكن اني الوجت محتاچك يا سيف هتسيبني يا أخوي💔
بصله سيف بوجع من وسط دموعه و اترمي في حضن ناصر وفضل يعيط زي الأطفال اول مره يحس بنبره صوت ناصر كلها ضعف.
بعد وقت بسيط رفع ناصر وش سيف بأيده وبصله اني تعبتن وچاي من سفر محتاچ انام شوي واول ما أصحي هعرفك انت وستك علي ضيفه چبتها معاي من مصر ماشي.
سيف….ضيفه مين؟
ناصر….وجت ما اصحي هحكيلكم كل حاچه ماشي يلا جوم خليك مكاني يا سيف ماشي يا حبيبي.
هز سيف راسه بحزن وخرج علي طول ناصر من الاوضه.
…………….
في القاهره في النيابه تحديداً
وصل عزام عشان بتحقق معاه بعد ما عز قال أقواله وذكر أسم عزام في التحقيق وحكي لوكيل النيابه كل اللي يعرفه.
دخل عزام وبدأ وكيل النيابه يسأله أسئله عشوائيه وبعد كده بدأ التحقيق.
وكيل النيابه….قولي يا استاذ عزام ايه علاقتك بالمجني عليه.
عزام….علاقتي بيه علي الله يرحمه كان ماسك الشغل بتاعي بقاله فتره كان مشروع سكني كده والمفروض انه بيتعمل علي 3 مراحل أستلمت منه مرحلتين و التالته اللي كانت شغاله دي هي اخر مرحله والمفروض انها كانت خلاص بتخلص عشان كده هو كان عندي اليوم اللي حصل فيه الحادثه. هو واتنين من الموظفين معاه قضينا تقريبا اكتر من نص اليوم في الشغل وبعد كده مشي
وكيل النيابه….قولي يا استاذ عزام انت اصلا من قنا؟ يعني بلدياته.
عزام….ايوه بس انا سايب الصعيد بقالي سنين حضرتك انا عندي الوقت 40 سنه سبت قنا وانا عندي 18 سنه نزلت علي القاهره اشتغلت كتير وبعد كده كونت مبلغ وواحد صاحبي قاللي نتشارك في ارض في اسماعيليه وفعلا اشترينا ارض وبعد كده بيعناها بعد حوالي سنه ونص كان سعرها عليي اوي وكسبنا فيها فضلنا نجيب في اراضي ونبيع ونكسب بعد كده بقينا الارض اللي نشتريها منبعهاش كنت بطلعها ادوار وابيعها تمليك حسيت ان البلد وشها حلو عليا وكملت فيها والحمد لله قدرت اعمل فيها شغل وبقي ليا اسم كبير عملت كذا مشروع سكني بنفس الطريقه والمشروع الاخير ده اللي كان علي ماسكه كان اخر مشروع ليا ودي كانت اول مره اتعامل مع علي قابلته صدفه في القاهره اتبسطت اوي خصوصا اني عرفت طبيعه شغله وطبعا كانت معايا الارض بتاعت المشروع فا عرضت عليه ووافق واتفقنا عالسعر اللي هو حدده وبدأنا سلمني أول مرحله علي أكمل وجه في الحقيقه يمكن هو من احسن الناس اللي اتعاملت معاهم سواء في طريقه الشغل او تسليمه في معاده وطبعا انا بدأت أسكن اول مرحله علي طول كان هو اشتغل في التانيه والمرحله التالته كانت هي الاخيره والمرفوض كانت خلاص بتتفنش بس.
وكيل النيابه….يعني مكانش في بينكم اي مشاكل خاصه بالشغل خالص.
عزام…خالص بالعكس علي من الناس المريحه جدا في شغلها واظن ان انا كمان كنت قد الاتفاق واللي كان بيطلبه كان بياخده وعمرنا ما اختلفنا علي فلوس او شغل لاني انا مكنتش بَدخل في شغله اصلا انا مفهمش في حاجه.
وكيل النيابه…امممم بس كلام أستاذ عز شريكه بيقول غير كده
عزام….بأستغراب كلام ايه؟
وكيل النيابه…استاذ عز اثناء التحقيق معاه عرفني اليوم من البدايه كان ماشي ازاي من قبل ما علي يسافر لحد ما وصل وفي مكالمه علي عملها لاستاذ عز وكان صوته مضايق وبلغه فيها انه شد معاك شويه وحصل بينكم مشكله بخصوص الادوار المخالفه.
عزام…بإحراج في الحقيقه ده حصل بس قبل ما احكي لحضرتك علي اللي حصل ده احب الاول اوضح موقفي من الادوار المخالفه دي. اولا انا معروف عني وحضرتك تقدر تسأل بنفسك اني انا راجل بحترم القانون جدا بخاف علي شغلي وسمعتي فوق ما تتخيل انا تعبت في اسمي جدا عشان اقدر ابنيه فا مستحيل اعمل حاجه تضرني او تضر غيري عشان شويه ملاليم بس الفتره اللي فاتت خسرت مبلغ بسبب تهدير في الخامات وغلطات من العمال تتقدر بحوالي 500 الف يعني نص مليون وطبعا انا معروف عني ان بهتم جدا بأساس البناء ودي اكتر حاجه تفرقلي والحقيقه استاذ علي كان عامل في كل المراحل اساس كويس جدا المرحله التالته دي المفروض ان الابراج فيها بين عشر ادوار وبين 12 دور الكلام كله كان علي الابراج اللي هي 10 ادوار طبعا انا اتفاجئت انه عرف الكلام ده في البدايه اتكلم علدي وبعدها بدأ ينفعل ويعلي صوته وبصراحه انا كنان شديت معاه وبالمناسبه انا اصلا معرفش هو عرف ازاي انا مكنتش لسه فاتحته اصلا كل الحكايه ان ده كان كلام بيني وبين شريكي وغالبا حد من العمال سمع النقاش ده وبلغه بيه انا مكنتش قولتله لان زب ما قولت لحضرتك انا راجل بحترم القانون وبخاف علي شغلي فا كنت واخد وقت عشان اطمن واحسبها صح واشوف هتنفع ولا لا وبما لني راجل شغال في المجال ده من سنين فا اكيد عندي خبره وخبرتي بتقول ان الاساس اللي اتعمل من البدايه يتحمل البرج انه يكون 12 دور ومع ذلك مكنتش واخد قرار اقوله وننفذ ولا بلاش لقيته متعصب وبيتكلم بهجوم انا عارف انه بيراعي ربنا جدا وشخص بيقدر شغله بس انا كمان مش هضحي بالبرج كله عشان نص مليون جنيه الا لو اصلا انا شايف انه مفيش خطر بس ده كل اللي حصل اتعصبنا و اتخانقنا وبعدها مشي انا اضايقت من هجومه قبل ما يسمعني لكن بردو عذرته زي ما انا بخاف علي اسمي اكيد هو بيخاف علي اسمه.
وكيل النيابه….وراح فين بعد كده؟
عزام…هو المفروض اصلا كان مقضي نص اليوم في الشغل وكان بيطمن علي اخر مرحله قبل ما يسلمها وكان خلص شغل خلاص فا اكيد رجع هو كده كده كان ماشي خلاص.
وكيل النيابه…هو كان فين اصلا وجاي منين؟
عزام….كان وقت راحه وكان بيتغدي هو والبنات هو في العادي لما كان بيجي كان بيتغدي معايا انا والعمال بس قاللي عشان البنات معاه وعشان يبقوا علي راحتهم
وكيل النيابه…يعني يا عزام انت ملكش اي يد في اللي حصل لعلي؟
عزام…بذهول من الاتهام نعمممم لا طبعا مستحيل اولا المشكله اللي بينا مكانتش تستدعي كل ده ده كان مجرد صوت عالي شويه واعتراض لكن بكل احترام حضرتك لو سألت عني في البلد هتعرف اني عمري ما كان ليا اي مشكله مع اي حد اشتغل معايا من اصغر واحد لاكبر واحد وكل اللي مشكلي مشاريع قبل علي علاقتي بيهم طيبه وخصوصا علي لانه ابن بلدي ودي كانت اول مره يحصل بينا مشاده لكن انها توصل للقتل مستحيل طبعا معلش انا اسف حضرتك من معلوماتي يعني ان علي واخد تسع طعنات و في بنت واخده طعنتين ومعتدي عليها وواحده مختفيه تفتكر حضرتك حتي لو انا ممكن اعمل كده هعمل كده عشان اعوض خساره نص مليون جنيه دي حاجه متتعقلش حضرتك والاهم من كل ده أسأل حضرتك عني كويس انا مش بمدح في نفسي بس انا حتي لو اختلفت مع اي شخص مستحيل توصل للقتل و بالبشاعه دي حضرتك تقدر تسأل كل العمال اللي في الموقف عن المشكله اللي حصلت كلها كانت مشاده كلاميه لا فيها لفظ ولا فيها مد ايد احنا اكبر من كده يا افندم والاهم بقي ان بعد ما علي مشي حاولت اهدي شويه و قعدت انا وشريكي مع بعض قدام العمال كلهم متحركتش الحادثه حصلت قرب العاشر من رمضان يعني كانوا قربوا يوصلوا تفتكر حضرتك هسافر وراه واعمل كده والعمال مش هيلاحظوا غيابي.
بصله وكيل النيابه بتفهم وبعد ما التحقيق خلص مشي عزام ودخل شريكه ودخل بعض العمال في الموقع والكل اكد نفس الكلام.
………………..
عدي كام ساعه العصر اذن ولسه عاليا وناصر نايمين في سابع نومه
وفجأه صحيت عاليا مفزوعه علي صوت صوات و صريخ قامت جري فضلت تلف حوالين نفسها بفزع ورعب بتحاول اصلا تركز مع المكان اللي هي فيه و تفتكر اللي حصل ولما ركزت سمعت الصوت جاي من الباب اللي بيودي علي البيت الكبير.
وفجأه سمعت صوت ناصر اللي قدرت تميزه من الكام مره اللي اتكلم فيها.
ومن كلامه وصوته العالي قدرت تعرف ان اللي بيصوتوا دول جايين يجاملوا
ناصر….معايزش اسمع صوت منك ليها اكتموا اي واحده فيكم هتصوت هتخرج من البيت مفهوووووم😡
فجأه حست عاليا ان مبقاش في اي صوت لاي مخلوق الكل اتخرس تماماً عدي حوالي 3 دقايق ولقت حد بيخبط عليها.
نزلت بسرعه تحت فتحت الباب وكان لسه باين عليها الخوف اول ما فتحت لاقيته قدامها😳
بشكله اللي كله هيبه لكن كان باين عليه الغضب اول ما سمع صواتهم علي علي.
بلعت عاليا ريقها بخوف وهي بتتنفس بسرعه.
ناصر….انتي كويسه؟
هزت عاليا راسها من غير ولا كلمه بلأ.
اتعصب اكتر ناصر 😡😡
ناصر….ماتردي 😡 كل ما اتحدت وياكي تهزي راسك لو مكنتش سمعت صوتك كنت جولت ما هتتكلميش.
عاليا…برعب انت بتزعق ليه انا جيت جمبك.
ناصر….لما اتحدت وياكي تردي ماهحبش انا هز الراس ده.
عاليا…ايوه كويسه في حاجه تاني؟🥺
خد نفس ناصر وحاول يهدي معلهش اني بس اتعصبت شويه من الصوات وعارف كمان انك اكيد اتفزعتي فا چيت اشوفك
عاليا…مين بيصوت كده؟🥺
ناصر…دي النسوان اللي چابين يعزوا بيچاملوا كيف ما بيجولوا
عاليا….بهدوء تمام
ناصر….چهزي حالك يمشوا الناس اللي چوه وهاچي اخدك اعرفك علي ستي
عاليا….حاضر.
ناصر….انسه عاليا في حاچه لازم نتفج عليها.
عاليا…حاجه ايه؟ هو انا مش عملت اللي انت عايزه لسه في اتفاق تاني.
ناصر…إيوه لسه فيه جعدتك إهنه جدام الناس لازما يكون ليها سبب
عاليا…مش فاهمه.
ناصر….جوليلي انتي كنتي هتشتغلي.
عاليا…ايوه انا بشتغل في شركه تسويق.
ناصر…جدام الناس هنجول انك مهندسه زراعيه وچايه تشتغلي في الارض.
.عاليا…بس انا مفهمش اي حاجه في شغل الارض ده.
ناصر….دي بتاعتي اني بجي عفهمك تعملي ايه ميته ماشي.
هزت عاليا راسها من غير ولا كلمه.
بصلها ناصر بنظره غضب.
عاليا….حاضر🥺
ناصر….أچهزي ساعه زمن وهاچي اخدك سلام.
عاليا….اووووووف يارب 🥺
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية سجينة مع وقف التنفيذ)
