رواية زينب وكريم الفصل الثاني 2 بقلم روان حسن
رواية زينب وكريم البارت الثاني
رواية زينب وكريم الجزء الثاني
رواية زينب وكريم الحلقة الثانية
كريم=أنا عارف أن دماغك زمانها بتودي و تجيب دلوقتى …
قاطعته_أتاري أنت اللي سايبها مش العكس ليه كذبت؟
كريم=عشان هي في الأول و في الآخر بنت، محبتش يبقي شكلها وحش قدامك
_تمام
كريم=صدقيني أنا وفي لأبعد درجة ممكن تتخيليها واللي خلاني أجيب هاجر قدامك لأني مش خايف من حاجة و هعرف ازاي أحافظ عليكي كويس
_المواقف هي اللي هتثبتلي يا كريم لأنه لو علي الكلام ف ناس كتير قوّالة بس خليني أقولك أن البنت دي لسه بتحبك
كريم=حوارنا خلص من زمان و أنا ملتزم ناحيتك و هثبتلك ده
ابتسمت_طيب سلام
كريم=سلام سلميلي علي سوسو و رحوم عمال ما أجيب ماما يوم وأبقي أشوفهم
_يوصل
تاني يوم
علي الواتساب
كريم=ألبس القميص الأبيض ولا البني
_بعتت ريكورد مدته 18 ثانيه بقول فيه” يعني انت بقالك ستة و عشرين سنة بتختار لبسك لوحدك و الدنيا مخربتش اشمعنا بقي دلوقتي أختارلك أنا، و بعدين إفرض ذوقي مش عاجبك هتلبسه غصب؟ كريم فكك مني و قول يا صبح”
كريم=كل ده عشان أخدت رأيك! يا شيخة ده انا مش نازل
بعتت ايموشن ضحك وأنا بضحك فعلاً في الحقيقة
كريم=بس كفاية سمعنا صوت القمر أحلي صباح ده ولا ايه!
امممم الولا ده شكله بقي خطر عليا
بعتت_الأبيض
كريم=خلصانة هلبس البني و جمبه قلب أحمر
_غلسسس
بعد شوية لقيته منزل استوري
متصور سيلفي في مراية الاسانسير بالقميص الأبيض!
و كاتب تحتها صباح الخير وجمبه قلب أبيض.
كريم=ليه مش بتقولي لسماح ماما
_عشان هي مش امي
كريم=بس هي اللي مربياكي
_بس مش امي
كريم=احيه وأنا اللي كنت فاكرك هتقولي لأمي يا ماما
_بس يا كريم لحسن والدتك مش بتطيقني أصلاً
كريم=لا لا متقوليش كده هي بس مش بتحبك سيكا
_حياتي بقت أحسن بكتير انا حسيت فعلاً بالتغيير
ضحك=سيبي ماما دلوقتي لوقتها و خلينا فيكي، أنتي كده كده بعيد عن والدتك ليه متجربيش شعور الأمومة مع خالتك صدقيني أنتي هتفرحي و هي كمان
_امم هبقي أشوف الموضوع ده
في الشات
بعتت_ صباح الخير
كريم=زوزو أبقي فكريني أروح أكشف عند دكتور عيون عشان شايفك باعتة صباح الخير
_هتستظرف همسحها
بعت ايموشنات ضحك= خلاص خلاص ده أنا ما صدقت، و بمناسبة أنك بتحبي الشِعر و كده
من كافاكا إلي ميلينا=شهادة جامعيّة، وأربعة كتب، ومئات المقالات، وما زلت أخطئ في القراءة.. تكتبين لي صباح الخير وأقرؤها أحبك
_كافكا مقالش كده بطل هبد
كريم=ايش عرفك أنتي اسكتي اسكتي
_عندي فرح و خالتو قالتلي لازم أقولك
كريم=سماح دي قلبي كده، طيب اشطا هتنزلي علي الساعة كام آجي اخدك
رحنا الفرح كان بتاع واحدة من أقرب صحابي
كريم=احكيلي عن صحابك
_اوك عايز تعرف عنهم ايه
كريم=يعني صحاب من قد ايه و كده يعني
_من زماان دول عشرة عمري
كريم=بس علي فكره مش سالكين
_نعم!
كريم=مش قصدي بس كلهم مش بيحبوكي ما عدا واحدة
_انهي بقي إن شاء الله
كريم=اللي كانت واقفة جمبك و بتبصلي و تبصلك كل شوية
_امم حبيبة و ايش عرفك هي بقي اللي كويسة وسط سبع بنات
كريم=عشان من نظراتها باين أنها فرحنالك و كانت بتبصلي بتفحص تقوليش المفتش كرومبو قال يعني كده هتعرف أنا كويس عشانك ولا لا
ضحكت_هي فعلا كده مفضوحة أوي الهبلة
كريم=النظرات عامة بتبين مش بيقولوا العيون مرآة الروح إنما الباقيين بتوع مصالح
اتنهدت_يمكن
كريم=مش يمكن هو أكيد، فكك منهم و شوفي غيرهم ما عدا حبيبة و…
قطع كلامه ظهور وليد
وليد*زيزي مش معقول عاملة ايه يابنتي
و جاي يسلم كريم مسك ايده
كريم=معلش بقي زيزي مش بتسلم
وليد بسخرية*هو أنت مين معلش، أخوها الصغير
كريم=هه اضحك و كده قوليله يا زينب أنا أبقي مين شكله عايش في العصر الحجري و ميعرفش عن السوشيال ميديا
قلت بتردد وأنا باصة في الأرض_ده… ده
كريم بمقاطعة=خطيبها
وليد بسخرية*لا مبروك و مبروك ليكي ياا زينب عن إذنكم و مشي
كريم وشه اتقلب=أنا بقول كده كفاية ولا ايه رأيك
_لا طبعا ده فرح صحبتي و لازم افضل للآخر
كريم=طيب انبسطي و سابني و خرج
مش عارفة مشي خالص ولا عمل ايه و أنا فضلت مع صحابي نتصور و نعمل فيديوهات بس مكنتش مبسوطة و وليد مجاش كلمني تاني علي الرغم أنه من الشلة ولمه الفرح خلص لقيت كريم واقف مستنيني بره
_كنت فكراك مشيت
كريم=واسيبك تروحي لوحدك انتي مجنونة
_وافرض حد ضايقني جوه
كريم=لو علي وليد بتاعك فميقدرش انا طلعت بره عشان اهدي و معملش حاجة تزعلك يلا نمشي
في العربية
فكرت في سري”ياربي ده ساكت كريم اللي مبيفصلش من الرغي ساكت! الموضوع كبير”
_احم ما تشغلنا حاجة كده نسمعها
=……
_الجو انهاردة كان لطيف
=…….
_ايه رأيك في فستاني؟
=…….
_علي فكرة مش من الذوق اني أكلمك و متردش عليا
فضل ساكت لحد ما وصل مكان يقدر يركن فيه
كريم=و مش من الذوق أنك متقوليش للأخ إني أبقي خطيبك يا هانم
_خفت
ماشي أنا خفت وليد ده كان في بيننا مشروع جواز و كل حاجة كانت مثالية لحد ما أكتشفت أنه لأ تفكيرنا مش واحد، كان بيعلق علي حاجات تافهة و متحكم بطريقة فظيعة متروحيش و متجيش و متلبسيش وأنا أكبر من كده و قولتهاله قولتله أنت اكبر مني في السن بس أنا عقلي أنضج ف تخيل أبقي سيبته عشان….
كريم=سكتتي ليه؟ كملي
سيبتيه عشان واحد أصغر منك بأربع سنين
أنا مبقتش فاهم أنتي مش عايزاني ولا كارهاني ولا مستعريّة مني ولا واخداني عشان شوية تقاليد سخيفة بتقول أنك كبرتي ولازم تتجوزي قبل قطر الجواز ما يفوتك، شوية أحس إنك قبلاني وأننا هنبقي كابل هايل و شوية احس أن في ميت حاجز و حاجز بيننا
وأنا بحاول، بجد بحاول بقالي فترة أهو أعرفك وحددنا الخطوبة خلاص و مفيش تقدم و كنت راضي علي فكرة
بس الحركة بتاعت أنهاردة دي رجعتني لنقطة قبل الصفر
خفت بس حاولت ميبانش علي ردة فعلي _احم يعني ايه؟
كريم=يعني احنا محتاجين ناخد بريك شوية لحد ما نشوف هنعرف نكمل ولا لا
_……
=الوقت اتأخر تصبحي على خير
_وأنت من اهل الخير
رحمة:شوفي لولا الامتحانات كان زماني رحت معاكي الفرح و جبتلي عريس زي الواد كيمو
_……
رحمة :ولا بلاش لحسن الهانم تغير احكيلي حصل ايه بالتفصيل
_أنا مخنوقة أوي و متضايقة أن أنا مخنوقة
رحمة:ااه الساعة قربت علي 12 عارفاها أنا الحالة دي
_أنا داخلة أنام نتكلم بكرة
:ماشي يا حبيبتي ارتاحي تصبحي على خير
عدي تلات أيام من غير ما يكلمني لحد ما اتفاجئت بيه بيكلم خالتو أنه جاي هو و مامته و أخته الكبيرة جات من بره و عايزة تشوفني!
استغربت لو هو عايز ينفصل ليه هيعرفني علي اخته
جم و أخته طلعت جميلة محستش أن فرق السن مضايقها في حاجة علي عكس والدته اللي مش حباني و حقها ما أنا أكبر منه
لحد ما كله اتلكك عشان يسيبونا لوحدنا
كريم ابتسم=مقفوشين أوي هم
ابتسمت بتكلّف و مردتش لاني غلطانة
بصلي و قال=مش عايزة تقولي حاجه
قلت بحرج_وليد كان…
قاطعني=مش عايز أعرف تفاصيل هو كان حابب ينغص علينا و قال أني أخوكي الصغير علي الرغم من أني شكلاً قدك مرتين و لمه فكرت فيها أكتشفت أنه عارف أني أصغر منك فحب يجيبها بالطريقة دي بس عادي طلع مش ناضج فعلاً كويس أنك سيبتيه و..
قلت عشان أخفف من حدة الموقف_اووه مين غيران
كريم=يا بنتي ده آخره فاضي و عضلاته دي مش أصلية اسئليني أنا
_وانت بقي اللي عضلاتك أصلية؟
كريم=لا طبعاً كله فيتامينات و حاجات مش كل حاجه تصدقيها كده!
و الموقف عدي
جه وقت الخطوبة و لمه خلصت كان لازم نخرج
_بص ده في مكان تحفه و الجي بي اس بيقول أنه في…..
كريم=يابنتي احنا بقالنا سنة بنلف بالعربية و موصلناش
_اقولك سيبها و تعالي نتمشى
كريم=واحنا جايين بيها عشان نتمشي، بس يا زينب
_يلا بس أهو نغير جو عايزة اتمشي بالفستان و البدلة هيبقي شكلنا حلو
كريم=أنتي متأكدة أننا رايحين مطعم عشان أنا حاسس أننا رايحين لقدرنا و لسه موصلناش
_ايوة حتي بص المفروض الشارع الجاي
مجهول×خير ان شاء الله شكلكم تايهين في المنطقة
كريم=آه يا صاحبي احنا بس عرسان زي ما أنت شايف و عايزين نروح مطعم اسمه….
مجهول×هات اللي معاك
_اديله الجي بي اس يا كريم عشان يعرف المكان فين
كريم=استني أنتي
قلت بتقليد التريند_يعني ايه استني أنتي يعني احنا جربانين يعني ولا ايه
كريم=زينب وحياة سماح مش وقت هزار لحسن احنا شكلنا داخلين علي سواد
المجهول×ما تيلا يلا منك ليها هاتي يا عروسة الدهب اللي معاكي ده و تلفوناتكوا يلاا
قلت بهمس لكريم_هو هو
كريم=ايوووة بالظبط كده وصلت اخيرا
_طب طب يا استاذ دلوقتي انا جبت الدهب ده و ملحقتش أفرح بيه
الحرا*مي×تصدقي صعبتي عليا أول مرة حد يحترمني و يقولي يا استاذ
كريم=يا استاذ و ياباشا مصر سيبنا نمشي عشان هي شكلها خطوبة باينة من أولها
قلت بغيظ_قصدك ايه يعني قصدك أني فقر
كريم بتريقه=لا العفو أنا اقدر، وهو بيبرق و بيشاور بعينه علي الموبايل ف ايدي
قلتله_ايه في ايه؟
ضرب بايده علي وشه باستسلام=لا يا حبيبتي سلامتك
الحرا*مي×تصدقوا بخناقكوا ده فكرتوني بالمدام أصلنا بنتعارك كده برده و ف آخر العركة بنروح المستشفى
كريم=ليه كده
الحرا*مي×اصل إيدنا تقيلة حبتين أومال فكرك منين العلامة اللي في وشي دي ما منها
كريم=ااه لا ربنا يخليهالك ألا أنت عندك أولاد
الحرا*مي بفخر× اه عندي عقبال عندك حمو و لمونه
_ليه تسميه لمونه كده يتنمروا عليه في المدرسة
كريم=اه تصدقي مشكلة كبيرة فعلا خلينا نسيب الوضع اللي احنا فيه عشان نعرف ليه سمي ابنه كده
الحرا*مي×يعني ايه يتنمروا عليه دي يا أستاذة
كريم=يعني يغلسوا عليه يا معلم
الحرا*مي×لا وهو حد يقدر ده ابني ده بيوقف الفصل علي الشعرة و كل الأساتذة مبسوطين منه
كريم=ربنا يبارك
الحرا*مي×الله يبارك فيك و…. أنتوا هتاخدوني في دوكة هاتوا اللي معاكم
كريم=انتي واقفة بتتفرجي علينا
_اومال أعمل ايه؟
كريم=هيجرالي حاجه منك يعني عمال أشاورلك علي التلفون تتصلي بالنجدة و بلاهيه في الكلام عشان تفضلي واقفة تتونسي معانا في الكلام الصبر من عندك يارب
الحرا*مي×بتستغفلني يلا
و ف لحظة عو.ره ف بطنه و جري
_يلهوي يلهوي يلهوي
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية زينب وكريم)
