رواية رجل في مهمة مستحيلة الفصل السادس 6 بقلم عادل عبدالله
رواية رجل في مهمة مستحيلة الجزء السادس
رواية رجل في مهمة مستحيلة البارت السادس
رواية رجل في مهمة مستحيلة الحلقة السادسة
الغريبة بقة ان جوز اختي نظراته ليا بقه واضح فيها انه متضايق من رجوعي او اني هتدخل في الشركة .
روحت الشركة انا واختي راندا ورؤوف جوزها وبدأوا يطلعوني علي قوائم الشركة المالية والمشاريع اللي شغالة فيها .
سألت راندا عن نصيب كل واحد في الشركة .
فهمت منها ان طارق وهشام لما حبوا يبيعوا نصيبهم اتعمل فرز وتجنيب لنصيب كل وارث في تركة ابويا الله يرحمه .وان طارق وهشام اخدوا نصيبهم الفيلا والسيولة اللي كانت في البنوك .وان نصيبي انا وراندا وامي بقي في الشركة .
وعرفت ان امي واختي اضطروا يبيعوا مخزن للشركة مساحته الفين متر علشان يسددوا باقي حق طارق وهشام .
طبعا انا الاخبار دي ضايقتني جدا. هما اخدوا حقهم طبعا ومحدش يقدر يلومهم ولكن مكنتش اتوقع ان اخواتي يفضلوا مصلحتهم الخاصة عن مصلحة امهم والاسرة كلها .
وكمان ازاي يسيبوا امهم واختهم لوحدهم في غيابي وخصوصا اني كنت ممكن اموت ومصحاش تاني .
عرفت ان اغلب موظفين الشركة اتغيروا ومش باقي منهم الا عدد بسيط من الناس القديمة .
وان اختي وامي عملوا توكيل بالادارة لرؤوف جوز اختي .
جوز اختي قالي لازم نلغي التوكيل علشان هو هيسلمني ادارة الشركة .
لكن انا قلتله ان انا مقدرش الغي تعبه في الشركة اثناء غيابي وان انا هتعرف علي شغل الشركة وبعدها هنبقي نقسم ادارة الشركة بينا احنا الاتنين علشان يحافظ علي مكانته في الشركة .
الكلام عجب جوز اختي وبدأ يطمن ليا .
ولما قعدت انا واختي لوحدنا سألتها عن سبب عدم انجابها هي وجوزها .
قالتلي ان السبب منها هي وانها بتتعالج من سنين ولكن لسه محصلش نصيب .
لما روحت البيت فكرت وقررت اني هعيش في القاهرة حتي ولو في شقة صغيرة لأن كل اهلي واصدقائي فيها وكمان هقدر ادور علي نجلا بطريقة احسن .
وفعلا نقلت انا وامي في شقة في القاهرة في ظرف اسبوع بالظبط وفضلت راندا مع جوزها في اسكندرية .علي اساس ان انا هتابع الشغل من القاهرة وهما من اسكندرية .
بعدين فكرت اتصل بهشام اخويا وسألت امي عنه .
قالتلي ان هشام بيكلمها علي فترات بعيدة .
اتصلت بهشام: ازيك يا هشام ؟ عامل ايه ؟
: تمام .مين معايا ؟
: شوف كده الصوت مش بيفكرك بحد ؟
: هو الصوت مش غريب عليا .بس مش قادر اجمع ده صوت مين .
: طيب حاول شوية كمان .
: مين اللي كان بيضرب علطول وانت صغير وياخد منك اللعب بتاعتك دايما ؟مين اللي يوم فرحك فضل مخبي البدلة بتاعتك لحد ما اتاخرت وبعدين ادهالك ولما روحت عند المأذون اكتشفت ان البطاقة مش معاك وفي اخر لحظة بعد ما كان هيحصل مشكلة طلعلك بطاقتك وادهالك ؟
: طاهر !!!!!! حبيبي يا اخويا انت فوقت من الغيبوبة امتي ؟ الف حمدلله علي سلامتك .
: الله يسلمك يا اتش .وحشتني يا ندل .بقه كده تسيب امك واختك ومتسألش عني ؟
: متتسرعش وتحكم يا طاهر .انت متعرفش الظروف .لما اشوفك هحكيلك كل حاجة .وحشني يا طاهر .
: وانت كمان يا اتش .يا تري شكلك بقه ايه دلوقتي ؟
: استني هكلمك فيديو كول علشان نفسي اشوفك .
وفعلا اتكلمنا فيديو كول .هشام كمان الزمن بان عليه بس مش اوي علشان هو رايق ومبيشلش هم .
تاني يوم لقيت هشام جالي الشقة الجديدة .
هشام طول عمره هو اطيب واحد في العيلة هو اصغر مني ومن طارق واكبر من راندا .هو طيب بس شخصيته ضعيفة خصوصا قدام الستات .ده غير ان سهل اي حد يأثر عليه .
هشام قعد يحكيلي في ظروف ومبررات انه وافق طارق علي بيع نصيبهم في التركة .
لكن انا فهمت انه تحت تأثير ضغط طارق ومراته مقدرش يقاوم .
لكن اللي خلاني اكون سعيد الي حد ما انه نجح في مشروع المطعم اللي عمله وانه بيفكر يعمل توسعات في شغله .
كل يوم بعد ما ارجع البيت اقعد افكر يا تري نجلا مراتي راحت فين وايه هو سر اختفائها الفترة دي كلها ؟ معقول بعد الحب اللي بينا تسيبني وتهرب ؟ ولا يكون حصلها حاجة وماتت ؟
قررت اني اعمل المستحيل علشان اوصلها .
عن طريق اصدقائي حاولت اعرف هل هي ماتت ولا لسه عايشة ؟ اتاكدت انها لسه عايشة علشان مش اتعملها شهادة وفاة حتي الان .
حاولت اعرف بردو هل سافرت خارج مصر ولا لاء؟ اتاكدت بردو انها مش سافرت نهائيها طول الفترة دي خارج مصر .
اذن هي عايشة وداخل مصر …طيب هي فين ؟وحتي لو نسيت حبنا ازاي يجلها قلب تسيب اولادها ؟ دي كانت بتحبهم بجنون .
قلت لنفسي لازم اتكلم مع اهلها علشان اشوف هما عملوا ايه ووصلوا لايه ؟
ولما روحت عند والدتها اتكلم معاها عرفت ان ناجي اخو نجلا مات بعد الحادثة بتاعتي وبعدها ب اربع سنين اختفت نجلا وان مامتها بسبب سنها ومرضها مقدرتش تكون مع اهلي وهما بيدوروا عليها .
ولما رجعت لأمي وقعدت معاها قلتلها احكيلي يا امي بالظبط نجلا اختفت ازاي ومين اللي كان بيدور عليها ؟
قالتلي ان اللي كانوا بيدورا عليها في كل مكان كان هشام اخوك ورؤوف جوز اختك .
كلمت هشام قالي انه اخد صورة نجلا وكان بيدور عليها في الاقسام ورؤوف كان بيدور عليها في المستشفيات .
ولما يئسوا انهم يوصلوا لها بطلوا يدورا عليها .
قلتله :وليه مش عملتوا نشرة بمواصفاتها في الصحف علشان توصولولها ؟
قالي ان رؤوف فعلا اخد صورتها ونزل بيها نشرة عن المفقودين .لغاية ما سمعنا الاشاعات انها هربت مع حد بعدها بطلنا ندور عليها .
روحت لراندا اختي وجوزها رؤوف وقعدت معاهم وسألت رؤوف عن اللي عمله ووصل لأيه وهو بيدور علي نجلا .
حكالي رؤوف عن اللي عمله وانه تعب كتير ومقدرش يتوصل لمكانها او اي اخبار عنها .
حسيت من كلام رؤوف انه بيحاول يداري حاجة او يتهرب من حاجه .
رؤوف كان بالنسبالي شخصية غامضة اوي مش قادر افهمه كويس .
ليا اصدقاء كتير ليهم معارف في كل مكان .اديت لهم كلهم صور نجلا واسمها بالكامل لعل حد منهم يوصل لأي حاجة .
قدرت عن طريق واحد منهم اني اعرف ان نجلا دخلت احدي المستشفيات في حادثة وكانت فاقدة الذاكرة .في نفس الوقت اللي اختفت فيه .
يتبع…..
لقراءة الفصل التالي : اضغط هنا
لقراءة الرواية كاملة اضغط على : (رواية رجل في مهمة مستحيلة)
