رواية رجل في مهمة مستحيلة الفصل الحادي عشر 11 بقلم عادل عبدالله
رواية رجل في مهمة مستحيلة الجزء الحادي عشر
رواية رجل في مهمة مستحيلة البارت الحادي عشر
رواية رجل في مهمة مستحيلة الحلقة الحادية عشر
وبكده اصبح رؤوف محاصر قانونيا ويبقي ان اوصل له لانتقم منه .
بعد كده بدأت رحلة البحث عنه وكنت لازم اوصله في اسرع وقت .
سافرت لاسكندرية ادور علي رؤوف ولكن معرفتش اوصله .ولما رجعت واثناء وانا في مكتبي في الشركة هشام اخويا كلمني وكان بيطمن عرفت اوصل لرؤوف ولا لا . حصلت حاجة عجيبة جدا .
اثناء المكالمة وانا بقول لهشام اني معرفتش اوصل لرؤوف لقيت نانسي السكرتيرة داخلة المكتب وبتقولي انا اقدر اوصلك له .
بصيت لنانسي في اندهاش وقفلت مع هشام وقلتلها : انتي بتتجسسي عليا يا انسة ؟
: لا يا استاذ طاهر انا مش قصدي .انا كنت داخله لحضرتك بالصدفة وسمعت انك مش عارف توصل لاستاذ رؤوف .
:وانتي هتساعديني ليه اني اوصله ؟دا حتي انتي كنتي سكرتيرته من سنين ولسه مش اشتغلتي معايا الا شهر وكام يوم !! يعني ولائك وانتمائك هيكون له هو مش انا !!..
بصت ليا في خجل مصطنع وابتسمت وقالت : مش مهم اشتغلت معاك اد ايه .المهم اني مكنتش مرتاحة في الشغل معاه .انماانت حاجة تانية .من اول ما شفتك وانا مش قادرة اقاوم .
لما ركزت في عنيها شوفت فيها تلميح او تصريح بانها معجبة بيا .
(قلت في نفسي اجاريها علشان اوصل لرؤوف وبعدين اشوف البنت دي عاوزة ايه ؟ لانها اكيد وراها حكاية. )
: هتساعديني ازاي يا نانسي ؟
:استاذ رؤوف عنده ايميل خاص مفيش حد يعرفه الا انا .
: والله !!!! وده ليه بقه ان شاء الله .
: لأنه كان هيموت عليا وكان عمل الميل ده مخصوص علشان يكلمني عليه .
: وكنتي بتكلميه عليه ؟
: نادرا…لما كنت بحس انه خلاص بيفكر يمشيني من الشركة .
: وبعدين ؟
: انا هكلمه علي الميل ده بحجة اني بطمن عليه وقلقت من غيابه عن الشركة واخد منه معاد نتقابل فيه وبكده هخليك تقدر توصله .
: وده بقه هتعمليه في مقابل ايه ؟
: انك ترضي عليا وتحس بيا .
: ومين قالك اني مش حاسس بيكي .
: تصرفاتك كلها تقول انك مش واخد بالك مني خالص .
: معقول انتي تكوني في مكان وحد مياخدش باله منك !! ده يبقي اعمي .انا واخد بالي منك من اول يوم رجعت فيه الشركة .
ضحكت نانسي وافتكرت في نفسها انها قدرت توقعني .وهو ده اللي انا كنت عاوزها تحسه بالظبط .
نانسي طلعت موبايلها وبدأت تبعت رسايل لرؤوف علي الميل الخاص بتاعه .وخلتني اقرا الرسايل بنفسي علشان تطمني ليها .
نانسي قالتلي ان اول ما رؤوف يرد عليها هتقولي وهتخليني اقرا الرسايل بنفسي .
لما روحت البيت قعدت مع الاولاد ومع نجلا نتعشي ولكن وانا قاعد كنت ببص علي نجلا وبفكر من جوايا وبقول لنفسي لأمتي حالنا هيفضل بالشكل ده ! جفاف المشاعر اللي بينا زي ما هو .
نجلا مصدومة بعد ما عرفت ان رؤوف كان بيغشها السنين دي كلها وانها كانت عايشه معاه في الحرام مش قادرة تعيش معايا كزوجة الا لما ترجعلها الذاكرة .وبصراحة انا ملتمسلها العذر .
تاني يوم وانا داخل الشركة لقيت الشركة مقلوبة والعمال والموظفين كلهم واقفين بره .
ناديت علي نانسي السكرتيرة وسألتها
: خير يا نانسي الموظفين واقفين كده ليه ؟
: في اتنين من الموظفين اكتشفوا ان عندهم كورونا .وكل الموظفين خايفين يدخلوا الشركة وعرفنا ان الحجر الصحي هييجوا علشان يعقموا الشركة ولازم الشركة تتقفل اسبوعين .
دخلت الشركة انا ونانسي وحطيت اوراق الشغل كلها في الخزن .وقفلت الخزن كلها .
وبعدين قفلت الشركة ومشيت وقلت لنانسي اننا لازم نفضل علي اتصال خلال اجازة الاسبوعين علشان موضوع رؤوف .
نانسي قالتلي : انا تحت امرك وقت ما تحتاجني هتلاقيني بقولك شبيك لبيك .واول ما استاذ رؤوف يرد علي رسالتي بعدها بدقيقة واحدة هتكون عارف .
مشيت من الشركة وروحت لهشام اخويا وقولتله علي القضايا اللي عملناها لرؤوف .
هشام قالي دلوقتي لازم نوصله ولما يبقي معانا ناخد منه حقنا وبعدين نحبسه .
كان باقي علي مهلة الاسبوع اللي اديتها لحازم يوم واحد بس .
لقيت رقم غريب بيرن علي موبايلي .رديت عليه لقيته حازم .
حازم قالي انه كلم والده علي انه عاوز يتجوز بنتي دنيا ولكن والده رفض لان سنه لسه صغير .
اول ما قالي كده انا ثورت عليه وقلت له انا مليش دعوة بالكلام ده اتصرف وقفلت الموبايل في وشه .
من ضيقي وغضبي من موقف ابو حازم ومش عارف هتصرف ازاي في الورطة دي اتصلت بدنيا وزعقت معاها وقلت لها ان ابو حازم رفض انه يتقدملها لان سنه لسه صغير .وقلتلها هنعمل ايه بقه في الفضيحة دي .
طبعا انا عارف اني انصرفت غلط لاني كده حطيت البنت في مواجهة مشكلة ملهاش حل .
لكن غضبي والضغوط اللي عليا من كذا اتجاه هي اللي خلتني اعمل كده .
وفي اخر اليوم رجعت البيت لقيت دنيا قافلة اوضتها علي نفسها .ولما سألت مامتها قالتلي انها من بعد الظهر كان عندها صداع نزلت جابت برشام للصداع ودخلت اوضتها ومخرجتش .
بعد شوية لقيت دنيا خرجت من اوضتها ودخلت الحمام .
استنتها لما تخرج علشان اتكلم معاها شوية ولكنها أتأخرت كتير .
قلت لنجلا شوفي البنت اتأخرت في الحمام كده ليه .
راحت نجلا تشوف دنيا اتأخرت ليه .وفجأة نجلا تصرخ بأعلي صوتها .
……………….
ياتري دنيا حصلها ايه وطاهر هيعمل ايه مع حازم من ناحية وهيعمل ايه مع رؤوف من ناحية تانية . ونانسي يا تري عاوزه ايه من طاهر وهيعمل معاها ايه .
لو عاوزين تعرفوا يلا بقه لايكاتكم الجميلة وتعليقاتكم الكتيييير .
يتبع…..
لقراءة الفصل التالي : اضغط هنا
لقراءة الرواية كاملة اضغط على : (رواية رجل في مهمة مستحيلة)
