رواية ديجور الهوى الفصل السادس والأربعون 46 بقلم فاطمة طه سلطان
رواية ديجور الهوى الجزء السادس والأربعون
رواية ديجور الهوى البارت السادس والأربعون
رواية ديجور الهوى الحلقة السادسة والأربعون
مرت عدة أيام أكثر من أسبوع بعد أن أجرت عمليتها عادت إلى المنزل برفقة عائلتها، كانت تشعر بالألم في جسدها أثر العملية، كان الجلوس والنوم وأي حركة وكل شيء صعب عليها، والدتها كانت بعونها تساعدها في كل خطوة، لكنها كانت صامتة أغلب الوقت تؤدي دورها وكأنها اقرب إلى مساعدة ليست والدتها، وكأنها منزعجة من شيء ولكن كلما تسألها إيمان إذا كان هناك شيء يزعجها أو يقلقها لـتخبرها به كما أعتادت لكنها تمتنع عن الإجابة…
لكن اليوم ما أن انتهت من تناول الطعام كادت والدتها أن تأخذ الصحون الفارغة، استوقفتها إيمان متمتمة:
-ماما ممكن افهم في ايه؟! مالك متغيرة ليه معايا من يوم العملية وكل ما أسألك تقوليلي مفيش حاجة…
تحدثت والدتها بانزعاج جلي وانفجار شديد كان لابد منه بعدما حاولت كتمه الأيام الماضية:
-أنا مستغربة من بجاحتك أنك بتسألي؟!!!!! أنتِ مش واخدة بالك من اللي حصل في المستشفى؟!! مش واخدة بالك من اللي قولتيه واللي عرفناه عن ******.
هتفت إيمان بنبرة باردة:
-أنا كنت بحافظ على الشخص اللي معايا واتجوز، قللت من نفسي وعملت كل حاجة علشان اتجوز وتفرحي بدل ما كانت الناس بتعايرك بيا اني وصلت للسن ده ولسه متجوزتش، وبعد ما عرفت اللي كان بيعمله كنت ساكتة، ساكتة علشان بحبه ومش عايزة اضيع سنين ووقت تاني من عمري والرجالة كلهم زي البعض…
هوت والدتها بصفعة على وجنتيها رن صداها في أرجاء المنزل، قالت والدتها بجنون:
-اخرسي، اخرسي احسنلك، احمدي ربنا اني عاملة حساب للعملية واللي مريتي بيه وإلا والله كنت كسرتك وكسرت عضمك أوعي تفتكري أنك كبرتي عليا، ومتجبيش العيب علينا، أنتِ اللي ضيعتي سنين من عمرك جنبه وحتى بعده ضيعتي سنين وأنتِ بتبخي السم في ودن اخته وساكتة عن شهادة الحق….
تمتمت والدتها بنبرة حاولت جعلها خافتة قدر المُستطاع:
-احمدي ربنا اني مش عايزة اخوكي او ابوكي يعرفوا عن قرفك حاجة، ادعي تقومي بالسلامة وان ربنا يسامحك يا بنتي وانا هدعي يسامحني لو كنت قصرت في تربيتك…
ابتلعت ريقها وهي تقول بنبرة جادة:
-واعملي حسابك أول عريس هيجي ليكي احنا هنقبل بيه مهما كانت حالته وابقى لو جدعة اعترضي….
غادرت الغرفة تاركة إيمان تستشيط غضبًا وهي تضع يدها على بطنها عند موضع الجرح تمنع صرخة كانت على وشك الخروج منها…
ما ان خرجت والدتها، وجدت ابنها يتحدث في الهاتف وفهمت من الحديث بأنه يتحدث مع صديقه ياسين وظلت واقفة حتى انتهى من المكالمة ليتحدث ابنها بنبرة هادئة:
-في حاجة يا امي؟! صوتكم كان عالي ليه كده؟!.
تمتمت والدته بنبرة هادئة:
-مفيش حاجة يا ابني الطبيعي بتاعك انا واختك ناقر ونقير، أنتَ كنت بتكلم ياسين صح؟!
هز رأسه بإيجاب لتسأله والدته وهي مستمرة في هدوئها ونبرتها:
-هو لسه بيدور على عروسة؟!.
تمتم ابنها بنبرة عادية ولا مبالاة لا يفهم ما وراء حديث والدته:
-يعني هو من ساعة ما مراته اتوفت وأهله بيلحوا عليه بالجواز علشان عياله بس يعني هو ساعات بحسه مايل للفكرة وشوية لا بحسها مش في دماغه وأنه مندمج ومهتم بـعياله؛ بس بتسألي ليه يا امي؟!
قالت والدته بهدوء:
-ما تلمح على اختك وتلفت نظره ليها..
صرخ ابنه بعدم استيعاب:
-أنتِ بتقولي ايه يا امي؟! على أخر الزمن هدلل على اختي؟!!…
تمتمت والدته بنبرة مرتبكة ولكنها جادة وتعي ما تقصده:
-ايه المشكلة يعني ياسين يعتبر متربي في بيتنا وعارفين أخلاقه وكمان ظروفه دلوقتي مناسبة لاختك بعد موضوع عمليتها، ده حتى المثل بيقول اخطب لبنتك ومتخطبش لابنك…
هتف بنبرة متشنجة وغاضبة خرجت منه ساخرة إلى أبعد حد:
-مقالش لاختك…
ابتلع ريقه ثم قال بنبرة ثائرة إلى أقصى درجة:
-انا هعتبر نفسي مسمعتش حاجة يا امي انا مش هدلل لاختي والجواز قسمة ونصيب وهي اللي عملت في نفسها كده قبل أي حد بلاش نفتح في القديم احسن، اخر مرة با امي اسمعك تقولي كده وتصغرينا بعد ما رفضت كل اللي دخلوا البيت من بابه هنمشي ندلل عليها…..
أنهى حديثه ورحل بخطوات غاضبة ومنفعلة بعد الكلمات التي قالتها والدته التي لا يتقبلها أي شاب…
____________
‘ القــاهـــرة ‘
تجلس أفنان على الأريكة شاردة تمامًا منذ أن أتت من الخارج…
طفلها يجلس في الخارج مع المُعلمة التي أتت بها من أجل الصغير فهو لا يتخذ والدته على محمل الجد، أما شريف رحل منذ الصباح بعد أن ترك الطفل معها هي وداغر….
داغر كان يجلس معها في الغرفة وأمامه الحاسوب الخاص به أخبرها بأنه يقوم بعمل بعض الأشياء المتعلقة بعمله ومن وقتها هو مشغول به، أو لا تعلم هي منذ عودتها ولا تعطي تركيز لأي شيء…
تحدث داغر بعدما أغلق الحاسوب المتواجد أمامه:
-مالك يا أفنان ساكتة كده ليه؟!
لم يجد منها أي رد فعل مازالت كما هي عاقدة ساعديها وتنظر في اللاشيء مما جعله يرفع صوته قليلًا:
-أفـنـان…
تحدثت أخيرًا وانتبهت له:
-ايوة يا داغــر في أيه؟!..
-مالك في ايه مسهمة كده ليه؟!.
أردفت أفنان محاولة جعل الأمر طبيعي:
-مفيش حاجة…
حاولت الكذب لكن بالفعل عقلها مشغول جدًا….
….عودة إلى ما قبل ثلاث ساعات….
كانت تقف في الصيدلية التي تتواجد أمام المنزل والتي تعرف الفتاة التي تعمل بها او الطبيبة كما تحب أن يناديها الناس، تقوم بشراء بعض المنظفات ومتعلقاتها الشخصية وبعض الأدوية التي تضعهما دومًا معها لأي ظرف طارئ من أجل صحة طفلها، وجدت الفتاة وألقت عليها التحية ولم تصدق حينما تحدث…
“أنتِ قلعتي النقاب يا أفنان ولا أيه؟!”.
وقتها تحدثت بعدم فهم:
“نقاب ايه؟!”.
“في ايه يا افنان مالك ده انا كنت بشوفك من فترة كل يوم وقولتيلي انك اتنقبتي وبعدها اختفيتي ودلوقتي قلعتيه”
وقتها حاولت إيجاد أي رد مناسب قد تتحدث به عن تلك الكارثة تحديدًا حينما وضحت المرأة بأنها رأتها أكثر من مرة تخرج من المنزل، فأخبرتها أفنان على مضض بأنها قامت بخلعه لأسباب صحية أو أي حجة استطاعت قولها هي لا تفهم شيء ولا تتذكر ما قالته لكنها بالتأكيد كان حمقاء أمام المرأة
يبدو أن كمال كان محقًا بأنه سمع صوت أمرأة معه، وبحديث الفتاة كانت تؤكد أن لمدة فترة طويلة كانت تتواجد أمرأة في منزل شقيقها….
هل هي شمس أم أمرأة أخرى؟!..
….عودة إلى الوقت الحاضر….
تحدث داغر بنبرة ساخرة:
-واضح فعلا أن مفيش حاجة أنتِ سرحانة من ساعة ما جيتي أنتِ وفهد لما كنتم بتجيبوا حاجات ومن ساعتها وأنتِ على الحال ده…
لم يكن أمرًا سهلًا حتى تخبره به…
لذلك حاولت القول أي شيء قد يبدو منطقي:
-مفيش يا داغر حاجة والله انا بس قلقانة شوية على شريف احواله مش عجباني ومش عارفة بيفكر في ايه وكده يمكن علشان بعدت عنه ورجعت حاسة ان في حاجات معرفهاش عنه..
سألها داغر بنبرة ذات معنى:
-متأكدة ان دي المشكلة بس؟!.
هتفت أفنان بتأكيد وثقة زائفة:
-ايوة مفيش حاجة تانية.
تمتم داغر بهدوء وهو يغير الموضوع هو بالفعل يعيش مرحلة جميلة وكأنه يؤسس بيتًا لهما، كأنه يتزوجها بالفعل:
-في موقع حلو في حاجات كده رفايع للبيت ايه رايك لو طلبنا على هنا أو ننزل بنفسنا في ****** او اي مكان تحبيه ونشوف الحاجة بعنينا يعني بس انا خايف على رجلك..
تمتمت أفنان بنبرة هادئة وواضحة:
-الدكتور قالي ادوس عادي يا داغر واتعامل عادي لو فضلت كده مش همشي بقية حياتي..
-بعد الشر عليكي.
ابتسمت له ثم غمغمت:
-أنا هقوم اروح احط عصير او حاجة ليها…
هز رأسه بتفهم وتركها تفعل ما يحلو لها بينما هو عقله كان مزدحمًا بشكل كبير…..
…بعد وقت…
انتهى الدرس الخاص بفهد كان شريف قد جاء وأخذ يصنع الطعام التي لم تصنعه أفنان متحججة بقدمها أمام داغر ولكنها في الواقع كانت تخفي عدم اتقانها الطهي هذا الشيء الوحيد الذي لم تتعلمه، حسنًا هي ليست سيئة إلى الدرجة لكنها ليست ماهرة، ولا تشعر بأنها مهما حاولت طهي الطعام جيدًا وتجربة العديد من الوصفات المختلفة او حتى تخترع هي أن تفعل شيء شهي، يكون مقبولًا رُبما لكنه ليس شهيًا عكس الطعام الذي يصنعه شريف، هو ماهر جدًا في أي شيء يفعله، وكانت تلك الصفة تشعر بدهشتها أي أمرأة تتزوجه…
انتهى الجميع من تناول الطعام ثم أخذ شريف وافنان يتشاجرا أثناء غسل الصحون هو يريد فعلها وهي تريد أن تفعل شيئًا وكان الحل هو المناصفة بينهما…
بعد ان انتهى من غسل الصحون أخذ شريف (فهد) واخذا يتحدثا بعيدًا وبعدها وجدت شريف يغمغم بهدوء:
-أنا هاخد فهد نروح مشوار كده مع بعض..
تحدثت أفنان ساخرة:
-النهاردة لسه المُدرسة كانت هنا بدل ما يذاكر هتاخده؟!.
غمغم شريف ساخرًا:
-ياستي ده أولى ابتدائي محسساني انه بيمتحن ثانوية عامة، لما يرجع هيذاكر، هو واحشني وبقالي كتير مخرجتش معاه.
تمتم فهد بحماس شديد:
-ايوة يا ماما سبيني أروح معاه واوعدك لما ارجع هذاكر..
هتفت أفنان بنبرة متهكمة وهي تجلس على الأريكة بجانب داغر الصامت تمامًا يشرب كوب الشاي الخاص به مراقبًا الجميع:
-لما بتصدق تهرب..
تمتم داغر بنبرة هادئة أخجلتها:
-طالع لأمه، سبيه مدام عايز يروح وخلاص.
_____________
‘ دبـــي ‘
أحبك أمس وأحبك اليوم وأحبك إلى الأبد..
#مقتبسة
ما ضَرُّ هَذِهِ الأرض لَو أنَّكَ هُنا بالجِوار، أقرَبُ مِن كُلِّ الوُجوه!
#مقتبسة
تَدور كل الكَواكبّ والنُجوم حَولّ نَفسُها وتَدورُ أنتَ حَولَ قَلبي.
-مقتبسة
عاصفة من المشاعر كلنت هوجاء، أشد عاصفة قد مرت عليهما رُبما لأنها تمتلك مشاعر جديدة مختلفة تمامًا دون قيود أو شروط، لكنها الأولى فحسب ليست الأخيرة بكل تأكيد…
لم يكن العناق كافي ليتأكد من أنها هنا حقًا كان شيء يتوقعه أبدًا…
لا شيء يكفيه أبدًا ولا يظن أنه سيكتفي منها يومًا…
أنه اليوم الاول الذي تم فيه السماح للمشاعر حقًا وبصدق دون الخوف او الترقب من كونها التجربة الأولى، تلك المرة أطلق الاثنان العنان دون حذر أو قلق، لا تتذكر أنها بعد أن سحبها إلى أحضانه قد تفوهت بحرف أو سمعت شيء منه هو الأخر، لا تتذكر سوى طيار المشاعر الجارف الذي عصف بهما ولم يوقفه في بدايته إلا طرقات خافتة تعلن عن وصول حقائب فردو استلمها كمال بسرعة ثم أغلق الباب مسترسلا بثها أشواقه لم يترك لها فرصة للابتعاد وهي كانت تريده وبشدة، اشتاقت له وتريده أن ينقذ ما تبقى منها بين ذراعيه لعل النجاة بينهما، بين لمساته الحنونة…
حتى أنه لم يسألها عن وجودها أو كيف أتت؟!! ولماذا؟!!!
لم يكن هناك أي مجال للأسئلة من هذا النوع فقط اشتياق لا أحد قادر على أن يتحكم به تلك المرة تحديدًا…..
ها هي تجلس بين أحضانه في الفراش، في خصلاتها متوسطة النعومة ذات الموجة القوية، خصلاتها كثيفة بشكل عام وصحية، في جانب رأسها فوق أذنيها هناك وردة موضوعة وبين يديها تحمل باقة الزهور التي ما عادت تستطيع أن تنصف باقة بعد وجودها بينهما وبعدها سقطت أرضًا وبعد انتهاء تلك المعركة أخبرته بأن الباقة قد أفسدت وهي أتت بها من أجله وهو لم يراها حتى….
أتى بها ووضع الوردة وقتها في خصلاتها مخبرًا أياها بأنه هكذا سيراها بشكل أفضل….
سألته فردوس بنبرة خجولة ولكنها عفوية:
-ايه رأيك فيها؟!..
نظر إليها متفحصًا نظرات أربكتها كليًا وكأنها لم تكن تلك المرأة التي تبادله عاطفته بعاطفة أكبر منذ وقت ليس طويلًا..
-ملهاش حل عجباني جدًا.
تمتمت فردوس بثقة بعض الشيء:
-بجد عجبك؟! انا بصراحة مكنتش عارفة اختار اوي دي اول مرة اجيبلك ورد و…
أجابها كمال بنبرة جادة وبريئة وهو يقاطع حديثها:
-بس أنا بتكلم عليكي أنتِ…
تصنعت أنها انشغلت في الباقة حتى تخفي خجلها التي قد تجد أنه غير منطقي بعض الشيء…..
سألها كمال بنبرة هادئة وهو يترك قُبلة على رأسها:
-جيتي ازاي؟!.
عقبت فردوس على حديثه ساخرة بعض الشيء:
-فيك الخير والله على السؤال ده أنا قربت أروح وأنتَ لسه فاكر تسألني جيت ازاي…
ضحك من قلبه حقًا بسبب تعقيبها يبدو أنها محقة…
لكنه كان يريدها، يريد الشعور بها أولا لتصدق بأنها هنا وأن يطلق لمشاعره وجنونه بها العنان…
-بكلمك بجد جيتي ازاي؟!..
تمتمت فردوس بنبرة هادئة:
-جدك هو اللي عمل كل حاجة وعرض عليا اليوم اللي سافرت أنتَ فيه وانه كان مجهز ورقي من قبل كده على أساس أننا كنا هنسافر مع بعض قبل اللي حصل، وبس قالي لو حابة أسافرلك هيسفرني ليك وأنا قولتله اني عايزة اجيلك وبس..
سألها باهتمام وهو يحاول أن يقوم بتخمين الباقي في عقله ولم يكن صعبًا:
-وجيتي من المطار ازاي؟!..
أراحته وهي تخبره بهدوء ونبرة هادئة تشعر بالسكينة بين أحضانه:
-كنت محولة الخط وأنا في مصر، ولما جيت شغلته واتصلت بـيوسف وكان مستنيني هو ومراته هو قالي أنك تعرفه وجدك قالي أنه هيكون مستنيني….
نظر لها كمال بعدم تصديق…
بالرغم من جراءة فردوس المعتادة في الحديث أو أي شجار جمعهما وفظاظتها لكنها ليست الإنسانة التي قد تقدم على المغامرة أو السفر بمفردها….
سألتها بنبرة هامسة:
-وجيتي ليه؟!..
هتفت فردوس بعنجهية:
-جاية اعمل shopping واجيب حاجات لدعاء وأنا ماشية هاجي ايه يعني؟!!!!…
نظر له بضيقٍ ورغبة في الحديث؛ حسنًا يبدو أنها مجبرة أن تخبره بالسبب الحقيقي هو يستحق سماع تلك الكلمات منها كما يخبرها هو دائمًا لتصبح هي المتكلم بدلا من المستمع كما أعتادت:
-علشان وحشتني، وعلشان مش عارفة اقعد وأنتَ مش موجود، وعلشان حسيت ان اي حاجة في الدنيا ممكن اتحملها غير اني اخسرك، وأنا محسبتهاش لأول مرة محسبهاش وأعمل اللي أنا حاساه؛ من غير ما أفكر في أي حاجة، أنا عمري ما هقدر أبعد عنك ومش هستحمل تضيع مني حتى لو في وقت غضبي….
صمتت لثواني وهي ترفع رأسها وتنظر إليه قائلة بجدية:
-بس بصراحة كنت خايفة حسيت أنك ممكن تكون عايز تفصل بجد ووجودي هيضايقك أو هيحرجك وأن وجودي هيكون غير مرغوب فيه….
ترك قُبلة على وجنتيها متمتمًا برقة تذيبها حقًا:
-ودلوقتي؟!..
أجابته بصدق وهي تضع رأسها على صدره:
-حسيت اني اخدت القرار الصح.
هتف كمال بنبرة تجعلها تشعر بالأمان رغم صعوبة الأمر:
-كل حاجة هتكون كويسة….
قالت فردوس بتمنى حقيقي ونبرة مرتجفة بعد أن هبطت دمعة من عيناها:
-يــارب.
تمتم كمال بهدوء:
-تحبي ننزل نأكل ولا نطلب الأكل؟!..
ابتعدت عن أحضانه ورقعت رأسها متمتمة:
-ننزل ونتمشى ونأكل في أي حتة أنا عايزة اتفرج على البلد وتخليني ألفها دي أول مرة أسافر ومعاك.
ترك قُبلة على جبهتها متحدثًا برفق:
-ومش هتكون الأخيرة ان شاء الله…
ثم أسترسل حديثه بنبرة ذات معنى قد يُهلكها لكنه هلاك أصبح محبب لها:
-ممكن نخلي النزول ده بكرا، النهاردة أنتِ ليا ومفيش حاجة هتاخدك مني ولا حتى دماغك لأنها خدت وقت أكتر من اللازم….
____________
‘ الـشـرقـيـة ‘
في منزل عائلة داليا…
جاءت داليا من الداخل وهي تحمل أصغر أبناء شقيقها الذي يبلغ من العمر عام ونصف حتى تخفف الحمل عن جهاد الواقفة في المطبخ والتي أعلمتها للتو بأن صديقتها نورا بالخارج أتت لزيارتها…
صافحتها نورا ببشاشة وانزعجت من ملابس داليا السوداء فهي مازالت تقيم على نفسها الحداد….
تمتمت داليا وهي تحاول إخفاء دهشتها من إتيان نورا للمرة الأولى دون ميعاد على غير العادة:
-اتفضلي يا نورا اقعدي، تشربي ايه؟!..
هتفت نورا بجدية وحرج:
-مش جاية أشرب حاجة ملهوش لزوم تتعبي نفسك…
هتفت داليا بإصرار:
-لا لازم طبعًا…
قالت نورا بـودٍ مقاطعة أياها:
-اقعدي بس نتكلم وشوية كده وهقولك اشرب ايه انا لسه جاية من البيت وواكلة وشاربة وعاملة كل حاجة.
جلست داليا وبين أحضانها ابن شقيقها النائم وحينما وجدت انظار نورا تتوجه نحوه تحدثت داليا برفقٍ:
-ده أسر ابن اخويا الصغير…
-ربنا يحفظه يارب.
تمتمت داليا بهدوء:
-يارب.
هتفت نورا باهتمام حقيقي:
-أنتِ ايه اخبارك واخبار دنيتك؟!.
عقبت داليا بـرضا تام:
-الحمدلله على كل شيء الأمور كلها تمام، يعني ربنا يصبرنا.
تمتمت نورا بنبرة خافتة ولكنها جادة:
-يارب يا حبيبتي، مش ناوية تغيري الأسود يا داليا؟!! ملهوش لزوم الحزن مش في اللبس تحديدًا في البيت يا حبيبتي متناميش باللبس الاسود ولا تقعدي بيه…
قالت داليا بعاطفة قوية:
-بحاول والله بس قلبي مش جايبني كأن الدنيا في عيني أسودت…
-كله هيعدي بأمر الله، وان شاء الله لسه الفرح والسعد هيحل على حياتك، الميت خصوصا الاب والام مش بيتنسوا ولا الحزن ده هيريح قلبها عليكي في تربتها، هي بتبقى حاسة بيكي…
هزت داليا رأسها بإيجاب ومسحت دمعة فرت من عيناها، لتحاول نورا تغيير الموضوع ولكنها كانت سخيفة إلى حد كبير في فعلتها:
-وبعدين ازاي يعني تطلقي بالسرعة دي طليقك معندوش دم يسيبك في ظرف زي ده…
قالت داليا بنبرة جادة:
-بلاش تجيبي سيرته يا نورا، كمال راجل محترم ربنا يوفقه في حياته، ومش هو اللي كان عايز يطلق أنا اللي فضلت مُصره على موقفي وهو كان رافض بس إصراري كان الأقوى لأسباب شخصية.
صمتت نورا لتقول بحرج:
-ربنا يعمل اللي فيه الخير.
-يارب.
هتفت نورا بنبرة واضحة:
-داليا بصراحة انا جيت أتكلم بخصوص الشغل…
ضيقت داليا عيناها وهي تسألها بعدم فهم:
-شغل ايه؟!!.
قالت نورا بتفسير وتوضيح أكبر:
-شغلك معانا في المعمل يا داليا هو هيكون شغلك في الغيط؟!!! ارجعي اشتغلي معانا زي زمان واشغلي وقتك، القعدة في الحزن طول الوقت بتتعب القلب الشغل بيلهي شوية…
ثم أسترسلت حديثها بنبرة جادة:
-داليا أنا خالد اللي بعتني أتكلم معاكي وأقولك ترجعي والمرة دي بنفسه قالهالي صريحة أنه مش عارف يوصل ليكي كل الارقام اللي معاه ليكي القديمة…
هي قامت بتغيير أرقامها بعد أن تمت سرقة هاتفها، وتركت العمل…
هتفت داليا بنبرة مستنكرة:
-خليني أفكر لمدة خمس ثواني بس علشان أفهم أنك قولتي قدامه اني اطلقت صح؟ فهو راح قدم عرضه الثمين اللي مش هيتكرر ….
قالت نورا بحرج وهي تحاول الدفاع عن نفسها:
-والله كانت بالصدفة مكنش قصدي خرجت مني غصب عني..
قاطعتها داليا بسخرية:
-متحمليش نفسك ذنب مش ذنبك، الذنب على اللي قالتلك كان المفروض افهم اني حياتي مشاع عندكم في المعمل تتكلمي فيها وأنا كنت بتكلم معاكي عادي كأني صاحبتك…
تمتمت نورا بانزعاج جلي ونبرة صادقة:
-والله العظيم ما كان قصدي وبعدين اقسم بالله هو قالي انه عايزك ترجعي من قبل ما يعرف حوار طلاقك ده.
تنهدت داليا ثم غمغمت بنبرة هادئة ومُرهقة:
-خلاص حقك عليا أنا اعصابي تعبانة شوية يا نورا هو في النهاية مش سر مصير الناس كلها تعرف…
أردفت نورا بهدوء:
-داليا خالد لسه بيحبك.
هتفت داليا بسخرية:
-أنتِ مُصرة تستفزيني صح؟!..
قالت نورا بنبرة جادة وصادقة:
-لا بتكلم بجد أنا شايفة أنك من الأول كنتي ظالماه، وأحنا مشوفناش منه حاجة وحشة يمكن طباعه كانت مختلفة عننا شوية علشان تربيته اللي كانت برا ورجوعه يشتغل في معامل ابوه بس هو بيتغير واتغير اكتر السنين اللي فاتت، ليه من الاول مش عايزة تديله حتى الفرصة؟!
ابتلعت ريقها ثم أسترسلت حديثها بوضوح:
-مع أنك شايفة أنك بتدي فرصة لأي حد غيره والدليل جوازتك الأولى والتانية، ومن غير ما تتعصبي أحنا بنتكلم في العقل…
ردت عليها داليا ببساطة:
-علشان هو شخص غير مناسب في تصرفاته بالنسبالي أنا كنت بحاول اختار اللي شبههي وشبة عيلتي وظروفه مناسبة ليا، ومعتقدش هو مناسب لأي حاجة من دول وكمان المفروض يصرف نظر ولا عنده طموحات يكون الزوج الثالث؟!..
أنهت حديثها بنبرة ساخرة مما جعل نورا تتحدث برفقٍ:
-هو مجابش سيرة حاجة بس ده شيء واضح للأعمى اهتمامه بيكي وتربيته وتكفيره اللي مش عاجبك مش هيخليه يتراجع لو هو زوج عاشر، يمكن تكوني كل ده كنتي بتحسبيها غلط وسايبة الشخص اللي بيحبك بجد وعايزك، حتى فكرة السفر مشوفنهوش سافر إلا مرة كل سنة بيقعد اسبوعين تلاتة أو شهر بالكتير لأمه وبيرجع يعني استقر هنا عايزة ايه تاني؟!!…
تنهدت داليا ثم سألتها بهدوء:
-تشربي ايه يا نورا؟! بدل ما نتكلم في كلام مش هيغير وجهة نظري عنه وسامحيني انا امي اتوفت ولسه في فترة العدة معنديش مرارة للكلام عن أستاذ خالد…
-والشغل؟!..
قالت داليا بنبرة جادة:
-والشغل كمان معنديش مرارة اتكلم فيه لاني حاسة اني نسيته ونسيت كل حاجة انا سيبت الشغل من سنين ورجوعي هيبقى صعب كأني لسه بتدرب من الأول ولو فعلا يهمك مصلحتي اني اشتغل علشان اضيع وقتي فأنا لو اشتغلت هشتغل في أي حتة غير معاكوا…
-غبية…
تمتمت داليا بنبرة عادية ولا مبالاة متجاهلة تعقيبها المنفعل:
-تسلميلي أنا هدخل أعملك عصير وفي كيك جهاد عملته وهسيب أسر جوا في السرير واجيلك.
رحلت داليا من أمامها ورغبت نورا في أن تكسر عنقها ورأسها الصلب، ألتقطت هاتفها لاجد اكثر من عشرين رسالة من خالد أغلبها علامات استفهام هو مترقب الرد بشكل كبير، حمدت ربها بأن هاتفها على الوضع الصمت وإلا كانت لاحظت داليا الأمر وأقامت عليها الحد…
أرسلت له رسالة قصيرة خيبت أمله:
“رافضة ترجع خالص”
“بس أنا مش هسيبها لو مش المرة دي هتبقى مرة تانية في مثل عندنا بيقول الزن على الودان أمر من السحر يا دكتور لا تقلق”
رأى الرسائل في لحظتها الهاتف بين يديه ينتظر الرد منها….
فأرسل لها بإيجاز:
“ابعتيلي رقمها أكلمها كمان كام يوم كده يمكن أعرف اقنعها ترجع الشغل”.
كان ردها عليه:
“لو عملت كده والله ممكن تقاطعني فيها ثق فيا أنا هحاول معاها تاني وخلي مكالمتك ليها اخر حل”
تركت الهاتف وبعد دقائق كانت تأتي داليا وهي تحمل العصير وقطعة من كعك الشيكولاتة الشهي…
______________
بسبب قول الجميع عن المشاكل التي قد يوجهها المحبين، الا أن بعضهم يقولون أنها تدل على قوة الحب بينهما، والأخرون يقولون أن كثرتها تدل على عدم التفاهم بينهما، ويكم السؤال في من هم يقول الحقيقة.
#مقتبسة
‘ القــاهـــرة ‘
لم يحاول شراء أي هدية لأي أمرأة تزوجها…
كان يكتفي بمعرفة ما تريد ويأتي به بعد سؤالها، لم يحاول أن يفعل هذا من نفسه قط وبدون مناسبة قد تستدعي هذا…
يبدو أنه فاشل في هذا الأمر لا يستطيع شراء هدية للمرأة التي يحبها ولأنه ببساطة شديدة لا يعلم اهتمامات شمس، لا يعلم عنها شيء تقريبًا….
فكيف يعتذر عما صدر منه؟!…
لا يستطيع سؤال أفنان بسبب كبريائه وخجله في تلك النقطة رغم أن الجميع يشهد بوقاحته، افنان فهي أمرأة بالتأكيد تعرف اي شيء قد تهتم به الفتيات والنساء عامة، لكن لا يستطيع فعل هذا بعد تلميحها الأخير…
يحمل الصندوق الخاص بالهدايا بين يديه يحمله ويضع يديه أسفله بسبب ثقل وزنه وبجانبه يقف فهد….
فتحت شمس الباب فقد تم قرع الجرس منذ دقائق، كانت ترتدي إسدالها المنزلي الذي يسعفها تحديدًا بسبب وجود والدتها في المرحاض تأخذ حمامها ولأنها لا تعلم هاوية الطارق قررت أن تفتح بهيئة مناسبة…
وجدته أمامها مبتسمًا يحمل صندوق الهدايا وابتسامة واسعة مرتسمة على ثغره، الأمر لا يحتاج أن تمتلك ذكاء خارق على ما يبدو هو أتى للاعتذار منها وأتى بهدية من أجلها، على وشك أن تفقد وعيها حقًا من شدة السعادة التي احتلتها الآن…
لتذهب كل خططها ما قبل النوم لتصبح أمرأة ثقيلة غير مبالية ولا تعترف له بحبها إلى الجحيم، حسنًا هي تعلم بأنها لا تقوم بتنفيذها مطلقًا في المرات السابقة لكنها كانت تقسم بأنها ستفعل تلك النرة لكنه الوغد لم يعطها الفرصة…
هبطت إلى مستوى الصغير بأعين لامعة وهي تقبل وجنتيه الممتلئة واللذيذة ثم صعدت ودون وعي منها أخذت الهدية متمتمة بحفاوة رغم اندهاشها من الثقل ما الذي وضعه ياترى ليصبح بهذا الحجم فهي تزيد عن خمسة كيلو:
-اتفضلوا…..
ولج فهد وخلفه شريف وحجس الاثنان على الأريكة وهي وضعت الصندوق على الطاولة وقالت بسعادة:
– تشربوا ايه؟! اجيبلكم عصير؟!
قال شريف بنبرة عادية:
-يعني مش عايزين نتعبك…
-لا تعبك راحة، أقصد تعبكم….
أنهت حديثها وولجت إلى الداخل اختفت لمدة دقائق بعد أن اخبرت والدتها التي تقوم بتمشيط خصلاتها بأن ثائر وابن شقيقته في الخارج لتنتهي وتخرج لهما وأخبرتها بأنه اتى بصندوق هدايا لا تعلم ما يتواجد بداخله لكن الحماس يقتلها…
خرجت وهي تحمل العصير وتضعه على الطاولة أعطت الصغير الكوب الخاص به وهي على وشك أن ترقص من فرط سعادتها بأنه أتى بهدية من أجلها…….
جاءت سوسن من الداخل متمتمة بنبرة وقورة:
-ازيك يا ابني؟! وازيك يا صغير؟!!.
قالت جملتها الأخيرة مداعبة الصغير…
ليجيب شريف:
-الحمدلله يا حجة سوسن بخير…
عقب الصغير هو الاخر:
-الحمدلله يا طنط.
أعطت شمس كوب العصير إلى ثائر الذي على ما يبدو قد نسته من فرط الحماس الذي يتملكها…
كانت شمس واقفة نظراتها على وشك أن تخترق الصندوق الكرتوني من شدة فضولها وكأن والدتها قد قرأت نظراتها لتقول برفق جديد عليها:
-افتحي يا بنتي شوفي ثائر جابلك ايه…
بثقة كان ثائر يتحدث هو الأخر:
-افتحي يا شمس…
فتحت شمس الغطاء بحماس رهيب لم تستطع أن تخفيه ولم تحاول من الأساس ولكن فجأة شعرت بالصدمة، أخرجت كيس السكر، أخرجت كيس أخر، كيس أخر وبعدها كيس من اللحم…
تمتمت شمس بصدمة:
-ايه ده؟!.
قال شريف بهدوء شديد وهو يفسر الأمر:
-كنت محتار أجيب ايه ليكي علشان أنتِ مقموصة مني، فلقيت السكر شاحح اليومين دول قولت اجيبلك وجايبلك عرق لحمة فلتو ملهوش حل هبعتلك الطريقة علشان تعمليه حاجة كده خيال…
صاحت شمس باستنكار:
-قوم اقف…
تمتم شريف بعدم فهم:
-ايه؟!!
صاحت شمس بجنون لينهض مجبرًا بعد نبرتها تلك:
-اقــف….
وضعت كل شيء في الصندوق لترفعه وتقذفه عليه رغم ثقله ويلتقطه هاتفًا بانزعاج:
-الصندوق كده هيتقطع الحق عليا اني عملتهم بشكل شيك…
تمتمت شمس بعصبية مُفرطة:
-اطلع برا يا ثائر، برا…
هتف ثائر بعدم فهم وبغضب هو الاخر:
-في ايه لده كله؟!.
صاحت شمس باستنكار شديد وهي تنظر له بذهول:
-ده كمان بيسأل في ايه؟!!!….
تمتم ثائر بنبرة غاضبة:
-أنا اللي غلطان والله اني عبرتك وحاولت اصالحك واجيبلك حاجة وانا جاي…
استمرت في الصياح وهي تغمغم بسخرية لاذعة:
-بتصالحني ولا معزوم عند الشيف الشربيني ولا دي شنطة رمضان؟! حتى لسه بدري عليه، برا بقولك..
تمتم ثائر وهو يكز على أسنانه:
-يلا يا فهد، الحق عليا..
جذبت الطفل إليها متمتمة بنبرة ساخرة:
-لا أنتَ اللي مطرود مش هو..
نظر لها بسخط شديد وغيظ كبير…..
فأسترسلت هي حديثها بنبرة جنونية:
-استناه تحت، يقعد معايا شوية وبعدين هنزله ليك لأنه واحشني……
بعد ربع ساعة تقريبًا كان يجلس على المقعد الخشبي الخاص بحارس البناية، وفي الوقت نفسه كان (ظــافـر) يصطف بسيارته أمام معرضه ليلمح هذا المشهد وهو يجلس على المقعد ويضع الصندوق على فخذيه ينظر نظرات قاتلة بسبب طرده وبسبب غبائه في الوقت نفسه أين كان عقله؟!….
جاء ظافر بخطوات واثقة ثم أردف بنبرة هادئة:
-مساء الخير يا ثائر ايه اللي مقعدك كده؟! طالع ولا نازل؟!.
أجابه شريف بنبرة ساخرة:
-ولا دي ولا دي ببساطة انا مطرود….
لم يفهم ظافر ما يقوله جيدًا أو بمعنى اصح سببه ولكنه تحدث بودٍ:
-مدام مطرود تعالى عندي المعرض نشرب قهوة او شاي مع بعض…..
الإنتظار في المعرض كان ألطف ويحفظ به كبريائه بدلًا من الجلوس بالاسفل في انتظار السيد فهد الذي جلس معها بدلًا من أن يشعر بالضيق من أجل خاله الذي تم طرده…
لم يتوقف ظافر عن ضحكاته وهو يسمع منه سبب طرده واستقبال فهد بدلًا منه ليتحدث ظافر بنبرة ساخرة:
-يعني في حد بيصالح واحدة يروح جايبلها لحمة وسكر؟! ماشي دي هدية تجيبها لما تكون مراتك مثلا بعد خمس سنين جواز ويكون كرشك قدامك مترين وأنتَ جايب اتنين كيلو برتقال معاهم علشان فيتامين سي..
-أنا غلطان والله اني فكرت اجيب حاجة أصلا هي الستات كده مبيعجبهاش العجب…
تمتم ظافر مستنكرًا:
-أنتَ بجح مش غلطان بس يعني انا اعرف الواحد يجيب تليفون، حاجة دهب، شنطة، طرحة، بلوزة، اي حاجة في الدنيا غير انك تشرحلها ازاي تعمل عرق فلتو، اومال لو مكنتش متجوز قبل كده كذا مرة منتظر حد يديلك نصايح عن الستات؟! ده المفروض أنتَ اللي تعملنا كتاب…
شعر شريف بأنه بالفعل أحمق والجميع محق…
أبلة ويستحق أن تقوم بـطرده…
أما ظافر كان عقله في مكان أخر لا يصدق بأنه يومًا كان يمتلك تلك العقلية لا يصدق بأنه أتى بـ سمك مملح (فسيح) من أجل زوجته الأولى حنان، وحينما بدأ الاهتمام بـ يقين زوجته الثانية كانت أول هدية قام بشرائها من أجلها زجاجة بلاستيكية وفي المرة الأخرى أصابع الورق عنب الذي قام بحشوها بنفسه، لكنه لم يعترف بأنه كان احمق مثله، او على الأقل هناك فارق في السن والتجارب بالنسبة لهما لكن رُبما الحب يصيب الانسان بالقدر الكافي من البلاهة تحديدًا حينما تستشعره لأول مرة……
هتف ظافر بنبرة هادئة:
-اشتري ليها هدية حلوة وصالحها بس اهم حاجة خف رجلك عن العمارة…
فهم تلميحه الأخير ولكنه تجاهله وتحدث بنبرة مهتمة:
-اجيب ليها ايه يعني؟!.
قال ظافر ببساطة شديدة:
-اقترحت اكتر من اقتراح شوف ايه اللي يناسبك..
تحدث شريف بنبرة جادة:
-مش كان عندك محلات دهب باين؟!!! قبل كده قولت قدامي، اروح اشتري ليها سلسلة أو خاتم او اي حاجة…
تمتم ظافر بنبرة يشوبها الحزن:
-ايوة بس هما بتوع مراتي الاولانية الله يرحمها وانا مبروحش هناك عثمان المسؤول عن كل حاجة حتى بعد ما شبه ساب الشغل بيروح كل فترة كده وأنا نادرًا ما اروح الا لو في شيء مهم يستدعي ده..
عقب شريف بجراءة:
-ده خوف من مراتك…
أجابه ظافر بنبرة عادية ولم ينزعج من تعقيبه كأي رجل أخر:
-اولًا مبحبش اروح هناك لأنه ذكريات حنان وذكريات محمد اخوها، ثاني سبب اه بخاف من زعل مراتي، الجواز مشاركة وتنازلات ومراعاة لمشاعر اللي معاك، زي ما هي بتراعي مشاعري في حاجات كتير واتنازلت عن حاجات كتير اوي علشاني، وغيرت من نفسها، ميقللش مني اني اعمل زي ما هي بتعمل لازم الكفة تفضل طول الوقت متوازنة لو جت في يوم اختلت شوية مش مشكلة لكن لو طبت هتبقى مشكلة كبيرة ساعتها…
ابتلع ظافر ريقه ثم غمغم بهدوء:
-لازم الإنسان يقدر اللي معاه وميعملش اللي يزعله بحجة أنه مكنش يقصد، في حاجة اسمها حب ومودة ورحمة..
أعجب شريف بحديثه إلى حد كبير، حديث لمسه ولم يسمعه من قبل، حتى في زيجاته لم يكن يضحي بشيء كان فقط يضع شروطه وما ان لم يتم تفيذها ينتهي كل شيء، لم يهتم لمراعاة من معه، ويبدو أنه يحاول تحسين ما يحدث مع شمس….
لكنه يفشل…
هتف ظافر بهدوء مغيرًا الحديث:
-صحيح بقا أنا مفهمتش ليه مدام البنت دي مهمة بالنسبالك متجوزتهاش لغايت دلوقتي مع أنه مش طبعك يعني أنتَ كل ما واحدة بتقع في طريقك وتعجبك بتتجوزها مش أنتَ اللي بتحط نفسك في مواضع شبهة حسب ما اع ف بتدخل البيت من بابه…
حاول شريف قول اي شيء مناسبًا وأي كلمات قد تبدو مناسبة:
-أحنا شبه مخطوبين ومامتها موافقة بس باقي موافقة أهل ابوها وفي بينهم مشاكل وأنا بحاول أحلها…
-ربنا يعمل اللي فيه الخير هبعتلك اللوكيشن بتاع المحل لو حابب تروح في اي وقت روح وكلمني….
صدع صوت الهاتف يعلن عن اتصال من شمس ليودع ظافر ثم يذهب إليها ليجدها ترتدي نقابها تركت الولد بعد أن ودعته وصعدت في المصعد وتركته دون قول كلمة واحدة…
_______________
”أريد كل ضحكة معك، كل إبتسامة، كل حُجة، كل يوم عظيم، كل يوم سيء، وكل اللحظات التي لم تأتِ بعد أريدها معك أنت”
#مقتبسة
كل وردّ الحبّ في قَلبي نـبَت..
#مقتبسة
‘ بــنــى ســويــف ‘
بعد اتصال جاءه من منير منذ عدة أيام يخبره بأن هناك موافقة مبدائية منهما فليأتي مع والده من أجل اتفاقات الرجال….
وحددا الموعد بأن يأتي يوم الأحد…
ها هو ووالده يجلسا في حجرة الاستقبال والضيافة في بيت منير، وضعت بشرى فناجين القهوة أمامه كان والدها في الداخل بعد أن استأذن منهما أجل مكالمة هامة تخص عمله، ووالده ذهب إلى المرحاض…
لا تعلم كيف تشجعت وخرجت بالفناجين تلك المرة بثقة دون أن تخشى تكرار ما حدث في المرة السابقة….
تمتم هلال بخفوت وتشجيع:
-التحسن واضح مفيش صوت تكسير النهاردة، القعدة في البيت خلت بعض الأمور تتحسن..
صدقًا هي ترغب في قتله ولكن ليست في مزاج رائق لفعل هذا، مما جعلها تعقب ببراءة زائفة وهي تحمل الصينية مرة أخرى:
-احنا لسه فيها ممكن يقعوا عليك مثلا وتروح من هنا للقاهرة وأنتِ بدلتك الحلوة دي كلها قهوة ايه رأيك؟!..
نظر لها هلال بنظرات مُبهمة فهي فتاة عجيبة تثير عقله وافكاره بتصرفاتها الخجولة تارة، المتهورة تارة اخرى، غير المجنونة لكنه عقب بهدوء شديد وهو يأخذ الصينية ويضعها مكانها:
-هي حلوة؟!.
ضيقت عيناها وهي تستقيم وتعقد ساعديها متمتمة بحماقة:
-هي أيه؟!.
قال هلال ببساطة شديدة وهو يتأملها:
-البدلة مش لسه كنتي بتقولي أنها حلوة، فده دليل انها عجبتك وثناء على اختياري، أول مرة ألبسها النهاردة.
تأمل فستانها الوردي الذي ينساب على جسدها بنعومة والتي ترتدي معه حجاب يجمع لون الفستان واللون الابيض سويًا:
-بالمناسبة فستانك حلو ولايق عليكي.
ما تلك المهارة اللعينة الذي يتمتع بها؟!!
هي تقوم بإهانته او قول ما لا يصح بكل غباء وهو يقوم بتحويل الأمر إلى شيء أخر حسنًا لتعترف بأنه وسيم، ليس وسيم فحسب بل مُهلك من هيئته الرجولية الطاغية واختيارته الرائعة ولم تكن المرة الأولى التي تعجب بملابسه هي أو ملك لكنها لم تقصد في وقتها أن تتغزل به…
-أنا مبحبش كده على فكرة..
ضيق هلال عيناه وهو يسألها باستغراب وبراءة:
-مبتحبيش ايه بالظبط؟!.
قالت بنبرة مرتبكة ومنزعجة إلى أقصى حد:
-أنتَ بتعاكسني وبتقولي فستانك حلو..
قال هلال مداعبًا أياها:
-معتقدش دي حاجة تعملي عليها حوار ومش معاكسة ده إطراء، وبعدين أنتِ عاكستيني وقولتي بدلتي حلوة مروحتش اتهمتك بالتحرش اللفظي..
من هذا الرجل وماذا يفعل في صالون منزلهم؟!!
ولما تضع القهوة أمامه وتتحدث معه بهذا الشكل؟!!!
ما الذي يحدث ويصيبها بالسعادة في أعماقها؟!!.
كانت تنظر له ببلاهة ليحاول تغيير الموضوع:
-عملتي ايه في القضية؟!…
-أنا خلصتها خلاص بغض النظر أنك باعتلي قضية خليتني اراجع كتب الجامعة كلها واحمل كتب قد كده pdf إلا اني عرفت الحل اللي يخلي المتهم مياخدش اكتر من ست شهور……
نظر لها هلال مصدومًا وهو يعقب:
-ازاي؟!.
قالت بشرى بثقة وهي تعقد ساعديها:
– عادي أنتَ حبيت تعقدني بس أنا كنت الاشطر..
لتسمع صوت عادل من خلفهم:
-احب اسمع القضية واسمع حلك..
بعد مرور عدة دقائق وهي تجلس على المقعد المتواجد أمام الأريكة الذي يجلس عليها عادل وابنه الذي يشعر بالغيظ الشديد مما توصلت إليه هو كان يرغب في تعجيزها أو رُبما الشرح، أن تطلب منه المساعدة أن يكون هناك أي سبب الحديث بينهما لكن أن تحل القضية كيف تفعلها فتاة في سنها ليس لديها خبرة في المجال؟!!!!!
يبدو أنها كانت مُصره على النجاح أمامه..
عقب عادل بـثناء كبير بعد ان انتهت من شرحها وتفسيرها لوجهة نظرها واثباتاتها:
-برافو عليكي يا بشرى بجد ما شاء الله عليكي غقلك سابق سنك وخبرتك، مش أي حد يقدر يوصل للحل والثغرات دي إلا لو كان حد متمكن…
قالت بشرى بسعادة حقيقية:
-أنا بجد مش مصدقة أن حضرتك بتقولي أنا الكلام ده..
تمتم عادل بحنان:
-تستحقيه يا بنتي، علشان كده أنا متمسك أنك ترجعي المكتب ولا ايه يا هلال؟!.
عقب هلال بغيظ واضح:
-ايوة طبعًا..
جاء منير من الداخل متمتمًا وهو يعتذر على مضض:
-اسف كانت مكالمة مهمة، خليتكم تستنوا كتير..
قال عادل بهدوء:
-ولا يهمك..
نظر عادل إلى بشرى نظرة فهمتها جيدًا فهتفت على مضض:
-عن إذنكم…
ابتسم لها عادل بحنان بينما هلال امتنع عن الإجابة وغادرت بشرى لتذهب إلى المطبخ حيث تجلس والدتها وجدتها…
…عودة مرة أخرى إلى الخارج…
-اهم حاجة بشرى ترجع المكتب لأن ده مستقبلها احنا مش بنعلم عيالنا علشان في أول خلاف يقعدوا في البيت احنا بنعلمهم علشان يعتمدوا على نفسهم ويشوفوا مستقبلهم…
كانت تلك كلمات عادل ليرد عليها منير ببرود:
-ان شاء الله، هعلمها السواقة واجيب ليها العربية وبعدين ارجعها كده اكون مطمن عليها اكتر في الطريق وفي الرجوع وغيره دلوقتي الافضل تكون في بيت ابوها لغايت ما كل ده يحصل…
تمتم عادل وهو يحاول تمالك أعصابه:
-بما أننا جايين نتفق ايه طلبات حضرتك؟!..
قال منير بإيجاز:
-مليش طلبات معينة زينا زي الناس وزي ما الأصول بتقول، اهم حاجة احنا معندناش خطوبة بطول شغل سنتين والكلام ده…
غمغم عادل ببساطة ودعابة:
-ولا احنا، وعموما هلال جاهز لو عايز الجواز الشهر الجاي احنا معندناش مشكلة في حاجة…
ابتسم منير على مضض وقبل أن يتحدث كان هلال هو من يتحدث:
-ست شهور كويس؟!.
قال منير بنبرة باردة:
-أنا كنت هقول سنة مناسب على الأقل علشان تفهموا بعض خصوصًا أن بشرى مش مستعجلة هي لسه صغيرة وبتشوف مستقبلها…
تحدث هلال بنبرة تماثله:
-انا كمان خابف على مستقبلها وعلاقتنا مش هتشكل خطر على مستقبلها بالعكس أنا هكون الداعم ليها..
تمتم منير بإصرار وإيجاز:
-سنة فترة مناسبة.
دخل عادل في الحوار مرة أخرى بعد أن تنحى جانبًا وصمت:
-نخليها سنة، ولو بعد كام شهر الولاد كانوا متفقين وبشرى حاسة انها مش محتاجة وقت تاني يبقى خير البر عاجله لو حاسة أنها لسه متلغبطة نخليها سنة او زي ما تحب…
يرغب منير في سبب أن يرفض الأمر لأجله لكن ليس هناك سبب حقيقي قد يجعله يفعل وبسبب ضغط والدته عليه……كان يرغب لابنته زيجة من شخص يعرفه وبطريقة يعرفها عوضًا عن شخص لا يعرفه جيدًا وتقضي ابنته وقت معه بحجة العمل..
هو لا يشعر بالراحة تجاة هذا الشاب ولا لصديقه وعلى ذكر صديقه هو لم يأت…
تمتم منير باستفهام:
-غريبة يعني صاحبك اللي كان بيجي كل مرة معاك ده مجاش المرة دي…
أجاب هلال بنبرة عادية:
-حضرتك قولت عايز قعدة للاتفاق، حتى والدتي مجتش، وكمان هو مشغول شوية الايام دي وهو زي اخويا مش صاحبي بس…
قال منير على مضض:
-ربنا يخليكم لبعض…
عقب هلال بثبات:
-يارب.
-نتفق على الشبكة ولو حابين تيجوا تشوفوا الشقة…
قال عادل تلك الكلمات بهدوء…
___________
‘ القــاهـــرة ‘
الغيرة عبارة عن التقاء بين صوت العاطفة وصوت العاصفة..
#مقتبسة
“لم يكن لدي نقطة ضعف،من أين خرجتِ أنتِ؟!”
#مقتبسة
بعد رحيل فهد برفقة شريف، ظلت أفنان تجلس على الأريكة بذهن شارد وبجانبها هو مستمر على عمل بعض الأشياء التي لا تعرفها على الحاسوب الخاص به، تعلم بأنه شيء يخص عمله…
برغم انشغاله الكلي إلا أنه بين الحين والأخر يلقي نظره عليها ليجدها شاردة تمامًا على غير العادة، لم يلمح في عينيها مثلا خوف او خجل من جلوسهما بمفردهما لكن بالفعل هو يشعر بأن هناك شيء يشغلها…
ترك الحاسوب مفتوحًا على الطاولة التي تتواجد أمامهم ثم غمغم داغر بنبرة منزعجة قد نفذ صبره على الأغلب:
-ممكن افهم في ايه بقا ومتقنعنيش اني مفيش حاجة علشان مش هصدق…
-أنتَ مصمم أن في حاجة ليه؟!..
-يمكن لأني مش أعمى وباين على وشك أن في حاجة شغلاكي أكبر من اللي قولتيه الصبح…
تنهدت أفنان ثم هتفت بنبرة جادة حتى يصمت ويكف عن اسئلته تلك:
-والله يا داغر ما في حاجة تخصني انا بفكر في شريف، في موضوع يخصه أنا مش هينفع أقوله قصادك وفي نفس الوقت أنا مش عارفة أكلمه فيه لأني محرجة بس هي حاجة تخصه هو وحياته هو متخصنيش أنا فـ مش هقدر أقولك ايه هي…
صمت لدقيقة تقريبًا وهو يستشعر صدقها تلك المرة ليعقب بعدها بإيجاز:
-شريف مش عيل صغير علشان تعدلي عليه، وهو طول عمره دماغ لوحده من ايام ما كان عيل صغير، مفيش حد مش عارف الصح من الغلط، سبيه يعيش حياته زي ما هو عايز ومدام موضوع يخص حياته الشخصية بلاش تدخلي فيه….
وهل حياته الشخصية يسمح بها ان يتم استخدامها هي مازالت تتذكر حماقتها وهي تقف أمام المرآة صمتت أفنان قائلة بعد تنهيدة خرجت منها:
-معاك حق…
صدع صوت هاتفه يعلن عن اتصال من صديق له فقال داغر بنبرة هادئة:
-في واحد صاحبي جالي عند ****** هروح اقابله وهاجي مش هتأخر…
-طيب.
غادر داغر تاركًا حاسوبه مفتوحًا، فحاولت أفنان أن تقوم بإغلاقه ولكنها وجدته قد قام بفتح أكثر من موقع لا تعلم لو قامت بإغلاقه وهو يفعل شيئًا سينتهي لو فعلت وستقوم بتخريب عمله…
فقررت أن تتركه كما هو لكن لفت انتباهها أن حسابه الخاص بـ (الفيس بوك) مفتوحًا..
ما شأنها؟!..
كانت تسأل نفسها هذا السؤال، لكن فضول الأنثى بداخلها جعلها ترغب في رؤية حسابه تحديدًا لأنه ليس صديقًا عندها ولا هي صديقه عنده بعد ما حدث وسفره حدث شيئًا ما وتم غلق حسابه، فقام بفتح حساب أخر ووقتها لم يضف أي شخص منهما الأخر….
أخذت تقوم برؤية حسابه الشخصي وترى المنشورات التي يقوم بتنزيلها وجدت أخر منشور قام بمشاركته كان منذ شهر تقريبًا ما هذا الرجل؟!!
ألا يوجد شيء يثير انتباهه او تفكيره؟!!
أو يعجبه؟!
يذكرها بشقيقها شريف….
حتى المنشورات الأخرى التي تسبقه كانت على فترات متباعدة جدًا، وجدت أكثر من عشرين إشعار في الأعلى لم يفتحهم، شيئا ما أخبرها أن تفعل..
وفعلت…
فوجدت حساب باسم منال يعقوب، قد سجلت إعجابها بـمنشورات عديدة لديه وصور خاصة به منذ يوم تقريبًا..
من منال؟!! من تلك؟!!!
في ثواني كانت ولجت إلى حسابها كانت صديقة عنده فتحت المحادثة بينهما دون وعي لتجد أخر محادثة بينهما قد مر عليها أكثر من ستة أشهر كانت محتواها بعض الطلبات الخاصة بالمنزل ليأتي بها عند عودته من العمل…
إذن هي طليقته…
ولما قد تكون طليقته في قائمة الأصدقاء بينما هي زوجته ولديها صلة قرابة به وليست متواجدة؟!!!.
ما هذا الحريق؟!!
يبدو أنه قد اندلع في قلبها وعقلها الآن…
هي على وشك أن تلقي بالحاسوب أرضًا ولكنها تماسكت قدر المُستطاع، أما عن نيرانها التي تشعر بها لا تستطيع اطفائها…..
طليقته مهتمة تتواجد في قائمة الأصدقاء..
تقوم بتسجيل إعجابها على منشوراته
فماذا بعد؟!!!!!
ليردها إلى عصمته حتى ينتهي الأمر……
ظلت الاسئلة تدور في عقلها والغضب يتفاقم بها….
حتى عاد بعد ساعة تقريبًا استقبلته بوجه لا يعبر عن شيء..
ثم جلست في مكانها الذي تركها به تضع قدم فوق الأخرى عاقدة ساعديها وتنظر له بنظرات غريبة تلك المرة هي ليست شاردة بل متحفزة وتتخذ وضعية الهجوم….
تمتم داغر بنبرة هادئة:
-خير يا أفنان مالك؟! مش كنتي كويسة قبل ما امشي؟!!..
هتفت أفنان بنبرة ساخرة:
-كُنت…
جلس بجانبها متحدثًا باهتمام:
-في أيه يا أفنان؟!..
-مفيش.
قالتها وعيناها على وشك إرتكاب جناية مما جعله يلوي فمه بتهكم وهو يتحدث بضيقٍ فهو يكره المماطلة:
-لا باين أوي أن مفيش حاجة فعلا، أفنان اخلصي أنا صبري بدأ يخلص منك…
-معلش اتحملني ولا متتحملنيش ما أنا مليش أي حق عندك….
نهضت من مكانها وهي تحاول كبح دموعها وكانت على وشك الرحيل ولكنه كان الأسرع حينما ألتقط كفها وجذبها لتجلس مرة أخرى متمتمًا بجدية تحديدًا وهو يرى دموعها:
-أفنان ايه اللي حصل؟! وايه اللي بتقوليه ده؟! وبتعيطي ليه أنا مش فاهم؟!!!!
هتفت أفنان بعجز وقهر:
-علشان مليش حق أتكلم تقريبًا…
كانت هذا ما تشعر به لمدة ثواني…
هي مازالت خجله من ذنبها أثناء مراهقتها عند محادثتها لحسن وبالرغم من حبها الذي بات واضحًا ومشاعر داغر المُعلنة لها إلا أنها تشعر بالقلق حيال ذنبها!!
أو رُبما الجرح من كونها السبب في كل ما يحدث وكأنه ليس من حقها معاتبة زوجها عن اقترافه شيء أغضبها…
لأنه تستر عليها….
عقب داغر بعدم فهم ولكن نبرته كانت مختنقة وغاضبة إلى أقصى حد:
-أفنان هو ايه اللي ملكيش حق أنا مبحبش الكلام بالالغاز قولي في ايه علطول، وبعدين يعني ايه ملكيش حق؟! حق ايه اللي بتتكلمي فيه؟!..
أجابته بنبرة جامدة بعد أن مسحت دموعها بيدها اليسرى لأن كف يدها اليمني قد احتجزه:
-حقي فيك….
ضيق عيناه وهو يحاول أن يفهم مغذي كلماتها ولكنه فشل وعقب تعقيب بسيط رغم عدم فهمه ما تقصده كليًا:
-زي ما ليا حق فيكي أنتِ كمان ليكي فيا يا أفنان وممكن تفهميني في ايه؟!.
هتفت أفنان بنبرة ثائرة:
-في أن طليقتك لسه عندك على الفيس بوك، تقدر تقولي ليه لو فعلا ليا حق؟!!.
صمت لثواني لا يصدق أن تلك الدموع وحالتها تلك بسبب منال، الذي كان على وشك أن ينساها لولا أمر سفرها هي وفهد معه…
تمتم داغر بنبرة هادئة محاولًا أن يرضيها:
-نسيت امسحها أفنان أنا بجد مش بهتم بأي حاجة ليها علاقة بالسوشيال ميديا ولا بركز في حاجة حتى لو حد باعتلي رسالة فين وفين عقبال ما أرد.
كان محقًا فهي وجدت العديد من الرسائل من أصدقائه لم يتم قرأتها أو فتحها وكذلك الإشعارات ولكنها لا ترى بأن هذا مُبررًا قويًا لذلك غمغمت بانزعاج:
-مش مبرر..
سألها داغر بعدم فهم وهو يحاول أن يخمن:
-أنتِ عرفتي منين اصلا؟! هو أنتِ عندي على الفيس بوك؟!!!.
صاحت بنبرة جنونية رغمًا عنها:
-لا كفايا ست منال عندك وجودي أنا ملهوش لازمة خليها هي عندك وتعملك لايكات ولاف على صورك، وعايشة الحياة هكون عندك أنا ليه؟!..
عاد يكرر سؤاله مرة أخرى بنبرة جادة:
-أفنان عرفتي منين؟!.
تمتمت أفنان على مضض وهي تحاول أن تحفظ ماء وجهها:
-لما مشيت كنت هقفل اللاب توب بدل ما هو مفتوح على الفاضي، كان الفيس بوك بتاعك مفتوح وغصب عني شوفت يعني مكنش قصدي…
هتف داغر مستنكرًا:
-غصب عنك ايه يعني اللاب توب كتفك علشان تفتشي فيه بالعافية؟؟!.
نظرت له أفنان بضيقٍ وهي تتحدث بانفعال:
-يعني هتسيب أساس المشكلة وتمسك في اني ليه قلبت في الفيس؟! بدل ما تعترف أنك غلطان.
عقب داغر على حديثها ببساطة شديدة:
-حقك عليا أنا غلطت فعلا، بس والله ما اهتميت ولا أخدت بالي، همسحها دلوقتي اهو…
بالفعل فتح الحاسوب وبعد دقيقتين تقريبًا كان قد قام بحذفها من قائمة الأصدقاء، لتسارع أفنان تطالبه بالمزيد:
-وتضيفني انا وتشيل سنجل اللي أنتَ حاططها دي وتحطني أنا، أنك متجوزني…
رفع داغر حاجبيه وهو يتحدث باستنكار:
-واضح أوي أنك شوفني كل ده بالصدفة….
أخذت الحاسوب منه وأخذت تبحث عن نفسها ثم أرسلت لحسابها طلب صداقة والتقطت هاتفها لتقوم بقُبوله وكان حسابها مُغلق لا يظهر منه شيء وكانت تضع صورة كرتونية فقط هي من تظهر لمن هو غير صديق لها، فهي لم تكن مهووسة بتصوير نفسها ووضع صورها الشخصية على حسابات التواصل الإجتماعي الخاصة بها….
نفذ داغر ما تريده ليتحدث بنبرة هادئة:
-كويس كده نفسيتك أحسن؟!.
تمتمت أفنان على مضض وكبرياء:
-يعني مش أوي، أنتَ عملت الصح واللي المفروض كنت تعمله مش علشاني يعني….
سألها داغر بنبرة غامضة بعد أن ترك الحاسوب ووضع يديه خلف ظهرها ليحتضنها:
-أفنان أنتِ غيرانة؟!!!.
هتفت أفنان بعناد:
-أنتَ كنت غلطان.
-خلاص والله عرفنا اني كنت غلطان واعترفت المفروض أنتِ اللي تعترفي أنك غيرتي…
تمتمت أفنان بارتباك طفيف:
-أبدًا عادي أنا بس…
صمتت فوجدته ينظر لها بسخرية ينتظر أن تزيد من حماقتها أمامه، لتتفوه باختناق بسبب الشعور العجيب الذي احتلها ولم تكن تشعر به من قبل حقًا وكأن أحدهم قد انتهك أحد حقوقها بل أهمها:
-أيوة غيرت، ارتحت….
ترك قُبلة على وجنتيها وبعدها ثغرها الشهي متحدثًا بمشاعر تحرقها من شدتها وصدقها في الوقت ذاته:
-أنا بـحـبـك ممكن تفهمي ده كويس…
تسارعت دقات قلبها وصمتت لثواني وحاوطت عنقه واحتضنها هو بحب بلمسات هادئة تطمئنها، وكان هذا هو مقصده أن تعلم بأنه يرغب في قُربها ليس شهوة، بل حُبًا، اكتمالًا، حق مشروع، ليس لمسات تخيفها أو تصيبها بالذعر بل لمسات ترغب بها وما ورائها من عاطفة…..
كانت ترغب في الاعتراف بأنها بالفعل باتت تعشقه، بات شيء لا يتجزأ من حياتها ولكنها صمتت أو رُبما خجلت، أو مازالت متحفظة في شأن تركه طليقته طوال هذا الوقت على حسابه، لا تعلم السبب الأساسي الذي منعها من قولها الآن….
لكنها احتضنته لأول مرة بنفسها بامتلاك وكأنها تؤكد لها في المقام الأول وله بأنه حـققها الذي لن تفرط به.
_____________
‘ يــوم الاثـنـيـن ‘
يحاول تصليح ما اقترفه مساء أمس، ذهب منذ الصباح وقام بشراء سلسلة على هيئة (شمس) رأها مناسبة وتشبهها إلى حد كبير، تذكر شقيقه كمال الذي دومًا يحسن اختيار الهدايا يتذكر أنه دائما كان يراه حاملًا هدايا مختلفة إلى فردوس تحديدًا باقات الزهور المختلفة والانيقة حاول أن يشتري واحدة لكن قبل أن يدخل إلى المتجر عاد بإدراجه لا يراه شيئًا مناسب لشخصيته ليس إلى هذا الحد!!!
ها هو يقف أمام شقتها قرع الجرس، فتحت له سوسن قائلة بترحاب:
-ازيك يا ثائر عامل ايه؟!.
أجاب ثائر عليها بهدوء:
-الحمدلله يا حجة، أنتِ ايه اخبارك واخبار صحتك ايه؟! متنسنيش من دعواتك في كل صلاة بقا…
نظرت له سوسن في غيظ ثم أشارت له بالدخول، فولج وجلس على أقرب أريكة متمتمًا بهدوء:
-شمس فين؟!.
-في اوضتها.
أشار لها شريف ببراءة زائفة:
-كوباية القهوة التمام وناديها..
هتفت سوسن ببرود:
-بس هي مش عايزة تشوفك من امبارح وهي في حالة غريبة..
قال شريف بنبرة حاول فيها ألا يغضب وأن يكن متماسكًا:
-ناديها ولو عايزة تطردني النهاردة كمان مش مشكلة الانسان بيضايق من المرة الاولى بس بعد كده مش بيتحرج زي الأول…
جاءت شمس من الداخل بعد أن سمعت صوته المميز جدًا، هتفت بفظاظة غير المعتاد:
-ايه اللي جابك؟!.
تمتم شريف بنبرة جادة موجهًا حديثه إلى سوسن:
-القهوة يا حجة ومطوليش اوي خليها نار متوسطة بلاش هادية المرة دي…
ذهبت سوسن وهي لا تكف عن شتمه بداخلها بأفظع الشتائم، بينما شمس واقفة تعقد ساعديها مازالت عند موضعها ليقول شريف بنبرة جادة:
-تعالى أنا جايبلك هدية…
قاطعته شمس ساخرة:
-ايه لحمة العيد ولا بتاع الفراخ فتح المرة دي؟!.
تمتم شريف بصوت هادئ:
-لا موصلتش النهاردة للمرحلة دي من الابداع جايبلك هدية تدوم معاكي مش أكله وخلاص…
جاءت وجلست على المقعد المتواجد بجانب مقعده متمتمة بهدوء:
-ايه هي؟!..
أخرج علبة قطيفة من جيبة وفتحها تحت انظارها سلسال ذهبي به دلاية على هيئة شمس، كانت جميلة بشكل يجعلها تنسى ما اقترفه ليلة أمس….
-ايه رايك؟!.
أجابته بصدق وعفوية وهي تأخذها منه:
-حلوة اوي…
يكفي أنها منه…
وضعتها على عنقها الطويل الغض والناضر في ثانية واحدة ثم أغلقت القفل الخاص بها لتزين عنقها بشكل جعلها لا تناسب أمرأة غيرها في عينه، رأى لهفتها الحقيقة وعيناها التي تحولت لتعبر عن سعادة كبيرة.
وهذا يكفيه ويكفي قلبه، مشاعر تحتله جديدة كليًا معها هي وحدها…
تمتمت شمس شاكرة أياه:
-شكرًا ليك بجد حلوة اوي انا مش هقلعها أبدًا.
-العفو دي حاجة بسيطة.
هتفت شمس بتلقائية:
-على فكرة أنا كنت هكلمك النهاردة أصلا…
لماذا تنوي الحديث معه بعد ما حدث ليلة أمس؟!!!..
تمتم شريف بهدوء:
-ليه؟!.
-أنا عايزة أشوف بـشـرى…..
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية ديجور الهوى)
