رواية دوار العمدة الفصل الثامن عشر 18 بقلم حبيبة الرحمن
رواية دوار العمدة الجزء الثامن عشر
رواية دوار العمدة البارت الثامن عشر
رواية دوار العمدة الحلقة الثامنة عشر
طارق واقف في المطبخ بيجهز الغدا
الجرس يرن
طارق /حاضر جاي استني يلي على الباب الأكل هيتحرق
يخرج من المطبخ يفتح الباب يتفاجا بالبواب
طارق/ عم كرم في حاجة
تنظر هنادي من خلف البواب
طارق بدهشة / هنادي
البواب / يبقي تعرفها يا أستاذ طارق كويس امشي انا بقى
هنادي تقرب من باب الشقة
طارق بغضب/’انتي جيتي هنا ازاي
هنادي /وحشتني لاقيت رجلي جايبني هنا
تحتضنه هنادي بحب
طارق بانفعال/ بلاش اللي بتعمليه ده احنا علي الباب
هنادي /انت زعلان اني جيت
طارق /ادخلي نتكلم جوه
……………..
يدخل طارق جوه تتبعه هنادي
هنادي /واني اللي كنت فكراك هتفرح لما تشوفني أخص عليك مكنتش اعرف إنك كده
طارق/ سيبك من كل ده انت ازاي جيتي هنا وازاي كمان متتصليش وتقوليلي
هنادي وهي مقربه من طارق / جيت علشان بحبك ومعرفتش اتصل التليفون فصل مني
طارق/ ازاي بس يا هنادي تيجي لوحدك مخوفتيش علي نفسك
هنادي / مفكرتش في حاجة غير أني عايزة اشوفك
يبتسم طارق/ يا مجنونه أنتي عارفة إنك كان ممكن تتخطفي ولا يحصلك حاجة وحشه بعد الشر
هنادي/ الحمد لله
اتعرفت علي بنت في القطر هي اللي وصلتنى للمدرسة ومن هناك البواب جابني هنا
طارق / وازاي تمشي مع حد متعرفهوش
هنادي/ لأ دي بنت طيبه وسلتني طول الطريق
طارق / وازاي تمشي مع راجل غريب
هنادي/ مش انت تعرفة
طارق/ آه بس انتي تعرفيه؟!
هنادي/ عندك حق اني آسفة
طارق وهو بيحملها/ وحشتيني موووووت ياروحي
هنادي / نرمين اختك فين
طارق بغمز/ مش موجودة لسه مجاتش من بره
هنادي/ طيب
طارق بمكر/ طيب ايه
هنادي بخجل / طيب وخلاص
طارق ببتسامة /اموت انا في كسوفك اللي هيجنني ده
هنادي/ كل ده وتقولي كسوف يعني جيتلك لحد عندك وكمان مكسوفة
طارق بمزح / تعالي جوه نتفاهم بقي علشان انا زعلان منك اوي
هنادي/ معلش يا طارق بس اني جعانه قوي
طارق ينزلها سريعاً ويجري ناحية المطبخ
هنادي بدهشة / هو في ايه
تدخل هنادي المطبخ
هنادي /هههههههههه حرقت الأكل اومال هناكل ايه
طارق / مش وقت أكل دلوقتى
يحملها مرة تانية.
هنادي /بس اني جعانه قوي
طارق / مش وقته يا حبيبتي تعالي بس معايا وانا هبقي اجيبلك أكل من بره
تبتسم هنادي / طب حاسب لتوقعني
طارق / عيب عليكي اللي شايلك أسد
هنادي بمزح/’طب حاسب يا أسد لتوقع وتوقعني معاك
طارق /ههههههههههه
…. …………..
في منزل كامل
سعدية وكامل قاعدين علي الطبليه
كامل/ ناوليني المعلقة اللي قدامك يا سعدية.
سعدية سرحانه
كامل/ بقولك ناوليني المعلقة انتي مالك النهاردة
سعدية بدهشة / بتقول حاجة يا كامل
كامل/ بقولك ناوليني المعلقة يا وليه مالك انتي روحتي فين
تمد سعدية ايدها لكامل بالمعلقة
سعدية/ هنادي متصلتش قلقانه عليها
كامل/ ههههه تلاقيها وصلت لجوزها ونسيت تكلمنا ماانتي عارفة بقي الشوقه تعمل اكتر من كده
سعدية /معقول دا اني موصياها وهي طالعه انها تتصل علي التلفون تطمنا
كامل/ شوية كده وهكلم جوزها
سعدية /متكلموا دلوقتي
كامل/ لما أكل الأول انتي مستعجله علي ايه
سعدية/ عايزة اطمن علي البت يا راجل
كامل/ طيب حاضر
يخرج كامل التليفون ويتصل
كامل/ اهوه جرس ومحدش بيرد
……
في شقة طارق
طارق/هنادي انتي نمتي يا حبيبتي؟ !
طارق ببتسامة يقبلها / لما تصحي أبقى اتصلي علي ابوكي عمال يتصل
تفتح هنادي عينها ببتسامة هنادي / انت رايح فين وسايبني لوحدي
طارق/ هنزل أجيب أكل
هنادي / لأ اني هدخل اطبخ قولي ايه في التلاجه علشان اطبخ.
طارق/ لا متتعبيش نفسك خليكي مستريحه انتي جعانه وكمان نرمين زمانها جايه هتيجي جعانه بردو ومفيش وقت
هنادي/’طب خلي بالك من نفسك
طارق ببتسامة / حاضر اتغطي كويس الجو برد
……………. .
في الكفر
محسن قاعد تحت شجرة توت في طرف الأرض
سعيد يصب الشاي / بقولك ايه يا محسن متيجي نوزع الأرض بالعدل بينا وبين اخواتك
محسن/ اخواتك اخدوا نصيبهم اني رضيتهم ونرمين حقها محفوظ أبوك كاتب ليها كام قيراط علشان جوازها
سعيد/ طب وطارق
محسن / ماله طارق ماهو خد حقة
سعيد / يعني انت حاسبها صح يا محسن تكاليف جواز طارق وعلامه يساوي نصيبه في الأرض
محسن/ متنساش إن ابويا جايبله كمان شقة في مصر
سعيد /ايوه بس هو اللي بيدفع اقساطها
محسن/ وابوك هو اللي كان دافعله مقدم الشقة وانت عارف دلوقتي الاراضي والشقق غليت يعني الشقة دلوقتي تسوالها الشيء الفلاني
سعيد/ علي رأيك اني بس كنت عايز أطمن علشان منبقاش ظلمناه انت عارف انني مش ساعة ماابوك مات واني مش عارف انام خايف إن طارق يكون اتظلم
محسن / طارق متظلمش ولا حاجة بالعكس بقي هو اكتر واحد خد حقه فينا علام وتربية ودلع واتجوز مخسرش حاجة في جوازاته دي
سعيد/ بس لسه مخلفش يااخويا
محسن/ احسن اني بقول ياريت ميكونش ليه نصيب انه يخلف منها علشان يتجوز واحده غيرها تكون من قيمتنا بدل الجوازة اللي تكسف دي
سعيد/ بيحبها يااخويا
محسن/ حب ايه بكره يندم
سعيد/ احنا مالنا كل واحد حر المهم دلوقتى هنزرع الأرض ايه دره ولا رز
محسن/ هنزرعها رز بتجيب محصول حلو الدره انت عارف العيال اللي جار الأرض بيبهدلوها
سعيد/ خلاص يبقي رز بس المياه تكتر شوية في الترعة لأحسن مياه الرتوازي دي بتعدم الأرض
محسن/ أهو اللي هيمشي علي الناس هيمشي علينا
سعيد/ انى راجع الدار الدنيا شكلها هتمطر.
محسن/ أهو الشتا خلص ولسه الدنيا بردو برد
سبحان الله
سعيد/ احنا في شهر اربعه كلها كام يوم والدنيا تدفي
محسن/ الناس لابقت مستريحه صيف ولا شتا
استني هات ايدك لما أقوم اروح اني كمان جسمي متكسر من البرد
سعيد / ابقي تقل علي نفسك شوية متخففش هدومك مره واحده الجو لسه برد
محسن/ عندك حق اليومين اللي الدنيا دفت فيهم خففت هدومي قولت خلاص الشتا خلص اتاري لسه الدنيا هتمطر تانى
….. .. … ……
في شقة طارق
تدخل نرمين الشقة وتنادي/ طارق. …طارق
خلصت الأكل ولا لسه انا واقعه من الجوع تنظر لغرفة طارق تلاقيها مفتوحة تدخل تلاقي هنادي نايمه ومغطيه نفسها بالبطانية ورجلها من تحت مكشوفة
نرمين بغضب/ هي حصلت يا طارق لكده
تقرب من هنادي بأنفعال / انتي يا بت انتي قومى
هنادي تتقلب وشعرها مغطي وشها
نرمين/ انتي يا بت انتي يلي معندكييش دم نايمه يااختي في بيتكو؟!
هنادي تفتح عينها وتصرخ
نرمين تصرخ بفزع وتجري تخرج من الاوضة
طارق بيفتح الباب ويدخل بسرعة
طارق لنرمين/ في ايه بتصرخي ليه
نرمين بغضب/ مين اللي نايمه جوه علي سريرك دي
طارق / هتكون مين يعني
نرمين/ انا عارفة انا اللي بسالك
طارق/’هنادي. .يعني تفتكري هجيب واحده الشقة
وسعي أما اشوف عملتي ايه فيها
يدخل طارق الغرفة يلاقي هنادي بتعيط ومغطيه جسمها بالبطانية وقاعدة علي السرير
طارق /ايه يا حبيبتي مالك؟
هنادي ببكاء/ اختك فزعتني
نرمين /انا اللي فزعتك ولا انتي اللي خضتيني
طارق /ههههههههه معلش حقكو عليه
يلا يا حبيبتي البسي وأخرجي جبتلك حتة اكلك إنما ايه عارفك إنك بتحبيها
يلا يا نرمين اغسلي ايدك وتعالي ظبطي السفرة
يدخل طارق المطبخ يوزع الأكل في الأطباق
تدخل هنادي المطبخ تمد ايدها من خلف طارق تاخد الطبق
طارق يلتفت ليها ببتسامة/ القمر أعصابه عامله ايه دلوقتي.
هنادي /اسكت اختك خلتني مهخلفش تاني
طارق/ ههههههه معلش يا حبيبتي كان مفروض اتصلت بيها وقولتها انك هنا علشان ميحصلش اللي حصل من شوية
هنادي /انا كل اللي خوفني إنه يكون راجل وانا لبسي يعني
طارق/:هههههه ايه مكنتيش متغطيه كويس
هنادي بخجل/ بس بقي يا طارق
طارق يحتضنها / بحبك يلي جننتي طارق
توقف نرمين علي باب المطبخ / انا بقول كفاية كده ويلا علشان جوعت
ترتبك هنادي وتخرج من المطبخ في ايدها الأطباق
علي السفرة
طارق ببتسامة/ كلو بقي وقولولي رأيكو ايه
نرمين/ مخلتش هنادي تطبخ ليه
طارق/ لا انا كنت بطبخ والأكل اتحرق مني
نرمين بسخرية ونظرة لهنادي / اللي واخد عقلك
قوليلي يا هنادي جيتي ازاي
هنادي /في القطر
نرمين / ومخوفتيش تيجي لوحدك
نظرت هنادي لطارق ببتسامة/ لأ
طارق/ هنادي مش صغيرة بس متعملهاش تانى
هنادي/ حاضر
نرمين/ امي وأخواتي عاملين ايه
هنادي/ بخير كلهم كويسين
طارق لنرمين/’ممكن تاكلي وتبطلي أسأله
وينظر لهنادي / كلي يا حبيبتي تلاقيكي ماكلتيش من بالليل
هنادي /لا امي عملتلي ساندوتشات أكلتها في القطر
نرمين تضحك / هههههههههه
طارق/ عجبتك اوي ايه امي معملتهاش معاكي قبل كده
نرمين /آه بس مكنتش باكل
هنادي/ انا قايمه اغسل أيدي
طارق/ كملي أكل يا حبيبتي.
هنادي/ الحمد لله. …شبعت
تقوم هنادي وتدخل الحمام
طارق لنرمين/ مش هتبطلي غلاسه بقي
هنادي/ طارق عايزة تليفونك علشان أكلم امي تليفوني فاصل شحن
طارق/ عندك يا حبيبتي جمب السرير وهتلاقي الشاحن بردو هناك اشحني تليفونك
نرمين/ هو ايه اللي جاب هنادي مش عوايدها يعنى
طارق / وحشتني وجات تقعد معانا يومين عندك مانع
نرمين وهي بتقوم من علي السفرة / لا معنديش مانع بس ياريت تبقي تخليها تشيل الأكل انا داخله انام
طارق/ لا متقلقيش انا هشيله وهنضف السفرة خلاص اتعودت علي طبعك اللي لا يطاق
نرمين/ مالك شادد حيلك عليه كده هو انا عملتلك حاجة
طارق/’لا ابدا انتي مبتعمليش حاجة خالص وهو دا اللي هينقطني
نرمين/ انا جايه تعبانه وانت بقى والمدام شكلكو نمتوا وفايقين عليه اوي
طارق/ تصدقي معندكيش دم
تخرج هنادي من الغرفة ببتسامة/ امي بتسلم عليك يا طارق
تنظر ليها نرمين بضيق وتدخل اوضتها وتقغل الباب جامد
هنادي/ هو في ايه يا طارق اني عملت حاجة
طارق/ لا يا حبيبتي مفيش
هنادي تقرب تشيل الأطباق / ادخل اغسل ايدك واني هنضف المكان واعملك شاي
طارق ببتسامة/ تسلم ايدك يا حبيبتي
……………………..
كامليا قاعدة بتذاكر
تدخل واحده صاحبتها
نسرين/ كامليا ممكن تليفونك اعمل مكالمة لماما ضروري معنديش رصيد في التليفون والوقت اتاخر
كامليا /اوووك يا حبيبتي اتفضلي
نسرين / هتكلم دقيقة واحده بس متقلقيش
كامليا ببتسامة/ براحتك التليفون معاكي
تدخل إلهام
إلهام / كامليا ممكن تسرحيلي شعري بقالي نص ساعة مش راضي يفك من بعضه أيدي وجعتني
كامليا /:في ايه يا بنات انا مش هذاكر بالشكل ده
إلهام /’خلاص يا كامليا هشوف واحده من البنات تسرحولي
كامليا/ قربي يااختي مسرحه ليكي
اصلا شعرك طويل وكمان بتسرحيه وهو مبلول لازم يتعبك
إلهام / بتحايل علي ماما اقصه وهي تقولي البت انوثتها في شعرها
كامليا/’عندها حق
إلهام / يااختي طويل قصير ايه الفرق ماانا في الآخر بلفه واغطيه بالطرحه
كامليا /ههههه’مامتك قصدها لما تتجوزي يعني تتباهي بشعرك قدام عريسك
إلهام / مش لما يجي الأول
كامليا /’ههههه ايه مستعجله اوي
إلهام / ومين فينا يا حبيبتي مش مستعجلة ولا هنضحك علي بعض
كامليا/ خلصي دراستك الأول وبعدين فكري في الجواز
إلهام /’متفكرنيش يااختي الامتحان الاسبوع اللي جاي وانا مرعوبه
تدخل نسرين / اتفضلي تليفونك
كامليا / مامتك كويسه
نسرين/ آه بخير. ..الحمد لله. ..بتسلم عليكي قولتلها اني بتكلم من تليفون واحده صاحبتي فضلت تدعيلك
إلهام / خلصي يا كامليا عايزة انام
نسرين / انتي مش هتبطلي بهدله في شعرك
إلهام / هعمل ايه بس انتوا كده هتخلوني فعلا اقصه
نسرين لكامليا/ علي فكره كان فيه واحد عمال يتصل كتير
كامليا/ عندي انا
نسرين/ هو مين وائل دا يا كامليا
إلهام بغمز/ اوبااا هو الموضوع فيه وائل
كامليا /بس أنتى وهي
نسرين/ انا قلت يمكن اخوكي بس افتكرت انك قولتيلي مرة إنك معندكيش أخوات
إلهام / بلاش ظلم بقي يمكن خالها ههههه
كامليا/ لأ ابن خالتي
إلهام / ههههه شوفتي ظلمناها ازاي
نسرين/ امممم ابن خالتك طيب
تليفون كامليا يرن
كامليا/ دقيقة وراجعالكو
نسرين/ الموضوع كده فيه إنه
إلهام /
لو في حاجة هتقولنا
كامليا / في ايه يا وائل بتتصل كتير ليه في حاجة
وائل / ابدا بس كنت عايز اطمن عليكى
كامليا بغضب/ انا كويسه
وائل / مالك يا حبيبتي في حاجة
كامليا بانفعال/ لأ مفيش. ..وبعدين ايه حبيبتي دي
وائل / هو انتي مش حبيبتي ولا ايه
كامليا/ وائل مبحبش الطريقة دي في الكلام ها قول بقى كنت عايز ايه
وائل / الظاهر انك مشغولة
كامليا/ آه مشغوله في المذاكرة
وائل / طيب خلاص اسيبك تكملي مذاكرة علشان معطلكيش
كامليا / طيب مع السلامة
وتقفل كامليا التليفون/’ايه اللي انا عملته ده اكيد زعل دلوقتي
وايه يعني لما يزعل هو كل شوية هيتصل ويعملها حجه بقي
تدخل الغرفة تستلمها صاحبتها
نسرين بغمز/ ايه أخبار الجو
كامليا/ جو ايه؟ !
إلهام / مش علينا الشويتين دول نسرين تقصد وائل
كامليا/ ماله
نسرين/ بنسال علي أخباره
كامليا/ وانتوا يهمكو اخباره في ايه
إلهام / شوفتي اللئيمه مش عايزة تتكلم
كامليا / أتكلم عن ايه
نسرين/ انا عن نفسي لما يبقي عندي جو هحكيلوا علي كل حاجة
إلهام / هههههه طب شدى حيلك بقي
كامليا/ تعرفوا تشدوا حيلكوا في المذاكرة احسن
إلهام / لاااا انا هنام
نسرين / وانا شرحه تصبحو علي خير
كامليا / أبقوا قابلوني لو فلحتوا
…………
في شقة طارق
طارق وهنادي قاعدين قدام التليفزيون وطارق محاوط هنادي بذراعيه تخرج نرمين من الغرفة بهدوء وتوقف خلفهم
تهمس هنادي في أذن طارق فيضحك
تقرب نرمين منهم وببتسامة مصطنعه تقعد بجوارهم
نرمين/ متضحكوني معاكو
يعتدل طارق في جلسته
طارق / ايه قلقنا نومك
نرمين/ لا انا مكنتش نايمه كنت بذاكر ايه يا هنادي انتي مبذاكريش ولا ايه
هنادي /لأ بذاكر بس مجبتش الكتب بتاعي معايا
طارق /مذاكرة ايه دلوقتي
نرمين / مش علشان تخلص ولا ناويه تقعد كام سنه في الصنايع بتاعتها دي
هنادي /إن شاء الله. ..هخلص
طارق انا داخله انام تصبح علي خير
طارق /استني انا جاي معاكي
نرمين /طارق استني عايزة اتكلم معاك
ينظر طارق لهنادي تتركهم وتدخل غرفتها
طارق ببتسامة/ اختي العزيزة بقي كانت عايزاني في ايه
نرمين/ هو موضوع كده مش عارفة الظروف تسمح ولا ايه
طارق/ قولي واشوف إن كانت الظروف تسمح ولا لأ
نرمين/’انا في شاب يعني
طارق ببتسامة/ يعني ايه؟!
نرمين/ عايز يتقدم وانا قولتله مش وقته
طارق/ ياااه اخيرا بس هو مين وعرفتيه ازاي دي أهم حاجة
نرمين/ معيد عندنا في الجامعة
طارق/ وكلمك ازاي
نرمين/ عادي يعني كنت بساله علي حاجة فتح معايا الموضوع
طارق /بس كده
نرمين بضيق/ اه بس كده تقصد ايه يعني اتقابلنا بره الجامعة مثلا
طارق /انا مقصدتش كده علي العموم خليه يكلمني وانا اشوفه في أي مكان حتي لو هنا
نرمين / اوووك رقمه اهوه
طارق/ وانا هعمل ايه برقمه هو اللي لازم ياخد رقمي
لو جاد يعني لو قابلتيه صدفه قوليلوا دا رقم اخويا لو عايز تدخل البيت من بابه
نرمين/ ماشى يا طارق ولو إن كلامك فيه تلميح مش كويس بس هقوله
طارق/ طيب تصبحي علي خير
نرمين/ هتنام دلوقتي
طارق/ عندى شغل الصبح
نرمين/ ماانت كل يوم عندك شغل ومبتنامش في الوقت ده
طارق/ نرمين تصبحي علي خير
نرمين تمسك الريموت تقلب في التليفزيون
……
في غرفة طارق
طارق يقرب من السرير
طارق لهنادي/ انتي نمتي يا حبيبتي
تنفض هنادي الفراش / لأ لسه صاحيه
طارق /ههههههه كنت عارف إنك صاحيه
هنادي/ طب وبتسأل ليه ولا هي رخامه زي مااختك بتتعمد ترخم عليه
طارق /ههههه تقصدي نرمين
هنادي/ هو في غيرها معانا هنا
طارق /على فكرة هو دا طبع نرمين
هنادي/ سيبك من موضوع نرمين وخلينا في موضوعنا
طارق /طب اطفي النور الأول
هنادي/ طارق انا عايزة اكشف
طارق/ ليه يا حبيبتي انتي تعبانه
هنادي /لأ بس اني اقصد اكشف علشان الحمل
طارق /قولتلك يا حبيبتي متفكريش في الموضوع ده
هنادي/ واني خايفة من التأخير ده
طارق /تأخير ايه اومال لو مكنتيش حملتي قبل كده مرتين كنتي قولتي ايه
هنادي/ ماهو علشان كده اني خايفة
طارق /متخافيش العيله عندنا كلها تمام ههههه
هنادي/ خايفة تتجوز عليه
طارق/ هههههههه يا مجنونه اتجوز ايه بس
هنادي/ يعني لو اتاخرت في الحمل مش هتفكر تتجوز
طارق/’ههههه لأ
هنادي / توعدني
طارق / متبطلي جنان وخلينا ننام
هنادي تجري ناحية الشباك.
طارق واقف بدهشة / هو في ايه؟ !
هنادي/ الجو بيمطر
طارق/ بتحبي المطر اوى كده
هنادي /قوي قوي
طارق/’ههههه طب وسعي اقفل الشباك علشان الجو برد قوي قوي هههههههه
تحتضنه هنادي وهو بيقفل الشباك / بحبك
طارق / قولتي ايه
هنادي بخجل/ اللي سمعته
طارق / لأ قوليها تاني
هنادي /لا خلاص شطبنا
طارق/ هو احنا لسه قولنا حاجة
يقرب يقبلها
هنادي تبتسم
طارق وهو يقبلها / بقي حد يسيب القمر ده دا انا عايز اخلف منك عشر بنات علشان يبقوا بالحلاوة والطعامة والطيبه والكسوف ده
هنادي / عشره! !!
طارق/ اه عشرة عندك مانع
هنادي بضحكه عاليه /هههههه لأ
طارق/ طب وطي صوتك نرمين صاحيه
هنادي تبتعد عن طارق وتقرب تفتح الباب بهدوء
طارق من خلفها/ بتعملي ايه.
هنادي/ بطمن إن نرمين نامت
طارق/ ههههههه طب اقفلي وتعالي
………………………………..
في منزل صفيه
علي لعمر/ واني يا ابني اتمني بس انت عارف لازم اخد رأي كامليا الأول
عمر/ واني مش مستعجل يا عمي بس هي توافق
علي/ هكلمها تاني وارد عليك
عمر/ قولها يا عمي اني شاريها ومستعد أصبر لحد متخلص كليتها
علي /هنعمل ايه في ابن عمتك اللي عقدها في الجواز كله
عمر/ اني هعوضها عن كل حاجة بس قولها توافق
علي/ حاضر ياابني
عمر/ طيب ياعمي اني همشي الوقت اتاخر تصبحو علي خير
صفيه / وانت من أهل الخير ياابني سلملي علي أبوك
عمر/ يوصل يا عمتي
يخرج عمر
علي/ ايه يا صفيه قاعدة ساكته ليه
صفيه/ اقول ايه بس اني شايفة الواد يا حبة عيني هيموت علي البت وهي ولا هنا
علي / تكون بنتك لسه بتكلمه
صفيه /هو مين وائل؟
لا يا علي مش ممكن دي خلاص كرهتكوا خالص ومبتجبش سيرته نهائي
على /ياريت يكون كلامك هو الحقيقة مش تكون بتستغفلنا
صفيه/ يبقى معندهاش دم بعد اللي عمله فيها
…………..
في الصباح
هنادي تقوم من النوم بعد خروج طارق للشغل نرمين نايمه في اوضتها
تدخل هنادي المطبخ تجهز فطار واقفة في حيره
هنادي/ اعمل فطار ايه
آه هطلع كبده اعملها نفسي رايحالها
تخرج هنادي الأكل من التلاجه وتبدأ بتقطيع الخضار
جرس الباب يرن
هنادي تفتح
كامليا / صباح الخير اهوه متأخرتش زي ماقولتلك
هنادي ببتسامة/ طول عمرك مواعيدك مظبوطة كويس إنك عرفتي توصلي
كامليا/ هههههه خلاص يا حبيبتي انا بقيت من أهل البلد دي يعني أعرفها حته حته
هنادي/ ههههههه طب تعالي معايا المطبخ نجهز الفطار
كامليا/ ايه الريحه دي
هنادي/ بعمل كبده
كامليا/ بتفطري كبده اومال هتتغدوا ايه
هنادي/ لحمه.
كامليا / ههههه انتي بتتوحمي ولا ايه
هنادي/ ياريت يااختي بس لسه محصلش
كامليا/ متستعجليش. …قوليلي اعمل ايه معاكي
هنادي/ انتي تقعدي هنا وانا هجيب الأكل لحد عندك
كامليا / بصراحه مفطرتش لسه والكبده ريحتها تجوع
هنادي /وسعي بقي الكبده وصلت
كامليا/ هههههه تسلم ايدك يا عم الشيف
هنادي /كلي بقي وقوليلي رأيك ايه
كامليا/ هو مفيش حد هنا
هنادي/’أخت طارق نايمه جوه
كامليا/ طيب سبيلها طبق بقي هاتي معاكي طبق
هنادي/ متقلقيش انا شيلت نص الكبده علشانها هي وطارق انا ميهونش عليه أكل حاجة هو مياكلهاش
كامليا /ايه يا عم الحب ده
هنادي/ طب كلي وانتي ساكته
كامليا /بتعملي ايه عندك انا هاكل لوحدي
هنادي/ جايه اهوه بس بولع علي الأكل علشان الغدا
كامليا/ مبتضيعيش وقت
هنادي /هههه عايزة الوقت ياخدنا ومعملش الغدا
كامليا / لا يااختي انا مش عايزة تحصل مشكلة بسببي
تقرب هنادي وتقعد تاكل
هنادي/ امممم تسلم أيدي الأكل حلو
كامليا/ ههههههه طب استني لما ادوق انا الأول
تدخل نرمين بضيق
نرمين/ احنا عندنا ضيوف ولا ايه
هنادي/ دي كامليا بنت خالتي
نرمين/ ومالكو معليين صوتكو كده انا مش عارفة انام
هنادي/ فين اللي معليين صوتنا احنا بنتكلم عادى
نرمين/ لا واضح إنها وكالة من غير بواب
هنادي /لو سمحتي يا نرمين بلاش تلميحاتك دي
وبعدين دي شقتي وادخل فيها اللي يعجبني
نرمين/ عال اوي وكمان بقيتي تعرفي تتكلمي يا هنادي
كامليا/ انا ماشية يا هنادي
هنادي/ استني يا كامليا دي شقة جوزي ومن حقي بقي اقابل فيها اللي يعجبني
كامليا/ انا مش عايزة تحصل مشكلة بسببي انا ماشية
نرمين /ياريت تاخدي الباب وراكي
تخرج كامليا من الشقة
تجري هنادي تلحق كامليا اللي كانت وصلت لمدخل العمارة
هنادي بغضب/ انتي ايه اللي عملتيه ده
نرمين /فاكره نفسك ست البيت وهتتامري عليه
هنادي /اني فعلا ست البيت هنا وإن كان عاجبك
نرمين/ القوالب نامت والانصاص قامت فعلا معدش اللي انتي كمان تتكلمي
هنادي /أني مش هرد عليكي لما يجي طارق هحكيلوا علي اللي حصل واشوف بقى مين ست البيت هنا
نرمين /وانا مش فاضيه للعب العيال ده انا نازله الجامعه
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية دوار العمدة)
