رواية دموع ممنوعة الفصل السادس عشر 16 بقلم هناء النمر
رواية دموع ممنوعة الجزء السادس عشر
رواية دموع ممنوعة البارت السادس عشر
رواية دموع ممنوعة الحلقة السادسة عشر
من المفترض أن الجد سيصل قرابة الساعة الثالثة عصرا ، ومن لحظة علمها بموعد وصوله ، قررت عدم انتظاره وارجاء مقابلته فيما بعد حتى تنتهى حفلة الترحيب بعودته ،
استيقظت مبكرا رغم أنها لم تنم إلا القليل جدا ، فقد أرادت الخروج مبكرا قليلا حتى لا تقابل أحدا ، فقد أصبحت هذه طريقتها فى التعامل مع أهل المنزل ، تجنبهم تماما ، ومتابعة أفعالهم واقوالهم من خلال أجهزة التسجيل المنتشرة فى المنزل بدون علمهم ،
استيقظ عادل وهى تقف أمام المرآه لتضع حجابها، تابعها بعينه دون أن تلاحظ استيقاظه لدقائق ، ثم تظاهر بالاستيقاظ ،
…ولبستى كمان ، هو انا اتأخرت اوى كدة …
…أنا اللى صاحية بدرى …
…ليه ، عندك شغل برده …
…وبتقولها بتريأة كدة ليه …
… لا تريأة ولا حاجة …
…أمال ايه ده ؟
…الكلام مش هيجيب فايدة معاكى يافريدة ، ودى مشكلتى الأساسية معاكى ، ومع غيرك عموما …
…يعنى إيه …
…ولا حاجة ، انا هقوم أخد حمام احسن …
تلميح غريب ، لم تفهمه ، لكنها تتذكر انه لمح لنفس الشئ من قبل ، ماذا يقصد بما يقول ؟
توجهت للنزول ، وعندما وصلت للدور الأرضى ، وجدت عالية متوجهة الاسانسير ، فلم تفوت الفرصة ، فهى لا تحب الصباح الخالى من المناوشات ، وهى تعلم جيدا ان عالية لا تتحمل ، فهى انسانة ضعيفة ، مجرد تابع جبان لمن يحركه .
…صباح الخير ياطنط …
…صباح الخير يافريدة …
…هو عمى لسة مصحيش ولا ايه …
…صحى من بدرى وفطر وخرج كمان ، انتى عارفة أن جدك جاى انهارضة ، عنده كام مشوار عايز يخلصهم قبل ما يوصل ، وانتى نازلة بدرى كدة ليه ؟
…لنفس السبب ، عشان أبقى فاضية لما جدى يوصل …
التوتر فى صوت عالية نبأ فريدة أن سميرة اخبرتها بما قالته لها ، فهى لم ترفع عينيها فيها منذ وقوفها .
…مادام انتى قلقانة و خايفة كدة ، كان ليه من الأول اصلا ؟
رفعت عينيها وكأنها وصلت لما تريد فريدة قوله، وقالت بتوتر
…هو ايه اللى ليه يابنتى ؟
…بنتك برده ، أبقى سلميلى عليها ، قوليلها لسة لينا كلام ، يااما اخليها أفعال ، وده مش هيعجبها خالص ، بل مااهى مختفية من ساعتها كدة …
وهمت بالمشى ، فوجدت سهام تخرج من الاسانسير ،
…صباح الخير …
لم يرد أحد ، واتجهت عالية مضطربة الاسانسير وأغلقت بابه وصعدت ،
…ماما مالها. ..
…معرفش. .
…متعرفيش يعنى إيه ، مش كنتى واقفة معاها. .
…أبقى اسأليها، يمكن تقولك ، مع أنى أشك ، زى ماانتى طبعا مش هتقوليلها على اللى عملتيه امبارح. ..
…هو ايه ده …
…والله ، اللى بالمناسبة ، عجبتك الحاجات اللى شفتيها، متتكسفيش وقوليلى ، مع انك مشوفتيش الحاجات اللى بيحبها ، اصلى ركناها لوحدها ، بلبس منها بليل بس ،سلام بقى ، اصلى مش فاضية …
ذهبت وتركتها مكانها بانفاس مضطربة، تكاد تصرخ من الغضب .
خرجت من الفيلا ، وهى فى اتجاهها لسيارتها، فقد ارسل عادل أشخاص لأخذها وتوصيلها للبيت بعدما استقلت فريدة معه سيارته أمس ،
وجدت خالها أكرم فى اتجاهه لسيارته هو الأخر ، والسائق واقف بجانبها يفتح الباب له ، عندما رأاها توقف وانتظرها،
تمتمت فريدة داخلها … دا احنا مش هنخلص انهارضة …
…صباح الخير يافريدة ..
..صباح الخير ، طنط عالية لسة قايلالى انك خرجت …
…أنا فعلا كنت خارج ، بس قلت اشوف الرجالة دى قبل ما أخرج …
…إيه ، هتعملوا حفلة ؟
…مجرد عشا بسيط كدة ، عازمين القرايب والاحباب بمناسبة رجوع جدك بقى …
..كويس ، حمدالله على سلامته …
…الله يسلمك يابنتى ، هو عادل لسة نايم ولا ايه …
…لا ابدا ، ده صاحى من بدرى ، بس انا مستعجلة فسبقته. ..
…أنتى مش هتيجى بدرى ولا ايه …
…هحاول ، بعد إذن حضرتك …
…مع السلامة ، ربنا يهديكى يابنتى ، والله يرحمها أمك …
*********
وصلت فريدة لمكتبها ، فمازال ثلاث ساعات على عملها ، قررت ان تنهى فيهم بعض الأعمال ،
لم يكن أحد وصل للمكتب غير السعاة يقومون بتنظيف المكتب ، فالساعة مازالت السابعة والنصف ،
دخلت فريدة لمكتبها وبدأت تبحث عن CD المسجل عليه مكالمة عادل مع ميس ، فلم تجده فى خزنتها فى المنزل ، أرادت أن تتأكد من صدق ما قال ليلة أمس ،
دخل عم محمد ومعه قهوتها الصباحية المعتادة ،
..شكرا ياعم محمد ، تسلم ايدك ، بس والنبى شوفلى أى حاجة أكلها ، احسن حاسة أنى دايخة وخرجت من غير فطار ..
…حالا ياست فريدة ، أحلى فطار ..
..،خد خد ، تعالى هنا ، بقولك لقمة ، هتروح تعملى وليمة ، انا بس مش عايزة أشرب قهوة على معدة فاضية …
…أنا معايا سندوتشات جبنة ومربى ، جايبهم عشان اكلهم آخر النهار ، اجبلك منهم ..
…حلو اوى ، هاتلى واحد مربى بقى …
… واحد بس ، ده سندوتش صغير. ..
… كفاية ، بس بسرعة قبل ما القهوة تبرد …
…عنيا ، ثانية واحدة …
ذهب الرجل وعاد بعدها بدقائق ،
…اتفضلى ياأستاذة …11
…شكرا ياراجل يا طيب …
…الست رشا جت برة …
…رشا ، اشمعنى يعنى ، مش بعادة ، دى الساعة مجتش 8 ، روح انت ياعم محمد وابعتهالى …
تردد الرجل فى الخروج ولاحظته فريدة
…فى ايه ، مالك ، وايه اللى مخبيه فى ايدك ده …
وضع الرجل الكيس من يده أمامها وفتحه
…إيه دول …
…60 الف جنيه …
…بتوع ايه بقى …
…باقى حساب الشغل ياست فريدة وكتر خيرك انك استنيتى عليا ده كله …
…هو احنا اتفقنا على حساب اصلا وقتها…
…منا عارف انتى بتشتغلى بقد ايه يابنتى …
…جبتهم منين ياعم محمد ، وقول الحق …
… بصراحة ، بعت القيراتين اللى فى البلد …
…أه ، يعنى انت اخدت الإجازة عشان كدة ، طيب شيل فلوسك ياعم محمد وروح ابعتلى رشا زى ما قلتلك …
…مينفعش ياست فريدة ، انتى كل اللى خدتيه منى 10 آلاف جنيه …
… اسمع ياعم محمد ، وقتها موضوع بنتك ده كان بالنسبالى تحدى ، كان لازم ابن الكلب ده يتربى ، غير انك معايا من 7 سنين ياراجل ، يعنى عشرة عمر زى ما بيقولوا ، شيل فلوسك ياعم محمد ، ياترجع ارضك ، ياتحطهم فى البنك باسم بنتك ، هينفعوك فى جوازها …
…جواز ايه بقى يابنتى ، هى بقى فيها جواز …
…لأ فيها ، ربنا مبينساش حد ، واللى حصل كان غصب عنها ، سلم أمرك لله وهو هيحلهالك ، وروح بقى ، دماغى مش فايقة للجدال انهارضة …
…ربنا يسترها معاكى يابنتى ويبعد عنك ولاد الحرام …
…أيوة كدة ، ادعيلى وخلاص ، وروح وابعتلى زفتة ياعم محمد …
ظهر صوت من خلف الرجل يقول …زفتة مين بقى …
…أنتى جيتى انتى كمان ، أهلا ، نموسيتك كحلى …
…أنا برده ، الساعة لسة 8 ، ميعادى بالظبط ، روح انت ياعم محمد ، يلا احكيلى بقى …
…احكيلك ايه يابت انتى …
…عملتوا ايه امبارح ، انتى مش قولتيلى انك معاه بره …
..كاك خيبة، ليلة ضاربة زييك …
…اتخانقتوا. ..
…لا اتخانقنا ولا اتصالحنا ياريهام ، الموضوع كان عادى يعنى ..
طرقت رشا الباب ودخلت ….صباح الخير يا جماعه. ..
…أهلا ، قبل اى حاجة ، روحى هاتيلى نسخة من مكالمة عادل مع البت إياها عشان مش لاقياه. ..
…طيب حاضر …
مالت رشا على ريهام و سألتها …هو فى ايه …
…معرفش …
…يلا يارشا ، واقفة ليه ؟
…حاضر ..
خرجت رشا ، وقالت فريدة
…عندنا ايه انهارضة …
..نفس الجدول اللى مبلغاكى بيه امبارح بالإضافة لاستاذ محسن ، الساعة 6 …
…6 …
…مش انتى اللى قولتيلى اعمليله ميعاد انهارضة فى اى وقت ، ووقتك كله متقفل لحد خمسة ونص …
…كدة كملت ، عادل هيقول أنى متعمدة …
…ليه ، هو فى ايه ؟
…جده راجع انهارضة انهارضة، وطلب منى مجيش، وأنا اللى صممت وخرجت …
…تحبى اشوف مواعيد تتلغى …
…عنك مواعيد تنفع …
…بصراحة لأ ، بس أحاول …
…شوفى كدة لحد ما أرجع من الشغل …
دخلت رشا ومعها CD المسجل واعطته لفريدة ،
…اسمعى يارشا ، البيت انهارضة هيبقى زحمة ، عايزاكى تتابعى كويس اللى هيحصل ، وتبلغينى اول بأول ، وخدى بالك أنى بدأت استفزهم شوية ، يعنى هتلاقى رغى كتير ، اوكى ..
…اوكى ، أى جديد ، هكلمك على طول …
…تمام ، روحى انتى ابدأى ، وانتى ياريهام هاتيلى ملف المتابعة، اشوفه دلوقتى، هيوفر معانا وقت …
…بس لسة مش كامل ، لسة فى ناس مسلمتنيش تقارير امبارح. ..
…ليه ان شاء الله ..
…متعودين يسلموه الصبح لأنهم عارفين انك بتراجعيه بعد الضهر …
…ارحمنى يارب ، بعد كدة التقارير تخلص وتتسلم قبل ما يمشو …
…حاضر ….
…روحى وابعتيلى شاهر اول ما ييجى …
خرجت ريهام ، وجدت شاهر متجها لمكتبه
…استنى ياشاهر ، رايح فين ؟ …
…هجهزلك التقرير …
…فالح ، كلهم سلموا إلا أنت ،، أستاذة فريدة أمرت أن بعد كدة كله يتسلم فى اخر اليوم …
…هى هنا ؟
…أه ياخويا ، وبتخانق دبان وشها وكمان عايزاك. …
…ياحلاوة ، ايه الصباح ده …
…أدخلها يلا وربنا يستر …
*************
طرق الباب ودخل ، كانت فريدة تستمع للريكورد الخاص بمكالمة زوجها بسماعة فى اذنها ، وأطفئته عندما دخل شاهر ،
…صباح الخير ياأستاذة فريدة …
…صباح الخير ياشاهر ، عملت ايه فى اللى قولتهولك. ..
…حصل بالظبط زى ما رسمتيه يافندم بس …
…بس ايه …
… الرجل طلب 30 الف جنيه …
…وافق طبعا ، اوعى تكون رفضت ..
…لأ طبعا ، انا عارف ان اهم حاجة عند حضرتك التنفيذ ، عشان كدة وافقت ، واديته نص المبلغ ، والنص التانى بعد التنفيذ ..
…تمام ، قالك هينفذ امتى ..
…بمجرد ما يفتحوا قاعدة البيانات عشان يبدأوا تنفيذ الاوردرات ، فى لحظتها هتكون الاسماء اختفت تماما من قاعدة البيانات …
…كويس اوى ، اتفضل دلوقتى ، تابع معاه وعرفنى اول بأول ، وفى لحظة ما يتنفذ ، تعرفنى …
…حاضر يافندم …
وقفت فريدة أمام الحائط الزجاجى الذى اعتادت الوقوف أمامه اذا أرادت الخوض مع عقلها لدقائق.
…ها يافريدة ، ناوية على ايه ، عادل طلع صادق فى كل كلمة قالهالك ، ومعنى انه اعترفلك ، يبقى بيحاول يفتح معاكى صفحة جديدة ، وأدى اول ضربة لسميرة وعالية هتتنفذ ، ضربة هتقطم وسطهم هم الاتنين، هتعملى ايه بعد كدة ، هتخلصى معاهم وتقفلى الملف ده ، ولا وجود عادل وميلك ليه بالطريقة دى هيخليكى تغيرى رأيك …
يتبع…..
لقراءة الفصل التالي : اضغط هنا
لقراءة الرواية كاملة اضغط على : (رواية دموع ممنوعة)
