رواية خطيبتي واخواتها التوأم الفصل الرابع 4 بقلم رحاب القاضي
رواية خطيبتي واخواتها التوأم الجزء الرابع
رواية خطيبتي واخواتها التوأم البارت الرابع
رواية خطيبتي واخواتها التوأم الحلقة الرابعة
سما اتفاجئت وقالت
محمد انت بتعمل ايه هنا؟..
محمد
جاي اتفرج..
سما
نعمم يا روح امك..
قام ولد من الطلاب وقال
العب يا ميس سما..
سما بعصبيه
اقعد كويس يا ولد انت، اتفضل اقعد واياك اسمع صوتك..
وشاورت بالعصايه علي محمد وقالت
وانت جاي تستظرف هنا ولا حكايتك ايه انت؟..
محمد بخوف
هو انا كلمتك، انا مستنيكي بره لحد ما تخلصي..
سما
طيب اوعي تعمل دوشه بره انا مش ناقصه مشاكل..
محمد.
حاضر يا ميس سما…
سما
انت بتتريق عليا ولا ايه؟..
محمد
لا والله العظيم مش قصدي بس شخصيتك جامده بصراحه،..
وبعدين بص للطلاب وقال
الله يعينكم ده انا اللي هبقي جوزها ومرعوب منها..
سما بحده
اطلع بره يا محمد….
_طلت محمد بسرعه وفضل مستنيها شويه، وبعدين الحصه خلصت وطلعت بره لقيته واقف عند السور وقالع نضارة النظر بتاعته وفي بنات واقفين علي مسافه منه وبيبصو عليه، ادايقت سما وقربت منه وقالت….
سما
انا خلصت مش يلا بينا ولا ايه؟..
بصلها محمد وقال
اوكي يلا بينا..
سما
ايه ده انت عيونك لونهم ازرق..
ابتسم محمد ولبس النضاره وقال
ايوه انتي لسه واخده بالك بجد..
مشيت سما وهو جنبيها وقالت
وانا هاخد بالي ازاي وانت اصلا لابس نضاره..
محمد
اما عديمة نظر بصحيح، اصلا ازاي كنتي عايزه تطفشي عريس زيي عيون زرقا وابيضاني وشعر بني ودقن بني..
سما بسخريه
والله استحي اقولك انا اول ما شوفتك اول مره قولت ايه اصلا..
طلعو من المدرسه ومحمد وقف قدامها وقال
لا انا فضووووولييي اووي وعايز اعرف انتي قولتي ايه…
سما
ما. بلاش. احسن..
محمد
لا معلش انا عايز اعرف..
سما
قولت عليك ملزق وعيل طري..
محمد بغيظ
هو انتي ما فيش حاجه عندك اسمها جبر خواطر
ابتسمت وقالت
ما انا اللي قولتك بلاش، علي العموم انت جاي عايزني في ايه؟..
محمد بجديه
في موضوع مهم لازم نتكلم فيه، بس تعالي نروح كافيه و..
سما
لا انا ده معاد الغدا بتاعي، انا هنروح نتغدي وقول اللي عايزه..
محمد
اوكي تعالي طيب اوديكي مطعم جامد جدا وو..
سما
لا هوو انا لسه هروح مطاعم، تعالي معايا ورا المدرسه هنا في حتت مسمط بيعمل كوارع ووكبده مش هتدوق زيهم في حياتك.
اتصدم محمد وقال
نعممم كوارع وكبده..
_وبعد شويه كانو قعدين هناك وسما بتاكل ومحمد بيبص ليها بقرف وللمكان كله…
سما بصوت عالي
حماصه اتنين كبده هنا للدكتور..
محمد
لا لا لا انا مش بحب الاكل ده بصراحه وبتعب منه..
سما بخبث
بص انا بالنسبالي الراجل اللي ما بياكلش كوراع وممبار مش راجل..
محمد بص وراه وقال
زود واحد كوارع وواحد ممبار لو سمحت..
ضحكت سما وقالتله
ههههههه ايه بقي الموضوع اللي عايزني فيه..
محمد ابتسم لضحكتها اللي اول مره يشوفها وقال
شوفتي عمرو دياب لما قال ضحكت يبقي قلبها مال…
سما
بس الواقع بيقولك ولو رجعت تبقي بنت شماال..
محمد
قنبلة فصلان قاعده قدامي، المهم الموضوع اللي انا عايزك فيه بخصوص ماما او حماتك..
سما
مالها اوعي تكون حرمبوءه..
محمد
عرفتي منين؟..
سما
نعمممم؟…
محمد
لا انا قصدي يعني انها عصبيه شويه، متعلقه بيا شويتين اكمني ابنها الوحيد، والموضوع بقي انها رافضه موضوع اني اسكن بعيد عنها…
سما
انت عايز تقول ايه يا محمد اتكلم علي طول.
محمد
انا كلمت دكتور بهاء في الموضوع وقولتله اننا هنتجوز عند اهلي وهجيب شقه في نفس العماره بتاعتكم وهجهز الاتنين، بس ماما ما تعرفش حاجه عن الشقه دي واحنا بعد الجواز حبه هنا وحبه هنا..
سما ادايقت وقالت
لا معلش انا مش بحب الطريقه دي، ليه ما نتكلمش بجد و..
مسك ايدها محمد وقال
انا بحبك يا سما، انا بالفعل تفكيري مش قادر يبقي غير فيكي، انا بقعد بالسعات اقلب في الاكونتات بتاعتك علي السوشيال كلها وكل يوم مش مره واحده،من الاخر يا سما انا عايزك معايا ومش عايز غيرك بس طلبي الوحيد انك تستحملي ظروفي شويه..
سما سحبت ايدها من ايده وقالت بضيق
حاضر انا هفكر في الموضوع كويس و..
محمد
استني بقي وانتي بتفكري فيه، فكري ان فرحنا هيكون اخر الشهر الجاي..
سما اتفاجئت
نعمممم؟..
ـــــــــ #بقلم_الكاتبه_رحاب_القاضي ـــــــــ
_دخل امجد المكتب بتاعه وكانت معاه البنت اللي شافها لما كان واقف مع ملك، وقفل الباب عليهم وبصلها بكل عصبيه وقال..
امجد
انتي مجنونه صح، هو انتي فاكره لما تيجي شركة امجد البحيري هعديهالك يا سونيا..
سونيا
يا اخويا بركه انك لسه فاكر اسمي ده انا قولت انك نسيتي مع اللي كانو قبل مني..
امجد
جايه عايزه ايه يا سونيا، مش انا قولت شغلي خط احمر..
سونيا
قبل ما ارد. عليك مين القطه اللي كانت واقفه معاك بره دي ولما شوفتني وانت معاها اتكهربت كده..
ماجد ببرود
دي خطيبتي يا سونيا..
سونيا بعصبيه
يا نهار ابوووك اسود خطيبة مين يا عينيا؟..
امجد بحده
في ايه يا روح امك جو الرقصات الرخيص ده ما بتعملش هنا ده يتعمل في الكباريه اللي لميتك منه فاهمه ولا لا؟..
سونيا
بقي دلوقتي جو رخيص الله يرحم لما كنت بتيجي الكباريه اللي لميتني منه وتترمي تحت رجلي عشان ارضي عليك وابصلك..
_خلصت كلامها ونزل امجد بايده علي وشها وقال بعصبيه..
امجد
هتنسي نفسك يا بت ولا ايه ده امجد البحيري يعني باشاره واحده مني تروحي في ستين داهيه..
بصتله سونيا بكل شر وقالت
شالله تكون مالك العالم ده كله، انت هتندم علي اللي عملته ده يا امجد وربنا بقي يكفيك شر كيد الغوازي…
_قالت كلامها ومشيت وهي متعصبه، ودخلت السكرتيره وقالت..
السكرتيره
مالك يا امجد. بيه حضرتك شكلك مدايق اووي؟..
امجد
عكرت مزاجي بنت العكره، بقولك ايه ما تقفلي باب المكتب حبه كده وتعالي اعدليلي مزاجي..
ضحكت السكرتيره وقالت
هههههه بس كده تحت امرك يا امجد بيه..
ـــــــــ #بقلم_الكاتبه_رحاب_القاضي ـــــــــ
خالد
ممكن تستني حضرتك رايحه فين؟..
ملك
رايحه مكان ما رايحه انتو مالكم يا ناس يا شريره وانا الملك البريئه المظلومه..
خالد
لو سمحتي اتفضلي اركبي العربيه لازم اوصلك البيت عشان اروح المستشفي…
ملك بحده
قولتلك مش طالعه، انا هروح لوحدي..
خالد بضيق
طيب هوقف لحضرتك تاكسي يوصلك..
ملك بصتله بغيظ وقالت
ده بدل ما تقولي انا اسف وما تزعليش..
خالد بحده
انا ما غلطش فيكي عشان اعتذرلك..
اتملت عيونها دموع وقالت
طيب وربنا لهقول لبابا انت بتزعقلي، اتفرج انا هعمل فيك ايه تعالي وصلني…
_خلصت كلامها وراحت ركبت العربيته وهو اتصدم من انها عيطت بسبب انه علي صوته شويه عليها وقال لنفسه بسخريه..
خالد
اومال لو عايشه مع فتحي كنتي عملتي ايه…
_واخدها وصلها المستشفى واول ما نزلت مسكت ايده وقالت..
ملك
تعالي معايا انا هوديك لبابا هخليه يتصرف معاك..
خالد بجمود
سيبي ايدي لو سمحتي…
ملك
انت بتبرقلي ليه، طيب انا هخلي بابا هو اللي يجيبك..
_وطلعت فوق وبعد شويه كلمه بهاء وقاله يطلعله فووق، اتنهد خالد بضيق وطلع فوق في مكتب بهاء..
خالد
تحت امر حصرتك يا دكتور بهاء؟..
بهاء
مزعل ملك منك ليه يا خالد. ده انا مش بامن حد علي بناتي غيرك..
خالد
ده شرف ليا يا دكتور بهاء، بس انا ما زعلتهاش والله..
ملك بعصبيه
علي فكره اللي بيكذب بيروح النار يا خالد..
غصب عنه ابتسم وقال
يا دكتور بهاء انا لو غلطت في. حقها في حاجه تقول وانا مستعد اعتذرلها قدام الدنيا كلها..
بهاء بص لملك وقال
ها يا ملك زعلك في ايه خالد؟..
ملك بتوتر
هو لازم يعني تعرف.. بصراحه كده انا نسيت….
ضحك خالد غصب عنه وبهاء قال
قومي يا ملك روحي بدل ما اقلع الجزمه وانزلها علي دماغك…
ملك قامت وقالت لخالد وهي مدايقه
عارف لولا اني نسيت يا خالد انت ما تعرفش كان هيحصلك ايه؟..
خالد
ومش عايز اعرف….
بهاء
اديها المفتاح بتاع العربيه تروح لوحدها عشان عايزك معايا في مشوار وهناخد العربيه الكبيره..
ـــــــــ #بقلم_رحاب_القاضي ـــــــــ
_في القاهره دخلت جيلان النادي اللي بيتدرب فيه انس، ومعاها جني اللي كانت مدايقه جدا..
جني
علي فكره انا مش هخرج تاني معاكي بعد كده.، لانك بتكدبي وبرضو جايه عند. الولد ده…
جيلان
لا هتخرجي معايا وبعدين بطلي حركاتك دي اللي عايزه تلفتي بيها نظر انس ليكي هو مش هيشوفك اصلا..
جني
وانا مش عايزاه يشوفني، وعايزه امشي من هنا..
في الوقت ده قرب منهم انس وقال
تمشي ليه بس يا جني ده انا ما صدقت انك تيجي..
بصتله جيلان بعصبيه وهو قال بسرعه
قصدي يعني عشان جيلان تقدر تيجي، لانها مش هتقدر تيجي لوحدها..
جيلان
المهم يا حبيبي تعالي بس عشان هتفرج عليك وبعدين نطلع نتغدي..
انس بص لجني وقال
اكيد طبعا، تعالي اقعدو في المكان اللي عايزينه عشان الكابتن بيناديلي…
_وسابهم ومشي وفضل يتدرب مع الفريق بتاعه وكان فعلا موهوب جدا في اللعبه دي، وكل شويه كان يبص لجني يلاقيها مش مهتميه بيه ومركزه في موبيلها، وبعدين قامت ومشيت وهي بتتكلم في الفون، مسك الكوره ورماها بعصبيه علي الارض..
المدرب
انس فيه ايه اهدي شويه..
انس بضيق
سوري يا كابتن..
المدرب
انت بريك النهارده، طارق هينزل مكانك…
_ادايق انس وراح غير هدومه ومشي حتي من غير ما يكلم جيلان خالص، واللي خلاها تدايق اكتر لما لقيته واقف مع جني وبيقولها…
انس
هو انتي ليه بتتصرفي كده معايا، انا ما فيش بنت تعبتني زيك..
جني
الموضوع ساهل جدا بس انت مش عايز تفهمه ان انا مش زي البنات اللي تعرفها..
انس
بالظبط وده اللي مجنني عليكي، وعلي فكره انا بالي طويل اووي..
جني بحده
لو سمحت ابعد عن طريقي احسنلك والا مش هيحصل كويس.
انس
مش هبعد غير لما توافقي نرتبط او حتي نبقي صحاب..
انس
هو انت ما تعرفش ان ده علط وعيب وحرااام، بس انت واحد زيك بيتسلي ببنات الناس هيعرف ده ازاي…
_خلصت كلامها وسابته ومشيت، وهو كلامها عصبه جدا ومشي رجع بيتهم…
ـــــــــ
_في بيت معتز كانت مريم قاعده قدام المرايه في اوضتها وبتقول..
مريم
والنبي يا مريم زي القمر حتي لو بقي عندك عشروميت سنه ولا ايه يا معتز..
معتز
لا الرد مش هيكون وانتي بعيد كده، تعالي جنبي بس وهقولك..
مريم
يا شيخ اتنيل ده انت لو رفعت ايدك عشان تهرش في ضهرك هيجيلك تشنجات..
معتز بغيظ
انتي مالك بيا اليومين دول، قالبه علي ميس مريم بتاعت الحضانه اللي شوفتها زمان فاكره..
مريم قامت قربت منه وقالت
استني بس سيبك من ده كله، امبارح انا كنت بكلم نيره وقالتلي ان حازم عايز يعمل مشروع يتسلي بدل قعدت البيت، ما تعمل الجيم اللي انت نفسك فيه انت وهو مع بعض…
قرب منها معتز وقال
هي فكره حلوه اووي بس مش وقته دلوقتي، انتي مالك محلوه اووي كده ليه..
وقبل ما يقرب منها فتح انس الباب وقال
انتو بتعملو ايه؟..
مسك معتز الشبشب من الارض وحدفه عليه وقال
هنكون بنعمل ايه ياللي ما عندك. ذوق ازاي تدخل كده؟…
بص انس لمريم اللي كانت مكسوفه جدا وقال
ما انا جاي من التمرين جعاان، والشغاله ما جاتش النهارده، تعالي يا ماما جهزيلي عشاا..
معتز
بقولك ايه نيره وحازم جم روح كل عندهم وسيبلي امك دلوقتي..
انس فرح اووي وقال
بجد حازم ونيرو رجعو من العمره، انا عبات عندهم النهارده ما حدش يقلق…
_قال كلامه ومشي ومريم ادايقت وقالت..
مريم
هو انا ليه حاسه ان الواد ده مش بيحبنا زي نيره وحازم؟…
معتز
يا ستي ما يحبهم مش كفايه ربنا ما ادهمش خلفه، هنستكتر عليهم انس اللي هما مربينه اكتر مني ومنك..
ـــــــــ #بقلم_الكاتبه_رحاب_القاضي ـــــــــ
_في الاسكندرية..
_دخلت ملك البلكونه اللي كانت كبيره ومترتبه بشكل حلو اووي، وقالت وهي ماسكه شنط اهل..
ملك
الكريب وصل يا شباب..
ناني
سما احلفي تاني ان بابا قال انه هيصالحني..
سما
يادي النيله والله قال كده، المهم انا اعمل ايه في موضوع محمد..
ملك
وافقي طبعا ده حلو اووي.
ناني
سيبك من المسهوكه دي، انتي حاسه بايه من ناحيته؟..
سما
مش عارفه بس مش عايزااه يبعد وخايفه يقرب اكتر من كده..
ناني
هو موضوع ان الفرح بعد اسبوعين تلاته ده يوتر، بس هو مسافر شغل مهم واكيد عايز حد جنبه في الفتره اللي هيكون فيها هناك..
ملك
وافقي يا ناني ده انا في حتة فستان جامد عايزه البسه في فرحك..
سما بغيظ
يا ملك هقوم اضربك اسكتي بقي،وبعدين انا مدايقه منك بسبب اللي عملتيه في خالد حرام عليكي افرض كان بابا زعله بكلمه او حاجه….
ناني
لا لا بابا عارفها هطله، المهم انتي قوليلز موافقه وخليه يجي هو ومامته وباباه ويمكن خير يا سما..
ملك
انا نفس رأي ناني والله، وبعدين محمد مش وحش ولا يخوف بالعكس محترم جدا..
ناني
بناات فاكرين لما كان بابا بيبات زمان في المستشفي زي كده، كنا احنا بنعمل ايه..
_قامو هما التلاته بحماس وشغلو فيلم رعب وقفلو نور الشقه كله وجابو بطنيه وقعدو علي الكنبه جنب بعض وفضلو يتفرجو معادا ملك اللي كانت مخبيه وشها في سما من الخوف…
ـــــــــ #بقلم_الكاتبه_رحاب_القاضي ـــــــــ
_تاني يوم قدام محطة اسكندريه، كانت ناني واقفه بعربيتها مستنيه اياد اللي طلع وهو ماسك شنطه كبيره في ايده..
ناني لنفسها بسخريه
هو حد ضحك عليه العبيط ده وقاله انه جاي رحله..
اياد
ناني مش كده؟..
ناني بغيظ
بيقولو، اتفضل حضرتك معايا…
اياد
لا انتي هتتنكي عليا من اولها والله الف وارجع تاني..
ناني
انا مش بتنك دي طريقتي، وبعدين انت جايب الشنطه دي ليه، ده هما كلهم ساعتين تلاته..
اياد
لا ما انا اخدت اجازه اسبوع لحد ما اشوف اخرتها ايه؟..
ناني
هي ايه دي؟..
اياد
اسكندريه وبحر اسكندريه اللي مجنني من اول مره شوفته..
ناني
اوكي اتفضل بقي لو سمحت..
_وركبو العربيه وبعد شويه اياد زعق فيها وقال..
اياد
يا ستي ادخلي يمين..
ناني بعصبيه
وربنا ما انا داخله، خلي الحيوان اللي ذنق عليا ده متذنب شويه..
اياد
علي فكره انتي اللي كنتي ماشيه غلط اصلا، اتحركي بقي الله يسترك..
ناني بحده
وانت مالك اصلا هو كان من باقي اهلك..
اياد بغيظ
ما هما لما هيتكلمو الكلام هيجي في وش البأف اللي قاعد جنبك.. اتنيلي امشي وقفتي الشارع كله..
ناني
بقولك ايه يا بأف خليك في حالك.، ومش هتحرك غير لما الحيوان ده ينزل يتعذرلي…
فتح اياد باب العربيه وقال وهو نازل
الله يخرب بيت اللي ركبهالك يا شيخه وطلعك من بيتكم اصلا..
وفتح الباب بتاع العربيه وزعق فيها وقال
هاتي المفتاح ده وانزلي يللااا…
ناني بحده
انت بتزعق فياا..
_مسك ايدها وخلاها نزلت واخد منها المفتاح وهي راحت ركبت الناحيه التاتيه واياد هو اللي ساق العربيه..
اياد
انتي بصالي كده ليه انتي هتتحولي ولا ايه؟..
ناني بغضب
انت زعقت فيا، انا ما فيش حد. بعد بابا قدر يزعق فيا ابدا..
اياد بقلق
علي فكره انتي اللي استفزتيني و..
ناني بعصبيه
اقسم بالله لولا ان البرنانج واقف عليك لكنت خليتك تقضي الاجازه بتاعتك في المستشفي..
اياد بصلها باستغراب من كلامها وقال
عنيفه اووي، وبعدين انا عملت كده عشان ماحدش يقولك حاجه واتخانق معاه لاني مش هتحمل عليكي نص كلمه..
ناني بحده
لييه يعني كنت من باقي اهلي..
اياد بغيظ
لميه شويه لسانك ده.، وبعدين انتي ما سمعتيش عن حاجه اسمها تلميحات قبل كده..
ناني بضيق
بقولك ايه سوق وانت ساكت، هترتاح شويه وبعدين هنسجل عشان نخلص..
اياد
هو ايه المقابل بقي تسجيلي البرنامج ده معاكم مع انا مش عايز اقولك مين كلمني وانا رفضت..
ناني
من. غير هري كتير، في التلفزيون ما حدش بيجيب ظباط شرطه احنا بس عشان التريند. مش اكتر جايبينك..
اياد
يخربيت لسانك يا شيخه، المهم انا عايز مقابل وهطلبه بعد البرنامج ما يتسجل..
ناني فكرته بيتكلم علي الفلوس وقالت
مش هنختلف كتير، اقف بقي علي شمالك هنا الاستديو بتاعي…
_تفتكرو بقي ايه اللي هيطلبه اياد منها؟.
ـــــــــ #بقلم_الكاتبه_رحاب_القاضي ـــــــــ
_في مكان معماري حديث التشطيب، نزل بهاء من عربيته وكان معاه خالد، وقرب من امجد اللي واقف يبص علي العماره الكبيره اللي من تصميمه وقال..
بهاء
برافو عليك شاطر زي ابوك الله يرحمه لا وكمان عديته..
امجد
كلامك ده شرف ليا والله يا عمي، خير قولتلي انك عايزني في موضوع مهم ورفضت انا اروحلك وحضرتك اللي جيت..
بهاء
عارف يا امجد انا لما قرىو اسيب القاهره ابوك اكتر واحد ساعدني انقل هنا مع بناتي بنفس امكانياتي وظروفي..
امجد
بابا كان بيحبك جدا، بس انا مش فاهم برضو حضرتك..
بهاء بجمود
انا طول عمري بتمني اللحظه اللي ارد فيها جمايل ابوك عليا، بس مش هردها ببنتي يا امجد…
قلق امجد وسأله
برضو مش فاهم حضرتك تقصد ايه؟..
بهاء
من غير لف ودوران انا الكلام ده هقوله ليك انت بعيد عن ملك لانها طفله اووي وبريئه فوق ما تتصور غير اخواتها واخاف عليها تتوجع..
بصله خالد اللي كان واقف بعيد باهتمام وامجد قال
انا مش فاهم حضرتك تقصد ايه للمفروض اني بكره هجيب ماما واجي اخطب ملك..
بهاء
لا اعتذر لمامتك بالنيابه عني، بس انا مستحيل اجوز بنتي لواحد نسوانجي يا امجد..
اتعصب امجد. وقال
وجيبتها ليه بقي تشتغل عندي من الاول، ليه وافقت اني اجي اخطبها..
بهاء
اولا لاني كنت فاكر ان الشغل عندك حاجه وعلاقتك حاجه تاني، ووافقت قدام ملك عشان مش عايز ازعلها..
امجد
يا دكتور بهاء انا شاب اعزب يعني اعمل اللي عايزه، بس لما ملك هتبقي في حياتي ه…
بهاء
امجد انا حاجه واحده بس اللي اعرفها اخلاق المحترم هتكون لنفسه قبل اي حد، وانا مش مستعد اغامر ببنتي معاك، معلش الجواز قسمه ونصيب..
_خلص بهاء كلامه وراح ركب عربيته، وابتسم خالد غصب عنه ان الجوازه مش هتم، وامجد بص لبهاء بكل غضب وطلع موبيله وكلم ملك وقال..
امجد
ملك انزلي حالا انا جايلك علي البيت لازم نتكلم..
ملك
مش هينفع دلوقتي خالص، لان سما اختي جايلها عريس دلوقتي هو واهله وناني في الشغل وانا مش هينفع اسيب سما لوحدها..
امجد بضيق
اوكي الصبح بدري هجيلك، بس ياريت دكتور بهاء ما يعرفش لوو عايزه موضوعنا يتم..
قلقت ملك وقالت
انا مش فاهمه انت عايز ايه يا امجد وفي ايه اصلا..
امجد
لما هشوفك هفهمك كل حاجه..
وقغل معاها وقال لنفسه بحده
انا ما يتقاليش لا ية دكتور بهاء وملك هتجوزها غصب عن عين اي حد….
_تفتكرو ايه اللي هيعمله امجد، وليه اللي هيحصل بين سما ومامت محمد، واياد وناني وانس وجني؟..
يتبع…..
لقراءة الفصل التالي : اضغط هنا
لقراءة الرواية كاملة اضغط على : (رواية خطيبتي واخواتها التوأم)
