رواية خطيبتي واخواتها التوأم الفصل الحادي والعشرون 21 بقلم رحاب القاضي
رواية خطيبتي واخواتها التوأم الجزء الحادي والعشرون
رواية خطيبتي واخواتها التوأم البارت الحادي والعشرون
رواية خطيبتي واخواتها التوأم الحلقة الحادية والعشرون
ـ الحلقه الحاديه والعشرون
ـــــــــــــــــــــ ـــــــــــــــــــــ
قام فوزي بسرعه وقال
انت ازاي دخلت هنا يا بني ادم؟..
خالد.
اهدي بس اوعي تتعصب هو انا غريب ولا ايه؟..
جه فوزي يقوم وقال
انت عايز ايه وازاي تيجي هنا في اوضة نومي..
خالد
بجاحه انا انسان بجح ومش متربي عندك مشكله..استني بس عيب تقوم كده قدامي انا خجول معلش..
فوزي اتنهد بعصبيه وقال
عايز مني ايه يا خالد؟..
خالد وقف قدامه وقال
دكتور بهاء وبناته لو قربت من بناته في اي حاجه خير او شر الفديو الجميل اللي اتسجلك مع الخواجيه هيلف مصر كلها وتبقي فضيحة رجل الاعمال فوزي البحيري ، وعايزك برضو تكمل في شغلك اوعي تسيبه..
فوزي بغيظ
غريبه حضرة الظابط خالد. بنفسه بيطلب مني اكمل شغل..
خالد
طبعا يا فوزي اومال مين اللي هيوصلك لحبل المشنقه غيري،بس ازاي ما اخدتش بالك من الكاميرا الجميله دي…
فوزي بغيظ
ماشي بس اعمل حسابك اللي انت عملته ده هيترد فيك اضعااف..
خالد
في الانتظار يا باشاا، مش هعطلك اكتر من كده بقي..
_قال كده وطلع خالد من عنده، وفوزي كان متعصب جدا وبعدين خالد مشي بعربيته ووقف قدام عربية امجد ونزل من العربيه وقال..
خالد
ما هو انا عايز اعرف انت عايز توصل لايه؟..
امجد
مش انا ساعدتك تمنع فوزي انه يهدد بهاء بالبنات، من وجهة نظرك انت بقي انا ايه..
خالد بجمود
قولت انك عايزني خير ان شاء الله؟..
راح امجد. وطلع من عربيته ملف وقال
الملف ده فيه كل تفاصيل العمليه الجديده…
خالد
امم هاخده بس مش هصدق اللي فيه فما تتعشمش كتير…
امجد
مصلحتنا واحده انا عايز اخلص من عمي ومشاكله وانت عايز تترقي في شغلك عايز تبان جامد قدام ملك ما اعرفش ايه نيتك بالظبط بس مصلحتنا واحده..
خالد
مصلحتي اخلص البلد من عمك وامثاله ولو اتاكدت انك من امثاله هتكون انت الهدف بتاعي قبل عمك..
_ خلص كلامه واخد عربيته ومشي وبص لموبيله لقي ملك بترن عليه رد عليها وقال..
خالد
في ايه يا ملك عشرين مكالمه وقولتلك لما ترني وما اردش من اول مره يبقي انا مشغول..
ملك بضيق
ما انا خايفه البواب قالي انك ما رجعتش لحد دلوقتي..
خالد
انتي نزلتي سالتي عليا وخايفه كمان يعني؟…
ملك
انا قولت خايفه عليك لا ما قولتش لا طبعا المهم قولي انت بتخوني ولا لا؟..
خالد
عبط علي الصبح مش عايز، وبعدين ما اوقات كتير بكلمك ومش بتردي وتبقي عامله بلوك معني كده انتي بتخونيني..
ملك
لا والنبي تعالي نكد مكاني احسن، هو ده دور مين يا استاذ وبعدين ايه طريقتك دي هو احنا مرتبطين يعني ولا مرتبطين عشان تقولي كلامك ده..
خالد بغيظ
قولي لنفسك يا اختي..
ملك
طيب انا هقفل في وشك وهعمل بلوك بس وانت طالع الشقه فوق هات شوكلاته وحطها قدام باب الشقه..
خالد
بصي انا مطبق من امبارح وبعدين قولت لابوكي انا عايز ارجع شقتي هو صمم اقعد في وشك..
ملك بحده
وماله وشي يا سكر مش عاجبك وشي..
ابتسم خالد وقال
ما هي المشكله انه عاجبني هجببلك الشوكلاته وجاي..
ملك بحماس
اوكيشن يا اسطا اتفقنا…
_ قفلت معاه وخالد نزل من العربيه قدام سوبر ماركت وجابلها شوكلاتات كتير وبعدين راح البيت وحط قدام الباب ولسه كان هيرن عليها طلع بهاء في وشه..
خالد بتوتر
دد دكتور بهاء..
بص بهاء للشوكلاته وقال
ايه ده بقي يا خالد باشا؟..
خالد
دا يعني الانسه ملك طلبت مني اجيبلها شوكلاته..
بهاء
وانا مش مغفل يا خالد ودلوقتي حالا اعرف ايه اللي بينك وبين ملك..
خالد
والله انا ما اعرف يعني ممكن تسألها، ده بعيد عن انها مراتي يعني..
بهاء بحده
بس ده ما كانش اتفاقنا ولا انت كمان بتلف وتدور..
خالد.
انا لا بلف ولا ادور. لا يفرق معايا في الدنيا دي كلها غير شغلي وملك اللي انا قاعد هنا عشان احميها واحمي اهلها، وبعد ما تخلص القضيه هيبقي الجواز ده قدام الناس كلها ده بعد اذنك يعني..
بهاء اتنهد بنفاذ صبر وقال
اتفصل يا خالد اطلع نام ولا شوف هتعمل ايه، وانا لولا ما واثق فيك ما كنتش امنتك علي سري من البدايه وواثق ان حتي لو ملك معاك هتكون في امان، بس انا لازم اربي بنتي وده بعيد عنك انت..
خالد ابتسم وقال
براحتك يارب بس ملك تعقل واستلمها عاقله …
_ قال كلامه خالد وطلع فوق وبهاء اخد الشوكلاته ودخل جوه، واتصدم لما لقي سما ماسكه صنية مكرونه كبيره وبتاكل..
بهاء
ايه المنظر ده يخرب بيتك…
سما
ده مش انا والله، دي اوامر ابو عبيده..
بهاء
ايه ده هو ابو عبيده عندنا في البيت يا تولتميت اهلا وسهلا هو فينه ده انا هموت واشوفه..
سما
يا بابا ايه اللي هيجيب ابو عبيده هنا ده زمانه عمال يلسوع في اليهود، انا قصدي علي ابني ابو عبيده الصغير…
بهاء.
لا هو الاسم حلو بصراحه بس ما يطلعش منك انتي..
سما
لا ما هو ده اختيار المنيل علي عينه ابن ثريا..
بهاء
اللهم طولك يا رووح، المهم اخواتك فين؟..
سما
مرزوعين في اوضهم…
_ وندهلهم بهاء والاتنين طلعو وكانت ناني لابسه هدوم الخروج وبتحط الحاجه بتاعتها في الشنطه..
بهاء
علي فين يا هانم ولا هتطلعي من غير ما تاخدي اذني..
ناني
لا والله كنت هقولك انا رايحه اقابل استاذ فؤاد صاحب القناه اللي كنت شغاله فيها لاني مشيت من غير ما اقوله وكده والراجل جالي لحد هنا..
بهاء
تمام وما فيش رجوع القاهره، ثانياً بقي وانا وطالع لمحت خالد بيحط شوكلاته قدام الباب ياتارا جايبها لمين…
بصت سما وناني لملك اللي قالت
انتو بتبصولي ليه اصلا دي شوكلاته من الرخيصه مش نوعي المفضل..
سما بخبث
هاتهم يا بابا دي نوعي انا المفضل..
مسكتهم ملك بسرعه وقالت
لا طبعا هو جايبهم ليا انا..
قلع بهاء الجزمه وقال
والله لتتنفخي يا ملك ياللي بتجري ورا الخازوق لحد ما يلبس فيكي…
ملك بخوف
الحقووونيييي والله ما هعمل كده تاني…
_ فضلت تجري وبهاء وراها وسما وناني فضلو يضحكو…
ـــــــ #بقلم_الكاتبه_رحاب_القاضي ــــــ
_ في قرية شهبانه كان اياد قاعد مع غاده في مكتبها وقال..
اياد
بس فعلا غيريتي الوحده الصحيه بقيت ازبل من الاول..
غاده
يا جدع حرام عليك بس بجد. انا لقيت نفسي هنا في القريه دي رغم اني ما كنتش بطيقها الاول خالص..
اياد
ايوه فاكر كنتي يومياً تكلمينا وتصيحي اول ما التعيين جالك هنا..
غاده
المهم سيبك انت قولي الواد البأف ابن الصفرا عامل ايه..
اياد بغيظ
طيب احترمي نفسك وقدري ان الصفرا تبقي خالتي..
غاده
شوفت انت كمان قولت عليها صفرا ومش هي بس لا وبنتها صفرا، والواد خالد واخد. سيكا صفار منهم والله..
اياد
غاده قومي فزي وريني البيت اللي هقعد فيه..
غاده
استني بس الاول اشرب القصب ده، وبعدين ابوك كلمني ولمحلي انك متخزوق بس هو الخزوق يخليك تسيب القاهره والسمعه اللي عملتها لنفسك في شغلك هناك وتيجي كفر الشيخ وفين في قريه لو حصل فيها اي حاجه هيرحو للعمده مش ليك..
اياد بجمود
ما ده كويس انا عايز اريح دماغي..
غاده
طيب ايه اللي حصل طيب، ومين دي اللي حبيتها من غير ما تقولي..
اياد بحزن
قريت مره في كتاب كده حاجه بتقول
وكأنك في خلاف مع الحب، اما ان تجد من يحبك وانت لا تحبه
او انك تحب من لا يحبك
ولو شاء القدر والتقيت بمن يحبك، لا تحبكم الحياه معاً…
سقفت غاده وبعين قالت
ها بقي ايه اللي حصل،وبلاش الكلام الملولو ده مش بفهمه..
_ قبل ما يرد عليها جه واحد من الممرضين وقال وهو مدايق جدا..
الممرض
يا دكتوره غاده والله كده ما ينفعش تعالي شوفي بره في واحده عامله مشاكل..
قامت غاده وقالت
يعني هو ما اعرفش اقعد افضفض مع صديق طفولتي شويه، دقيقه يا ايدو وجايه..
_ وطلعت غاده وبعد شويه اتفزع اياد من صوتها العالي وطلع بسرعه لاقاها بتزعق وبتقول…
غاده
جرا ايييه يا حوووش ايه الدوشه دي ما اللي يجي يكشف ويتعالج يجي وهو ساكت..
الست
يا بنتي انا جايه اخلع ضرسي ومش لاقيه الدكتور..
غاده بحده
وهي فين الدكتور العره بتاع الاسنان..
جه بسرعه الدكتور وقال
انا اهو يا دكتوره بس كنت في الحمام والله…
غاده
جرا ايه يا دكتور علي ما تفرج انت مش قولنا المريض اهم من اي حاجه..
الدكتور
انا اسف بس يعني اقعد بيها يا دكتوره..
غاده
لو لزم الامر تقعد بيها يبقي تقعد بيها..
الدكتور بغيظ
حاضر يا دكتوره غاده تحت امرك، اتفضلي يا امي جوه…
غاده بحده
وانتو مش عايزه دوشه هغيب نصايه وارجع ما اسمعش صوت..
اياد بصدمه
ايه اللي انتي بتعمليه ده، عارفه لو حد بلغ عنك..
غاده
ما ينفعش معاهم غير كده، المهم تعالي انا خليت البت سعيديه الممرضه تروقلك البيت اللي هتقعد فيه وعملتلك موز باللين وحطيته في التلاجه..
اياد
جدعه يا بت يا غاده والله، حاسه باخوكي اووي..
غاده وهي ماشيه قدامه
ما قولتلكش مش ابن العمده هنا بيكرااش عليا…
اياد
ما عندوش نظر…
غاده
بتقول حاجه يا اياد سمعني كده..
اياد
بقول حقه هيلاقي فين واحده في طولك كده وهبلك..
غاده
لا ما عز طويل واطول مني زيك كده واطول كمان بس هضبه وكرش ولا كرش حمو بيكا وسمج اووي بس اهو لقيت حد يكراش عليا..
اياد
اخلصي وصليني البيت..
ـــــ #بقلم_الكاتبه_رحاب_القاضي ــــ
_ في القاهره في بيت عزت الشندويلي دخلت الشغاله عند جني وقالت..
الشغاله
اتفضلي يا جني هانم الحاجات دي بعتهم ليكي الكابتن انس وبيقولك انه مستنيكي تحت بس عند الباب اللي ورا…
_ابتسمت جني وهو بتشوف الطرح اللي جابهم ليها انس وبسرعه لبست منهم واحده ونزلت وراحت ركبت جنبيه بسرعه وقالت..
جني
يلا بسرعه فاضل تلت ساعه علي الامتحان..
انس
في ايه يا بت هو انا السواق بتاعك قولي صباح الخير الاول وانا ارد عليكي اقولك صباح الفل يا قمر يا عسل انت..
جني بحده
اخلص يا انس الامتحان هيفوتني يلاااا..
_ ساق انس العربيه وبعد شويه وصل قدام المدرسه بتاعتها وقال..
انس
خلي بالك من نفسك انا هستناكي هنا…
جني بصتله وقالت
هو انا قولتلك قبل كده اني بحبك يا انس..
انس
لا ما قولتيش و… احلفي انتي قولتيها بجد..
جني بتوتر
هروح انا بس عشان الحق الامتحان…
_ نزلت من العربيه ومشيت بسرعه وانس نزل وقال بصوت عالي خلي اللي واقفين بصولهم وقال..
انس
وانا كمان وحياة امي بحبك…
_ ضحكت جني وراحت الامتحان بتاعها، وانس فضل قاعد مستنيها…
ـــــــــــــــــــــ
ـ وفي بيت معتز دخلت مريم وراحت وقفت قدام الاوضه اللي فيها معتز وقالت..
مريم
واخرتها يا معتز؟…
معتز بحده
اقفلي الباب يا مريم وسبيني انام..
مريم
هو انت بتنام ده انت زمانك عمال تهري وتفرك وتفكر ازاي هتنكد علينا..
معتز
ايه اللي رجعك مش انا ما اتعشرش وما اتحبش جيتي ليه في وشي تاني..
ضربته مريم علي كتفه وقالت
ما تقولنيش كلام ما قولتوش يا راجل انت عيب عليك تكدب وانت علي كبر..
معتز
ما انتو كلكم معتبرني عدوكم وكل ده ليه عشان عايز ولادي يبقو احسن ناس في الدنيا…
مريم
يا حبيبي مش ديما اللي انت شايفه هو الصح..
معتز
مش وقت محاضراتك علي فكره وعيالي هيمشو زي ما انا عايز وبس…
مريم
تصدق انك راجل بومه، وانا غلطانه اني رجعتلك خليك كده لوحدك. زي القرد..
جات تمشي بس هو مسك ايدها وقال
استني..
سحبت ايدها منه وقالت
عايز ايه يا معتز مش بتقولي ايه اللي جابك لما دخلت..
معتز
قولتها وخلاص ما تمسكيش في الكلمه عشان لو عملت زيك هلبسك عشرين محضر سب وقصف..
مريم.
انا ممكن اقعد بس بشرط، تقولي خليكي يا ميمي يا حبيبتي وما تمشيش عشان انا ما اقدرش اعيش من غيرك…
معتز اتنهد وقال
اتنيلي اقعدي عشان ما فيش حد بيعملي طلباتي غيرك..
اتعصبت مريم وقالت
ايه ايه ده انا ما قولتلكش تقول كده، انت رخم يا معتز..
ضحك معتز وقال
ههههه طيب خلاص ما تمشيش بقي يا مريم، انا بجد. محتاجلك..
قعدت مريم وقالت
هو انت غلس ومطلع عيني من يوم ما اتجوزتك بس اعمل ايه بحبك يا معتز وما اقدرش اسيبك انما ورحمة الميتين كلهم لو ما اتعدلت مع العيال لكون بعتاك لامك فاكر امك يا ابن الفت..
معتز بخوف
الله يرحمها يا حبيبتي…
ـــــ #بقلم_الكاتبه_رحاب_القاضي ــــ
ـ وفي الاسكندريه..
كانت ناني قاعده مع فؤاد وقالتله
انا بعتذر جدا بس انا وضحتلك ظروفي ومش هقدر اكمل..
فؤاد
تمام بس انا ممكن اكلم باباكي و..
ناني
يا استاذ فؤاد انا ما فيش مني وان القناه واقفه عليا و..
فؤاد
لا لا انتي فاهمه غلط انتي ايوه مذيعه جامده وكل حاجه بس ما فيش حد مشهور هيرضي يسيب مكانه ويجي يشتغل راديو وانا مش لسه هدور..
ناني
ايه الاحراج ده.، طيب انا برضو مش هقدر ارجع..
فؤاد
انا ممكن اقابل والدك واقنعه وو..
ناني
لا لا والله مش هيوافق..
فؤاد
تمام يا انسه ناني، وانا برضو مش هسيبك انتي مذيعه شاطره وانا اختي ماسكه الفرع اللي هنا في اسكندريه للقناه وتقدري تبدأي معاها…
ناني
احلف انك بتتكلم جد..
ابتسم فؤاد وقال
ايوه وحاجه كمان انا اللي همسك الفرع هنا مكانها..
ناني بتوتر
دد ده ليه يعني هتمسك الفرع مكانها..
فؤاد
مش عشان حاجه بس انا كده كده كنت هنقل هنا وهي هترجع مكاني، هو في احلي من اسكندريه..
ناني
معاك حق يبقي كده تمام..
فؤاد
اوكي وانا هبعتلك كل التفاصيل ونتواصل سوا.
_ شكرته ناني ومشيت… وهو فضل باصص ليها باهتمام كبير باين عليه اووي..
ـــــ #بقلم_الكاتبه_رحاب_القاضي ـــــ
_ وعدي شهر علي ابطالنا وكانت ناني النهارده اول يوم ليها وقرب منها فؤاد وقال..
فؤاد
خير بقي في ايه قالولي انك مش تطلعي البرنامج غير لما اجي وسيبت ام الجيم وجيت نعم…
ناني
بص من غير عصبيه انا عايزه اغير موضوع الحلقه..
فؤاد بغيظ
معاكي الاعداد يا ناني غيري انا مالي ده افتكرت القناه بتولع..
ناني
لا لا تف من بوقك.. قصدي يعني تف من بوق حضرتك.. يا نهار اسود ايه اللي انا بقوله ده بص اقعد اتفرج عليا انا داخله اهووو..
ـ وسابته ناني ودخلت اوضة الاذاعه، ولبست السمعات واخدت نفس عميق وقدمت البرنامج بتاعها بكل هدوء وكان فؤاد قاعد برد بيتفرج عليها وهو مبتسم، وبعدين هي قالت…
ناني
النهارده الموضوع هيكون مختلف شويه هنتكلم عن فرحة البدايات في كل حاجه في حياتنا سواء مرحله دراسيه بنكون فرحانين في البدايه وبعدين بنتزنق زنقة ما يعلم بيها الا ربنا، او فرحتنا مثلا ببداية علاقه بنبدأ نقول ايه احنا معارف بعدين بقي بنبقي زمايل وبعدين بنبقي اصدقاء ونبدا بقي نحس بحاجات غريبه زي المخدر كده بيدا يدخل جسمك وعقلك وقلبك بتفضل تتخدر كده لحد. ما تصدق الفرحه دي اللي في البدايه انها حقيقه بتدخل العلاقه دي وتتعامل بكل سذاجه تقول كل اللي جواك وهو كمان قال كل حاجه احساسي بيقولي انه كان صادق مش كداب وان في حاجه اكبر منه ومني هي اللي بعدتنا وهي اللي وجعتنا وخلتني اقول انها ما كانتش فرحه من الاول دي وهم البدايات اللي اخرها بتشوف نفسك بشع بسبب حاجات انت مش فاهمها بس البعد بيكون هو المريح في الحاله دي وهنتعود والله..
مسحت دموعها وقالت
اتكلمت كتير النهارده بس دلوقتي هسمعكو وكل واحد بقي يقولي هو في انهي مرحله بيمر بيها في البدايه ولا عداها ولا لسه ما دخلش فيها…ونطلع لفاصل ونرجع تاني…
_ خلصت وقلعت السماعه وبصت قدامها لقيت فؤاد باصص ليها بجمود وبعدين دخل عندها وقعد قصادها وقال..
فؤاد.
برافو عليكي الحلقه حلوه اووي…
ناني
ميرسي انا هدخل جوه شويه وجايه…
ـــــ #بقلم_الكاتبه_رحاب_القاضي ــــــ
_ في قرية شبهانه…
كان اياد بيسمع لكلام ناني في الراديو ودموعه علي وشه وكان عارف انها بتقصده هو… وفجأه دخلت عنده غاده..
غاده
وحياة امك ما هسيبك انت ايه اللي عامله في البيت ده يا… ايه ده انت بتعيط..
وقف اياد وقرب منها وقال
اطلعي بره يا غاده يلا يا ماما اطلعي بره..
غاده
انت بتطردني يا اياااد الحق عليا جايه اتكلم معاك وافتح نفسك علي الشغل اللي انت سايبه ده..
اياد
لما تبقي تخبطي وافتحلك ابقي اتكلمي انما انك تدخلي البيت بالمفتاح وكأنها زريبه فا ده مش مرحب بيه…
غاده
ما انا حاطه مانكير وخايفه يبوظ لما اخبط علي الباب يا ايدوو المهم جيبالك جبنه مالحه معايا وفطير سرقتهم من بيت جيراني يلا ناكل..
اياد
يخربيت سنينك عايزانا ناكل حاجات مسروقه..
غاده
يا ابااا انا عايشه علي السرقه هنا اومال هشتغل واطبخ بس هما عارفيني ان انا اللي باخد الاكل…
_ وقبل ما يرد عليها موبيله رن وراحت هي مسكته وقالت بحماس..
غاده
ده خالد انا هرد عليه..
ورد علي خالد وقالت
الو ازيك ياد يا ابن الصفرااا..
_ ما ردش عليها خالد وقفل السكه وهي اتعصبت وقالت..
غاده
شايف قفل في وشي..
ضحك اياد واخد الفون وقال
ههههههه هو حد يعني يخض حد. كده..
وكلم خالد وقاله.
ايه يا خالد يعني انت مش عارف غاده..
خالد بغيظ
بقولك ايه انا مش بطيق البت دي من واحنا في المدرسه فلما تمشي من عندك كلمني.
غاده
ليه كده ده انا حتي بحبك يا خالوده..
خالد
ياربي ما تقوليش ام الاسم ده.. “عرفتو ليه خالد مش بيحب ملك تقوله خالوده”..
غاده
ما تنشف كده يا خالد وبعدين قولي انت اتجوزت بس مين دي تعيسة الحظ اللي هتتجوز كتلة الكآبه دي..
اتنهد خالد وقال
اديني اياد يا غاده ربنا يهدك..
غاده
طيب امك الصفرا عامله ايه. مرات ابوك فاطمه الوتكه…
خالد زعق فيها وقال
ادينييييي اياااااد يا غاااده..
غاده
بس والله حقك تطفش من العيله دي حتي ابوك علي فكره اصفر برضو، والبت امينه طليقتك بتشوفنا امانه عليك الطشهالي بالقلم لحد ما اجي اكمل عليها، تطلع مين هي عشان تطلق من صدقي الصدوق..
خالد بحده
ربنا ياخدك يا غاده يا ياخدني، انتيييي ايه مش رحماني لا انا صغير ولا. وانا كبير ربنا ينتقم منك..
ـ قال كده وقفل في وشها وعمل بلوك لرقم اياد،واياد ادايق وقال….
اياد
عجبك كده افرض كان عايزني في حاجه مهمه..
_ وفجأه الباب خبط وراح اياد فتح ولقي واحد. ضخم اووي واقف قدامه وشكله متعصب جدا..
اياد بقلق.
نن نعم في ايه؟..
طلعت غاده وقالت
لؤي ده لؤي يا اياد. اللي بيكراش عليا ابن العمده..
لؤي
بقي عامله عليا محترمه وانتي قاعده في بيت راجل غريب..
غاده
انت بتقولي انا كده طيب، اياد رد. عليه واتخانق معاه وهاتلي حقي..
اياد بقلق
اتخانق مع مين ده لو نفخ فيا اطير..
مسكه لؤي من قفاه وقال
بقي انت عايز تتخانق معايا يااااه..
اياد بخوف
وربنا ما انا اللي قولت ده هي…
ـ ده ذنب ناني يا اياد، اشرب بقييييي..
ــــــ #بقلم_الكاتبه_رحاب_القاضي ـــــ
_وفي القاهره طلع انس من التدريب بتاعه وكانت جني قاعده مستنيااه وبصلها وابتسم وقال..
انس
ايه رئيك فيا بقي النهارده بقيت جاهز للماتش خلاص..
جني
لا بجد. جامد بص انا صورتك في كل الجوان اللي جيبتها.
انس بحناس
يا متابع انت يا جااامد، بصي استنيني هنا هروح اجيب حاجه نشربها..
جني
طيب يلا عشان نعمل اللي اتفقنا عليه..
انس وهو مدايق
امممم مع اني مش مقتنع بس عشانك هعمل كده..
جني
انس احنا اتفقنا تقول حاضر وبس والا ه..
انس
لا لا خلاص اللي عايزاااه..
_ وراح انس جاب حاجه يشربوها ولما رجع لقاها واقفه مع هادي وبيضحكو واتعصب جدا و؟؟؟.
ــــــ #بقلم_الكاتبه_رحاب_القاضي ــــــ
_ وفي الاسكندريه
كانت سما في السنتر اللي بتدي فيه دروس للطلاب وقاعده بتشرح وبتاكل في فاكهه وقالت..
سما
انت ياللي ورا ركز في اللي بقوله مش في التفاحه..
الولد.
يا ميس سماا انا مش شايفك وانتي قاعده ممكن تقفي..
سما
حامل انا مش هقدر اقف افهم بصوتي مش لازم تشوفي يا تقوم انت تقف..
ودخل واحد عندها وقال
يا ميس سما في واحد بره عايزك…
سما
طيب جايه…
وبصت للاولاد وقالت
هطلع اشوف مين بره وهرجع اللي هسمع نفسه هبلعه واخليه يوانس ابو عبيده جوه…
_ طلعت سما واتقلب وشها لما شافت في وشها محمد اللي قال..
محمد
اهلا بالهانم اللي سابت جوزها ومشيت..
شمرت سما اكمامها وقالت
اهلا واحده بس ده يا مليون اهلا وسهلا…
_قولولي بقي مين اللي خايف علي محمد 🤣🙈
ـــــ #بقلم_الكاتبه_رحاب_القاضي ـــــــ
_ وفي شغل خالد…
كان خالد وسط زمايله اللي بيحتفلو بيه وبالترقيه اللي اخدها وقرب منه مديره وقاله..
المدير
الف مبروك يا حضرة الظابط، انا فخور بيك جدا، لا ده مصر كلها فخوره بيك يا ابني..
خالد بهدوء
ده بفضل تعليمات حضرتك بعد ربنا يا افندم..
المدير
ربنا يوفقك وتوصل للاكتر من كده كمان، هسيبك تحتفل مع زمايلك بقي…
ـ خلص كلامه مع مديره وراح وقف بعيد عن صحابه ورد علي ملك اللي بتكلمه وقال…
خالد
ايه يا ملك زن زن واقف مع المدير كنت..
ملك بحده
كنت بتخوني صح؟..
خالد
يا ربنا بقول واقف مع المدير هخونك مع المدير يعني..
ملك
خلاص خلاص ما تتعصبش كده المهم شوفت وشي حلو عليك ازاي اهو اترقيت..
خالد ابتسم وقال
هو احنا هنستهبل ده انا عارفك من سنه يا ملك..
ملك
نعمم اومال ده وش مين ان شاء الله..
خالد
يا غبيه هو لازم وش اي حد،المهم انا جاي النهارده وهطلب من دكتور بهاء اا….
ملك
وهو ايه بقي معني كلامك ده ان مش شرط وش حد..
خالد
وشك يا ملك يالهوي علي وشك اللي حلو عليا ما شوفتش بعد كده…
ملك
هو انا يعني لازم ازعق، برغم اني كيوت ومش عنيفه خالص…
ضحك خالد اووي وقال
ههههههه تصدقي كنت هصدقك المهم انتي بتعملي ايه.. الو ملك…
ملك بصوت خايف
خ خالد في حد بيكسر الباب الحقني…
_ وفجأه الفون اتقفل، ونزل خالد بسرعه وما ردش علي صحابه اللي قلقو عليه، واول ما ركب عربيته لقي رقم بيرن عليه.. رد بسرعه وقال..
خالد
ايوه مين؟..
فوزي
حبيت اباركلك بطريقتي علي الترقيه اللي كانت علي قفايا يا خالد، بيقولو ملوكه اسم علي مسمي وانا قولت لازم اتأكد بنفسي..
_ قال كلامه وقفل وعيون خالد اتملت دموع من خوفه عليها وراح بسرعه البيت واول ما وصل الشقه طلع مسدسه ودخل لقي الباب مكسور، وفضلت يدور علي ملك وكانت الشقه مكركبه ودخل اوضتها ولقاها فاضيه، اتقبض قلبه وجه يطلع بس اتصدم لما حصل؟…
_تفتكرو حصل ايه؟..
يتبع…..
لقراءة الفصل التالي : اضغط هنا
لقراءة الرواية كاملة اضغط على : (رواية خطيبتي واخواتها التوأم)
