رواية خائفه بدون ذنب الفصل الأول 1 بقلم زينب مجدي
رواية خائفه بدون ذنب الجزء الأول
رواية خائفه بدون ذنب البارت الأول
رواية خائفه بدون ذنب الحلقة الأولى
دي آخر رساله هبعتهالك ولو مردتيش عليا.. هتلاقي صفحه بإسمك وعليها نفس الصورة إللي إنتي حطاها…هيكون عليها صور ورسايل مش كويسه..هتتبعت لجوزك ولولدك واخوكي
….. أنا قرأت الرساله دي من هنا وقلبي وقع في رجليا
في حد بقاله فتره بيبعتلي رسايل. ومصصم إني أكلمه وكل ما أعمل حظر يبعتلي من صفحه تاني
قعدت اعيط أنا حاسه إني وحيده أوي. ..جوزي دايما بيسافر كتير…وده خلا إللي يسوي واللي ما يسواش يبعتلي رسايل زي كده
عملت اسكرين شوت للرساله وبعتها لجوزي
أنا من أول رساله ابعتتلي وأنا بعمل اسكرين شوت وابعت الكلام ده لجوزي…
جوزي قرأ الرساله ورن عليا
سليم… إيه يا سميه الواد ده بعتلك تاني
سميه….. أنا خايفه أوي يا سليم… ممكن بجد يعمل صفحه بإسمي
سليم….متخافيش هو مش هيقدر يعمل حاجه
سميه…. طيب يا سليم اتصرف.. أعمل أي حاجة
سليم…. أعمل إيه يعني ياسميه
سميه…..هو أنا إللي هقولك تعمل إيه
سليم… طيب سلام دلوقتي وأنا هتصرف
قفلت مع جوزي وأنا قاعده بجد خايفه…بس إللي مطمني شويه إن جوزي عارف كل حاجه من أول رساله
شويه ولقيت رساله ابعتتلي تاني
روحتي قولتي لجوزك وخلتيه بعتلي طلب صداقه ماشي متزعليش بقي من إللي حيحصل
.. هو ده اللي قدرت عليه يا سليم بعتله طلب صداقه… أستغفر الله العظيم يا رب…رنيت عليه. ورد عليا
سميه…. إنت رايح تبعتله طلب صداقه يا سليم…بدل ما تدخله تشتمه وتهزأه
سليم… أنا هعملك ايه يعني يا سميه مش إنتي إللي قولتيلي أتصرف
سميه….ما تعملش يا سليم أنا هتصرف هقول لأحمد أخويا ممكن يعرف يتصرف
في الوقت ده وأنا بكلم جوزي جاتلي رساله تاني بس أنا تجاهلتها وكملت المكالمه
سليم….. خلاص ماشي قولي لأحمد ممكن يعرف يتصرف. سلام
…..موقف جوزي ده دايقني أوي…بس تجاهلت شعوري ودخلت شوفت الرسالة..لقيته كاتب
بدل ما إنتي قاعده بتكلمي جوزك كده ردي عليا شوفي أنا عايز منك إيه
….قرأت الرساله…واعصابي تعبت اكتر…قررت ابعت لأخويا
هو ممكن يتصرف…بس لقيته مش فاتح نت… أخويا السنه دي سنويه عامه ومش بيفتح كتير… وأنا خايفه اشغله عن مذكرته…يارب أقوله ولا لأ… سيبت التليفون من ايدي وقومت أجهز غدا لإبني دلوقتي هييجي من الحضانه
قومت جهزت الغدا. وأنا بجد متوتره…مكنتش متخيله إني في يوم من الايام اتحط في موقف زي ده… أنا عمري ما اتكلمت مع شاب… وطول عمري حاطه حدود في التعامل مع أي حد… ليه كده في حد ممكن يدايق أو يأذي حد..ليه الناس تأذي بعضها…. قطع تفكيري حضور إبني من الحضانه وحماتي طلعت معاه..تشوفني أنا منزلتش ليه انهارده
حماتي….منزلتيش يعني انهارده يا سميه
سميه….بطني بتوجعني يا ماما ومقدرتش أنزل
أنا مكدبتش أنا فعلاً لما بتوتر بطني بتوجعني
حماتي….طيب عندك برشام مغص ولا ابعت حد من العيال يجبلك
سميه…. أنا هدخل أشوف برشام عندي جوه…تعالي إنتي أدخلي اتغدي معانا
حماتي…. لأ مش جعانه
سميه….. لا والله لازم تدخلي تتغدي معايا
دخلت حماتي وحطيت الغدا وقعدنا نتكلم شويه في أمور عامه…التوتر إللي عندي خف شويه لما بطلت تفكير في الموضوع…اتغدت حماتي ونزلت تحت… وأنا فكرت مع نفسي وقولت همسح الماسنجر خالص علشان اريح دماغي من وجع الدماغ ده….وبصيت لقيت جاتلي رساله تاني
هو أنا ليه كل ما أكلمك من صفحه تعمليلي حظر
ما تكلميني وشوفي أنا عايز إيه
لو رديتي عليا بالليل هقولك أنا مين… وياريت متعمليش حظر
….. أخدت اسكرين شوت وبعتها لجوزي طبعاً وعملت حظر
سليم….طيب ردي عليه وشوفي هو مين
سميه بصدمه….. طبعاً لأ مش هرد عليه
سليم….ماهو إنتي هتعرفي هو مين ومش هتكلميه تاني
سميه…. طبعاً مش هكلمه…. أفرض إنهم شباب فاضيه وعاملين رهان علشان يشوفو أنا هرد ولا لأ
سليم…. خلاص اعملي إللي إنتي عايزاه
سميه….قولي هو الماسنجر بيتقفل إزاي وأنا هقفله واريح دماغي
سليم.. مش عارف والله قولي لأحمد اخوكي هتلاقيه عارف
سميه… خلاص ماشي أنا هكلمه
قفلت مع جوزي وفتحت واتس لقيت احمد فاتح بعتله ..وبعد السلامات قولتله
لو عايزه أقفل الماسنجر يا أحمد أقفله إزاي
احمد…..هتقفليه ليه في حاجة ولا ايه
فكرت شويه أقوله ولا لأ وبعدين قررت أقوله
في حد كل شويه يبعتلي رسايل ومدايقني
احمد….. رسايل زي إيه
سميه…..استنا أنا عملالها اسكرين شوت هبعتهالك
بدأت ابعتله الرسايل
أول واحده
إيه يا أم سفيان جوزك هنا ولا مسافر. لو سافر ردي عليا نتكلم مع بعض…ونتعرف
تاني رساله
عملتي حظر ليه يا أم سفيان… أنا عايز نتعرف وإنتي كده كده جوزك مسافر… وصدقيني مش هيعرف حاجه
تالت رساله.. كان بعتلي رقم تليفوني.. وبيقولي
مش رقمك ده علشان تعرفي لو عايز اوصلك هوصلك
ردي عليا ومتعمليش حظر تاني
ورسايل تاني كثير أوي
احمد…. ابعتيلي اللينك بتاع الصفحه إللي بعتلك منها
سميه …. أنا مش عارفه أجيب اللينك ده إزاي.. وبعدين أنا عمله حظر
احمد…..فكي الحظر..وادخلي على الصفحة هتلاقي تلت نقط كده علي جمب فوق..دوسي عليهم هتلاقي في كلام تحت دوسي عليه وانسخيه وابعتهولي
سميه…. ماشي..بس إنت هتعمل ايه
احمد…..هشوف واحد بيهكر تليفونات وهروحله وأعرف هو مين ده… وأنا هتصرف
سميه….ماشي..عملت زي ما قالي وقعدت…لقيت جتلي رساله خلتني هموت من الرعب
أنا ساعة بالظبط وهتلاقيني واقف قدام البيت
يتبع…
لقراءة الفصل التالي : اضغط هنا
الرواية كاملة اضغط على : (رواية خائفه بدون ذنب)
