رواية حواديت من الواقع الفصل الأول 1 بقلم ليل السيد

رواية حواديت من الواقع الجزء الأول

رواية حواديت من الواقع البارت الأول

رواية حواديت من الواقع الحلقة الأولى

يابني فرحك بكره علي واحده تانيه غيري فوووق
= اقسم بالله انتي بس قوليلي موافقه وأنا ابوظ كل الي معمول ده بس انتي ردي عليا ابوس ايدك
– زين الي بتعمله دي مينفعش ابدا خلاص كل الي بينا خلص انا كنت بنت عمك ولسه بنت عمك وبس فاهم انا بنت عمك وبس
= أنتي كدااابه انتي اكتر واحده عارفه انا حبيتك قد ايه وعارفه انتي كمان بتحبيني قد ايه
– كنت يزين كنت لكن دلوقتى انت فرحك بكره خلاص وأنا بجهز فستاني الي هحضر بيه فرح ابن عمي زين
= ليلي أنتي السبب في كل ده وانتي عارفه
– زين مراتك كلمتني قبل كده وطلبت مني ابعد عنك خالص بتقولي انا مقدره قربكم لبعض وانك بتعتبريه اخوكي بس زين كل قعدتنا انا وهو مش بيحكي غير عنك زين مثبت شاتك واتساب حاطط wallpaper الفون صورتكم وانتوا صغيرين مش بتتغير حطي نفسك مكاني
انا فعلا لو مكانها مستحيل مشكش ان في حاجه هي عندها حق
= ليلي أنا لسه بحبك انتيا السبب في اني ادخلها حياتي علشان انساكي ومعرفتش بشوفك فيها دايما ليلي وافق ومتظلمناش احنا الاثنين
قالها بصوت منكسر
ليلي وهي تتجه لباب الغرفه
– انا اسفة يازين انت زي اخويا وبس كل الي بينا ده كان ماضي وخلص
جذبها زين من معصمها بقوة ودفع ظهرها علي الحائط وحاصرها بذراعيه واقترب منها كان لا يفصل بينها سوا عدة سنتيمترات لا تذكر وقال بصوت رجولي حاد وعيون كادت تشتعل من الغضب
= أنتي لو موافقتش مش هتكوني لحد غيري حتي لو انا كنت اتجوزت غيرك حطي ده في دماغك علشان كل الي فات عمره ما كان ماضي انتي ناسيه احنا كنا عاملين ازاي سوا
فلاش باااك
زين ابن عمي وأنا ليلي احنا من اصل صعيدي لكن طول حياتي انا وأهلي واحنا في القاهره إنما زين صعيدي وباقى اهلي كده وكل حياتهم في الصعيد بس مش صعيد المسلسلات العبيط ده لا ابدا هما ناس عاديه جدا زينا لكن بيختلفوا في بعض الحاجات البسيطه جدا
– يابابا زين مين الي جاي يبات عندنا النهارده انا بخاف منه بجد ده عمره ما عاملني كويس وكل ما اسافر عندهم يزعق فيا ويتريق علي شعري ده بيقولي اقوله يا ابيه هو عبيط
= معلش يا ليلي جايب تحاليل واشاعات عمك علشان نعرضها علي دكاترة هنا ونطمن عليه اكتر وهيقعد كام يوم المهم بس خليكي كويسه وبطلي عبط
– تمام ينور يبابا
قالت جملتها وهي تتجه لغرفتها متذمره
بعد وقت ليس بطويل سمعت صوت ابي يعلو خارج غرفتي
* حمدلله علي السلامه يحبيبي اتفضل يا أم ليلي زين وصل
^ حمدلله علي السلامه يابني اتفضل عملالك شوية حاجات بتحبها والله هتاكل صوابعك وراها اتفضل ادخل ارتاح وغير ليلي رتبتلك الاوضه وأنا اول ما احط العشاء علي السفره هندهلك
= تسلمي يمرات عمي ربنا يخليكي عن اذنك
* فين الزفته ليلي
^ شكلها نايمه هدخل اشوفها
^ ليلي ليلي منتي صاحيه اهو
ابن عمك وصل روحي سلمي عليه
– انتي مش قولتله يدخل يريح خلاص لما يريح
^ احترمي نفسك يقول انتي مش طيقاه روحي خبطي ولو قالك اتفضل ادخلي بكوباية العصير دي اكيد هفتان من السفر قوليله حمدلله علي السلامه واخرجي جهزي معايا السفره
– يووووه علي شغل الرسميات ده
لملمت شعرها بعشواية بالقلم وعدلت ملابسها الغير منهدبه بالمره وعشوائيه اكثر من شعرها
فين العصير الي هدخله
^ انتي هتخرجي من اوضتك كده بنظرة احتقار
– والله انام ومتشوفوش وشي
^ خلااااص خلاااااص قوووومي منك لله قومي يمعفنه
اخذت العصير وذهبت بغضب اتجاه غرفته فهي غرفة نوم زاده في المنزل بسبب زيارات اهل ابي المتكرره من الوجهه القبلي لأسباب متعدده
طرقت الباب بقدمي نظرا لاني ممسكه بصنية العصير وبعض الكيك بكلتا اليدين بعد وقت اقل من الدقيقه فتح الباب
= اتفضل يعم…
ليلي ازيك كبرتي ماشاء الله اتفضلي
– شكرا يزين ماما بعتالك دول وبتقولك حمدلله علي السلامه سلااام
التفت علي صوت ضحكته مره آخري
انت بتضحك علي ايه
= لسه عبيطه زي منتي
– زين احترم نفسك عيب تقول عني عبيطه انا عندي١٧ سنه دلوقتى وفى ثانويه عامه
= بجد وعامله ايه في الثانويه ياستي وناويه علي ايه
– مش عارفه والله انا عايزاه ايه بس عمك ومراته كالعاده عايزين طب يعني فربنا يسهل
= وليلي عايزاه ايه
– مفكرتش قبل كده دايما عايزاه الي هما عايزينه وبس بكسل افكر في أحلام مش هتعجبهم وفي الاخر مش هحققها
= مش زمان كان نفسك تدخلي هندسه زيي واول ما قدمت فيها وجيبوا علشان تباركولي قولتيلي نفسي ادخل هندسه انا كمان
– ده كنت لسه في ابتدائي احلام عبيطه وخلاص
= عمر أحلامك ما هتكون عبيطه بس انتي حطيها في دماغك لو احتاجتي اي حاجه انا موجود بعرف اشرح علي فكره
– واو بتعرف تشرح فيزيا
= طبعا يابنتي دي لعبتي
– حلو كل كويس بقا علشان ابقى استغلك يلا اشوفك علي الاكل
ضحك ضحكه خفيفه وانا خرجت من غرفته وجهزنا الاكل انا وماما علي السفرة وبعدين بابا نادي عليه كان شكله تعبان وعايز ياكل بسرعه علشان ينام وده الي حصل فعلا
^ شكلك تعبان يابني محتاج تشرب حاجه ولا هتدخل تريح
= شكرا يمرات عمي اه مرهق شوية من السفر والسواقه هدخل اريح علشان نازل بدري للدكتور
* هاجي معاك علشان تكون عارف من دلوقتى
= مفيش داعي يعمي تسيب شغلك انا هروح بكره اطمن واجي اطمنك بنفسي
* شغل ايه يابني بس مش وقته
= والله مفيش داعي صدقني كده كده بابا مش معايا يعني انا هعرض الاشعات علي الدكتور وبس
* تمام يابني ادخل ريح يلا تصبح علي خير ولو احتاجت اي حاجه انا موجود والبيت بيتك
= تسلم يعمي تصبحوا علي خير يجماعه
استيقظت ليلي في اليوم التالي وتناولت فطورها بشكل سريع واستعدت لدورسها
– ماما هتاخر النهارده عندي حصص برايفيت بعد السنتر
^ تمام يحبيبتي ربنا يوفقك سلام
كان يوم طويل للغايه عادت الي البيت في نهايته
دخلت البيت ملقتش حد خالص او تقريبا كل واحد في مكان بس مش في الصاله ناديت بصوت عالي
– ماما انا جيت
^ الاكل عندك يا ليلي في المطبخ
دخلتلها الاوضه
– في حاجه حصلت ولا ايه!!!
^ لا يابنتي زين لسه مرجعش اصلا وبابا بياخد دوش وهينام زين رن عليه قاله ان كل حاجه كويسه بس هو هيتاخر علشان هيقابل صحابه وبس فلما يجي بقا خليكي صاحيه علشان تسمعي الباب لانه مش معاه مفتاح
– تمام يماما تصبحوا علي خير
^ وانتي من اهله حبيبتي
بعد تلات ساعات بالظبط كنت زهقت من المذاكره وقومت أقف في البلكونه شوية
بصيت علي الجنينه بتاعة بيتنا الصغيره لقيت زين قاعد فيها وحاطط ايده الاتنين علي راسه وجسمه بيتهز كده اتخضيت علشان شوفته بيعيط
لبست الجاكت بتاعي واتسحبت وطلعت بهدوء علشان ماما متحسش بيا وتقلق
فتحت الباب وخرجت من البوابة لقيته قاعد ومش حاسس بيا ولا شايفيني كان بيعيط بصوت مسموع
قعدت جنبه بهدوء وحطيت ايدي علي ضهره وبصوت هادي
– انت كويس!!!
جسمه اتنفض بخضه ولقيته قام بسرعه وبيمسح وشه
= اه اه كويس متقلقيش كنت لسه هرن عليكي علشان تفتحي البوابة معلش سهرتك
مسكت ايده قبل ما يتحرك وقولتله تاني
– انت كويس في حلجه حصلت ممكن تحكيلي ومحدش هيعرف وعد
فضل باصصلي شويه وبعدين قعد بقهر تاني فضل ساكت وباصص في اللاشئ وبيتنهد بحزن رددت كلامي مره تاني
– في حاجه حصلت مش كويسه!
= بابا عنده كانسر وحالته متاخره جدا وانا مش عارف اتصرف ازاي ومش عارفه اقولهم ازاي حاسس ان حد ضربني علي ضهري بحديده تقيله اوي قطمهولي انا خايف اخسره ماليش غير انا وامي واخواتي البنات خايف يسبلي كل الحمل ده لوحدي ويمشي هشيل البيت كله لوحدي ازاي هقدر استحمل فراقه اصلا حاسس بالعجز والدكتور حسسني بالعجز اكتر
كنت مصدومه وهو بيتكلم مش عارفه اقول ايه عمو هلال غالي عندي زي بابا بالظبط هو صاحبي مش عمو دايما بيسمعني ودايما بيحب يقعد معايا كنت بعيط وزين بيتكلم وبعدين بصلي وحط ايده علي ضهري
= كل حاجه هتكون كويسه بس انتي ادعيله وادعيلي ياريت محدش يعرف حاجه لحد منا الي اعرفهم
– انا مش مصدقه بجد اكيد في امل لازم يجي هنا ويبدأ علاج وكلنا حواليه اهو
= بابا لو عرف الي عنده مستحيل يوافق ياخد علاج اصلا هيقولك أعذب نفسي ليه انا عندي صحه كده كده الأعمار بيدي الله ليلي ده بيكون عنده دور برد وبيرفض ياخد المضاد الحيوي هياخد كيماوي
قولت بنفي سريع
– اه طبعا هياخد وانا مش هسيبه غير لما يبدأ علاج هو بيحبني مستحيل يسيبني لوحدي ويرفضلي كلام انا هقنعه وهكون دايما معاه ده صاحبي الوحيد مستحيل اسيبه
ابتسم زين
= هو كمان بيحبك اوى يلا علشان الوقت اتأخر والجو برد
– انت كده مكنتش مع صحابك زي ما ماما قالت كنت لوحدك صح
= لا يعنى مش بالظبط كنت بلف بالعربيه بفكر في حل ومش عايز ارجع وعمى صاحى علشان ميتكلمش معايا في تفاصيل
– همم يعني اكيد ماكلتش برضو يلا يعم هتبرع واعملك مكرونه بالوايت صوص مش علشان انت ابن عمي وكده تؤتؤ ده علشان ماما عامله اكل مش بحبه وانا كنت مكسله اعمل اكل لنفسي كنت شايفه الموضوع مش مستاهل
= أنتي طول عمرك يا ليلي مش بتهتمي باكل وتكسلي وتختاري انك تنامي جعانه اسهل
– بس لما الموضوع يكون مرتبط بحد تاني غيري بحس ان لا لازم اكل علشان الحد التاني ده
يلا بس علشان تساعدني
= يلا يا ستي
دخلت المطبخ وهو دخل يغير وبعدين قالي هاجي وراكي
بدأت اظبط واشوف كل الي هنحتاجه
– زين ممكن اسألك سؤال
= اه طبعا
– لما بنسافر البلد في الأعياد والإجازات العيله ماشاء الله مليانه بنات كتير في سني واكبر مني كنت بشوفك بتعاملهم كلهم كويس من واحنا صغيرين وبتعاملني انا وحش جدا وتتعصب عليا دايما وتزعقلي وتتريق علي شعري وشكل انا بجد يا زين كنت بكره اروح البلد بسببك مع اني بحب اوي باقى ولاد عمي وقرايبي بس وصلتني ان اكره البلد واعيط كل مره لبابا علشان منروحش
– = يااه انا وحش اوي كده
وانا بحط اللبن علي الدقيق واقلب علشان اعمل الصوص وهو مركز معايا
– بصراحه انا
= كل الحكايه ياستي اني كنت بضايق منك علشان مش بتحبى تقعدي غير مع الشباب يعني تبقى العيله كلها متجمعه وكل البنات والستات جوا مع بعض وانتي الوحيده الي سيباهم وقاعده معانا احنا بره تهزري مع ده وده يحضنك وده يقولك روحك حلوة يا ليلي وده معرفش ايه ليه متقعديش زي كل بنات العيله جوا ليه متلميش شعرك الي دايما سيباهولى علي ضهرك وعملته وعملاهولي كيرلي وده يلعب فيه وده يقولك حلو وده لايق عليكي ولبسك كان كله عريان وده برضو كان بيضايقني
– علشان انا بحب شباب العيله اكتر كلهم صحابي
وشعري انا بحبه كده مش بحب المه ولبسي انا كنت لسه صغيره مرفوع عني القلم يعني لبسي مش هتحاسب عليه كنت طفله لسه بس انت كنت بتحاسبني
= ايه بحب شباب العيله دي انتي عبيطه
– ايه عبيطه دي والله بجد فعلا بحسهم كلهم اخواتي انا كان نفسي اوي يكون عندي اخوات اكبر مني علي فكره بقا بجد هما كلهم صحابي وبيكلموني دايما حتي عمر ابن عمك محمد كل يوم يكلمني بجد اكتر حد أصيل فيكم كلكم دايما بيسأل عني
= عمر!!! وده بيكلمك يقولك ايه ان شاء الله
– اهو شوفت طريقتك مستفزه ازاي مش هقولك ويلا المكرونة خلصت كل
= مش هتاكلي معايا
– اصل دوقت المكرونه كتير فشبعت
= انتي عبيطه مش هاكل غير لما تاكلي
– يووووه هاكل هاكل كل انت بس
هتعمل ايه في حوار بابا هلال “ده عمي الكبير هلال باباه هو كلنا بنقوله بابا علشان هو أكبر واحد في العيله”
= مش عارف يا ليلي
– اجي معاك البلد طيب علشان اقنعه يجي يسافر معانا تاني هنا ونبدأ العلاج
= ركزي بي انتي السنه دي في دراستك ومتشليش هم انا هعرف اظبط كل حاجه متجي نشوف الفيزيا بتاعتك دي بتقول ايه
– ليه السيره دي بس اغسل الأطباق يلا وانا هروح ادور علي الملخصات ونبقا نذاكر في البراندا
= أطباق!!!! اغسل!!!
– متتاخرش سلام
سيبته ودخلت الاوضه بسرعه علشان اهرب من المواعين اكتر حاجه بكرها في حياتي
بعد وقت مش طويل كنت مستنياه في البرانده
لقيت عامل كوبايتين شاي وجاي واحده بنعناع علشان هو بيحبه وواحده من غير نعناع علشان عارف اني بكرهه
– جدع والله راجل محترم
= الله يكرم اصلك وريني بقا ياستي الي مش فاهمه
كريشووووف في حد مش بيفهم كريشوف ده اسهل حاجه
– طب سهلها يبشمهندس
قعدنا ما يقارب الساعتين يمكن اول مره افهم في حياتي واحس ان الفيزيا فعلا سهله
– شكرا يا زين انا فهمت
= كويس والله يلا روحي نامي علشان الوقت اتأخر
– مش محتاج حاجه انت طيب
= لا لا متقلقيش هدخل انام انا كمان
– تصبح علي خير
= وانتي من أهله
صحيت تاني يوم علي صوت بابا العالي في الصاله وهو بيزعق في زين
^ انت مجنون يزين مجنوون ولا عايز تجنني