رواية حمل غير معلوم المصدر الفصل السابع 7 بقلم منصور سيد
رواية حمل غير معلوم المصدر الجزء السابع
رواية حمل غير معلوم المصدر البارت السابع
رواية حمل غير معلوم المصدر الحلقة السابعة
-مش عارفه سكت ورضيت بكلامه ليه بس اكيد عشان أدي لنفسي فرصه انا كمان عشان اعرف انتقم من خالتى وجوزها لان جه فى بالى فكره تخلينى انتقم منهم الاثنين
وهى انى بعد ما جوز خالتى يقع فى شباكي هطلب منه يطلق خالتى ويتجوزنى وهو يبقى وقتها من وجهة نظره انه كسب ابنه انه يتكتب بأسمه ويكسب ورثه وكمان يبقى كسب حبه ليا
وهشترط عليه انه يطلقها بالثلاثه وهقوله عشان اتطمن انك ماترجعش تطلقنى وترجع ليها
وبعد كده افصح عن اللى فى بالى واللى اتوصلت اليه لما روحت كشفت لانى كنت بشعر بصداع من وقت للتانى بصفه دائمه واللى هتعرفوا اللى اتوصلت ليه من خلال الكشف فى اخر حكايتى
وفعلا اتفقت مع حسام انى هصبر عليه لحد مايخلص اخر ترم له فى الدراسه
وطبعا عرفت اخته باللى حصل واللى ماكنتش مصدقه الا ما شافت جزء من الفيديوهات وكانت هتتجنن وفضلت تسب وتضرب فى اخوها ازاى تعمل كده فى صحبتى اللى جيه تنام معايا عشان خاطرى وكمان وانا نايمه فى السرير اللى جنبها ياسافل ياجبان
وخليت حسام كتب لى ورقه انه هو والد الابن اللى فى بطنى ومضيت اخته كشاهده مقابل انى انتظر لحد ما حسام يشوف حل
وانى ما افضحش الدنيا ويبقى عليا وعلى أعدائي ويعنى هو هيفرق معايا ايه تانى
وفضلت على خطتى مع جوز خالتى لما بقيت اشوف نظرات عنيه ليا وانا رايحه ووانا جايه وبدأ يحاول يمد ايده ويلمسنى وانا طبعا بزود فى ناره من غير ما اديله فرصه انه ينال منى
لحد ما جه لحد عندى وسلمى مش موجوده وقال لى انا حاسس بحبك ليا وانا كمان هموت عليكى وحاول يستغل الموقف ويتهجم عليا وانا كنت عامله حسابي للوقت ده لانى كنت عارفه انه جى جى كنت مخبيه سكينه تحت المخده ورحت مطلعها وقلبت له على الوش التانى
-انت اتجننت ولا ايه انت ناسي انك جوز خالتى اتفضل اطلع بره
جوز خالتى: فى ايه يابت انتى عاوزه تفهميني انك مش عينك منى يعنى ولا انتى بتلعبي ليا ولا ايه بظبط
-نفترض انى عينى منك يبقى معناه انى اسبلك نفسي فى الحرام لا ياحبيبى يبقى فى الحلال
اهو حتى الطفل يتكتب بأسم امه وباسمك
جوز خالتى:خلاص نتجوز فى السر
-انت فاكرنى عيله صغيره هتضحك عليا
جوز خالتى:ليه بس
-انت ناسي ان مراتك دى تبقى خالتى وماينفعش تجمع بنا
جوز خالتى :طب اعمل ايه بقى أدى الله وادى حكمته
-لا من حيث تعمل ايه انا اقولك
جوز خالتى :قولى
-تطلقها وبالثلاثه عشان اضمن انك ماترجعش تطلقنى وترجع ليها
جوز خالتى :ايييييه أطلقها و بالثلاثه وهقول لأهلى ايه وهما عرفوا ان سلمى حامل
-والله انت حر تقول سقطت تقول اللى تقوله دى قصتك انت
وعلى فكره انا لقيت اللى ممكن يتجوزنى وعارف انى حامل وهيكتب الطفل بأسمه كمان يعنى لو موافقتش هيضيع منك كل حاجه الطفل والورث زى مافهمت ان ده اللى خلاك توافق انك تكتب الطفل باسمك وفوق ده كله هتكسبني انا كمان ولا انا ما استهلش
ها قولت ايه
جوز خالتى :لا تتجوزى حد تانى ايه وطفل مين اللى يتكتب بأسمه دا انا كنت اقتلك واقتله
-وانت مالك محموق على الطفل ليه كده انت صدقت انه ابنك بجد هو احنا هنكدب الكدبه ونصدقها ولا ايه
على العموم فكر براحتك واتفضل بقى اخرج من الغرفه عشان عاوزه انام
بص لى وراح واخد نفسه وخارج زى الكلب
وانا فى بالى بقول عشان تبقوا تيجوا على بنات الناس تانى وتستحلوا شرفهم وعرضهم وحياتهم
صحيح انتوا اوتونى فى بيتكم بس ماحفظتوش على الامانه اللى امى امنتكم عليها واستغلتونى كأنى جموسه هتتعشر وتولد عادى
واترميت على السرير وفضلت أبكى على حالى اللى وصلت ليه وعلى نفسي انا ما كنتش كده بس قسوة الناس وسفالتهم هى اللى عملت فيا كده
منهم لله ويارب قدرنى عليهم كلهم
تفتكروا انا كده ظالمه او مفتريه انا مابقتش عارفه الصح ايه والغلط ايه انا ماكنتش كده خالص بس سواء غلط اللى بعمله اوصح انا لازم اخد حقى وحق اللى فى بطنى
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية حمل غير معلوم المصدر)
