رواية حكاية قمر الفصل الرابع والعشرون 24 بقلم هاجر محمود
رواية حكاية قمر البارت الرابع والعشرون
رواية حكاية قمر الجزء الرابع والعشرون
رواية حكاية قمر الحلقة الرابعة والعشرون
نروح لسيف
تاني يوم كان سيف في بيلف على عساكر الخدمة وبعد ما خلص طلع مكتبه واتصل على سالم اللي كان قاعد في بيته فرد عليه وسأله: خير يا سيف؟
سيف: حضرتك عرفت اللي مي وامها عاوزين يعملوه؟
سالم: لا حصل ايه؟
سيف: ناويين يسجنوا فارس بالقانون الجديد
سالم بعصبية: ايه؟ ازاي ده يحصل، انا غلطان اني مسيبتش الكلاب عليهم
سيف: اهدأ يعمي واكيد ليها حل
فسكت سالم شوية لحد ما سيف نادى عليه: حضرتك روحت فين؟
سالم: ها؟ معاك، انا لقيت الحل اقفل انت
سيف: طيب وفارس؟ ابلغه؟
سالم: لا
سيف: حاضر
قفل سالم المكالمة وقام منادي على كبير الحرس اللي جه في ثواني وسأله: امرك يا حج؟
سالم: هاتلي مي وامها دلوقتي
كبير الحرس: تحت امرك
وبعد ما الحارس مشي اتصل بالمحامي، وبدأ يتكلم معاه وبعد مدة سأله: يعني كده تمام؟
المحامي: ايوه
سالم: طيب انا عاوزك تظبط كل حاجه فاهمني طبعا
المحامي: اكيد
سالم: سلام دلوقتي واول ما تجهز بلغني
المحامي: حاضر……
***********************
نروح لقمر
جهزت قمر واخوها جهزوا نفسهم وفضلوا مستنيين چنى لحد ما خبطت عليهم ونزلوا سوا كلهم وركبوا عربية اياد وطلعوا عالمطار وهما في الطريق سألتهم چنى باستغراب: اومال فين طنط نبيلة
قمر: مرضيتش تسيب بابا لوحده
چنى: ممممممم
قمر بحماس: جاهزه للاجازة؟
چنى: اكيد
وطلعت تليفونها واتصلت بجوزها سيف تبلغه مكانهم، وبعد شوية وصلوا المطار وركبوا الطيارة وطلعوا عالغردقة وبعد ساعة ونص وصلوا الفندق ودخلوا قمر وچنى قعدوا في الريسبشن لحد ما اياد استقبل الجروب السياحي وسكنهم وبعد ما خلص مع الجروب راح لقمر فسألته: هنطلع عالاوض ولا ايه؟
اياد باستغراب: اوض ايه؟
چنى: اللي هنقعد فيها مدة الاجازة
قمر: انت محجزتش ولا ايه؟
اياد: لا طبعا حجزت، بس ڤيلا خاصة عالبحر
قمر بمفاجأه: بجد والله؟
اياد: ايوه طبعا عشان تكونوا براحتكم
حضنته قمر وقالت: ربنا يخليك ليا
اياد: يلا عشان نروح هناك
**********
وراحوا كلهم عالڤيلا ولما وصلوا دخلوا يتفرجوا عليها وشاور اياد لكل واحده فيهم على اوضتها، فهمست چنى لقمر: سيف احتمال يجي؟
قمر: اهلا به
وسألت اياد: جوز چنى ينفع يجي؟
اياد: ايوه ما هو اتصل بيا وقالي انه جاي
قمر: لحقتو تكونوا صحاب
اياد: طبعا
چنى: شرف لينا والله انك صاحب سيف
اياد: شكرا، اسيبكم ترتاحوا وهرجع انا الفندق
قمر: ماشي
**************
بعد ما مشي اياد دخلت كل واحده غيرت هدومها ولبسوا حاجات خفيفة ونزلوا قعدوا في الجنينه سوا، فبصت چنى لقمر وقالتها: على فكرة انا مش مقتنعه بالكلام اللي قولتيه امبارح
قمر: كلام ايه؟
چنى: اللي قولتيه عن فارس
قمر: تاني يا چنى، اقفلي بقا الموضوع ده
چنى: انا مش فهماكي بصراحة، في حد يجيله فرصه انه ينتقم من حد اذاه ويضيعها
قمر: انا مش عاوزه انتقم منه
چنى: افهم ليه؟
قمر: الدنيا هي اللي تجيبلي حقي احسن
چنى: مش فاهمه
قمر: ماهو الانتقام بيجرح القلب زياده مش بيشفيه زي ما انت فاكرة، مجرد ما تبدأي في الانتقام مش هتشبعي ونفسك هتسيطر عليكي وتفضل توسوسلك، كمان بيبقا مفيش مكاسب كتيرة فيه، بالعكس بتندمي، لكن لما الدنيا تدور وحقك يجيلك لحد عندك ده احسن وانتي بترتاحي، خصوصا لو لقيتي الشخص ده بيترجاكي تسامحيه
چنى: عندك حق، تعرفي انا ساعات بتعلم منك
قمر: بتتعلمي ايه؟
چنى: التسليم والتوكل على الله، القلب الابيض والطيبة
ضحكت قمر وقالت: مش دايما طيبه ساعات بكون شريره
چنى: متعرفيش، حتى شرك مش بيأذي بالعكس بيعلم
اتنهدت قمر وسألتها: تفتكري؟
چنى: طبعا والدليل معاذ
نفخت قمر بضيق وقالت: والنبي ما تيجبي سيرته، احسن الاقيه بي
وقطع كلامهم رنة تليفون قمر فبصت فيه لقته معاذ، فقالت لچنى: اهو لسه بقولك ايه؟
چنى: طيب ما تردي عليه، وحاولي تديله فرصه
قفلت قمر تليفونها وقالت بحزن: مش قادرة، مبقاش عندي طاقة لحد ولا مشاعر، فارس اخد كل حاجه ومشي ودي غلطتي
قامت چنى وشدتها من ايدها وقالت: لا لا فوقي كده بلاش حزن احنا جايين نفرفش، قومي ننزل البحر
قمر: على رأيك، يلا بينا
وفجأه سمعوا صوت بيسأل: على فين منك ليها؟……
******************
نروح لفارس
كان قاعد في مكتبه سرحان في اللي بيحصله الفترة الاخيرة وقمر مراحتش من باله، وفجأه دخل عليه سيف وسأله: مالك يا فارس؟
مردش عليه، فنادى سيف عليه: فيري، يا فيري
فارس: يلعن ابو الاسم ده
سيف: سرحان في ايه كده؟
نفخ فارس بضيق وقال: في اللي بيحصلي الفترة دي
سيف: ايه حصل تاني؟
فارس: ابدا مفيش الترقية ضاعت، والسفرية اتلغت وحالي واقف، وابويا غضبان عليا ومي عاوزه تسجني، وقمر مش لاقيها خالص
سيف باستغراب: وانت عاوز قمر ليه؟
فارس: حاسس ان اللي بيحصلي ده كله بسبب اني كنت ندل معاها
ابتسم سيف وسأله: تفتكر؟ وعاوز ايه برضه؟
فارس: اعتذرلها
سكت سيف مردش عليه فبصله فارس وسأله: في ايه؟
سيف: مفيش
فارس: طيب ما تقول رأيك؟
فكر سيف شوية وقال: انا عاوز اكل، تيجي معايا؟
فارس: شوف انا بقولك ايه وانت بتقولي ايه؟ روح كُل انا مليش نفس
سيف: براحتك
خرج سيف وفجأه رن تليفون فارس برقم نادين (بنت عمه واخته في الرضاعة) فاستغرب ورد عليها واول ما ردت عليه قالت: الحقني يا فارس
استغرب فارس من نبرة صوتها وسألها: في ايه؟
عيطت نادين وقالتله: خطيبي سابني وبيتهمني في عرضي
فارس: ايه؟، طيب اهدي وفهميني اللي حصل
نادين بعياط: الحيوان بيقول عني مش بنت بنوت
سكت فارس وفجأه افتكر قمر يوم ما رماها في شرفها، واهو بيحصل مع اخته، اما نادين فصوت عياطها زاد فسألها فارس: ايه السبب؟
بدأت نادين تشرح لفارس علاقتها بخطيبها بالتفصيل وبعد ما خلصت قالتله: انا محتاجالك محدش يعرف حاجه من دي
فارس: وانا هتصرف معاه، متقلقيش…….
*******************
نروح لسيف
خرج من مكتب فارس وراح المبيت وغير هدومه ونزل عالجراچ وساق عربيته للغردقة، وبعد ساعتين ونص وصل الڤيلا اللي قاعدين فيها چنى وقمر ودخل يدور عليهم لحد ما لقاهم قاعدين في الجنينه بيتكلموا فوقف وسمع كلامهم ولما لقاهم نازلين البحر قال: على فين منك ليها؟
بصو الاتنين وراهم لقوا سيف واقف مربع ايديه والشرار هيطق منهم، فقالت قمر: كنا هننزل البحر
بص سيف لچنى وسألها: صح الكلام ده؟
چنى: ايوه، ده شط خاص
سيف بغيرة: وحياة امك
چنى: اهدا يا سيف
سيف: هي كلمة مفيش نزول بحر، عندكم البسين مقفول انزلوا فيه
بصت چنى لقمر وسألتها: ايه رأيك؟
قمر: سيف عنده حق
چنى: ماشي
سيف: ادخلوا انتو عقبال ما اجيب اكل واكلم اياد ونيجي
چنى: ماشي
ودخلت قمر وچنى البسين واتصل سيف باياد واتقابلوا سوا واشتروا اكل ورجعوا قضوا اليوم كلهم مع بعض…
********************
نرجع لسالم
بعد ساعة وصل المحامي وقعد مع الحج سالم في التراس وفضلوا يتكلموا، وبعد شوية دخل الحارس ومعاه سهام ومي واول ما شافهم قال: اهلا اهلا اتفضلوا
سهام باستغراب: ايه الترحيب ده كله؟
ودخلوا يقعدوا مع الحج سالم والمحامي واول ما قعدوا قال سالم: تاخدوا كام؟
سهام باستعباط: كام ايه، واحنا هنا ليه اصلا؟
الحج سالم: خمسين الف كويس؟
مي بابتسامة: مش قليلين شوية على مستقبل ابنك
الحج سالم: اومال عاوزين كام وتتنازلوا؟
سهام: قدر تتقدر
الحج سالم: ماشي، بس بشرط
مي: ايه؟
الحج سالم: تمضي عالورقة دي
مسكت مي الورقه وسألته: ايه دي؟
المحامي: تنازل عن المحضر
بصتلها سهام وهزت راسها بالموافقة وبعد ما مي مضت عالورقة اخدها المحامي منها والحج سالم ناولهم شنطة مقفوله وقال: حلال عليكم اللي فيها
سهام بفضول: كام؟
الحج سالم: لما تروحوا عدوهم، المهم اني مسمعش سيرتكم تاني
مي: ولا كأنك شوفتنا وكده خلاص
فامر الحج سالم الحارس يوصلهم بس سهام قالت: لا احنا هنمشي
الحج سالم: بس مي لازم تروح مع المحامي عشان يخلصوا الاجراءات في القسم
سهام: ماشي
ورجعت سهام بيتها ومعاها شنطة الفلوس، اما مي فراحت مع المحامي واتنازلت عن المحضر وكل حاجه بقت كويسه، ورجع المحامي بعد ساعة للحج سالم فسأله: عملت ايه؟
المحامي: كله تمام اتنازلت خلاص
الحج سالم: حلو اوي، تعالى نتغدى بقا
وبعد الغدا بص المحامي في الساعة وقال: تقدر تنفذ اللي اتفقنا عليه
مسك الحج سالم تليفونه واتصل بالبوليس وقال: انا عاوز ابلغ عن سرقة حصلت في بيتي واسمي سالم المصري…….
*****************
نروح لسهام ومي
دخلت سهام بيتها بشنطة الفلوس وهي فرحانه وحطتها قدامها شوية وفضلت باصلها كده بابتسامة انتصار وبعد شوية حضرت مي ودخلت قعدت قدام امها فسألتها: عملتي ايه؟
مي: اتنازلت خلاص
وفتحت تليفونها وبدأت تلعب فيه، فسألتها سهام: بتكلمي مين؟
مي: ها، لا ولا حاجه
وقفلت تليفونها وبعدين بصت لامها وللشنطة وهي بتقول: مش هنعد الفلوس بقا ولا ايه؟
وقامت فتحت الشنطة واول ما فتحتها لقت فيها عُقد الماظ محطوط فوق الفلوس، فسألت امها: ايه ده؟
سهام: معرفش، بس سالم قال حلال علينا اللي في الشنطة
وفجأه سمعوا خبط جامد على الباب فراحت مي تفتح واول ما فتحت لقت ضابط شرطة ومعاه شوية عساكر، فسألته: خير يا حضرة الضابط
ضابط الشرطة: معانا امر بتفتيش الشقة ودخل هو والعساكر وبدأوا يفتشوا الشقة…….
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية حكاية قمر)
