رواية حكاية قمر الفصل الثامن عشر 18 بقلم هاجر محمود
رواية حكاية قمر البارت الثامن عشر
رواية حكاية قمر الجزء الثامن عشر
رواية حكاية قمر الحلقة الثامنة عشر
تاني يوم الصبح وصلت اخت فارس تحت بيتها فلقت عربية فارس مركونه، فرنت على فارس تشوفه فين واول ما رد عليها سألته بخضه: انت فين؟
فارس وهو بيتاوب: في العربية
فريدة: العربية قدامي اهي مقفوله مفهاش حد
فتح فارس باب العربية ونزل منها وراح لأخته، واول ما شافت حالته اتخضت وجريت عليه حضنته وسألته: انت كويس؟ ايه اللي حصل؟
فارس: ابويا رفض يدخلني البيت
فريده: ايه السبب؟
فارس: معرفش، انا تعبان اوي وعاوز انام
فريده: طيب تعالى نطلع ترتاح شوية
وندهت على جوزها راشد يشيل شنطة فارس وطلعوا كلهم شقتها واخد فارس شنطة هدومه من جوز اخته وشكره، ودخل اوضة صغيرة غير هدومه واخته غيرتله على جرح دماغه ودراعه ونام، اما فريده فاتصلت بأبوها وقالتله ان فارس عندها
الحج سالم بلهفه: وهو عامل ايه؟
فريده: تعبان اوي ودخل ينام، بعد ما غيرتله على جرح دماغه ودراعه
الحج سالم بخضه: والجروح دي عامله ايه دلوقتي؟
فريدة: احسن الحمدلله
الحج سالم: الحمدلله، وكان بايت فين البيه؟
فريده: في عربيته تحت بيتي
الحج سالم: طيب بيتيه عندك يوم واحد ويمشي
فريده: ازاي بس يا بابا، ميهونش عليا
الحج سالم: اديني جوزك افهمه وهو هيتصرف
فريده: حاضر
وندهت على جوزها يكلم ابوها وبعد شويه خلص مكالمة وقفل معاه…..
*********************
نروح لسيف
تاني يوم الصبح صحي هو ومراته وفطروا ودخلت چنى المطبخ ووقفت تفكر هتعمل ايه غدا لحد ما لقت سيف داخل عليها بيسألها: مالك؟
چنى: محتاره اعمل غدا ايه عشان العزومه دي
سيف بابتسامة: ولا يهمك، نجيب اكل من بره المهم راحتك انتي
حضنته چنى وقالت: ربنا يخليك ليا
سيف: اعملي انتي بقا الحلويات وانا هنزل اجيب الاكل
چنى: طيب هتجيب ايه؟
سيف: اللي هتقولي عليه هجيبه
فراحت جابت ورقة وكتبت الطلبات وبعد ما خلصت ناولتها لسيف وهي بتقول: اهي الطلبات كلها
اخد سيف الورقة منها وقراها وقال: عينيا
ونزل يجيب الحاجات وهو في مطعم الاكل لقى الحج سالم بيتصل به وحكاله عاللي حصل فاستغرب سيف وسأله: طيب وايه غرضك؟
الحج سالم: عشان يتأدب
سيف: طيب ما كنت واجهته وخلاص
الحج سالم: مش هتجيب نتيجه معاه في الاول، لازم اخليه يحس باللي عمله في البنت دي
سيف: عندك حق
الحج سالم: المهم متنساش اللي طلبته منك
سيف: على بليل اكون بعتلك كل حاجه
الحج سالم: ماشي، سلام
سيف: سلام
وبعد ساعتين رجع سيف البيت بالغدا وباقي الطلبات، وقعد هو وچنى يستنوا الضيوف لحد ما الساعة دقت ٤ بعد العصر جرس الباب رن ففتح سيف ورحب بالضيوف وقعدوا يتكلموا لحد ما الغدا يجهز عالسُفرة
سيف: يعني اياد عنده شركة لوحده؟
طارق: لا بيشتغل معايا في شركتي
سيف: وايه نوع البيزنس بتاعها
طارق: مقسوم نصين
سيف باستغراب: ازاي؟
فكمل اياد: يعني بنشتغل في نوعين بيزنس
سيف بقلق: اللي هما؟؟
ضحك اياد وقال: سياحة وتجاره
سيف بارتياح: خضتني يا شيخ، بس اللي اعرفه انك دكتور في الجامعه يا اياد
اياد: والدي فتح فرع التجارة وبدأ يتاجر في الخشب، ولما طلبني معاه رفضت اشتغل ف نفس المجال واشتغلت في مجالي وفتحت مكتب صغير في السياحة جنب شغلي ف الجامعة وواحده واحده كبر ودمجنا الشركتين سوا وسيبت شغل الجامعة
سيف: هايل، على كده بقا اسمها ايه؟
اياد: على اسم والدي، شركة الطارق للسياحة والتجارة
وبدأ سيف يتكلم عن نفسه وبعد شويه ندهت چنى عليهم عشان الغدا وقاموا كلهم يتغدوا وبعد الغدا قعدوا كلهم مع بعض وبدأ سيف يتكلم معاهم كلهم، لحد ما الساعة دقت ٧ ونص واستأذنت عيلة طارق يمشوا وبعد ما مشيوا مسك سيف تليفونه وبعت رسايل كتير للحج سالم وقفل الفون ودخل يساعد چنى في ترتيب البيت وبعد ما خلصوا دخلوا يناموا عشان السفر
***************
وتاني يوم الصبح نزل هو وچنى راحوا لاهلها زيارة لاهلها وبعد الزيارة طلعوا عالمطار عشان يسافروا الاقصر ومر يومين وهما مبسوطين هناك وفي اليوم التالت اتصل فارس بسيف………
*****************
نرجع لفارس في بيت اخته فريدة
صحي فارس بعد المغرب وفضل نايم على السرير بيفكر في تصرفات ابوه معاه لحد ما قام غسل وشه ورجع الاوضة تاني وولع سجارة وفضل واقف في البلكونه بيفكر فدخلت عليه فريده وسألته: انت صحيت امتى؟
فارس: من شوية
فريدة: طيب هجبلك تاكل لان شكلك ماكلتش من امبارح
فارس: مليش نفس
ورمى السيجارة وسألها: انتي كلمتي بابا؟
فريدة: ايوه
فارس: وقالك سبب تصرفاته معايا؟
فريدة: لا، مش هتاكل بقا
سكت فارس ففهمت فريدة انه مكسوف فراحت تجيب له اكل
*********
في الوقت ده دخلوا عليه ولاد اخته صبا وفارس وهما فرحانين وجريوا عليه، واول ما شافهم فارس نزل لمستواهم وحضنهم بفرحة وقعد عالكرسي ورفع صبا تقعد على رجله وطبع بوسه على جبهتها فسأله فارس الصغير بغيرة: وانا يا خالو؟
فارس: وانت يا حبيب خالو
وباسه هو كمان وفضل يلاعبهم لحد ما فريده جابلته الاكل وقعد ياكل والولاد ياكلوا معاه وفريده جنبهم مكسوفه من ولادها فبصلها فارس وقال: سيبيهم براحتهم
فريدة: طيب كفاية كده ويلا عشان تناموا
فردوا الولاد بطاعة: حاضر يا ماما
وكل واحد فيهم حضن فارس وراحوا اوضهم وناموا، وسالته فريده صينية الاكل وبعد شوية رجعت بكوباية قهوة لفارس وناولتهاله وهي بتقول بهزار: انت عكس الناس، هما شاي بعد الغدا، انت قهوة
فارس بهزار: مش مهم، المهم اللي يريحني
فسكتت فريدة فبصلها فارس وسألها: مالك؟
فريدة بكدب: مفيش
فارس: وبعدين
وفجأه دخل جوزها راشد عليهم وهو بيشاور على فارس وبيتكلم بعصبية: النهارده اخر ليلة تبات فيها هنا
بصله فارس باستغراب وسأله: ليه؟
راشد: هو كده
بص فارس لاخته اللي حطت وشها ف الارض بكسوف ومتكلمتش فرجع بص لراشد وقال: وعلى ايه انا همشي دلوقتي احسن
وقام من مكانه فقال راشد وهو بيرجعه على كرسيه: انا قولت هتبات النهارده بس
وشد فريدة من ايدها وخرجوا من اوضة فارس وراحوا لاوضتهم فسألته فريدة وهي بتعيط: ليه عملت كده؟
راشد وهو مكسوف من اللي عمله: والدك امرني
فريدة: ايه السبب
راشد: معرفش
وحضنها وطبطب عليها وقال: حقك عليا والله غصب عني
اما فارس ففضل قاعد في البلكونه بيفكر لحد ما النوم غلبه واول ما الصبح طلع صحي وغير هدومه واخد شنطته ومشي قبل ما حد يصحي…….
*************************
نروح للحج سالم
بعد ما وصتله رسايل سيف فضل يفكر هيعمل ايه لحد ما سمع آذان الفجر فقام اتوضى وصلى وقعد يقرا قرآن لحد ما النوم غلبه، وتاني يوم الصبح قام الحج سالم واتصل ببنته التانية سلمى يسأل عليها فردت عليه وبلغته اخبارها فقال: انا عايزك تيجي عندي النهارده
سلمى بطاعة: حاضر ده حتى الولاد هيفرحوا اوي
الحج سالم: يلا مستنيكي
وقفل المكالمة وبعد شوية اتصل بالسكرتير بتاعه ف الشركة وقال بشده: اجمعلي كل المعلومات عن شركة الطارق للسياحة والتجارة واصحابها كمان
السكرتير: تحت امرك
الحج سالم: قدامك يومين والمعلومات تكون عندي
السكرتير: حاضر
وبعد ما خلص مكالمة اتصل بالبنك……
*****************
نروح لفارس
نزل فارس ركب عربيته وفضل يلف بيها مش عارف يعمل ايه ولا فاهم ايه اللي بيحصل معاه، لحد ما وقف في بنزينه يمون العربية ونزل دخل الكافيه اللي فيها يفطر ويشرب حاجه، وهو قاعد لقى فريده بتتصل به فرد عليها فسألته بلهفه: انت فين؟
فارس: مشيت زي ما جوزك قال
فريدة: انا اسفه اوي يا فارس
وبدأوا يتكلموا ويفكروا مع بعض في تصرفات ابوهم لحد ما فريدة قالت: طيب روح لسلمى
فارس: مش عاوز اتقل عليها
فريدة: ده واجب علينا كلنا انت هتبقا ضهر لينا بعد ابونا
سكت فارس شوية وقال: طيب هكلمها
فريدة: خلي بالك من نفسك
فارس: حاضر، مع السلامة
فريدة: مع السلامة
وقفل معاها وخلص حاجته وقام مشي
**********
وهو في العربية اتصل بسلمى اخته كذا مرة بس مردتش عليه فاتصل بيها لاخر مرة فردت عليه، وبعد السلامات قالها: انا هاجي ابات عندك النهارده
سلمى: بس انا مش في البيت
فارس: اومال فين؟
سلمى: عند بابا لسه واصلة عنده، ما تيجي
فارس: مش راضي يدخلني البيت وكمان قفل شقتي
سلمى: ليه كل ده؟
فارس: انا لحد دلوقتي معرفش، اسأليه
في الوقت ده كان الحج سالم معدي من قدام اوضة سلمى وسمعها وهي بتتكلم مع فارس فخبط عالباب ودخل فسألها: بتكلمي مين؟
سلمى: ده فارس يا بابا
وفتحت السبيكر بتاع التليفون وقالت لفارس: بابا اهو
بصلها سالم بغضب ومردش
فنادى فارس عليه وسأله: بابا انا مش فاهم حاجه انا عملت ايه لده كله؟
الحج سالم: راجع نفسك وانت تعرف
وسابهم وخرج قبل ما يسمع رد فارس، فاستغربت سلمى من رد ابوها وقالت لفارس: انت شكلك عامل مصيبه
فارس: انا مش فاهم
سلمى: طيب هتعمل ايه؟
فارس: هروح اقعد ف اوتيل بقا وربنا يحلها
سلمى: طيب خلي بالك من نفسك
قفل معاها وطلع على اوتيل وحجز فيه يومين وطلع اوضته واخد دش وطلب ممرض عشان يغيرله على جرح ذراعه ودماغه وبعد ما خلص حاول ينام بس معرفش فضل يفكر، ومر اليومين وهو في الحاله دي وفي اليوم التالت نزل يتمشى ف الجنينه وهو طالع نده عليه فرد الريسبشن، فراحله فارس وسأله: في ايه؟
موظف الريسبشن: مدة الاقامة خلصت، حضرتك هتجدد ولا هتمشي
فارس: لا هجدد، جدد ٣ ايام كمان
موظف الريسبشن: طيب حضرتك عارف الدفع مسبق
فخرج فارس كارت الفيزا من جيبه وناولها للموظف، فاخذها الموظف ودخلها عالمكنه بس قال: الكارت مش شغال
فارس: يعني ايه؟
موظف الريسبشن: البنك وقف حسابك……..
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية حكاية قمر)
