رواية حكاية قمر الفصل التاسع والعشرون 29 بقلم هاجر محمود
رواية حكاية قمر البارت التاسع والعشرون
رواية حكاية قمر الجزء التاسع والعشرون
رواية حكاية قمر الحلقة التاسعة والعشرون
نروح لفارس
عدى يومين بعد المقابله وفارس حالته زي ماهي راقد في سريره ورافض الاكل والدكتور جنبه بيتابعه وابوه وسيف بيتحايلوا عليه ياكل وهو رافض، واليوم التالت دخل الدكتور لفارس بنتيجة تحليل نسبة الانيميا: عامل ايه دلوقتي؟
مردش فارس عليه وغمض عينيه، فنادى الدكتور عالحج سالم وسأله: هو اكل ولا لا؟
الحج سالم: رافض ياكل
زعق الدكتور في فارس: انت عاوز تموت نفسك؟
وناول الدكتور نتيجه التحليل وقال للحج سالم: اتفضل، اقرأ ده منظر
الحج سالم بقلة حيله: حاولنا معاه انا وسيف كذا مرة ورافض
فطلع الدكتور محلول حديد وعلقه وركب كانيولا في دراع فارس وقال: طيب وبعدين؟ هتفضل كده هاتوا الاكل اللي وصفتهوله
فارس بتعب: مش عايز
الدكتور بزعيق: هاتو الاكل
دخل سيف بصينيه الاكل وحطها قدام فارس و وقعد ابوه والدكتور جنبه وبدأوا يأكلوه بالعافية، لحد ما خلص اكل وخرج ابوه من اوضته فلقى سيف بيتكلم ف الفون واول ما شافه شايل الصينيه قفل المكالمة وراحله اخدها منه فسأله سالم: كنت بتكلم مين؟
سيف: مراتي
فقد سالم على كرسي بتعب اما سيف فراح دخل الصينيه المطبخ ورجع فقاله سالم: شكرا يابني انك واقف معانا
سيف: ده صاحب عمري
سالم: متعرفش حاجه عن قمر؟
اتنهد سيف وحكاله عن حالتها فرد سالم: ادي اخرة العند بينهم
وفجأه رن تليفون فارس فرفعه سالم يشوف مين وحطه مكانه تاني فسأله سيف: ليه مردتش؟
سالم: دي نادين
رن تليفون فارس تاني ففكر سيف شوية وقال: رد عليها وقولها على حالة فارس، يمكن تقدر تعمل حاجه
سالم: تفتكر؟
سيف: هما صحاب اوي ويمكن وقوفها جنبه يخليه يخف بسرعة
سالم: ياريت
ورد على التليفون وشرح لنادين حالة فارس فردت عليه: انا جايه حالا لازم اكون جنبه
سالم: طيب يا بنتي
في الوقت ده كان فارس بدأ يتكلم مع الدكتور شوية بشوية فرد الدكتور: الحالة النفسيه الكويسه شرط اساسي عشان تقوم بالسلامة
فارس بتعب: طيب انا عاوزك… في طلب شخصي… بس محدش يعرفه غيرك
الدكتور: اتفضل
فارس وهو بياخد نفسه: عاوزك ترشحلي احسن دكتور نفسي… عشان ابدا علاج معاه
الدكتور: بكرة يكون عندك
فارس بتعب: شكرا
وبص للمحلول اللي في ايده وسأله: هو لسه كتير
الدكتور: هانت خلاص
وبعد ما المحلول خلص شال الدكتور الكانيولا من دراع فارس وقال: تقدر تنام دلوقتي
فارس: شكرا
وخرج الدكتور بعد ما فارس نام ومشي وبعد ٣ساعات كانت نادين عند فارس في البيت…….
***********************
نروح لقمر
عدى يومين وهي في اوضتها راقده في سريرها رافضه الكلام مع حد ولا بتاكل ولا بتشرب يدوب تصحى شوية وتنام تاني وچنى ونبيلة جنبها لحد اليوم التالت صحيت قمر وندهت على امها بتعب، فقامت نبيلة من عالكرسي اللي قدام سريرها وراحتلها وملست على شعرها وسألتها: ايه يا حببتي؟
قمر بتعب: عاوزه اقوم
نبيلة: على فين؟
حاولت قمر تقوم لوحدها بس معرفتش فندهت نبيلة على چنى وسندوها سوا ونزلت قمر من السرير ومع اول خطوة ليها اغمى عليها، فندهت نبيلة على طارق اللي دخل الاوضة بسرعة وسأل: في ايه؟
نبيلة: كلم دكتور بسرعة
وبعد عشر دقايق وصل الدكتور ودخل يكشف على قمر وبعد ما خلص كشف سألته نبيلة: خير يا دكتور
چنى: لحظه يا دكتور قبل ما تقول قرارك، قمر عندها انهيار عصبي
الدكتور: اااااه لا لازم كده تنتقل مستشفى بدل ما تموت نفسها
نبيلة بخضه: تموت نفسها؟
الدكتور: طبعا مريض الانهيار العصبي بيشوف ان حياته ملهاش لازمه وهيحاول يخلص منها بأي شكل عشان كده المستشفى مكان افضل ليها وتكون تحت الملاحظه لحد ما تخف
نبيلة: وليه مقدرتش تقف على رجليها
الدكتور: طبيعي، جسمها رافض لاي امر من عقلها لان حالتها النفسيه رافضه العيشه
وفتح الدكتور تليفونه وقال: انا هتصل بمستشفى نفسيه كويسه جدا عشان تتنقل فيها
وخرج من الاوضه واتكلم مع طارق وبعد دقايق دخل طارق لاوضه قمر وقال لنبيلة: غيري هدوم قمر عشان تروح المستشفى، اياد جاي
فبدأت نبيله بمساعدة چنى يغيروا لقمر هدومها وبعد ما خلصوا شالها اياد ونزل بيها عالعربية وطلعوا كلهم عالمستشفى…..
******************
نروح لنادين
كانت نادين قاعده في اوضتها بتفكر في المصيبه اللي حصلتلها من خطيبها وبتفكر ازاي تخلي فارس يتجوزها بسرعة لحد ما دخلت عليها امها ناهد وسألتها: بتفكري ف ايه؟
نادين: في فارس، خايفه منه
ناهد: ليه؟
نادين: خايفه يعرف اني كذبت عليه
ناهد: طيب والعمل
نادين: مش عارفه، انا هتصل اشوفه عمل ايه مع قمر
وبعد ما اتصلت بفارس ورد عليها الحج سالم وبلغها بإن فارس تعبان فقالت: انا جايه، لازم اكون جنبه
وقفلت السكه وبصت لأمها فسألتها ناهد: ماله فارس؟
نادين: تعبان
ناهد بخبث: طيب ماهي فرصتك تكوني جنبه
نادين: ده واجبي بحكم القرابه والصداقه اللي بينا
ناهد: برضه مش فاهمه
نادين: فهميني طيب
ناهد: هتكوني جنبه كحبيبه كمان، لانه في وقت يائس محتاج حد يسمعه، يهتم به، يشجعه يقوم وده دورك
نادين: عندك حق، انا هحضر شنطتي واسافرله
ناهد: ماشي
وسابتها وخرجت وبعد نص ساعة كانت نادين حضرت شنطتها وفي طريقها للقاهرة، وبعد ٣ ساعات وصلت نادين قدام شقة فارس ورنت الجرس ففتحلها الحج سالم الباب ورحب بيها فسألته بلهفة: فارس عامل ايه؟
الحج سالم: الحمدلله
نادين: عاوزه اشوفه
نده الحج سالم على سيف وقاله يدخل يصحي فارس، فدخل سيف اوضة فارس وصحاه وهو بيقوله: اصحى في ضيوف
صحي فارس وسأل بتعب: مين؟
ناوله سيف تيشرت يلبسه وقال: بنت عمك
لبس فارس التيشيرت وقال بتعب: دخلها
دخلت نادين لفارس واول ما شافت شكله وهو عيان صعب عليها وقعدت جنبه على كرسي فقال سيف: هسيبكم بقا
ولما خرج سيف بدأوا يتكلموا سوا……..
************************
نرجع لقمر
بعد ما اتنقلت للمستشفى عدى كذا يوم وهي هناك وحالتها بدأت تتحسن واهلها وچنى معاها وسيف كل شويه يروح يطمن عليها ويبلغ چنى اخبار فارس، وفي يوم كانت نبيلة في البيت ساعة ما سمعت صوت تليفون قمر بيرن برقم أمل فردت عليها فسألتها: هي قمر فين؟ مش بتيجي ليه؟
نبيلة بحزن: قمر في مستشفى**** جالها انهيار عصبي
أمل بخضه: يا خبر، سلامتها، ممكن اجي اطمن عليها؟
نبيلة: طبعا
أمل: هجيلها النهارده
وقفلت معاها وراحت قمر تحضر باقي المحاضرات في الكُلية
***********
وعالساعة ٤ كانت أمل خلصت محاضرات وخرجت من المدرج عشان ترجع البيت وهي ماشيه من ناحية جراچ الكُلية وقفها صوت دكتور أنس وهو بينادي عليها فلفت أمل لدكتور أنس لقيته بيقرب عليها بعربيته ووقف قدامها ونزل منها وسألها باستغراب: هي قمر فين؟ مش بتيجي ليه؟
أمل بحزن: قمر تعبانه اوي
دكتور أنس بلهفة وخوف: تعبانه مالها ايه اللي حصل؟
أمل: جالها انهيار عصبي من كام يوم واتنقلت مستشفى*****
دكتور أنس: مسموح بالزيارة
أمل: ايوه انا هروحلها النهارده
دكتور أنس بسرعة: انا هاجي معاكي، اتصلي بزياد وقوليله
اتصلت أمل بزياد وقالتله عاللي حصل فقال: استنوا انا هاجي معاكم برضه
وبعد دقايق كان زياد واقف قدامهم بعربيته فركبت أمل معاه وركب أنس عربيته وراحوا كلهم يزوروا قمر
***********
وبعد دقايق وصل زياد وأمل وأنس المستشفى وطلبوا أذن بالزيارة وطلعوا لأوضة قمر وفتحتلهم نبيلة ودخلوا قعدوا كلهم في صالون الجناح واتعرفوا على بعض فسألها أنس: انسه قمر عامله ايه؟
نبيلة: الحمدلله احسن
أنس: طيب ممكن نشوفها؟
نبيلة: ثواني اناديها
ودخلت نبيلة اوضة قمر فلقتها قاعدة ساكته فندهت عليها فلفت قمر ليها من غير كلام فقالتلها نبيلة: عندنا ضيوف
سألتها قمر بتعب: مين؟
نبيلة: أمل وزياد وواحد اسمه أنس
استغربت قمر لما سمعت باسم أنس وسألت نفسها: ايه اللي جابه؟
فقالت نبيلة: يلا عشان تقابليهم
فقامت قمر سندت عليها ولبست طرحتها ودخلت الصالون وقعدت معاهم فسالتها أمل: عامله ايه؟
قمر بتعب: الحمدلله
وبصت لنبيلة وسألتها: ممكن عصير ليا وللضيوف يا ماما؟
نبيلة بابتسامة: حاضر
وبعد ما نبيلة مشيت قعدوا كلهم يتكلموا مع قمر ويضحكوها فقال أنس: متقعديش هنا كتير
أمل: ايوه صح، الامتحانات قربت
قمر: هأجل الترِم ده مش قادرة اعمل حاجه
أنس: لا هتقدري والوقت لسه معاكي وانا معاكي، قصدي كلنا معاكي
زياد: طبعا، وأمل هتجيبلك المحاضرات اللي فاتتك، مش كده يا أمل؟
أمل: طبعا من غير ما تقول
أنس: وانا موجود لو احتاجتي حاجه اشرحالهاك او أمل تشرحلك
قمر بتعب: شكرا يا دكتور
زياد: طيب نستأذن بقا ونسيبك ترتاحي، سلامتك
أمل: سلامتك
أنس: سلامتك
قمر: الله يسلمكم
ومشيوا كلهم وندهت قمر على نبيلة وسندت عليها ورجعت سريرها، تاني ونامت وتاني يوم الصبح صحيت قمر على صوت چنى وهي بتصحيها عشان العلاج الطبيعي لرجليها فسألتها: عامله ايه دلوقتي؟
قمر وهي بتتاوب: الحمدلله
چنى: طيب يلا قومي عشان نفطر سوا
وسندتها چنى وراحوا يقعدوا على السفرة عشان ياكلوا فلقت قمر وردة حمرا كبيرة وجنبها كارت صغير فسألت چنى: مين اللي جايب دول؟
چنى: معرفش، اقرأيه كده
قرأته قمر واستغربت فسألتها چنى: في ايه؟
قمر: مكتوب “صباح الخير الورد الاحمر لاحلى واحده شافتها عيني حتى وهي عيانه، يومك حلو زيك”
چنى: يعيني يا يعيني، مين ده؟؟
ابتسمت قمر بكسوف ورفعت الوردة تشمها وقالت: معرفش
چنى: طيب يلا عشان نبدأ اليوم
وبدأوا اليوم سوا وخلصت قمر تمارين العلاج الطبيعي ورجعت اوضتها ساعة الغدا فلقت نوع شيكولاته هي بتحبه ومعاه كارت صغير جنب سريرها فمسكت قمر الكارت وقرأته وابتسمت وسألت الممرضة: مين اللي جاب دي؟
الممرضة: مرضاش يقول اسمه
قمر: شكرا
وخرجت الممرضة ودخلوا چنى ونبيلة عشان ياكلوا مع قمر فاستغربت نبيلة من الشيكولاته اللي ف ايد قمر وسألتها: ايه دي؟
قمر: شيكولاته
نبيلة: مين اللي جابها؟
قمر: معرفش
چنى: هو اكيد الواد بتاع الورده
قمر: تفتكري؟
چنى: اكيد
نبيلة: طيب يلا عشان قمر تاكل
وقعدوا كلهم ياكلوا سوا وبعد ما خلصوا اكل نزلت قمر مع چنى الجنينه تتمشى لحد ما قالت: كفاية كده يلا نطلع
وبعد ما طلعوا ريحت قمر على سريرها وطلبت من امها تطفي النور عشان تنام ونفذت نبيلة كلامها ورجعت نامت عالسرير اللي جنب سريرها اما قمر ففضلت صاحية بتفكر وبتسأل نفسها: معقول؟! لا اكيد مش هو؟ صح؟ لا مش هو يا قمر……
مين اللي بيبعت لقمر الحاجات دي؟
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية حكاية قمر)
