رواية حب من طرف قهوة الفصل السادس 6 بقلم شهد محمد جادالله
رواية حب من طرف قهوة البارت السادس
رواية حب من طرف قهوة الجزء السادس
رواية حب من طرف قهوة الحلقة السادسة
في اليوم التاني بروح شغلي وانا مرتاحه نفسياً على الاقل واثقه إن لو حصل موقف يعيطني الماسكرا مش هتهبب
بخلص الشيفت وكالعادة بنتقابل انا ونور عند اسامه بنشرب قهوتنا وبنرجع للمكتبة بنصور بقيت المشاهد
نور كان لطيف اوي مؤدب ومهذب شيك وبيسمعني وفيه بينا حاجات كتير مشتركه
عارفين إحساس مين اللي زقك عليا ؟
التروما بوظت كل حاجه عندي بس من جوايا نفسي يكون حقيقي نفسي يكون بجد الدنيا اللي رميته في طريقي ميكنش حد بعته أو ليه مصلحه في كل ده ..
انهارده بيكون المشهد الانهياري بتاع حياة البطله لما تتصدم في حبيبها
بجهز الميكب واللبس وبخرج ليهم وانا مستعده المفروض الشاب اللي بيمثل المشهد معايا هو اللي بيبدا
_افهمي أنا مش عايزك مش عايزك تكوني معايا بعترف انك عملتيلي حاجات حلوه كتير بس انا مطلبتش منك كل ده مطلبتش
_دي اخرتها ده انا كنت بدويك وانا مجروحه !!
_مطلبتش منك ده مطلبتش تكوني معايا انتي كنتي متعشمه إني هحبك من اهتمامك وحبك بس مش عارف احبك مش عارف
بنسى أنه مجرد مشهد بنمثل فيه وفوراً بتتجمع دموعي في عيني وبفتكر احمد وببدأ اتكلم بشحتفه وانا بقول:
_ولما انت كنت عارف انك مش هتحبني كملت معايا ليه وعودك دي كانت كذب !! بتلعب بمشاعري ؟؟ انت كنت طول الوقت بتقول إنك بتحبني أنا عمري ما قولتها لكن عملت اللي يثبتها ، ليه كدا ليه ؟؟
بقولها بعياط وصوت انهياري لحد ما المشهد بيخلص وكلهم بيسقفوا بسيبهم وبجري على الحمام.
بقف وبحاول اتنفس بهدوء بحاول انظم نفسي وبهدا.
وبغسل وشي وبخرج ولما بخرج بلاقي نور مستنيني ومعاه مناديل
_كلهم فاكرين أن اللي حصل كانت تمثيل بس انا الوحيد اللي عرفت أن دموعك دي حقيقيه
ببتسم ليه وباخد منه المنديل وبقول:
_افتكرته بس مش اكتر
_ولا يهمك هو الجرح كدا يوم مش هتفتكريه ويوم كأنه امبارح والدنيا هتمشي وهتنسي
_المهم المشهد حلو؟
_تحفه تاكلي معايا على عربية كبده؟
ببتسم وبقول:
_اشمعنا كبده؟
_سوشي؟
_لا سوشي إيه كبده احلى طبعا
_ايوا يا بنت البلد ، هاخدك على عربية عم ربيع هتاكلي احلى كبده في حياتك وهصالحك ب شوب قصب ياستي
_الله ده انا هزعل على طول بقى عشان تصالحني دايمٔا
_من غير زعل وعياط الله يخليكي بس الماسكرا طلعت اصلي
بيقولها وهو بيغمزلي ببتسم بكسوف وبقول:
_بجد مش عارفه اقولك إيه على حوار الماسكرا ده
_متقوليش ويلا بينا على الكبده
_يلا
بقولها وباخد شنطتي وبنخرج أنا وهو بتكون عربية الكبده في الدقي عربية بسيطه واقف عليها راجل باين عليه طيب وبشوش
بيطلب لينا وبيرجع يقعد معايا بناكل سوا وبتكون اطعم سندوتشات كبده دوقتها في حياتي
بعد ما بنخلص اكل بيحاسب وبنروح نشرب قصب وبيروحني للبيت
عارفين اكتشفت إن كل مره بكون حزينه فيها هو بيصالحني بس من غير ما اخد بالي ..
وفي اليوم التاني مبيكونش عندي تصوير بس بنسهر عند اسامه بعد ما بخلص شغلي
_تعرفي إن فكرة عربية القهوة بتاعت أسامه دي فكرتي أنا
_بتهزر
_والله فكرتي أنا اسامه معرفه قديمه وحب يبدأ بمشروع صغير اقترحت عليه موضوع عربية القهوة بديكور لطيف واهو على قده اه لكن محبوب وبيجي ليه ناس من كل حته
_طب وكوبايات القهوة
_مالها؟
_الرسومات اللي عليها والكلمات؟
_فكرتي بردوا إيه رأيك فيها؟
_دي تحفه
_لحد دلوقتي اي اكتر جملة معلقه معاكي؟
_بصراحه كل جملة كانت أحلى من اللي قبلها كلهم بيلموسني بحس أن دي رسالة متشفره
_الحاجات دي بتفرق معاكم ك بنات اكتر مننا عشان كدا قولتله على الفكره دي يعني مثلاً ممكن تلاقي واحده جايه تشرب قهوة عشان بس الكوباية
_ده بيحصل بجد برافو عليك شاطر
_شهادة اعتز بيها يا حلوه
_طب وقهوة التوت ؟
_مالها؟
_مكنتش اعرف إن فيه قهوة بالتوت دي طعمها ايه كان عندي فضول اجربها بس خوفت
_خوفتي من إيه؟
_طعمها ميعجبنيش
_طب قومي هخليكي تجربيها
بيقولها وبياخدني بندخل عند اسامه وبنقف أنا وهو بس اللي نعمل القهوة
بنعمل واحده بالتوت وواحده بالمانجه
كان شاطر عارف هو بيعمل إيه
ودوقني الاتنين بس عجبتني اللي بالتوت اكتر وفي آخر اليوم وصلني للبيت وبيمشي
وبتعدي الأيام وعلاقتي بيه على نفس النمط يا بنتقابل في التصوير يا بنتقابل عند اسامه
وانهارده بخلص شغلي وبنتقابل عند اسامه زي كل مره
_اتأخرتي انهارده يعني
_زميلتي مجتش انهارده ف خلصت شغلها بدالها
_واي الاخبار؟
_انهارده فرحه
_انتي لسه بتفكري فيه يا لقاء ؟
_مش حكاية بفكر فيه حكاية أنه عزمني وبصراحة حابه اروح اوي ليه مجربش اعيش دور فتاة المصنع ؟
_انا بقول لأ متروحيش احسن
_لا هروح هو لما عزمني كان بيحرق دمي أنا بقى هحرق دمه وهروح اهو حتى عشان اثبت لنفسي إني خفيت منو ..
_طيب هاجي معاكي
_هيفكرك حبيبي وبغيظه بيك
_يفكر زي ما يفكر بقى
_احلى نور في الدنيا
_هروح اجيب عربيتي نروح بيها بدال ما نتبهدل في اوبر
_اتفقنا وانا هجهز في عشر دقايق
_لما نشوف اخرتها معاكي يا لقاء هانم
ببتسم ليه وبسيبه وبرجع للبيت بلبس بلوزه سواريه على بنطلون اسود وبحط ميكب يليق على أجواء الفرح وبكون جاهزه
بنزل ليه بعد ما بيبعتلي مسدج أنه تحت البيت بيكون هو كمان لابس اوتفيت اسود في أسود
ببتسم ليه وبركب جنبه وبيبدا يسوق للمكان اللي فيه القاعه
كان خايف عليا يجرالي حاجه لما اشوفه وهو عريس
بس انا فعلا مبقاش جوايا ليه غير شوية مشاعر حزينه على العشره لكن هو مبقتش بحبه ولا حتى بكرهه هو شاف في حياته كتير في حياته اتمنى ربنا يعوضه ويسعده بس ده ميمنعش إني بردوا هحرق دمه ..
بعد شوية بنوصل للقاعة بندخل سوا واول ما بشوفه بحس زي ما يكون قلبي اتكهرب بس بحاول أبين إني عادي
عارفين أنا اللي جابني فضولي أني اشوف شكل البنت اللي اختارها في حياته بدالي
ومن غير حقد البنات والغيره البنت كانت حلوه ملامحها لذيذه عندها غمازات بس مهما كانت حلوه قلبها مش زي قلبي أبدا
بياخد باله من وجودي بيبتسم ليا وفورا الابتسامه دي بتختفي لما بيشوف نور جنبي
_الف مبروك يا احمد
_الله يبارك فيكي
بيقولها وهو بيبص ل نور ونور مبيتكلمش بيكتفي ب ابتسامة ليه وبيسكت
وبنفضل واقفين شوية وبتشتغل اغنية بحبها باجي ادخل في شخصية فتاة المصنع وارقص نور اللي بيمسك إيدي قدامهم كلهم وبيقول:
_معندناش بنات ترقص في افراح يا حلوه
بتكسف وبسكت برجع أقف في مكاني تاني وشوية وهو بياخدني من إيدي وبنخرج
_كنا فضلنا شوية
_الفرح ممل كل حاجه فيه ممُله
_بصراحه عندك حق
_انبسطي انك عملتي اللي في دماغك
_انبسطت إني خلاص اتنازلت عنه واني اتمنيت ليه الخير
_انتي جميله يا لقاء ومشاعرك جميله زيك
_ماما دايما بتقول اللي قلبه جميل ملامحه بتكون حلوه
_عشان كدا انتي زي القمر؟
بتكسف منو وبركب في العربيه بصمت وبيبتسم وبيجي يركب جنبي وبيسوق وفي وسط الطريق بيلمح عربية قهوة بيركن العربية وبينزل يجيب ليا وليه
_معندوش قهوة بس فيه شاي تشربي شاي؟
_لا مبحبوش
_بالنعناع هتحبيه اوي
بيقولها وبيروح يجيب كوبايتين الشاي وبيرجع بنفضل قاعدين في وسط الطريق هو بيحكيلي عن ذكرياته وانا في إيدي كوباية شاي دفايه بالنعناع
العربية بتاعت القهوة كانت مشغله اغنيه جميله معرفش بتاعت مين بس كل كلماتها كانت لذيذه
|..حبيبي اللي بحبه مشفتش زيه حد
عينيه حنان وقلبه بستان امان وورد
غالي وطول عمره غالي ومقامه في قلبي عالي
وليلة بعد ليلة بالحب بقينا عيلة ..|
اندمجت مع كلام الأغنية ولما بصيت عليه لقيته مريح رأسه على الشباك ونام
ببتسم ليه كان شكله لذيذ اوي بطلع موبايلي بصورو وبرجع اسرح مع كوباية الشاي وكلام الأغنية
لحد ما بتفجاء من صوته وهو بيناديني ولما بفتح عيني بلاقينا لسه في الطريق والنهار طلع علينا
_متهزرش احنا نمنا هنا ؟
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية حب من طرف قهوة)
