رواية حب من طرف قهوة الفصل السابع 7 بقلم شهد محمد جادالله
رواية حب من طرف قهوة البارت السابع
رواية حب من طرف قهوة الجزء السابع
رواية حب من طرف قهوة الحلقة السابعة
_متهزرش احنا نمنا هنا؟
_انا زيي زيك بظبط صحيت لقيتنا لسه على الطريق
_ماما !!
بقولها وانا مخضوضه وبشوف موبايلي وبلاقيها رنت عليا كتير
_اكيد زمانها قلقانه عليا
_رني طمنيها طيب
بيقولها وبينزل من العربية وانا برن على ماما وانا إيدي على قلبي من الخضه ودقايق وبترد
_انتي فين يا لقاء كل ده ؟
_والله والله راحت عليا نومه وانا مع نور في العربية ركن في الطريق نشرب شاي وهو نام وفجأة محستش بحاجه غير إننا في النهار وهو اللي بيصحيني
_وهو في بنت محترمه تفضل الوقت ده كله مع واحد وكمان في عربيته
_يا ماما مانتي عارفه إن اللي بيني وبينه شغل ومجرد صديق وحياتك عندي هو ده اللي حصل
_طيب ارجعي ولينا كلام تاني وانا قولت ل ابوكي عندك ضغط شغل عشان يبقى كلامنا زي بعض
_ماشي يا حبيبتي سلام
بقولها وبقفل معاها وببص عليه مبيكونش موجود قدامي معرفش راح فين
ببص لنفسي في مراية العربية شعري بيكون منعكش من الهوا الكحل سايح شكلي مبهدل
إزاي شافني بالشكل ده !
بمسح الكحل اللي ساح وبعدل شعري وبلاقيه جاي ومعاه شنطه في ايديه
_كنت فين؟
_شوية سندوتشات فول وطعميه هيعجبوكي اوي
_يا نور انت رايق والله سندوتشات إيه
_هنفطر ، حصلك مشكلة في البيت؟
_مش عارفه لسه لما هروح هشوف
_عموما متقلقيش لو حصل حاجه أنا ممكن اعتذر من باباكي أو أفهمه اللي حصل أو اتجوزك عادي يعني متشيلش هم
بتكسف وبحاول اداري كسوفي وبعمل نفسي مخدتش بالي من كلامه وبنطلع السندوتشات بنفطر سوا وبيرجعني للبيت
بيحصل مشكلة بسيطه مع ماما لكن بتعدي وبشرب قهوتي وبنزل للشغل
وفي وسط مانا في البريك بلاقي منو مسدج على موبايلي باعت صوره ليه وهو في النادي وبيقول أنه كسب
_اشطر نور في الدنيا برافو عليك فخوره بيك
_حصلك حاجه في البيت؟
_لأ كله تمام
_هنتقابل إنهارده؟
_فيه مشهد تاني هيتصور صح؟
_صح وهعزمك على تين شوكي
_اديني في العروض المغريه
_هستانكي يا حلوه
_اتفقنا
ببعتها وبقفل موبايلي وبكمل بقيت شغلي الكل بيمشي ومبيفضلش غيري
بخلص شغلي وبسرح في الا شئ
جوايا مشاعر متلغبطه اوي
جزء حزين من اللي حصل من احمد ، وجزء مشدود لنور
بس مش عارفه إذا كنت هقدر الحاجات اللي بايظه في نور ولا لأ مش عارفه إذا كنت هعرف اخليه يتعافى أو هنتعافى سوا ولا لأ ؟
معرفش أنا بيجرالي إيه تايها اوي بس مرتاحه نفسياً ومبسوطه
بفوق من شرودي وباخد شنطتي وبنزل بروح ليه في المكتبه
بيكون مستنيني هو وفريق العمل ونرمين أخته وبنت تانيه بتلفت نظري بس مابهتمش
كانت حلوة بيضه وعينيها عسلي شعرها كيرلي واصغر وطويل جمالها مميز بصراحة.
بيكون المره دي مشاهد بسيطه وتعتبر الأخيره
بخلص وهو بيقف يراجع على اللي اتصور وبتجري ناحيته البنت دي وهي بتقول:
_برافو يا نوري فخوره بيك
ببص ليهم باستغراب وبسيبهم وبدخل الحمام بعدل لبسي وبجرب لون الكحل الجديد اشتريته الصبح ونسيت اجربه
كان لونه لافندر بس هادي رسمته على عيني وكان شكلي واو لوحة فنية بيعجبني شكلي بيه اوي
بكون راضيه عن نفسي وشكلي وبخرج ليهم وبتكون نفس البنت دي بتتلزق فيه وواقفه جنبه
_خلاص يا لقاء؟
_ايوا
_طب يلا بينا
بيقولها وبياخدني من إيدي وبنخرج سوا
بنمشي في صمت بس بقطع الصمت ده وبقول:
_عينيها منك على فكره
_مين؟
_البنت اللي كانت جنبك
_دي لارا كنا بيست فريند
_وبعدين؟
_مفيش كان هيحصل بينا قصة حب بس الحمدلله فشلت هي صاحبة نرمين اختي ف عشان كدا لسه موجوده
_اممم
_بتغيري؟
_وهغير من إيه انا مش بغير غير على الراجل اللي يخصني وبس
_طيب ، وبس ياستي هي بقى عندها امل إننا نرجع تاني
_وليه لأ ؟
_عشان هي اتخلت عني في اكتر وقت كنت محتاجها فيه حنيتها لو مش موجوده في أصعب اوقاتي يبقى متلزمنيش بقيت الأوقات
_انت صح
_وبس كدا
بيقولها وهو بيبتسم ليا وبياخدني لعربية التين الشوكي بناكل كتير لدرجة أننا بننسى العدد بنتصور فيديوهات عشوائيه بنهزر
وفي الآخر حاسب وجابلي تاني أخدهم معايا وانا راجعه البيت
_احكيلي يومك كان عامل إزاي انهارده؟
_ماشي الحال لطيف يعني
_بكرا اجازه ؟
_اه
_بتعملي إيه في يوم اجازتك ؟
_بساعد ماما في شغل البيت والمطبخ بحب المطبخ اوي
_شاطره فيه يعني؟
_طب ده انا عليا حلة ورق عنب تخليك تحلف بيا العمر كله
_ادوق واحكم
_ديل يا معلم
بيضحك من كلمة معلم دي وبيكمل كلامه وبيقول:
_تعرفي انك جميله .. جميله اوي
_ربنا يخليك
_فنون الرد ..
بنضحك سوا وبكون وصلت للبيت بيسلم عليا وبيمشي هو وبطلع أنا باخد شاور وبحط من البادي اسبلاش بتاعي وبعمل قطتين وبريح في اوضتي
والحمدلله بالي كان رايق مكنش فيه وقت لدماغي تفكرني بحاجه كانت استراحة محارب بجد
وفي اليوم التاني بصحى وبساعد ماما في البيت لحد ما بنخلص وبتقف هي تعمل الغدا
وبقعد أنا في البلكونة بحاول اشغل نفسي في كتاب بقالي كتير اوي مقرأتش بحاول ارجع شغفي
وشوية ولقيت مكالمة منه وبرد عليه:
_محتاج مساعدتك
_في إيه انت كويس؟
_اه بس بجيب طلبات من السوق وبصراحة مش عارف الفرق بين الكزبره والفلفل ممكن تقوليلي
بضحك وبفهم إنها حجه عشان يكلمني وبقول:
_اسأل الراجل بتاع الخضار وهو يقولك
_صح عندك حق إزاي مجاش في بالي شكراً اوي بجد
_العفو
بقولها وانا بضحك وبقفل معاه برجع اقراء تاني وشوية وموبايلي بيرن تاني وبيكون هو
_ها المره دي بقى مش عارف الفرق بين الطماطم والبصل ؟
_لا مش للدرجه دي المره دي هسألك سؤال مهم
_اسأل
_دلوقتي عايز اغير صورة البروفايل بتاعت الفيسبوك ومش عارف متعرفيش تتغير إزاي؟
_هتدوس على الصوره يا نور وتختار اختيار صورة ملف شخصي جديده
_شكرا جدآ عطلتك
_لا ولا يهمك أنا دايما في الخدمه
_متشكر يا لولو
بيقولها وبيقفل معايا وبتدخل ليا ماما وهي بتقول:
_اعملكم حواوشي ولا مكرونة وشاورما؟
_انتي عايزه تعملي إيه؟
_مش عارفه بس بفكر اعمل حواوشي واعملكم جنبه شوية بطاطس وطحينه إيه رأيك
_خلاص يبقى حواوشي
_هجبلك البطاطس تقشريها
_ماشي يا حبيبتي
بقولها وبقعد على موبايلي شوية وهي بترجعلي بالبطاطس وبقعد اقشرها وبلاقي موبايلي بيرن تاني وبيكون هو
_ها المره دي الحجه إيه؟
_مكشوف اوي كدا؟
_جدا جدا
_بتعملي إيه طيب
_بقشر بطاطس
_انتي تعرفي إن تقشير البطاطس ليه سبع فوايد أنا جاي احكيهملك سلام
مبلحقش ارد وبيقفل معايا بضحك عليه وعلى حركاته ومفيش دقايق وبلاقيه قدامي في إيديه شنطة حاجه حلوه
_والله بتهزر !
بتدخل ماما وهي بتقول:
_خلصتي يا لقاء البطاطس ؟
بتقولها وبتتفجاء من نور اللي واقف قدام البلكونة بتبص ليا وبقول:
_ده نور اللي كنت بحكيلك عنه
_اه ازيك يا ابني
_بخير يا خالتي انتي إزيك وإزي صحتك
_في نعمه الحمدلله اتفضل ادخل بالمره تتغدا معانا انهارده
_ربنا يخليكي تسلمي
_والله أبدا نص ساعه والغدا يكون جاهز اتفضل
_لو بس مكنتيش تحلفي
بيقولها وبيلف لينا من ناحية الباب وبيدخل يقعد معايا في البلكونة ماما بتعملنا شاي وهو بيكون جايب معاه شيبسي وشكولاتات وايس كريم
_ها إيه هما السبع فوايد؟
_اولهم إني عرفت الاقي سبب عشان اجيلك
_والتاني؟
_إني معاكي دلوقتي
_والتالت؟
_قاعد في بلكونة بيتك
_الرابع؟
_شفتك
_الخامس؟
_بصي هقولك وحشتيني وافتقدتك بس على هيئة البطاطس حلوه اوي
ببتسم بكسوف وبقول:
_طب والسادس؟
_البطاطس حلوه اوي
_السابع؟
_البطاطس حلوه اوي
بضحك وبحاول اغير الموضوع عارفين حلاوة البدايات ؟
هو ده اللي كنت فيه والموضوع بنسبالي رعب بس انا مبسوطه وحابه اكون معاه
جوايا شخصية بتقول وسيرة الحب لو تيجي بقيت منها اخاف واجري
وشخصية تانيه بتقول إن هو ده العوض والشخص الصح ..
بنفضل نرغي شوية وبنتغدا سوا وبيتعرف على بابا واخواتي
وبنستأذن منهم ننزل نتمشى شوية
_تعرفي إن ده الطف يوم في حياتي عموماً
_عشان دوقت اكل ماما؟
_وعشان انتي اللي قشرتي البطاطس
_تعرف انك غريب؟
_دي نسخه جديده مني خلي بالك اول مره تطلع أنا ذات نفس مستغربني
_اممم قولتلي
_مش عارف بقى بس وانا معاكي ببقى على طبيعتي وبقول كل اللي في بالي
_طب دي حاجه لطيفه
_الالطف هو وقتي معاكي
ببتسم ليه وبنقعد سوا قدام عربية قهوة قديمه بنطلب اتنين شاي وبنقعد على الرصيف سوا
كان جنبنا زرع فيه ورد بيقطف ورده وبيديهالي
كأن مثلاً اتنين بيحبه وكل اللي مابينهم غرام وكلام حلو!
بيقطع كلامنا موبايله بيرد على مكالمه بتيجي ليه وبيرجع ليا وهو متغير والزعل باين على وشه
_حصل إيه؟
_عرفت أنها عملت حادثة
_هي مين؟
_ندى .. الأكس
بسكت وبحاول استوعب وبقول:
_لسه بتحبها؟
_مش عارف بس زعلت عليها
_ربنا يقومها بالسلامه أنا عايزه اروح ..
بقولها ومش بستنى منو رد باخد شنطتي وهو بيحاسب وبيمشي معايا طول الطريق كنا ساكتين لحد ما بيتكلم هو
_انتي زعلتي؟
بقف قدامه وبقول:
_شوف يا نور انت مستسلم ومش عايز تتخطى مش عايز تقبل الواقع أنا وجودي في حياتك مضاف إليه ..
_لقاء اسمعيني
_اسمعني انت اللي بيني وبينك ده استهبال دلوقتي أنا هسيبك يومين تفكر فيهم لو حابب انك تتخطى ونتعافى سوا هتقولي وهكون معاك حابب تفضل عايش في أحزانك مع ذكرياتك قولي بردوا وهكون معاك بس وانا لقاء بتاعت الشغل مش بتاعت مرحلة الاستعباط ارجوك متكلمنيش غير بعد يومين يا نور ..
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية حب من طرف قهوة)
