رواية حب من طرف قهوة الفصل الخامس 5 بقلم شهد محمد جادالله
رواية حب من طرف قهوة البارت الخامس
رواية حب من طرف قهوة الجزء الخامس
رواية حب من طرف قهوة الحلقة الخامسة
_فرحي اخر الشهر هستناكي ..
بشوف المسدج وبحس إحساس غريب عارفين برود المشاعر؟
أنا مكنتش عارفه احس أي وقتها
ومكنتش فاهمه هو بيعمل كد ليه!
فيه مليون سؤال في دماغي ليه وإزاي وامتى
برد عليه وبقول:
_ربنا يتمملك على خير واكيد طبعاً هاجي مش محتاجة عزومه
ببعت المسدج وبقفل موبايلي وبشغل البلاي ليست بسمعها لحد ما بنام
وبصحى في اليوم التاني بستعد لشغلي ببص لنفسي في المرايا وببتسم بحزن وبقول:
_هتتعافي يا لولو بس مش دلوقتي !
باخد شنطتي وبنزل للشغل بحاول اشغل نفسي بحاول مسيبش وقت لدماغي عشان مفكرش فيه
وفي نص اليوم كان فيه عميل بيدايقني بنظراته بس حاولت اتجاهله
ووقت ما جيت اديله الورق مسك إيدي فوراً بعدت وخوفت وزعقت بنبرة صوت عاليه لكن ضعيفة وقولت:
_انت قليل الأدب على فكره
_وانا كنت عملتلك إيه؟
_يعني مش عارف انت عملت إيه؟
أتدخل مصطفى زميلي وقام اتخانق معاه من غير ما يعرف حصل إيه الصوت بيكون عالي
بيخرج المدير على الصوت ده
_حصل إيه ؟
بيرد مصطفى وبيقول:
_بيضايق لقاء
بيقف يسمع مني ومنه اللي حصل وبيحل المشكلة بيخليه يعتذرلي وبيطلبني على مكتبه
_اتفضل يا فندم
_ايه اللي حصل بره ده؟
_مانا حكيت لحضرتك
_مش مبرر يا لقاء اتنين بيتخانقه عشانك؟ هو انتي فرحانه ب لمة الشباب حواليكي ؟؟
كلمته بتكون تقيله على قلبي ومن قبل ما يخلص كلامه بخرج من المكتب وانا معيطه باخد شنطتي وبمشي من قبل ما يخلص الشيفت بتاعي
كنت ضعيفة بعيط بشحتفه ..
انثي جميله قلبها مكسور ومعيطه والماسكرا الاصلي ام ٢٠٠ جنيه سايحه على عيونها
مبيجيش على بالي غير نور برن عليه وبطلب منه يقابلني معرفش ليه أو هيعمل إيه بس في الوقت ده بالذات مكنش ينفع ابقى لوحدي أبدا
ببعت ليه اللوكيشن وبعد شوية وقت بلاقيه قدامي
_مالك يا جميل
بيقولها وبيطلع منديل من جيبه بيديهولي
بتفتح في العياط اكتر وبقول:
_متخانقه معاهم في الشغل وكمان الماسكرا الاصلي بتاعتي طلعت مش اصلي وكمان بكرهه أحمد
_طيب اهدي واحيكلي براحه عن كل دول .. فيه كافيه قريب من هنا تعالي نروح نقعد فيه
بروح معاه للكافيه واول ما بنوصل بدخل للحمام بمسح كل اللي الماسكرا عملته وبخرج ليه تاني
بيكون طلبلي آيس كريم وطلب لنفسه قهوة
_ايس كريم ليه؟
_سهيلة اختي بتقول لو حد زعلان وحابب تصالحه نجيب ليه آيس كريم
_سهيلة دي قمر
بقولها وانا ببتسم ليه وبقعد قدامه وبتنهد
_اول حاجه حصل إيه في الشغل؟
بحكي ليه كل اللي حصل وانا باكل الآيس كريم كنت زي الاطفال اللي بيدوشه اهلهم بمواضيع مش مهمه بحكي وفي نفس الوقت مندمجه مع الآيس كريم
وهو كان بيسمعني بيسمع بجد مش تقضية واجب وخلاص
_مديرك غلطان طبعاً مكنش ينفع يقول كلمه زي دي ومصطفى جدع كان كسر دماغه كمان ويرن عليا أجي اكمل عليه وانتي جدعه انك مسكتيش ليه
_كنت مضغوطه مستنيه تكه واعيط وهو كان التكه دي
_طيب واي بقى موضوع الماسكرا اللي مش اصلي دي
_انت تعرف يعني إيه ماسكرا أصلا
_اه طبعاً دي علبة الالوان اللي فوق العين
_لا غلط
بقولها بضحك بيكمل وبيقول:
_يبقى اللي بنرطب بيها الوش أصل انا بتلغبط مابينهم الاتنين شبه بعض
بضحك بصوتي كله من ثقته في نفسه وهو بيتكلم وهو بيبتسم وبيقول:
_غبي اللي يبقى سبب في زعلك والله .. المهم متزعليش نفسك نجيب ماسكرا اصلي يا جميل مين محمد بقى اللي بتكرهيه ده؟
بتنهد وببقى مش عارفه ابدأ منين بس بحاول اقول كل اللي متراكم جوايا
_محمد ده كان بيت مهجور فيه اشباح انا بقى دخلت البيت نضفته ورتبته وطردت الاشباح منو وزرعت فيه ورد وعملت حواليه سور عشان الاشباح مترجعش ليه تاني
_حلو اوي وبعدين؟
_بعدين اهلي موافقوش ف صاحب البيت مكنش قادر أنه يحاول مكنش شجاع كفايه عشان يخليني من نصيبه ف راح كل مجهودي وتعبي على البيت ده
_عشان مكنش شبهك يا لقاء ما يمكن ربنا عمل كدا عشان شايل ليكي بيت تاني حلو وجميل ومش هياخد منك مجهود ولا وقت ومفيهوش اشباح وكل مفاتيحه تبقى معاكي انتي
_الحمد الله في الأول والآخر نصيب
_بظبط كدا متزعليش نفسك بقى هو مكنش ليكي من البداية
_ربنا يسعده
_ويسعدك ويلا يا استاذه عندنا تصوير ولا وراكي حاجه؟
_لا يلا أنا كنت لسه هقولك أصلا
بيبتسم ليا وبيقوم يحاسب وبيرجع ياخدني وبنروح سوا للمكتبة بتاعت نرمين أخته
بغير هدومي وبعدل الميكب والمره دي بيكون سيشن تعريف شخصيات
بقف اتصور كذا صوره لحد ما بنخلص والكل بيمشي
وبدخل اغير هدومي وبخرج ليه بيكون مستنيني بياخدني وبنروح على عربية القهوة بتاعت أسامه
المكان بيكون فاضي مفيهوش غيري انا وهو ونسمات الهوا ومزيكا قديمه
جابلي قهوتي والمره دي كان مكتوب عليها
“خُذني إليك”
بنصور الكوبايات انا وهو وبنقعد في صمت بقطع انا الصمت ده وبقول:
_احكيلي عنك بقى
_زي ما شفتي كاتب شاطر أغلبية وقتي في شغلي يا في النادي عندي أختين نرمين وسهيلة وانا أكبرهم
_وبالنسبة لحياتك العاطفيه؟
بيبتسم وبيتنهد وبيقول:
_كان عندي بيت بردوا حلو وجميل ودافي وحنين من كتر ما البيت ده كان حلو كنت بخاف عليه من الهوا كنت بحاول احميه واخبيه عشان مش اي حد يشوفه ولا حد يفكر يأذيه بس صاحبة البيت طردتني قالت إني بتحكم في بيتها وعندي حب تملك بس السبب الحقيقي إن المستأجر القديم رجع
_في الهوا سوا يعني
_لا يا لقاء انتي العقبه كانت اهلك لو مكنش اهلك كان زمانكم سوا لكن هي اللي مكانتش عايزني هي الي كانت مصممه ننهي كل حاجه عشان حبها القديم رجع خارج من الريليشن دي متدمر حرفياً بس بحاول اتعايش اللي كنا عايشين قبله نعرف نعيش بعده يعني فاهمني؟
_عندك حق مش نصيبك الحمدالله
_ربنا يسعدها في حياتها
_لسه بتحبها ؟
_لسه مش عارف انسى لسه مش عارف ابقى كويس بس بحاول اسحل نفسي في أي حاجه عشان مفكرش فيها
_الدنيا مش كلى كيف حد
_ده بجد بقى
_روق ياصاحبي هنتعافى ونبقى زي الفل صدقني
_هنساعد بعض نموف اون سوا
_اتفقنا جدآ
بيبتسم ليا وبنكمل كلام في أي هبل لحد ما الوقت بيتأخر وبيوصلني للبيت
بكون اروق بكتير من الصبح بقعد مع ماما شوية وبعدها بدخل اوضتي
بلاقي مسدج من المدير بيعتذر فيها وبقبل الاعتذار عشان الشركه فيها تكيف مش اكتر
وبقعد اكمل بقيت الشغل اللي سيبته الصبح وفي وسط اندماجي بسمع صوت خبط على باب البلكونة
بجري بحماس بجيب الشال عشان بعرف أنه نور وبخرج ليه
_لسه صاحيه ؟
_اه بكمل بقيت الشغل
_طيب خدي جبتلك ماسكرا نوعها حلو عشان لما تعيطي متبقيش شبه الباندا زي الصبح
بضحك وانا بقول:
_بتهزر روحت جبتها؟
_اه والله وخليت البنت تحلف على المصحف اربع مرات إنها اصلي
_نور أنا مش عارفه اقولك إيه بس انت جميل اوي
_انا جنبك في أي وقت عموماً ودلوقتي بقى يلا ادخلي بدال ما حد يشوفنا ويحصلك مشكلة
ببتسم ليه وباخد منه الماسكرا وبدخل اوضتي بحط منها
بتكون جميله وحنينه على عيني مدمعتش حتى وانا بحطها لايقه على عيني كأنها معموله ليها ..
شكل كدا والله اعلم لقاء هتبطل تعيط تاني ..
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية حب من طرف قهوة)
