رواية حب من طرف قهوة الفصل الثاني 2 بقلم شهد محمد جادالله
رواية حب من طرف قهوة البارت الثاني
رواية حب من طرف قهوة الجزء الثاني
رواية حب من طرف قهوة الحلقة الثانية
في اليوم التالي بكون مضطره اتعامل عادي ولا كأن جوايا إنهيار داخلي
بفضل في شغلي بلهي نفسي عشان منبقاش أنا ودماغي لوحدنا الشيفت بتاعي خلص وفضلت مكمله في شغل لحد ما الوقت بيتأخر
بدخل للحمام بعدل الميكب وببص لنفسي في المرايا وبقول:
_شايفه البنت الجميلة دي اللذيذه اللي ملامحها زي السكر وناجحة وموهوبه هو خسرها ، لقاء فوقي عادي مش اول اتنين يحبو بعض وميتجوزوش يمكن نصيبك في الحب لسه مجاش
بفضل اتكلم مع نفسي ولا كأنها جلسة ثيرابيست ، وبعد شوية باخد شنطتي وبمشي
ووانا في التاكسي بنسى كل حاجه قولتها لنفسي وبلاقيني بفتح الساوند كلاود على اغنية حزينه ..
|..لا هنسى اللي عيشته معاك
ولا اقدر في يوم انساك
بودع عينيك واتمنى
تخليك شوية
يا اقرب ما ليا سلام
ل أيامنا والأحلام
بودع عينيك واستنى
جراحي اللي جايه..|
بلمح عربية القهوة بتاعت أسامه
بحاسب التاكسي وبروح اقعد عنده بيكون المكان فاضي مفيهوش غيري وبس
_فرنساوي سكر زياده يا استاذه؟
_اه يا اسامه
_عيني حاضر
بقعد وشوية وبيجبلي القهوة وبلاقيني وانا قاعده عملت اكونت فيك وبدخل اشوف اخباره
وياريتني ما عملت كدا منزل أنه بيحبها منزل بوست عزومة خطوبتهم تاريخ ارتباط في البايو
بمسك دموعي وبمسح الاكونت
وبفضل في إنهيار داخلي
دخلت الاكونت بتاعه اطمن عليه خرجت منه عايزه اللي يطمن على قلبي ..
بسيب موبايل وبفضل سرحانه لحد ما بيقطع سرحاني ده صوت طفله بتعيط بنتبه ليها وبتفجاء من نفس الشاب موجود معرفش موجود من امتى بس بيتكلم مع البنت يشوفها
_مالك يا حبيبتي ؟
_ماما ضاعت مني
_يعني مش انتي اللي ضيعتي من ماما ؟
مبيعرفش يسكتها من العياط بروح انا ليهم وبحاول اهديها
_متعيطيش يا كتكوته انتي اسمك إيه؟
_لارا
_طب وماما اسمها إيه بابا اسمه إيه شكلهم عامل إزاي؟
_ماما اسمها ماما وبابا اسمه بابا
بيضحك ببص ليه بقلة حيلة وبقول:
_وبعدين؟
بيرجع يتكلم معاها وبيقول:
_طب ماما شكلها عامل إزاي؟
_لابسه طرحه لونها بمبي
بتكلم أنا وبقول:
_طب بيتكم فين يا حبيبتي؟
_جنب الشجره الخضرا وبيت يزن
بيرد عليا وبيقول:
_بسيطه هندور على واحده اسمها ماما لابسه طرحه بمبي بيتها جنب شجره خضرا
ببص ليه وبرجع ابص ليها وبقول:
_طيب انتي كنتي فين انتي وماما؟
_في الملاهي وبعدين لقيت الملاهي بعدت وماما تاهت
بيبص ليا وبيروح ينادي على اسامه وهو بيقول:
_في ملاهي قريبه من هنا ؟
_اه في الشارع الرئيسي في جنينة فيها ملاهي
بياخد شنطة اللابتوب وبيجي ناحيتها وبيقول:
_يلا هنروح ندور على ماما
_استنى هاجي معاكم
بقولها وباخد شنطتي وبنمشي إحنا التلاته سوا هي في النص وانا ماسكه ايد وهو ماسك إيد
بنوصل عند الجنينة واول ما بنوصل بنلاقي واحده ست منهاره بتجري علينا اول ما بتشوفنا
_بنتي حبيبتي كدا يا لارا وقعتي قلبي
بتقولها وهي بتحضنها وبعدها بتبص لينا وبتقول:
_مش عارفه اقولكم إيه كل الشكر والله
بيرد عليها وبيقول:
_متقوليش حاجه يا مدام ربنا يخليهالك
_ويخليكم لبعض يارب وميوريكوش حاجه وحشه أبدا في عيالكم
كنت لسه هرد عليها بس بتاخد بنتها وبتمشي ببص ليه بحرج بيتكلم هو وبيقول:
_هتعرفي ترجعي ولا هتضيعي الطريق زي لارا؟
ببتسم ليه وبقول:
_لا هعرف
_متأكده؟
_اه
_طيب عموماً لو في اي وقت توهتي أنا موجود
ببتسم ليه وبسيبه وبمشي برجع للبيت بسهر مع أحزاني
شكلي بيكون بهتان مش لقاء الجميله اللي ضحكتها مش بتفارق وشها
اكتشفت إن مش الورد بس اللي بيدبل !
يمكن شوية وقت وارجع ورده جميله من تاني بس أصل مش من يوم وليلة هننسى ..
مكنش عندي حد احكيله أو يواسيني أنا اللي كنت بقوم بكل الأدوار شوية منهاره وشوية عامله نفسي مش حاسه بحاجة واهي ماشية
بس بطلت اراقب وبطلت احاول اعرف اخبار عنه أصل مش هيبقى انا وقلبي عليا كنت بحاول ارحم روحي شوية
وإنهارده خلصت الشيفت بتاعي وبروح عند اسامه كالعادة
بطلب قهوتي وشوية وبتجيلي
والمره دي بتكون عليها صوره لفيروز مكتوب عليها انا لحبيبي وحبيبي إلي
بكمل قعدتي وكالعادة بشوف نفس الشاب في نفس المعاد بيطلب نفس القهوة اللي بالتوت
وبيقعد قدام اللابتوب يمكن هو كمان مجروح من قصة حب وبيجي هنا كل ليلة عشان يهون على قلبه
بكمل قهوتي وبطلع النوت بتاعتي بكتب فيها شوية عن مشاعري وعن كل اللي حساه
عادة اكتستبها من فتره لما بقيت بكتب اللي جوايا بقيت برتاح شوية ، وبعد وقت مش كتير باخد شنطتي وبرجع للبيت
نفسيتي بتكون أهدى كتير من الأيام اللي فاتت أصل مش هفضل العمر كله ببكي على اللبن المسكوب ..
باخد شاور وبقف اعمل مكرونة وايت صوص وايس كوفي وبخرج اقعد مع ماما
_اكلك بقى كله مكرونات مبتزهقيش؟
_مانتي اللي بتعملي اكل مبحبوش يا ماما
_فيه حد مبيحبش الارانب يا لقاء
_السؤال غلط اصلا السؤال الصح في حد بياكل ارانب !!
_اه فيه كتير
_عموما الأكل أزواق
_خالتك جايه بكرا ابقي تعالي بدري من الشغل بقى عشان تقعدي معانا شوية
_حاضر
بقولها وبكمل اكلي وبدخل اقعد في اوضتي الفتره دي كنت بسحل نفسي في مسلسل تركي جديد وشوية وبتدخل ليا ماما
_قومي البسي هنخرج أنا وبابا ناكل ايس كريم
_لا أنا مش قادره
_نغير جو يا لقاء قومي
_معلش يا ماما سبيني على راحتي
_طيب هجبلك معانا واحنا جايين زبادي توت او فانيليا او توت صح؟
_اشطر ماما والله
_حبيبتي
بتقولها وبتخرج وبرجع أنا اندمج مع المسلسل وشوية وبسمع صوت خبط عند البلكونة
بفتحها وبلاقيه الشاب إياه
_مكتوب عليا انتي تنسي حاجاتك وانا ارجعهالك ياستي
بيقولها وبيطلع النوت بتاعتي يديهالي
_إزاي نسيتها !
_معرفش إيه اللي شاغل بالك
بيقولها وبيمشي وباخد بالي أنه مفتحهاش وبحترم أنه مكنش متطفل وشاف مشاعري الحزينه ..
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية حب من طرف قهوة)
