رواية حب من طرف قهوة الفصل الثامن 8 بقلم شهد محمد جادالله
رواية حب من طرف قهوة البارت الثامن
رواية حب من طرف قهوة الجزء الثامن
رواية حب من طرف قهوة الحلقة الثامنة
برجع للبيت بعد كلامي معاه وبكون واخده قرار إن بعد يومين هحدد علاقتي بيه هتكون إيه
عارفين جوايا شخصية بتقولي امشي احنا لسه هنصلحه؟
جوايا شخصية تانيه بتقول محدش فينا سليم أنا ذات نفسي مش سليمه هنتعافى ببعض ..
مش عارفه الدنيا عايزه مني إيه
ليه العادي بيقلب عندي مستحيل؟
مينفعش احب واتحب واتجوز الشخص اللي بحبه ونعيش في سلام؟
احلامي مبالغ فيها؟
بتعب من التفكير وبنام وفي اليوم التاني بنزل شغلي وبحاول مفكرش فيه وفي نص اليوم ميار زميلتي بتتعب وباخدها وبنروح المستشفى سوا
_عندها إيه يا دكتور؟
_شوية دوخه من الانيميا هكتب ليها على مكمل غذائي صحي
_تمام متشكره اوي
بقولها ليه وبيلفت نظري بنت حلوه بتتكلم مع الممرضه
_لا أنا تعبانه لازم تركبيلي كانولا
_يا حبيبتي بلاش دلع انتي مفيكيش حاجه
_لا أنا حاسه اني تعبانه ركبيلي كانولا بقى
_روحي بيتك نامي شويه واشربي عصير وهتبقي كويسه
بتقولها الممرضه وبتمشي وبتقف البنت بقلة حيلة كان باين عليها في حدود ال١٨ أو ١٧ سنه
ببتسم ليها وبقول:
_عايزاه يصالحك ولا اي؟
بتبص ليا باستغراب وبتقول:
_انتي عرفتي منين؟
_كنت زيك وانا في سنك
_والمفروض اعمل إيه ؟
_حبيبك ولا الكراش؟
_لسه في مرحلة الاستعباط
_ياني من دي مرحلة
_زعلته في حاجه ومش بنتكلم وبصراحة مستكبره ابعتله أنا ف قولت اخليه يقلق عليا ويسألني مالك لما يشوف صورة الكانولا
_تاخدي بنصحتي؟
_لو هتجيب نتيجة يبقى من إيدك دي ل إيدك دي
_جربي ومش هتندمي
_طيب إيه هي نصيحتك؟
_هتبعتي مسدج تسأليه فيها إحنا إيه ؟ ولازم يرد رد واضح وصريح لو معملش كدا يبقى انهي معاه كل حاجه
_مش هعرف أنا بحبه
_مانا عارفه بس انتي هتنهي كل حاجه بشكل مؤقت عشان بس يعرف انك مش دايماً متاحه وان كرامتك غاليه عندك وممكن تمشي عادي حتى لو روحك فيه ويومين وهو هيتجنن عليكي وهيدور عليكي
_يعني معملش موضوع الكانولا ؟
_لا هتبقي مكشوفه اوي
_طب اقولو متقدملي عريس ؟
_بلاش تكوني فيك معاه خليكي صريحه خلي كل حاجه تكون واضحه من غير خطه من غير طريقه فاهمني ؟
ابتسمت ليا وهزت رأسها بمعنى موافقة بس شفت نظرة الخوف في عيونها
مسكت ايديها عشان اطمنها وقولت:
_خلي رقمي معاكي عشان لو احتاجتي اي حاجه تكلميني
_بجد شكراً
_ولا شكر ولا حاجه الستات لبعضيها ولا اي؟
بتبتسم ليا وبتحضني وبناخد ارقام بعض وبتمشي
وبعد ما بطمن على ميار زميلتي بوصلها للبيت وبرجع أنا كمان لبيتي
كان يوم صعب أو ممُل يمكن عشان مكلمنيش؟
بدخل اخد شاور وبخرج اقعد مع ماما شوية وبفتح موبايلي اشوف اخبار السوشيال وبلاقي مسدجات على الواتساب
مسدج منه بيقول فيها وحشتيني ومسدج من رقم غريب مكتوب فيها اعترفلي أنه بيحبني
ابتسمت وعرفت أنها البنوته بتاعت المستشفى
_حلو جدآ كدا علاقتكم أصبحت واضحة
ببعتها ليها وبدخل اشوف المسدج بتاعته كان اونلاين مبعرفش ارد اقول إيه بفضل فاتحه الشات وانا عيني على المسدج وساكته بعت مسدج تانيه بيقول فيها:
_ممكن نتقابل بكرا محتاج اتكلم معاكي
_اليومين لسه مخلصوش يا نور
_مش محتاج يومين كفاية يوم كفايه أول ساعتين من غيرك أصلا
بشوفها ومبردش مش تقل بس بحس أننا عندنا اضطرابات في المشاعر محدش فينا عارف هو عايز إيه محدش فينا لسه خف من الجرح القديم أقل حاجه ناخد بريك نفكر فيه ..
بقفل موبايلي وبنام او أنا اللي بكون نايمه ودماغي بتكون صاحية
في معاد شغلي بقوم بعمل قهوة وبلبس وبنزل وبتفجاء لما بلاقيه قدام البيت
_انت هنا من امتى ؟
_معرفتش انام لبست وجيتلك مانتي مش مدياني فرصة اتكلم معاكي
_هنتكلم في إيه يا نور؟
_هوصلك للشغل ونتكلم في الطريق ونشرب قهوتنا سوا
_شربت قهوتي قبل ما انزل بس احنا اتفقنا انك متكلمنيش غير بعد يومين عشان تعرف تفهم فيهم مشاعرك وانت عايز ايه
_كل اللي اكتشفته إني في غيابك الكام ساعه دول إني عايز اعيش العمر جنبك كل ليلة وكل يوم
_نور افهم دي إضرابات مشاعر إحنا بنموف اون ببعض من غير ما ناخد بالنا
_وفيها إيه انتي صلحيني وخديني وانا موافق انك تتعافي بيا
_ارجوك سيبنا نفكر على مهلنا محدش فينا فيه حيل أنه يتجرح تاني
_يعني إيه؟
_يعني ناخد بريك من بعض يومين ونكون فكرنا كويس
_طب اوصلك طيب
_لا عارفه طريقي كويس
بقولها وبسيبه وبمشي بروح شغلي وعلى قد ما بكون فرحانه من كلامه وأنه مقدرش يبعد عني يومين على قد ما بكون خايفه
خايفه يكون درس جديد ..
بيعدي يومي في الشغل بدون اي تفاصيل مهمه برجع للبيت وبحاول اشغل نفسي في أي حاجه
بفتح واتساب وبيكون اونلاين وانا اونلاين بس مش قادرين نتكلم محدش عارف يبعت للتاني
بهرب من الشات اول ما بلاقيه بيكتب وبلاقيه بعت بيقول:
_سهيلة نفسها تاكل كيكة وانا مش عارف الطريقة ممكن تقوليلي؟
ببتسم وبعرف إنها حجه عشان نتكلم بيستعبط عارفين أنا كمان عملت إيه؟ استعبطت زيه
_عندك إيه من المكونات طيب؟
_المكونات إيه في العموم؟
_دقيق وفانيليا وبيض وسكر
_عندنا السكر بس
_طب ما تشتري جاهزه من بره اسهل
_لا هي عايزها في البيت
_طيب انزل جيب الحاجه من السوبر ماركت وهكتب ليك تجيب إيه
_تمام اكتبي وانا نازل اهو
بكتب ليه عن كل حاجه هيحتاجها وبيشوف المسدج ومبيردش بيغيب كتير لحد ما بلاقيه بيرن
_خير مش عارف الفرق بين الدقيق والفانيليا ؟
_لا عارف بس انا تحت بيتك سهيلة صممت تشوفك وتديكي الحاجه الحلوه اللي جبتهالك
ببتسم وبحط شال عليا وبخرج ليه بيكون واقف وسهيله جنبه ومعاه شنطه فيها حاجات
_سهيلة العسوله عامله إيه؟
_كنت هبقى كويسه لو نور سابني انام
ببص ليه وبرفع حاجبي بس بينقذه ماما اللي بتشوفه وبتيجي ناحيتي
–إزيك يا نور اخبارك ايه يا حبيبي
_بخير يا خالتي انتي عامله إيه
_الحمد الله في نعمه غايب بقالك يومين كدا ليه؟
_الشغل والله ودلوقتي كان نفسي في كيكه بس ست الكل على قدها في المطبخ عملتها محروقه ف نزلت جيبت الحاجه من السوبر ماركت وكنت بسأل لقاء عن الطريقه عشان اعملها أنا
_ياحبيبي هات هعملهالك أنا
_لا لا ربنا يخليكي متتعبيش نفسك
_ابدا ده انت زيك زي لقاء ادخل عمك جوه كمان اهو تعلب معاه شطرنج عقابل ما اخلص
بيدخل يقعد مع بابا وسهيله بتيجي تقعد معايا وماما بتدخل تعمل الكيكه
_كنتي عايزه تنامي بقى ؟
_اه ونور صحاني قالي مش عايزه تاكلي كيكه قولتله لأ عايزه انام قالي لأ انتي عايزه تاكلي كيكه أنا حاسس بيكي
_ياروحي حقك عليا انا تعالي نامي في سريري يا كتكوتة
بقولها وباخدها تنام وبفضل في اوضتي بفكر فيه وفي عمايله
مش عارفه بس بفرح لمجرد أنه بيخترع اي حجه عشان يشوفني
شوية وبتكون ماما خلصت الكيكه وبتعمل جنبها كاكاو وبنقعد كلنا سوا بنتفرج على فيلم لحد ما الوقت بيتأخر وبيستأذن أنه يمشي وانا بطلب منه يسيب سهيلة عشان مش عايزاه يصحيها وطبعاً بيسيبها عشان تبقى حجه يجي ياخدها بكرا
هو بيمشي وانا بقوم اغسل الأطباق وبسمع مدح بابا وماما فيه وبفهم أنهم مرحبين بوجوده في حياتي عشان انسى احمد
بخلص وبدخل اوضتي وبلاقي منه مسدج بيقول فيها:
_وجرت الأمور كما خططت لها
_حرام عليك بتصحي البنت عشان تعملها حجه
_اعمل إيه طيب غلبت معاكي
_وبعدين في آخرة الاستعباط ده يا نور؟
_مش عايزه تكوني عروسه؟ قاضيه الجمعه الجايه؟
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية حب من طرف قهوة)
