رواية حب من طرف قهوة الفصل الثالث 3 بقلم شهد محمد جادالله

رواية حب من طرف قهوة البارت الثالث

رواية حب من طرف قهوة الجزء الثالث

رواية حب من طرف قهوة الحلقة الثالثة

بعد ما بخلص شغلي بنزل في الشارع بيكون الهوا ساقع والشوارع فاضيه بفضل إني اتمشى بدال ما اخد تاكسي
كان الجو هادي والدنيا ليل لدرجة إني توهت
كنت واقفه في الشارع بحاول افهم أنا فين ومنين بيودي على فين
بقعد على الرصيف في صمت عشان اعرف هتصرف إزاي
وفجأة بسرح وبفتكر أحزاني وبنسى إني تايها ..
وبعد شوية بشوف ظل حد واقف ببص لفوق ملامحه مبتكونش باينه بس واقف ومعاه كوبايتين قهوة وبيقعد جنبي
بيديني كوباية وملامحه بتبان بيطلع الشاب إياه
_ضيعتي طريقك؟
_ابدا بس قولت اريح شوية ، شكراً على القهوة
_عينيكي فيها حزن !
بضحك من قلبي وبيضحك معايا ، ضحكت عشان عارفه إن الكلمه دي اي شاب بيقولها لما بيعوز يتعرف على بنت بس هو كان بيقولها بجد مش عشان نتعرف ولا حاجه
بنسكت شوية واحنا بنبص لبعض بعدين بيتكلم هو وبيقول:
_انا بس عايز اقولك إن في كل مره هتضيعي فيها طريقك أنا هلحقك وان هو ميستاهلكيش
_انت تعرفه؟
_لا بس اكيد سبب حزنك ده راجل غبي
_ربنا يسعده في حياته حبنا كان حب غالي وصادق بس حكم النصيب
_يبقى خلاص لو فضلتي مركزه مع اللي ضاع منك عمرك ما هتاخدي بالك من اللي مستنيكي
_إيه اللي مستنيني علاقه توكسيك جديده ؟
_او عوض مثلاً
بشرب من القهوة في صمت مبعرفش ارد اقول إيه في الحالات اللي زي دي بحتاج البيست فريند جدآ
هو كمان بيشرب قهوته من غير ما يتكلم ، منكرش أنه وسيم طول بعرض ورياضي كنت بحس بحاجه غريبه في كل مره بشوفه صدفه
اوقات كنت بتمنى إني اشوفه وانا راجعه من شغلي يمكن اعجاب ..
_هنتقاسم الحزن سوا عشان يبقى خفيف إيه رأيك
_هو انت جيت هنا إزاي؟
_النادي اللي بلعب فيه الشارع اللي ورانا ده وبس ياستي ده معاد التدريب بتاعي شفتك قولت اكيد محتاجه قهوة كل مشكلة ليها كوباية قهوة
_بتلعب إيه بقى؟
_كوره
_عطلتك عن التدريب؟
_لأ أنا أصلا باجي بدري قبل معادي ، تحبي تيجي تتفرجي عليا ؟
ببص في ساعتي وبلاقي إن لسه معايا وقت بهز راسي بمعنى موافقة وبنروح سوا
مكنتش فاهمني بصراحة مين ده ورايحه معاه فين واسمه إيه وريحة البرفيوم بتاعته حلوه كدا ليه؟
بنوصل للنادي واول ما بيدخل بيتكلم راجل كبير واقف أمن بيقول:
_لازم نكسب أنهارده يا كابتن نور
_ثق في الله ثم فيا يا عم مسعد
_سمعة النادي بين إيديك
_مع الشخص الصح متقلقش
بيقولها بهزار وبنكمل مشي لجوه بيسيبني في الاستاد وبيستأذن أنه يروح يغير هدومه
مكنش فيه حد في الاستاد غيري كانت اول مره ليا ادخل نادي رياضي أو مكان لحجز كوره
بس كان طول عمري انزل حجز كوره مع الحب بتاعي ونتصور صور حلوه.
وانا سرحانه باخد بالي من كوباية القهوة مكتوب عليها
“في قلبها حب جديد”
ببتسم وبلاقيه واقف قدامي وهو لابس لبس الكوره وبيقول:
_متفائل بوجودك معايا لو كسبت ليكي عندي هديه اي حاجه تطلبيها هتتنفذ
ببتسم ليه وبقول:
_إن شاء الله هتكسب باين إن كلهم واثقين فيك
_معتمدين عليا بقى وكدا
بنضحك سوا وبيسيبني لما بيبدا الماتش كان شاطر حريف زي ما بيقولوا
جاب كذا جون الحماس خدني وكنت عايزه ازغرط أصل انا من الناس الهبله اللي لما بتفرح بتزغرط
بس الحمدالله مسكت نفسي لحد ما الماتش خلص ساب أصحابه وجالي
_إيه رأيك انفع؟
_شاطر اوي بجد برافو عليك
_مبسوط انك شفتيني وانا بلعب
_انا اللي انبسطت حقيقي شاطر وماتش هايل مفيهوش اي اصابات وانت كنت مركز
_اصل أنا بردوا اتأذيت من الحب ف حطيت كل اهتماماتي في حاجه بحبها الكوره بحبها بس عمرها ما هتجرحني ولا هتخوني مثلاً انتي إيه اكتر حاجه بتحبيها؟
_مش عارفه بس غالباً القهوة
_خلاص كل ما تعطل معاكي اديها فنجان قهوة أو نفتحلك كافيه صغير زي أسامه
_اوعدك إني هفكر في الموضوع
_عشر دقايق هغير هدومي وراجع
_اتفقنا
بقف استناه وبالفعل مش بيتأخر عشر دقايق وبيرجع وبنرجع للبيت سوا
كان لطيف دمه خفيف مؤدب وبيضحكني ومعاه نسيت إني حزينه وكدا
بنوصل عند بيتي بيبتسم وبيحط إيديه في جيبو وبيقول:
_مش هطلب منك رقمك هستنى اشوفك صدفه تاني وارجوكي حاولي تتعافي كفايه توهان
ببتسم ليه وبهز راسي بمعنى ماشي بيطلع من جيبه شوكولاته صغيره وبيقول:
_كُليها مع القهوة ميكس تحفه زيك وزيه بالظبط انتي حلوه زي الشكولاته وهو مُر زي القهوة
بضحك من المثال وبقول:
_متشكره اوي شكراً على كل حاجه
_صحيح انتي اسمك إيه؟
_لقاء
_اتمنى ترميني الصدفه عندك في كل مره تكوني فيها حزينه
بيقولها وبيبتسم ليا وبيمشي برد ليه الابتسامه وبطلع البيت
زيكم بظبط فكرته العوض بس مش بالسهوله دي انا لسه متعافتش ..
بعمل فنجان قهوة وبدخل اقعد في اوضتي بسمع مياده الحناوي وهي بتقول حبيبي كان هنا مالي الدنيا عليا ..
وعشان غبيه ومتهوره وبمشي ورا قلبي بعتله مسدج كنت فاكره إن يمكن لسه فيه امل أو احاول كمان مره عشان حبنا مثلاً..
_هونت عليك؟
_إحنا مش لبعض يا لقاء شوفي حياتك حكايتنا خلصت
_والي بينا الوعود والذكريات حبنا لبعض كل دول مالهمش أي قيمة عندك يا أحمد !
_إحنا مش لبعض صدقيني شوفي نصيبك فين وكملي
_حبيتها؟
_الحب مش كل حاجه هي مناسبة فيه أولويات كتير اهم من الحب وكدا كدا الحب هيجي بعدين
_وانا الي مكنتش مناسبة ده انت حتى مودعتنيش وداع يليق بالي كان بينا ..
_عشان كل حاجه انتهت يا لقاء
_ربنا يسعدك في حياتك
_وانتي كمان
بسيب موبايلي وبرجع انهار ماهو أنا بردوا غبيه كنت بحاول مع مين وليه
أنا بس صعبان عليا كل حاجه كانت بينا وراحت
بيعدي اليوم الحزين ده وانا على سريري معيطه وبحاول انام
الساعه بتبقى تسعه الصبح ومبيجيلش نوم بقوم بلبس وبنزل وانا مقرره إني هتمشى وإن اخر ذرة حب لازم تخلص جوايا
بروح عند عربية القهوة بتاعت أسامه بس بيكون قافل بقعد على الكراسي اللي موجوده الجو هادي مفيش حد غيري
وفجأة بيظهر من حيث لا ادري
_حسيتك محتاجني
_انت مهكرني صح؟
بيضحك وبيقول:
_ابدا ياستي هي بس صدفة
_امم هحاول اصدق
_قهوه؟
_منين؟
_فيه محل قدام شوية
_يبقى يلا عشان فعليٱ الصداع مش سايبني في حالي
_سلامتك من الصداع
ببتسم ليه وبمشي معاه لحد المحل اللي بيعمل قهوة بيكون راجل بسيط عنده مكان فيه كام كرسي
بيطلب لينا القهوة وبيجي يقعد جنبي
بشرب من القهوة وببص ليه وبقول:
_إيه حكايتك بقى ومتقوليش صدفه عشان مش هصدقك
_كل الحكاية إني عايزك تغيري اغنية مياده الحناوي من أنا الحب اللي كان ل إحلو عمري
_انت سويت توكر ليه كدا؟
بيضحك وبيكمل قهوته وبيقول:
_بتكلم بجد بس مش في العموم في الرواية
_رواية إيه؟
_ما أصل انا كاتب نور الدين لو سمعتي عني
_في الحقيقه لا
_طيب كل الحكاية إن أنتي البطله الي كتبت عنها في الرواية كنت ما بصدق كل مره اقابلك عشان اتحقق من ملامحك واعرف اكمل وصف البطله
_انا مش فاهمه حاجه
_انا هفهمك .