رواية حب خارج المنطق الفصل الثاني 2 بقلم مجهول
رواية حب خارج المنطق الجزء الثاني
رواية حب خارج المنطق البارت الثاني
رواية حب خارج المنطق الحلقة الثانية
: وقفوا القطر حالاً!!…انا اتسرقت!!
وقفت بسرعة و قولتها بانفعال وصوت عالي وانا متوقعة انهم هيوقفوا القطر ويعملوا تفتيش ويلاقوا تلفوني الا ان الجميع بصلي بسخرية والقطر موقفش سمعت اللي وراا وهي بتتكلم بهمس مع اللي جنبها
: يا حرام شكلها لسه ورده مفتحة على الدنيا ومتعرفش حاجه!!…اللي يتسرق يتفلق هنا !!
: اه والله انا السفر كله بفضل ماسكة شنطتي عشان متسرقش!!
قعدت مكاني تاني من سرعة القطر وقعدت اعيط بصوت عالي ومش عارفه اعمل ايه وحاسه اني هتعب اوي في سفرتي دي لحد ما اتخرج واتأقلم على الدنيا برا البلد!!
بصيت على البنت اللي قاعدة في الناحية التانيه من القطر وشكلها مش فاهمه حاجه وهتتعب اوي فقررت اساعدها…
: نمرة تلفونك!!
بصيتله بخوف و صدمة من طلبه : انت بتقول ايه؟؟؟
: بقولك عايز نمرة تلفونك!!
بصيتله بعصبية وصرخت فيه : يا وقح يا عديم الرباية يا متحر.. ش يا اللي مشوفتش دقيقة تربية انا مش من البنات السيكو سيكو اللي تعرفهم!!
: سيكو سيكو ايه!!!…… انتي غبية؟؟؟…..استغفرالله العظيم!!…خليتيني اشتم!!…وانا مش بشتم!!… بقولك عايز نمرة تلفونك عشان ارن عليكي!!..مش بتقولي مش لاقيه تلفونك!!…..بس الظاهر اني غلطان اني فكرت اساعدك!!
بصيتله باحراج والكل كان بيبصلي : ********01
: ايه ده؟؟؟
ايه باحراج : نمرة تلفوني!!
كنت هرفض اساعدها بسبب موقفها معايا وتسرعها بس حسيت انها ندمت ومكسوفة ومش عارفه حاجه فقررت اساعدها ورنيت عليها
: ايه ده صوته بيرن جنبك شوفيه كده تحت الكرسي ولا في الارض !!
نزلت تحت الكرسي وهتفت بسعادة وهي بتلتقطه : لقيته!!……. لقيت التلفووون!!…. متسرقش!!….الف حمد وشكر ليك يارب
بصيت على تلفونها اللي فرحانة بيه اوي بصدمة و استغربت ان في حد ماسك تلفون زي ده في الزمن اللي احنا فيه وان ده التلفون اللي معمول عشانه الضجة دي كلها !!
بعد فترة طويلة مش عارفه كم ساعة محستش بالوقت لاني اغلبه كنت نايمة اساساً وصلنا نزلنا و اتصدمت من الاشكال والالوان اللي شايفاها قدامي!!
: ايه ده!!…دي عامله زي الممثلات اللي بنلاقيهم في التطبيق اللي اسمه التيك توك!!
بصيت على منظر البنات ولبسهم واناقتهم باحراج من منظري وكانوا هم بيبصلوا باستغراب من شكلي لابسه عباية ماما لما كانت في اعدادي اللي اتوارثتها اساساً من جدتي لما كانت في ابتدائي !!
: لو سمحتي فين هلاقي التوك توك؟؟
البنت وهي بتبصلي بسماجة : انتي بتقولي ايه؟؟؟… توك توك ايه؟؟…مش فاهماكي!!
قولتلها وانا بوصف بايدي : توك توك ده اللي بيركب الناس كلها في الصندوق بتاعه وبيلف بيهم في البلد!!
البنت وهي بتبصلي بصدمة : مفيش الكلام ده هنا!!… هنا بتركبي اوبر!!
بصيتلها بغباء : طب وفين هلاقي الاوبرا ده؟؟
البنت : اسمه اوبر مش اوبرا!!….وبتطلبيه اونلاين من تليفونك!!
: اطلبه ايه يا اختي؟؟؟
: اونلاين!!…من تلفونك!!… ايه معندكيش تلفون؟؟؟
جاوبتها بثقة وفخر وانا بطلعوا من الشنطة : اكيد طبعا معايا خدي اطلبيلي الاوبرا من لونولاين ده!!
مديتلها التلفون وهي مسكته بصدمة وهي بتبدل نظرها بيني وبين التلفون : ده تلفونك!!
اردفت بثقة : ايوه اكيد طبعا تلفوني لسه مشترينه ليا جديد بمناسبة نجاحي اصل عندنا ممنوع البت تمسك تلفون الا لما تدخل الجامعة عشان هتحتاجه!!
: بس ده يادوب بيعمل مكالمات اصلا!!…. هطلب لك اوبر من تلفوني!!
وطلعت تلفونها من شنطتها كان حجمه اكبر من تلفوني اربعة مرات ماشاءالله وفيه 3 كاميرات اتنين فوق بعض وواحدة على جنب ومرسوم عليه تفاحه انبهرت بشكله اوي و سألتها
: الله تلفونك حلو اوي!!…اسمه ايه؟؟؟
: ايفون 14 برو ماكس
: سيفون كلوراكس 14
: ايفوووون مش سيفون !!
قالتها وهي بتبص عليا بعصبية وقرف فقررت اسكت لحد لما تجي الاوبرا بتاعتها دي!!
: انتي رايحة على فين؟؟
: داخلية البنات
البنت بنفاذ صبر : و داخليه البنات دي فين؟؟؟
بصيت عليها بغباء ورفعت ايديا بمعنى مش عارفة
البنت : انتي في كليه ايه طيب؟؟
: كليه طب!!
بصيتلي من فوق لتحت بصدمة : مش باين عليكي!!… انا برضو في كليه الطب سنه اولى ولسه جاية!!… ومدت لي ايديها اسمي رحمة
بصيت على ايديها وسلمت عليها : وانا ايه
رحمه : بصي يا ايه القاهرة دي كبيرة ومش زي بلدكم اوكااااي!!!… فلو رايحة فحته لازم تكوني عارفة اسم الشارع والحي والمكان ذات نفسه!!
بصيتلها بصدمه ومفأجاه : يالهوووووي هعمل ايه؟؟؟
رحمه : انا عايشة في شقة في ومعايا بنات اتعرفت عليهم على الفيسبوك ممكن تيجي تعيشي معانا وبندفع الايجار بالتساوي!!
مكنش قدامي حل غيرها وكنت خايفة اوي وانا ببص على شكل الاولاد اللي هنا فقررت امشي معاها
مرت الايام وفهمت كل حاجه هنا واكتشفت اني كنت غبية اوي في مواقفي ولسه بفتكر الشاب بتاع القطر وبتمنى اشوفه اوي وبقيت بلبس زي البنات وابين شعري من قدام واحط ميكب من اللي جابتهم ميار والقلم اللي كنت فاكراه كحل اكتشفت انو ايلاينر!!
: بنت الجيران شغلالي عنيا !!
بصيت لمصدر الصوت وكان ده واحد طالع من الشقة اللي قدامنا وكان واضح من نبرته ونظراته انه قاصدني بصيت على هيئته شعره كيرلي و مسقط البنطلون ولابس قميص مبين عضلاته وراسم وشم في ايديه
: شكل السنارة غمزت!!
قالها بمشاكسه وهو بيغمز فوقت من سرحاني ولاحظت اني واقفة ببصله ليا مسافة وهو بدل ما يمشي فضل واقف وبيبصلي جريت بسرعة على الشقة وقفلت الباب بسرعة وسمعت صوت ضحكاته من ورا الباب وهو بيمشي
: و بس ده كل اللي حصل !!
رحمه بتوهان : ياااااه يا بختك يا ايه!!…ده احمد ساكن في الشقة اللي قدامنا ومعاه شابين برضو!! انما ايه مززززز وفورمة اوي!!… ده كراش البنات كلها!!
بصيتلها بغباء وطفيت النور عشان انام وفضلت بفكر في كلام رحمه وبفتكر موقفي معاه ابتسمت بخفة وانا بغمض عيوني : شكل السنارة غمزت فعلاً يا مدميدو!!…يا لهويييي انا بحبه ولا بحب في الشاب بتاع القطر؟؟…ايه!!!… انا بقول ايه؟!!…لا انا شكلي اتجننت خالص!!!..شكل القعدة مع رحمه جننتني!!!….بعدها نمت
مرت الايام وانا بتمنى اشوف مدميدو تاني بس للاسف مشوفتوش
: ايوة يا ماما سامعاني؟؟؟
: الوووووووووو الوووووووووو ايه سامعاني ؟؟
: سامعاكي يا ماما انتي سامعاني؟؟؟
: ايوه سامعاكي يا بنتي سامعاكي !!…متنسيش تعملي الفطار و ما تاكليش اكل من بره وما تاخديش ايه حاحه من حد !!…. ماشي؟؟؟
جاوبت بملل : ايوة يا ماما ماشي!!
: انتي بتعملي ايه دلوقتي؟؟
: نازلة الجامعة عندي محاضرة!!
: افتحي الكاميرا عايزين نشوفك كلنا قبل ما تنزلي الجامعة
بصيت على هيئتي بخوف كنت مبينه نص شعري ولابسه بنطلون وحاطه ميكب اوفر فقولت بتوتر : معلش يا ماما بس انا متاخره هبقى اكلمكم فيديو وقت تاني يلا باي…. وقفلت الخط بسرعة قبل ما اسمع الرد
ومسحت عرقي اللي نزل على جبهتي من التوتر : انا اللي جيبته لنفسي !!..كنت هروح في داهية!!… يعني كان لازم اتصل دلوقتي؟!!
فتحت باب الشقة لقيت باب الشقة اللي ساكن فيها مدميدو بيتفتح فعملت نفسي بدور على حاجه في الشنطة عشان اشوفه الباب اتفتح وبصيت بصدمة على اللي خرج من الباب : هووووووو انت؟؟
بصلي باستغراب ونزل عيونه في الارض وهو مش عارفني وحقه ميعرفنيش بالتغير الكبير اللي عاملاه في شكلي ولبسي ومشي بسرعة وهو بيحاول يسرع خطوته عشان ميكونش ورايا..
: نادر نادر استنى يا نادر!!
كان ده صوت مدميدو !!..انا بقول ايه؟؟؟..احمد وهو بيوقفه عرفت منه انه اسمه نادر وهو نفسه الشاب بتاع موقف القطر !!
: نسيت تليفونك يا صاحبي!!
نادر باستعجال : بعدين بعدين يا احمد!! …عايز الحق على الصلاة !!
لقيت احمد بيبصله باستغراب وتعجب وهو بيقول : ماله ده؟؟؟
فضلت سرحانه وانا بقارن بين نادر و احمد … الشيخ نادر واضح عليه انه عاقل متدين وملتزم في صلاته ومحترم اوي حتى في لبسه وشهامه بجد ومش بيشتم حتى اما احمد باين انه طايش ومش بيصلي اساساً وحاطط وشم وبيعاكس البنات!!…..بس برضو ده ميمنعش اني بحبهم الاتنين زي بعض يا ترى مين فيهم اللي هيكسب قلبي في النهاية.. فوقت من سرحاني على اني خبطت في واحد قدامي ووقعت!!
: انا اسف…كنت مستعجل وبجري عشان متأخر!!..بس انتي برضو كنت سرحانه ومش واخده بالك!!…. انتي كويسه؟؟؟…. قالها وهو بيمد لي ايده
فضلت ابص عليه ببلاهة وانا فاتحة بوقي مترين وو
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية حب خارج المنطق)
