رواية حب تخطى كل الظروف الفصل الحادي عشر 11 بقلم مارينا عبود
رواية حب تخطى كل الظروف الجزء الحادي عشر
رواية حب تخطى كل الظروف البارت الحادي عشر
رواية حب تخطى كل الظروف الحلقة الحادية عشر
” القرار ”
¤قاسم أخد قراره وكلم صاحبه:
– رامى أنا موافق على الخطة بتاعتك بس اقسم بالله إلياس لو حصله حاجه بسبب غبائك وقتها هتندم على اليوم إللى شوفتني فيه.
– متقلقش إلياس هيكون في حمايتي بس خططتنا هتتنفذ يوم الفرح بس لحد اليوم ده يا قاسم أنا عاوزك تبين قدامهم كلهم إنك مبسوط وفرحان بجوازهم علشان محدش يشك فيك يعني كل المطلوب منك شوية حركات كده
قاسم زفر بضيق وأردف:
– تمام موافق رغم إنه صعب عليا اعمل كده بس اوك هحاول
– تمام يا صاحبي اقفل دلوقتي وارجع البيت علشان مامتك لسه قافله معايا وقلقانه عليك
– حاضر
¤قاسم قفل الفون وركب عربيته واتنهد بحزن:
– أنا عارف إنه القرار اللي اخدته غلط وكل اللي بعمله ده غلط بس معنديش حل تاني مينفعش اضيعكِ من ايدي يا حبيبة
أنتِ حب عمرى ومينفعش تروحي لغيرى حتى لو اضطريت ارجعكِ بالقوة.
¤اخد نفس وبدأ يسوق عربيته وبعد وقت رجع البيت، اول ما دخل والدته جريت عليه بخوف:
– كنت فين يابني كل ده قلقتني عليك
ابتسم وباس ايدها:
– متقلقيش يا ست الكل أنا كويس ولله بس كُنت مع صحابي والوقت أخدنا أنا اسف قلقتكِ عليا
بصتله بحزن وأردف بهدوء:
– أنتَ كويس يا قاسم ؟
– أنا كويس يا ماما متخفيش بس عاوز انام بصراحة
– طيب يابني روح ارتاح وبعدين نتكلم.
– ماشي تصبحي على خير.
– وأنت بخير يا حبيبي.
طلع اوضته وهي فضلت بتبص لطيفه بحزن كبير وبتتمنى ابنها يكون بخير.
~~~~~~~~
تاني يوم وفي تمام الساعة السادسه مساء.
كان إلياس قاعد مع مامته وبيتكلموا لحد ما قاطع دخولهم سيف.
إيه يا عريس مجهزتش ليه
– هروح أجهز دلوقتي بس أنتَ كُنت فين
– كنت مع صحابي، قوم يلاه هساعدك
– لا روح أنتَ ذاكر ومتشغلش بالك
أردف بمرح: ياعم قووم بلا مذاكره احنا عندنا كام إلياس يعني
ضحك: ماشي يلاه بينا
زينة بصتلهم بحب:
– ربنا يحافظ عليكم يا ولاد ويفرح قلبكم
¤بعد دقايق
– يابني حرام عليك طلعت كل الهدوم وبرضو مفيش حاجه عجبتك
– ما أنا محتار، بقولكَ إيه أختار أنتَ انا زهقت.
سيف ضحك وقام مسك بدله ورفعها قدامه:
– بصراحه البدلة ديه حلوه وهتطلع جامده عليك
اتنهد بيأس: طيب هدخل أشوفها
سيف بصله وضحك:
– طيب أدخل بسرعة علشان متتاخرش.
– ماشى بس أنتَ مش هتروح معانا؟
– لا روح أنتً أنا نازل أتابع الماتش
– ماتش!!!
– ماتش إيه ؟
ضحك وبصله بفخر:
– يابني الأهلى بيلعب السوبر النهاردة إيه هو الحب أخد عقلك ولا إيه؟
– لا ولله يعني الماتش أهم من جوازتي يا سيف
سيف بصله بضحك ووقف قدامه على السرير:
– وأهم مني شخصيًا أنتَ عاوزني اسيب الأهلي واروح اقعد فى اتفاقية جواز لا لا أنا مش بتاع الكلام ده خاالص
– لا بصراحة أمي عرفت تربي فيك.
سيف ضحك وإلياس بصله بغيظ وفتح باب الاوضة:
– يا ماااما، أنتِ يا نبع الحنان تعالي شوفي ابنكِ.
زينة دخلت ووقفت قدامه بخوف:
– فى إيه يابني مالك؟
– ابنكِ المُحترم عاوز يسيب اخوه علشان يروح يتابع الماتش.
زينة بصتله وكتمت ضحكتها:
– بصراحة يا إلياس يابني أنتَ اخترت معاد غلط يعني مش لاقي غير وقت الماتش نروح نطلب إيد البنت.
– لا ثواني كده هو حضرتكِ كمان عاوزه تتابعي الماتش زيه.
زينة بصت لسيف وضحكِت:
– لا طبعنا يا إلياس جوازتك أهم بس لو الأهلى فاز يا واد يا سيف رن عليا
سيف بص لإلياس المصدوم ووقع من الضحك:
– زوزا أنتِ مش بتهزقيني كل يوم ؟ بس أنتِ روحي روحي روحي.
– يا بختي الاسود
سيف كتم ضحكته ووقف جنبه:
– لا مهو بختك على حسب مين هيفوز،
– يعني لو الأهلى فاز وقتها بختك هيبقاا قمر ولو خسر بختك هيبقاا اسود أنتَ وعروستك.
إلياس هز رأسه بيأس وبصلهم:
– امممم طيب اتفضلوا انتوا الاتنين اطلعوا علشان اغير هدومي قبل ما تحصلي حاجه بسببكم.
سيف ضحك ولف دراعة حولين زينة وطلع وهو بيغني وإلياس فضل واقف متنح.
~~~~~~~~~~
– مالكِ يا حبيبة متوتره كده ليه
– بصراحه خايفه ماما تعمل مشكلة مع ألياس وأهله أنتِ عارفه أنها مش موافقة على الجوازه ديه
منة ابتسمت ورتبت على ضهرها:
– متخفيش يا حبيبتي بإذن الله خير
اتنهدت بخوف:
– يارب بس في حاجه تانيه مخوفاني اووي
– هي إيه
حبيبة بصتلها ببراءة:
– خايفه الأهلي يخسر السوبر يا منة
– منة خبطت ايدها على جبينها وبصتلها بيأس:
– لا هو بصراحة إلياس ربنا يكون فى عونه عليكِ.
– منة بقولكِ إيه أنا هنزل للضيوف وأنتِ تابعي الماتش وقوليلي مين فيهم هيفوز.
منة ضحكِت وقومتها:
– طيب قومي ياختي العريس قرب ييجي وبكره اسألي آدم مين فاز
– فكرة برضوا
منة رفعت رأسها وايديها لفوق:
– يارب صبرني.
~~~~~~~~~
بعد وقت كان ألياس و والدته قاعدين فى فيلا غانم ابراهيم
وقصادهم قاعد غانم وحبيبة وشيرين و والدتها وبيتفقوا على كل حاجه تخص جواز حبيبة وألياس لحد ما قاطعتهم شيرين:
– بس أنا عندي شرط يا ألياس لو أنتَ حابب تتجوز بنتي
ألياس بهدوء:
– اتفضلي حضرتكِ تقدري تشرطي
شيرين بجمود:
– شرطي إنك اول ما تتجوز حبيبة تعيش معانا هناا وتسيب بيت اهلك ولو موافقتش على الشرط ده معنديش بنات للجواز ودلوقتي القرار فى إيدك أنتَ.
كلهم بصولها بصدمة وخصوصا حبيبة اللي بصت لإلياس بخوف.
ألياس أخد نفس عميق وو…..
دلوقتي إلياس اصبح فى موقف صعب وما بين نارين والقرار فى ايده حبيبته ولا أهله ياتره هيختار مين؟
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية حب تخطى كل الظروف)
