رواية حب إجباري الفصل السابع 7 بقلم ميساء
رواية حب إجباري الجزء السابع
رواية حب إجباري البارت السابع
رواية حب إجباري الحلقة السابعة
وعمي يهز في روحه ويلطخ عرفتو فقد ماشي عالم ب روحو ، جبدت ولادي وقعدت في شومبرة .. عمي ما بطلش أخرج عليا متقعدش هنا بقى موراه حتى لي خرج ولا هدوء في دار غير صوتي أنا و ولادي نبكو. معلاباليش شحال فات الوقت وعمتي دور بطبسي الماء وترش وتردد شيطان ودخل عين وضربتنا بسم الله بسم الله ، احمد خرج وعمي يعاود والله ما يزيد يدخل داري ولادو أنا نربيهم وبنت خويا من ذرك ماشي مرتو حتى لي نموت .. وانا غير قاعدة نعاود في كلمة وحدة نطلقك اي نطلقك ومنبقاش هنا فاتت ساعات تيم رقد على رجلي ودمعة في عينيه وغزلان عند سمر وعمي وعمتي بقاو يتناقشو واش جاب عبير بعد هاذي المدة كامل نسمع فيهم وعقلي في غير عالم. نخمم كيفاه استغفلني وكيفاه ما فقتش بيه وكيفاه عطاه قلبه يكسرني وما خممش فيا حطيت تيم فوق لمخدة نضت وعيونهم عليا مهدرتش معاهم طلعت وغلقت الباب وقفت قدام لمراية حليت شعري ودموعي دايرة طريق تلمست وجهي ، واش رجعو لعبير قداه كنت غبية يقلي اني في خدمة ومصدقاتو ، المن هاذي صبغة المن هذا المكياج والشعر المن نجري ونجري باش غير راضي؟ هاذي تاليتها هكذا يجازيني عشرين يوم وهو عاقد ومعرس ومعيطتلو تتحجج على دواء وانا يا غافلين ليكم ربي. نسامحو؟ نرجعلو؟ نقتنع بالكذب تاعه ؟ واش راح يدير أكثر ملي دارو ايوب واحد نيسواني وميترباش ومتملي عينو غير #####. لمن راح نشكي منو يرجعلي حقي منو ويوقف في وجهه وهو ما يملى عينو حتى واحد ولا حتى يحترم عبد. بواش قصرت معاه معقولة ستغفلني لاني مدللاتو أكثر من اللازم ، دايما سمر تقلي اثقلي عليه متبقييش تجري قدامو ، شفتك مكيجة ومنضمة وريحتك سابقاتك واش ولا ايوب هذا حتى كل يوم تقول عليك عروسة جديدة اهملي روحك خليه يتمناك ديري روحك لاتية ب لولاد (باش تفهموا وتعرفو بلي راجل ماشي شرط تكون مرتو هاملاتو باش يشوف البراا ). نقلها لا هو يرجع تاعب من الخدمة يجي يشوف الراحة تامة ، نجيب ونشري غير الغالي حوايج نوم وغير لحوايج الله الله وانواع واشكال عارفاتو نيسواني وقداه مكيبر في عينو والو نقول نوليلو كل نساء ومنخليش حتى حاجة في نفسه ولا نخليه يشوف في وحدة. مهتمة بيه بماكلتو ولبسو شيبة وحدة في راسو مكانش احمد اصغر منه وشعرو معمر بالشيب اقرب ناس ليه أمه ديما تقلي من كثرة ماهو مرتاح حتى الكبر ما يكبر لي قده رأسهم معمر شيب. هل جزاء الاحسان الا الاحسان؟ يعني عبير دارت لي ميدروش الشيطان وحس بالتقصير جيهتها راح تزوجها باه يكفر عن ذنبه مليح وهذا لي درتو أنا كامل وشنو؟ راح هباء منثورا .. معليش يا ايوب والله غير ندمك عليها وآلله لميت شعري نحيت روبة المقطعة بدلتها لوحت خيمار وهبطت وانا قاسمة يمين معظم ما نبقى معاه ماعنديش أهل نروحلهم وهو متأكد وواثق راح نقعد ونسكت هاذي في أحلامه يزي بكاء يزي حرقان الدم ونوح عندي قداه من ساعة نبكي وضربت روحي وملختها واش حصلت واش شعلت وماطفيتش ذرك لازم نخمم بعقل احسن.
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية حب إجباري)
