رواية حبيبي يحب اختي الفصل الثالث 3 بقلم إيمان شلبي
رواية حبيبي يحب اختي الجزء الثالث
رواية حبيبي يحب اختي البارت الثالث
رواية حبيبي يحب اختي الحلقة الثالثة
-اغمي عليكي يانهار ابيض طب وبعدين ايه اللي حصل ؟
حطيت فنجان القهوه اللي كان في أيدي علي التربيزه وانا بهز اكتافي بلا مبالاه وثبات مزيف
-ولا حاجه فوقوني واتكرر المشهد للمره التانيه وطلب ايد داليا للجواز !
صاحبتي “لينا” بفضول:
-ومحدش حس بحاجه
-توء
بصيتلي بشفقه وسكتت لحظه وبعدها سألتني بهدوء
-اختك وافقت
ابتسمت ابتسامه حزينه وانا بهز راسي :
-ربنا يسعدهم
-انتي زعلانه
بصيت في كل الاتجاهات ماعدا عيونها وانا برد بتوتر :
-لا اكيد لا طالما اختي هتكون مبسوطه انا هكون مبسوطه
-متأكده؟!
سألتني بشك وهي بتقفل عينيها نص قفله
اخدت نفس عميق وانا بسند بظهري علي الكرسي وبهز راسي بحيره
-مش عارفه
-هو انتي بتحبي سليم ولا احمد ياريناد
رديت بحيره اكبر :
-برضو مش عارفه
-ازاي مش عارفه اومال مين اللي يعرف
-يعني معرفش بجد مش قادره احدد مشاعري ،مش قادره احدد انا بحب سليم ولا احمد ولا مش بحب حد فيهم من الأساس ،مشاعري متلغبطه ،محتاره وفي صراع بين قلبي وعقلي ،مش قادره احدد انا فرحانه اصلا ولا زعلانه ،انا فعلا محتاره محتاره اوي وتعبانه
قولت كلامي وحطيت وشي بين ايديا وانا بعيط بصوت مكتوم عشان محدش في الكافيه ياخد باله
أما عن “لينا” فضلت بصالي بحزن وشفقه وحاولت بكل جهدها تهديني من نوبه البكاء الهستيري اللي احتلتني فجأه بعد كتمان ليومين كاملين قدام اهلي
بعد شويه كُنا بنتمشي علي البحر بعد ما هديت شويه لكن مقدرش أنكر اني كان جوايا حزن مش قادره افهم ايه سببه !
لينا بابتسامه وهي بتمسك ايدي :
-هديتي
هزيت راسي بابتسامه مزيفه :
-اه
قعدنا علي سور البحر وفضلنا احنا الاتنين ساكتين وبنبص علي البحر اللي كانت أمواجه مضطربه ،مره هاديه ،مره بتخبط في الصخور بكل قوتها ،مره ساكنه تماماً ،وكأن البحر قرر يشاركني حيرتي واضطراب قلبي !
لفيت راسي وانا بسألها :
-هو اللي بيحب بيحس بأيه؟!
بصيتلي باستغراب :
-يعني ايه ؟
-يعني انتي مخطوبه عن قصه حب ،ايه هو مفهوم الحب بالنسبالك ،يعني بتحسي بأيه وانتي معاه ،ازاي قدرتي تتأكدي أنه الشخص المناسب
بصت قدامها وحركت رجلها بتلقائية في الهواء وهي بتبتسم بخجل
-احساس الحب مع الشخص المناسب مفيش اجمل منه
لما بكون معاه بحس براحه غريبه ،بحس ان قلبي مرتاح مفيش عليه اي حمل ،قلبي بيدق بأقصي سرعه ، عيوني بتفضل تبص لملامحه وعقلي بيطبعها ،ببقي علي طبيعتي معاه يا ريناد ،مش بحاول اتصنع عشان أعجبه ،لما بحتاجه بلاقيه ،لما بتضايق بجري عليه ،لما بحقق أي إنجاز بجري عليه فوراً عشان اشاركه فرحتي اللي مش بتكمل غير بيه
وانا معاه بحس اني خفيفه زي الفراشه
شوفت بوست من كام بيقول
في نظره أنا فراشة
آه لو يعلم
أنه لا يرى إلا تأثيره !
“شهد آل حجاج ”
تأثير وجوده في حياتي بيحسسني اني فراشة بتطير بكل خفه
بصيتلها بتشوش وحيره :
-ا انا عمري ما حسيت بأي احساس من اللي قولتي عليه ده
ابتسمت بهدوء :
-يبقي لسه الحب مدقش علي قلبك !
بصيت قدامي :
-معقوله ط طب وأحمد وسليم؟؟
-عمرك حسيتي وانتي مع احمد أن قلبك بيدق جامد
هزيت راسي بنفي وشرود
-طب سليم عمرك مثلا حققتي اي نجاح وحبيتي تشاركيه فرحتك؟
هزيت راسي بنفي للمره التانيه بيأس
-قلبك عمره ما دق في وجود سليم
-لا
ردت بسخريه :
-اومال حب ايه اللي بتتكلمي عنه لا مؤاخذه؟
فركت ايدي بتوتر وانا ببلع ريقي :
-معرفش بس بس يعني ا انا معجبه بالاتنين و….
قاطعتني بهدوء :
-هو انا ممكن أسألك سؤال يا رينو
-اسألي
-انتي ايه اللي عاجبك في سليم وأحمد
-سليم وسيم ،جد ،مثقف ،رياضي ،طموح ،كاريزما
احمد ،دماغه لاسعه ،جنتل ،رومانسي ،بيقول كلام حلو للبنات اللي مرتبط بيهم وكلامه بيعجبني!
بصيتلي وهي بتضحك بذهول :
-انتي بتتكلمي جد
رديت باستغراب :
-انتي بتضحكي علي ايه
-عليكي طبعا لا بجد ايه التفكير الغريب ده انا بقول عليكي عاقله
مطيت شفايفي وانا ببص قدامي بحزن وضيق :
-ايه الغريب في كده دلوقتي
اتنهدت وردت بهدوء وعقلانيه:
-ريناد حبيبتي احمد وسليم شخصيتين عكس بعض تماماً انتي بتحبي في احمد حاجات معينه مش موجوده في سليم والعكس صحيح بس لو جينا بقي للواقع انتي شخصيه بتحب النوعين يعني عايزه واحد ميكس
ولو كنتي اتجوزتي سليم مكنتيش هتقدري تتأقلمي معاه لان في حاجات ناقصه في شخصيته ولو اتجوزتي احمد برضو مكنتيش هتتأقلمي لان في حاجات ناقصه في شخصيته
وقبل كل الكلام ده انتي احساسك بيكون ايه وانتي مع كل واحد فيهم
هزيت اكتافي بحيره:
-ولا حاجه مجرد اعجاب
-يبقي انتي لا حبيتي سليم ولا احمد
-تفتكري ؟!
-جدا
اتنهدت وانا برد بحزن :
-اتمني اقدر احدد مشاعري في اقرب وقت
ًــــــــــــــــــــــــــــــــــــــــــــــــــــــــــــــــــــــــــــــــــــــــــ
رجعت البيت علي الساعه ٩ ولسه هدخل من باب العماره لقيت “يحيي ” في وشي
بصيتله بضيق وكنت ندخل من غير ما اسلم عليه بس هو سد الباب بجسمه اللي شبه البغل
رفعت حاجبي وانا برفع عيوني في عيونه :
-عديني لو سمحت
هز رأسه بنفي وبرود:
-توء
اتعصبت عليه وزعقت في وشه :
-بقولك عديني
-برضو لا
-هو في ايه يابني انت مستفز ليه!
هز أكتافه بحيره :
-هو انا مش طبعي اني استفز اللي قدامي بس انتي بالذات مش عارف ليه بحب استفزك
اخدت نفس عميق وانا بجز علي اسناني وبحاول اسيطر علي اعصابي
حطيت وشي في الأرض وانا ببتسم ابتسامه صفراء :
-طب بعد اذن حضرتك يا استاذ يحيي ممكن اعدي؟؟
رفع حاجبه بمراوغه:
-الاه ايه الادب ده كله
حسيت بالضغط ومقدرتش اكتم دموعي قومت معيطه قدامه وهو واقف يبصلي بذهول وصدمه
شاورلي بأيده وهو بيحاول يهديني بلهفه :
-خلاص خلاص والله هعديكي بطلي عياط
رفعت عيوني وانا بسأله بصوت مبحوح :
-بجد هتعديني
-والله اه بس بشرط
مسحت دموعي بكف ايدي زي الاطفال :
-ايه هو
-اعرف بتعيطي ليه ؟
رديت بضيق :
-انت مالك انت هو انت هتصاحبني ولا ايه؟؟
ضحك وهو بيرد بهدوء :
-لا انا ابن عمك مش صاحبك
-طب بعد اذنك بقي عديني لو سمحت
-طب ممكن اقول حاجه
نفخت بضيق وانا ببصله بتساؤل …
فرك في أيده بتوتر وهو بيبص في الأرض :
-انا اسف اني قولتلك فرصه مش سعيده ،واسف اني كنت بضايقك ،اوعدك أن ده مش هيتكرر تاني ،انا في العاده مش بحب ارخم علي حد اصلا اتمني تقبلي اسفي
فتحت بوقي ببلاهه وذهول وعقلي مش قادر يستوعب أن البني آدم ده اعتذرلي
-ريناد انتي كويسه
-هه
كتم ضحكته بصعوبه :
-بقولك انتي كويسه
بلعت ريقي بصعوبه :
-ا أه ا اه كويسه
-طب قبلتي الاعتذار
هزيت راسي بابتسامه رقيقه وانا بحط وشي في الأرض بأحراج
-حصل خير انت زي اخويا
رد بذهول مصطنع :
-اخوكي بعد كل ده اخوكي
رمشت بعيني اكتر من مره باستغراب وغباء ..
ضحك وهو بيقولي بمرح :
-بهزر ياستي في ايه
ابتسمت ابتسامه بسيطه :
-لا مفيش
بعد عن الباب وهو بيشاورلي بابتسامه لطيفه :
-اتفضلي
كنت لسه هدخل بس هو وقفني بلهفه
-استني
رجعت بضيق :
-ايه تااااني
خرج من جيبه شوكلت ومدلي أيده بابتسامه كلها احراج
-اتفضلي
وزعت نظري بينه وبين الشوكلت وانا منتظره منه تفسير أنه يهديني شوكلت من غير اي مناسبه
حك فروه رأسه بتوتر :
-ا احم بصي بصراحة أنا سرقتها من الواد احمد
ضحكت بذهول :
-سرقتها !!
-اه قولت يمكن وانا ماشي في الطريق اشوف مزه كده واشقطها بيها
-الاه
-ايه مالك
-يعني انت بتشقطني
هز رأسه بنفي ولهفه :
-لا لا والله انا بعتذرلك بيها
-طب والمزه
-لا انتي أهم
خدودي احمرت وحطيت وشي فى الارض وانا بقوله بهمس
-شكراً
ابتسم وهو بيشاورلي بأيده:
-يلا باي
رديت الابتسامه وانا بشاورله بهدوء :
-باي
اول ما مشي من قدامي حسيت بقلبي بيدق جامد وعيوني بتراقبه لحد ما اختفي نهائياً من قدامي
حطيت ايدي علي قلبي وانا بهز راسي بهستريه:
-لا لا لا أن شاء الله مش اللي في بالي أن شاء الله يكون عندي القلب ولا حاجه
ـــــــــــــــــــــــــــــــــــــــــــــــــــــــــــــــــــــــــــــــــــــــــ
– انتي عيد ميلادك النهارده ؟!
جاتلي ماسدج علي الواتساب من رقم غريب اول ما شوفتها استغربت لكن قدرت اعرف مين صاحب الرقم لانه كان حاطط صورته
فتحتها ورديت بسرعه :
-اه
عملي ريبلاي :
-كل سنه وانتي طيبه
بلعت ريقي وانا بترعش :
-و وانت طيب ش شكراً
-العفو
-هو انت عرفت منين !
-اممممم سر
نفخت بضيق :
-لا بجد عرفت منين
-البايو بتاع الفيس
رديت بذهول :
-بس انا مش كاتبه أنه عيد ميلادي ده مجرد تاريخ مش اكتر
-بس انا عارف انه عيد ميلادك لاني افتكر أنه كان في نفس اليوم معايا
رديت بصدمه :
-اي ده هو عيد ميلادك انت كمان
-اه
-كل سنه وانت طيب
-وانتي طيبه تسلمي ..تعرفي أن انتي الوحيده اللي قولتيلي كل سنه وانت طيب !
اتنهدت بحزن وانا بسند راسي علي السرير :
-وتعرف أن انت الوحيد اللي قولتلي كل سنه وانتي طيبه وسلمي صاحبتي برضو قالتلي
رد بمرح:
-الوحده ديه غريبه جدا
-الوحده ديه وحشه جدا !
-امممم ايه رأيك تيجي معايا
رفعت حاجبي مع ابتسامه بلهاء اترسمت علي وشي
-اجي معاك فين
-ناكل ايس كريم ونتمشي علي البحر شويه
ضحكت بذهول :
-دلوقتي!!!
-وايه المشكله
-المشكله أن احنا داخلين علي تلاته الفجر!
-مش هيحصل حاجه ،طب بذمتك مش نفسك تتمشي الفجر مع حد وتاكلي ايس كريم
سكتت لحظه وانا ببص للماسدج بحيره وتفكير لحد ما اخدت القرار
-انا موافقه بس خايفه بصراحه
-وانا كمان خايف بس مش عليا خايف عليكي
-طب وبعدين ؟
-استأذن عمي
-بابا نايم
-خلاص يبقي نتسحب براحه ونخرج من البيت نص ساعه ونرجع ولا كأن حاجه حصلت
-اممممم طيب اوكي هلبس واكلمك
وفي الحقيقه بالرغم من أنها كانت مغامره خطيره نوعاً ما لكني كنت متحمسه جدا اعمل كده
مكنتش فاهمه اشمعني “يحيي” بالذات اللي وافقته علي حاجه زي كده لكن نقدر نقول اني بالرغم من خوفي كنت متطمنه!
تناقض غريب فعلا بس انا فعلا كنت خايفه ومتطمنه في نفس الوقت ،خايفه حد من أهلي يكتشف اني مش موجوده الساعه اربعه الفجر وفي نفس الوقت متطمنه أن يحيي اكيد هيتصرف ومش هيسيب حد يأذيني
اخدت نفس عميق وابتسامه غريبه اترسمت علي وشي وانا بتخيل نفسي ماشيه معاه علي الكورنيش وحاطه ايدي في ايده وسانده راسي علي كتفه وكأني بطله من ابطال افلام الابيض والاسود بتاعه زمان وهو ملجأي الأمن …
ـــــــــــــــــــــــــــــــــــــــــــــــــــــــــــــــــــــــــــــــــــــــــ
“الليل وسماه ونجومه وقمره وانت وانا ياحبيبي انا ياحياتي انا كلنا في الحب سوا”
كُنا قاعدين احنا الاتنين علي سور البحر وبنحرك رجلينا بتلقائية وبنبص علي البحر بشرود وفي ايد كل واحد فينا ايس كريم نفس النكهه !
وصوت الست طالع من الراديو عند الراجل بتاع الذره
كان جو لطيف ،رومانسي ، يستحق عشره من عشره ونجمه وقلبي يدوب جوا قلبه
-مؤمنه بالحب ؟
اتنهدت تنهيده طويله وانا بهز راسي من غير ما ابصله:
-جدا لدرجه بفضل اتخيل قصه حب زي الروايات أو الافلام الرومانسيه
-تفتكري ممكن نحب حد من اول مره نشوفه !
سكتت لحظه وانا بفكر في سؤاله شويه وبعدها لفيت وانا برفع عيوني في عيوني
-اه
-ازاي ؟
-بتلاقي نفسك اتخطفت من غير ما تحس للشخص اللي قدامك
رد بمرح :
-ده احساس نابع من جواكي ولا كلام روايات برضو
ضحكت وانا بهز راسي بنفي:
-كلام روايات برضو
-انتي عمرك حبيتي
اتوترت وبصيت قدامي وانا برد بصوت مهزوز :
-لا
-ولا أنا
رديت باستغراب :
-ده بجد
-والله
-ازاي ده مفيش شاب عمره ما حب
هز أكتافه بحيره :
-انا عمري ما حبيبت
-طب ليه مع أن انت كنت في لندن يعني وقدامك بنات اشكال والوان
ضحك جامد وبعدها بصلي ورد بجديه:
-بس دول للبص بس انما حب وجواز والكلام ده انا يوم ما افكر يبقي مع بنت محترمه اشوفها ام لأولادي
هزيت راسي بتفاهم وانا ببتسم بهدوء :
-ربنا يرزقك ببنت الحلال
-هو انا ممكن اسالك سؤال ؟
-اتفضل
-ا احم اليوم اللي “سليم ” اتقدم فيه لأختك ليه اغمي عليكي
وشي اصفر وقلبي اتنفض وانا ببص في كل مكان إلا عيونه وبرد بصوت مهزوز مع ابتسامه مصطنعه
-ل لا عادي يعني ا اصل ا اصل يعني انا اوقات بيجيلي هبوط كده
رد بشك :
-متأكده
-اكيد
-امممم تمام، بقولك ايه صحيح
-ا ايه
قرب مني وهمس في ودني برقه :
-شكلك زي القمر
خدودي احمرت من الاحراج وقلبي فضل يدق جامد بسبب قُربه المُريب
بلعت ريقي وانا برد بصعوبه وصوت مبحوح :
-ش شكراً
-نروح؟
هزيت راسي مع ابتسامه رقيقه ..
نزل مع علي السور ومدلي أيده عشان انزل
بصيتله لحظه وبعدها حطيت ايدي في ايده ونزلت
مشينا من المكان واحنا شابكين ايدينا في بعض وجوايا رغبه مُلحه احقق حلمي اللي اتمنيته من سنين
حطيت راسي علي كتفه وانا بتعلق في دراعه وببص قدامي بابتسامه لطيفه وجوايا شعور بالأمان عمري ما حسيته في يوم
اما عنه نزل رأسه وبصلي بابتسامه جميله خطفت قلبي وعقلي وانا !
وصلنا البيت كانت الساعه خمسه واتسحبنا بهدوء لحد ما قدر كل واحد يوصل لأوضته من غير ما حد يحس
اول ما دخلت اوضتي اتصل بيا
رديت بلهفه :
-الو
-شكراً
-علي ايه
-شكراً انك شاركتيني اليوم ده ،انا طول عمري حاسس اني لوحدي ،النهارده بس حسيت بالونس في وجودك
قلبي دق ورسمت ابتسامه واسعه علي وشي وانا برد بصوت حاولت يكون ثابت
-انا كمان بشكرك اول مره احب يوم عيد ميلادي اوي كده
رد بأحراج :
-ط طب يلا تصبحي علي خير
-وانت من أهل الخير
ـــــــــــــــــــــــــــــــــــــــــــــــــــــــــــــــــــــــــــــــــــــــــ
بعد مرور شهر
-انا بحب
قولتها فجأه وانا قاعده مع لينا صاحبتي في كافيه الكليه
رمشت بعيونها اكتر من مره في محاوله للاستيعاب
-ايه مالك ؟
-بقولك انا بحب
ردت ببلاهه:
-بتحبي مين احمد ولا سليم
هزيت اكتافي بلا مبالاه :
-ولا ده ولا ده
-الاه!
-ايه؟
حطت ايديها علي جبيني باستغراب :
-انتي تمام ؟
-يوووه بقي انتي بتتريقي عليا
-لا والله بس انا من ساعه ما عرفتك وانتي قارفاني بسليم وأحمد مفيش في حياتك غيرهم
رديت بضيق:
-لا خلاص سليم خطيب اختي واحمد مش شبهي
ابتسمت بخبث:
-يحيي مش كده
بصيتلها بذهول :
-عرفتي منين
-مجرد استنتاج مش اكتر
حطيت وشي في الارض بأحراج وانا بهز راسي بخجل :
-ايوه يحيي
-طب واحمد وسليم اللي طول عمرك محتاره ما بينهم
-سليم في حاجات كتير حلوه بس برضو في حاجات ناقصه معتقدش اني اقدر اتعايش معاها ،وكذلك احمد ،ده غير اني عمري ما حسيت بأي احساس من نحيتهم زي اللي انا بحسه مع يحيي
-بتحسي بأيه!
-الامان
-بس؟
-الامان اكتر كلمه ممكن تلخص احساسي
وانا معاه بحس اني متطمنه مش خايفه من اي حد مش خايفه من اي حاجه مش خايفه من مستقبلي مش خايفه علي قلبي
-طب وهو عارف انك بتحبيه
ابتسمت بخجل :
-امبارح عرض عليا الجواز
ردت بلهفه :
-بجد وانتي قولتي ايه اكيد وافقتي مش كده
هويت راسي بإحباط :
-توء
فتحت بوقها ببلاهه:
-نعم رفضتي يعني
-يابت لا انا قولتله اني هفكر
ضربتني علي دماغي بغيظ :
-انتي لسه هتفكري ياللي ربنا يبتشليكي بمصيبه قومي فزي كلميه وقوليله انك موافقه
بصيت حوليا بتوتر :
-ب بس احنا دلوقتي في المدرج وعندنا محاضره
-ان شا لله نكون علي القمر يلا قومي بلا تعليم بلا زفت الوحده ملهاش غير بيت جوزها
هزيت راسي بتأكيد وانا بقوم من مكاني وبخرج من المحاضره وسط استغراب الطلاب
لسه هخرج لقيت الدكتور في وشي
رفع حاجبه يتساؤل:
-رايحه فين يا انسه
رديت بتوتر :
-هه ه هكلمه هكلم يحيي واقوله اني موافقه
رد باستغراب :
-موافقه علي ايه
رديت بتلقائية:
-ع علي عرضه ا اصل هو عرض عليا الجواز وانا كنت بفكر و و….
ابتسم بتفاهم وهو بيشاورلي بأيده :
– تمام تمام اتفضلي بس متتأخريش
ابتسمت بخجل :
-حاضر شكرا يادكتور
خرجت وانا باخد نفسي بتوتر وضغطت علي رقم يحيي اللي رد فوراً وقبل ما ينطق كلمه قولتله بسرعه
-انا موافقه
سكت لحظه وكأنه بيحاول يستوعب وانا وافقه علي اعصابي وببص يمين وشمال بتوتر
-ا انت معايا
-هه ا اه ايوه انا معاكي م معلش انتي قولتي ايه
رديت بنبره كلها حب:
-موافقه اني اتجوزك موافقه اكون الونس في كل وقت وأي مكان موافقه اسلمك قلبي
انا استنيت كتير علشان عيني تلمع اللمعه دي للشخص الصح ، انا عيني مبتلمعش كده غير وانا بتكلم معاك ، وانا مبسوطه وانا معاك ، وانا بجري وبهزر وبضحك وبتنطط معاك ، كل مره بنتكلم فيها بحس بنفس الانبهار كأن أول مره نتكلم ، بحس روحي خفيفه جدا وطايره م الفرحه وانت جمبي
رد بفرحه :
-انا بحبك
-وانا كمان بحبك اوي
(في قلب عاوزِك وشايفِك فُرصِته وأملُه
فَ اديلُه فُرصه أخيره
لوكنتي بِتحبيه).♥️
تمت..
لقراءة الرواية كاملة اضغط على : (رواية حبيبي يحب اختي)
