رواية لعبة الحياه الفصل العاشر 10 بقلم حنين الماضي

رواية لعبة الحياه الجزء العاشر

رواية لعبة الحياه البارت العاشر

رواية لعبة الحياه الحلقة العاشرة

ملك أطلقت للمرة الثانية ومرة واحدة لقت نفسها بقت لوحدها بعد ابوها ما توفى ،الدنيا اسودت فى عينيها ومش عارفة تعمل اية واخواتها سابوها وبقوا كل واحد فى بيتة ومتكلين أن ملك بعد ما اتطلقت هتقعد مع مامتها تخدمها وتبقى كدة ريحتهم من الالتزام بخدمة امهم 🙂
وفعلا ملك بقت مسئولة عن مامتها فى اى مشوار خاص بدكتور أو نزولها تجيب التموين أو اى زيارة حابة تروحها ،فكانت ملك هى اللى بتعمل كل دة ومن زهقها نزلت ملك تروح لشهد يقعدوا مع بعض زى ما كانوا اطفال يفضفضوا مع بعض ويشوفوا الحياة لعبت بيهم ووصلت لحد فين 👇
ملك : ازيك يا شهد وحشتينى اوى
شهد : ازيك يا ملك عاملة أية
ملك : الدنيا لعبت بيا وبهدلتنى اوى يا شهد
شهد : 🙂 انا الدنيا من يوم ما اتولدت وهى مبهدلانى يا ملك
ملك : انا بقعد اقول لنفسى ازاى استحملتى كل دة
شهد : كنت هعمل أية غصب عنى
ملك : انا اخر حاجة اعرفها عنك لما اتخانقتى مع جدتك وخالك جة خدك تعيشى معاة
شهد بتنهيدة : يااااة يا ملك دى حاجات كتير اوى اتغيرت
ملك : انا جيت اسمعك وتسمعينى زى زمان قوليلى حصل معاكى اية
شهد : يوم ما جدتى استفزتنى وشتمتنى بأبويا وهددتنى انها تطردنى طبعا كلمت خالتو صباح وبصراحة دى اكتر واحدة فى حياتى بحبها جدا هى اكتر واحدة وقفت معايا يكفى انها كانت بتطبطب عليا فى وقت اقرب الناس ليا هربوا منى ، المهم جة خالى وخدنى ورحت فعلا وكنت إلى حد ما مرتاحة بس كل واحد عندة همومة ومسئولياتة والتزاماتة فكنت بشتغل على نفسى اكتر واكتر وكل جنية كان بيجيلى كنت بحوشة واستخسرت حاجات كتير فى نفسى وفضلت اخد كورسات جنب دراستى وأطور نفسى فالرسم عشان اقدر اثبت موهبتى .
ملك : كورسات يا شهد ! كنتى خلصى تعليمك الاول وبعدين شوفى موضوع الكورسات دة
شهد : مكنش ينفع يا ملك لانى كنت عاملة حسابى اتخرج اشتغل على طول ،ومضيعش وقت تانى وافضل مستنية العيدية من العيد للعيد عشان احوش واخد كورسات .
ملك: طيب وباباكى محاولش يبعتلك فلوس
شهد بحزن : 🙂 بابا كأنة نسى أن عندة ولد وبنت اصلا واكتفى بمراتة وبنتها واستقر فى اسكندرية وطبعا مكنش ينفع ارجع للذل دة تانى ،دة غير أن الكلية كدة والكورسات بعيد جدا وسفر من اسكندرية للقاهرة .
ملك : ايوة صح عندك حق وكمان اكيد مش هترجعى لمرات ابوكى دى تانى ونفس الذل .
شهد : كان صعب اتعامل معاها تانى ،خصوصا أن شريط طفولتى بيعدى قدامى وافتكر محمد اخويا وهى بيعيط من الجوع وخايف ياكل لحسن تضربة وافتكر نفسى وانا تعبانة وهى تتعمد تخلينى اقوم اهد الشقة وابنيها تانى من غير رحمة انى طفلة ومن حقى العب ،لكن تخيلى هى كانت غيرانة من أمى بالرغم أن امى مافيهاش حاجة تغيير منها عليها .
ملك : طيب لية مارحتيش عند شقة باباكى مع عمك تقعدى فيها بعد ما سابها وتخلصى من كلام جدتك !؟
شهد : لان دة بيت عيلة وابويا باع الشقة لعمى
ملك : طيب ما كان عمك كويس ،معتقدش هيقولك حاجة لو قولتيلة عاوزة اقعد فيها .
شهد : مكنش ينفع لان مراتة كانت هتفتكر أنى برسم على انى اخد الشقة ليا ، دة غير أن فى مرة كانت داخلة العيد الكبير تعبت وانا عند جدتى جدا جدا وخالتو صباح جريت بيا على المستشفى واتحجزت فيها من قلة المناعة كان بيغمى عليا وخالتو صباح امكانيتها على قدها وانا كنت محتاجة مصاريف للمستشفى والعلاج فقولت اكلم بابا ، لكن للأسف مكنش بيرد فقولت يمكن مشغول أو مش شايف التليفون مثلا ، فقولت هبعت رسالة اقولة أنى تعبانة يا بابا وكل يوم بعلق محاليل كتير ومش قادرة اقف ومحتاجة فلوس اتعالج ونفسى اشوفك يا بابا وتاخدنى فى حضنك زى زمان اكيد لما تحضنى هخف ولو زعلان منى انا اسفة تعالى انت بس وانا اصالحك عشان انا محجوزة فالمستشفى ومش قادرة اقف .
ملك بدموع : حبيبتى يا شهد واكيد جة بسرعة صح ؟
شهد بحسرة : ولا رد على اتصالاتى ولا كأنة قرأ رسالتى اصلا ومحاولش يجى يزورنى ولا يكلمنى ومبقاش يسأل عنى ولا عن محمد ولا حتى ماما كلفت خاطرها تيجى تشوفنى فالمستشفى 😭
ملك : حبيبتى يا شهد طب عمك
شهد : حتى عمى كأنة ما صدق انى مشيت من البيت ولما بردوا بعتلة أنى تعبانة مجاش يشوفنى ولا بعت اى فلوس عشان علاجى
ملك : يااااة للدرجادى قلبهم حجر
شهد : عارفة يا ملك ، كنت زمان يشوفهم فالاعياد ويدونى عيدية لحد ما تعبت مبقاش حد يجى لا عيد ولا غير عيد واتقطعت اخبارنا عن بعض
ملك : يعنى من ساعتها مشوفتهمش
شهد : تخيلى شوفتهم ،كنت معزومة فى فرح المفروض عمى فية هو وولادة ومراتة ،رحت الفرح واول لما لقيتة قدامى دورت وشى وعملت نفسى مش شيفاة ولا كأنى اعرفة ،كنت خدت قرار بعد خروجى من المستشفى انا مش هشحت اهتمام وحب حد تانى لانى كنت بموت فعلا .
ملك : يااااة يا شهد وانا اللى جاية اقعد جنبك عشان تاخدينى فى حضنك واشتكيلك همى وتهونى عليا طلعتى مهمومة زيى انا كمان
شهد.: انا كنت اطمنت عليكى وعرفت انك اتجوزتي
ملك : يوم ما خرجت من بيت ابويا كانت أكبر غلطة عملتها وانا اللى عملت كل دة فى نفسى
شهد : لية جوزك مش كويس ؟
ملك : دة كان أحقر راجل قابلتة ولا اقولك لالا انا كنت ماشية فالطريق الصح لكن اتعميت ومشيت غلط والغلط جاب غلط ووصلت للمنظر اللى قدامك دة
شهد : احكيلى عمل فيكى اية
ملك : قبل سامح كنت قولتلك انى اتعرفت على واحد من الفيس اسمة تامر ودة كان اكتر شخص حبنى بجد وانا حبيتة ويعتبر هو الحب الاول والاخير ، لكن بغبائي لما جت مرات عمة وقالتلى أن تامر مش كويس وانة عمل حاجة من ورا فى ابنها ،ساعتها قرفت من تامر ومبقاش عندى الجرأة اقولة مرات عمك قالت عليك كذا
شهد : بس انتى غلطانة كنتى لازم تواجهيه
ملك: مقدرتش كان صعب عليا وعقلى ساعتها دلنى غلط
شهد : وطبعا بعدتى عنة وسيبتية
ملك : وطلع ارجل واحد شوفتة فى حياتى وللأسف بعد كدة عرفت أن مرات عمة دى طلعت كدابة وكانت بتعمل كدة عشان كانت بتغيير من تامر وانة محبوب عن ابنها ومكنتش بتحب تشوفة فرحان بالرغم أن جت فترة كان عايش معاها فى بيت عمة لكن سابة من كتر ما كان حاسس بغيرة مرات عمة منة وانا للأسف ترجمت الموقف دة أنة حصل نتيجة أن تامر غلط مع ابنها 😭 شوفتى خيبة كدة.
شهد : طيب لما عرفتى الحقيقة كنتى روحى قوليلة
ملك : كان عدا الوقت لانى كنت اتجوزت وللاسف ربنا رزقنى بواحد الحياة عندة ضرب وشتيمة وإهانة لحد ما أطلقت منة ومن سامح لواحد اسمة علاء لواحد لواحد من هنا لهنا وكلهم اختيارات غلط لحد ما تعرفت من الفيس على مصطفى وكنت متخيلة أن دة هيعوضنى لكن للأسف طلع نفس الكلام إهانة وعصبية غير انى كنت خلفت من سامح بنتى وخدتها معايا طبعا ولما جيت وفكرت ارجع لسامح بابا قال تعالوا اقعدوا فى الشقة هنا فى بيت بابا لأنها فى دور عالى وبابا هياخد شقة تانية قريبة منى فى دور ارضى عشان السلم بيتعبة وياريتنى ما وافقت
شهد : لية ما كدة احسن
ملك : بابا كتب الشقة بأسمى وأم سامح كانت معترضة على الجوازة اصلا ،لكن بعد الطلاق بالصدفة بلم كراكيب من اوضتى لقيت أية تخيلى
شهد : أية ؟
ملك : لقيت طرحة من عندى مش جديدة،، معقودة اربع ربطات وفى كل ربطة شعر
شهد : قصدك ايه
ملك : طلع عمل ليا بالحزن ووقف الحال
شهد : 😱😱 مين عمل كدة
ملك : مافيش غير اتنين حماتى أم سامح لأنها بعد ما رجعت لسامح تانى مرة كنا مبسوطين جدا جدا وهو كان فعلا اتغير لكن فى يوم عرفت انها أصرت تيجى البيت وانا مش موجودة ومشيت وانا مش موجودة ومن بعدها الحياة بينى وبين سامح انقلبت لدرجة محدش كان يقعد فالبيت والتانى موجود .
والتانية مرات اخويا لأنها بتكرهنى طول عمرها بسبب دلع بابا ليا.
شهد : اعوذ بالله للدرجة دى أذية ؟
ملك : لعلمك كانت حزينة يوم ما ولدت بنتى وقالت أنا عاوزة ولد وأهى جوزتة دلوقتى وقعدتة معاها فى نفس البيت وجابلها الولد اللى عاوزاة وعملت نفس الشئ مع إخوة وطلقتة من مراتة وجوزتة واحدة على مزاجها وخلت ولادها الاتنين واحد ساكن فوقيها وواحد تحتها .
شهد : وانتى ناوية على اية
ملك : والله ما عارفة يا شهد انا حاسة الحياة عمالة تلعب بيا زى الملاهى يوم فوق وعشرة تحت وبقيت دلوقتى لوحدى مافيش غير بنتى وأمى ، لكن مصطفى عمال يكلمنى ويلح عليا نرجع لبعض وانا محتارة اوافق ولا لاة ؟
انا كان كل حلمى زى اى بنت اعيش قصة حب واتجوز واخلف ويبقى بيتى هو كل حياتى والاقى حد يطبطب عليا ، انا يا شهد بعد موت ابويا اتكسرت اكتر واكتر 😭
شهد : 😭😭 كنت فاكرة إن انا بس اللى الحياة لعبت بيا لعبة غصب عنى لكن هى دنيا مش مريحة مليانة بشر ميعرفوش حاجة عن الرحمة ولا الحرام والحلال.
ملك : طيب وانتى ناوية على اية يا شهد
شهد : ما انا مكملتكيش انا لما رحت عند خالى مافيش كام يوم وجدتى جت تعيط وزعلانة انها رجعت تقعد لوحدها تانى وقعدت تتحايل عليا وعلى خالو ارجع اعيش معاها تانى وانا قعدت اقولها لا انا زهقت من الشتيمة ومبقتش قادرة استحملها ، قعدت تبوسنى وتقولى أنا غلطانة حقك عليا أنا ست عجوزة وكبرت ومش هعمل كدة تانى
ملك : ووافقتى ترجعى معاها ؟
شهد : رجعت؛؛؛ صعبت عليا لما قعدت تعيط ولقيتها عاوزانى مقدرتش اعمل زى بابا وماما وعمى لما مسكت فيهم وهما مشيوا وسابونى
ملك : طيب بتصرفى على نفسك ازاى دلوقتى
شهد : انا يا ملك الحمدلله قدرت اثبت نفسى وبقيت برسم بورتريهات وبدخل بيها مسابقات وبقدمها فى معارض والفلوس اللى بتجيلى من اى بورتريه بصرف بيها على نفسى و بقى ليا اسم معروف إلى حد ما وممكن ارسمك على فكرة وقت ما تحبى وعندى صفحة على الفيس شغلى عليها .
ملك : بجد يا شهد برافوا عليكى انا فرحانة بيكى جدا وان شاء الله ربنا هيوفقك وتكونى فى يوم عندك معرض بأسمك وبكرة باباكى ومامتك هما اللى يتحايلوا عليكى عشان يكلموكى .
شهد : بس انا مش عاوزة اعرفهم انا بس عاوزة اثبتلهم أنى قدرت احارب فالصخر لحد ما وصلت
ملك : مبروك يا قلبى
__________________
فى يوم دخلت بنوتة رقيقة عالخاص لحنين وقالتلها عندى قصة مؤلمة وفيها عبرة عاوزة احكيهالك يا حنين ولو شايفة انها تنفع رواية قوليلى رأيك ؟
وفعلا حنين قرأت كل الشات الخاص بشهد ووافقت تكتبها لكن حنين سألت شهد أية هدفك من كتابة قصتك ؟
شهد قالتلها أنى اكون عبرة لأى ام وأب يفكروا يتنازلوا عن أولادهم لان انا قدرت احافظ على نفسى لكن غيرى ممكن ميعملش كدة .
_________
حنين : مين انتى ؟
ملك : انا حابة تكتبى قصتى يا حنين .
حنين : أية هدفك من القصة
ملك : أن ممكن يكون قدامنا طريق صح وبسبب قلة عقل ،،،الغلط يجيب غلط والحياة كلها تكون غلط وانا ندمانة دلوقتى
حنين : تمام موافقة اكتبها
______________________
حنين كتبت قصة شهد وملك من بداية حياتهم مع اختصار لبعض التفاصيل فى حياة ملك لان المضمون كان اتقال،
فالنهاية وبعد عرض قصة ملك ، انا رأيى كحنين لملك 👌👌 اوعى ترجعى لمصطفى اوعى لأنك كدة هتكونى لسة مستمرة فالغلط انتى مش كبيرة عشان تقولى مافيش قدامى بدائل بالعكس كملى شغلك وبلاش معرفة الفيس دى يا ملك وراعى بنتك كويس جدا واتعلمى من تجربة شهد .
________
بالنسبة لشهد اتمنالك التوفيق يا قلبى وفعلا أنا سعيدة جدا جدا باللى انتى وصلتى لية ودلوقتى كل الجروب هيعرف انك بترسمى بورتريهات تحفة انا عن نفسى شوفتها وعجبتنى جدا واللى عاوز شهد ترسملة بورتريه يقدر يتواصل معاها لانها فعلا فنانة موهوبة وانا هنزل بعض من البورتريهات اللى شهد بعتتها ليا فالتعليقات .
_________________
توتة توتة خلصت رواية لعبة الحياة واتمنى اكون وفقت فى عرض الرواية واكون قدرت اوصلكوا مشاعر الابطال ، واتمنى اكيد أن الابطال يكونوا راضيين عن طريقتى فى عرض قصتهم وفالنهاية احب اقولكوا أن ملك وشهد فالوااااقع ملهمش اى علاقة ببعض ،لكن كل واحدة منهم كان ليها قصة عكس التانية وبدل ما اكتب كل قصة لوحدها ،حبيت اعمل تغيير وادمج الشخصيتين مع بعض، اتمنى اكون وفقت فى قرارى دة .