رواية جحيم أنس الفصل الرابع 4 بقلم أحمد نبيل
رواية جحيم أنس الجزء الرابع
رواية جحيم أنس البارت الرابع
رواية جحيم أنس الحلقة الرابعة
تدخل انس غرفة نانيس وتبحث في متعلقاتها
انس : مهو لازم هلاقى حاجة تاكدلى انها بتتاعطى مخدرات
كريم يتابعها دون تعليق
انس : اللى بعت الهدية امبارح كان عندوا حق ماهو اللى عايز يقتلنى مش لازم يضربنى بسكينة في ظهرى لا ممكن يقتلنى بافعاله واختك عملت كده قتلتنى وابوك عمل كده قتلنى
كريم ينظر لها ولا يعلق
انس (تبكى) : أنا السبب أنا السبب
يحتضنها كريم ويقبل رأسها
تشعر انس بدوار وتفقد وعيها وتسقط على الارض
…………………………………
مكتب الجمال للاستثمار العقارى
يدخل سيد مكتبه ويرتمى على أحد المقاعد
صوت من خلفه : حمد الله على السلامة
يلتفت سيد الى الصوت ويجد صافى أمامه – فتاة في الثلاثين من عمرها – ترتدى ملابس خارجية مثيرة
بحدة : انت … انت جيتى امتى
صافى : اعمل ايه قولت اجى الشغل بدل ما انت مطنشنى ومش عايز تيجى البيت
سيد : يا دى الموال الأسود مقلتلك هجى النهاردة
صافى : بقولك ايه يا سيد هي الأستاذة شده عليك ولا ايه
سيد : ملكيش دعوة بيها وخليكى في نفسك
صافى : براحتك … كلوا بعض انتوا الاتنين
سيد (وهو يجذبها نحوه) : وانت مالك محلوة اوى كده ليه
صافى (وهى تبعده عنها) : أنا حلوة علطول وبعدين ابعد عنى مش انت مطنشنى
سيد : وانا اقدر … دا انتى الحتة اللى في القلب وغيرك مفيش
صافى : ايوه كل بعقلى حلاوة عشان انسى اللى طلبته منك
سيد : بقولك ايه انا بقالى يومين في مشاكل ومش عايزك تكملى عليا
صافى : وانا لما افكرك بفيلا الشيخ زايد ابقى بكمل عليك
سيد : اتباعت والله ياحبى … اصبرى انا هوقعلك حاجة على مقاسك
صافى : على مقاسى برده انت من ساعة مجوزتك ومخدش منك غير كلام وبس
سيد : نعم وال 100 ألف اللى حطتهم في البنك في حسابك والدهب اللى جبتهولك شوفى يساوى كام دلوقتى
صافى : انت بتعد عليا بقى الحاجة طب خلى بالك بقى يا سيد أنا زهقت ومش هكمل
سيد : بقولك ايه أنا اللى فيا مكفينى متيجى نقضى ليلة حلوة النهاردة وبعدين نهرى فأى حاجة بعد كده
صافى : لأ يا حبيبى ميرسى معطلكش وحتة الورقة اللى بينا نقطعها دلوقتى
سيد : وهى اللى بينا ورقة برده يا صوصو
صافى : هو في حاجة تانية وبلاش صوصو دى قلتلك كذا مرة
سيد : طب بلاش صوصو خليها صفاء كده زى ما هيا
صافى : أنا اسمى صافى وبس
سيد : طب يا صافى وبس ايه اللى يرضيكى
صافى : يووووووه اللى هنقوله هنعيده واللى نعيده نزيده انت مش بتزهق خلص بقى وقطع الورقة
سيد : طب بقولك ايه أنا هعوضك بحتة شقة في عابدين تحفة
صافى : عابدين ايه وبتاع ايه أنا بقولك فيلا في الشيخ زايد تقوم تقولى عابدين
سيد : يا بت افهمى دى شقة لو بعتيها تجبلك دلوقتى مليون جنيه مستريح
صافى : ودى شقة مين بقى انشاء الله
سيد : انت مالك بقى انت ليك اكل ولا بحلقه
صافى : ماشى لما اشوف اخرتها معاك
سيد : طب يلا بقى
صافى : لما اشوف عقد الشقة باسمى الأول
سيد : يا سلام بكره يبقى معاك
صافى : خلاص وانت كمان بكره بقى
سيد (وهو يخلع الجاكيت الذى يرتديه) : بقولك
ايه كده جبتى اخرك معايا احنا نقفل النور
ونجيب درف المكتب
…………………………………………
بيت انس صباحا
يستيقظ كريم من نومه ويخرج الى الريسيبشن ويجد انس تجلس على أحد المقاعد
كريم : ماما … انت ايه اللى خرجك من اودتك
انت تعبانه … ولا عايزة يغمى عليك تانى
انس : انا بقيت كويسة خلاص
كريم : طب وبعدين اللى بتعمليه فى نفسك ده … انت ناسية ان دماغك لسه تعبانة
انس : مش مهم أي حاجة المهم اختك تخرج
كريم : طب كلمتى بابا
انس : ابوك تليفونه مقفول هو فاضى لحد
كريم : طب انا هحاول اتصل بالمحامى
انس : انت معاك تليفونه
كريم : ايوه معايا كنت خدته من بابا في مرة
انس : وساكت وانا سألتك امبارح على تليفونه قلتلى مش معاك
كريم : كنت عايزك تريحى نفسك شوية خصوصا انى عارف ان الموضوع هيقعد للنهاردة
انس : ماشى يا كريم حتى انت بتكدب عليا
كريم (وهو يقبل يدها) : معلش يا ست الكل انا خايف عليكى
انس : طب اتصل بيه بسرعة شوف اختك اخبارها ايه
كريم : حاضر
جرس الباب يرن
انس (تقف) : اختك رجعت
كريم (وهو يتجه نحو باب الشقة) : معقول يكون الموضوع خلص بسرعة كده
يفتح كريم ويجد أمامه نانيس
كريم (وهو يتنهد بعمق) : حمد الله على السلامة
تدخل نانيس وتسرع نحو انس
نانيس : اسفة يا ماما حقك عليا
تحتضنها نانيس
نانيس : أنا شوفت ليلة عمرى ما هنساها
كريم : مش انت اللى عملتى في نفسك كده
نانيس (تبكى) : أنا معملتش حاجة
كريم : لسه بتكدبى واللى عملتيه في ماما وفيا
كل ده بسبب ايه
انس : خلاص يا كريم الموضوع خلص ادخل
انت استريح
كريم : لا استريح ايه بقى أنا لازم اروح الجامعة كفاية امبارح
انس : بس انت لسه تعبان
كريم : انا بقيت كويس يا ماما اطمنى
يدخل كريم غرفته
نانيس : أنا هدخل انام مش قادره
تهم نانيس بدخول غرفتها
انس (توقفها) : انت بتتعاطى مخدرات
نانيس (بارتباك) : ماما انت بتقولى ايه
انس : ايه هتكدبى عليا
نانيس : ماما أنا تعبانة … كفاية اللى حصل خلينا نهدى شوية
انس : أنا بفكرك انت بنت الأستاذة انس مديرة مدرسة احمد زويل للبنات يعنى سمعتى وسمعتك اهم حاجة عندى
نانيس (وهى تفرك عينيها) : عارفه يا ماما واطمنى بس ياريت ننسى كل اللى حصل لو سمحتى
انس : وتفتكرى اللى حصل يتنسى
نانيس (تتنهد بعمق) : أنا هدخل أنام
تدخل نانيس غرفتها
تتابعها انس دون تعليق
……………………………………….
مكتب الجمال للاستثمار العقارى
يستيقظ سيد من نومه ويجد نفسه مرتمى على الأرض
يمد يده ويلتقط هاتفه ويجد الساعة تقترب من الثانية عشر ظهرا
سيد (وهو يهب من مكانه واقفا) : يانهار اسود الساعة 12 البت
يعدل سيد من ملابسه ويرتدى الجاكت بسرعة
يتصل بصافى
ولا ترد
يتصل بوائل المحامى
سيد : ايوه يا أستاذ ايه الاخبار
وائل (عبر الهاتف) : انت فين يا أستاذ سيد أنا كلمتك كتير اوى تليفونك كان مقفول
سيد : معلش البت اخبارها ايه
وائل (عبر الهاتف) : اطمن الموضوع خلص وانا وصلتها البيت بنفسى
سيد : ايه رجعت البيت طيب ماشى يا أستاذ مع السلامة
سيد (وهو يلتقط مفاتيح سيارته) : يابنت الكلب يا صافى
ينصرف سيد من المكتب
…………………………………
مدرسة احمد زويل الثانوية للبنات
انس تجلس في مكتبها بالمدرسة وتدخل عليها الأستاذة هدى مدرسة اللغة العربية ووكيلة المدرسة
هدى : حمد الله على السلامة يا أستاذة انس طمننى عليكى
انس : الله يسلمك يا هدى معلش اتخبطت في راسى خبطة بسيطة ومقدرتش اجى امبارح
هدى : ألف لا بأس عليكى يا استاذة طب كنتى ريحتى النهاردة كمان
انس : انت عارفه مقدرش اغيب عن المدرسة كفاية امبارح
هدى : ربنا يخليكى لينا ولاسرتك يا أستاذة
انس : متشكرة يا هدى … تقدر تروحى تشوفى شغلك وانا شوية وهقوم ألف على الفصول
صوت طرقات على باب المكتب
ينفتح الباب وتدخل مدرسة شابة ومعها احدى التلميذات
المدرسة : انا اسفة يا أستاذة بس الموضوع مهم
انس : في ايه يا سلمى
انس (وهى تشير الى التلميذة) : هي مش دى دعاء عبد العزيز
سلمى : ايوه هى اتفضلى حضرتك شوفى عامله ازاى
تنظر انس الى دعاء التي ترتدى زى خارجى مخالف لزى المدرسة وتضع مكياج صارخ على وجهها وتاركه شعرها منسدل على صدرها
انس : ايه ده يا بنت انا مش قولت متجيش المدرسة تانى بالشكل ده
دعاء : والله يا أستاذة دى حرية شخصية
سلمى : اتكلمى كويس يا بنت
انس : استنى يا سلمى … تعالى هنا يا بنت
تقترب دعاء من انس
انس : هو والدك ووالدتك ربوكى انك تكلمى كده
مع الأكبر منك
دعاء : أنا بابا مات وماما مجوزه ومعرفش حاجة عنها
انس : أومال انت قاعده مع مين ومين بيصرف عليكى
دعاء : هو تحقيق يا أستاذة ولا ايه
انس : أه تحقيق ورد على سؤالى
دعاء : أسفة مش هرد
انس : يبقى هيتعملك جواب استدعاء ولى أمر دلوقتى وهتخديه ومش هتخش المدرسة هنا تانى الا لما يجى المسؤول عنك واقعد معاه
دعاء : ما بلاش يا أستاذة
انس : هو ايه اللى بلاش يا بنت
دعاء : الاستدعاء مش كويس عشانك
تتدخل هدى
هدى : ايه قلة الادب دى … انت ايه محدش
رباكى خالص
دعاء : لا متربية أحسن من ولادكوا كلهم
سلمى (بغضب) : لو سمحتى يا أستاذة البنت
دى لازم تترفد
دعاء : مش هتقدروا
هدى : ايه يا بنت انت فيكى ايه
انس : استنوا … سبونا لوحدنا شوية
هدى : يا استاذة البنت دى …
انس : قلت سبونا لوحدنا
هدى (تتنهد) : حاضر يا أستاذة
تنصرف هدى وسلمى
تجلس دعاء دون استئذان أمام انس وتضع قدما فوق الأخرى في تحدى صارخ
دعاء : ايه مش هتطلبيلى حاجة اشربها ولا ايه
انس : بصى انا هتعامل معاكى على انك مريضة نفسية لان لو اتعاملت معاكى غير كده التصرف والقرار اللى هخده ضدك مش هيبقى رفد وبس لأ انتى هتتحرمى من دخول اى مدرسة وهرفع الموضوع للوزير و …
تقاطعها دعاء وهى تشير الى هاتفها : طب استنى يا أستاذة قبل متكملى قرارتك وشوفى الفيديو ده
تشغل دعاء فيديو على هاتفها تم تصويره لانس وهى أمام القسم وتتعارك مع سيد
دعاء (وهى تغلق هاتفها) : أظن متحبيش حضرتك ان الفيديو ده يترفع على النت وتبقى فضيحة حضرتك بجلاجل في المدرسة خصوصا لما يعرفوا ان حضرتك كنت هناك ليه
تنظر لها انس دون تعليق
تقف دعاء وتقترب من انس
دعاء (تهمس فى اذنها) : مش بنت حضرتك برده كانت محبوسة في القسم بتهمة …. اكمل ولا بلاش
تستمر انس فى صمتها وتخفى وجهها بيدها وتتابعها دعاء بابتسامة كبيرة
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية جحيم أنس)
