رواية جبروت اسمه اختي الفصل التاسع 9 بقلم محمد خلف صالح
رواية جبروت اسمه اختي الجزء التاسع
رواية جبروت اسمه اختي البارت التاسع
رواية جبروت اسمه اختي الحلقة التاسعة
آمال ابو المواهب في اجتماع مغلق مع فادي مدير اعمالها وذراعها الايمن يمتاز بذكائه الخارق وسرعة بديهته بالاضافة الي رأسة المليئة بالشر فيعتبر بمثابة العقل المدبر ل آمال ابو المواهب
آمال .. ليك ساعة قاعد قدامي عمالة ارصلك في كلام وانت ساكت مبتتكلمش !! هو انا جايباك عشان تسمعني ولا عشان تشور عليا هعمل ايه ؟!!
فادي ..ما انا عشان اركز معاكي واقلك تعملي ايه
آمال .. طب قول يا ابو العريف اتصرف ازاي مع الزفته دي اللي ناوية تفضحني ع الملأ وتهد كل اللي انا بنيته السنين اللي فاتت دي كلها
فادي .. وهي وصلت للمستندات دي ازاي اصلا ؟!!
آمال .. معرفش ؟!! بس مش مهم عندي وصلت ازاي .. المهم دلوقتي اني الحقها قبل ما تعمل بيها حاجة
فادي .. طب ما جايز تكون المستندات دي شوية اوراق ملهاش لزمة او جايز يكون مفيش مستندات من أساسة
آمال تتعجب .. قصدك ايه ؟!! قصدك ممكن تكون دي حركة من فريال قصدها تهوشني بيها ؟!!
فادي .. احتمال وارد وعشان نتصرف صح لازم نشوف المستندات دي وساعتها نقرر هل فعلا مستندات تضرنا او هتطلع شوية ورق ملهمش اي قيمة ويدوب اخرهم مطعم فول وطعمية يلف بيهم الطلبات
آمال .. كلامك صح والوحيد اللي يقدر بجبلي نسخة من المستندات دي كمال .. ثواني لما اتصل عليه
وتطلب آمال كمال ويرن تليفون كمال المحمول وفي هذا التوقيت يكون كمال جالسا مع آمال يشاهد التلفاز فيكنسل عليها ولا يرد وآمال تلاحظ ذلك
آمال .. مش عايز ترد ليه علي تليفونك ؟!!
كمال .. لا دا اشرف اكيد هيكلمني في الشغل
آمال .. طب رد عليه ممكن يكون عايزك في شئ ضروري
كمال .. مفيش حاجة اهم من مراتي حبيبتي وانا فهمته اني طول ما انا في البيت مع مراتي وولادي ميتصلش بيا ابدا ولا يكلمني في شغل
فريال .. يا سلام !! ودا من امتي ده طول عمرك بتتكلم في الشغل عادي وانت في البيت
كمال .. الكلام ده لما كنتي انتي يا حبيبتي مشغولة زيي لكن دلوقتي انتي قاعدة في البيت ومضايقة ومخنوقة اكيد لازم اراعي مشاعرك واواسيكي
فريال .. غريبة !! ع العموم كتر خيرك لما اقوم اعمل فنجان قهوة تحب تشرب قهوة معايا ؟
كمال .. دا لو مش هتعبك
فريال .. لا طبعا .. فينك يا دادا حسنية كنتي مريحاني في شغل البيت
كمال .. ما قلتلك اشفلك دادا غيرها وانتي رفضتي
فريال .. مش معقول الاقي واحدة زي دادا حسنية وبعدين هي اللي مربية الاولاد ومرتاحين كلنا معاها وكمان مينفعش بعد اللي حصلها ده وفي قلب شقتي استغني عنها !!اهي قربت تقوم بالسلامة وربنا يجازي اللي كان السبب في اللي حصل .. يعني مقلتش آمين ؟!!
كمال .. اه .. اااا .. آمين طبعا
فريال .. طيب لاحسن يكون مش هاين عليك تدعي عليه!! .. لما اقوم اعمل القهوة
وتدخل فريال الي المطبخ وبعد ان يتأكد كمال انها دخلت المطبخ يتصل ب آمال
كمال .. ايوا يا آمال عايزة ايه ؟!! مش قادر ارد عليكي
آمال .. هههه .. ايه لسة قاعد جمب الغندورة بتواسيها ؟؟!
كمال .. مش وقت تريقة وحياتك .. آمال شكلها فعلا عرفت حاجة وبقت ترمي بالكلام وانا عامل نفسي عبيط
آمال .. ما قلتلك قلها الحقيقة واخلص
كمال .. انتي اتجننتي !! هو دا وقته اصلا
آمال .. ع العموم براحتك انا كنت عاوزة منك طلب
كمال .. قولي
آمال .. كنت عاوزة نسخة من المستندات اللي قلتلي عليها واللي فريال بعتتها للولد الصحفي ده اللي اسمه حسين
كمال .. ودي اجيبهالك ازاي ؟!! فريال بتقفل علي الحاجات المهمة اللي زي دي جوة درج مكتبها والمفتاح دايما معاها
آمال .. اكيد هتلاقيها باعته نسخه من الملفات عن طريق الواتساب او الايميل .. اتصرف يا كمال .. لازم المستندات دي تجيلي انهاردة عشان اقدر اتصرف بسرعة والا وديني هشوط في الكل
كمال .. قصدك ايه بكلمة هتشوطي في الكل ؟!! انا بحذرك ابعدي عن الاولاد انا عاديتهالك المرة اللي فاتت ومش هسمح بأنك تقربي من ولادي تاني يا آمال .. سامعة ؟
آمال .. خلاص .. يبقي المستندات تجيلي انهاردة
كمال .. حاضر هحاول
آمال .. مش هتحاول وبس وهتقدر كمان
كمال .. طيب سلام عشان فريال جاية
وتعود فريال وهي تحمل صينية فوقها فنجانان من القهوة
فريال .. ايه كنت بتكلم اشرف ؟!!
كمال .. اه .. رديت عليه
فريال .. وكان عاوز منك ايه ؟!!
كمال ..كان بيقلي ان الوفد بتاع الشركة الالمانية وصل ومنتظرين يقابلوني
فريال .. وانت مستني ايه !! اشرب القهوة وانزل قابلهم
كمال .. يا سلام يا فريال ببقي فرحان اوي وانا شايفك خايفة علي شغلي وهمك مصلحتي
فريال .. اكيد مش جوزي حبيبي وابو ولادي .. واللي مصلحته هي مصلحتي واللي حاربت الدنيا كلها عشانه وخسرت الدنيا كلها عشان اتجوزه ويبقي معايا عمري كله.. حتي اختي الوحيدة خسرتها عشان يفضل معايا وميسبنيش ثانية .. كمال ممكن اسألك سؤال
كمال .. اكيد يا حبيبتي اتفضلي
فريال .. انت عمرك ما خنتني قبل كدا؟!!
كمال يشنق اثناء ارتشافه لشربة من فنجان القهوة ويسعل بشدة
فريال .. ايه مالك شنقت ليه ؟!! اجيبلك ميه ؟
كمال .. لا مش محتاج اصل سؤال غريب واول مرة تسألهولي!!
فريال .. اهوه سؤال خطر في بالي فسألتهولك
كمال .. مع اني مش عارف ايه سبب السؤال الغريب ده !! لكن هجاوبك .. انا يا حبيبتي عمري ما خونتك ولا عمري هفكر في حاجة زي دي ابدا .. انتي مش ناقصك حاجة عشان ادور عليها عند غيرك
فريال .. كداب
كمال .. ايه ؟!!
فريال .. كداب اللي يقول علي كمال جوزي حبيبي خاين .. انا عرفة يا حبيبي ومتأكدة من دا كويس .. بس انت عارف بقي احنا ستات وبنحب نسمع الكلمة دي حتي لو احنا متأكدين منها .. اشرب قهوتك وروح شوف شغلك وانا بالمرة هدخل اخد شاور وانزل اقابل حسين الصحفي عشان كلمني
كمال .. انتي لسة ناوية تنفذي اللي في دماغك؟!!
فريال .. اكيد .. سيبك مني انا وخليك انت في شغلك .. لما اقوم بقي اخد شاور بعد ازنك يا حبيبي
وتدخل فريال الحمام لتأخذ شاور ويتسحب كمال ناحية باب الحمام ويضع اذنه علي الباب ليتأكد فعلا ان فريال بدأت تستحم ثم يهرول مسرعا الي غرفة النوم ويتوجه ناحية مكتب فريال الخاص بها ويفتح ادراج المكتب فيجدها جميعها مغلقة
كمال .. يا تري شايلة المفتاح فين يا فريال ؟!!
ويبحث في مكان ولا يجد اثر للمفتاح فيستعجب
كمال .. معقول تكون دخلت بيه الحمام ؟!! تعملها ما هي بدأت تشك فيا .. منك لله يا آمال انتي السبب .. ثم يتوجه نحو التليفون المحمول الخاص بفريال ويتفحص الواتساب فيجد فعلا انها قامت بارسال ملف pdf الي حسين الصحفي فقام باعادة ارسال الملف الي الرقم الخاص به ومسح الرسالة بعدها مباشرة ليعود ويقوم باعادة الرسالة من تليفونه المحمول الي آمال ابو المواهب .. آمال تأتيها اشعار رسالة جديدة ع الواتساب وتكون في هذا الوقت في منزلها نراها تمسك المحمول وتقرأ الملف ولحظات ويتغير وجه آمال
آمال .. ايه ده ؟!! مش معقول !! جابت الورق دا منين ؟!! اه يا بنت الكلب ده انتي ناوية تدمريني بجد !! ثم تتصل علي فادي مدير اعمالها .. اه يا فادي .. سيب اللي في ايدك وتجيلي دلوقتي حالا .. ايوة بعتلي الملف .. بجد !! الا بجد .. دا فيه ورق يوصلني لحبل المشنقة .. مش وقت شرح تعالي دلوقتي حالا .. سلام
فريال ترتدي ثيابها تستعد للخروج لمقابلة حسين الصحفي
كمال .. لسة برضوا مصرة تقابلي الولد الصحفي ده عشان تنشري الورق اللي عندك ؟!!
فريال .. اكيد
كمال .. فريال لاخر مرة بحذرك انتي داخلة لعبة خطيرة وانتي مش ادها
فريال .. متقلقش طول عمري ربنا واقف جمبي وبينصرني عشان دايما في صف الحق وبعدين انت خايف عليا ولا علي آمال ؟!!
كمال يرتبك .. آمال !! وانا آمال هتهمني في أيه ؟!! خايف عليكي انتي طبعا .. انتي مراتي حبيبتي وام اولادي
فريال بسخرية .. اها !! طيب .. لا متخفش عليا يا حبيبي انا واثقة ان ربنا هينصرني عشان قلبي طيب وطول عمره ابيض لا يعرف غش ولا كدب ولا حتي يخون!! .. سلام
وتذهب فريال لمقابلة حسين الصحفي في احد الكازينوهات لتفاجأ بصدمة
عندما تصل فريال الي الكازينو لم تجد حسين قد وصل بعد وتجلس تنتظر قدومة قرابة ساعة من الوقت ولكن لم يحضر فتقلق وتقوم بالاتصال عليه فلا يرد فتتعجب وبعد عدة محاولات من الاتصال به ترد زوجته وهي في حالة من الذعر والبكاء والانهيار
الشديد لتخبرها بأن حسين قد تعرض لحادث بشع حيث قام مجهولون بإطلاق النار عليه اثناء توجهه لأستقلال سيارته لمقابلتها في المكان المحدد وانه يرقد الآن في العناية المركزة بين الحياة والموت .. تنزعج فريال عند سماع هذا الخبر المؤلم وينتابها الشك ان آمال قد يكون لها يد في هذا الحادث فربما نما الي علمها ان حسين ينوي مقابلة فريال للتحدث بخصوص المستندات التي تنوي نشرها في الجريدة التي يعمل بها حسين ولكن من اخبرها بأن حسين لديه مستندات ضد آمال وينوي نشرها في الجريدة التي يعمل بها ؟!! فلا احد يعلم ذلك سوي كمال زوجها .. فربما كمال اخبر آمال بذلك لتأخذ حذرها وبالتالي تخلصت من حسين .. بل بالتأكيد كمال هو الشخص الوحيد الذي اخبرها فهي تيقنت انه علي علاقة غير شرعية ب أختها آمال وانه دائما يحذرها من الدخول في معركة معها وفجأة تأتي رسالة ل فريال من رقم مجهول نصها .. اصرفي نظر عن اللي ناوية تعملية يا أما هتدفعي التمن غالي اوي وانتي حرة .. البقية في حياتك في المرحوم حسين …تنطلق فريال مباشرة بعد قرآة تلك الرسالة الي الضابط هشام وتخبرة بما حدث
اما آمال فهي تجلس الان مع مدير اعمالها فادي وهي في غاية الفرح والسرور بسبب التخلص من حسين الصحفي
آمال .. لا عفارم عليك بجد .. برافو يا فادي
فادي .. خدامك يا ست الكل .. عشان كدا دايما اقلك .. متقلقيش ابدا طول ما انا معاكي
آمال .. بس انت متأكد ان اللي اسمه حسين ده مش هيقوم من الحادثة دي تاني ؟!
فادي .. يقوم فين يا ست الكل دا اخد اربع رصاصات وكلهم في مقتل !! دا زمانه مات دلوقتي
آمال .. ادينا خلصنا من واحد .. كدا فاضل واحد كمان
فادي .. مين يا ست الكل؟!!
آمال .. هي في غيرها .. اللي طول عمرها معكننه عليا حياتي وواقفالي زي اللقمة في الظور .. فريال
فادي .. اختك ؟!! هو انتي ناوية تخلصي منها هي كمان ؟!!
آمال .. انت ناسي ان اصل المستندات دي معاها هي .. يعني لسا التهديد موجود ومادام في نيتها تضرني بيهم .. هتعمل كدا
فادي .. بس اظن ان بعد اللي حصل ل حسين والرسالة اللي جاتلها اكيد هتخاف وهتفهم انها لو حاولت تضرك بالمستندات دي هتلاقي نفس المصير
آمال .. لا ما اظنش .. فريال عنيدة ومبتخفش ومعتبره نفسها انها من انصار الدفاع عن المال العام وحقوق الشعب واكيد ما دام عزمت النية علي انها تضرني هتضرني وخصوصا بعد ما عرفت اني علي علاقة ب كمال جوزها .. يعني اكيد هتنتقم مني
فادي .. طب والعمل ؟!!
آمال .. اتغدي بيها قبل ما تتعشي بيا
فادي .. والمطلوب ؟!!
آمال .. اكوي قلبها علي عيل من عيالها واهو بكدا تبقي قرصة ودن خفيفة ليها
فادي .. بس دي مش قرصة ودن خفيفة !، انتي كدا ناوية تكسري قلبها لأنه مفيش اغلي من الضنا وممكن بالعملة دي تعند اكتر وتنتقم منك شر انتقام
آمال .. لا بالعكس .. بعد العملة دي فريال فعلا هتتكسر وهتعرف ان اللي يقف قدام آمال ابو المواهب ويتحداها لازم يخسر ويخسر جامد اوي وبكدا هتخاف علي العيل اللي هيتبقالها وهتحل بعيد عني ومش بعيد تسيب البلد وتمشي وبكدا كمال يبقي ليا لوحدي من غير شريك .. نفذ يا فادي واديني تمام
وبدون تردد او تفكير قررت آمال ابوالمواهب الانتقام من اختها اقرب الناس اليها وفي الصباح يأتي الباص ليأخذ محمد ومها اولاد فريال الي المدرسة وفي الطريق تتوجه مشرفة الباص نحو محمد ومها وتعطي كلا منهما علية عصير قائلة
المشرفة .. خد يا محمد بابا كلمني حالا في التليفون وقالي ادي محمد ومها علبة العصير دي .. عشا الجو حر اوي انهاردة .. يلا اشربوا بالهنا والشفا
مها .. غريبة اول مرة بابا يعمل حاجة زي دي ؟!!
محمد .. ما هي قالتك عشان الجو حر اوي انهاردة .. اشربي يابنتي اشربي
ويشرب محمد ومها علبة العصير واثناء سيرهم في الطريق تطلب المشرفة من السائق ان يقف وتنزل في عرض الطريق وتختفي تماما وبعدها بدقائق يشعر محمد بمغص مفاجئ ثم يتألم ويصرخ والسائق ينزعج فيتوقف للأطمئنان علي محمد
السائق .. مالك يا حبيبي في ايه ؟!!
محمد .. بطني وجعاني اوي يا عمو
السائق يلاحظ الاعياء والعرق الشديد علي محمد فيضطر الي تغيير اتجاهه والتوجه الي اقرب مستشفي لأنقاذة وللأسف يصل محمد الي المستشفي ليكون قد فارق الحياة .. السائق يتصل بإدارة المدرسة التي تتصل علي الفور بوالدة محمد ..
وتذهب فريال مسرعة الي المستشفي ليخبرها الطبيب انه يشك في ان وفاة الطفل ليست طبيعية وانه يعتقد ان الطفل قد مات اثر تناولة طعام او شراب مسموم واخبرت مها امها بما حدث وان المشرفة قد اعطتهم عصير ليشربوه بحجة ان والدهم قد طلب ذلك وعند مواجهة كمال اخبرها بأنه لم يتصل بأحد ولم يطلب شئ كهذا والبحث عن المشرفة لم يجدوها فقد اختفت تماما من المدرسة والبيت فهي تعمل بعقد مؤقت ادركت حينها فريال ان آمال هي وراء ما حدث وايضا اعتقد كمال ذلك الذي ذهب كالمجنون الي شركة آمال واقتحم عليها مكتبها اثناء تواجدها مع مدير اعمالها فادي
آمال .. كمال!! .. ايه الزيارة المفاجئة دي ؟!!
كمال .. ابني محمد مات مسموم يا آمال !! انتي اللي ورا ده صح ؟!!
آمال .. سيبنا لوحدنا دلوقتي يا فادي
كمال .. لا .. الشيطان ده هيستني هنا لحد ما اعرف الحقيقة عشان وديني لو انتي اللي وراها يا آمال انتي والكلب ده انا هقتلك وهقتله حالا
آمال .. اهدي علي نفسك شوية يا كمال .. وشوف انت بتكلم مين !! وبعدين مراتك اللي بدأت معايا والبادي اظلم
كمال .. يبقي انتي اللي وراها .. انا قلتلك قبل كدا وحذرتك اولادي خط احمر يا آمال .. لكن للأسف انتي مش هامك تحذيري ونفذتي اللي في دماغك برضوا .. وانا دم ابني غالي اوي وتمنه حياتك يا آمال
ثم يخرج مسدسه ويصوبه ناحية امال
آمال .. انت عايز تقتلني يا كمال ؟! بعد كل اللي عملته عشانك .. دا انا اللي خليت لشركتك اسم في السوق بنفوذي وفلوسي كمان .. وبعدين ايه يعني ابنك مات .. ما هو اللي في بطني برضوا ابنك وولد كمان .. انا عملت كدا عشان اكسر فريال
كمال .. انتي كسرتيني انا مش بس فريال .. ولا انتي ناسية ان اللي قتلتيه ده زي ما هو ابن فريال ابني انا كمان .
آمال .. انسي يا كمال وطلق فريال عشان تتجوزني وابننا يتولد ويتربي بيني وبينك واهو يعوضك عن اللي راح
كمال .. انا لا هطلق فريال ولا عمري هتجوزك .. عرفة ليه؟!! عشان فريال احسن منك واشرف منك وعمرها ما فكرت تخوني وانا وانتي اقرب الناس ليها خوناها وكسرنا قلبها .. انتي اقذر انسانه عرفتها علي وجه الارض انتي تستحقي الموت يا آمال ولازم تموتي انتي والكلب ده عشان الناس ترتاح من شركم للأبد
آمال .. اوعي تفكر انك بقتلي كدا ضميرك هيرتاح !! انسي .. عمرك ما هتنسي انك خنت مراتك في يوم من الايام مع اقرب الناس ليها ولا عمرك هتنسي ان ابنك مات بسبب عند مراتك ونشفان دماغها
كمال .. فريال عمرها ما اذتك في شئ انتي اللي اقتحمتي عليها حياتها وحبيتي تاخدي جوزها منها ودمرتي حياتها وشغلها وقتلتي ابنها وجاية في الآخر وبكل برود عاوزاني انسي وابدأ صفحة جديدة معاكي .. يا جبروتك يا شيخة!! .. جبتي القساوة والفظاعة دي كلها منين؟!!
آمال .. انا قلتلك قبل كدا اللي يفكر بس يئذيني امسحه من علي وش الدنيا .. ولآخر مرة بقلك انسي اللي فات يا كمال وسيبك من فريال .. فريال خلاص بقت زي الفرخة المدبوحة ومعادتش تنفعك .. انا بس اللي اقدر انفعك .. معايا انا بس هتفضل كسبان
كمال .. بالعكس انا معاكي خسرت كل حاجة .. خسرت مراتي وابني وحتي احترامي لنفسي
ثم يلمح كمال فادي وهو يحاول اخراج مسدس من خلف ظهرة فيسارع بقتله
آمال .. ايه اللي انت عملته ده يا مجنون ؟!!
كمال .. انا فعلا كنت مجنون يوم ما فكرت اخون مراتي اللي باعت الدنيا كلها عشان خاطري ويوم ما اكتشفت خيانتي مهانش عليها تواجهني وكتمت جوة قلبها ومفكرتش تسيبني لكن دلوقتي بس انا فقت وعقلت .. وزي ما هان عليكي ابن اختك اللي هو ابني .. انتي كمان هونتي عليا يا آمال
ثم يطلق النار عليها بصورة عشوائية .. بعدها يقوم آمن الشركة بالقبض علي كمال وتسليمة للشرطة في الوقت الذي وصل فيه الملف للضابط هشام والذي تم عرضه علي السلطات المختصة وصدر أمر من النائب العام برفع الحصانه عن آمال ابو الدهب والتحقيق معها في كل قضايا الفساد التي وردت بتلك المستندات وترقد آمال في العناية المركزة في غيبوبة طويلة اما كمال فيلقي مثيره في غيابات السجون .. وفريال تحاول جاهدة ان تقف مرة اخري علي قدمها بعد كل تلك الصدمات من اقرب الناس اليها حاضنة ابنتها الوحيدة مها .. وبالفعل تنجح في ان تعود وتقف علي قدمها مرة اخري ورغم كل ذلك ترفض الطلاق من كمال وتقرر ان تستمر معه رغم كل ما صدر منه فما زالت تحبه وتعلم انه ادرك خطأة وندم عليه فكانت تزوره من آن لآخر داخل السجن وتولت هي ادارة الشركة وبعد عام من الغيبوبة المستمرة تموت آمال بعد ان بدأ جسدها يتعفن من طول الرقود في السرير … وبذلك تنتهي القصة والتي نتعلم منها ان ما بني علي باطل فهو باطل ولا يحق الا الحق … انتهت قصتي ولم تنتهي محبتي ..
لقراءة الرواية كاملة اضغط على : (رواية جبروت اسمه اختي)
