رواية تشابك أرواح الفصل الرابع 4 بقلم هبة أحمد
رواية تشابك أرواح الجزء الرابع
رواية تشابك أرواح البارت الرابع
رواية تشابك أرواح الحلقة الرابعة
وقعت ع الارض ولقيتهم بطلو خناق وقال غيث لحمزه بتحذير لو حصلها حاجه هوديك في داهيه اتفضل امشي واعمل حسابك لو قربت منها مره تانيه انا مش هسمي عليك
انا مكنتش تعبانه ولا حاجه انا بس ملقتش حل يخليهم يسكتو غير اني اعمل كده
سلمي كانت بتعيط جامد ومسكت في جاكت البدله بتاع حمزه وفضلت تقوله
_انا هخرب بيتك ياحمزه انت السبب في اللي حصلها دا اتا هوديك في داهيه
بس لما حست اني بمثل سكتت وبدأت تقومني
مستر غيث مشي الناس وطلب منهم يدخلو يكملو الحفله تاني وانو هيرجعلهم بعد مايوصلني الاوضه بس سلمي رفضت انو يجي وانا ساعتها اتكلمت وقولتله
_ مستر غيث انا بقيت كويسه والله اتفضل انت مع ضيوفك ولما تخلص هتلاقيني مستنياك علي البحر
_ متأكده يارحمه انك هتقدري تمشي
_ ايوه صدقني انا كويسه
مشي مستر غيث مع ضيوفه وكان كل شويه يتلفت حواليه يبص عليا
بعد ماتأكدنا انو مشي اتنفست براحه وبصيت لسلمي وضحكنا بصوت عالي
_ هش وطي صوتك ياسلمي هتفضحينا
_ كده تخضيني عليكي يارحمه انا قولت انتي اغمي عليكي بجد
_ يابنتي انا ملقتش حل اعمله عشان يسكتو غير كده .. بس انا فعلا كان هيغمي عليا اول ماقال اني خطيبته .. انا مش عارفه الراجل دا اتهبل ولا ايه
_ عيب يارحمه كده يعني دا جزاته انو انقذك من حمزه
_ انا كنت اقدر اوقف حمزه عند حده علي فكره من غير غيث هو اللي اتحشر بينا معرفش ليه
_سيبك المهم ينفع كده الحفله اللي باظت دي انا ملحقتش افرح بالفستان ياشيخه منك لله ياحمزه
_ والله انتي رايقه هو دا وقت فستان .. بقولك قاله اني خطيبته انا اتصرف ازاي دلوقتي
_ ياستي كبري بكره الناس تنسي .. محدش هيركز
_ سلمي الحفله كان كلها صحفيين اساسا والخبر دا بكره الصبح هيكون علي كل المواقع
خطوبة رجل الاعمال غيث الحديدي من موظفة شركته
.. هو انتي فاكره ان خطوبة غيث دي هتعدي عادي كده .. دا رجل اعمال وشاب وحلو ومشهور وبصراحه كده انا مش عارفه هو ازاي قدر ينطقها دانا مش قادره استوعب الكلمه لحد دلوقتي
بقولك ايه يارحمه متشيلنيش الهم بقي هو لما هيخلص الحفله هيجي يتكلم معاكي اكيد ابقي شوفيه هيقولك ايه بقي
_ انا هقوم اغير الفستان دا مش هتيجي
_ لا انا هقعد استناه هنا .. اطلعي انتي
_ ماشي متتأخريش
طلعت سلمي الاوضه وانا فضلت قاعده مستنيه مستر غيث ودماغي فيها مليون حاجه .. ليه يقولهم اننا مخطوبين وازاي يعمل كده .. طب والصحافه لما تنزل الخبر انا وضعي هيكون ايه .. وازاي هنعرف نكذب الخبر اللي اتقال دا .. وياريتها اشاعه دا مستر غيث بنفسه هو اللي قال كده يعني مش هيفع نكذبه
قطع تفكيري صوت مستر غيث وهو بيقول
_ عامله ايه دلوقتي
_ الحمدلله انا كويسه
_ بتفكري في ايه
_ حاجات كتير والله انا مش عارفه بصراحه حضرتك ليه تقول اننا مخطوبين
_عادي يارحمه هي دي حاجه تزعلك
بصتله بتعجب وقولتله
_ ايوه اكيد عشان دي كذب مش حقيقه احنا مش مخطوبين
_ طب ماتيجي نتخطب
_انت بتقول ايه ياغيث
_بهزر ياستي .. انا بجد ملقتش حاجه اقولها غير كده عشان حمزه يبطل يضايقك وصدقيني انتي لو مكنتيش تعبتي واغمي عليكي انا كنت هزعله جامد
_ مستر غيث حضرتك معملتش حساب الصحافه اللي كانت موجوده الخبر دا بكره الصبح هيكون تريند علي كل المواقع انت بجد حطيتنا في موقف صعب اوي
قطع كلامي صوت رنة موبايله
طب اهدي بس وانا هفهمك بس ثواني هرد علي بابا
_ ايوه يا بابا .. مين اللي قالك الكلام دا .. لا والله هو بس حصل حوار كده هحكيلك عليه لما اجيلك .. يابابا هو يعني انت شايفني اتجوزت دي مجرد خطوبه .. وبعدين انا كان قصدي بيها اننا في مشروع خطوبه .. انت عارف بقي المواقع والصحافه .. لا متقلقش الحفله مشيت كويس .. اه وقعنا العقود بس في عقد مكملش .. لما اجيلك هحكيلك .. اه بكره ان شاء الله .. الله يسلمك ياحج .. سلام
قفل الموبايل وبصلي وهو بيضحك وقال
_ واضح انهم مستنوش للصبح .. بابا عرف
_ حقيقي انا مش عارفه اقولك ايه .. اه انت كنت عايز تبعد حمزه عني بس انت دخلتني في مشكله كبيره
كملت كلامي بعصبيه
_ لو سمحت خرجني من الموضوع دا دلوقتي حالا
اتصرف بقي كلمهم قولهم انك كنت بتهزر اي حاجه انا اهلي لو عرفو باللي حصل دا هيكون في رد فعل مش هيعجبني ولا هيعجبك
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية تشابك أرواح)
