رواية تشابك أرواح الفصل الثاني 2 بقلم هبة أحمد
رواية تشابك أرواح الجزء الثاني
رواية تشابك أرواح البارت الثاني
رواية تشابك أرواح الحلقة الثانية
غمضت عيني يمكن اكون بحلم وهصحي من الحلم دا .. اصل اشمعن يعني لما اقرر انساه يطلع قدامي
اخدت شنطتي من ع الارض وبصيت لإيده اللي ماددها عشان اسند عليها واقوم كان فيها دبلتي .. اه دبلتي لسه موجوده فيها .. مش هنسي ابدا يوم مانزلنا نختار الشبكه بتاعتي مع امي وباقي عيلته وهربنا منهم وسط الزحمه عشان نختار دبلته لوحدنا .. ولما اختارناها وقال لصاحب المحل يحفر اسمي عليها .. الذكريات دي كلها جات في دماغي في اقل من الثانيه لدرجة اني اتهزيت وانا بقف وببص علي ايه الممدوده ليا وكنت هقع تاني بس مسكت دماغي .. معرفش امتي وازاي حصل بس لقيت عيني بقت في عنيه .. انا اصلا عمري مابصيت في عينيه واحنا مع بعض كنت بتحرج او بخاف معرفش .. بس انا دلوقتي قدامه وباصه في عنيه وهو كمان شايفني ومركز في عيني .. كنت عايزه اجري اهرب حد يشدني يخرجني من هنا .. انا اتحبست بس مش جوه المكان لا انا اتحبست جوه عنيه .. مش عارفه اطلع.. جوايا مشاعر متضاربه ومليون حاجه بتقولي دا خاين ومليون حاجه غيرها بتقولي بس بتحبيه
مفوقتش غير علي صوته وهو بيقولي رحمه انتي كويسه
هزيت دماغي واتنهدت بصعوبه وقولتله اه تمام
_ انتي جايه ليه هنا
_ تبع الشركه
_ انا مبسوط اوي اني شوفتك
كنت لسه هرد بس لاقيت باب الحمام اتفتح وواحده طالعه بتقوله معلش اتأخرت عليك ياحمزه
_ لوهله عقلي ترجم انها اكيد مراته انا اه مشوفتهاش قبل كده بس ربكته اول ماشافها وخوفه بتقول انها اكيد مراته … بس اللي اخدت بالي منه وعقلي ترجمه وسط كل اللي بيحصل دا ان دي الست اللي كانت جوه في الحمام
عملت نفسي بنفض هدومي واعتذرتله اني مكنتش واخده بالي لما خبطنا في بعض ومشيت
_مقدرتش ارجع عند سلمي ومستر غيث كان نفسي اتنفس بعد ماحسيت ان المكان ضيق عليا اوي في وجوده لدرجة اني مش عارفه اتنفس في مكان هو فيه .. دي كانت اول مره اشوفه بعد ماسبنا بعض .. اوقات كنت بتمني اني اشوفه او احتي المحه بس مكانش بيحصل .. اشمعن النهارده لما قررت اتخطاه وانسي الاقيه في وشي
سألت نفسي للمره المليون هو انتي ليه بتعملي كل حاجه وعكسها انتي بتحبيه ولا بتكرهيه
لاقيت ايد بتتحط علي كتفي فاتخضيت بصيت ورايا لقيت سلمي بتقولي..
_ قولي بقي انك عايزه تقعدي ع البسين
_ لا والله مش كده انا حسيت اني تعبانه فجيت اشم هوا انا اسفه يامستر غيث ممكن ندخل انا بقيت احسن
_ بجد حاسه نفسك كويسه .. انتي بتتعبي دايما كده يعني ولا اول مره
_ لا هي اول مره بس ممكن يكون ارهاق من السفر وكده متشغلش بالك يامستر
_ بصيت لسلمي اللي كانت مركزه معايا تركيز غريب وحاولت اتفادي نظراتها ليا
مستر غيث مشي قدامنا وهي شدتني من ايدي لحد ماهو سبق عننا بكتير
_ وشك مصفر كده ليه يارحمه انطقي .. وكمان عنيكي كأنك هتعيطي .. هو في حد زعلك
_ انا شوفته .. هو هنا .. في نفس المكان اللي انا فيه بيتنفس نفس الهوا اللي بتنفسه .. يمكن يكون شايفني دلوقتي كمان .. حمزه هنا ياسلمي
بصتلي بجمود وقالت _ طب وايه يعني هنا هيفرق معانا ايه يعني .. وجوده من عدمه ميشغلناش يارحمه .. اوعي تكوني كلمتيه
_ ملحقتش .. قصدي مراته جات يعني فانا مشيت .. اصلا مكنتش هرد … يوووه بقي انتي بتبصيلي كده متخوفنيش .. مستر غيث بينادي يلا وبعدين هكملك يلا…
انا كنت بهرب منها .. لو حكتلها اللي حصل هتقول اني غلطانه .. انا معملتش حاجه دا رد فعل تلقائي والله هي سلمي علي طول مكبره المواضيع كده
دخلنا المطعم تاني .. كنت بحاول اعمل ان الموضوع مش فارقلي عشان سلمي متاخدش بالها فاتكلمت مع مستر غيث كتير .. كنت فاكره انو مبيعرفش يعمل حاجه غير الشغل بس طلع بيهزر وعنده سنان اهو وبيضحك كمان ماشاء الله .. حقيقي الناس اللي ماسكين مناصب في شعلهم دول الله يكون في عونهم
_ تحبو تحضرو الحفله بكره
بصيت لسلمي بعد مامستر غيث عرض علينا نحضر الحفله لقيتها هي كمان بتبصلي كأنها بتسألني
حرك عينه بينا احنا الاتنين وقال تمام منتظركو بكره .. همشي انا بقي عشان ورايا شغل
_الراجل دا ذوق والله انا كنت هموت واحضر يارحمه
_ لا متموتيش قبل ماتفكري هتلبسي ايه بكره يافالحه احنا ادبسنا وش .. حفله زي دي عايزه لبس وتجهيزات كتير واحنا جايين نأنتخ وبصراحه كده معييش فلوس لفساتين .. اتصرفي انتي بقي
_ احنا اصلا لو جبنا فستاتين مش هيبقي معانا فلوس ندفع حجز الاوتيل
_ شوفتي بقي يبقي مش هينفع احنا هنعتذرله بكره الصبح
… طلعنا نتفسح شويه في حوالين الاوتيل وقعدنا ع البحر سوا انا وسلمي .. كنت خايفه تفاتحني في موضوع حمزه بس هي متكلمتش خالص .. احنا الاتنين ساكتين واكتفينا اننا نبص ع البحر ونتفرج علي الغروب
بعد لف كتير طلعنا الاوضه عشان ننام
كانت سلمي في الحمام وانا كنت واقفه في البلكونه مستنياها تطلع
باب الاوضه خبط .. طلعت عشان افتح لاقيت…..
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية تشابك أرواح)
