رواية تشابك أرواح الفصل الأول 1 بقلم هبة أحمد
رواية تشابك أرواح الجزء الأول
رواية تشابك أرواح البارت الأول
رواية تشابك أرواح الحلقة الأولى
فات 257 يوم علي فراقنا
_ النهارده الجو كان برد اوي تخيل قاعده 10 ساعات تحت البطانيه ولسه بردانه الشتا دا صعب اوي مش عارفه انت بتحبه علي ايه .. مانت عارفني مبعرفش اعيش في الجو دا خالص انا بحب الصيف بخروجاته ولبسه وكل حاجه فيه وانت بتحب الشتا اول مره الاحظ اننا اتنين مختلفين تماما يعني .. بكلمك بأمانه والله يمكن اختلافنا دا اللي جمعنا.. حقيقي مش عارفه
بعت الرساله في الشات بتاعنا زي كل يوم وقومت
مستنتش رد لأني عارفه انو مستحيل هيرد .. انا اساسا عامله بلوك .. ورغم كده يوميا ببعتله علي اللي انا حساه انا اتعودت كل يوم احكيله اتكلم عن اللي جوايا
قفلت الفون وعملت قهوه ووقفت في البلكونه رغم ان الجو برد اتنفست بهدوء وانا بشم ريحة القهوه كأنها داخله تطبطب عليا وتقولي معلش دموعي نزلت علي خدي اول ماالمطر بدأ يلمس الأرض
كنت بسأل نفسي سؤال واحد بس انا امتي هنسي ..امتي ذكرياته اللي محوطاني دي هتفارقني وبرده ملقتش رد
دخلت اخدت شنطتي ونزلت علي شغلي
انا رحمه بشتغل محاسبه في شركة النور للإستيراد والتصدير عندي 25 سنه
_ بقولك ايه ياسلمي هو باشمهندس غيث هيرجع امتي
في شغل كتير اوي متعطل
_ شغل متعطل ايه يارحمه وانتي من امتي بيهمك الشغل
_ هو انا باين عليا اوي كده .. انا بصراحه كنت عايزه الحق اخد اجازه كام يوم علي مايجي يعني
_ وتاخدي اجازه وتسبيني انا في العك دا اخص عليكي
_ يابنتي انتي قدها انا بصراحه عايزه اريح كام يوم كده
_ والله لو هتخرجي وتنبسطي وكده انا هبقي اول واحده اقولك خدي اجازه من دلوقتي كمان بس انا عارفاكي هتقضيها نوم ومش هتتحركي من مكانك زي البطه كده وهترجعلنا بعدها عينك مورمه من كتير العياط انتي صاحبتي وانا عارفاكي
_ ياستي شويه كده وشويه كده بس انا مرهقه فعلا وعايزه اريح كام يوم
_ طب ايه رأيك ناخد انا وانتي ونسافر اي مكان .. تعالي نروح اسكندريه بتبقي تحفه في الجو دا يارحمه هننبسط اوي بجد
_ هننبسط ايه في الجو دا ياشيخه قولي كلام غير دا .. بس انا هوافق تدري ليش لأني زهقت من البيت
يلا هاتيلنا ورقتين وقلم واكتبي اللي هقولك عليه
_ سمعينا ياست رحمه قولي
_ برجاء التكرم من سيادتكم بالموافقه علي منحي اجازه من يوم 20/1 الي يوم 25/1 ………….
يلا هاتي بقي الورقتين دول وانا هروح اقدمهم وانزل اجيب حاجه نشربها بس فالمقابل ياسلمي هتخلصيلي كل الشغل بتاعي دا عشان مش هينفع نمشي ونسيبه وانا بصراحه مودي وحش مش عايزه اشتغل
صوت الباب بيتقفل
_ انتي يابت يا رحمه طب اديني فرصه ارفض طيب ..ايه الصحاب دي ياربي كل دا عشان نسافر يومين منك لله يارحمه
…….
تعالي اقعدي معايا النهارده بقي ياسلمي عشان نطلع بكره بدري
_ ماشي هروح اجيب شنطتي واجيلك
_ روحت البيت وقولت اعمل اكل خفيف علي ماسلمي تيجي .. حقيقي البيت بقي كئيب اوي من يوم وفاة ماما وانا لوحدي .. انا اصلا دايما لوحدي ماليش اخوات ولا حتي كان ليا صحاب غير لما اشتغلت عرفت سلمي.. بس امي كانت ماليه عليا حياتي حقيقي مكنتش اتمني ابدا انها تروح مني كان نفسي تفضل عايشه طول العمر بس هي كانت تعبانه اوي في الفتره الاخيره اكيد هي مرتاحه هناك اكتر .. الله يرحمها
_مسكت الموبايل وفتحت الشات بتاعنا وكتبت … تفتكر ليه كل حاجه بنحبها لازم تسيبنا وتمشي
امي وحشتني اوي ياحمزه اكيد هي في مكان احسن دلوقتي صح ..بس برده ليه تمشي ليه متفضلش موجوده علي طول هي كانت بتهون عليا حاجات كتير اوي .. انت كمان ليه تمشي وتسبني ها ليه
عارفه انك دلوقتي هتقولي انا ممشيتش انتي اللي اجبرتيني اني امشي والكلام دا بس صدقني انت اللي وصلتني لكده اصلا انت لو بتحبني مكنتش زعلتني
صوت جرس الباب بيرن .. قفلت الموبايل بسرعه كأن خايفه حد يشوفني وقومت افتح
_ يابت انتي ايه مابتصدقي تحطي ايدك ع الجرس ارحميني شويه احنا لسه ايامنا طويله مع بعض خفي شويه ها
_ والله يا رحمه هو انا كده اذا كان عاجبك طب والله انا عاملالك بهجه في حياتك ياكئيبه ياعدوة الفرحه
طب خشي ياختي خلينا ناكل وننام عشان نلحق القطر
_ خشي انتي هاتي الاكل دانا حتي ضيفتك ياشيخه وهاتي موبايلك اتصور عليه
_ هاتلاقيه عندك ع السفره
دخلت اجيب الاكل وطلعت لقيت سلمي حاطه الموبايل قدامها ع السفره وبصالي بشر
_ انتي لسه بتبعتي لحمزه يارحمه
_ حمزه ايه مين اللي قالك
_ والله الشات بتاعكو اللي انتي سايباه مفتوح هو اللي بيقول مش انا مينفعش اللي انتي بتعمليه دا خالص انا قولت انتي خلاص بدأتي تنسي ليه بتعملي كده في نفسك دا ميستاهلكيش دا واحد باعك وراح لواحده متستاهلش اوهمته انها بتحبه عشان فلوسه ايه يخلي واحده متجوزه تتطلق من جوزها وتتجوزه غير انها ست مش كويسه .. صدقيني حمزه نفسه مسيره هيكتشف حقيقتها بس الوقت ساعتها هيكون فات .. زي ماباعت جوزها هتبيعه بس بعد ماتكون خدت اللي وراه واللي قدامه .. فوقي لنفسك انتي مش واخده بالك من الناس اللي بيحبوكي ومعلقه نفسك بحمزه دا اساسا انتو عمركو ماكنتو شبه بعض .. وهو كان بيستغل حبك ليه .. انا تعبت منك يارحمه بجد بقالي قد ايه بقول الكلام دا وانتي مفيش فايده فيكي … انا هقوم انام احسن لو فضلت قاعده قدامك كده هقولك كلام يزعلك
قامت سلمي ودخلت الاوضه وانا فضلت ابص علي السراب سرحت لأيام حلوه كنا فيها مع بعض وقعدت اقول لنفسي مش معقول دا كله كان كدب بس فوقت علي صوت سلمي وهي بتقولي انتي مش واخده بالك من الناس اللي بيحبوكي
مين اللي بيحبني معقول في حد بيحبني وانا مش حاسه ..للدرجادي هو شاغل تفكيري لدرجة انو مش مخليني شايفه اللي حواليا
فضلت قاعده ع السفره وقت طويل لحد ماالفجر اذن قومت اتوضيت وصليت ودعيت ربنا انو يشيلو من عقلي وقلبي .. دعيت ربنا اني انساه
قومت دخلت الاوضه وصحيت سلمي عشان نلبس
_ حقك عليا متزعليش بس والله غصب عني انا بس بحاول اطلع اللي جوايا في الشات مش اكتر انتي يعني شوفتيني كلمته
_ وانتي كمان كنتي عايزه تكلميه ياست رحمه دانا كنت طلعت عينك من مكانها والله
_لو بتحبيني بجد ادعيلي انساه مش تعليلي في صوتك والشويتين اللي عملتيهم بالليل دول خلي بالك انا سكتلك عشان مكنتش قادره اتخانق مش اكتر
_ يعني مش عشان كنتي غلطانه
_ تؤتؤ اطلاقا
… لبسنا ونزلنا عشان نلحق القطر اللي رايح اسكندريه الجو مكانش وحش اوي بس مكانش احسن حاجه
ركبنا القطر وكنت واخده روايه معايا حطيت الهاند فري في ودني ومسكت الروايه وبصيت علي سلمي بصه اخيره وهي بتروح في النوم ضحكت وحطيت وشي في الروايه مفوقتش غير والقطر بيقف والناس بتنزل
صحيت سلمي ونزلنا من القطر
لقيتها بتشد ايدي وبتقولي شوفي من هناك مش دا استاذ غيث استخبي بقي ليشوفنا ويدينا شغل هنا كمان نخلصه
_ استخبي من مين ياعبيطه احنا في اجازه ياماما يعني هو مالوش اي سلطه علينا دلوقتي .. يعني تحطي ايدك في جيبك كده وتعدي من قدامه ولا يهمك اي حاجه .. بصي تعالي ورايا هنسلم عليه
_ استني انتي ساحباني فين .. بقولك استني.. هتودينا في داهيه يخربيتك
_ مستر غيث ازي حضرتك
_ انسه رحمه عامله ايه .. اخبارك ايه يااستاذه سلمي
_ احنا كويسين الحمدلله
_ خير في حاجه ولا ايه
_ سلمي ردت : لا مفيش احنا في اجازه اصلا اوعي تقولي في شغل احنا جايين نستريح
اتكيت علي اديها جامد بأنها تسكت بس مفيش فايده
_لا انا مش جاي في شغل اصلا دا في حفله في الفندق اللي تبع الشركه هنا عشان الصفقه الجديده وانا جاي عشان كده .. اجازه سعيده
_ ميرسي يامستر غيث .. نستأذن حضرتك عشان نلحق احنا
_ انتو نازلين فين صحيح
_ هنشوف شقه لسه
_ وليه شقه تعالو ع الفندق تبع الشركه علي طول ومتقلقوش في خصم كبير للموظفين
_لا ميرسي يامستر احنا هنشوف شقه قريبه من البحر احسن
_ بقولك فندق الشركه تقوليلي شقه يارحمه
يلا هاتو الشنط وتعالو هنلاقي العربيه واقفه بره
استسلمنا لكلامه وشال معانا الشنط وطلعنا لاقينا العربيه واقفه والسواق بيفتحلنا الباب ركبنا انا وسلمي والاستاذ غيث والسواق دخلو الشنط
تفتكري الفندق هيبقي احلي من الشقه ياسلمي انا كنت حابه نكون براحتنا
_ هو الاكيد ان الفندق احسن كفايه اننا مش هنطبخ انا عارفه انك كنتي هتقرفينا بموضوع الاكل دا واسكتي بقي احسن يسمعنا
الحقيقه هو كان مركز اوي مع الموبايل وكل شويه يجيله مكالمه
_ هو حضرتك في اجازه يامستر غيث ولا شغل
_ لا ياانسه سلمي انا في اجازه بس ليه بتسألي
_ اصل حضرتك حتي وانت في اجازه بتشتغل يعني بصراحه دا الواحد مابيصدق ياخد يوم اجازه عشان يفصل وحضرتك برده شغال يعني مش عارفه اقول لحضرتك ايه للدرجادي الشغل مهم في حياتك
كان لسه هيرد بس العربيه وقفت فقال وصلنا
نزلنا من العربيه ودخلنا الفندق .. المكان كان حلو اوي وهادي ومريح قعدنا في الريسيبشن ومستر غيث جابلنا مفتاح الاوض بس احنا صممنا انا وسلمي نقعد مع بعض في اوضه واحده اصل هتبقي اجازه ازاي يعني وكل واحد قاعد في اوضه
اخدنا المفتاح وطلعنا
اول ما دخلت وقفت في البلكونه المنظر كان حلو اوي الجو كان برد والبحر كان موجه عالي عمال يخبط في الصخور وقلبي كان بيتنفض من مكانه
سلمي كانت بتحط هدومنا في الدولاب وانا حقيقي كنت بستمتع بالمنظر
فوقت علي صوت سلمي وهي بتقول
_ مش قولتلك الجو هيعجبك
_ انا مبحبش البرد بحس ان قلبي بيوجعني من لسعة البرد دي بخاف وجسمي بيقشعر .. الشتا بيفكرني بيه وانا مش عايزه افتكره .. كان بيفضل الشتا وكان دايما بيقولي اني شبه المطر لما بروح مكان بخليه اجمل زي المطر لما بينزل ع الارض بيرويها ويخليها احسن واجمل
_ انتي هتقلبيها نكد يارحمه ابوس ايدك فكي خلينا ننزل ننبسط شويه يلا
_ نزلنا من الاوضه وكنا بنسأل علي مكان المطعم في الريسيبشن بس قابلنا مستر غيث تحت
_ جعانين اكيد .. انا كمان رايح المطعم تحبو نروح سوا انا لوحدي مش معايا حد
مكانش عندي مشكله انو يجي اه مش كارهه وجوده بس مش حابه انو يكون موجود اوي يعني عايزه انا وسلمي نكون براحتنا كنت لسه هقوله مش عايزين نزعج حضرتك واخلع بشياكه بس سلمي اتسحبت من لسانها وقالتله _ ياريت والله نتشرف بحضرتك
_ كان نفسي ساعتها اديها علي دماغها والله بس سكت مشيت وراهم للمطعم وقعدنا وطلبنا الاكل
_سلمي كانت بتتكلم معاه في اي حاجه وكل حاجه وانا كنت بتفرج عليهم وساكته كنت حاسه ان في حاجه هتحصل ومستنياها تحصل
استأذنت منهم وقومت ادخل الحمام … وانا بغسل ايدي سمعت واحده بتتكلم مع واحد بصوت عالي نسبيا مكانش قصدي اسمعهم بس شكلها ونبرة صوتها خلوني اتلفت ليها وبالذات وانا بقفل الباب وانا خارجه لما قالت حمزه لازم يمضي بكره اوعي تسيبه يمشي من غير مايمضي علي البيع
كان قلبي بيدق جامد كالعاده لما بسمع اسمه بس حمدت ربنا اني خرجت استغفرت ربنا وبصيت للسما وشاورت علي قلبي ودعيت وقولت مش هيخرج من هنا بقي ولا ايه
لسه بتحرك لاقتني خبطت في حد
نزلت اجيب شنطتي اللي وقعت وانا بقول
_ انا اسفه والله انا بس كنت بكلم ربنا في موضوع كده
_ رحمه ….
الصوت دخل في قلبي والله كأن كل اللي كنت بعمله طول الايام اللي فاتت دا ضاع اول مانطق اسمي علي لسانه وبعدين دانا لسه بدعي يارب لسه بقول خرجه من قلبي مفيش ثواني الاقيه في وشي …. اكيد دي علامه…
كنت خايفه ارفع راسي لفوق اشوفه كنت حاسه اني بحلم كان نفسي اختفي اي حاجه تحصل تخليني امشي ومشوفهوش دموعي كانت هتنزل مجرد ماحسيت ان هو اللي بيتكلم انا فضلت ع الارض خايفه اقوم خايفه ارفع راسي لفوق ….
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية تشابك أرواح)
