رواية تزوجتها الفصل الأول 1 بقلم إسراء إبراهيم عبدالله
رواية تزوجتها الجزء الأول
رواية تزوجتها البارت الأول
رواية تزوجتها الحلقة الأولى
كانت واقفة بتشتري سمك ولكن سمعت شخص بيقول لصاحبه
ياعم أنا بس عايز أتجوز عشان تخدم أمي فمش فارق معايا هى مين؟ ولا فارق معايا شكلها ولا مستواها التعليمي غير تكون مطيعة ومحترمة يعني تقول حاضر ونعم، إنما شغل العند والبجاحة وقلة الأدب لأ مش هوافق
صاحبه: يعني قصدك تتجوز واحدة عشان تبقى خدامة لوالدتك
يعني هتخلي بنت الناس اللي أبوها وصاك عليها وقالك حافظ عليها وحطها في عنيك تبقى خدامة ليك ولأمك صح؟ حقيقي مصدوم من تفكيرك، وكمان رايح تتشارط دا أنت اللي بجح
جاد: يا عم اومال احنا بنتجوز ليه مش عشان تيجي تريح أمي وتشوف طلباتها وتعمل شغل البيت كله
وأمي تقعد مرتاحة وتقول ليها اعملي دي ودي ولو مش رضيت تعاقبها، ولا تطردها عند أهلها تتربى هناك وبعدين نبقى نجيبها ما هو دا يابني اللي بيحصل في كل البيوت بكرة لما تتجوز هتعرف إني صح، وبكرة تشوف حياتي، لو فكرت بس تبص لأمي أو تفتح بوقها وتعارضها يبقى ماتلزمنيش، أصل دي شغلتهم يابني يعني مش هنعمل احنا شغلهم، احنا علينا نشتغل عشان نجيبلهم فلوس وبس ومانعملش حاجة في البيت
صاحبه: تصدق إنك خسارة فيك البنت اللي رايح تخطبها يارب ما توافق عليك
يعني أنت ترضى تخلي أختك ينقال عليها كده وتتعامل معاملة الخدامة؟ ولا أسلوبك دا هتتحمله أصلا؟ دي لو قعدت معك شهر مش هتستحمل وهى اللي هتستغنى عنك وتبيعك يعني مش هتسيبك لغاية ما أنت تطردها، أصل مجرد التفكير في كلامك مقرف حقيقي والله، أنت أصلا فاهم الجواز غلط، وصدقني بيتك مش هيعمر لو فضلت كدا
جاد: ياعم وأنت مالك محموق كده ليه هو أنا جاي أخطب أختك دي واحدة لا نعرفها ولا حاجة، أما أنت راجل غريب بكرة يا أخويا نشوف معاملتك، دي هى اللي باين كدا هتمشي عليك وأنت تنقذ كلامها زي الحمار المسحوب تقوله يمشي يمين يمشي شمال يمشي لا هيبقى ليك كلمة ولا حزن اسكت أنت، أهم يا أخويا بكلامك دا بيحطونا خاتم في صوابعهم ويمشونا على كيفهم
فتدخلت نهى بعد لما كانت ودانها هتطلع نار من كلام جاد
وقالت بعصبية: حضرتك طالما مش عايزة زوجة وعايز
خدامة روح هات خدامة تعمل طلبات والدتك وطلباتك
وسيب بنت الناس اللي عايز تبهدلها ومش هتراعي مشاعرها سيبها معززة مكرمة في بيت أبوها لغاية ما يجي ليها اللي
يستاهلها ويعرف قيمتها ويقدرها ويعمل زي ما رسولنا الكريم قال لينا وزي ما ربنا أمر يا أستاذ يا للي معندكش ثقافة ولا تفكير
وأنت مفكر أصلا إن في واحدة هترضى تستحمل واحد زيك بالتفكير العقيم ده
وبعدين الزوجة مش بتروح بيت زوجها عشان تخدم عيلته ولا هو هى بس ليها تربية الأطفال
إنما تعمل شغل البيت ولوالدتك
عشان بنت أصول ومتربية وعملت ده من نفسها إنها بتساعد حماتها
وبتلبي طلبات زوجها رغم إنه ممكن يعملها لنفسه لكن شايفة إن زوجها بيجي تعبان من الشغل فبتقوم تعمله أكل وتكنس وتغسل رغم إن المفروض تساعدها في شغل البيت
إنما لما أنت تقول ليها اعملي دي بطريقة وحشة كأنها جارية فده هيقلل من قيميتها وهيحصل مشاكل
ولو مستحملتش فهتطلب الطلاق وده الأكيد في موقف زي ده لأنها مش متجوزة عشان تبقى خدامة
يبقى بلاها جواز وتقعد في بيت أبوها، والراجل كمان مش عيب إنه يشتغل في بيته ويساعد أمه أو أخته أو مراته أو بنته
إنما عايز حد يشتغل لوالدتك روح أنت اشتغل ليها اهو تبر بيها والجنة تحت أقدامهم وتدعيلك دعوة حلوة مش تروح تجيب بنت الناس تبهدلها بطريقتك دي، دا لو واحدة أصلا كلمت معك أسبوع في الخطوبة دي أصلا بتفكيرك العقيم دا، ربنا يهديك، روح اقرأ أحسنلك عن معاملة الرسول صلى الله عليه وسلم لزوجاته عشان فعلا بيتك يعمر ويبقى في استقرار
ووضعت حساب السمك قدام البياع ومشيت وجاد وصاحبه لسه مصدومين وباصين عليها لغاية ما اختفت من قدامهم
جاد: الكلام ده كان ليا يابني
صاحبه بذهول: اومال ليا بس شاطرة اهو ده الكلام اللي لازم تسمعه يا صاحبي كلامها صح
وزي ما النبي قال «استوصوا بالنساء خيرا»
طالما بقت زوجتك يبقى تعاملها بما يرضي الله ومعاملة حسنة وطيبة أصل هى مش جارية عندك، هى معها حق في كل كلمة، وكلامك أصلا كان مستفز جدا لأبعد الحدود يعني فمن حقها تقول كدا وأكتر كمان
بقلم إسراء إبراهيم عبدالله
وسابه ومشي هو كمان بيردد إنه ربنا يهديه ويفوق من تفكيره دا
وفضل يفكر جاد في الكلام ده وفي الآخر رجع بيته
قابلته والدته بابتسامة: وقالت إيه يا بني اتأخرت كده ليه وأنت بتجيب الطماطم ساعة بتجيبها
باس راس والدته: معلش أصل قابلت واحد صاحبي والكلام خدنا
وجه على باله نهى وتعبيرات وشها المتعصبة
وبعدين قال: تعالي يلا عشان هساعدك في تجهيز الغدا
والدته بذهول: أنت هتدخل تجهز معايا الغدا ده بجد ولا ايه دا أنت مكنتش راضي تجيب الطماطم
لولا إني تعبانة وفضلت اتحايل عليك، أنت سخن يابني ولا بدلوك في السوق ولا حصل إيه؟
جاد بابتسامة:ما أنا عايز أساعد ست الكل وأخد حسنات ولا مش عايزاني أبر والدتي، لا ياستي دا في حد فوقني كدا قبل ما أجي سبحان الله كأن ربنا حط الشخص دا في طريقي عشان أفوق وأغير تفكيري لحاجات كتير كنت معتقدها صح
والدته بابتسامة: ماشي يا حبيبي ربنا يحميك ويلا عشان نخلص بدري ونروح نشوف العروسة اللي جارتي قالتلي عليها، من كتر كلامها عليها وبتشكرلي فيها حبيتها قبل ما أشوفها بتمنى إنها تكون من نصيبك يابني بدعيلك دايما ربنا يرزقك ببنت الحلال يابني
جاد: ماشي ودخلوا يجهزوا الأكل، أنا كمان متحمس إني أشوفها
الساعة خمسة عصرا كان جاد ووالدته قاعدين مع أهل العروسة ومستنين العروسة تطلع ليهم، وكل شوية يبصوا عالباب
دخلت العروسة العروسة ومعها صنية العصير وجنبها أختها وصحبتها
بص العريس ولكن انصدم وقال في نفسه: إيه ده؟
ياترى إيه اللي هيحصل؟
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية تزوجتها)
