رواية تربية حواري الفصل العاشر 10 بقلم ولاء حامد
رواية تربية حواري الجزء العاشر
رواية تربية حواري البارت العاشر
رواية تربية حواري الحلقة العاشرة
تاني يوم حور صحيت وهي حاسه احساس غريب مش فاهمه ايه هو بس عاندت نفسها وقامت غسلت وشها وغيرت هدومها وخرجت صحيح علاقتها بجبل في حدود الاحترام بقالها شهور عمره متجاوز حدوده لكن حست ان لمعت عنيه غير كل مره بقالها فتره
حور بمشاغبه: صبح صبح يا هدهد الجناين
هدي بلويه بوق: مش ناويه يا بت تبطلي الاسم المعقرب ده اللي ما شوفتك في يوم تحترميني وتقوليلي يا أما زي باقي الخلق تصدقي بالله انا معرفت اربيكي وشكلي هاربيكي على كبر والشبشب يحكم بيني وبينك
حور برفعه حاجب ومنزله التاني: شبشب وأما وتربيني في جمله واحده وهزة رأسها يا خساره تربيتي فيكي يا هدى ما كانش العشم يا أم حور على اخر الزمن ال إيه هدى هتربيني هزلت عجبت لك يا زمن روحي يا هدى الله يباركلك ربي شعرك اللي وقع من عوامل الزمن
هدى بتبرقة عنين وشهقه: اربي شعري اللي وقع ليه شيفاني قرعه وكأي أم مصريه اصيله في ثانيه كانت ماسكه الشبشب
حور بخضه: اهدي يا حاجه وطلعت تجري
وهدى وراها :حاجه دلوقتي بقيت حاجه يا بنت عامر وديني يا حور لو طولتلك لقطعه عليك وانسره على جتتك نساير نساير اه يناري منك تعالي هنا بت
حور بضحك وشقاوه: لا يا ست يفتح الله الشبشب داه بلاستك ولسعته بنت كلب الله الغني بقى انا الاسطى حور اللي يتهزلها اتخن شنب فيك يا حارة المغربي يتمسكلي شبشب
كل داه داير وحور بتجري في البيت وهدى بتجري وراها
قعدت حور على السلم بتنهج: خلاص يا حاجه ماشاء الله صحتك عفيه ايه يا أما كنتي بتجري في مارثون
هدى بإستغراب: إيه
حور : ولا حاجه اخلصي بقى خليني انزل اروح شغلي يا وليه
هدى :وليه يا عديمة الربايه ولولو عليكي ساعه وفضوا اه يناري لو اطولك ادعي عليكي بإيه وانتي فيكي كل العبر
حور بترقصة حواجب: هدى الدعاء لو بيحوق مكنش خلى ولا مخلوق
هدى بكزه سنان وفي لحظة تهور حدفت الشبشب على حور
حور ميلت بسرعه وسمعت صوت تكسير وبصت وراها وضحكة بشماته: نشنت يا فالح اهو كسرتي زجاج الشراعه
هدى بندب: يارب هي البت دي تخليص ذنوب اعمل ايه اطلعله منك بسلالم
حور بمشاكسه: من هنا للسما السلالم بعيده الاسانسير اسرع يا هدى
ونزلت اترمت في حضن امها وكملوا ضحكهم وسابتها وطلعت علشان تروح ورشتها
جبل بقلوب بتطلع من عيونه: حور
حور اتلفتت وراها: خير يا استاذ جبل
جبل كش وشه تانى: استاذ ماشي يا حور احم احم انا كنت جاي بس علشان اقولك اني قولت لبابا وان شاء الله هانيجي نتقدم قريب أوي
حور قلبها دق بسرعه بس سيطرت على نفسها: اظن عارف طريق البيت يا أستاذ جبل يلا فوتك بعافيه
جبل بإبتسامه على وشه من الودن للودن: الله يعافيكي يا حوريتي احم احم
جبل لنفسه: ايه الهبل اللي انا بعمله داه في الشارع شكل هبلي على إيدك يا بنت عامر
وركب عربيته واتحرك على شغله
***************
حور وصلت الورشه وهي سرحانه ومش مركزه في حاجه
ديشا بزعيق: يا سطا حوي يا حوي مياك يا اسطى مش ميكزه والشغي واقف من غيك
(( يا اسطى حور يا اسطى حور مالك يا اسطى مش مركزه والشغل واقف من غيرك))
حور بملل: ديشا ابوس ايدك ترجم انا بتكلم معاك بيجيلي خلل في لساني كل الحروف عندك عامله حادثه في بعضها
ديشا بضحك: ويبنا انتي ما في منك اتنين يا اسطا عسى كده في نفسك وبتيفعي معنوياتي
(وربنا انتي ما في منك انتين يا اسطى وعسل كده في نفسك بترفعي معنوياتي))
حور : الله يجبر بخاطرك يلا نشوف اللي ورانا
لبست عفريته الشغل ونزلت من المكتب للورشة
حور بصدمه من منظر العربيه اللي قدامها: مين اللي قبل العربيه دي
ديشا: سبايس يا اسطا
حور : سبارس طيب ناديلي عليه
ديشا: من عنيا
دقايق وجه ديشا ومعاه شاب
سبارس: امؤري يا اسطى
حور: العربيه دي عايزه شغل من نار دي تقريبا عايزه عربيه جديده علشان تطلع عربيه أصلا
سبارس: عارف يا اسطى بس بردوا مش صعب عليكي ولا علينا داحنا تربيه المعلم عامر الله يرحمه وأجعص من دي تطلع عروسه بعون الله
حور: معاك بس دي هاتتكلف جامد
سبارس: منا اتفقت مع صاحبتها على 40 الف
حور بشهقه: بس انتا مجنون دي هاتغير بابين يمين غير الاكصدام وباب الكبوت غير وش السلندر الله اعلم فيه ايه احتمال تحل او تغير وش سلندر والله اعلم فيه ايه دي حتى مش هاينفع تترد ولا تترش يا اسطى يا تربيه المعلم عامر عارف قطع غيار دي قد إيه وتمنها إيه وخصوصا بعد رفع الدولار يا أسطى
سبارس: والحل إيه دلوقتي
حور: كلم صاحب العربيه قبل ما يتدب فيها مفك علشان تبقى عارفه التكلفه الصح ولو قبلت يبقى على بركه الله ولو رفضت يبقى يفتح الله تشوف غيرنا يا أبا داه لو حد مجنون قبل بيها
سبارس : تمام يا اسطى
نص ساعه ووصل ست باين عليها نايتي
البنت بغرور وتكبر: سوري يا … فين الاسطى اللي اسمه…. مش فاكره كلمني علشان العربيه
حور ببصه قرف من منظرها وبصتلها من فوق لتحت بنت مايعه لابسه جيبه ضديقه داخله فيها بالعافيه ولابسه تيشيرت على الكامر وحزام عريض وطرحه نص شعرها باين مع مكياج كامل برفان يخنق
حور : خير يا …. انتي مين
البنت: سوزي اسمي سوزي
حور بملل ومطت كلام : اممم خير يا سوووووزي
سوزي : حد كلمني علشان عربيتي
حور فهمت: اااااه انتي صاحبة العربيه المدشدشه اللي تحت لا كل خير مبدئيا كده سبارس اتفق قبل ما يعرف الشغل اللي في العربيه وقبل ما يعرف تمن قطع الغيار المطلوبه
سوزي :يعني ايه هو اتفق معايا على 40 ألف وانا وافقت لانه فعلا سعر لقطه
حور: لا يا مدام العربيه هاتتكلف 65 ألف دي هاتغير بابين واكصدام وكبوت غير وش سلندر دي لا هاينفع تترد على البارد ولا حتى تدخل فرن الصاج مقطوع دي طالعه من حادثه كبيره والاكيد انهم حشوا الصاج عشان يطلعوا اللي جواها لازمك يا مدام قبل ما يتدب فيها مفك آمين مش لازم شوفي حد تاني
سوزي: 65 ألف ليه هاتشتريلي عربيه جديده
حور: لا يا مدام دي عايزه عربيه جديده علشان تنفع دي في وشها بالصلاه على النبي ولا شهر كامل شغل اظن قبل ما تيجي عارفه ان هنا مفيش شغل طلسأ واجري الشغل هنا بيطلع على ابوه وبمشيئه المولى عز وجل قبل ما أمد ايدي بمفك فيها هاتدفعي نص التكلفه ولما تستلميها هاتدفعي النص الباقي آمين يا مدام ولا نقول يفتح الله
سوزي: ليه داه كله منا اوديها التوكيل اضمن
حور بسخريه: وماله يبقى يفتح الله دي عربيه اسكودا اوكتافيا موديل السنه يعني يوم ما يكرموكي هاتكعي 100 ألف بالميت او 120 يا مدام
سوزي بغضب: يبقا لما تخلص ابقى ادفع فلوس تصليحها مش هارمي فلوس على الأرض
حور بسخريه: اهدي يا مدام ليطقلك عرق انا هادوتك في السعر وهاجيبلها القطع الأصليه مش صيني ولا مضروب التوكيل اللي فوق تبعي يعني لو راحت لميكانيكي غيري هايقولك الفلوس لوكشه واحده قبل ما يندب فيها مفك
سوزي بغيظ من البنت اللي قدامها : اوكي اوكي بكره هابعتلك الفلوس
حور :تمام بمشيئة المولي عز وجل انهارده هاعمل كشف بطلبات الحلوه اللي تحت وابعت المخزن اجيبها وبكره نبداء نفك ونشتغل فيها سلام يا مدام
سوزي : باي
حور بغيظ: اوووف يا ساتر منك وليه ارشانه داه ايه المرار الطافح داه ونادت بأعلى صوت سبارس سبااارس
سبارس بنهجان: ايوه يا أسطى
حور: هات ورقه وقلم وورايا
سبارس بإستغراب :ورقه وقلم ليه يا اسطى
حور بملل: علشان نشوف الحلوه اللي لبستي فيها يا شبح دي في وشها شهر يا باشا
سبارس هرش في رأسه وضحك: قدها وقدود يا اسطى دانتي تربيه المعلم عامر الف رحمه ونور تنزل عليه
حور بإبتسامه: بتثبتني ياض ماشي يلا تعالي معايا خلينا نخلص
ساعه كامله حور بتعمل حور فحص شامل للعربيه
خلصت واترمت على الأرض من التعب: اوووف الله يخربيت النسوان وسواقه النسوان دي داخله في قطر يا ياأبا
سبارس بضحك: عندك حق يا اسطى انا نفسي اتخضيت من شكلها
حور بغيظ: اضحك اضحك يا اخويا منا الي هالبس في الاخر إلا بالحق ياض انتا مش امتحاناتك قربت
سبارس بملل هز رأسه
حور: أمته
سبارس: كمان شهر
حور: اممممم تمام اسبوعين وتأجز
سبارس بلهفه: مينفعش يا اسطى انا بذاكر في الورشه
حور بنظره غضب: اللي اقوله ميتكررش شغلك شغال ويوميتك شغاله الا مستقبلك ياض انتا كلها سنتين وتبقى مهندس فاهم اوعي تضيع تعبك
سبارس: فاهم يا اسطى بس الزمن داه اللي مش فاهم انا ورايا حمل على اكتافي ومش على اخر الزمن هاعيش صدقه انا منيش عويل يا اسطى عشان اقعد في البيت وانتي تبعتي يوميتي اه صحيح في كليه هندسه بس الناس مبترحمش محدش شايف الباشمهندس محمود الكل شايف سبارس صبي الميكانيكي
حور بتوضيح: مين قالك انك عويل أولا اجرتك ماشيه ولما ترجع هاتتخصم من يوميتك على طول السنه ياض انتا راجل بجد وابويا الله يرحمه ليه نظره متخيبش في الناس ثانيا كلها سنتين وتبقى الباشمهندس محمود رسمي ويبقى ليك شغلك الخاص خلي الكلمتين دول وشم في دماغك كلام الناس بيهد وقوه النفس تبني وتطلع فوق اوي الي بيستعر منك داه بياخد مصروف من بابي ومامي ميقدرش يشيل شيلتك ينخ تحت منها ويبرك متقوملهوش قومه وبكره لما تكبر هايتمني يسلم عليك ويتمحك فيك انك كان يعرفك في يوم يلا زي ما قولت اسبوعين وتأجز ويلا ابعت المخزن خليهم يجهزو للموكوسه دي
سبارس بضحك: في دينك دي موكوسه دي كلها شهر وتبقى أحلى عروسه تطلع من تحت ايدك يا أسطى
حور: إلهي تتوكس دي عايزه عمليه جراحيه مستعجله اصل الحاله حرجه يلا طريقك أخضر
مشي سبارس وحور مستغربه محمود بقاله 4 سنين شغال معاهم حتي قبل ما ابوها يموت من أيام ما كان لسه عوده أخضر ولسه شاب في ثانوي عام شال بيته وأخواته وأمه بعد وفاه ابوه راجل بجد غمضت عنيها بتعب واتنهدت تنهيده طوووويله اوووي من الوجع ورجعت تكمل شغلها وتشوف اللي وراها
****************
رجع جبل من الشغل وهو حاسم قراره ان حور ليه مش لغيره
همام بإبتسامه لئيمه: ايه يا جبل ناويت على ايه
جبل بشرود: هاتبقى ليا مش لغيري وانتا طبعا في ضهري يا ابو جبل ولا إيه
همام: في ضهرك بس بلاش تمشى وتنخ تحت كلام أمك كلام الحريم بيشيل الطين وخصوصا لو كان عينة أمك وغمزله فاهم
جبل هز رأسه: فاهم يا حاج
دخلت عليهم ثريا زي القضا المستعجل : متجمعين عند النبي بقالكم كام يوم واكلين ودان بعض خير
همام بسخريه: عليه الصلاه والسلام وداه يزعلك يا أم جبل ولا إيه
ثريا بشهقه: أم جبل ايه يا همام شكلك اخدت على طباع الناس هنا بدري اوي أسمي مدام ثريا بطل اسلوب الحواري داه
همام بسخريه: ليه وانتي ساكنه في جاردن سيتي محنا ساكنين في حاره بلاش جو سيد انح وخديجه شلح داه عيشي عيشه أهلك الله يسترك احنا كنا عايشين هنا قبل ما نسافر يعني انتي مش سليلة الملوك
ثريا بقرف: ايه حيلك حيلك داخل فيا زي القطر اللي من غير فرامل بقيت بيئه اوي ياريت بلاش نختلط بالناس هنا كتير ويلا جهزت الغدا
قعد الكل ومر الغدا مرور الكرام في صمت قاتل لا يقطعه سوي أصوات المعالق
خلص الاكل وقعد جبل وجمبه ابوه وقعدت ثريا وهي بتبصلهم بشك مريب
ثريا بهدوء : شكلك عايز تقول حاجه يا جبل صح ولا انا غلطانه
جبل بهدوء حذر: ايوه وياريت قبل ما توافقي او ترفضي تفكري في سعادتي وراحتي
ثريا بهدوء: شكلك عارف اني هارفض الموضوع علشان كده قولت المقدمه الطويله دي خير يا جبل سمعاك
بلع جبل ريقه بصعوبه: انا قررت اتجوز
ثريا بفرحه ودهشه: طيب الف مبروك وإيه اللي مخوفك داه حتى عروستك عندي بنت ناس وحسب ونسب يشرف بصحيح
جبل: لا انا اختارت عروستي واتمني انك تفكري في مصلحتي قبل أي حاجه
ثريا : ويا ترى مين بقى العروسه اللي عليها العين والكلام يا قلب أمك
جبل : حور عامر
ثريا بصريخ وفزع: مييين داه على جثتي والله العظيم لو فكرت فيها لا انتا ابني ولا اعرفك وقلبي وربي غضبانين عليك ليوم الدين يا جبل
جبل بمحايله: بحبها خطفت قلبي مش شايف من البنات غيرها مش عارف اشوفها غير مراتي وأم عيالي ارجوكي اوعي تكسري قلبي
ثريا بزعيق: والله داه لا يحصل ولا يكون هاتقول للناس ايه متجوز صبي ميكانيكي مفكرتش اهلها هايجهزوها منين هاتقدر تتعامل معاها ازاي بلسانها داه هاتقدمها لصحابك وأهلك ازاي هاتعيش معاها ازاي هاتقدر تسيبها تنزل تشتغل وسط الرجاله وتتعامل معاهم وترجعلك اخر اليوم مشحمه ومزيته هاتقدر فكرت في كل داه ولا لاء مراية الحب عميا يا جبل فكرت اذا كانت متعلمه ولا لاء ولو متعلمه اخرها دبلوم وانتا محاسب في بنك وهي صبي ميكانيكي
جبل بص لابوه بوجع: متقبلها بكل عيوبها بحبها بجد ولو على شغلها انا هاخليها تسيبه انا هاعلمها كل اللي ناقصها حور دهب اصلي بس عليه شويه تراب
ثريا: هي كلمه واحده لا يعني لا ومتحاولش لأنك عارفني
همام بزعيق: ليه كنتي راجل البيت وانا مش واخد بالي ابنك بيحبها ولو على عيوبها لو مقدرش يعدلها يبقى جرب وعرف واتعلم وأقسم بالله يا ثريا لو ما لميتي الدور لاكون مرجعك بيت اهلك واظن انتي أكتر واحده عارفه هما ممكن يعملوا فيكي إيه وابنك انا هاروح انا وهو يوم الجمعه اللي جايه نطلب إيد البنت من أهلها وهاتيجي معانا ولو كلمه او تصرف صدر منك معجبنيش هاتشوفي وش تتمني الموت قبل ما تشوفيه
واخد ابنه وخرج
ثريا بغضب وشر: والله يا بنت الكلب ما هسيبك ولأخلي حياتك جحيم ويا انا يا انتي يا تربيه الحواري
مر اليوم بسلام لكن نفوس تخفي بدخلها ما بين الحب والأمان والاثام
الصبح بدري صحي جبل وهو في كامل نشاطه والضحكه مرسومه على وشه من الودن للودن لبس وجهز نفسه وخرج
جبل بإبتسامه : صباح الفل
همام بإبتسامه: صباح الفل ايه الغزاله رايقه يعني
جبل بضحك: ايه تكره
همام بمشاغبه: لا مكرهش ربنا يديم عليك الفرح
ثريا بصتلهم بغضب ومردتش
جبل انتحنح وكمل انا هاكلم الست هدى أم حور علشان أبلغهم بميعادنا معاهم بعد بكره
همام: وماله يلا ربنا يسعدك
ثريا بسم وعقربه: اه الست مهي تربيه حرمه وياترى السنيورة مالهاش رجاله اااه نسيت انها مسترجله اصلا بس ربنا يستر من الحريم واللي ييجي من بيت مالهوش راجله
همام بزعيق: أقسم بالله لولا اني ما عايز اكسر فرحة ابنك كنت عرفتك الرد على كلامك يبقى ازاي بس اللي متعرفيشهوش ان ليها عمها وخلانها وكل راجل في الحاره يتمنى انه يكون معاهم ويساعدهم اصل ابوها الله يرحمه كان راجل ونعم الرجال وليه جميل على كل أهل الحاره
يلا يا جبل اتوكل على الله يا ابني
جبل هز رأسه بهدوء ونزل فضل واقف مستني حور
ومعداش وقت كتير وشافها قدامه بطلتها اللي بتخطف قلبه قبل عينه
جبل بإبتسامه: صباح الخير يا حور
حور برسميه: صباح النور
جبل : يا ترى عندكم قهوه
حور برفعه حاجب: نعم
جبل : اقصد إننا جايين نشرب قهوه عندكم وغمزلها بعينه
حور بتهرب: اظن عارف طريق باب البيت يلا فوتك بعافيه
قالتها وسابته ومشيت من قدامه
جبل اتأكد من انها مشيت خالص وطلع السلالم اللي قدام
البيت ورن الجرس
فتحت هدى الباب الحديد
هدى بإستغراب: اؤمر يا بني
جبل بهدوء: السلام عليكم يا ست هدى
هدى بنفس الاستغراب: وعليكم السلام ورحمة الله وبركاته يا ابني اؤمر
جبل: انا جبل ابن الحاج همام
هدى: اهلا وسهلا خير يا ابني
جبل : كنت عايز أبلغ حضرتك اني جاي انا وبابا وماما يوم الجمعه بعد صلاه العشاء ان شاءالله
هدى: تأنس وتنور يا إبني
جبل: شكرا يا ست هدى يلا سلام عليكم
هدى :وعليكم السلام يا ابني
قفلت هدى الباب ومطت بوقها : اممممم يا ترى وراك ايه يا ابن ثريا ولو ان الفوله باينه ومسكت التليفون ورنت على حور
حور بصت على التليفون وبضحكه: ايه يا هدهد الجناين وحشتك ولا ايه يا وليه دانا لسه سيباكي من ربع ساعه يا اختي
هدي بضحك: ماشي يا بنت عامر لا يا أختي موحشتنيش منتي في وشي زي النسناسين التؤام
حور بشهقه: نسناسين ماااشي يا هدى خير اتصالك مش لله وللوطن
هدى: فعلا جبل جه وقالي انه جايب ابوه وأمه يوم الجمعه بعد العشاء ايه قولك
حور بهدوء: قالي وقولتله اظن عارف طريق الباب
هدى: جدعه يا بت على العموم انا هابلغ خالك راشد وخالك قطب علشان يبقوا معانا مينفعش يدخلوا والبيت مفيهوش راجل والله يا بنتي لو كان الود بينا وبين عمك موجود كنت بعتله خبر
حور: معلش يا أما ربنا يصلح الحال بلغيهم انا كنت بفكر في كده بس قولت لما اجي من الشغل
هدى: تمام يا بنتي يلا ربنا يكتبك في كل خطوه سلامه
قفلت المكالمه بهدوء
عند ثريا :اااه يا ناري بقى بنت الكلب دي تعلم عليا وتاخد الواد تحت باطها وانتا يا همام الكلب مطاوعهم مااشي وسكتت شويه وضحك بشر ايوووه مفيش غير ………؟؟
يا ترى ثريا ناويه على ايه والأيام مخبيه ايه تاني
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية تربية حواري)
