رواية تحت التهديد الفصل الرابع 4 بقلم منة ممدوح

_متأكدة إن سليم هو اللي طلب منك كده مش حد تاني؟

قالت والدته الكلام ده وهي واقفة قدامي مربعة إيديها ورافعة حاجبها بتنقل نظراتها بيني وبين سميرة وكإنها شاكة إن ليها يد في الموضوع، ارتبكت واترعشت وأنا ببص بطرف عيني لسميرة اللي كانت بتهددني بنظراتها إني لازم أقول اللي حفظتهولي وإلا كل حاجة هتتقلب عليا، فدمعت من الموقف الوحش اللي اتحطيت فيه من شوية وازدادت رجفة جسمي.

_أيوه، هو اللي قالي أروحله بالليل والكل نايم، وكان بيقولي إنه بيحبني وعايز يتجوزني بس خايف منكوا لترفضوا

قولتها وانهارت في البكاء، بشكل خلاها تصدقني من حالة الهيستريا اللي كنت فيها، ولكني كنت في حالة هيستريا من الوضع اللي اتحطيت فيه ومن الموقف اللي اتسببت لسليم فيه بعد ما شوفت نتايج اللي عملناه أنا وسميرة، مكنتش مدركة عواقب الطريق اللي مشيت فيه، ابتسمت سميرة بانتشاء وهي شايفة خطتها ماشية زي ما هي عايزة بالظبط.

أما والدة سليم فرفعت إيديها على دماغها وحست بصداع رهيب من تصرفات ابنها الطايشة.

اتلفتت ناحيته وكان واقف على جنب ساند على الحيطة بيتابعني بنظرات كارهة.

خرجت والدته من الاوضة بعد ما قالت للكل يستنوا برا عشان تعرف تستجوبني من غير دوشة.

وقبل ما تخرج بصتله بنظرة مليانة عتاب فقابلها هو بجمود وكإن مش فارق معاه أي حاجة غير إن المهزلة دي تخلص بس.

وبمجرد ما خرجت سمعت صوت تسقيف من ورايا، اتلفت ولقيته بيقرب بوش جامد تمامًا وبيسقف ببرود رهيب، بصتله بعيون حمر من كتر العياط..

_هايلة

ممثلة هايلة والله، عاجبني المواهب المتعددة اللي عندك دي يا منة، ده أنا نفسي قربت أصدقك!

كانت شفايفي بتترعش ومش عارفة أرد عليه، أما سميرة ضحكت وخبطتني على كتفي بفخر وعيون بتلمع بجشع

_شاطرة يا بت، جدعة تربيتي

_عاجبك الفضيحة اللي حصلت دي يا سميرة؟

_مكانتش هتبقى زي الفضيحة اللي هتحصلك لما يعرفوا اللي عملته يا ابن الشهاوي

سكت تمامًا وبصلها بكره، فلحظة لقيت الباب بيتفتح وبابا بيدخل وملامح وشه متبشرش بالخير

وبدون تردد قرّب مني وضربني بالقلم بعنف وقعت على الأرض بين إيدين سليم بسببه

_لا أنتِ بنتي ولا أنا أعرفك

وخرج من الأوضة من غير كلام زيادة

بكيت مكاني، فحسيت بسليم بيرفعني بحنية.

رغم اللي عملته إلا إنه مهانش عليه يشوفني في الحالة دي

كان هو الإيد الوحيدة اللي اتمدتلي في الموقف ده رغم اللي اتسببتله فيه كمان!

بصتله بدموع فبادلني هو بنظرة مليانة عتاب، وبعد عني وخرج لحد ما المأذون ييجي..